Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) SEPTEMBER 2015

“Nyɛdamɔa Shi Shiŋŋ yɛ Hemɔkɛyeli lɛ Mli”

“Nyɛdamɔa Shi Shiŋŋ yɛ Hemɔkɛyeli lɛ Mli”

“Nyɛdamɔa shi shiŋŋ yɛ hemɔkɛyeli lɛ mli, . . . nyɛhe awaa.”—1 KORINTOBII 16:13.

LALAI: 60, 64

1. (a) Be ko be ni Petro kɛ kaselɔi komɛi ta lɛlɛ mli kɛmiifo Galilea Ŋshɔ lɛ, mɛni ba? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni hã Petro bɔi shiumɔ lɛ?

FEEMƆ nɔ ni ba maŋkɛ ko be ni bɔfo Petro kɛ kaselɔi lɛ ateŋ mɛi komɛi ta lɛlɛ mli kɛmiifo Galilea Ŋshɔ lɛ he mfoniri okwɛ. Nakai gbi lɛ, amɛnáaa gbɛfãa lɛ mlɛo, ejaakɛ no mli lɛ ahum ko ni naa wa miitswa ni ŋshɔkei miihɛlɛ lɛlɛ lɛ. Shi trukaa be ni amɛyaakwɛ lɛ, naa Yesu nyiɛ ŋshɔ lɛ hiɛ. Petro bo etsɛ Yesu, ni ekɛɛ lɛ akɛ ehã enyiɛ nu lɛ hiɛ kɛba eŋɔɔ. Yesu kɛɛ lɛ akɛ eba. No hewɔ lɛ, Petro je lɛlɛ lɛ mli ni ebɔi nu lɛ hiɛ nyiɛmɔ. Shi eshɛɛɛ Yesu ŋɔɔ ni ebɔi shiumɔ. Mɛni hewɔ? Ejaakɛ ekwɛ ahum lɛ kɛ ŋshɔkei lɛ, ni etsui fã. Petro bo etsɛ Yesu ni eye ebua lɛ, no hewɔ lɛ Yesu kpã enine mli oya ni emɔ emli ni ekɛɛ lɛ akɛ: “Bo ni ohemɔkɛyeli faaa, mɛni hewɔ ohã oyiŋ fee bo kɔshikɔshi?”Mateo 14:24-32.

2. Mɛni he wɔbaasusu?

2 Nyɛhãa wɔsusua nibii etɛ komɛi ni kɔɔ Petro hemɔkɛyeli lɛ he lɛ ahe, kɛ nɔ ni wɔbaanyɛ wɔkase yɛ mli: (1) nɔ ni Petro fee yɛ  shishijee mli ni hãa wɔnaa akɛ ekɛ ehiɛ fɔ̃ Yehowa nɔ akɛ ebaaye ebua lɛ, (2) nɔ ni hã Petro hemɔkɛyeli lɛ mli gbɔjɔ, kɛ (3) nɔ ni hã Petro hemɔkɛyeli lɛ mli wa ekoŋŋ. Kɛ́ wɔsusu nibii nɛɛ ahe lɛ, ebaaye ebua wɔ ni wɔna bɔ ni wɔɔfee ‘wɔdamɔ shi shiŋŋ yɛ hemɔkɛyeli lɛ mli.’1 Korintobii 16:13.

ESA AKƐ WƆNÁ HEMƆKƐYELI AKƐ NYƆŊMƆ BAAYE EBUA WƆ

3. Mɛni hewɔ Petro je lɛlɛ lɛ mli lɛ? Ni mɛɛ gbɛ nɔ wɔ hu wɔfee nɔ ko ni tamɔ nakai?

3 Be ni Yesu kɛɛ Petro akɛ enyiɛ ŋshɔ lɛ hiɛ kɛba lɛ, Petro je lɛlɛ lɛ mli ni ebɔi nu lɛ hiɛ nyiɛmɔ. Mɛni hewɔ? Ejaakɛ ehemɔkɛyeli mli wa. Ená nɔmimaa akɛ, Nyɔŋmɔ baahã lɛ hewalɛ ni ekɛnyiɛ nu lɛ hiɛ, tamɔ bɔ ni efee ehã Yesu lɛ. Wɔ hu wɔjie hemɔkɛyeli ni tamɔ nakai nɔŋŋ kpo. Be ni Yesu fɔ̃ wɔ nine ni wɔbanyiɛ esɛɛ lɛ, wɔkpɛlɛ nɔ, wɔjɔɔ wɔhe nɔ wɔhã Yehowa, ni wɔhã abaptisi wɔ. Mɛni hewɔ? Ejaakɛ wɔná nɔmimaa akɛ, Yehowa kɛ Yesu baaye abua wɔ.Yohane 14:1; kanemɔ 1 Petro 2:21.

Petro hemɔkɛyeli lɛ hewɔ lɛ, enyɛ efee nɔ ko ni adesa ko adesa ko nyɛŋ afee

4, 5. Mɛni hewɔ wɔbaanyɛ wɔkɛɛ akɛ hemɔkɛyeli ji su ko ni jara wa lɛ?

4 Hemɔkɛyeli ji su ko ni jara wa waa. Petro hemɔkɛyeli lɛ hewɔ lɛ, enyɛ efee nɔ ko ni adesa ko adesa ko nyɛŋ afee; enyiɛ nu hiɛ. Wɔ hu kɛ́ wɔyɛ hemɔkɛyeli lɛ, wɔbaafee nibii komɛi ni yɛ adesai ahiɛ lɛ, anyɛŋ afee kɔkɔɔkɔ. (Mateo 21:21, 22) Wɔteŋ mɛi komɛi etsake wɔsubaŋ kɛ wɔjeŋba aahu akɛ, mɛi komɛi ni le bɔ ni wɔji sa lɛ, anaa kpɛɔ amɛhe kɛ́ amɛna wɔ. Yehowa ye bua wɔ ni wɔfee tsakemɔi nɛɛ, ejaakɛ wɔsumɔɔ lɛ. (Kanemɔ Kolosebii 3:5-10.) Wɔhemɔkɛyeli lɛ ji nɔ ni tsirɛ wɔ ni wɔjɔɔ wɔhe nɔ wɔhã Yehowa ni wɔbatsɔmɔ enanemɛi. Shi eji jeee Yehowa kulɛ, wɔnyɛŋ nakai wɔfee kɔkɔɔkɔ.Efesobii 2:8.

5 Wɔhemɔkɛyeli lɛ wajeɔ wɔ. Akɛ nɔkwɛmɔnɔ lɛ, ehãa wɔnyɛɔ wɔdamɔɔ wɔhenyɛlɔ ni he wa, ni ji Abonsam lɛ tutuamɔi anaa. (Efesobii 6:16) Agbɛnɛ hu, akɛni wɔkɛ wɔhiɛ fɔ̃ɔ Yehowa nɔ hewɔ lɛ, kɛ́ wɔkɛ naagbai kpe lɛ, wɔhaooo tsɔ. Yehowa ewo wɔ shi akɛ, kɛ́ wɔhe lɛ wɔye, ni wɔkɛ e-Maŋtsɛyeli lɛ ye klɛŋklɛŋ gbɛhe yɛ wɔshihilɛ mli lɛ, ebaahã wɔ nibii ni he hiaa wɔ lɛ. (Mateo 6:30-34) Ni nɔ ni fe fɛɛ lɛ, wɔhemɔkɛyeli lɛ hewɔ lɛ, Yehowa baahã wɔ nikeenii ko ni nɔ bɛ, no ji naanɔ wala.Yohane 3:16.

KƐ́ WƆJWƐŊMƆ JE YEHOWA NƆ LƐ, WƆHEMƆKƐYELI LƐ MLI BAAGBƆJƆ

6, 7. (a) Mɛni he wɔbaanyɛ wɔkɛ ahum kɛ ŋshɔkei ni wo Petro he gbeyei lɛ ato? (b) Mɛni hewɔ esa akɛ wɔkpɛlɛ nɔ akɛ wɔhemɔkɛyeli lɛ mli baanyɛ agbɔjɔ lɛ?

6 Be ni Petro nyiɛ Galilea Ŋshɔ lɛ hiɛ kɛshɛ he ko lɛ, etsui fã. Mɛni hewɔ? Ejaakɛ ekwɛ ahum lɛ kɛ ŋshɔkei lɛ. Wɔbaanyɛ wɔkɛ ŋshɔkei lɛ kɛ ahum lɛ ato naagbai kɛ kai babaoo ni Kristofoi kɛkpeɔ ŋmɛnɛ lɛ he. Eyɛ mli akɛ naagbai nɛɛ ekomɛi anaa wala moŋ, shi Yehowa baanyɛ awaje wɔ koni wɔnyɛ wɔkpee naa. Kaimɔ akɛ, jeee ahum lɛ kɛ ŋshɔkei lɛ ni hɛlɛ Petro ni ebɔi shiumɔ. Biblia lɛ kɛɔ wɔ akɛ, “Be ni ena bɔ ni kɔɔyɔɔ lɛ tswaa waa lɛ, eshe gbeyei.” (Mateo 14:30) Yɛ nɔ najiaŋ ni Petro baaya nɔ ekwɛ Yesu lɛ, ekɛ ejwɛŋmɔ tee kɔɔyɔɔ ni  tswaa waa lɛ nɔ. Enɛ hã ehemɔkɛyeli lɛ mli bɔi gbɔjɔmɔ. Nakai nɔŋŋ wɔ hu, kɛ́ wɔkɛ wɔjwɛŋmɔ ma wɔnaagbai lɛ anɔ lɛ, wɔyiŋ baafee wɔ kɔshikɔshi kɛji Yehowa baaye abua wɔ.

Kɛ́ wɔkɛ wɔjwɛŋmɔ emaaa nibii ni he hiaa lɛ anɔ lɛ, eyeŋ be ko ni wɔhemɔkɛyeli lɛ mli baagbɔjɔ

7 Esa akɛ wɔkpɛlɛ nɔ akɛ, wɔhemɔkɛyeli lɛ mli baanyɛ agbɔjɔ. Mɛni hewɔ? Ejaakɛ Biblia lɛ kɛɔ akɛ, esha ko yɛ ni “ewaaa akɛ eeelalaa wɔ,” ni no ji wɔhemɔkɛyeli lɛ mli ni baanyɛ agbɔjɔ lɛ. (Hebribii 12:1) Taakɛ eba lɛ yɛ Petro sane lɛ mli lɛ, kɛ́ wɔkɛ wɔjwɛŋmɔ emaaa nibii ni he hiaa lɛ anɔ lɛ, eyeŋ be ko ni wɔhemɔkɛyeli lɛ mli baagbɔjɔ. No hewɔ lɛ, mɛni baaye abua wɔ ni wɔna kɛ́ wɔhemɔkɛyeli lɛ he eba sane? Sanebimɔi ni nyiɛ sɛɛ nɛɛ baaye abua wɔ ni wɔpɛi wɔhemɔkɛyeli lɛ mli wɔkwɛ.

8. Mɛni baanyɛ ahã wɔyiŋ afee wɔ kɔshikɔshi yɛ Nyɔŋmɔ shiwoi lɛ ahe?

8 Ani miheɔ Nyɔŋmɔ shiwoi lɛ anɔ miyeɔ tamɔ bɔ ni mifeɔ be ko ni eho lɛ? Akɛ nɔkwɛmɔnɔ lɛ, Nyɔŋmɔ ewo shi akɛ ebaakpãtã Satan je lɛ hiɛ. Shi ani wɔhãa nibii srɔtoi ni yɔɔ je lɛ mli, ni mɛi kɛjieɔ amɛhiɛtserɛ lɛ gbalaa wɔjwɛŋmɔ? Kɛ́ nakai ni lɛ, ekolɛ wɔyiŋ baafee wɔ kɔshikɔshi kɛji naagbee lɛ ebɛŋkɛ. (Habakuk 2:3) Susumɔ nɔkwɛmɔnɔ kroko hu he okwɛ. Yehowa ehã wɔ kpɔmɔnɔ lɛ, ni ewo wɔ shi akɛ kɛ́ wɔtɔ̃ enɔ lɛ, ekɛbaake wɔ. Shi kɛ́ wɔhã tɔ̃mɔi ni wɔtɔ̃ be ko ni eho lɛ he wɔjwɛŋmɔ fɛɛ lɛ, ekolɛ wɔyiŋ baafee wɔ kɔshikɔshi kɛji Yehowa kɛ wɔtɔ̃mɔi lɛ efa wɔ lɛɛlɛŋ. (Bɔfoi 3:19) Ni enɛ baanyɛ afite miishɛɛ ni wɔkɛsɔmɔɔ Nyɔŋmɔ lɛ, ni wɔbaakpa shiɛmɔ.

9. Kɛ́ wɔhã nibii krokomɛi he wɔjwɛŋmɔ moŋ fe Yehowa sɔɔmɔ lɛ, mɛni baanyɛ aba?

9 Ani mikã he mikɛ minyɛmɔ fɛɛ miisɔmɔ Yehowa? Kɛ́ wɔkɛ wɔnyɛmɔ fɛɛ sɔmɔ Yehowa lɛ, no baaye abua wɔ ni wɔkɛ wɔjwɛŋmɔ ama nibii ni ewo shi akɛ ebaafee ehã wɔ wɔsɛɛ lɛ anɔ. Shi mɛni baanyɛ aba kɛ́ wɔhã nibii krokomɛi he wɔjwɛŋmɔ? Akɛ nɔkwɛmɔnɔ lɛ, mɛni baanyɛ aba kɛ́ wɔbɔi nitsumɔ ko ni baahã wɔná shika, shi ehaŋ wɔná be pii kɛsɔmɔ Yehowa lɛ tsumɔ? Wɔhemɔkɛyeli lɛ mli baagbɔjɔ, ni ‘wɔbaafee anihao’ yɛ Yehowa sɔɔmɔ lɛ mli, ni tsɔɔ akɛ, wɔkɛ wɔnyɛmɔ fɛɛ sɔmɔŋ Yehowa.Hebribii 6:10-12.

Yesu kaselɔi lɛ yɔse akɛ, kɛ́ mɔ ko bɛ hemɔkɛyeli lɛ, enyɛŋ ekɛ mɛi atɔ̃mɔi afa amɛ

10. Kɛ́ wɔkɛ mɛi atɔ̃mɔi fa amɛ lɛ, mɛɛ gbɛ nɔ no hãa anaa akɛ wɔheɔ Yehowa nɔ wɔyeɔ?

10 Kɛ́ mɛi tɔ̃ minɔ lɛ, ani ewa kɛhã mi akɛ mikɛ amɛhe baafa amɛ? Kɛ́ mɛi tɔ̃ wɔnɔ, loo amɛfee nɔ ko ni yɔɔ dɔlɛ amɛshi wɔ lɛ, ani wɔmli fuɔ amɛ ni wɔkɛ amɛ hiɔ naa? Kɛ́ wɔfeɔ nakai lɛ, belɛ eeenyɛ efee akɛ wɔmiihã wɔhenumɔi miiye wɔnɔ. Kɛ́ mɛi tɔ̃ wɔnɔ ni wɔkɛfa amɛ lɛ, no tsɔɔ akɛ wɔheɔ Yehowa nɔ wɔyeɔ. Mɛni hewɔ? Ejaakɛ kɛ́ mɔ ko tɔ̃ wɔnɔ lɛ, etamɔ nɔ ni ehiɛ wɔ nyɔmɔ, tamɔ bɔ ni kɛ́ wɔtɔ̃ Yehowa nɔ lɛ, wɔ  hu wɔhiɛ lɛ nyɔmɔ lɛ. (Luka 11:4, shishigbɛ niŋmaa) Wɔyɛ hemɔkɛyeli akɛ kɛ́ mɔ ko tɔ̃ wɔnɔ ni wɔkɛfa lɛ lɛ, Yehowa baajɔɔ wɔ, ni no jara wa hã wɔ kwraa fe ni wɔbaafee mɔ lɛ nɔ ko kɛtse. No hewɔ lɛ, kɛ́ wɔkɛ mɛi atɔmɔi fa amɛ lɛ, no tsɔɔ akɛ wɔkɛ wɔhiɛ fɔ̃ɔ Yehowa nɔ. Yesu kaselɔi lɛ yɔse akɛ, kɛ́ mɔ ko bɛ hemɔkɛyeli lɛ, enyɛŋ ekɛ mɛi atɔ̃mɔi afa amɛ. Be ni Yesu kɛɛ amɛ ni amɛkɛ mɛi ni tɔ̃ɔ babaoo amɛshiɔ amɛ lɛ po ahe afa amɛ lɛ, amɛkpa lɛ fai akɛ: “Fatamɔ wɔhemɔkɛyeli lɛ he ohã wɔ.”Luka 17:1-5.

11. Mɛni baanyɛ ahã wɔkpoo ŋaawoo?

11 Kɛ́ awo mi ŋaa lɛ, ani mimli fuɔ? Yɛ nɔ najiaŋ ni wɔbaatao tɔ̃mɔi yɛ mɔ ni wo wɔ ŋaa lɛ loo eŋaawoo lɛ he lɛ, esa akɛ wɔkwɛ bɔ ni wɔɔfee wɔkɛ ŋaawoo lɛ atsu nii. (Abɛi 19:20) Kɛ́ awo bo ŋaa lɛ, eji hegbɛ ni oná ni okɛbaajaje osusumɔi, koni ekɛ Yehowa nɔ lɛ akpã gbee. Kaahã nakai hegbɛ lɛ ŋmɛɛ bo!

12. Kɛ́ mɔ ko kɛfee esu akɛ ebaawie eshi mɛi ni nyiɛɔ hiɛ yɛ asafo lɛ mli lɛ, mɛni no baanyɛ atsɔɔ?

12 Ani miwieɔ mishiɔ mɛi ni nyiɛɔ hiɛ yɛ asafo lɛ mli lɛ? Israelbii lɛ hã amaniɛbɔɔ fɔŋ ni saralɔi nyɔŋma lɛ kɛba lɛ he amɛjwɛŋmɔ fɛɛ, ni no hã amɛwie amɛshi Mose kɛ Aaron. Enɛ hewɔ lɛ, Yehowa bi Mose akɛ: “Mɛɛ beyinɔ amɛaahe minɔ amɛye?” (4 Mose 14:2-4, 11) Yehowa na akɛ, Israelbii lɛ kɛ amɛhiɛ efɔ̃ɔɔ enɔ, ejaakɛ amɛwie amɛshi mɛi ni ehala lɛ, ni ji Mose kɛ Aaron. Kɛ́ wɔ hu wɔkɛfee wɔsu akɛ wɔbaawie wɔshi mɛi ni Yehowa ehala akɛ amɛnyiɛ ewebii lɛ ahiɛ ŋmɛnɛ lɛ, no baanyɛ atsɔɔ akɛ hemɔkɛyeli ni wɔyɔɔ yɛ Nyɔŋmɔ mli lɛ mli egbɔjɔ.

13. Kɛ́ wɔna akɛ wɔhemɔkɛyeli lɛ mli egbɔjɔ lɛ, mɛni hewɔ esaaa akɛ wɔnijiaŋ jeɔ wui lɛ?

13 Kɛ́ sanebimɔi nɛɛ ehã ona akɛ ohemɔkɛyeli lɛ mli egbɔjɔ lɛ, onijiaŋ akaje wui.  Kaimɔ akɛ, bɔfo Petro po tsui fã ni ehemɔkɛyeli lɛ gbugbã. Ni Yesu wie etsɔɔ bɔfoi lɛ fɛɛ shii abɔ yɛ ‘amɛhemɔkɛyeli ni faaa’ lɛ hewɔ. (Mateo 16:8) Kɛ̃lɛ, wɔbaanyɛ wɔkase nɔ ko ni he hiaa waa yɛ Petro sane lɛ mli. Kadimɔ nɔ ni Petro fee be ni ehemɔkɛyeli lɛ mli gbɔjɔ ni ebɔi shiumɔ lɛ.

OKƐ OJWƐŊMƆ AMA YESU NƆ KONI OHEMƆKƐYELI LƐ MLI AWA

14, 15. (a) Be ni Petro bɔi shiumɔ lɛ, mɛni efee? (b) Te wɔɔfee tɛŋŋ ‘wɔkwɛ Yesu waa’?

14 Be ni Petro bɔi shiumɔ lɛ, mɛni efee? Petro le seremɔ waa, no hewɔ lɛ kulɛ, ebaanyɛ esere kɛya lɛlɛ lɛ he ekoŋŋ. (Yohane 21:7) Shi efeee nakai, ejaakɛ ekɛ ehe efɔ̃ɔɔ lɛ diɛŋtsɛ ehe nɔ. Ekɛ ejwɛŋmɔ tee Yesu nɔ ekoŋŋ, ni ehã eye ebua lɛ. Kɛ́ wɔyɔse akɛ wɔhemɔkɛyeli lɛ mli egbɔjɔ lɛ, esa akɛ wɔkase Petro. Shi te wɔɔfee tɛŋŋ wɔɔfee nakai?

15 Taakɛ bɔ ni Petro kɛ ejwɛŋmɔ tee Yesu nɔ ekoŋŋ koni eye ebua lɛ lɛ, nakai nɔŋŋ esa akɛ wɔ hu ‘wɔkwɛ Yesu waa.’ (Kanemɔ Hebribii 12:2, 3.) Shi wɔnyɛŋ wɔkɛ wɔhiŋmɛi ana Yesu tamɔ bɔ ni Petro na lɛ lɛ. No hewɔ lɛ, te wɔɔfee tɛŋŋ ‘wɔkwɛ lɛ waa’? Wɔbaanyɛ wɔfee nakai kɛji wɔkase nibii ni etsɔɔ mɛi kɛ nibii ni efee lɛ he sane, ni wɔnyiɛ enɔkwɛmɔnɔ lɛ sɛɛ kpaakpa. Kɛ́ wɔfee nakai lɛ, no baaye abua wɔ ni wɔhemɔkɛyeli lɛ mli awa. Nyɛhãa wɔkwɛa nibii komɛi ni wɔbaanyɛ wɔfee kɛtsɔɔ akɛ wɔmiikase Yesu.

Kɛ́ wɔkɛ wɔjwɛŋmɔ ma Yesu nɔ ni wɔnyiɛ enɔkwɛmɔnɔ lɛ sɛɛ kpaakpa lɛ, wɔhemɔkɛyeli lɛ mli baawa (Kwɛmɔ kuku 15)

16. Mɛɛ gbɛ nɔ Biblia lɛ baanyɛ aye abua wɔ ni wɔhemɔkɛyeli lɛ mli awa?

16 Hã hemɔkɛyeli ni oyɔɔ yɛ nɔ ni Biblia lɛ ewie lɛ mli lɛ mli awa. Yesu ná hemɔkɛyeli akɛ Biblia lɛ ji Nyɔŋmɔ Wiemɔ, ni ŋaawoo ni yɔɔ mli lɛ nɔ bɛ. (Yohane 17:17) Kɛ́ wɔmiitao wɔkase Yesu lɛ, esa akɛ wɔkane Biblia lɛ daa gbi, wɔkase, ni wɔjwɛŋ nibii ni wɔkaseɔ yɛ mli lɛ nɔ. Agbɛnɛ hu, esa akɛ wɔtao nibii ni ekolɛ wɔyiŋ feɔ wɔ kɔshikɔshi yɛ he lɛ amli, koni wɔnu shishi jogbaŋŋ. Akɛ nɔkwɛmɔnɔ lɛ, ani oheɔ oyeɔ kɛ otsui fɛɛ akɛ naagbee gbii lɛ amli wɔyɔɔ lɛ? Kɛ́ oyiŋ feɔ bo kɔshikɔshi yɛ he lɛ, kasemɔ Biblia mli gbalɛi ni tsɔɔ akɛ wɔyɛ naagbee gbii lɛ amli lɛ, koni no ahã ohemɔkɛyeli lɛ mli awa. Ani ootao ni hemɔkɛyeli ni oyɔɔ akɛ Nyɔŋmɔ baaye eshiwoi fɛɛ nɔ lɛ mli awa? No lɛ, kasemɔ Biblia mli gbalɛi ni eba mli momo lɛ ahe sane. Ani oheɔ oyeɔ kɛ otsui fɛɛ akɛ, ŋaawoo ni yɔɔ Biblia lɛ mli lɛ baanyɛ aye abua wɔ ŋmɛnɛ? Kɛ́ oyiŋ feɔ bo kɔshikɔshi yɛ enɛ he lɛ, obaanyɛ okane nyɛmimɛi komɛi ni Biblia lɛ eye ebua amɛ ni amɛfee tsakemɔi yɛ amɛshihilɛ mli lɛ ahe sane. * (Kwɛmɔ shishigbɛ niŋmaa lɛ.)1 Tesalonikabii 2:13.

17. Mɛni ye bua Yesu ni enyɛ ekpee kai ni jaraa anaa? Ni mɛɛ gbɛ nɔ obaanyɛ okase lɛ?

17 Okɛ ojwɛŋmɔ ama nibii kpakpai ni Yehowa ewo shi akɛ ekɛbaaduro wɔ lɛ anɔ. Yesu kɛ ejwɛŋmɔ ma nibii kpakpai ni ebaaná wɔsɛɛ lɛ anɔ, ni enɛ ye bua lɛ ni enyɛ edamɔ kai ni jaraa ni ekɛkpe lɛ anaa. (Hebribii 12:2) Ehãaa nibii ni yɔɔ je lɛ mli lɛ agbala ejwɛŋmɔ. (Mateo 4:8-10) Te obaafee tɛŋŋ okase Yesu? Jwɛŋmɔ nibii kpakpai ni Yehowa ewo shi akɛ ebaafee lɛ anɔ. Feemɔ ohe mfoniri ni oyɛ jeŋ hee lɛ mli. Ŋmalamɔ nibii ni obaasumɔ ni ofee yɛ Paradeiso lɛ mli lɛ oshwie shi loo tɛŋmɔ po. Aloo ŋmalamɔ mɛi komɛi ni abaatee amɛ shi ni obaasumɔ ni okɛ amɛ agba sane lɛ agbɛ́i kɛ nibii ni obaasumɔ ni okɛ amɛ awie he lɛ oshwie shi. Ŋɔɔ nibii fɛɛ ni Nyɔŋmɔ ewo shi akɛ ebaafee lɛ akɛ nibii ni ebaafee ehã bo akɛ mɔ aŋkro.

18. Mɛɛ gbɛ nɔ sɔlemɔ baanyɛ aye abua bo koni ohemɔkɛyeli lɛ mli awa?

 18 Sɔlemɔ ni Yehowa afata ohemɔkɛyeli lɛ he ehã bo. Yesu kɛɛ ekaselɔi lɛ akɛ, amɛsɔle amɛbi Yehowa ni ehã amɛ mumɔ krɔŋkrɔŋ lɛ. (Luka 11:9, 13) Kɛ́ oosɔle ni Yehowa ahã bo mumɔ krɔŋkrɔŋ lɛ, bi lɛ ni ehã ohemɔkɛyeli lɛ mli awa. Hemɔkɛyeli fata mumɔ lɛ yibii lɛ ahe. Tsĩi nibii pɔtɛi ni obaasumɔ ni Yehowa afee ahã bo lɛ atã. Akɛ nɔkwɛmɔnɔ lɛ, kɛ́ oyɔse akɛ ewa hã bo akɛ okɛ mɛi atɔ̃mɔi baafa amɛ lɛ, sɔlemɔ obi Yehowa ni ehã ohemɔkɛyeli lɛ mli awa ni eye ebua bo ni okɛ tɔ̃mɔi afa.

19. Dani obaahala mɔ ko akɛ onaanyo lɛ, mɛni esa akɛ okwɛ?

19 Okɛ mɛi ni yɔɔ hemɔkɛyeli ni mli wa abɔ naanyo. Yesu kɛ mɔ fɛɛ mɔ kɛkɛ ebɔɔɔ naanyo. Bɔfoi lɛ ye Yesu anɔkwa, ni amɛbo lɛ toi yɛ nɔ fɛɛ nɔ mli, no hewɔ lɛ amɛji mɛi ni ekɛbɔ gbagbalii. (Kanemɔ Yohane 15:14, 15.) Kasemɔ Yesu, ni ohala nanemɛi kpakpai. Esa akɛ amɛfee mɛi ni hemɔkɛyeli mli wa, ni boɔ Yesu toi. Nanemɛi kpakpai baaye bo anɔkwa; kɛ́ owo amɛ ŋaa lɛ, amɛbaakpɛlɛ nɔ, ni kɛ́ ehe bahia ni amɛwo bo ŋaa lɛ, amɛbaafee nakai.Lala 141:5.

20. Kɛ́ wɔye wɔbua mɛi krokomɛi ní amɛhemɔkɛyeli lɛ mli awa lɛ, mɛni baajɛ mli aba?

20 Ye obua mɛi krokomɛi ni amɛhemɔkɛyeli lɛ mli awa. Yesu kɛ ewiemɔ kɛ enifeemɔi ye bua ekaselɔi lɛ koni amɛhemɔkɛyeli lɛ mli awa. (Marko 11:20-24) Esa akɛ wɔkase lɛ. Kɛ́ wɔfee nakai lɛ, wɔ diɛŋtsɛ wɔhemɔkɛyeli lɛ mli baawa, ni mɛi ni wɔyeɔ wɔbuaa lɛ hu ahemɔkɛyeli mli baawa. (Abɛi 11:25) Te obaafee tɛŋŋ oye obua mɛi ni yɔɔ oshikpɔŋkuku lɛ mli lɛ? Kɛ́ ootsɔɔ mɛi nii kɛmiijɛ Biblia lɛ mli lɛ, gbalamɔ amɛjwɛŋmɔ kɛya nibii ni tsɔɔ akɛ Nyɔŋmɔ yɛ lɛ anɔ, ni ohã amɛna akɛ esusuɔ wɔhe. Hã amɛna hu akɛ, Biblia lɛ ji Nyɔŋmɔ Wiemɔ. Mɛɛ gbɛ nɔ obaanyɛ oye obua onyɛmimɛi Kristofoi lɛ ni amɛhemɔkɛyeli lɛ mli aya nɔ awa? Kɛ́ oyɔse akɛ nyɛmi ko miiwie mɛi ni nyiɛɔ hiɛ yɛ asafo lɛ mli lɛ ahe nyanyaanya lɛ, tsɔ ŋaa gbɛ nɔ oye obua lɛ ni ehemɔkɛyeli lɛ mli awa ekoŋŋ. Kaaye ohe oyai ni okɛ lɛ kpa bɔɔ. (Yuda 22, 23) Kɛ́ otee skul, ni otsɔɔlɔ lɛ miiwie sutsakemɔ tsɔɔmɔ lɛ he lɛ, ná ekãa ni ofã ohemɔkɛyeli lɛ he. Hã oskulbii lɛ kɛ otsɔɔlɔ lɛ ale akɛ, mɔ ko ni bɔ nibii fɛɛ. Kɛ́ ofee nakai lɛ, ekolɛ nɔ ko kpakpa baajɛ mli aba.

21. Mɛni Yehowa ewo wɔ shi akɛ ebaafee ehã wɔ?

21 Yehowa kɛ Yesu ye bua Petro koni ehemɔkɛyeli lɛ mli awa ni eyiŋ akafee lɛ kɔshikɔshi yɛ nibii ahe. Enɛ hewɔ lɛ, sɛɛ mli lɛ, Petro hemɔkɛyeli lɛ mli bawa waa, ni ebatsɔ nɔkwɛmɔnɔ kɛhã mɛi krokomɛi. Yehowa yeɔ buaa wɔ teŋ mɔ fɛɛ mɔ nakai nɔŋŋ koni wɔdamɔ shi shiŋŋ yɛ hemɔkɛyeli lɛ mli. (Kanemɔ 1 Petro 5:9, 10.) Ebiɔ hiɛmiamɔ dani wɔbaanyɛ wɔná hemɔkɛyeli ni mli wa, shi kɛ́ wɔmia wɔhiɛ wɔfee nakai lɛ, Yehowa baajɔɔ wɔ.

^ kk. 16 Akɛ nɔkwɛmɔnɔ lɛ, obaanyɛ okane saji ni yitso ji, “Biblia lɛ Tsakeɔ Mɛi” ni jeɔ kpo yɛ Buu-Mɔɔ ni ji maŋbii anɔ lɛ mli lɛ.