Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) MAY 2015

Obaanyɛ Owu Oshi Satan—Ni Oye Enɔ Kunim!

Obaanyɛ Owu Oshi Satan—Ni Oye Enɔ Kunim!

“Nyɛdamɔa shi shiŋŋ yɛ hemɔkɛyeli lɛ mli nyɛtsĩa [Satan] gbɛ.”—1 PETRO 5:9.

1. (a) Mɛni hewɔ amrɔ nɛɛ ji be ni ehe miihia waa ni wɔwu wɔshi Satan lɛ? (b) Te wɔfeɔ tɛŋŋ wɔleɔ akɛ wɔbaanyɛ wɔye kunim yɛ ta ni wɔkɛ Satan wuɔ lɛ mli?

SATAN miiwu eeshi mɛi ni afɔ amɛ mu lɛ ateŋ mɛi ni yɔɔ shikpɔŋ lɛ nɔ lolo lɛ, kɛ “gwantɛŋi krokomɛi” lɛ. (Yohane 10:16) Abonsam miitao efite Yehowa tsuji babaoo ahemɔkɛyeli bɔ ni ebaanyɛ, ejaakɛ ele akɛ be fioo kɛkɛ eyɔɔ. (Kanemɔ Kpojiemɔ 12:9, 12.) Shi wɔbaanyɛ wɔye kunim yɛ ta ni wɔkɛ Satan wuɔ lɛ mli. Biblia lɛ kɛɔ akɛ: “Nyɛtsĩa Abonsam gbɛ, ni ebaajo nyɛnaa foi.”Yakobo 4:7.

2, 3. (a) Mɛni hewɔ Satan miisumɔ ni mɛi ahe aye akɛ ebɛ shihilɛ mli lɛ? (b) Mɛni hewɔ oheɔ oyeɔ akɛ Satan yɛ lɛɛlɛŋ lɛ?

2 Mɛi pii susuɔ akɛ nilee bɛ mli akɛ mɔ ko baahe aye akɛ Satan yɛ. Efeɔ amɛ akɛ woji, sinii, kɛ vidio gemisii amli pɛ anaa Satan kɛ edaimonioi lɛ yɛ. Mɛi ni hiɛ susumɔ ni tamɔ nɛkɛ lɛ kɛɔ akɛ, mɛi ni jwɛŋmɔ mli gbeleko pɛ heɔ yeɔ akɛ mumɔi fɔji yɛ. Ani egbaa Satan naa akɛ mɛi heee amɛyeee akɛ lɛ kɛ edaimonioi lɛ yɛ lɛɛlɛŋ? Dabi, egbaaa enaa kwraa. Ewaaa kɛhãaa Satan akɛ ebaalaka mɛi ni heee yeee akɛ eyɛ  lɛ. (2 Korintobii 4:4) Anɔkwa, eesumɔ ni mɛi babaoo aná susumɔ ni tamɔ nɛkɛ, bɔ ni afee ni enyɛ elaka amɛ.

3 Akɛ Yehowa tsuji lɛ, alakako wɔ. Wɔle akɛ Abonsam yɛ lɛɛlɛŋ. Te wɔfeɔ tɛŋŋ wɔleɔ enɛ? Biblia lɛ kɛɔ akɛ Satan tsɔ onufu nɔ ekɛ Hawa wie. (1 Mose 3:1-5) Efolɔ Hiob naa yɛ Yehowa hiɛ. (Hiob 1:9-12) Eka Yesu. (Mateo 4:1-10) Ni be ni Yesu batsɔ Maŋtsɛ yɛ afi 1914 lɛ, Satan kɛ mɛi ni afɔ amɛ mu ni yɔɔ shikpɔŋ lɛ nɔ lolo lɛ bɔi ‘wuu.’ (Kpojiemɔ 12:17) Ta nɛɛ bako naagbee, ejaakɛ Abonsam miibɔ mɔdɛŋ lolo ni efite mɛi ni afɔ amɛ mu lɛ kɛ gwantɛŋi krokomɛi lɛ ahemɔkɛyeli. Ja wɔwu wɔshi Satan, ni wɔdamɔ shi shiŋŋ yɛ hemɔkɛyeli lɛ mli dani wɔbaanyɛ wɔye kunim yɛ ta nɛɛ mli. Nikasemɔ nɛɛ baatsɔɔ wɔ gbɛi etɛ ni wɔbaanyɛ wɔtsɔ nɔ wɔfee nakai.

KWA HENƆWOMƆ

4. Mɛni hewɔ wɔbaanyɛ wɔkɛɛ akɛ mɔ ko mɔ ko bɛ je nɛɛ mli ni woɔ ehe nɔ fe Satan?

4 Satan woɔ ehe nɔ waa diɛŋtsɛ. Efeee bɔfo fɔŋ nɛɛ hiɛgbele akɛ ebaate shi ewo hegbɛ ni Nyɔŋmɔ yɔɔ akɛ eyeɔ ebɔɔ nii lɛ anɔ lɛ, ní eka akɛ ebaahã mɛi krokomɛi ajá lɛ, moŋ fe ni amɛbaajá Yehowa. Mɔ ko mɔ ko bɛ je nɛɛ mli ni woɔ ehe nɔ fe Satan. Enɛ hewɔ lɛ, gbɛ kome ni wɔbaanyɛ wɔtsɔ nɔ wɔwu wɔshi Satan ji, ni wɔbaakwa henɔwomɔ, ni wɔba wɔhe shi.Kanemɔ 1 Petro 5:5.

5, 6. (a) Ani eji tɔmɔ akɛ wɔmii baashɛ wɔhe yɛ nɔ ko ni wɔyɔɔ loo nɔ ko ni wɔnyɛ wɔfee lɛ he? Tsɔɔmɔ mli. (b) Mɛni ji henɔwomɔ? Ni mɛɛ Biblia mli nɔkwɛmɔnii hãa wɔnaa akɛ henɔwomɔ ehiii?

5 Ani eji tɔmɔ akɛ wɔmii baashɛ wɔhe yɛ nɔ ni wɔ diɛŋtsɛ loo mɛi ni bɛŋkɛ wɔ lɛ yɔɔ loo amɛnyɛ amɛfee lɛ he? Dabi. Bɔfo Paulo kɛɛ Kristofoi ni yɔɔ Tesalonika lɛ akɛ: “Wɔ diɛŋtsɛ wɔkɛ nyɛ shiɔ wɔtsitsi yɛ Nyɔŋmɔ asafoi lɛ amli, yɛ nyɛshifimɔ kɛ nyɛhemɔkɛyeli yɛ yiwai kɛ shihilɛi ni mli wawai ni nyɛtsɔɔ mli lɛ fɛɛ mli lɛ hewɔ.” (2 Tesalonikabii 1:4) No hewɔ lɛ, ejeee tɔmɔ akɛ wɔmii baashɛ wɔhe yɛ nɔ ni mɛi krokomɛi loo wɔ diɛŋtsɛ wɔnyɛ wɔtsu lɛ he. Yɛ anɔkwale mli lɛ, henumɔ ni tamɔ nakai lɛ he baanyɛ aba sɛɛnamɔ kɛhã wɔ po. No hewɔ lɛ, esaaa akɛ wɔhiɛ gboɔ yɛ weku, shihilɛ mli ni wɔjɛ, loo he ni wɔda yɛ lɛ hewɔ.Bɔfoi 21:39.

6 Kɛ́ nakai lɛ, belɛ mɛni tuuntu ji henɔwomɔ? Kɛ́ mɔ ko woɔ ehe nɔ lɛ, no tsɔɔ akɛ enaa ehe tsɔ, ni enuɔ he akɛ ehi fe mɛi krokomɛi. Yehowa nyɛɔ henɔwomɔ. (Ezekiel 33:28; Amos 6:8) Subaŋ fɔŋ nɛɛ baanyɛ afite wekukpaa ni kã wɔ kɛ mɛi krokomɛi ateŋ lɛ, ni ebaanyɛ efite wekukpaa ni kã wɔ kɛ Yehowa teŋ lɛ po. Mɛi ni woɔ amɛhe nɔ lɛ amli fuɔ kɛ́ awo amɛ ŋaa, ni yɛ nɔ najiaŋ ni amɛkɛ ŋaawoo baatsu nii lɛ, amɛkpoɔ. (Lala 141:5) Kɛ́ mɔ ko gbeɔ edaaŋ loo epupuɔ ehe tamɔ Satan lɛ, Satan náa miishɛɛ pi. Bo diɛŋtsɛ kwɛmɔ bɔ ni Satan mii shɛ ehe be ni Nimrod, Farao, kɛ Absalom pupuu amɛhe, ní amɛwo amɛhe nɔ lɛ! (1 Mose 10:8, 9; 2 Mose 5:1, 2; 2 Samuel 15:4-6) Henɔwomɔ fata nibii ni fite wekukpaa ni yɔɔ Kain kɛ Nyɔŋmɔ teŋ lɛ ahe. Yehowa diɛŋtsɛ wo Kain ŋaa, shi henɔwomɔ hewɔ lɛ, Kain booo toi. Ekpiliŋ etsui, eku ehiɛ efɔ̃ Nyɔŋmɔ kɔkɔbɔɔ lɛ nɔ, ni eshashaooo shi kwraa akɛ ebaafee esha eshi Yehowa.1 Mose 4:6-8.

7, 8. (a) Te mɛi ni kwɛɔ hiɛiaŋ lɛ feɔ amɛnii tɛŋŋ? Ni mɛni hewɔ abaanyɛ akɛɛ akɛ henɔwomɔ ji nɔ ni hãa amɛfeɔ nakai lɛ? (b) Mɛɛ gbɛ nɔ henɔwomɔ baanyɛ afite toiŋjɔlɛ ni yɔɔ asafo lɛ mli lɛ?

7 Ŋmɛnɛ lɛ, mɛi ni woɔ amɛhe nɔ lɛ  feɔ nibii gbohii babaoo. Bei pii lɛ, henɔwomɔ ji nɔ ni hãa mɛi kwɛɔ hiɛiaŋ. Mɛi ni kwɛɔ hiɛiaŋ lɛ susuɔ akɛ, he ni mɔ ko jɛ lɛ ni tsɔɔ sui kɛ nyɛmɔi ni eyɔɔ, ni akɛ mɛi ni jɛ hei pɔtɛi komɛi lɛ hi fe mɛi ni jɛ hei krokomɛi. Amɛteŋ mɛi komɛi hu kɛ mɛi krokomɛi yeee yɛ he ni amɛjɛ loo mɛi ni amɛji lɛ hewɔ. Su gbonyo nɛɛ kɛ nɔmɔi kɛ tai eba, ni ehã ashwie lá shi babaoo.

Henɔwomɔ baanyɛ afite toiŋjɔlɛ ni yɔɔ asafo lɛ mli lɛ

8 Ekã shi faŋŋ akɛ, esaaa akɛ nɔ ko ni tamɔ nakai yaa nɔ yɛ Kristofoi ateŋ. Kɛ̃lɛ, bei komɛi lɛ, henɔwomɔ hãa nyɛmimɛi kɛ amɛhe béɔ, ni enɛ baanyɛ afite nii waa. Nakai ji bɔ ni eba lɛ yɛ Kristofoi komɛi ni hi shi yɛ klɛŋklɛŋ afii 100 lɛ mli lɛ ateŋ. No hewɔ lɛ, Yakobo bi amɛ sane ni yɔɔ hiɛdɔɔ nɛɛ, akɛ: “Nɛgbɛ tawui kɛ nɔmɔi ni yɔɔ nyɛteŋ lɛ jɛ?” (Yakobo 4:1) Kɛ́ wɔnyɛ mɛi krokomɛi, ni wɔnu he akɛ wɔhi fe amɛ lɛ, wɔbaanyɛ wɔwie nɔ ko loo wɔfee nɔ ko ni baadɔ amɛ waa. (Abɛi 12:18) No hewɔ lɛ, eyɛ faŋŋ akɛ, henɔwomɔ baanyɛ afite toiŋjɔlɛ ni yɔɔ asafo lɛ mli lɛ.

9. Mɛɛ gbɛ nɔ Biblia lɛ yeɔ ebuaa wɔ koni wɔwu wɔshi hiɛiaŋkwɛmɔ kɛ henɔwomɔ? (Kwɛmɔ mfoniri ni yɔɔ nikasemɔ lɛ shishijee lɛ.)

9 Kɛ́ wɔnuɔ he akɛ wɔhi fe mɛi krokomɛi lɛ, esa akɛ wɔkai akɛ, “Yehowa miihi mɔ fɛɛ mɔ ni woɔ ehe yɛ etsui mli.” (Abɛi 16:5) Agbɛnɛ hu, esa akɛ wɔpɛi wɔtsui mli, ni wɔbi wɔhe akɛ, ‘Ani minuɔ he akɛ mihi fe mɛi ni jɛ weku, maŋ, loo shihilɛ kroko mli lɛ?’ Kɛ́ wɔyɔse akɛ wɔnuɔ he nakai lɛ, belɛ etamɔ nɔ ni wɔhiɛ ekpa nɔ akɛ, “gbɔmɔ kome mli [Nyɔŋmɔ jɛ] efee gbɔmɛi ajeŋmaji fɛɛ.” (Bɔfoi 17:26) Yɛ gbɛ ko nɔ lɛ, wɔ fɛɛ wɔjɛ weku kome mli, ejaakɛ wɔ fɛɛ wɔjɛ Adam mli. No hewɔ lɛ, nilee bɛ mli kwraa akɛ wɔbaasusu akɛ Nyɔŋmɔ bɔ mɛi komɛi jogbaŋŋ fe mɛi krokomɛi. Kɛ́ wɔhiɛ jwɛŋmɔ ni tamɔ nakai lɛ, belɛ wɔmiiŋmɛ Satan gbɛ ni efite suɔmɔ kɛ ekomefeemɔ ni yɔɔ Kristofoi ateŋ lɛ. (Yohane 13:35) Ja wɔkwa henɔwomɔ dani wɔbaanyɛ wɔye kunim yɛ ta ni wɔkɛ Satan wuɔ lɛ mli.Abɛi 16:18.

KAATIU HELOONAA NIBII ASƐƐ, NI KAASUMƆ JE LƐ HU

10, 11. (a) Mɛni hewɔ ewaaa kwraa akɛ mɔ ko baasumɔ je lɛ? (b) Mɛni jɛ suɔmɔ ni Dema yasumɔ je lɛ lɛ mli kɛba?

10 Satan ji “je nɛɛ nɔyelɔ,” ni lɛ nɔŋŋ ekudɔɔ je lɛ. (Yohane 12:31; 1 Yohane 5:19) Nibii ni mɛi woɔ he hewalɛ yɛ je lɛ mli lɛ babaoo teɔ shi woɔ Biblia mli shishitoo mlai. Eyɛ mli akɛ jeee nɔ fɛɛ nɔ ni yɔɔ je lɛ mli lɛ ji nɔ fɔŋ moŋ, shi wɔle akɛ shwelɛi ni wɔyɔɔ lɛ ahewɔ lɛ, Satan baanyɛ atsɔ nibii ni yɔɔ je lɛ mli lɛ anɔ eka wɔ ni wɔfee esha loo wɔsumɔ je lɛ, koni wɔkpa Yehowa jamɔ.Kanemɔ 1 Yohane 2:15, 16.

11 Kristofoi ni hi shi yɛ klɛŋklɛŋ afii 100 lɛ mli lɛ ateŋ mɛi komɛi yasumɔ je lɛ. Akɛ nɔkwɛmɔnɔ lɛ, Paulo ŋma akɛ: “Dema eshi mi . . . akɛni esumɔɔ shihilɛ gbɛjianɔtoo ni yɔɔ amrɔ nɛɛ hewɔ.” (2 Timoteo 4:10) Biblia lɛ etsɔɔɔ wɔ nɔ pɔtɛɛ ni yɔɔ je lɛ mli ni Dema yasumɔ ní hã eshi Paulo. Eeenyɛ efee akɛ, Dema yasumɔ heloonaa nibii fe Yehowa  sɔɔmɔ lɛ. Kɛ́ nakai ni lɛ, belɛ hegbɛi kpelei ni kulɛ Dema baanyɛ aná yɛ Nyɔŋmɔ sɔɔmɔ lɛ mli lɛ ŋmɛɛ lɛ. Mɛni Dema ná yɛ nɔ ni efee lɛ mli? Enáaa nɔ ko nɔ ko. Kulɛ Dema baanyɛ aya nɔ eye ebua Paulo, ejaakɛ nɔ ko nɔ ko bɛ je nɛɛ mli ni hi fe jɔɔmɔi ni kulɛ Yehowa baahã ená lɛ!Abɛi 10:22.

Ekaba kɔkɔɔkɔ akɛ wɔbaahã shika kɛ heloonaa nibii ahe ahia wɔ fe naanyobɔɔ ni yɔɔ wɔ kɛ Yehowa teŋ lɛ

12. Mɛɛ gbɛ nɔ Satan baanyɛ atsɔ wɔshwelɛi anɔ ekɛ “ninámɔ lakamɔ lɛ” aka wɔ?

12 Nɔ ni ba Dema nɔ lɛ baanyɛ aba wɔ hu wɔnɔ. Akɛ Kristofoi lɛ, ekã shi faŋŋ akɛ wɔmiisumɔ ni wɔkwɛ wɔhe kɛ wɔwekui. (1 Timoteo 5:8) Be ni Yehowa bɔ Adam kɛ Hawa lɛ, ekɛ amɛwo abɔɔ fɛfɛo ko mli, ni enɛ tsɔɔ akɛ eesumɔ ni wɔná miishɛɛ. (1 Mose 2:9) Shi Satan baanyɛ atsɔ shwelɛ ni wɔyɔɔ akɛ wɔná miishɛɛ yɛ shihilɛ mli lɛ nɔ ekɛ “ninámɔ lakamɔ lɛ” aka wɔ. (Mateo 13:22) Efeɔ mɛi pii akɛ shika kɛ heloonaa nibii ji nɔ ni baahã amɛná miishɛɛ loo amɛye omanye. Kɛ́ wɔ hu wɔná susumɔ ni tamɔ nɛkɛ lɛ, naanyobɔɔ ni yɔɔ wɔ kɛ Yehowa teŋ lɛ baanyɛ afite. Nakai naanyobɔɔ lɛ ji nii ni jara wa fe fɛɛ ni wɔyɔɔ. Yesu bɔ esɛɛnyiɛlɔi lɛ kɔkɔ akɛ: “Mɔ ko nyɛŋ atsɔ nyɔŋ ehã nuŋtsɔmɛi enyɔ; ejaakɛ no lɛ ebaanyɛ mɔ kome ni ebaasumɔ mɔ kroko lɛ, aloo ebaakpɛtɛ mɔ kome he ni ebaagbe mɔ kroko lɛ he guɔ. Nyɛnyɛŋ nyɛtsɔmɔ nyɔji nyɛhã Nyɔŋmɔ kɛ Ninámɔ fɛɛ.” (Mateo 6:24) Kɛ́ wɔtsɔmɔ nyɔji wɔhã heloonaa nibii lɛ, belɛ wɔkpa Yehowa jamɔ, ni nakai pɛpɛɛpɛ Satan taoɔ ni wɔfee. Ekaba kɔkɔɔkɔ akɛ wɔbaahã shika kɛ heloonaa nibii ahe ahia wɔ fe naanyobɔɔ ni yɔɔ wɔ kɛ Yehowa teŋ lɛ. Ja wɔná heloonaa nibii ahe jwɛŋmɔ ni ja dani wɔbaanyɛ wɔye kunim yɛ ta ni wɔkɛ Satan wuɔ lɛ mli.Kanemɔ 1 Timoteo 6:6-10.

WU OSHI BƆLƐNAMƆ JEŊBA SHA

13. Mɛɛ gbɛ nɔ je nɛɛ woɔ mɛi hewalɛ ní amɛná gbalashihilɛ kɛ bɔlɛnamɔ he jwɛŋmɔ ni ejaaa?

13 Nɔ kroko ni Satan kɛlakaa mɛi ji bɔlɛnamɔ jeŋba sha. Ŋmɛnɛ lɛ, mɛi babaoo susuɔ akɛ gbalashihilɛ mli bii nyɛŋ aye amɛhe anɔkwa, ni akɛ, ehe ehiaaa ni abote gbalashihilɛ mli po, ejaakɛ ebe eho ni ehãaa mɔ he ajɔ lɛ. Akɛ nɔkwɛmɔnɔ lɛ, yoo ko ni feɔ sinii lɛ wie akɛ, mɔ ko mɔ ko nyɛŋ eta wu kome loo ŋa kome he ewala gbii abɔ fɛɛ. Ekɛshi sɛɛ akɛ, “Mileee mɔ ko mɔ ko ni yeɔ eŋa loo ewu anɔkwa loo mɔ ko ni miitao efee nakai.” Nuu ko ni feɔ sinii lɛ hu wie akɛ, “Efeee mi akɛ abɔ wɔ ni wɔkɛ mɔ kome ahi shi wɔwala gbii abɔ fɛɛ.” Kɛ́ Satan nu ni mɛi ni ehe gbɛ́i miigbe Nyɔŋmɔ nɔkeenɔ ni ji gbalashihilɛ lɛ he guɔ nɛkɛ lɛ, emii shɛɔ ehe waa. Abonsam nyaaa gbalashihilɛ gbɛjianɔtoo lɛ he, ni esumɔɔɔ ni mɛi agbalashihilɛ asɔ. Kɛ́ susumɔ ni wɔyɔɔ yɛ gbalashihilɛ he lɛ kɛ Nyɔŋmɔ nɔ lɛ kpãaa gbee lɛ, wɔnyɛŋ wɔye kunim yɛ ta ni wɔkɛ Satan wuɔ lɛ mli.

14, 15. Kɛ́ onuɔ he akɛ okɛ ohe awo bɔlɛnamɔ jeŋba sha mli lɛ, mɛni obaanyɛ ofee?

14 Kɛ́ wɔbote gbalashihilɛ mli jio, wɔboteko  mli jio, esa akɛ wɔmia wɔhiɛ waa ni wɔwu wɔshi bɔlɛnamɔ jeŋba sha henɔi srɔtoi fɛɛ. Ani enɛ feemɔ yɛ mlɛo? Dabi kwraa! Akɛ nɔkwɛmɔnɔ lɛ, kɛ́ oji oblanyo loo oblayoo ni yaa skul lɛ, ekolɛ obaanu ni onanemɛi lɛ ekomɛi miishi amɛtsitsi akɛ amɛnyɛɔ amɛkɛ mɔ fɛɛ mɔ ni amɛsumɔɔ náa bɔlɛ. Aloo ekolɛ obaanu ni amɛmiiwie akɛ amɛkɛ tɛs mɛseji loo mfonirii ni teɔ bɔlɛnamɔ akɔnɔ shi emajemaje amɛhe. Yɛ maji komɛi anɔ lɛ, kɛ́ mɔ ko kɛ nibii ni tamɔ nakai maje mɔ kroko lɛ, abuɔ lɛ tamɔ nɔ ni ekɛ ponografi ní akɛ gbekɛbii feɔ emaje mɔ lɛ. Biblia kɛɔ akɛ: “Mɔ fɛɛ mɔ ni yaa nɔ ekɛ ehe woɔ bɔlɛnamɔ jeŋba sha mli lɛ, eefee esha eeshi lɛ diɛŋtsɛ egbɔmɔtso lɛ.” (1 Korintobii 6:18) Bɔlɛnamɔ jeŋba sha ehã helai egbɛ eshwã, ni enɛ kɛ piŋmɔ babaoo kɛ gbele po eba. Oblahii kɛ oblayei ni kɛ mɛi ná bɔlɛ be ni amɛboteko gbalashihilɛ mli lɛ ateŋ mɛi babaoo ewie akɛ, amɛshwa amɛhe waa akɛ amɛfee nakai. Bɔ ni awieɔ bɔlɛnamɔ jeŋba sha he yɛ TV, redio, Intanɛt lɛ, kɛ adafitswaa woji amli lɛ, hãa efeɔ tamɔ nɔ ni kɛ́ wɔku Nyɔŋmɔ mlai lɛ amli lɛ, nɔ ko baŋ. Kɛ́ wɔhe nɔ ni amɛwieɔ lɛ wɔye lɛ, “esha lakamɔ lɛ” baahã wɔdu gbɛ.Hebribii 3:13.

15 Kɛ́ onuɔ he akɛ okɛ ohe awo bɔlɛnamɔ jeŋba sha mli lɛ, mɛni obaanyɛ ofee? Kpɛlɛmɔ nɔ akɛ oyɛ naagba. (Romabii 7:22, 23) Sɔlemɔ ohã Nyɔŋmɔ  koni ewaje bo. (Filipibii 4:6, 7, 13) Okɛ ohe akayawo shihilɛi ni baanyɛ ahã okɛ ohe awo bɔlɛnamɔ jeŋba sha mli lɛ amli. (Abɛi 22:3) Ni kɛ́ okɛ bɔlɛnamɔ jeŋba sha he kaa ko kpe lɛ, joo naa foi amrɔ nɔŋŋ.1 Mose 39:12.

16. Be ni Satan ka Yesu lɛ, mɛni Yesu kɛɛ lɛ? Ni mɛni wɔkaseɔ yɛ nɔkwɛmɔnɔ nɛɛ mli?

16 Yesu fee nɔkwɛmɔnɔ ni nɔ bɛ ehã wɔ. Ehãaa nibii ni Satan wo lɛ shi akɛ ebaaná loo ekɛbaahã lɛ lɛ alaka lɛ. Esusuuu he po. Moŋ lɛ, yɛ kai ni Satan kɛba enɔ lɛ eko fɛɛ eko mli lɛ, ekɛɛ lɛ amrɔ nɔŋŋ akɛ: “Aŋma akɛ.” (Kanemɔ Mateo 4:4-10.) Yesu le Nyɔŋmɔ Wiemɔ lɛ, ni no hewɔ lɛ be ni Satan ka lɛ lɛ, enyɛ etsɛ ŋmalɛi ayisɛɛ amrɔ nɔŋŋ ni ekɛhã lɛ hetoo. Ja wɔjo bɔlɛnamɔ jeŋba sha he kai anaa foi, dani wɔbaanyɛ wɔwu wɔshi Satan ni wɔye enɔ kunim.1 Korintobii 6:9, 10.

FI SHI SHIŊŊ KONI OYE SATAN NƆ KUNIM

17, 18. (a) Mɛɛ nibii krokomɛi Satan baanyɛ ekɛdu wɔ? Ni mɛni hewɔ enɛ efeee wɔ naakpɛɛ lɛ?

17 Henɔwomɔ, heloonaa nibii asɛɛtiumɔ, kɛ bɔlɛnamɔ jeŋba sha ji nibii ni Satan baanyɛ ekɛdu wɔ lɛ ateŋ etɛ pɛ. Babaoo yɛ lolo. Akɛ nɔkwɛmɔnɔ lɛ, Kristofoi komɛi awekumɛi teɔ shi woɔ amɛ, loo amɛnanemɛi skulbii yeɔ amɛhe fɛo. Yɛ maji komɛi anɔ lɛ, nɔyeli lɛ etsĩ shiɛmɔ nitsumɔ lɛ naa. Wɔle akɛ wɔkɛ shihilɛi ni jaraa baakpe, ejaakɛ Yesu diɛŋtsɛ bɔ wɔ kɔkɔ akɛ: “Mɛi fɛɛ baanyɛ nyɛ yɛ migbɛ́i lɛ hewɔ, shi mɔ ni efi shi kɛyawula shi lɛ, abaahere eyiwala.”Mateo 10:22.

Abaakpãtã Satan hiɛ (Kwɛmɔ kuku 18)

18 Te wɔbaafee tɛŋŋ wɔwu wɔshi Satan ni wɔye enɔ kunim lɛ? Yesu wie akɛ: “Kɛ́ nyɛfi shi lɛ, nyɛbaabaa nyɛwala yi.” (Luka 21:19) Adesa ko nyɛŋ aye wɔ awui kɛya naanɔ. Mɔ ko mɔ ko nyɛŋ afite naanyobɔɔ ni ka wɔ kɛ Nyɔŋmɔ teŋ lɛ, ja wɔ, wɔŋmɛ lɛ gbɛ. (Romabii 8:38, 39) Kɛ́ Yehowa tsuji anɔkwafoi komɛi gboi po lɛ, no etsɔɔɔ akɛ Satan eye kunim. Yehowa baatee amɛ shi. (Yohane 5:28, 29) Shi, Satan bɛ hiɛnɔkamɔ ko. Kɛ́ akpãtã jeŋ fɔŋ nɛɛ hiɛ lɛ, abaashɛ lɛ afɔ̃ bu kwɔŋkwɔŋ lɛ mli afii 1,000. (Kpojiemɔ 20:1-3) Kɛ́ Kristo Afii Akpe Nɔyeli lɛ ba naagbee lɛ, “abaajie Satan kɛjɛ etsuŋwoo lɛ mli.” Kɛ́ ajie lɛ lɛ, ebaaka adesai ni eye emuu lɛ nɔ ni ji naagbee nɔ. No sɛɛ lɛ, abaakpãtã ehiɛ. (Kpojiemɔ 20:7-10) Abonsam bɛ hiɛnɔkamɔ, shi bo lɛ, oyɛ hiɛnɔkamɔ! No hewɔ lɛ, yaa nɔ owu oshi Satan, ni odamɔ shi shiŋŋ yɛ hemɔkɛyeli lɛ mli. Obaanyɛ owu oshi Satan ni oye enɔ kunim!