Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Mɛni Hewɔ Esa Akɛ Wɔsɔle Yɛ Yesu Gbɛi Amli?

Mɛni Hewɔ Esa Akɛ Wɔsɔle Yɛ Yesu Gbɛi Amli?

 Mɛni Hewɔ Esa Akɛ Wɔsɔle Yɛ Yesu Gbɛi Amli?

YESU tsɔɔ mɛi nibii ni kɔɔ sɔlemɔ he yɛ bei babaoo mli. Yudafoi ajamɔŋ hiɛnyiɛlɔi ni hi shi yɛ Yesu beaŋ lɛ damɔɔ “gbɛjegbɛi akoji lɛ anaa” amɛsɔleɔ. Mɛni hewɔ amɛfeɔ nakai? “Koni mɛi ana amɛ.” Eyɛ faŋŋ akɛ amɛmiitao ni mɛi ana amɛ akɛ amɛjáa Nyɔŋmɔ waa diɛŋtsɛ. Amɛteŋ mɛi babaoo kɛɔ sɔlemɔi kakadaji ni amɛtiɔ wiemɔ kome too lɛ nɔŋŋ mli shii abɔ, oookɛɛ nɔ ni ‘wiemɔi babaoo’ ni amɛkɛtsuɔ nii lɛ baaha abo amɛsɔlemɔ lɛ toi. (Mateo 6:5-8) Yesu wie eshi nifeemɔi ni tamɔ enɛɛmɛi akɛ sɛɛnamɔ ko bɛ he, yɛ no najiaŋ lɛ eye ebua mɛi ni hiɛ tsui ni ja lɛ koni amɛle nɔ ni esaaa akɛ amɛkɛɔ kɛji amɛmiisɔle. Shi kɛlɛ, jeee bɔ ni esaaa akɛ asɔleɔ lɛ pɛ kɛkɛ etsɔɔ.

Yesu tsɔɔ mli akɛ esa akɛ wɔha wɔsɔlemɔi lɛ atsɔɔ akɛ wɔmiisumɔ ni Nyɔŋmɔ gbɛi lɛ he atse, e-Maŋtsɛyeli lɛ aba, ni agbɛnɛ hu afee Esuɔmɔnaa nii. Yesu tsɔɔ hu akɛ ehi jogbaŋŋ akɛ wɔɔbi Nyɔŋmɔ koni eye ebua wɔ kɛtsu wɔshihilɛ mli hiamɔ nii ahe nii. (Mateo 6:9-13; Luka 11:2-4) Yesu kɛ nɔkwɛmɔnii hu tsu nii ni ekɛtsɔɔ akɛ kɛji abaabo wɔsɔlemɔi atoi lɛ, no lɛ esa akɛ wɔya nɔ wɔsɔle daa, wɔná hemɔkɛyeli, ni wɔba wɔhe shi. (Luka 11:5-13; 18:1-14) Ni etsɔ bɔ ni lɛ diɛŋtsɛ ehi shi eha lɛ nɔ eha mɛi nu nɔ ni etsɔɔ amɛ lɛ shishi.—Mateo 14:23; Marko 1:35.

Ŋwanejee ko bɛ he akɛ Yesu nitsɔɔmɔ nɛɛ ye ebua ekaselɔi lɛ ni eha amɛsɔlemɔi bafee nɔ ni sa jogbaŋŋ. Kɛlɛ, Yesu mɛ kɛyashi naagbee gbɛkɛ ni eye yɛ shikpɔŋ lɛ nɔ lɛ nɔ dani ekɛ nikasemɔ ni he hiaa fe fɛɛ ni kɔɔ sɔlemɔ he lɛ ha ekaselɔi lɛ.

 “Tsakemɔ ko ni Sa Kadimɔ ni Afee yɛ Sɔlemɔ He”

Yesu kɛ naagbee gbɛkɛ ni eye yɛ shikpɔŋ lɛ nɔ lɛ tsu nii ni ekɛwo ebɔfoi anɔkwafoi lɛ hewalɛ. Nakai bei lɛ bafee be ni sa ni ekɛbaatsɔɔ amɛ nɔ ko hee. Yesu kɛɛ akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa tsɛ lɛ ŋɔɔ, akɛ ja etsɔ minɔ.” Yɛ sɛɛ mli lɛ, ewo amɛ shi kɛ wiemɔi ni woɔ mɔ hewalɛ nɛɛ akɛ: “Nɔ fɛɛ nɔ ni nyɛaakpa he fai yɛ migbɛi anɔ lɛ, no mafee, koni tsɛ lɛ hiɛ aba nyam yɛ bi lɛ mli. Kɛji nyɛkpa nɔ ko he fai yɛ migbɛi anɔ lɛ, mafee.” Beni ekɛ esanegbaa lɛ baa naagbee lɛ, ekɛɛ akɛ: “Kɛbashi be nɛɛ lɛ nyɛkpako nɔ ko he fai yɛ migbɛi anɔ; nyɛkpaa fai, ni nyɛaaná, koni nyɛmiishɛɛ lɛ ayi.”—Yohane 14:6, 13, 14; 16:24.

Wiemɔi nɛɛ sa kadimɔ waa. Biblia lɛ he wiemɔ komekomei ashishitsɔɔmɔ wolo ko tsɔɔ mli akɛ enɛ ji “tsakemɔ ko ni sa kadimɔ ni afee yɛ sɔlemɔ he.” Yesu etsɔɔɔ akɛ yɛ nɔ najiaŋ ni abaasɔle aha Nyɔŋmɔ moŋ lɛ, esa akɛ asɔle aha lɛ. Yɛ no najiaŋ lɛ, eeha ale gbɛ hee ko ni esa akɛ atsɔ nɔ abɛŋkɛ Yehowa Nyɔŋmɔ yɛ sɔlemɔ mli.

Yɛ anɔkwale mli lɛ, Nyɔŋmɔ etee enɔ ebo enɔkwa tsuji lɛ asɔlemɔi atoi yɛ bei fɛɛ mli. (1 Samuel 1:9-19; Lala 65:3) Shi kɛlɛ, kɛjɛ beni Israel batsɔ maŋ ni Nyɔŋmɔ kɛ amɛ efee kpaŋmɔ lɛ, ehe bahia ni mɛi ni sumɔɔ ni abo amɛsɔlemɔi atoi lɛ ayɔse akɛ Israel ji maŋ ni Nyɔŋmɔ ehala. Ni sɛɛ mli yɛ Salomo beaŋ lɛ, ehe bahia ni amɛyɔse akɛ sɔlemɔwe lɛ ji he ni Nyɔŋmɔ ehala kɛha afɔleshãa. (5 Mose 9:29; 2 Kronika 6:32, 33) Kɛlɛ, nɛkɛ jamɔ he gbɛjianɔtoo nɛɛ ji be kukuoo ko mli nifeemɔ kɛkɛ. Taakɛ bɔfo Paulo ŋma lɛ, Mla ni akɛha Israelbii lɛ kɛ afɔle ni ashãa yɛ sɔlemɔwe lɛ feɔ ‘nii kpakpai ni baaba lɛ ahe mfoniri, shi jeee nibii lɛ asubaŋ diɛŋtsɛ.’ (Hebribii 10:1, 2) Esa akɛ nɔ̃ diɛŋtsɛ ni afee he mfoniri lɛ abaye mfonirifeemɔŋ nibii lɛ anajiaŋ. (Kolosebii 2:17) Kɛjɛ afi 33 Ŋ.B. kɛbaa nɛɛ, ehe ehiaaa dɔŋŋ ni aŋkro ko aye Mose Mla lɛ nɔ dani ená ekɛ Yehowa teŋ wekukpãa. Yɛ no najiaŋ lɛ, enɛ damɔ toiboo ni abaafee aha mɔ ni Mla lɛ gbalaa jwɛŋmɔ kɛyaa enɔ, ni ji Kristo Yesu lɛ nɔ.—Yohane 15:14-16; Galatabii 3:24, 25.

Gbɛi ‘ni Ta Gbɛi Krokomɛi Fɛɛ Anɔ’

Yesu ha ale gbɛ ko ni nɔ kwɔ ni atsɔɔ nɔ abɛŋkɛɔ Yehowa, ni ejie ehe kpo akɛ naanyo kpakpa, mɔ ni haa Nyɔŋmɔ boɔ wɔsɔlemɔi atoi ni ehaa hetoo. Mɛni haa Yesu feɔ nakai kɛhaa wɔ?

Akɛni afɔ wɔ fɛɛ yɛ esha mli hewɔ lɛ, nɔ ko kwraa bɛ ni wɔbaatsu loo afɔle ko afɔle ko kwraa bɛ ni wɔbaashã ni baanyɛ atsumɔ wɔhe eshai lɛ, loo ni eha wɔná wɔkɛ wɔ-Nyɔŋmɔ ni yɔɔ krɔŋŋ ni ji Yehowa lɛ teŋ wekukpãa. (Romabii 3:20, 24; Hebribii 1:3, 4) Kɛlɛ, Yesu ni ji adesa ni eye emuu  lɛ kɛ ewala shã afɔle kɛwo adesai ni abaanyɛ akpɔ̃ amɛ lɛ ahe eshai ahe nyɔmɔ. (Romabii 5:12, 18, 19) Amrɔ nɛɛ hegbɛ yɛ kɛha mɛi fɛɛ ni sumɔɔ ni akɛ amɛhe eshai ake amɛ lɛ akɛ, amɛbaanyɛ amɛná shidaamɔ kpakpa yɛ Yehowa hiɛ, ní amɛná “ekãa” kɛbɛŋkɛ Nyɔŋmɔ—shi ja amɛjie hemɔkɛyeli kpo yɛ Yesu afɔleshaa lɛ mli ni amɛsɔle yɛ egbɛi amli dã.—Efesobii 3:11, 12.

Kɛ wɔsɔle yɛ Yesu gbɛi amli lɛ, no tsɔɔ akɛ wɔmiijie hemɔkɛyeli kpo yɛ kɛ, hooo kwraa lɛ gbɛfaŋnɔ srɔtoi etɛ ni Yesu tsuɔ he nii yɛ Nyɔŋmɔ yiŋtoo lɛ he nitsumɔ mli lɛ mli, ni nomɛi ji: (1) Lɛ ji “Nyɔŋmɔ toobi lɛ” ní adamɔɔ efɔleshaa lɛ nɔ akɛ adesai ahe eshai keɔ amɛ lɛ. (2) Yehowa tée lɛ shi, ni amrɔ nɛɛ eesɔmɔ akɛ ‘osɔfonukpa’ ni miitsu sɛɛnamɔi ni yɔɔ kpɔmɔnɔ lɛ he lɛ he nii. (3) Lɛ pɛ ji “gbɛ lɛ” ni atsɔɔ nɔ abɛŋkɛɔ Yehowa yɛ sɔlemɔ mli lɛ.—Yohane 1:29; 14:6; Hebribii 4:14, 15.

Kɛ́ wɔsɔle yɛ Yesu gbɛi amli lɛ, no tsɔɔ akɛ wɔkɛ woo miiha lɛ. Woo ni tamɔ nakai lɛ sa jogbaŋŋ, ejaakɛ eji Yehowa suɔmɔnaa nii akɛ ‘nakutso fɛɛ nakutso akula shi yɛ Yesu gbɛi lɛ amli, ní lilɛi fɛɛ lilɛi agbá mli kpoo ákɛ Yesu Kristo ji Nuŋtsɔ kɛwo tsɛ Nyɔŋmɔ lɛ hiɛ nyam.’ (Filipibii 2:10, 11) Shi nɔ ni fe fɛɛ lɛ, kɛ́ wɔsɔle yɛ Yesu gbɛi amli lɛ, ewoɔ Yehowa, mɔ ni kɛ e-Bi lɛ ha yɛ wɔhilɛ-kɛhamɔ hewɔ lɛ hiɛ nyam.—Yohane 3:16.

Bɔni afee ni wɔnyɛ wɔnu hegbɛ kpele ni Yesu yɔɔ lɛ shishi jogbaŋŋ lɛ, Biblia lɛ kɛ sabalai srɔtoi tsɛɔ Yesu ni ekɛtsɔɔ hegbɛ ni eyɔɔ lɛ mli. Enɛɛmɛi yeɔ ebuaa wɔ ni wɔnuɔ jɔɔmɔi babaoo ni wɔnine shɛɔ nɔ yɛ nɔ ni Yesu efee eha wɔ, nɔ ni efeɔ amrɔ nɛɛ, kɛ nɔ ni ebaafee eha wɔ yɛ wɔsɛɛ be mli lɛ shishi jogbaŋŋ. (Kwɛmɔ akrabatsa ni ji “Hegbɛ Kpele ni Yesu Yɔɔ” lɛ, ni yɔɔ yɛ baafa 14 lɛ.) Eji anɔkwale akɛ, aha Yesu ‘gbɛi ní tá gbɛi krokomɛi fɛɛ anɔ’ lɛɛlɛŋ. * Aŋɔ hegbɛi fɛɛ ni yɔɔ ŋwɛi kɛ shikpɔŋ lɛ nɔ lɛ aha lɛ.—Filipibii 2:9; Mateo 28:18.

Esaaa akɛ Efeɔ Mɔ Daaŋ Kotsa Kɛkɛ

Yɛ anɔkwale mli lɛ, kɛ́ wɔmiitao ni Yehowa abo wɔsɔlemɔi atoi lɛ, no lɛ esa akɛ wɔsɔle yɛ  Yesu gbɛi amli. (Yohane 14:13, 14) Shi esaaa akɛ wɔtiɔ wiemɔi nɛɛ ni ji “yɛ Yesu gbɛi amli” lɛ mli kɛkɛ, akɛni ebatsɔ wɔsu loo wɔdaaŋ kotsa lɛ hewɔ. Mɛni hewɔ?

Susumɔ nɔkwɛmɔnɔ ko he okwɛ. Bei pii lɛ, kɛ́ ofee nɔ ko kpakpa oha mɔ ko lɛ, ekɛɔ bo akɛ “oyiwaladɔŋŋ.” Ani osusuɔ akɛ nakai “oyiwaladɔŋŋ” ni ekɛɔ lɛ jɛ etsui mli, loo osusuɔ akɛ eekɛɛ nɔ ko ni mɛi fɛɛ fɔɔ kɛɛmɔ kɛkɛ kɛjieɔ hiɛsɔɔ kpo kɛji mɔ ko fee nɔ ko eha amɛ lɛ? Yɛ anɔkwale mli lɛ, ehe miihia ni wɔha bɔ ni wɔkɛ Yesu gbɛi lɛ tsuɔ nii yɛ sɔlemɔ mli lɛ afee nɔ ni shishinumɔ diɛŋtsɛ yɔɔ he, shi esaaa akɛ efeɔ tamɔ “oyiwaladɔŋŋ” ni akɛɔ kɛkɛ ni jɛɛɛ tsui mli lɛ. Eyɛ mli akɛ abiɔ ni ‘wɔsɔle ni wɔkafɔ̃ɔ’ moŋ, shi esa akɛ wɔjɛ ‘wɔtsui muu fɛɛ’ mli wɔfee nakai, shi jeee ni wɔbaasɔle yɛ gbɛ ni tsɔɔ akɛ wiemɔ ko etsɔ wɔsu loo wɔdaaŋ kotsa lɛ nɔ kɛkɛ.—1 Tesalonikabii 5:17; Lala 119:145.

Te ooofee tɛŋŋ ni okawie wiemɔi nɛɛ ni ji “yɛ Yesu gbɛi amli” lɛ akɛ nɔ ko kɛkɛ ni ookɛɛ kɛmu osɔlemɔ naa lɛ? Mɛni hewɔ ojwɛŋŋ Yesu sui ni haa mɔ mii shɛɔ ehe lɛ anɔ? Susumɔ nɔ ni efee eha bo momo kɛ nɔ ni eesumɔ akɛ efee eha bo lɛ he. Kɛ́ oosɔle lɛ, daa Yehowa shi ni ojie eyi yɛ bɔ ni ekɛ e-Bi lɛ tsu nii yɛ gbɛ ni nɔ bɛ nɔ lɛ hewɔ. Kɛ́ ofee nakai lɛ, obaaná hekɛnɔfɔɔ babaoo yɛ Yesu shiwoo nɛɛ mli, akɛ: “Nɔ fɛɛ nɔ he fai ni nyɛaakpa tsɛ lɛ yɛ migbɛi anɔ lɛ, eeeha nyɛ.”—Yohane 16:23.

[Shishigbɛ niŋmaa]

^ kk. 14 Taakɛ Expository Dictionary of New Testament Words ní Vine ŋma lɛ tsɔɔ mli lɛ, Hela wiemɔ ni atsɔɔ shishi akɛ “gbɛi” lɛ baanyɛ akɔ “nɔ fɛɛ nɔ ni gbɛi lɛ tsɔɔ, tamɔ nɔyeli hegbɛ ni mɔ yɔɔ, mɔ subaŋ, egbɛhe, egbojee, ehewalɛ, [kɛ] enifeemɔ ko ni nɔ̃ bɛ” lɛ he.

[Wiemɔ ni akɔ ni akɛmiitsu nii ni yɔɔ baafa 13]

Esa akɛ wɔjɛ ‘wɔtsui muu fɛɛ mli’ wɔsɔle, shi jeee ni wɔbaasɔle yɛ gbɛ ni tsɔɔ akɛ wiemɔ ko etsɔ wɔsu loo wɔdaaŋ kotsa lɛ nɔ kɛkɛ

[Akrabatsa/Mfoniri ni yɔɔ baafa 14]

HEGBƐ KPELE NI YESU YƆƆ

Bɔni afee ni onu hegbɛ ni Yesu yɔɔ lɛ shishi jogbaŋŋ lɛ, susumɔ sabalai, wiemɔi, kɛ gbɛi ni akɛtsɛɔ lɛ lɛ ekomɛi ahe okwɛ.

Amen.​2 Korintobii 1:19, 20; Kpojiemɔ 3:14.

Bɔfo.​Hebribii 3:1.

Wala Lumɔ.​Bɔfoi lɛ Asaji 3:15.

Kristo loo Mesia.Mateo 16:16; Yohane 1:41.

Naanɔ Tsɛ.​Yesaia 9:5.

Odasefonyo Anɔkwafo.​Kpojiemɔ 1:5.

Tookwɛlɔ Kpakpa.​Yohane 10:11.

Asafo lɛ Yitso.​Efesobii 5:23.

Osɔfonukpa.​Hebribii 4:14, 15.

Imanuel.​Mateo 1:23.

Kojolɔ.​Bɔfoi lɛ Asaji 10:42.

Maŋtsɛ.​Kpojiemɔ 11:15.

Nyɔŋmɔ Toobi.​Yohane 1:29.

Naagbee Adam.​1 Korintobii 15:45.

Hiɛnyiɛlɔ.​Mateo 23:10, NW.

Nuŋtsɔ.​Yohane 13:13.

Teŋdamɔlɔ.​1 Timoteo 2:5.

Bɔfonukpa Mikael.​1 Tesalonikabii 4:16; Yuda 9.

Nyɔŋmɔ Hewalɔ.​Yesaia 9:5.

Hejɔlɛ Lumɔ.​Yesaia 9:5.

Yiwalaherelɔ.​Luka 2:11.

Nyɔŋmɔ Bi.​Yohane 1:34.

Gbɔmɔ Bi.​Mateo 8:20.

Tsɔɔlɔ.​Yohane 13:13.

Wiemɔ lɛ.​Yohane 1:1.

Naakpɛɛ Ŋaawolɔ.​Yesaia 9:5.