Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  September 2015

Ani Oyɛ Henilee Kpakpa?

Ani Oyɛ Henilee Kpakpa?

“Yiŋtoo ni yɔɔ gbɛtsɔɔmɔ nɛɛ sɛɛ ji suɔmɔ ni jɛ tsui ni mli tse kɛ henilee kpakpa . . . mli.”1 TIMOTEO 1:5.

LALAI: 57, 48

1, 2. Namɔ hã wɔ henilee? Ni mɛni hewɔ esa akɛ wɔda Yehowa shi waa akɛ eduro wɔ henilee lɛ?

YEHOWA NYƆŊMƆ ehã adesai fɛɛ heyeli, ni tsɔɔ akɛ, ehã wɔ fɛɛ hegbɛ ni wɔ diɛŋtsɛ wɔkpɛ wɔyiŋ yɛ saji ahe. Shi ehã wɔ nɔ ko ni baaye abua wɔ ni wɔkpɛ yiŋ ni ja. No ji wɔhenilee lɛ. Wɔhenilee lɛ ji henumɔ ko ni kɛɔ wɔ kɛji nɔ ko ja loo ejaaa. Kɛ́ wɔkɛtsu nii jogbaŋŋ lɛ, ebaanyɛ eye ebua wɔ ni wɔfee nɔ ni ja, ni wɔkpoo efɔŋ. Henilee ni Yehowa kɛhã wɔ lɛ yeɔ odase akɛ, esumɔɔ wɔ ni eetao ni wɔye omanye.

2 Ŋmɛnɛ lɛ, mɛi komɛi feɔ nibii kpakpai, ni amɛnyɛɔ nɔ fɔŋ, tsɛ amɛkaseko Biblia lɛ. (Kanemɔ Romabii 2:14, 15.) Mɛni hewɔ? Ejaakɛ amɛyɛ henilee. Mɛi pii ahenilee hãaa amɛfee nibii gbohii. Eji mɔ ko mɔ ko bɛ henilee kulɛ, te je lɛŋ shihilɛ baafee tɛŋŋ? Kulɛ abaafee nibii gbohii babaoo fe bɔ ni afeɔ amrɔ nɛɛ. Esa akɛ wɔda Yehowa shi waa akɛ eduro adesai henilee!

Kɛ́ wɔtsɔse wɔhenilee lɛ jogbaŋŋ lɛ, mɛɛ gbɛ nɔ ebaaye ebua wɔ kɛ́ ehe bahia ni wɔkpɛ wɔyiŋ yɛ sane ko he?

3. Kɛ́ wɔtsɔse wɔhenilee ni wɔkɛtsu nii lɛ, mɛɛ gbɛ nɔ asafo lɛ baaná he sɛɛ?

3 Mɛi babaoo gbaaa amɛhe naa akɛ amɛbaatsɔse amɛhenilee lɛ. Shi, Yehowa webii tsɔseɔ amɛhenilee lɛ, ejaakɛ  amɛmiisumɔ ni etsu nii jogbaŋŋ, koni no ahã ekomefeemɔ ahi asafo lɛ mli. Wɔmiisumɔ ni wɔhenilee lɛ akai wɔ gbɛtsɔɔmɔi ni yɔɔ Biblia lɛ mli ni kɔɔ nɔ ni ja kɛ nɔ ni ejaaa, kɛ nɔ ni hi kɛ nɔ ni ehiii he. Kɛ́ wɔtsɔse wɔhenilee lɛ, jeee nɔ ni Biblia lɛ kɛɔ lɛ pɛ kɛkɛ wɔbaale, shi moŋ wɔbaasumɔ Nyɔŋmɔ gbɛtsɔɔmɔi lɛ, ni wɔbaaná hemɔkɛyeli akɛ amɛhi kɛhã wɔ. Paulo ŋma akɛ: “Yiŋtoo ni yɔɔ gbɛtsɔɔmɔ nɛɛ sɛɛ ji suɔmɔ ni jɛ tsui ni mli tse kɛ henilee kpakpa kɛ hemɔkɛyeli ní osato bɛ mli lɛ mli.” (1 Timoteo 1:5) Kɛ́ wɔtsɔse wɔhenilee lɛ ni wɔkɛtsu nii lɛ, wɔbaasumɔ Yehowa waa, ni hemɔkɛyeli ni wɔyɔɔ yɛ emli lɛ mli baawa. Bɔ ni wɔkɛ wɔhenilee lɛ tsuɔ nii wɔhãa lɛ hãa anaa he ni wɔda yɛ mumɔŋ kɛshɛ, kɛ bɔ ni shwelɛ ni wɔyɔɔ akɛ wɔbaasa Yehowa hiɛ lɛ mli wa hã. Agbɛnɛ hu, ehãa anaa nɔ gbɔmɛi ni wɔji diɛŋtsɛ.

4. Te wɔbaafee tɛŋŋ wɔtsɔse wɔhenilee lɛ?

4 Shi te wɔbaafee tɛŋŋ wɔtsɔse wɔhenilee lɛ? Ehe miihia ni wɔkase Biblia lɛ daa, wɔjwɛŋ nɔ ni wɔkase lɛ nɔ, ni wɔsɔle wɔbi Yehowa ni eye ebua wɔ ni wɔkɛ nɔ ni wɔkase lɛ atsu nii. Ni tsɔɔ akɛ, kɛ́ wɔmiikase Biblia lɛ, jeee mlai kɛ saji ni yɔɔ mli lɛ pɛ esa akɛ wɔle. Moŋ lɛ, esa akɛ wɔkɛfee oti ni ma wɔhiɛ akɛ, wɔbaale Yehowa jogbaŋŋ, wɔle esui, ni wɔle nibii ni esumɔɔ kɛ nibii ni esumɔɔɔ. Kɛ́ wɔkase Yehowa he nii babaoo lɛ, fiofio lɛ, ewaŋ kɛhaŋ wɔ akɛ wɔbaayɔse nɔ ni ja kɛ nɔ ni ejaaa yɛ Yehowa hiɛ. Kɛ́ wɔtsɔse wɔhenilee lɛ jogbaŋŋ lɛ, wɔbaabɔi niiahesusumɔ tamɔ Yehowa.

5. Mɛni he wɔbaasusu yɛ nikasemɔ nɛɛ mli?

5 Shi, ekolɛ obaabi akɛ: Kɛ́ mitsɔse mihenilee lɛ jogbaŋŋ lɛ, mɛɛ gbɛ nɔ ebaaye ebua mi kɛ́ ehe bahia ni makpɛ miyiŋ yɛ sane ko he? Kɛ́ Kristofonyo ko damɔ ehenilee nɔ ekpɛ eyiŋ yɛ sane ko he lɛ, mɛni manyɛ mafee kɛtsɔɔ akɛ mikpɛlɛɔ nɔ akɛ eyɛ hegbɛ ni efeɔ nakai? Ni mɛɛ gbɛ nɔ mihenilee lɛ baanyɛ aye abua mi ni matsu nitsumɔi kpakpai? Yɛ nikasemɔ nɛɛ mli lɛ, wɔbaakwɛ bɔ ni kɛ́ wɔtsɔse wɔhenilee lɛ jogbaŋŋ lɛ, ebaaye ebua wɔ yɛ saji ni kɔɔ (1) helatsamɔ, (2) hiɛtserɛjiemɔ, kɛ (3) shiɛmɔ nitsumɔ lɛ he lɛ mli.

GBƆMƆTSOŊ HEWALƐNAMƆ

6. Yɛ helatsamɔ gbɛfaŋ lɛ, mɛni ehe baahia ni wɔkpɛ wɔyiŋ yɛ he?

6 Biblia lɛ kɛɔ wɔ ni wɔkafee nibii ni baaye wɔ awui, ni ewoɔ wɔ hewalɛ ni wɔŋmɛ pɛpɛɛpɛ yɛ nibii tamɔ niyeli kɛ ninumɔ mli. (Abɛi 23:20; 2 Korintobii 7:1) Wɔkɛ nɔ ni Biblia lɛ kɛɔ lɛ tsuɔ nii, ni no hewɔ lɛ, wɔyeɔ wɔhe kɛjɛɔ helai komɛi ahe. Fɛɛ sɛɛ lɛ, hela mɔɔ wɔ, ni wɔgbɔlɔɔ hu. Enɛ hewɔ lɛ, ekolɛ ehe baahia ni wɔkpɛ wɔyiŋ yɛ gbɛ ni wɔbaasumɔ ni atsɔ nɔ atsa wɔ lɛ he. Yɛ maji komɛi anɔ lɛ, ayɛ blɔfo tsofa, shikpɔŋ tsofa, kɛ ekrokomɛi ni fata he. Ni bei pii lɛ, nyɛmimɛi ŋmaa nitsumɔhe nine lɛ, ni amɛbiɔ saji yɛ helatsamɔ gbɛi srɔtoi nɛɛ ahe. Amɛteŋ mɛi babaoo biɔ sane lɛ tamɔ nɔ ni amɛmiitao ni akɛɛ amɛ akɛ, “kpɛlɛmɔ helatsamɔ gbɛ nɛɛ nɔ” aloo “kaakpɛlɛ nɔ.”

7. Mɛni baaye abua wɔ be ni wɔkpɛɔ wɔyiŋ yɛ saji ni kɔɔ lá he lɛ ahe?

 7 Nitsumɔhe nine lɛ loo asafoŋ onukpai lɛ bɛ hegbɛ ni amɛkpɛɔ yiŋ amɛhãa Kristofonyo ko yɛ helatsamɔ saji ahe, ni kɛ́ mɔ lɛ kɛɛ amɛfee nakai po lɛ, esaaa akɛ amɛfeɔ. (Galatiabii 6:5) Kɛ̃lɛ, asafoŋ onukpai lɛ baanyɛ atsɔɔ mɔ lɛ nɔ ni Yehowa yɔɔ kɛɛmɔ yɛ sane lɛ he, koni no aye abua lɛ ni ekpɛ yiŋ ni ja. Akɛ nɔkwɛmɔnɔ lɛ, Nyɔŋmɔ efã wɔ akɛ wɔtsi wɔhe kɛje lá he. (Bɔfoi 15:29) Famɔ nɛɛ tsɔɔ akɛ, esaaa akɛ Kristofonyo ko heɔ lá loo nibii titrii ejwɛ ni feɔ lá lɛ ateŋ eko kwraa. Gbɛtsɔɔmɔ nɛɛ baanyɛ aná Kristofonyo ko henilee nɔ hewalɛ be ni ekpɛɔ eyiŋ kɛji ebaakpɛlɛ ni akɛ nibii bibii ni anáa kɛjɛɔ nibii titrii ejwɛ ni feɔ lá lɛ mli lɛ atsu nii ahã lɛ kɛ́ etee helatsamɔhe. * (Kwɛmɔ shishigbɛ niŋmaa lɛ.) Mɛɛ Biblia mli ŋaawoi krokomɛi baanyɛ aye abua wɔ ni wɔkpɛ yiŋ ni ja yɛ helatsamɔ saji ahe?

8. Mɛɛ gbɛ nɔ Filipibii 4:5 lɛ baanyɛ aye abua wɔ be ni wɔkpɛɔ wɔyiŋ yɛ saji ni kɔɔ helatsamɔ he lɛ ahe?

8 Abɛi 14:15 lɛ kɛɔ akɛ: “Mɔ ni náko jwɛŋmɔ lɛ, eheɔ wiemɔ fɛɛ wiemɔ eyeɔ; shi hiɛtɛlɔ leɔ enanenaa kwɛmɔ.” Ŋmɛnɛ lɛ, helai pii yɛ ni abɛ amɛnaa tsabaa. No hewɔ lɛ, kɛ́ mɔ ko kɛɛ ele gbɛ ni atsɔɔ nɔ atsaa helai nɛɛ ateŋ eko, shi wɔbɛ odaseyeli ni tsɔɔ faŋŋ akɛ helatsamɔ gbɛ nɛɛ yeɔ omanye lɛ, esa akɛ wɔkwɛ jogbaŋŋ. Paulo ŋma akɛ: “Nyɛhãa gbɔmɛi fɛɛ alea nyɛniiashishinumɔ lɛ.” (Filipibii 4:5) Kɛ́ wɔnuɔ nii ashishi lɛ, wɔbaaŋmɛ pɛpɛɛpɛ. Wɔbaahã Yehowa sɔɔmɔ lɛ afee nɔ ni he hiaa wɔ fe fɛɛ yɛ shihilɛ mli, jeee wɔgbɔmɔtsoŋ hewalɛnamɔ. Kɛ́ wɔhã gbɔmɔtsoŋ hewalɛnamɔ he wɔjwɛŋmɔ kɛ wɔbe fɛɛ lɛ, no baanyɛ ahã wɔfee nibii ni tsɔɔ akɛ wɔmiifo wɔ pɛ wɔnɔ mli. (Filipibii 2:4) Wɔle akɛ, yɛ jeŋ fɔŋ nɛɛ mli lɛ, wɔnyɛŋ wɔhi shi ni hela mɔɔɔ wɔ. No hewɔ lɛ, esa akɛ wɔhã Yehowa sɔɔmɔ lɛ afee nɔ ni he hiaa wɔ fe fɛɛ yɛ shihilɛ mli.Kanemɔ Filipibii 1:10.

Ani okɛ osusumɔi fiɔ mɛi krokomɛi anɔ? (Kwɛmɔ kuku 9)

9. Mɛɛ gbɛ nɔ esa akɛ Romabii 14:13, 19 lɛ aná yiŋ srɔtoi ni wɔkpɛɔ yɛ gbɔmɔtsoŋ hewalɛnamɔ he lɛ nɔ hewalɛ? Ni mɛni baanyɛ afite ekomefeemɔ ni yɔɔ asafo lɛ mli lɛ?

 9 Kristofonyo ni hiɛ kã shi lɛ, kɛ esusumɔi fĩii mɛi krokomɛi anɔ. Yɛ maŋ ko nɔ lɛ, nyɛmi nuu ko kɛ eŋa kɛɛkɛɛ nyɛmimɛi krokomɛi akɛ amɛkɔlɔ tsofai pɔtɛi komɛi ni amɛye niyenii pɔtɛi komɛi hu. Eyɛ mli akɛ jeee nyɛmimɛi lɛ fɛɛ kɛ nɔ ni amɛwie lɛ tsu nii moŋ, shi amɛnyɛ amɛkɔne mɛi komɛi ayiŋ kɛ̃. Be ni tsofa lɛ kɛ niyenii ni amɛtsɔɔ lɛ eyatsuuu nii bɔ ni akpaa gbɛ lɛ, nyɛmimɛi babaoo amli fu. Eyɛ mli akɛ nyɛmi nuu nɛɛ kɛ eŋa lɛ yɛ hegbɛ akɛ amɛkpɛɔ amɛyiŋ yɛ tsofai ni amɛ amɛbaakɔlɔ, kɛ niyenii ni amɛ amɛbaaye he moŋ, shi, kulɛ esaaa akɛ amɛkɛ amɛsusumɔi lɛ fiɔ mɛi krokomɛi anɔ. Ani nilee yɛ mli akɛ amɛbaafite ekomefeemɔ ni yɔɔ asafo lɛ mli lɛ yɛ tsofai kɛ niyenii hewɔ? Yɛ klɛŋklɛŋ afii 100 lɛ mli lɛ, esoro jwɛŋmɔ ni Kristofoi ni yɔɔ Roma lɛ ateŋ mɛi komɛi hiɛ yɛ niyenii komɛi kɛ gbii juji komɛi ahe. No hewɔ lɛ, mɛɛ ŋaa Paulo wo amɛ? Ekɛɛ amɛ akɛ: “Mɔ ko buɔ gbi ko fe gbi kroko; mɔ kroko hu buɔ gbi fɛɛ gbi pɛpɛɛpɛ; mɔ fɛɛ mɔ aná nɔmimaa kwraa yɛ lɛ diɛŋtsɛ ejwɛŋmɔ mli.” Nyɛhãa wɔkwɛa jogbaŋŋ ni wɔkatɔ̃tɔ̃ mɛi krokomɛi anaji.Kanemɔ Romabii 14:5, 13, 15, 19, 20.

Hã Yehowa sɔɔmɔ lɛ afee nɔ ni he hiaa bo fe fɛɛ yɛ shihilɛ mli

10. Mɛni hewɔ esaaa akɛ wɔwieɔ mɛi krokomɛi ayiŋkpɛi ahe nyanyaanya lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

10 Jeee be fɛɛ be wɔbaanu nɔ hewɔ ni nyɛmi ko kpɛ eyiŋ yɛ gbɛ ko nɔ lɛ shishi. Kɛ́ eba lɛ nakai lɛ, esaaa akɛ wɔyeɔ wɔhe oyai kɛkojoɔ lɛ, loo wɔnyɛɔ enɔ koni etsake ejwɛŋmɔ. Ekolɛ, kpaako etsɔseɔ ehenilee lɛ, loo ehenilee kɛɔ lɛ akɛ nibii komɛi ehiii, tsɛbelɛ tɔmɔ ko bɛ amɛhe. (1 Korintobii 8:11, 12) Loo ekolɛ, wɔ wɔnyɛko wɔtsɔse wɔhenilee lɛ jogbaŋŋ. Eji wɔteŋ mɔ fɛɛ mɔ sɔ̃ akɛ, lɛ diɛŋtsɛ ebaakpɛ eyiŋ yɛ saji ni kɔɔ helatsamɔ, gbɔmɔtsoŋ hewalɛnamɔ, kɛ saji krokomɛi he lɛ ahe, ni ekpɛlɛ nɔ fɛɛ nɔ ni baajɛ mli kɛba lɛ nɔ.

HIƐTSERƐJIEMƆ KƐ KPƆIAŊGBƆLEMƆ

11, 12. Mɛɛ gbɛ nɔ Biblia lɛ baanyɛ aye abua wɔ be ni wɔhalaa nibii ni wɔkɛbaajie wɔhiɛtserɛ lɛ?

11 Bɔ ni Yehowa bɔ wɔ ehã lɛ hewɔ lɛ, wɔnyɛɔ wɔjieɔ wɔhiɛtserɛ ni wɔnáa he sɛɛ. Solomon ŋma akɛ “ŋmɔlɔ be” kɛ “joo be” fɛɛ yɛ. (Jajelɔ 3:4) Kɛ̃lɛ, jeee nibii fɛɛ ni mɛi feɔ kɛjieɔ amɛhiɛtserɛ lɛ he yɔɔ sɛɛnamɔ. Ekomɛi hãa etɔɔ mɔ efolo, ni ehãaa mɔ mii ashɛ ehe. Ni nakai nɔŋŋ esaaa akɛ wɔfiteɔ be babaoo yɛ hiɛtserɛjiemɔ he. Mɛɛ gbɛ nɔ wɔhenilee baanyɛ aye abua wɔ koni wɔkɛ nibii ni sa Yehowa hiɛ, ni he yɔɔ sɛɛnamɔ, ni baahã wɔná miishɛɛ ajie wɔhiɛtserɛ?

‘Kɛ́ efee mi akɛ mifee nɔ ko ni ejaaa lɛ, ani mihenilee bɔɔ mi kɔkɔ?’

12 Biblia lɛ bɔɔ wɔ kɔkɔ yɛ “heloo lɛ nitsumɔi lɛ” ahe. Nomɛi ji, “bɔlɛnamɔ jeŋba sha, muji nii, efɔŋ ni akɛ kuɛŋtimɔ feɔ, amagajamɔ, mumɔi kɛshãramɔ, hetsɛ̃, béi, awuŋayeli, girimɔi, naataamɔi, mligbalamɔi, jamɔ kui, mɔnɔklɔmɔ, dãatɔɔ, hiɛtserɛjiemɔi ni yɔɔ hoo, kɛ nibii ni tamɔ enɛɛmɛi.” Paulo ŋma akɛ, “mɛi ni yaa nɔ amɛfeɔ nɛkɛ nibii nɛɛ anine shɛŋ Nyɔŋmɔ  Maŋtsɛyeli lɛ nɔ.” (Galatiabii 5:19-21) No hewɔ lɛ, esa akɛ wɔbi wɔhe akɛ: ‘Ani mihenilee yeɔ buaa mi ni matsi mihe kɛje shwɛmɔi ni yɔɔ gidigidi, loo shwɛmɔi ni hãa mɛi feɔ yiwalɛ nii, amɛkɛ amɛhe shiɔ akaŋ, loo amɛjieɔ maŋhedɔɔ su kpo lɛ ahe? Kɛ́ efee mi akɛ mikwɛ sini ko ni efãi komɛi teɔ bɔlɛnamɔ akɔnɔ shi, loo eko ni woɔ bɔlɛnamɔ jeŋba sha, dãatɔɔ, loo mumɔi kɛsharamɔ he hewalɛ lɛ, ani mihenilee bɔɔ mi kɔkɔ?’

13. Mɛɛ gbɛ nɔ 1 Timoteo 4:8 kɛ Abɛi 13:20 lɛ baanyɛ aye abua wɔ yɛ saji ni kɔɔ kpɔiaŋgbɔlemɔ he lɛ amli?

13 Biblia mli shishitoo mlai baanyɛ aye abua wɔ ni wɔtsɔse wɔhenilee lɛ yɛ saji ni kɔɔ kpɔiaŋgbɔlemɔ he lɛ amli. Akɛ nɔkwɛmɔnɔ lɛ, Biblia lɛ kɛɔ akɛ, “kpɔiaŋgbɔlemɔ he yɛ sɛɛnamɔ yɛ gbɛ bibioo ko nɔ.” (1 Timoteo 4:8, shishigbɛ niŋmaa) Mɛi komɛi miisumɔ ni amɛgbɔle amɛkpɔiaŋ daa, koni amɛná gbɔmɔtsoŋ hewalɛ kpakpa ni amɛfee klɛklɛ. Shi kɛ́ wɔmiitao wɔyafata mɛi komɛi ahe kɛgbɔle wɔkpɔiaŋ lɛ, ani esa akɛ wɔkɛ mɔ fɛɛ mɔ kɛkɛ afee nakai? Abɛi 13:20 lɛ kɛɔ akɛ: “Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeena amane.” No hewɔ lɛ, eyɛ faŋŋ akɛ, ehe miihia ni wɔkɛ Biblia lɛ atsɔse wɔhenilee lɛ, ni wɔhã wɔhenilee lɛ akudɔ wɔ yɛ saji ni kɔɔ kpɔiaŋgbɔlemɔ he lɛ amli.

14. Mɛɛ gbɛ nɔ weku ko kɛ shishitoo mlai ni yɔɔ Romabii 14:2-4 lɛ tsu nii?

14 Nyɛmi nuu ko ni atsɛɔ lɛ Christian lɛ kɛ eŋa Daniela yɛ biyei enyɔ ni yeko afii 20. Be ko be ni amɛfeɔ gbɛkɛ Weku Jamɔ lɛ, amɛsusu hiɛtserɛjiemɔ kɛ naanyobɔɔ he. Amɛna akɛ hiɛtserɛjiemɔi komɛi hi ni ekomɛi hu ehiii. Christian wie akɛ: “Wɔbiyei lɛ ateŋ mɔ kome wie akɛ, kɛ́ aba shwane hejɔɔmɔ yɛ skul lɛ, Odasefoi ni ekɛyaa skul lɛ ekomɛi feɔ nibii komɛi ni esusuɔ akɛ ehiii. Ni bei komɛi lɛ enuɔ he akɛ efee nibii ni amɛfeɔ lɛ eko. Wɔkɛ amɛ susu nibii ahe ni amɛna akɛ, wɔteŋ mɔ fɛɛ mɔ yɛ henilee, ni esa akɛ wɔhã no aye abua wɔ be ni wɔkpɛɔ wɔyiŋ yɛ nibii ni wɔbaafee kɛ mɛi ni wɔkɛbaabɔ lɛ he.”Kanemɔ Romabii 14:2-4.

Kɛ́ okɛ Biblia lɛ tsɔse ohenilee lɛ, ebaanyɛ eye ebua bo ni okɛ ohe akayawo oshara mli (Kwɛmɔ kuku 14)

15. Mɛɛ gbɛ nɔ Mateo 6:33 lɛ baanyɛ aye abua wɔ be ni wɔtoɔ hiɛtserɛjiemɔ he gbɛjianɔ lɛ?

 15 Be enyiɛ oyeɔ kɛjieɔ ohiɛtserɛ? Kɛ́ ooto nibii ni obaafee lɛ ahe gbɛjianɔ lɛ, ani osusuɔ hiɛtserɛjiemɔ he klɛŋklɛŋ, dani osusuɔ nibii tamɔ asafoŋ kpeeiyaa, shiɛmɔyaa, aŋkro nikasemɔ, kɛ ekrokomɛi ni tamɔ nakai lɛ ahe? Mɛni he hiaa bo fe fɛɛ yɛ shihilɛ mli? Yesu wie akɛ: “Nyɛyaa nɔ nyɛtaoa Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ, ni abaaŋɔ nibii krokomɛi nɛɛ fɛɛ afata he ahã nyɛ.” (Mateo 6:33) Kɛ́ ooto nibii ni obaafee lɛ ahe gbɛjianɔ lɛ, ani ohenilee lɛ kaiɔ bo Yesu ŋaawoo lɛ?

WƆHENILEE LƐ KANYAA WƆ NI WƆSHIƐ

16. Mɛɛ gbɛ nɔ wɔhenilee baanyɛ aná bɔ ni wɔtsuɔ shiɛmɔ nitsumɔ lɛ wɔhãa lɛ nɔ hewalɛ?

16 Kɛ́ wɔtsɔse wɔhenilee lɛ, jeee nibii fɔji pɛ ebaabɔ wɔ kɔkɔ ni wɔkafee, shi ebaatsirɛ wɔ ni wɔfee nibii kpakpai hu. Nibii kpakpai nɛɛ eko ji shĩa fɛɛ shĩa shiɛmɔ nitsumɔ lɛ, kɛ shiɛmɔ ni wɔbaashiɛ wɔhã mɛi be ni wɔnyiɛɛɛ shiɛmɔ nɔ. Paulo henilee tsirɛ lɛ ni efee nakai. Ewie yɛ shiɛmɔ nitsumɔ lɛ he akɛ: “Eji sɔ̃ ni kã minɔ. Anɔkwa, kpoo hã mi kɛ́ mijajeee sane kpakpa lɛ!” (1 Korintobii 9:16) Kɛ́ wɔkase Paulo lɛ, wɔhenilee ebuŋ wɔ fɔ, ejaakɛ wɔle akɛ nɔ ni esa akɛ wɔfee lɛ wɔfeɔ lɛ. Ni kɛ́ wɔshiɛ sane kpakpa lɛ wɔhã mɛi krokomɛi lɛ, wɔyeɔ wɔbuaa amɛ koni amɛle anɔkwale lɛ, ni amɛdamɔ amɛhenilee nɔ amɛkpɛ amɛyiŋ kɛ́ amɛbaahi shi yɛ naa loo amɛhiŋ shi yɛ naa. Paulo wie akɛ: “Wɔtsɔɔ anɔkwale lɛ ní wɔjieɔ lɛ kpo faŋŋ lɛ nɔ wɔjieɔ wɔhe yi wɔhãa gbɔmɔ fɛɛ gbɔmɔ henilee yɛ Nyɔŋmɔ hiɛ.”2 Korintobii 4:2.

17. Mɛɛ gbɛ nɔ nyɛmi yoo oblayoo ko bo ehenilee ni ekɛ Biblia lɛ etsɔse lɛ toi?

17 Be ni nyɛmi yoo ko ni atsɛɔ lɛ Jacqueline lɛ ye afii 16 lɛ, ekase adebɔɔ nibii ahe nii yɛ skul. Nibii ni atsɔɔ amɛ lɛ eko kɔɔ sutsakemɔ he. Ewie akɛ: “Mihenilee gba minaa waa, no hewɔ lɛ, be ni asusu tsɔɔmɔ nɛɛ he yɛ klas lɛ, minyɛɛɛ mikɛ mihe awo mli jogbaŋŋ tamɔ bɔ ni mifɔɔ feemɔ lɛ, ejaakɛ miheee sutsakemɔ tsɔɔmɔ lɛ miyeee. Mitee tsɔɔlɔ lɛ ŋɔɔ, koni magbala nibii amli matsɔɔ lɛ. Miishɛɛ sane ji akɛ, ehere mi hiɛmɛɛ, ni ehã mi hegbɛ koni magbala nɔ hewɔ ni miheɔ miyeɔ akɛ mɔ ko ni bɔ je lɛ mli matsɔɔ klasbii lɛ fɛɛ.” Jacqueline tsui nyɔ emli waa akɛ ebo nɔ ni ehenilee ni ekɛ Biblia lɛ etsɔse lɛ kɛɛ lɛ lɛ toi, ni ekɛtsu nii. Ani ohenilee tsirɛɔ bo ni ofee nɔ ni ja?

18. Mɛni hewɔ esa akɛ wɔtsɔse wɔhenilee lɛ?

18 Oti ni ma wɔhiɛ ji, ni wɔhi shi yɛ Yehowa mlai kɛ eshishitoo mlai anaa. Ni wɔhenilee lɛ baanyɛ aye abua wɔ ni wɔshɛ nakai oti lɛ he. Kɛ́ wɔkase Nyɔŋmɔ Wiemɔ lɛ daa, wɔjwɛŋ nɔ, ni wɔkɛtsu nii lɛ, no baatsɔɔ akɛ wɔmiitsɔse wɔhenilee lɛ. Kɛkɛ lɛ, nikeenii ni jara wa nɛɛ baatsɔɔ wɔ gbɛ koni wɔba wɔjeŋ jogbaŋŋ akɛ Kristofoi.

^ kk. 7 Kwɛmɔ “Sanebimɔi ni Jɛ Kanelɔi Adɛŋ” ni je kpo yɛ June 15, 2004 Buu-Mɔɔ lɛ, baafa 29-31 lɛ.