Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) OCTOBER 2015

Nyɔŋmɔ Ŋɔɔ Hilɛ Hi Hã Mi

Nyɔŋmɔ Ŋɔɔ Hilɛ Hi Hã Mi

BE NI miye afii nɛɛhu lɛ, minyɛɛɛ makɛ dɔŋŋ. Amrɔ nɛɛ, miye afii 43, shi mikɛlɛ fɛɛ ji ninetalɔi etɛ. Be ni mifɔlɔi na akɛ minyɛŋ makɛ dɔŋŋ lɛ, amɛwo mi hewalɛ ni matsu nii waa bɔ ni afee ni mikajwɛŋ mikɛlɛ lɛ he tsɔ. No hewɔ lɛ, mikɛ okpɔlɔ ma wɔshĩa lɛ hiɛ, ni mibɔi aduawai hɔ̃ɔmɔ. Akɛni be fɛɛ be lɛ, misaa he ni mihɔ̃ɔ nii lɛ yɛ lɛ jogbaŋŋ hewɔ lɛ, mɛi pii bayeɔ mi jara.

Nihɔɔmɔ lɛ ye bua mi ni misusuuu mikɛlɛ lɛ he tsɔ, shi nibii krokomɛi yɛ ni hã mikai be fɛɛ be akɛ mikɛɛɛ kwraa. Nibii bibii komɛi yɛ ni mináaa amɛfeemɔ mlɛo. Akɛ nɔkwɛmɔnɔ lɛ, kɛ́ mitee shwapoi anaa ni miyahe nii lɛ, etɔɔ mi waa, ejaakɛ okpɔlɔ ni nihɔɔlɔi lɛ taa sɛɛ lɛ kɛ tsɔ hã mi. Miwerɛ ho mihe waa, ni minu he tamɔ nɔ ni afee nɔ fɛɛ nɔ ni yɔɔ je lɛ mli lɛ ahã mɛi ni kɛ fe mi. Shi be ni miye afii 14 lɛ, mishihilɛ tsake.

Gbi ko lɛ, yei enyɔ komɛi bahe aduawai. Yei nɛɛ ji Yehowa Odasefoi, ni amɛkɛɛ mi akɛ amɛbaasumɔ ni amɛkɛ mi akase Biblia lɛ. Eyeee be ko ni mibayɔse akɛ, jeee kɛ ni makɛ lɛ ji nɔ ni he hiaa, shi moŋ Yehowa kɛ eyiŋtoo lɛ he nii ni male. Enɛ ye bua mi waa. Ŋmalɛ kome ni mibanya he waa ji Lala 73:28 lɛ. Eklɛŋklɛŋ fã lɛ kɛɔ akɛ: “Nyɔŋmɔ ŋɔɔ hilɛ hi hã mi.”

Trukaa lɛ, ehe bahia ni wɔweku lɛ afã kɛjɛ Côte d’Ivoire ni wɔyahi Burkina Faso, ni enɛ hã mishihilɛ tsake waa. Be ni wɔyɔɔ Côte d’Ivoire lɛ, mɛi le mi, ni amɛnaa mi be fɛɛ be ni mita mijara lɛ sɛɛ. Shi mɛi ni yɔɔ he wɔyaje yɛ Burkina Faso lɛ lé mi, ni kɛ amɛna mi kɛ bɔ ni miyɔɔ kpitioo lɛ, amɛhiɛ feɔ amɛ yaa. Kɛ́ mɛi na mi lɛ, amɛkwɛɔ mi gãa, no hewɔ lɛ, otsii pii baho ni mijeee kpo. Shi mibakai bɔ ni miná miishɛɛ be ni mikaseɔ Yehowa he nii lɛ. No hewɔ lɛ, miŋma Yehowa Odasefoi anitsumɔhe nine lɛ wolo, ni amɛtsu nyɛmi yoo maŋsɛɛ sɔɔlɔ ko ni hiɛ moto kɛba miŋɔɔ. Atsɛɔ lɛ Nani, ni eye ebua mi waa.

Gbɛjegbɛi ni yɔɔ wɔkutso lɛ mli lɛ tsiɔ mɔ egbeɔ shi waa, ejaakɛ shia fa yɛ nɔ, ni kɛ́ shɛ nugbɔnɛmɔ be lɛ, amɛnɔ woɔ ŋmɔtɔ. Kɛ́ Nani miiba ni ekɛ mi abakase nii lɛ, bei komɛi lɛ ekɛ emoto lɛ gbeɔ shi. Anɔkwa, egbee shi shii abɔ, shi no hãaa enijiaŋ aje wui ni ekɛ mi akpa nikasemɔ. Gbi ko lɛ, Nani kɛɛ mi akɛ ekɛ emoto lɛ baawo mi kɛya asafoŋ kpeei. Be ni ekɛɛ mi lɛ, misusu naagbai enyɔ komɛi ahe. Klɛŋklɛŋ lɛ, ehe baahia ni mashi shĩa ni maya mɛi ateŋ, ni mɛi baakwɛ mi. Nɔ ni ji enyɔ lɛ, kɛ́ Nani wo mi eta moto lɛ sɛɛ lɛ, moto lɛ sɛɛ baatsii, ni no baahã etamɔ awa waa diɛŋtsɛ. Fɛɛ sɛɛ lɛ, mikpɛlɛ nɔ akɛ mikɛ lɛ baaya, ejaakɛ  mikai miŋmalɛ lɛ fã ni ji enyɔ lɛ. Ekɛɔ akɛ: “Mikɛ Nuŋtsɔ Yehowa efee mibobaahe.”

Bei komɛi kɛ́ wɔmiiya asafoŋ kpeei lɛ, wɔgbeɔ ŋmɔtɔ mli, shi no gbaaa wɔnaa kwraa, ejaakɛ wɔsumɔɔ asafoŋ kpeei lɛ. Nyɛmimɛi lɛ sumɔ mi, ni be fɛɛ be ni maya Maŋtsɛyeli Asa lɛ nɔ lɛ, amɛnyaa mihe waa; amɛfeee amɛnii tamɔ mɛi ni yɔɔ agbo lɛ naa ni kɛ hiŋmɛi ko kwɛɔ mi lɛ! Nyɔji nɛɛhu sɛɛ lɛ, abaptisi mi.

Miŋmalɛ lɛ fã ni ji etɛ lɛ kɛɔ akɛ: “Magba onitsumɔi lɛ fɛɛ.” Mile kɛjɛ shishijee tɔ̃ɔ akɛ, mináŋ shiɛmɔ nitsumɔ lɛ mlɛo. Mikaiɔ be klɛŋklɛŋ ni mitsu shĩa fɛɛ shĩa shiɛmɔ nitsumɔ lɛ. Gbekɛbii kɛ onukpai fɛɛ kwɛ mi gãa, amɛnyiɛ misɛɛ, ni amɛye mihe fɛo yɛ bɔ ni minyiɛɔ lɛ hewɔ. Nɔ ni amɛfee lɛ dɔ mi waa diɛŋtsɛ. Shi mikai mihe akɛ, jeee mi pɛ miyɔɔ naagbai. Amɛ hu amɛyɛ naagbai, ni no hewɔ lɛ Paradeiso lɛ he miihia amɛ, tamɔ bɔ ni ehe miihia mi lɛ nɔŋŋ. Enɛ ji nɔ ni ye bua mi ni minyɛ mifi shi.

Bɔ ni afee ni ekatɔ mi tsɔ lɛ, mihe baisiko ko ni akɛ niji taa, ní hiɛ naji etɛ. Kɛ́ wɔnyiɛ shiɛmɔ nɔ, ni wɔshɛ he ko ni gɔŋ yɔɔ lɛ, mɔ ni kɛ mi nyiɛ lɛ tsiɔ mi kɛkwɔɔ gɔŋ lɛ, kɛkɛ lɛ, etu eta misɛɛ, kɛkɛ lɛ, wɔye jɔɔ lɛ. Eyɛ mli akɛ yɛ shishijee mli lɛ, mináaa shiɛmɔ nitsumɔ lɛ mlɛo, shi etsɛɛɛ ni mibana akɛ, ehãa mináa miishɛɛ waa. Anɔkwa, mimii bashɛ shiɛmɔ nitsumɔ lɛ he aahu akɛ, yɛ afi 1998 lɛ, mibatsɔ daa gbɛgbalɔ.

Mikɛ mɛi babaoo kase Biblia lɛ, ni abaptisi amɛteŋ mɛi ejwɛ. Kɛfata he lɛ, minyɛmimɛi yei lɛ ateŋ mɔ kome hu ebamɔ anɔkwale lɛ mli! Be shɛɔ ni mibɛ miishɛɛ, shi kɛ́ minu akɛ mɛi miiya amɛhiɛ yɛ anɔkwale lɛ mli lɛ, eshɛjeɔ mimii. Be ko lɛ, minine shɛ wolo nɔ kɛjɛ Côte d’Ivoire. No mli lɛ atridii emɔ mi. Yɛ wolo lɛ mli lɛ, miná mile akɛ, nuu ko ni yaa yunivɛsiti yɛ Burkina Faso, ni kulɛ mikɛ lɛ kaseɔ nii yɛ eshinaa naa lɛ, ebatsɔ shiɛlɔ ni abaptisiko lɛ. Be ni mikɛ nuu nɛɛ kase nii kɛshɛ he ko lɛ, mikɛ lɛ hã nyɛmi nuu ko ni ekɛ lɛ atsa nɔ. Sɛɛ mli lɛ, nuu lɛ fã eyahi Côte d’Ivoire. Wolo lɛ hã mimii shɛ mihe waa!

Mɛni mitsuɔ kɛkwɛɔ mihe? Kuu ko ni yeɔ buaa mɛi ni eje kpa lɛ, kɛɛ amɛbaatsɔɔ mi nikpɛɛ. Tsɔɔlɔi lɛ ateŋ mɔ kome na akɛ, mihiɛ kã shi, ni mitsuɔ nii waa. No hewɔ lɛ, ekɛɛ mi akɛ: “Esa akɛ wɔtsɔɔ bo bɔ ni afeɔ samala.” Ni nakai pɛpɛɛpɛ amɛfee. Amrɔ nɛɛ, mitsuɔ nii yɛ shĩa. Mifeɔ samala ni akɛfɔɔ nii ahe, kɛ nɔ ni akɛjuɔ he. Mɛi sumɔɔ misamalai lɛ waa, ni amɛjieɔ yi amɛhãa mɛi krokomɛi. Miyɛ moto kɛ enaji etɛ ni mikɛyajaa samalai lɛ.

Dɔlɛ sane ji akɛ, yɛ afi 2004 lɛ, misɛɛ bɔi mihe waa waa, no hewɔ lɛ, mikɛ gbɛgbamɔ nitsumɔ lɛ fɔ̃ shi. Shi loloolo lɛ, miyaa shiɛmɔ waa.

Mɛi kɛɔ mi akɛ, daa nɛɛ miiŋmɔ. Ni lɛɛlɛŋ, esa akɛ mimii ashɛ mihe, ejaakɛ Nyɔŋmɔ ŋɔɔ hilɛ hi hã mi.—Mɔ ni gba ji Sarah Maiga.