Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) MAY 2015

Kwɛmɔ Ohe nɔ Jogbaŋŋ—Satan Miitao Bo Emi!

Kwɛmɔ Ohe nɔ Jogbaŋŋ—Satan Miitao Bo Emi!

“Nyɛkwɛa nyɛhe nɔ jogbaŋŋ! Nyɛhenyɛlɔ, Abonsam lɛ, nyiɛ tamɔ jata ni miihũu, ni eetao mɔ ko emi.”—1 PETRO 5:8.

1. Tsɔɔmɔ bɔ ni fee ni ŋwɛibɔfo ko batsɔ Satan.

BE KO NI EHO LƐ, wekukpaa kpakpa yɛ ŋwɛibɔfo ni ŋmɛnɛ lɛ wɔle lɛ akɛ Satan lɛ, kɛ Yehowa teŋ. Shi sɛɛ mli lɛ, ená shwelɛ akɛ adesai ajá lɛ. Yɛ nɔ najiaŋ ni ebaakpoo shwelɛ fɔŋ nɛɛ amrɔ nɔŋŋ lɛ, ehã shwelɛ lɛ tsirɛ lɛ ni eyafee esha. (Yakobo 1:14, 15) Wɔleee egbɛ́i diɛŋtsɛ. Kɛ̃lɛ, wɔle akɛ “edamɔɔɔ shi shiŋŋ yɛ anɔkwale lɛ mli.” Etse Yehowa hiɛ atua, ni ebatsɔ “malemɔ tsɛ.”Yohane 8:44.

2, 3. Mɛni gbɛ́i ni ji “Satan,” “Abonsam,” “onufu,” kɛ “drako” lɛ tsɔɔ wɔ yɛ Yehowa henyɛlɔ ni fe fɛɛ lɛ he?

2 Kɛjɛ be ni Satan tse Yehowa hiɛ atua lɛ kɛbashi ŋmɛnɛ lɛ, ekɛ enifeemɔi etsɔɔ akɛ eji Yehowa henyɛlɔ ni fe fɛɛ kɛ adesai fɛɛ ahenyɛlɔ. Kɛ́ wɔkane nɔ ni Biblia lɛ wieɔ yɛ ehe lɛ, wɔbaana akɛ ebɛ jeŋba kwraa. Gbɛ́i Satan lɛ shishi ji, “Shiteekɛwolɔ,” ni tsɔɔ akɛ bɔfo fɔŋ nɛɛ nyɛɔ Nyɔŋmɔ nɔyeli lɛ, ni efeɔ nɔ fɛɛ nɔ ni ebaanyɛ kɛteɔ shi ewoɔ lɛ. Nɔ ni  Satan taoɔ nɔŋŋ ji, ni Yehowa akaye ebɔɔ nii anɔ dɔŋŋ.

3 Kpojiemɔ 12:9 lɛ, atsɛ Satan akɛ Abonsam. Eshishi ji “Heguɔgbelɔ.” Satan gbe Nyɔŋmɔ he guɔ, ni etsɛ lɛ amalelɔ. Agbɛnɛ hu, atsɛ lɛ “blema onufu lɛ,” ni enɛ kaiɔ wɔ bɔ ni ekɛ onufu tsu nii kɛlaka Hawa lɛ. Satan gbɛ́i kroko hu ni sa lɛ jogbaŋŋ ji, “drako kpeteŋkpele lɛ.” Gbɛ́i nɛɛ sa lɛ, ejaakɛ ehiɛ yɛ laŋlaŋ, eyitsoŋ wa, ni mɔ fɔŋ ji lɛ. Esumɔɔɔ ni Yehowa yiŋtoo lɛ baa mli, ni eetao ekpãtã Nyɔŋmɔ webii ahiɛ.

4. Mɛni he wɔbaasusu yɛ nikasemɔ nɛɛ mli?

4 Eyɛ faŋŋ akɛ, Satan ji mɔ titri ni baanyɛ ahã wɔkwa Yehowa. Enɛ hewɔ lɛ, Biblia lɛ bɔɔ wɔ kɔkɔ akɛ: “Nyɛhiɛ ahia nyɛhe nɔ be fɛɛ be, nyɛkwɛa nyɛhe nɔ jogbaŋŋ! Nyɛhenyɛlɔ, Abonsam lɛ, nyiɛ tamɔ jata ni miihũu, ni eetao mɔ ko emi.” (1 Petro 5:8) No hewɔ lɛ, yɛ nikasemɔ nɛɛ mli lɛ, wɔbaasusu nibii etɛ komɛi ni Biblia lɛ hãa wɔleɔ yɛ Satan he lɛ ahe. Enɛ baahã wɔna nɔ hewɔ ni esa akɛ wɔbu wɔhe kɛjɛ Yehowa kɛ ewebii lɛ ahenyɛlɔ ni bɛ subaŋ kwraa nɛɛ he.

SATAN HE WA

5, 6. (a) Okɛ nɔkwɛmɔnii ahã ni tsɔɔ akɛ ŋwɛibɔfoi ‘ahe wa.’ (b) Mɛni hewɔ Biblia lɛ kɛɔ akɛ Satan gbeɔ mɛi lɛ?

5 Ŋwɛibɔfoi ‘ahe wa.’ (Lala 103:20) Amɛhe wa, ni amɛle nii kwraa fe adesai. Ŋwɛibɔfoi anɔkwafoi lɛ kɛ amɛhewalɛ lɛ tsuɔ nii yɛ gbɛ kpakpa nɔ. Akɛ nɔkwɛmɔnɔ lɛ, Yehowa bɔfoi lɛ ateŋ mɔ kome gbe Asiria asraafoi ni batutua Israelbii lɛ ateŋ mɛi 185,000 sɔŋŋ. Adesa ko bɛ ni baanyɛ afee enɛ, ni asraafoi akuu muu po naŋ enɛ feemɔ mlɛo. (2 Maŋtsɛmɛi 19:35) Be kroko hu lɛ, ŋwɛibɔfo ko kɛ ŋaa kɛ hewalɛ tsu nii kɛjie Yesu bɔfoi lɛ kɛjɛ tsuŋwoo mli. Eyɛ mli akɛ no mli lɛ bulɔi damɔ tsuŋwoohe lɛ shinai lɛ anaa moŋ, shi ŋwɛibɔfo nɛɛ nyɛ egbele shinai lɛ, ejie bɔfoi lɛ, ni esaa eŋmɛ mli, ní bulɔi lɛ leee akɛ mɔ ko eba jɛmɛ po!Bɔfoi 5:18-23.

6 Ŋwɛibɔfoi anɔkwafoi lɛ kɛ amɛhewalɛ lɛ tsuɔ nibii kpakpai, shi Satan kɛ ehewalɛ lɛ tsuɔ nibii gbohii. Satan he wa waa, ni ená mɛi babaoo anɔ hewalɛ. Biblia lɛ tsɛɔ lɛ “je nɛɛ nɔyelɔ” kɛ “shihilɛ gbɛjianɔtoo nɛɛ nyɔŋmɔ.” (Yohane 12:31; 2 Korintobii 4:4) Satan ‘baanyɛ agbe mɛi’ po. (Hebribii 2:14) Shi jeee be fɛɛ be efeɔ nakai tɛ̃ɛ. No hewɔ lɛ, mɛɛ gbɛi krokomɛi anɔ etsɔɔ egbeɔ mɛi? Klɛŋklɛŋ kwraa lɛ, Satan ji mɔ ni ehã nyɛɛ kɛ awuiyeli eyi je lɛ mli obɔ. Nɔ ni ji enyɔ lɛ, akɛni Hawa he amale ni Satan kɛɛ lɛ lɛ eye, ni Adam hu gbo Nyɔŋmɔ nɔ toi hewɔ lɛ, adesai fɛɛ feɔ esha ni amɛgboiɔ. (Romabii 5:12) Yesu tsɛ Satan “gbɔmɔgbelɔ,” ni nakai pɛpɛɛpɛ eji. (Yohane 8:44) Anɔkwa, Satan ji henyɛlɔ ni he wa waa diɛŋtsɛ!

Kɛjeee Yehowa yeɔ ebuaa wɔ kulɛ, wɔnyɛŋ wɔye kunim kɔkɔɔkɔ yɛ ta ni wɔkɛ Satan wuɔ lɛ mli

7. Mɛɛ nɔkwɛmɔnii tsɔɔ akɛ daimonioi lɛ ahe wa?

7 Kɛ́ wɔte shi wɔwo Satan lɛ, belɛ wɔmiite shi wɔmiiwo mɛi fɛɛ ni fiɔ  esɛɛ, ní teɔ shi woɔ Nyɔŋmɔ nɔyeli lɛ hu. Ŋwɛibɔfoi atuatselɔi babaoo fata mɛi ni fiɔ Satan sɛɛ lɛ ahe. Atsɛɔ ŋwɛibɔfoi nɛɛ daimonioi. (Kpojiemɔ 12:3, 4) Nɔkwɛmɔnii babaoo yɛ ni hãa wɔnaa akɛ, daimonioi lɛ ahe wa kwraa fe adesai, ni amɛpiŋɔ amɛ waa. (Mateo 8:28-32; Marko 5:1-5) Kaahã ohiɛ kpa nɔ kɔkɔɔkɔ akɛ, daimonioi lɛ kɛ amɛnɔyelɔ lɛ he wa waa. (Mateo 9:34) Kɛjeee Yehowa yeɔ ebuaa wɔ kulɛ, wɔnyɛŋ wɔye kunim kɔkɔɔkɔ yɛ ta ni wɔkɛ Satan wuɔ lɛ mli.

SATAN YITSOŊ WA

8. (a) Mɛni ji oti ni ma Satan hiɛ? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛɛ nibii ona ni tsɔɔ akɛ mɛi ni yɔɔ je lɛ mli lɛ ateŋ mɛi komɛi ayitsoŋ wa tamɔ Satan?

8 Bɔfo Petro kɛ Satan to “jata ni miihũu” he. Niiamlitaomɔ wolo ko tsɔɔ mli akɛ, kɛ́ kooloo ko “miihũu” lɛ, no tsɔɔ akɛ hɔmɔ eye lɛ waa, ni ehiɛ efee kramakrama. Eja jogbaŋŋ akɛ abaawie nakai yɛ Satan he, ejaakɛ eyitsoŋ wa waa! Satan nine eshɛ mɛi babaoo ni yɔɔ je lɛ mli lɛ anɔ, ni Biblia lɛ po wieɔ akɛ jeŋ muu lɛ fɛɛ kã ehewalɛ mli. Shi no faaa hãaa lɛ, eetao mɛi babaoo emi lolo. (1 Yohane 5:19) Amrɔ nɛɛ, ejie ehiɛ eka mɛi ni afɔ amɛ mu lɛ ateŋ mɛi ni eshwɛ yɛ shikpɔŋ lɛ nɔ lɛ, kɛ “gwantɛŋi krokomɛi” ni fataa amɛhe kɛsɔmɔɔ Yehowa lɛ. (Yohane 10:16; Kpojiemɔ 12:17) Oti ni ma Satan hiɛ ji, ni ekpãtã Yehowa webii ahiɛ. Bɔ ni awa anɔkwa Kristofoi ayi kɛjɛ klɛŋklɛŋ afii 100 lɛ mli aahu kɛbashi ŋmɛnɛ lɛ, yeɔ odase akɛ, Satan yitsoŋ wa diɛŋtsɛ!

9, 10. (a) Mɛɛ gbɛ nɔ Satan tutua Israelbii lɛ? (Okɛ enɛ he nɔkwɛmɔnii ahã.) (b) Mɛɛ yiŋtoo krɛdɛɛ hewɔ Satan jie ehiɛ eka Israelbii lɛ? (d) Kɛ́ Yehowa tsuji ni yɔɔ ŋmɛnɛ lɛ ateŋ mɔ ko fee esha ni yɔɔ hiɛdɔɔ lɛ, te osusuɔ akɛ Abonsam nuɔ he tɛŋŋ?

 9 Nɔ kroko hu yɛ ni tsɔɔ akɛ Satan yitsoŋ wa. Kɛ́ hɔmɔ miiye jata lɛ, enaaa kooloo ni eyaagbe lɛ mɔbɔ, ni kɛ́ ekɛ lɛ gbe naa hu lɛ, eshwaaa ehe. Nakai nɔŋŋ Satan enaaa mɛi ni etutuaa lɛ mɔbɔ. Akɛ nɔkwɛmɔnɔ lɛ, te osusuɔ akɛ Satan nu he tɛŋŋ be fɛɛ be ni Israelbii lɛ ahiɛ kɔ̃ nii anɔ loo amɛkɛ amɛhe wo bɔlɛnamɔ jeŋba sha mli? Bo diɛŋtsɛ kwɛmɔ bɔ ni Satan mii baashɛ ehe be ni Zimri kɛ ehe yawo bɔlɛnamɔ jeŋba sha mli ni agbe lɛ lɛ, aloo bɔ ni emli fili lɛ be ni Gehazi hiɛ yakɔ̃ nii anɔ, ni ahã kpiti shwie lɛ kɛ eseshibii lɛ!4 Mose 25:6-8, 14, 15; 2 Maŋtsɛmɛi 5:20-27.

Kɛ́ Nyɔŋmɔ tsuji lɛ ateŋ mɔ ko fee esha lɛ, Satan mli filiɔ lɛ (Kwɛmɔ kuku 10)

10 Yiŋtoo krɛdɛɛ ko hewɔ Satan jie ehiɛ eka Israelbii lɛ. Kaimɔ akɛ, Israelbii lɛ ateŋ Mesia lɛ baajɛ aba, ni lɛ ji mɔ ni baakpãtã Satan hiɛ, ní ehã ana akɛ Yehowa ji mɔ ni yɔɔ hegbɛ akɛ eyeɔ je lɛ nɔ. (1 Mose 3:15) Akɛni Satan sumɔɔɔ ni Israelbii lɛ náa Nyɔŋmɔ hiɛ duromɔ hewɔ lɛ, efee nɔ fɛɛ nɔ ni ebaanyɛ koni ehã amɛfee esha. Kaasusu akɛ be ni David yafite gbãla lɛ, enii fee Satan mɔbɔ. Ni kaasusu akɛ emusuŋ tsɔ lɛ yɛ Mose hewɔ be ni eyashɛɛɛ Shiwoo Shikpɔŋ lɛ nɔ lɛ. Yɛ anɔkwale mli lɛ, kɛ́ Nyɔŋmɔ tsuji lɛ ateŋ mɔ ko fee esha ni yɔɔ hiɛdɔɔ lɛ, Satan mli filiɔ lɛ. Anɔkwa, kɛ́ Abonsam ye omanye nɛkɛ lɛ, ekɛtswaa Yehowa mpoa.Abɛi 27:11.

11. Mɛni hewɔ ekolɛ Satan jie ehiɛ eka Sara lɛ?

11 Satan ná nyɛɛ ni mli wa waa ehã weku ni abaajɛ mli afɔ Mesia lɛ. Akɛ nɔkwɛmɔnɔ lɛ, susumɔ nɔ ni ba be ni Yehowa kɛɛ Abraham akɛ ebaatsɔ “jeŋmaŋ kpeteŋkpele” lɛ sɛɛ lɛ he okwɛ. (1 Mose 12:1-3) Be ni Abraham kɛ Sara yɔɔ Ejipt lɛ, Farao ŋɔ Sara kɛtee eshĩa, ni kulɛ eetao ebatsɔ eŋa. Shi Yehowa bu Sara he, ni ejie lɛ kɛjɛ shihilɛ ni jaraa nɛɛ mli. (Kanemɔ 1 Mose 12:14-20.) Be ni eshwɛ fioo ni abaafɔ Isak lɛ, nɔ ko ni tamɔ nakai nɔŋŋ ba yɛ maŋ ni atsɛɔ lɛ Gerar lɛ mli. (1 Mose 20:1-7) Ani eeenyɛ efee akɛ Satan ji mɔ ni hã Sara yaje shihilɛi nɛɛ amli? Kaimɔ akɛ Sara shi ogbɔjɔ shihilɛ ni eyɔɔ mli yɛ Ur lɛ, ni eyahi bui amli. No hewɔ lɛ, ani Satan yasusu akɛ ebaanyɛ ekɛ ogbɔjɔ shihilɛ ni yɔɔ Farao kɛ Abimelek amaŋtsɛwei lɛ aka lɛ? Ani Satan susu akɛ Sara baaje ewu lɛ sɛɛ, ekpoo Yehowa, ní ekɛ maŋtsɛmɛi nɛɛ ateŋ mɔ kome abote gbalashihilɛ mli? Biblia lɛ etsɔɔɔ. Shi ekã shi faŋŋ akɛ, eji hegbɛ ni Sara ná akɛ efee Mesia lɛ blemanyɛ lɛ ŋmɛɛ lɛ kulɛ, Abonsam mii baashɛ ehe kɛteke nɔ. Eji yoo nɛɛ gbalashihilɛ, egbɛ́i kpakpa lɛ, kɛ wekukpaa ni yɔɔ ekɛ Yehowa teŋ lɛ fite kulɛ, eshiŋ Satan kpu po. Anɔkwa, Satan yitsoŋ wa waa diɛŋtsɛ!

Jeee Satan he sane ji nɔ ni ja loo nɔ ni ejaaa

12, 13. (a) Be ni afɔ Yesu lɛ, mɛni Satan fee ní hãa wɔnaa akɛ eyitsoŋ wa? (b) Ŋmɛnɛ lɛ, kɛ́ Satan na gbekɛbii ni sumɔɔ Yehowa, ní miibɔ mɔdɛŋ ní amɛsɔmɔ Nyɔŋmɔ lɛ, te enuɔ he tɛŋŋ?

 12 Abraham gbele sɛɛ afii ohai abɔ lɛ, afɔ abifao ko. Lɛ ji Yesu. Kaasusu akɛ abifao nɛɛ he fee Satan fɛo. Satan le akɛ abifao nɛɛ baada ebatsɔ Mesia ni awo ehe shi lɛ. Yesu ji mɔ titri ni feɔ Abraham seshi lɛ, ni lɛ ji mɔ ni baafite “Abonsam nitsumɔi lɛ.” (1 Yohane 3:8) Kɛ́ okwɛ lɛ, ani Satan baasusu akɛ kɛ́ ehã agbe gbekɛ nɛɛ lɛ, efee tsɔ? Dabi, esusuŋ nakai kwraa. Jeee Satan he sane ji nɔ ni ja loo nɔ ni ejaaa. No hewɔ lɛ, eshashaooo shi kwraa; ebɔ mɔdɛŋ akɛ ebaagbe gbekɛ lɛ. Mɛɛ gbɛ nɔ etsɔ efee enɛ?

13 Be ni ŋulamiiaŋkwɛlɔi komɛi kɛɛ Maŋtsɛ Herode akɛ afɔ “Yudafoi lɛ amaŋtsɛ lɛ,” emli fu waa, ni etswa efai shi akɛ ebaagbe abifao lɛ. (Mateo 2:1-3, 13) No hewɔ lɛ, efã ni agbe gbekɛbii hii fɛɛ ní eye afii enyɔ kɛ mɛi ni yeko nakai, ni yɔɔ Betlehem kɛ ehewɔ kpokpai lɛ anɔ. (Kanemɔ Mateo 2:13-18.) Yesu je gbɔmɔgbee ni yɔɔ gbeyei nɛɛ mli sɔkee. Shi, mɛni enɛ tsɔɔ wɔ yɛ wɔhenyɛlɔ Satan he? Etsɔɔ wɔ akɛ, Abonsam ebuuu adesai awala. Enaaa gbekɛbii po mɔbɔ. Lɛɛlɛŋ, Satan tamɔ “jata ni miihũu.” Kaahã ohiɛ kpa nɔ kɔkɔɔkɔ akɛ eyitsoŋ wa waa diɛŋtsɛ!

SATAN LAKAA MƆ

14, 15. Mɛɛ gbɛ nɔ Satan “eshwila mɛi ni heee yeee lɛ ajwɛŋmɔi”?

14 Gbɛ pɛ ni Satan baanyɛ atsɔ nɔ etsi mɛi kɛje Yehowa, wɔ-Nyɔŋmɔ ni yɔɔ suɔmɔ lɛ he ji, ni ebaalaka amɛ. (1 Yohane 4:8) Satan lakaa mɛi, koni amɛkayɔse akɛ Nyɔŋmɔ he miihia amɛ. (Mateo 5:3) “Eshwila mɛi ni heee yeee lɛ ajwɛŋmɔi,” koni amɛkale anɔkwale ni kɔɔ Yehowa he lɛ.2 Korintobii 4:4.

15 Gbɛ kome ni sa kadimɔ waa ni Satan tsɔɔ nɔ elakaa mɛi ji, kɛtsɔ amale jamɔ nɔ. Ele akɛ Yehowa ‘yeɔ awuŋa,’ ni tsɔɔ akɛ, eesumɔ ni ajá lɛ pɛ. (2 Mose 20:5) No hewɔ lɛ, kɛ́ Satan na ni mɛi miijá amɛblematsɛmɛi, tsei kɛ tɛi, kooloi, loo nibii krokomɛi, moŋ fe ni amɛaajá Yehowa lɛ, emli filiɔ lɛ naakpa! Mɔbɔ sane ji akɛ, mɛi babaoo ni susuɔ akɛ amɛmiijá Nyɔŋmɔ jogbaŋŋ lɛ po leee akɛ amale hemɔkɛyelii kɛ kusumii ni he bɛ sɛɛnamɔ moŋ sɛɛ amɛnyiɛ. Amɛshihilɛ lɛ tamɔ Israelbii ni hi shi yɛ Yesaia beiaŋ lɛ anɔ lɛ pɛpɛɛpɛ. Yehowa bi amɛ akɛ: “Mɛɛba nyɛkaneɔ shika nyɛheɔ nɔ ni jeee aboloo, ni nyɛkɛ nyɛnitsumɔ nii lɛ heɔ nɔ ni etɔɔɔ mɔ? Nyɛboa mi toi moŋ, ní nyɛye nii kpakpai, ní nyɛsusuma mii ashɛ yɛ fɔ nii ahe!”Yesaia 55:2.

Satan baanyɛ alaka Yehowa tsuji ni yɔɔ ekãa po

16, 17. (a) Mɛni hewɔ Yesu kɛɛ Petro akɛ: “Ho misɛɛ, Satan!” lɛ? (b) Mɛni Satan baanyɛ ekɛlaka wɔ koni wɔhiɛ aje wɔhe nɔ?

16 Satan baanyɛ alaka Yehowa tsuji ni yɔɔ ekãa po. Akɛ nɔkwɛmɔnɔ lɛ, susumɔ nɔ ni ba be ni Yesu kɛɛ ekaselɔi lɛ akɛ etsɛŋ ni abaagbe lɛ lɛ he okwɛ. Bɔfo Petro sumɔɔ Yesu sane waa, ni  ekɛɛ lɛ akɛ: “Nuŋtsɔ, kaatsɛ efɔŋ ohã ohe; enɛ baŋ onɔ kɔkɔɔkɔ.” Yesu here lɛ nɔ akɛ: “Ho misɛɛ, Satan!” (Mateo 16:22, 23) Mɛni hewɔ Yesu tsɛ Petro “Satan” lɛ? Yesu tsɛ lɛ nakai, ejaakɛ ele nɔ ni etsɛŋ ebaaba enɔ. No mli lɛ, Yesu le akɛ, etsɛŋ ebaagbo ní ekɛ ewala akpɔ̃ adesai, ní ehã ana akɛ Abonsam ji amalelɔ. Nakai be lɛ baafee be ni sa kadimɔ waa yɛ adesai ayinɔsane mli; jeee be ni tamɔ nɛkɛ mli esa akɛ Yesu ana ehe mɔbɔ. Eji Yesu hã ehiɛ je ehe nɔ kulɛ, ebaaŋɔɔ Satan naa waa.

17 Shihilɛ gbɛjianɔtoo nɛɛ naagbee ebɛŋkɛ, no hewɔ lɛ, wɔ hu wɔyɛ be ko ni sa kadimɔ waa mli. Satan miisumɔ ni wɔhiɛ aje wɔhe nɔ, ni wɔfee gbɛ́i wɔhã wɔhe yɛ je nɛɛ mli. Eesumɔ ni wɔhiɛ akpa nɔ akɛ wɔyɛ naagbee gbii lɛ amli, koni wɔhiɛ akahi wɔhe nɔ. Kaahã elaka bo! ‘Yaa nɔ obu.’ (Mateo 24:42) Satan miisumɔ ni ohe oye akɛ kɛ́ naagbee lɛ baaba po lɛ, jeee bianɛ. Shi kaahe lɛ oye kɔkɔɔkɔ!

18, 19. (a) Mɛɛ gbɛ nɔ Satan bɔɔ mɔdɛŋ ni elaka wɔ koni wɔsusu akɛ Yehowa sumɔɔɔ wɔsane? (b) Mɛɛ gbɛ nɔ Yehowa yeɔ ebuaa wɔ koni wɔhiɛ ahi wɔhe nɔ?

18 Gbɛ kroko hu yɛ ni Satan baanyɛ etsɔ nɔ elaka wɔ. Satan miisumɔ ni wɔhe wɔye akɛ Yehowa sumɔɔɔ wɔsane, ni akɛ, kɛ́ wɔtɔ̃ enɔ lɛ, ekɛkeŋ wɔ kɔkɔɔkɔ. Shi enɛ bɛ mli. Bo lɛ susumɔ he okwɛ, namɔ tuuntu ji mɔ ni Yehowa sumɔɔɔ esane? Satan ni. Namɔ Nyɔŋmɔ kɛ ehe ekeŋ lɛ kɔkɔɔkɔ? Satan ni. Shi wɔ lɛ, Biblia lɛ kɛɔ wɔ akɛ: “Nyɔŋmɔ jeee mɔ ni ejaaa ni ehiɛ baakpa nyɛnitsumɔ lɛ kɛ suɔmɔ ni nyɛjie lɛ kpo yɛ egbɛ́i lɛ hewɔ lɛ nɔ.” (Hebribii 6:10) Yehowa hiɛ sɔɔ mɔdɛŋ fɛɛ ni wɔbɔɔ koni wɔsa ehiɛ lɛ, ni ebuŋ sɔɔmɔ ni wɔsɔmɔɔ lɛ lɛ akɛ ehe bɛ sɛɛnamɔ kɔkɔɔkɔ. (Kanemɔ 1 Korintobii 15:58.) No hewɔ lɛ, kaahã Satan laka bo.

19 Nikasemɔ nɛɛ ehã wɔna akɛ Satan he wa, eyitsoŋ wa, ni elakaa mɔ. No hewɔ lɛ, te wɔbaafee tɛŋŋ wɔwu wɔshi lɛ, ni wɔye enɔ kunim lɛ? Yehowa yeɔ ebuaa wɔ. E-Wiemɔ lɛ hãa wɔleɔ Satan ‘ŋaatsɔi lɛ,’ ni ji gbɛi srɔtoi ni etsɔɔ nɔ etutuaa wɔ lɛ. (2 Korintobii 2:11) Kɛ́ wɔnyɛ wɔna gbɛi srɔtoi nɛɛ jogbaŋŋ lɛ, ewaaa akɛ wɔbaahã wɔhiɛ ahi wɔhe nɔ. Shi Satan ŋaatsɔi lɛ ni wɔbaale lɛ pɛ kɛkɛ faaa. Biblia lɛ kɛɔ wɔ akɛ: “Nyɛtsĩa Abonsam gbɛ, ni ebaajo nyɛnaa foi.” (Yakobo 4:7) Nikasemɔ ni nyiɛ sɛɛ lɛ baahã wɔna nibii etɛ amli ni wɔbaanyɛ wɔwu wɔshi Satan yɛ, ni wɔye enɔ kunim.