Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  August 2015

Okɛ Mɛi Fɔji Akabɔ Yɛ Naagbee Gbii Nɛɛ Amli

Okɛ Mɛi Fɔji Akabɔ Yɛ Naagbee Gbii Nɛɛ Amli

“Naanyobɔɔ gbonyo fiteɔ sui kpakpai.”—1 KORINTOBII 15:33.

LALAI: 73, 119

1. Mɛɛ bei amli wɔyɔɔ lɛ?

“BEI krɛdɛɛ ní jaraa” amli wɔyɔɔ lɛ. Kɛjɛ be ni “naagbee gbii lɛ” je shishi yɛ afi 1914 lɛ kɛbaa nɛɛ, je lɛŋ shihilɛ etee nɔ efite. (2 Timoteo 3:1-5) Ni wɔle akɛ ebaafite fe nɛkɛ po, ejaakɛ Biblia lɛ egba akɛ “gbɔmɛi fɔji kɛ shishiulɔi baawo wu yɛ efɔŋ mli.”2 Timoteo 3:13.

2. Ŋmɛnɛ lɛ, mɛni mɛi babaoo kɛjieɔ amɛhiɛtserɛ? (Kwɛmɔ mfoniri ni yɔɔ nikasemɔ lɛ shishijee lɛ.)

2 Ŋmɛnɛ lɛ, nibii ni kɔɔ jeŋba sha, yiwalɛ nifeemɔi, ashwaifeemɔ, loo mumɔi kɛsharamɔ he ji nɔ ni mɛi kɛjieɔ amɛhiɛtserɛ. Akɛ nɔkwɛmɔnɔ lɛ, bei pii lɛ, bɔ ni awieɔ yiwalɛ nifeemɔi kɛ jeŋba sha he yɛ woji amli, sinii amli, kɛ agbɛnɛ hu, yɛ Intanɛt lɛ kɛ TV nɔ lɛ, hãa efeɔ tamɔ nɔ ni tɔmɔ ko kwraa bɛ he. Nibii komɛi yɛ ni be ko ni eho lɛ, kɛ́ mɔ ko fee lɛ, abuɔ lɛ gbɔmɔ gbonyo. Shi ŋmɛnɛ lɛ, mɛi enaaa lɛ nɔ ko dɔŋŋ, ni yɛ maji komɛi anɔ po lɛ, mla ŋmɛɔ gbɛ ni mɛi afee. Shi enɛ etsɔɔɔ akɛ Yehowa nyaa  nifeemɔi nɛɛ ahe.Kanemɔ Romabii 1:28-32.

3. Te mɛi babaoo naa mɛi ni hiɔ shi yɛ Nyɔŋmɔ mlai kɛ eshishitoo mlai anaa lɛ tɛŋŋ?

3 Yɛ klɛŋklɛŋ afii 100 lɛ mli hu lɛ, mɛi kwɛ yiwalɛ nifeemɔi kɛ jeŋba sha kɛjie amɛhiɛtserɛ. Shi Yesu sɛɛnyiɛlɔi lɛ efeee nakai, ejaakɛ amɛhi shi yɛ Nyɔŋmɔ mlai kɛ eshishitoo mlai anaa. Enɛ fee mɛi ni bɔle amɛ lɛ “naakpɛɛ.” No hewɔ lɛ, amɛye amɛhe fɛo ni amɛwa amɛ yi. (1 Petro 4:4) Nakai nɔŋŋ eji ŋmɛnɛ. Mɛi ni hiɔ shi yɛ Nyɔŋmɔ mlai kɛ eshishitoo mlai anaa lɛ ahe feɔ mɛi krokomɛi naakpɛɛ. Biblia lɛ bɔɔ mɛi ni nyiɛɔ Kristo Yesu sɛɛ lɛ kɔkɔ akɛ, “abaawa amɛ hu yi.”2 Timoteo 3:12.

“NAANYOBƆƆ GBONYO FITEƆ SUI KPAKPAI”

4. Mɛni hewɔ esaaa akɛ wɔsumɔɔ je nɛɛ?

4 Kɛ́ wɔmiisumɔ ni wɔfee nɔ ni Nyɔŋmɔ sumɔɔ lɛ, belɛ esaaa akɛ wɔsumɔɔ “je lɛ aloo nibii ni yɔɔ je lɛ mli lɛ.” (Kanemɔ 1 Yohane 2:15, 16.) Satan, ni ji “shihilɛ gbɛjianɔtoo nɛɛ nyɔŋmɔ lɛ,” ji mɔ ni kudɔɔ je lɛ. Etsɔɔ jamɔi, nɔyelii, jarayeli gbɛjianɔtoi, kɛ nibii tamɔ TV, redio, kɛ Intanɛt lɛ nɔ elakaa mɛi. (2 Korintobii 4:4; 1 Yohane 5:19) Wɔsumɔɔɔ ni je lɛ náa wɔnɔ hewalɛ, no hewɔ lɛ, esaaa akɛ wɔkɛ mɛi fɔji bɔɔ. Biblia lɛ bɔɔ wɔ kɔkɔ akɛ: “Nyɛkahãa alakaa nyɛ. Naanyobɔɔ gbonyo fiteɔ sui kpakpai.”1 Korintobii 15:33.

5, 6. Namɛi esaaa akɛ wɔkɛbɔɔ naanyo? Ni mɛni hewɔ?

5 Kɛ́ wɔmiitao ni wekukpaa kpakpa akã he ahi wɔ kɛ Yehowa teŋ lɛ, esaaa akɛ wɔkɛ mɛi ni feɔ nibii fɔji, loo mɛi ni kɛɔ akɛ amɛmiijá Yehowa, shi amɛgboɔ enɔ toi lɛ, bɔɔ naanyo. Kɛ́ mɛi ni tamɔ nakai lɛ yafee esha ko ni yɔɔ hiɛdɔɔ, ni amɛtsakeee amɛtsui lɛ, esa akɛ wɔkɛ amɛ akpa bɔɔ kwraa.Romabii 16:17, 18.

6 Mɛi kaseɔ amɛnanemɛi, ni amɛsumɔɔ ni amɛsa amɛhiɛ. No hewɔ lɛ, kɛ́ wɔkɛ mɛi ni booo Nyɔŋmɔ toi bɔ naanyo lɛ, no baanyɛ aka wɔ ni wɔkase amɛ. Akɛ nɔkwɛmɔnɔ lɛ, kɛ wɔkɛ mɛi ni kɛ amɛhe woɔ bɔlɛnamɔ jeŋba sha mli lɛ bɔ gbagbalii lɛ, ekolɛ wɔ hu wɔkɛ wɔhe baayawo bɔlɛnamɔ jeŋba sha mli. Enɛ eba nyɛmimɛi komɛi anɔ, ni ashwie amɛteŋ mɛi ni tsakeee amɛtsui lɛ kɛje asafo lɛ mli. (1 Korintobii 5:11-13) Kɛ́ mɛi ni ashwie nɛɛ kwɛɛɛ ni amɛbaatsake amɛtsui lɛ, amɛbaayaje shihilɛ ni Petro wie he lɛ mli.Kanemɔ 2 Petro 2:20-22.

7. Namɛi esa akɛ wɔkɛbɔ naanyo gbagbalii?

7 Eyɛ mli akɛ wɔmiisumɔ ni wɔkɛ mɔ fɛɛ mɔ ahi shi jogbaŋŋ moŋ, shi esaaa akɛ wɔkɛ mɛi ni booo Nyɔŋmɔ toi lɛ  bɔɔ naanyo. Esaaa akɛ Yehowa Odasefonyo ko ni boteko gbalashihilɛ mli lɛ kɛ mɔ ko ni ehiii shi yɛ Yehowa mlai kɛ eshishitoo mlai anaa lɛ wɔɔ tsũ kome mli. Nakai nɔŋŋ esaaa akɛ Yehowa Odasefonyo ko kɛ mɔ ko ni abaptisiko lɛ lɛ nyiɛɔ kɛhãa gbalashihilɛ, ni kɛ́ abaptisi mɔ lɛ po, shi eyeee Yehowa anɔkwa lɛ, esaaa akɛ ekɛ lɛ nyiɛɔ. Esa akɛ Nyɔŋmɔ hiɛ duromɔ ni wɔɔná lɛ he ahia wɔ kwraa fe mɛi ni sumɔɔɔ lɛ lɛ ahiɛ duromɔ ni wɔɔná. Esa akɛ wɔkɛ mɛi ni feɔ Nyɔŋmɔ suɔmɔnaa nii lɛ pɛ abɔ naanyo gbagbalii. Yesu wie akɛ: “Mɔ fɛɛ mɔ ni feɔ Nyɔŋmɔ suɔmɔnaa nii lɛ, lɛ ji minyɛmi nuu kɛ minyɛmi yoo kɛ minyɛ.”Marko 3:35.

Esa akɛ Nyɔŋmɔ hiɛ duromɔ ni wɔɔná lɛ he ahia wɔ kwraa fe mɛi ni sumɔɔɔ lɛ lɛ ahiɛ duromɔ ni wɔɔná

8. Mɛni ba Israelbii lɛ anɔ yɛ mɛi fɔji ni amɛkɛyabɔ lɛ hewɔ?

8 Mɛi ni kɛ mɛi fɔji bɔɔ lɛ eyagbeee naa ekpakpa. Akɛ nɔkwɛmɔnɔ lɛ, susumɔ nɔ ni ba Israelbii lɛ anɔ lɛ he okwɛ. Dani amɛbaayashɛ Shiwoo Shikpɔŋ lɛ nɔ lɛ, Yehowa bɔ amɛ kɔkɔ yɛ mɛi ni yɔɔ jɛmɛ lɛ ahe. Ekɛɛ amɛ akɛ: “Kaajá amɛnyɔŋmɔi lɛ, ni kaasɔmɔ amɛ, ni asaŋ kaafee amɛnifeemɔnii lɛ hu, shi moŋ butumɔ amɛ, ni okumɔkumɔɔ amɛmagai lɛ. Shi nyɛsɔmɔa Yehowa, nyɛ-Nyɔŋmɔ lɛ.” (2 Mose 23:24, 25) Ani Israelbii lɛ bo Nyɔŋmɔ kɔkɔbɔɔ lɛ toi? Dabi. Amɛteŋ mɛi babaoo booo toi, ni amɛyeee lɛ anɔkwa. (Lala 106:35-39) Mɛni jɛ mli kɛba? Yehowa kpoo Israel maŋ lɛ, ni ehala Kristofoi asafo lɛ akɛ emaŋ.Mateo 23:38; Bɔfoi 2:1-4.

KWƐMƆ JOGBAŊŊ YƐ NIBII NI OKANEƆ KƐ NIBII NI OKWƐƆ LƐ AHE

9. Mɛni hewɔ nibii ni wɔkwɛɔ, nibii ni wɔkaneɔ, kɛ nibii ni wɔboɔ toi lɛ baanyɛ aye wɔ awui lɛ?

9 Nibii pii ni ajieɔ yɛ TV nɔ lɛ baanyɛ afite wekukpaa ni yɔɔ wɔ kɛ Yehowa teŋ lɛ, ni nakai nɔŋŋ eji yɛ nibii ni yɔɔ Intanɛt lɛ nɔ, woji amli, kɛ hei krokomɛi lɛ agbɛfaŋ. Nibii nɛɛ wooo mɛi hewalɛ ni amɛkɛ amɛhiɛ afɔ̃ Yehowa kɛ eshiwoi lɛ anɔ. Moŋ lɛ, amɛwoɔ mɛi hewalɛ ni amɛkɛ amɛhiɛ afɔ̃ Satan jeŋ fɔŋ nɛɛ nɔ. No hewɔ lɛ, ehe miihia ni wɔkwɛ wɔhe nɔ jogbaŋŋ. Esaaa akɛ wɔkwɛɔ nɔ ko ni baanyɛ ahã wɔshwe nibii ni yɔɔ je lɛ mli lɛ, ni asaŋ esaaa akɛ wɔboɔ toi, loo wɔkaneɔ hu.Tito 2:12.

10. Mɛni baaba nibii fɔji ni mɛi kaneɔ kɛ nɔ ni amɛkwɛɔ lɛ anɔ?

10 Etsɛŋ, anaŋ nibii fɔji ni yɔɔ Intanɛt lɛ nɔ, nɔ ni mɛi kaneɔ yɛ woji amli, kɛ nɔ ni amɛkwɛɔ yɛ TV nɔ lɛ dɔŋŋ, ejaakɛ abaakpãtã Satan je lɛ hiɛ. Biblia lɛ kɛɔ akɛ: “Je lɛ kɛ nɔ fɛɛ nɔ ni yɔɔ mli ni mɛi shweɔ lɛ miiho kɛmiiya, shi mɔ ni feɔ Nyɔŋmɔ suɔmɔnaa nii lɛ baahi shi kɛya naanɔ.” (1 Yohane 2:17) Lalatsɛ lɛ hu lá akɛ: “Efɔŋfeelɔi lɛ, aaafolɔ amɛ ashwie.” Shi ewie yɛ “jalɔi lɛ,” ni ji “mɛi ni kwɛɔ Yehowa gbɛ lɛ” ahe akɛ: “Shikpɔŋ lɛ aaatsɔ amɛnɔ ni amɛaahi nɔ daa.”Lala 37:9, 11, 29.

11. Mɛni Nyɔŋmɔ feɔ kɛyeɔ buaa wɔ koni wɔya nɔ wɔsɔmɔ lɛ?

11 Yehowa asafo lɛ yeɔ buaa wɔ koni wɔhi shi yɛ gbɛ ni baahã wɔná naanɔ wala nɔ. Efeee enii tamɔ Satan je lɛ. Yesu sɔle ehã Yehowa akɛ: “Enɛ  ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ.” (Yohane 17:3) Yehowa tsɔɔ asafo lɛ nɔ eduroɔ wɔ nɔ fɛɛ nɔ ni baahã wɔle lɛ jogbaŋŋ. Akɛ nɔkwɛmɔnɔ lɛ, asafo lɛ efee magazin, broshuɔi, woji, vidioi, kɛ Wɛb saitii ni baaye abua wɔ koni wɔya nɔ wɔsɔmɔ Nyɔŋmɔ. Kɛfata he lɛ, etoɔ kpeei ahe gbɛjianɔ daa otsi yɛ asafoi fe 110,000 ni yɔɔ je lɛŋ fɛɛ lɛ amli. Nibii ni wɔkaseɔ yɛ Biblia lɛ mli yɛ kpeei nɛɛ, wɔkpeei bibii lɛ, kɛ wɔkpeei wuji lɛ ashishi lɛ hãa hemɔkɛyeli ni wɔyɔɔ yɛ Yehowa kɛ eshiwoi lɛ amli lɛ mli waa.Hebribii 10:24, 25.

ESA AKƐ WƆBOTE GBÃLA MLI “YƐ NUŊTSƆ LƐ MLI PƐ”

12. Kɛ́ Biblia lɛ kɛɛ abote gbãla mli “yɛ Nuŋtsɔ lɛ mli pɛ” lɛ, te etsɔɔ tɛŋŋ?

12 Ehe miihia ni Kristofoi ni miisumɔ ni amɛbote gbãla mli lɛ akwɛ jogbaŋŋ yɛ mɛi ni amɛkɛbɔɔ lɛ ahe. Nyɔŋmɔ Wiemɔ lɛ bɔɔ wɔ kɔkɔ akɛ: “Nyɛkɛ mɛi ni heee yeee lɛ akahia kɔɔŋtso kome shishi, ejaakɛ eŋmɛŋ pɛpɛɛpɛ. Ejaakɛ mɛɛ naanyobɔɔ yɔɔ jalɛ kɛ mlatɔmɔ teŋ? Aloo mɛɛ tsakpãa yɔɔ la kɛ duŋ teŋ?” (2 Korintobii 6:14) Biblia lɛ kɛɔ Nyɔŋmɔ tsuji akɛ, amɛbote gbãla mli “yɛ Nuŋtsɔ lɛ mli pɛ,” ni tsɔɔ akɛ, amɛkɛ mɔ ko ni ejɔɔ ehe nɔ ni abaptisi lɛ, ni hiɔ shi yɛ Yehowa mlai kɛ eshishitoo mlai anaa lɛ pɛ abote gbãla mli. (1 Korintobii 7:39) Kɛ́ okɛ mɔ ko ni sumɔɔ Yehowa hi shi lɛ, ebaaye ebua bo ni oye Nyɔŋmɔ anɔkwa.

Kɛ́ okɛ mɔ ko ni sumɔɔ Yehowa hi shi lɛ, ebaaye ebua bo ni oye Nyɔŋmɔ anɔkwa

13. Mɛɛ mla ni kɔɔ gbalashihilɛ he Nyɔŋmɔ wo Israelbii lɛ?

13 Yehowa le nɔ ni hi hã wɔ, ni efamɔ akɛ wɔbote gbãla mli “yɛ Nuŋtsɔ lɛ mli pɛ” lɛ jeee nɔ ko hee. Akɛ nɔkwɛmɔnɔ lɛ, susumɔ mla ko ni Yehowa tsɔ Mose nɔ ewo Israelbii lɛ yɛ mɛi ni sɔmɔɔɔ lɛ lɛ ahe lɛ he okwɛ. Mla lɛ kɛɔ akɛ: “Okɛ amɛ akaye yoowɛɛ; kaaŋɔ obiyoo ohã ebinuu gbãla, ni kaawɛ ebiyoo ohã obinuu. Ejaakɛ amɛaahã obii lɛ akpale yɛ misɛɛ, ní amɛyasɔmɔ nyɔŋmɔi krokomɛi, ni Yehowa mli aaawo nyɛ la, ni eeekpãtã nyɛhiɛ oya.”5 Mose 7:3, 4.

14, 15. Be ni Solomon ku ehiɛ efɔ̃ Yehowa mla lɛ nɔ lɛ, mɛni ba enɔ?

14 Be ni Solomon batsɔ Israel maŋtsɛ lɛ sɛɛ etsɛɛɛ lɛ, esɔle ni Yehowa aduro lɛ hiɛshikamɔ, ni Yehowa bo lɛ toi. No hewɔ lɛ, Maŋtsɛ Solomon hiɛshikamɔ lɛ, kɛ maŋ lɛ shweremɔ lɛ, jije kɛtee he fɛɛ he. Anɔkwa, be ni Sheba maŋnyɛ lɛ basara Solomon lɛ, Solomon hiɛshikamɔ lɛ hã enaa kpɛ ehe aahu akɛ, ewie akɛ: “Onilee kɛ oshweremɔ lɛ fa aahu fe yijiemɔ ni minu lɛ tete.” (1 Maŋtsɛmɛi 10:7) Shi Solomon ku ehiɛ efɔ̃ Nyɔŋmɔ mla lɛ nɔ, ni ekɛ mɛi ni sɔmɔɔɔ Yehowa bote gbãla mli. Nɔ  ni ba enɔ lɛ ji nikasemɔ kpele kɛhã wɔ.Jajelɔ 4:13.

15 Eyɛ mli akɛ Yehowa jɔɔ Solomon moŋ, shi ebooo Nyɔŋmɔ toi. Solomon “sumɔ maŋsɛɛ yei pii” ní sɔmɔɔɔ Yehowa, ni be ni yi wulaa shi lɛ, ená ŋamɛi 700 kɛ hemɛi 300. Mɛni jɛ mli kɛba? “Be ni Solomon gbɔ lɛ, eŋamɛi lɛ dɔ etsui kɛyanyiɛ nyɔŋmɔi krokomɛi asɛɛ. . . . Ni Solomon fee nɔ ni ji efɔŋ yɛ Yehowa hiɛ.” (1 Maŋtsɛmɛi 11:1-6) Mɛi fɔji ni ekɛbɔ lɛ ná enɔ hewalɛ, ni eyeee Yehowa anɔkwa. Kɛ́ enɛ nyɛ eba Solomon nɔ lɛ, belɛ ebaanyɛ eba wɔteŋ mɔ fɛɛ mɔ nɔ. No hewɔ lɛ, ekaba wɔjwɛŋmɔŋ kɔkɔɔkɔ akɛ wɔkɛ mɔ ko ni sumɔɔɔ Yehowa baabote gbãla mli!

16. Mɛɛ ŋaa Biblia lɛ woɔ mɛi ni bote gbãla mli dani amɛbale anɔkwale lɛ?

16 Ni kɛ́ mɔ ko bote gbãla mli dani ebale anɔkwale lɛ hu? Biblia lɛ kɛɔ akɛ: “Nyɛ ŋamɛi lɛ hu, nyɛŋɔa nyɛhe nyɛwoa nyɛwumɛi ashishi, koni kɛ́ amɛteŋ mɛi komɛi booo wiemɔ lɛ toi lɛ, atsɔ nyɛjeŋba nɔ ní nine ashɛ amɛnɔ ní wiemɔ fataaa he.” (1 Petro 3:1) Enɛ baanyɛ akɔ mɛi ni amɛŋamɛi jáaa Yehowa lɛ hu ahe. Ŋaa ni Nyɔŋmɔ Wiemɔ lɛ woɔ lɛ yɛ faŋŋ, akɛ: Feemɔ ohe wu loo ŋa kpakpa, ni okɛ Nyɔŋmɔ gbɛtsɔɔmɔi ni kɔɔ gbalashihilɛ he lɛ atsu nii. Kɛkɛ lɛ, kɛ́ ohefatalɔ lɛ na tsakemɔi ni ofee lɛ, ekolɛ no baatsirɛ lɛ ni ebasɔmɔ Yehowa. Nyɛmimɛi pii ená enɛ mli niiashikpamɔ.

 OKƐ MƐI NI SUMƆƆ YEHOWA ABƆ NAANYO

17, 18. Mɛni hewɔ Nyɔŋmɔ baa Noa yi yɛ Nu Afua lɛ mli lɛ? Mɛni hewɔ Kristofoi ni hi shi yɛ klɛŋklɛŋ afii 100 lɛ mli lɛ ayi ná wala be ni akpãtã Yerusalem hiɛ lɛ?

17 Kɛ́ okɛ mɛi fɔji bɔ lɛ, amɛbaahã ogbo Yehowa nɔ toi, shi kɛ́ okɛ mɛi kpakpai bɔ lɛ, amɛbaaye amɛbua bo ni oye lɛ anɔkwa. Susumɔ Noa he okwɛ. Yɛ Noa beiaŋ lɛ, “gbɔmɛi anɔfɔŋfeemɔ fá yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ.” (1 Mose 6:5) Mɛi lɛ fee efɔŋ aahu akɛ, Yehowa kpɛ eyiŋ akɛ ebaakpãtã nakai jeŋ fɔŋ lɛ hiɛ. Shi Noa ba ejeŋ jogbaŋŋ. Biblia lɛ kɛɔ akɛ, “jalɔ” ji lɛ, ni ‘ekɛ Nyɔŋmɔ nyiɛ.’1 Mose 6:7-9.

18 Noa kɛ mɛi ni sumɔɔɔ Yehowa ebɔɔɔ. Ekɛ eweku lɛ kɛ amɛbe kɛ hewalɛ fɛɛ kpɛ adeka lɛ, ni Biblia lɛ wie ehe hu akɛ “jalɛ shiɛlɔ.” (2 Petro 2:5) Noa, eŋa lɛ, amɛbihii etɛ lɛ, kɛ amɛbihii lɛ aŋamɛi lɛ hi shi akɛ weku diɛŋtsɛ. Amɛkɛ amɛbe kɛ hewalɛ tsu nibii ni sa Nyɔŋmɔ hiɛ. Enɛ hewɔ lɛ, ebaa amɛyi kɛfo Nu Afua lɛ. Mɛi fɛɛ ni yɔɔ shikpɔŋ lɛ nɔ ŋmɛnɛ lɛ ji Noa kɛ eweku lɛ shwiei, no hewɔ lɛ, esa akɛ wɔhiɛ asɔ nɔ ni amɛfee lɛ waa; amɛbo Yehowa toi, ni amɛkɛ mɛi fɔji ebɔɔɔ. Kristofoi ni hi shi yɛ klɛŋklɛŋ afii 100 lɛ mli lɛ hu kɛ mɛi ni sumɔɔɔ Yehowa ebɔɔɔ. Amɛbo Yehowa toi, ni no hewɔ lɛ, be ni akpãtã Yerusalem hiɛ yɛ afi 70 Ŋ.B. lɛ, amɛyi ná wala.Luka 21:20-22.

Kɛ́ wɔkɛ mɛi ni sumɔɔ Yehowa bɔ lɛ, no baaye abua wɔ ni wɔnyɛ wɔfee bɔ ni shihilɛ baaji yɛ jeŋ hee lɛ mli lɛ he mfoniri (Kwɛmɔ kuku 19)

19. Mɛni baaye abua wɔ ni wɔye Yehowa anɔkwa?

19 Taakɛ Noa kɛ eweku lɛ, kɛ Kristofoi ni hi shi yɛ klɛŋklɛŋ afii 100 lɛ mli lɛ fee lɛ, wɔ hu wɔkɛ mɛi ni sumɔɔɔ Yehowa ebɔɔɔ. Wɔyɛ nyɛmimɛi akpekpei abɔ ni wɔbaanyɛ wɔkɛbɔ naanyo. Nyɛmimɛi nɛɛ baaye abua wɔ ni ‘wɔdamɔ shi shiŋŋ yɛ hemɔkɛyeli lɛ mli’ yɛ bei ni jaraa nɛɛ amli. (1 Korintobii 16:13; Abɛi 13:20) Bo lɛ susumɔ bɔ ni wɔmii baashɛ wɔhe be ni wɔfo jeŋ fɔŋ nɛɛ naagbee lɛ, ni wɔyashɛ jeŋ hee ni Yehowa kɛbaa lɛ mli lɛ he okwɛ! No hewɔ lɛ, nyɛhãa wɔtswaa wɔfai shi ŋmɛnɛ, akɛ, wɔkɛ mɛi fɔji ebɔŋ!