Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Ani anɔkwa Kristofoi fɛɛ baaya ŋwɛi?

Ani anɔkwa Kristofoi fɛɛ baaya ŋwɛi?

 Saji Ni Mɛi Ni Kaneɔ Lɛ Biɔ . . .

Ani anɔkwa Kristofoi fɛɛ baaya ŋwɛi?

▪ Mɛi babaoo ekane Yesu wiemɔi ni shɛjeɔ mɔ mii nɛɛ: ‘Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.’ (Yohane 3:16) Ani Yesu miitsɔɔ akɛ mɛi fɛɛ ni jáa e-Tsɛ Yehowa Nyɔŋmɔ yɛ anɔkwayeli mli lɛ baaya ŋwɛi koni amɛyahi jɛmɛ kɛya naanɔ yɛ miishɛɛ shihilɛ mli?

Kadimɔ Yesu wiemɔ ni haa mɔ susuɔ nii ahe nɛɛ: “Mɔ ko ekwɔko kɛyako ŋwɛi, akɛ ja mɔ ni jɛ ŋwɛi kpeleke shi lɛ, gbɔmɔbi lɛ.” (Yohane 3:13) Enɛ tsɔɔ akɛ Nyɔŋmɔ jálɔi anɔkwafoi ni hi shi yɛ blema, tamɔ Noa, Abraham, Mose, kɛ David eyaaa ŋwɛi. (Bɔfoi lɛ Asaji 2:34) Belɛ, nɛgbɛ amɛtee mɔ? Yɛ kukufoo mli lɛ: Anɔkwafoi ni hi shi yɛ blema lɛ yɛ gbohiiabui amli, amɛmiiwɔ yɛ gbele mli, amɛleee nɔ ko nɔ ko, amɛmiimɛ gbohiiashitee.—Jajelɔ 9:5, 6; Bɔfoi lɛ Asaji 24:15.

Yesu nɔŋŋ hu ji mɔ klɛŋklɛŋ ni wie akɛ kɛ́ mɛi komɛi gboi lɛ amɛbaaya ŋwɛi. Ekɛɛ ebɔfoi lɛ akɛ ebaasaa gbɛhe eto amɛ yɛ ŋwɛi. (Yohane 14:2, 3) Sane nɛɛ bafee nɔ ko hee kɛha Nyɔŋmɔ webii lɛ. Sɛɛ mli lɛ bɔfo Paulo tsɔɔ mli akɛ beni Yesu gbo ni atee lɛ shi kɛtee ŋwɛi lɛ, Yesu ‘je gbɛ hee ni hiɛ kã eha ekaselɔi lɛ’—mɔ ko mɔ ko efako nakai gbɛ lɛ pɛŋ.—Hebribii 10:19, 20.

Ani enɛ tsɔɔ akɛ kɛjɛ nakai beaŋ kɛbaa lɛ anɔkwafoi fɛɛ baaya ŋwɛi? Dabi, ejaakɛ nitsumɔ ko hewɔ abaatee adesai komɛi ashi kɛya ŋwɛi lɛ. Gbi gbɛkɛ dani enɔ jetsɛremɔ lɛ abaagbe Yesu lɛ, ekɛɛ ebɔfoi lɛ akɛ ‘amɛaatara sɛii anɔ ni amɛkojo’ yɛ eŋwɛi Maŋtsɛyeli lɛ mli. No hewɔ lɛ, nitsumɔ ni amɛbaatsu ji akɛ amɛbaafata Yesu he kɛye nɔ yɛ ŋwɛi.—Luka 22:28-30.

Abaaha adesai krokomɛi hu afata bɔfoi lɛ ahe kɛtsu nitsumɔ ni nɔ bɛ nɛɛ. Ajie ninaa ko kpo atsɔɔ bɔfo Yohane, ni ena kuu ko ni atee amɛ shi fata Yesu he yɛ ŋwɛi, ni awie amɛhe akɛ amɛji ‘maŋtsɛmɛi kɛ osɔfoi ni baaye shikpɔŋ lɛ nɔ.’ (Kpojiemɔ 3:21; 5:10) Amɛyi enyiɛ? Mɛi fioo ko pɛ yeɔ nɔ yɛ nɔyeli fɛɛ nɔyeli mli. Nakai nɔŋŋ hu eji yɛ ŋwɛi Maŋtsɛyeli nɛɛ mli. Mɛi 144,000 ni “ahé kɛjɛ gbɔmɛi ateŋ” baafata Yesu, ni ji Nyɔŋmɔ Toobi lɛ he kɛye nɔ.—Kpojiemɔ 14:1, 4, 5.

Eji anɔkwale akɛ, kɛ́ akɛ mɛi 144,000 to anɔkwafoi ni hi shi yɛ blema kɛ mɛi ni yɔɔ ŋmɛnɛ lɛ ayibɔ he lɛ, mɛi 144,000 lɛ ayi faaa kwraa. Shishinumɔ yɛ enɛ mli, ejaakɛ nitsumɔ pɔtɛɛ ko ni yɔɔ krɔŋŋ tsumɔ hewɔ ateɔ mɛi 144,000 lɛ ashi kɛyaa ŋwɛi lɛ. Kɛ́ ootao oma tsu lɛ, ani okɛ nitsumɔ lɛ baawo tsumalɔi fɛɛ ni yɔɔ okutso lɛ mli lɛ adɛŋ? Dabi. Okɛbaawo mɛi ayibɔ pɛ ni he hiaa kɛha nitsumɔ lɛ adɛŋ. Nakai nɔŋŋ hu jeee anɔkwafoi fɛɛ Nyɔŋmɔ ehala akɛ amɛná hegbɛ ni nɔ bɛ akɛ amɛfata Kristo he kɛye nɔ yɛ ŋwɛi lɛ.

Ŋwɛi maŋtsɛyeli nɛɛ baaha Nyɔŋmɔ shishijee yiŋtoo kɛha adesai lɛ aba mli. Yesu kɛ mɛi 144,000 ni baafata ehe kɛye nɔ yɛ ŋwɛi lɛ baakwɛ koni afee shikpɔŋ lɛ fɛɛ paradeiso, ni anɔkwafoi babaoo ni amrɔ nɛɛ anyɛŋ atsɔɔ amɛyibɔ lɛ baahi nɔ kɛya naanɔ yɛ miishɛɛ mli. (Yesaia 45:18; Kpojiemɔ 21:3, 4) Mɛi ni baafata mɛi nɛɛ ahe ji mɛi ni Nyɔŋmɔ baakai amɛ ní ebaatee amɛ shi lɛ.—Yohane 5:28, 29.

Yehowa jálɔi anɔkwafoi lɛ ateŋ mɔ fɛɛ mɔ—mɛi ni hi shi yɛ blema kɛ mɛi ni yɔɔ ŋmɛnɛ lɛ—baanyɛ aná naanɔ wala ni ji nikeenii ni nɔ bɛ lɛ. (Romabii 6:23) Amɛteŋ mɛi fioo baaya ŋwɛi koni amɛyatsu nitsumɔ krɛdɛɛ ko, ni tsiimɔ baaná wala yɛ paradeiso yɛ shikpɔŋ muu lɛ fɛɛ nɔ.