Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ) NOVEMBER 2015

Tsɔsemɔ Obii lɛ Koni Amɛsɔmɔ Yehowa—Fã 1

“Hã Nyɔŋmɔ gbɔmɔ lɛ . . . [atsɔɔ] wɔ bɔ ni wɔɔtsɔ wɔhiɛ gbekɛ lɛ ni abaafɔ lɛ wɔhã!”—KOJOLƆI 13:8.

LALAI: 88, 120

1. Be ni Manoa nu akɛ amɛbaafɔ bi lɛ, mɛni efee?

MANOA kɛ eŋa susuuu kɔkɔɔkɔ akɛ amɛbaanyɛ amɛfɔ. Shi gbi ko lɛ, Yehowa tsu ŋwɛibɔfo ko, ni ebakɛɛ Manoa ŋa lɛ akɛ ebaafɔ binuu. Enɛ hã yoo lɛ mii shɛ ehe waa diɛŋtsɛ! Be ni eyagba Manoa nɔ ni bɔfo lɛ kɛɛ lɛ lɛ, lɛ hu emii shɛ ehe waa. Shi esusu bɔ ni Yehowa baasumɔ ni ekwɛ bi nɛɛ ehã lɛ hu he jogbaŋŋ. No mli lɛ, mɛi babaoo ni yɔɔ amɛmaŋ Israel lɛ miifee nibii gbohii. No hewɔ lɛ, lɛ kɛ eŋa lɛ susu bɔ ni amɛbaafee amɛtsɔse amɛbinuu lɛ ni ebasumɔ Yehowa ni esɔmɔ lɛ lɛ he. Manoa kpa Yehowa fai ní etsu bɔfo lɛ kɛba amɛŋɔɔ ekoŋŋ, ekɛɛ lɛ akɛ: “Miikpao fai, hã Nyɔŋmɔ gbɔmɔ lɛ ni otsu lɛ aba wɔŋɔɔ ekoŋŋ, ní ebatsɔɔ wɔ bɔ ni wɔɔtsɔ wɔhiɛ gbekɛ lɛ ni abaafɔ lɛ wɔhã!”Kojolɔi 13:1-8.

2. Mɛni esa akɛ otsɔɔ obii lɛ? Ni te obaafee tɛŋŋ ofee nakai? (Kwɛmɔ akrabatsa ni ji, “ Mɛi ni He Hiaa Fe Fɛɛ ni Esa akɛ Okɛ Amɛ Akase Biblia Lɛ.”)

2 Kɛ́ fɔlɔ ji bo lɛ, ekolɛ bo hu obaasumɔ ni Yehowa aye abua bo taakɛ Manoa bi ni efee ehã lɛ lɛ. Bo hu sɔ̃ kã onɔ akɛ, oye obua obii lɛ ni amɛle Yehowa ni amɛsumɔ lɛ. *  (Abɛi 1:8) Obaanyɛ otsɔɔ amɛ Yehowa he nii, ni okɛ amɛ akase Biblia lɛ be ni nyɛfeɔ weku jamɔ daa otsi lɛ. Shi no pɛ kɛkɛ faaa. (Kanemɔ 5 Mose 6:6-9.) Nibii krokomɛi yɛ ni esa akɛ ofee kɛye obua obii lɛ koni amɛsumɔ Yehowa ni amɛsɔmɔ lɛ. Yɛ nikasemɔ nɛɛ mli lɛ, wɔbaasusu nɔkwɛmɔnɔ ni Yesu fee yɛ enɛ gbɛfaŋ lɛ he. Eyɛ mli akɛ Yesu boteee gbalashihilɛ mli ni ebaafɔ moŋ, shi bɔ ni etsɔɔ ekaselɔi lɛ nii, ni etsɔse amɛ lɛ, ji nɔkwɛmɔnɔ kɛhã fɔlɔi. Yesu sumɔ amɛ, ni eba ehe shi. Agbɛnɛ hu, ekɛ sɛɛyoomɔ tsu nii, ni tsɔɔ akɛ, ena nɔ diɛŋtsɛ ni yɔɔ ekaselɔi lɛ atsui mli, ni ena gbɛ ni ebaanyɛ etsɔ nɔ eye ebua amɛ. Nyɛhãa wɔkwɛa bɔ ni wɔbaafee wɔkase lɛ.

NÁ SUƆMƆ OHÃ OBII LƐ

3. Mɛni hã Yesu kaselɔi lɛ na akɛ esumɔɔ amɛ?

3 Yesu kɛɛ ekaselɔi lɛ shii abɔ akɛ esumɔɔ amɛ. (Kanemɔ Yohane 15:9.) Ená dekã ehã amɛ. (Marko 6:31, 32; Yohane 2:2; 21:12, 13) Ebatsɔ amɛtsɔɔlɔ kɛ amɛnaanyo fɛɛ. No hewɔ lɛ, kaselɔi lɛ na faŋŋ akɛ, Yesu sumɔɔ amɛ. Te ooofee tɛŋŋ okase Yesu?

4. Mɛni obaanyɛ ofee kɛtsɔɔ obii lɛ akɛ osumɔɔ amɛ? (Kwɛmɔ mfoniri ni yɔɔ nikasemɔ lɛ shishijee lɛ.)

4 Kɛɛmɔ obii lɛ akɛ osumɔɔ amɛ, ni ohã amɛna akɛ oshwɛɛɛ amɛhe kwraa. (Abɛi 4:3; Tito 2:4) Nyɛmi nuu ko ni yɔɔ Australia, ni atsɛɔ lɛ Samuel lɛ wie akɛ: “Be ni gbekɛ fioo ji mi lɛ, mipapa kaneɔ Mi-Wolo ni Gbaa Biblia Mli Saji lɛ ehãa mi daa gbɛkɛ. Ehãa saji fɛɛ ni mibiɔ lɛ lɛ hetoo, efuaa mi, eshɔɔ mikpai ahe, kɛkɛ lɛ ekɛɛ mi akɛ miwɔ jogbaŋŋ.” Be ni Samuel da lɛ, ená ele akɛ, epapa gbekɛbiiashi lɛ, mɔ ko mɔ ko ejieee suɔmɔ ni tamɔ nakai kpo etsɔɔɔ lɛ; mɔ ko mɔ ko efuaaa lɛ, ni ebaashɔ ekpai ahe. Ewie akɛ: “Minaa kpɛ mihe waa!” Kɛkɛ ni etsa nɔ akɛ: “Kɛ̃lɛ, emia  ehiɛ efee nibii nɛɛ fɛɛ, koni mana akɛ esumɔɔ mi. Enɛ hewɔ lɛ, mibasumɔ esane waa, ehã mitsui nyɔ mimli, ni mina akɛ manyɛ mikɛ mihiɛ afɔ̃ enɔ.” Kɛji be fɛɛ be lɛ, okɛɛ obii lɛ akɛ osumɔɔ amɛ lɛ, amɛ hu amɛbaanu he taakɛ Samuel nu he lɛ. Fuamɔ amɛ, ni oshɔ amɛkpai ahe. Ná dekã ohã amɛ. Okɛ amɛ aye nii, ni okɛ amɛ ashwɛ.

5, 6. (a) Akɛni Yesu sumɔɔ ekaselɔi lɛ hewɔ lɛ, mɛni efee? (b) Kɛ́ obaatsɔse obii lɛ, te esa akɛ ofee lɛ ohã tɛŋŋ?

5 Yesu wie akɛ: “Mɛi fɛɛ ni midɔɔ amɛhe lɛ, mijajeɔ amɛ ni mitsɔseɔ amɛ.” * (Kwɛmɔ shishigbɛ niŋmaa lɛ.) (Kpojiemɔ 3:19, shishigbɛ niŋmaa) Yesu kaselɔi lɛ kɛ amɛhe taa naa shii abɔ yɛ mɔ ni nɔ kwɔ fe fɛɛ yɛ amɛteŋ lɛ he. Mɛni Yesu fee yɛ sane nɛɛ he? Ekuuu ehiɛ efɔ̃ɔɔ nɔ. Moŋ lɛ, ená tsui ehã amɛ ni ewo amɛ ŋaa yɛ he shii abɔ. Ni akɛni emli hi hewɔ lɛ, be fɛɛ be kɛ́ ebaajaje amɛ lɛ, efeɔ nakai yɛ be ni sa mli, ni efeee nakai yɛ he fɛɛ he kɛkɛ.Marko 9:33-37.

Kɛ́ obaatsɔse obii lɛ, feemɔ nakai yɛ be ni sa mli kɛ yɛ he ni sa, ni ofee nakai kɛ mlihilɛ

6 Kɛ́ oosumɔ obii lɛ, obaatsɔse amɛ. Bei komɛi lɛ, nɔ pɛ ni he hiaa ji ni obaatsɔɔ obii lɛ nɔ hewɔ ni nɔ ko ni amɛfee loo amɛyaafee lɛ ja loo ejaaa. Shi kɛ́ amɛbooo bo toi hu? (Abɛi 22:15) Kasemɔ Yesu. Ná tsui ohã amɛ, ni oya nɔ otsɔɔ amɛ gbɛ, otsɔɔ amɛ nii, ni ojaje amɛ. Ni kɛ́ obaatsɔse amɛ lɛ, feemɔ nakai yɛ be ni sa mli kɛ yɛ he ni sa, ni ofee nakai kɛ mlihilɛ. Nyɛmi yoo ko ni yɔɔ South Africa, ni atsɛɔ lɛ Elaine lɛ kaiɔ gbɛ ni efɔlɔi tsɔ nɔ amɛtsɔse lɛ lɛ. Amɛtsɔɔ lɛ nɔ ni esa akɛ efee, kɛ nɔ ni esaaa akɛ efeɔ. Agbɛnɛ hu, amɛtsɔɔ lɛ nɔ ni amɛbaafee lɛ kɛ́ egbo toi, ni be fɛɛ be ni ebaagbo toi lɛ, amɛyeɔ amɛwiemɔ lɛ nɔ. Ewie akɛ: “Amɛfeee nakai kɛ mlifu, ni be fɛɛ be lɛ, amɛtsɔɔ mi nɔ hewɔ ni amɛgbalaa mitoi lɛ.” Enɛ hewɔ lɛ, enuuu he kɔkɔɔkɔ akɛ efɔlɔi lɛ sumɔɔɔ lɛ.

BA OHE SHI

7, 8. (a) Mɛni Yesu kaselɔi lɛ kase kɛjɛ esɔlemɔi lɛ amli? (b) Mɛɛ gbɛ nɔ osɔlemɔi lɛ baanyɛ ahã obii lɛ ana akɛ esa akɛ amɛkɛ amɛhiɛ afɔ̃ Nyɔŋmɔ nɔ?

7 Be ni aaba abamɔ Yesu ni ayagbe lɛ lɛ, esɔle ekpa e-Tsɛ lɛ fai akɛ: “Aba, Ataa, onyɛɔ nii fɛɛ ofeɔ; jiemɔ kpulu nɛɛ kɛje minɔ. Kɛ̃lɛ, jeee bɔ ni mi misumɔɔ, shi moŋ bɔ ni bo osumɔɔ.” * (Kwɛmɔ shishigbɛ niŋmaa lɛ.) (Marko 14:36) Eeenyɛ efee akɛ, kaselɔi lɛ nu Yesu sɔlemɔ lɛ mli wiemɔi lɛ, loo sɛɛ mli lɛ, amɛná amɛle. Ni ekã shi faŋŋ akɛ, eta amɛtsuiŋ waa. Amɛna akɛ, yɛ emuu ni Yesu eye lɛ fɛɛ sɛɛ lɛ, ebi e-Tsɛ lɛ dɛŋ yelikɛbuamɔ. No hewɔ lɛ, amɛna akɛ esa akɛ amɛ hu amɛba amɛhe shi ni amɛkɛ amɛhiɛ afɔ̃ Yehowa nɔ.

Kɛ́ okɛ obii lɛ miisɔle, ni okɛɛ Yehowa akɛ eye ebua bo lɛ, amɛbaana akɛ, esa akɛ amɛ hu amɛkɛ amɛhiɛ afɔ̃ Yehowa nɔ

8 Nibii pii yɛ ni obii lɛ baanyɛ akase kɛjɛ osɔlemɔi amli, tsɛ jeee no ji yiŋtoo titri  hewɔ ni osɔleɔ lɛ. Akɛ nɔkwɛmɔnɔ lɛ, kɛ́ okɛ obii lɛ miisɔle lɛ, kɛɛmɔ Yehowa akɛ eye ebua amɛ ní eye ebua bo hu. Kɛ́ ofee nakai lɛ, obii lɛ baana akɛ okɛ ohiɛ fɔ̃ɔ Yehowa nɔ, ni amɛ hu amɛbaafee nakai. Nyɛmi yoo ko ni yɔɔ Brazil, ni atsɛɔ lɛ Ana lɛ wie akɛ: “Kɛ́ wɔweku lɛ kɛ naagbai kpe, tamɔ be ni minii kɛ minaa bɛ hewalɛ nɛkɛ lɛ, mifɔlɔi sɔleɔ ni Yehowa awaje amɛ koni amɛnyɛ amɛkpee shihilɛ lɛ naa, ní eduro amɛ hiɛshikamɔ koni amɛnyɛ amɛkpɛ yiŋ ni ja yɛ saji ahe. Kɛ́ nibii amli wa, ni amɛnaaa nɔ ni amɛfeɔ po lɛ, amɛshiɔ amɛnaagbai lɛ fɛɛ amɛhãa Yehowa. Enɛ hã mibana akɛ, esa akɛ mikɛ mihiɛ afɔ̃ Yehowa nɔ.” Kɛ́ okɛ obii lɛ miisɔle, ni okɛɛ Yehowa akɛ ehã bo ekãa ni okɛye okutsoŋbii odase, loo ni okɛbi onitsumɔtsɛ lɛ gbɛ koni onyɛ oya kpee lɛ, amɛbaana akɛ okɛ ohiɛ fɔ̃ɔ Yehowa nɔ akɛ ebaaye ebua bo, ni amɛ hu amɛbaafee nakai.

9. (a) Mɛni Yesu fee kɛtsɔɔ ekaselɔi lɛ akɛ, esa akɛ amɛba amɛhe shi ni amɛsɔmɔ mɛi krokomɛi? (b) Kɛ́ obaa ohe shi, ni ofooo bo pɛ onɔ mli lɛ, mɛni otsɔɔ obii lɛ?

9 Yesu kɛɛ ekaselɔi lɛ akɛ, esa akɛ amɛba amɛhe shi, ni amɛfo mɛi krokomɛi anɔ mli, ni lɛ diɛŋtsɛ hu efee nakai. (Kanemɔ Luka 22:27.) Ebɔfoi lɛ na akɛ, ekɛ nibii shã afɔle bɔ ni afee ni enyɛ esɔmɔ Yehowa ni eye ebua mɛi krokomɛi, ni amɛbɔ mɔdɛŋ akɛ amɛ hu amɛbaafee nakai. Bo hu kɛ́ oba ohe shi, ni okɛ nibii shã afɔle lɛ, obii lɛ baakase. Nyɛmi nuu ko ni atsɛɔ lɛ Pranas, ni sɔmɔɔ akɛ asafoŋ onukpa lɛ, kɛ eŋa Debbie yɛ bii enyɔ. Debbie wie akɛ: “Kɛ́ miwu lɛ he be kɛye ebua mɛi krokomɛi lɛ, edɔɔɔ mi.” Ekɛfata he akɛ: “Mile  akɛ be fɛɛ be ni ehe baahia wɔweku lɛ, ebaaná dekã ehã wɔ.” (1 Timoteo 3:4, 5) Mɛɛ gbɛ nɔ nɔkwɛmɔnɔ kpakpa ni Pranas kɛ Debbie fee lɛ ná amɛbii lɛ anɔ hewalɛ? Pranas wie akɛ ebii lɛ jɛ amɛtsui mli amɛkɛ amɛhe hã kɛhã nitsumɔi srɔtoi ni atsuɔ yɛ kpeei ashishi lɛ. Amɛná miishɛɛ, amɛná nanemɛi, ni amɛkɛ amɛnyɛmimɛi Kristofoi lɛ bɔ gbagbalii. Ŋmɛnɛ lɛ, amɛ kɛ amɛbii lɛ fɛɛ miisɔmɔ Yehowa akɛ be fɛɛ sɔɔlɔi. No hewɔ lɛ, kɛ́ oba ohe shi, ni ofooo bo pɛ onɔ mli lɛ, obii lɛ baana akɛ, esa akɛ amɛ hu amɛjɛ amɛtsui mli amɛye amɛbua mɛi krokomɛi.

OKƐ SƐƐYOOMƆ ATSU NII

10. Be ni mɛi komɛi ni yɔɔ Galilea lɛ tee Yesu taomɔ lɛ, mɛni efee ni tsɔɔ akɛ eyoɔ nii asɛɛ?

10 Yesu yoɔ nii asɛɛ waa, ni enyɛ ena mɛi atsui mli. Kɛ́ mɔ ko fee nɔ ko lɛ, enyɛɔ enaa nɔ hewɔ ni mɔ lɛ fee enii yɛ nakai gbɛ nɔ. Akɛ nɔkwɛmɔnɔ lɛ, be ko lɛ, Yesu yatsɔɔ mɛi komɛi nii ni elɛ amɛ. Be ni eshi lɛ, mɛi lɛ yatao lɛ, ni amɛyana lɛ. (Yohane 6:22-24) Shi Yesu na nɔ tuuntu hewɔ ni amɛtaoɔ lɛ lɛ; ena amɛtsui mli. Ena akɛ, jeee nibii ni etsɔɔ amɛ lɛ titri hewɔ amɛtaoɔ lɛ lɛ, shi moŋ niyenii ni ehã amɛ lɛ. (Yohane 2:25) No hewɔ lɛ, eŋmɛ etsui shi ni ejaje amɛ, ni etsɔɔ amɛ tsakemɔi ni esa akɛ amɛfee.Kanemɔ Yohane 6:25-27.

Ye obua obi lɛ ni enya shiɛmɔ nitsumɔ lɛ he (Kwɛmɔ kuku 11)

11. (a) Mɛni baanyɛ aye abua bo ni ona bɔ ni obii lɛ nuɔ he amɛhãa yɛ shiɛmɔ nitsumɔ lɛ he? (b) Mɛni obaanyɛ ofee kɛye obua obii lɛ ni amɛnya shiɛmɔ nitsumɔ lɛ he?

11 Onyɛŋ ona mɛi atsui mli, shi bo hu obaanyɛ oyoo nii asɛɛ. Akɛ nɔkwɛmɔnɔ lɛ, bɔɔ mɔdɛŋ ni ona bɔ ni obii lɛ nuɔ he amɛhãa yɛ shiɛmɔ nitsumɔ lɛ he. Obaanyɛ obi ohe akɛ, ‘Kɛ́ mikɛ mibii lɛ nyiɛ shiɛmɔ nɔ lɛ, ani nɔ pɛ ni amɛsusuɔ he ji, be ni wɔbaatao he ko wɔta ni wɔhe nɔ ko wɔye loo wɔnu ni wɔjɔɔ wɔhe?’ Kɛ́ oyɔse akɛ obii lɛ nyaaa shiɛmɔ nitsumɔ lɛ he tsɔ lɛ, bɔɔ mɔdɛŋ ni ofee nibii ni baahã amɛnya he. Tsɔɔmɔ amɛ nibii bibii ni amɛfee, bɔ ni afee ni amɛkanyiɛ osɛɛ kɛkɛ.

12. (a) Mɛɛ kɔkɔ Yesu bɔ ekaselɔi lɛ? (b) Mɛni hewɔ ehe bahia waa ni kaselɔi lɛ abo kɔkɔbɔɔ nɛɛ toi lɛ?

12 Mɛni ji nɔ kroko ni hãa wɔnaa akɛ Yesu yoɔ nii asɛɛ? Yesu yɔse akɛ, esha kome nyɛɔ etsɛɔ eshai krokomɛi kɛbaa, bei komɛi po lɛ, eshai ni yɔɔ hiɛdɔɔ. No hewɔ lɛ, ebɔ ekaselɔi lɛ kɔkɔ yɛ enɛ he. Akɛ nɔkwɛmɔnɔ lɛ, ekaselɔi lɛ le akɛ bɔlɛnamɔ jeŋba sha ehiii. Shi Yesu bɔ amɛ kɔkɔ yɛ nɔ ni baanyɛ ahã mɔ ko kɛ ehe awo bɔlɛnamɔ jeŋba sha mli lɛ he. Ekɛɛ amɛ akɛ: “Mɔ fɛɛ mɔ ni yaa nɔ ekwɛɔ yoo ni enáa ehe akɔnɔ lɛ, ekɛ lɛ efite gbãla momo yɛ etsuiŋ. Agbɛnɛ, kɛ́ oninejurɔ hiŋmɛi miitɔ̃tɔ onane lɛ, fãa oshɛ ofɔ̃.” (Mateo 5:27-29) No mli lɛ, Yesu kaselɔi lɛ yɛ Romabii lɛ ateŋ, ni Romabii lɛ sumɔɔ ni amɛkwɛ dramai ni mli eyimɔ obɔbɔ kɛ yakayaka wiemɔi kɛ jeŋba sha. Yesu sumɔɔ ekaselɔi lɛ, ni ebɔ amɛ kɔkɔ ni amɛtsi amɛhe kɛje nibii ni baahã ewa kɛhã amɛ akɛ amɛbaafee nɔ ni ja lɛ ahe.

13, 14. Mɛni obaanyɛ ofee kɛye obua obii lɛ koni amɛkɛ yakayaka nibii akajie amɛhiɛtserɛ?

13 Fɔlɔi, kɛ́ nyɛyoɔ nii asɛɛ lɛ, nyɛbaanyɛ nyɛbu nyɛbii lɛ ahe koni amɛkafee nibii ni esaaa Yehowa hiɛ. Mɔbɔ sane ji akɛ, ŋmɛnɛ lɛ, ewaaa akɛ gbekɛbii bibii po baakwɛ ponografi kɛ nibii krokomɛi ni mli eyimɔ kɛ jeŋba sha. Esa akɛ obɔ obii lɛ kɔkɔ ni amɛkakwɛ yakayaka nibii. Shi no pɛ kɛkɛ faaa. Nibii krokomɛi yɛ ni obaanyɛ ofee kɛbu amɛhe. Bi ohe akɛ: ‘Ani mibii lɛ le nɔ  hewɔ ni ponografi ehiii lɛ? Mɛni baanyɛ aka amɛ ni amɛkwɛ mfonirii ni tamɔ nakai? Ani mibii lɛ nyɛɔ amɛkɛ mi gbaa nɔ fɛɛ nɔ he sane, bɔ ni kɛ́ eefee amɛ akɛ amɛyakwɛ ponografi lɛ, amɛbaanyɛ amɛbakɛɛ mi?’ Obaanyɛ okɛɛ obii bibii lɛ po akɛ: “Kɛ́ nyɛna nɔ ko ni kɔɔ bɔlɛnamɔ he, loo yakayaka nɔ ko yɛ Intanɛt lɛ nɔ, ni eefee nyɛ akɛ nyɛkwɛ lɛ, nyɛfainɛ nyɛbakɛa mi. Nyɛkashea gbeyei, ni nyɛkahãa efea nyɛ hiɛgbele. Miisumɔ maye mabua nyɛ.”

14 Kɛ́ oohala nibii ni okɛbaajie ohiɛtserɛ lɛ, susumɔ bɔ ni amɛbaaná obii lɛ anɔ hewalɛ lɛ he jogbaŋŋ, bɔ ni afee ni ofee nɔkwɛmɔnɔ kpakpa ohã amɛ. Nyɛminuu Pranas, ni wɔtsĩ etã kɛtsɔ hiɛ lɛ, wie akɛ: “Obaanyɛ owie tsũ obɔ, shi nɔ ni ofeɔ lɛ, no obii lɛ baakase.” No hewɔ lɛ, kɛ́ oboɔ lalai kpakpai atoi, okaneɔ woji kpakpai, ni okwɛɔ sinii ni yɔɔ hiŋmɛi nɔ lɛ, ewaaa akɛ obii lɛ hu baafee nakai nɔŋŋ.Romabii 2:21-24.

YEHOWA BAAYE ABUA BO

15, 16. (a) Mɛni hewɔ esa akɛ nyɛná nɔmimaa akɛ, Yehowa baaye abua nyɛ ni nyɛtsɔse nyɛbii lɛ? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

15 Be ni Manoa kpa Yehowa fai koni eye ebua lɛ ni efee tsɛ kpakpa lɛ, ani Yehowa bo lɛ toi? Hɛɛ, “Nyɔŋmɔ bo Manoa gbee toi.” (Kojolɔi 13:9) Fɔlɔi, nyɛ hu kɛ́ nyɛsɔle nyɛbi Yehowa dɛŋ yelikɛbuamɔ lɛ, ebaabo nyɛ toi. Ebaaye ebua nyɛ ni nyɛtsɔse nyɛbii lɛ. Ni ebaaye ebua nyɛ ni nyɛsumɔ nyɛbii lɛ, nyɛba nyɛhe shi, ni nyɛyoo nii asɛɛ.

16 Yehowa baaya nɔ eye ebua nyɛ ni nyɛtsɔse nyɛbii lɛ kɛyashi amɛbaadara. Yɛ nikasemɔ ni nyiɛ sɛɛ lɛ mli lɛ, wɔbaakwɛ bɔ ni nyɛbaanyɛ nyɛkase Yesu ni nyɛjie suɔmɔ kpo, nyɛba nyɛhe shi, ni nyɛyoo nii asɛɛ, be ni nyɛtsɔseɔ nyɛbii ni eye kɛjɛ afii 13 kɛmiimɔ 19 lɛ koni amɛsɔmɔ Yehowa lɛ.

^ kk. 2 Nikasemɔ nɛɛ wieɔ bɔ ni fɔlɔi baanyɛ atsɔse amɛbii ni yeko afii 13 lɛ koni amɛsɔmɔ Yehowa lɛ he.

^ kk. 5 Biblia hãa wɔnaa akɛ, kɛ́ akɛɛ aatsɔse mɔ ko lɛ, etsɔɔ akɛ aatsɔɔ lɛ gbɛ, aatsɔɔ lɛ nii, loo aajaje lɛ, ni bei komɛi lɛ, ekɔɔ toigbalamɔ hu he. Kɛ́ fɔlɔi baatsɔse amɛbii lɛ, esaaa akɛ amɛfeɔ nakai yɛ mlifu naa kɔkɔɔkɔ. Esa akɛ amɛjɛ mlihilɛ mli amɛfee nakai.

^ kk. 7 Yɛ Yesu beiaŋ lɛ, gbekɛbii kɛ wiemɔ ni ji Aba lɛ tsuɔ nii kɛ́ amɛmiitsɛ amɛtsɛmɛi. Wiemɔ nɛɛ hãa anaa akɛ, amɛsumɔɔ amɛtsɛmɛi lɛ, ni amɛbuɔ amɛ.The International Standard Bible Encyclopedia.