Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Mɛi ni Egbɔlɔ lɛ Baatsɔmɔ Oblahii Ekoŋŋ

Mɛi ni Egbɔlɔ lɛ Baatsɔmɔ Oblahii Ekoŋŋ

 Tsi Obɛŋkɛ Nyɔŋmɔ

Mɛi ni Egbɔlɔ lɛ Baatsɔmɔ Oblahii Ekoŋŋ

WƆTEŊ namɔ sumɔɔ ni egbɔ—ehewolo nɔ akũa, ehiŋmɛii afee sulii, ekanu nii jogbaŋŋ, ní enaji amli agbɔjɔ? Ekolɛ obaabi ohe akɛ, ‘Mɛni hewɔ Nyɔŋmɔ bɔ wɔ koni wɔhi shi akɛ oblahii kɛ oblayei ni yɔɔ gbɔmɔtsoŋ hewalɛ kpakpa, ni lɛ nɔŋŋ eŋmɛ gbɛ ni gbɔlɛ haa wɔnaa nɔ lɛ?’ Miishɛɛ sane ji akɛ, jeee nɛkɛ Nyɔŋmɔ to eyiŋ eha wɔ. Ejɛ suɔmɔ mli eto gbɛjianɔ koni ekɛfo gbɔlɛ sɛɛ! Kadimɔ nɔ ni akɛɛ blematsɛ Hiob yɛ Hiob 33:24, 25 lɛ.

Susumɔ shihilɛ ni Hiob, ni ji nuu anɔkwafo ni Yehowa sumɔɔ lɛ waa lɛ kɛkpe lɛ he okwɛ. Hiob leee kwraa akɛ asomoaŋ Satan ewie eshi anɔkwa ni eyeɔ Nyɔŋmɔ lɛ, ni ekɛɛ akɛ Hiob miisɔmɔ Nyɔŋmɔ yɛ nibii kpakpai ni Nyɔŋmɔ feɔ ehaa lɛ lɛ pɛ ahewɔ. Akɛni Yehowa yɛ hewalɛ ni ekɛaasaa nɔ fɛɛ nɔ ni efite, ni eyɛ hekɛnɔfɔɔ hu yɛ Hiob mli hewɔ lɛ, eŋmɛ Satan gbɛ koni eka Hiob. Kɛkɛ ni Satan ha “asanei ní jaraa tsɛ̃rɛ̃ Hiob kɛjɛ enaneshi aahu kɛyashi eyiteŋ pampam.” (Hiob 2:7) Hiob heloo wo gɔ̃gɔ̃mii, efee faladokui, edĩ, ni ekpɔlɔ yɛ ehe. (Hiob 7:5; 30:17, 30) Feemɔ bɔ ni epiŋ eha lɛ he mfoniri okwɛ. Ni kɛlɛ, Hiob tee nɔ eye anɔkwa ni ekɛɛ akɛ: “Mibemyeli lɛ miŋmɛŋ he kɛyashi beyinɔ ní magbo.”—Hiob 27:5.

Shi Hiob eyafeee ni ahi kwraa yɛ sane ko he. Beni enu he akɛ ebɛŋkɛ gbele etã lɛ, ekɛ ejwɛŋmɔ ma ebemyeli nɔ tuutu, ni “ebu ehe jalɔ fe Nyɔŋmɔ.” (Hiob 32:2) Nyɔŋmɔ tsɔ Elihu nɔ ekã Hiob. Shi Elihu kɛ shɛɛ sane ni ŋɔɔ ni jɛ Nyɔŋmɔ ŋɔɔ nɛɛ hu ha Hiob: “Jiemɔ [Hiob] kɛjɛ laajemɔ bu [gbonyobu] lɛŋ yaa mli; miná kpatamɔ nii lɛ. No lɛ eheloo lɛ aaatsɔ efɔ́ fe gbekɛ nɔ̃; eeeku sɛɛ eeetsɔ oblanyo ekoŋŋ.” (Hiob 33:24, 25) Ekã shi faŋŋ akɛ wiemɔi nɛɛ ha Hiob ná hiɛnɔkamɔ. Ekaŋ he enaŋ nɔ kɛyashi ebaagbo. Kɛ́ Hiob tsake etsui lɛ, Nyɔŋmɔ baakpɛlɛ kpatamɔnii ni akɛbaaha yɛ ehewɔ lɛ nɔ, ni ebaaha enɔnaa lɛ sɛɛ afo. *

Hiob ba ehe shi ni ekpɛlɛ kãmɔ lɛ nɔ, ni etsake etsui. (Hiob 42:6) Ekã shi faŋŋ akɛ Yehowa kpɛlɛ kpatamɔnii ni aŋɔha yɛ Hiob hewɔ lɛ nɔ, ni eha no tsĩ etɔmɔ lɛ nɔ, ni no ha Nyɔŋmɔ kɛ lɛ kpãta ni ejuro lɛ. Yehowa “jɔɔ Hiob sɛɛkpee be lɛ fe etsutsu be lɛ.” (Hiob 42:12-17) Kwɛ bɔ ni Hiob tsui baanyɔ emli eha beni ehela lɛ fɛɛ tã, ní egbɔmɔtso lɛ fee “efɔ́ fe gbekɛ nɔ̃,” ní ajɔɔ lɛ kɛ nibii krokomɛi hu lɛ!

Kpatamɔnii ni Nyɔŋmɔ kpɛlɛ nɔ yɛ Hiob hewɔ lɛ he sɛɛnamɔ lɛ eyaaa shɔŋŋ, ejaakɛ no haaa Hiob aye emuu, ni sɛɛ mli hu lɛ egbo. Wɔyɛ kpatamɔnɔ ko ni hi kwraa fe no. Yehowa jɛ suɔmɔ mli eŋɔ e-Bi Yesu eha akɛ kpatamɔnɔ yɛ wɔhewɔ. (Mateo 20:28; Yohane 3:16) Mɛi fɛɛ ni baaná kpatamɔnɔ nɛɛ mli hemɔkɛyeli lɛ baahi shi kɛya naanɔ yɛ paradeiso mli yɛ shikpɔŋ lɛ nɔ wɔsɛɛ. Nyɔŋmɔ haŋ adesai anɔkwafoi agbɔlɔ yɛ nakai jeŋ hee ni baaba lɛ mli. Bɔɔ mɔdɛŋ ni okase gbɛ nɔ ni oootsɔ ona be ni mɛi ni egbɔlɔ lɛ ‘aheloo lɛ baatsɔ efɔ́ fe gbekɛ nɔ̃’ lɛ he nii babaoo.

[Shishigbɛ niŋmaa]

^ kk. 5 Hela wiemɔ ni atsɔɔ shishi akɛ “kpatamɔnii” yɛ ŋmalɛ nɛɛ mli lɛ shishi ji “aŋɔtsĩ nɔ.” Ekã shi faŋŋ akɛ kooloo ni akɛbaashã afɔle yɛ Hiob sane lɛ mli lɛ ji kpatamɔnii ni akɛbaaha yɛ ehewɔ lɛ, ni Nyɔŋmɔ baaha akɛjie loo akɛtsĩ Hiob esha lɛ nɔ.—Hiob 1:5.