Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  March 2015

Okɛ Anɔkwayeli Afi Kristo Nyɛmimɛi lɛ Asɛɛ

Okɛ Anɔkwayeli Afi Kristo Nyɛmimɛi lɛ Asɛɛ

“Gbii abɔ ni nyɛfee nyɛhã minyɛmimɛi nɛɛ ateŋ mɛi bibii fe fɛɛ lɛ ateŋ mɔ kome lɛ, mi nɔŋŋ nyɛfee nyɛhã lɛ.”—MATEO 25:40.

1, 2. (a) Mɛɛ abɛbuai Yesu gba enanemɛi kpakpai lɛ? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni esa akɛ wɔle yɛ abɛbua ni kɔɔ gwantɛŋi lɛ kɛ abotiai lɛ ahe lɛ he?

BE KO lɛ, Yesu gba enanemɛi kpakpai Petro, Andrea, Yakobo, kɛ Yohane sane ko ni he hiaa waa. Be ni egba amɛ abɛbuai ni kɔɔ nyɔŋ anɔkwafo kɛ hiɛshikalɔ lɛ, oblayei froi nyɔŋma lɛ, kɛ talɛntai lɛ ahe lɛ egbe naa lɛ, egba amɛ abɛbua kroko. Yɛ nakai abɛbua lɛ mli lɛ, ewie be ni “gbɔmɔ Bi lɛ” baaba ni ebakojo “jeŋmaji lɛ fɛɛ” lɛ he. Yesu wie akɛ “gbɔmɔ Bi lɛ” baajara mɛi amli ewo kui enyɔ mli. Etsɛ kuu kome gwantɛŋi, ni etsɛ kuu kroko lɛ abotiai. No sɛɛ lɛ, ewie kuu kroko ko ni he hiaa waa, ni bafeɔ kuu ni ji etɛ lɛ he. Etsɛ kuu nɛɛ Maŋtsɛ lɛ ‘nyɛmimɛi.’Kanemɔ Mateo 25:31-46.

2 Bɔfoi lɛ bu abɛbua nɛɛ akɛ nɔ ko ni yɔɔ hiɛdɔɔ waa, ni nakai nɔŋŋ Yehowa tsuji ni yɔɔ ŋmɛnɛ lɛ hu buɔ lɛ, ejaakɛ ekɔɔ mɛi awala he. Yesu tsɔɔ mli akɛ mɛi komɛi baaná naanɔ wala, ni abaakpata mɛi komɛi hu ahiɛ. Enɛ hewɔ ehe hiaa  waa akɛ wɔnu abɛbua nɛɛ shishi lɛ, koni wɔle nɔ ni esa akɛ wɔfee ni wɔná naanɔ wala. No hewɔ lɛ, yɛ nikasemɔ nɛɛ mli lɛ, wɔbaahã sanebimɔi ni nyiɛ sɛɛ nɛɛ ahetoo: Mɛɛ gbɛ nɔ Yehowa eye ebua wɔ ni wɔnu abɛbua nɛɛ shishi? Te wɔfeɔ tɛŋŋ wɔleɔ akɛ abɛbua nɛɛ kɔɔ nɔ hewɔ ni shiɛmɔ nitsumɔ lɛ he hiaa waa lɛ he? Namɛi esa akɛ amɛshiɛ? Mɛni hewɔ amrɔ nɛɛ ji be ni esa akɛ mɛi aye “Maŋtsɛ lɛ” kɛ ‘enyɛmimɛi’ lɛ anɔkwa lɛ?

MƐƐ GBƐ NƆ YEHOWA EYE EBUA WƆ NI WƆNU ABƐBUA NƐƐ SHISHI?

3, 4. (a) Dani wɔbaanyɛ wɔnu abɛbua ni kɔɔ gwantɛŋi lɛ kɛ abotiai lɛ ahe lɛ shishi lɛ, mɛni esa akɛ wɔle? (b) Yɛ afi 1881 lɛ, te Buu-Mɔɔ lɛ tsɔɔ abɛbua nɛɛ mli tɛŋŋ?

3 Dani wɔbaanyɛ wɔnu abɛbua ni kɔɔ gwantɛŋi lɛ kɛ abotiai lɛ ahe lɛ shishi lɛ, esa akɛ wɔle nibii ni nyiɛ sɛɛ nɛɛ: (1) ni “gbɔmɔ Bi lɛ” loo “Maŋtsɛ lɛ” damɔ shi kɛhã, kɛ mɛi ni gwantɛŋi lɛ, abotiai lɛ, kɛ Maŋtsɛ lɛ ‘nyɛmimɛi’ lɛ damɔ shi kɛhã. (2) Be ni “gbɔmɔ Bi lɛ” baakojo, loo ebaatsetsee mɛi kɛje mɛi krokomɛi ahe akɛ gwantɛŋi loo abotiai. (3) Nɔ hewɔ ni etsɛ mɛi komɛi gwantɛŋi ni etsɛ mɛi krokomɛi abotiai lɛ.

4 Yɛ afi 1881 lɛ, Buu-Mɔɔ lɛ tsɔɔ mli akɛ “gbɔmɔ Bi lɛ” loo “Maŋtsɛ lɛ,” ji Yesu, ni ‘enyɛmimɛi’ lɛ ji mɛi ni afɔ amɛ mu ni kɛ lɛ baaye nɔ yɛ ŋwɛi lɛ. Ewie hu akɛ, kɛ́ mɛi ni baahi shikpɔŋ lɛ nɔ lɛ ye emuu lɛ, amɛ hu amɛbaatsɔmɔ Maŋtsɛ lɛ ‘nyɛmimɛi.’ Buu-Mɔɔ lɛ kɛfata he akɛ, Kristo Afii Akpe Nɔyeli lɛ mli ebaatsetsee mɛi kɛje mɛi krokomɛi ahe, ni mɛi ni jie Nyɔŋmɔ suɔmɔ lɛ kpo yɛ amɛnifeemɔi fɛɛ amli lɛ ji mɛi ni ebaabu akɛ gwantɛŋi.

5. Yɛ afi 1923 lɛ, te Nyɔŋmɔ webii lɛ nu abɛbua ni wɔsusuɔ he lɛ shishi tɛŋŋ?

5 Sɛɛ mli lɛ, Yehowa ye ebua ewebii lɛ ni amɛnu abɛbua nɛɛ shishi jogbaŋŋ fe tsutsu lɛ. Yɛ October 15, 1923, Buu-Mɔɔ lɛ mli lɛ, awie akɛ “gbɔmɔ Bi lɛ” ji Yesu. Shi akɛ ŋmalɛi srɔtoi tsɔɔ mli akɛ, mɛi ni baafata Yesu he kɛye nɔ yɛ ŋwɛi yɛ Afii Akpe Nɔyeli lɛ mli lɛ pɛ ji mɛi ni abaanyɛ akɛɛ akɛ amɛji Maŋtsɛ lɛ ‘nyɛmimɛi.’ Buu-Mɔɔ lɛ tsɔɔ mli hu akɛ, gwantɛŋi lɛ ji mɛi ni Yesu kɛ enyɛmimɛi lɛ baaye amɛnɔ, ní baahi shikpɔŋ lɛ nɔ lɛ. Yɛ abɛbua lɛ mli lɛ, Yesu wie akɛ gwantɛŋi lɛ ji mɛi ni ye amɛbua Maŋtsɛ lɛ nyɛmimɛi lɛ. Shi kɛ́ Yesu nyɛmimɛi lɛ ná amɛtee ŋwɛi lɛ, yelikɛbuamɔ ko he ebahiaŋ amɛ. Enɛ hewɔ lɛ, Buu-Mɔɔ wie akɛ abaakojo mɛi, loo abaabu amɛ akɛ gwantɛŋi loo abotiai dani Afii Akpe Nɔyeli lɛ baaje shishi. Ni tsɔɔ akɛ nakai nifeemɔ lɛ baaya nɔ be ni Yesu nyɛmimɛi lɛ kã he amɛyɔɔ shikpɔŋ lɛ nɔ lɛ. Buu-Mɔɔ lɛ kɛfata he akɛ, gwantɛŋi lɛ ji mɛi ni heɔ Yesu nɔ amɛyeɔ, ní yɔɔ hemɔkɛyeli akɛ Maŋtsɛyeli lɛ baahã adesai aná shihilɛ kpakpa lɛ.

6. Yɛ afi 1995 lɛ, mɛɛ shishinumɔ hee wɔbaná yɛ abɛbua lɛ he?

6 Dani afi 1995 baashɛ lɛ, no mli lɛ wɔsusuɔ akɛ shiɛmɔ nitsumɔ ni wɔtsuɔ yɛ naagbee gbii nɛɛ amli lɛ nɔ adamɔɔ akojoɔ mɛi. Wɔsusu akɛ mɛi ni boɔ sane ni wɔshiɛɔ lɛ toi lɛ ji gwantɛŋi lɛ, ni mɛi booo toi lɛ ji abotiai lɛ. Shi yɛ nakai afi lɛ mli lɛ, wɔbanu abɛbua lɛ shishi yɛ gbɛ kroko nɔ. Buu-Mɔɔ ko ni je kpo yɛ nakai afi lɛ mli lɛ tsɔɔ mli akɛ, kɛ́ wɔkɛ sane ni yɔɔ Mateo 24:29-31(kanemɔ), to sane ni yɔɔ Mateo 25:31, 32(kanemɔ) he lɛ, wɔnaa akɛ Yesu, ni ji gbɔmɔ Bi lɛ, baakojo mɛi yɛ  amanehulu kpeteŋkpele lɛ mli be ni ‘eba kɛ anunyam kpele’ lɛ. *—Kwɛmɔ shishigbɛ niŋmaa lɛ.

Wɔmii shɛɔ wɔhe waa akɛ Yehowa eye ebua wɔ ni wɔnu Yesu abɛbuai lɛ ashishi

7. Amrɔ nɛɛ, mɛɛ shishinumɔ wɔyɔɔ yɛ abɛbua ni kɔɔ gwantɛŋi lɛ kɛ abotiai lɛ ahe lɛ he?

7 Amrɔ nɛɛ, wɔnuɔ abɛbua ni kɔɔ gwantɛŋi lɛ kɛ abotiai lɛ ahe lɛ shishi jogbaŋŋ. Yɛ shishinumɔ ni wɔyɔɔ amrɔ nɛɛ naa lɛ, wɔle akɛ “gbɔmɔ Bi lɛ” loo “Maŋtsɛ lɛ,” ji Yesu. Maŋtsɛ lɛ ‘nyɛmimɛi’ lɛ ji mɛi ni akɛ mumɔ krɔŋkrɔŋ efɔ amɛ mu ní kɛ Yesu baaye nɔ yɛ ŋwɛi lɛ. (Romabii 8:16, 17) “Gwantɛŋi lɛ” kɛ “abotiai lɛ” ji mɛi ni yɔɔ je lɛŋ maji srɔtoi lɛ fɛɛ amli lɛ. Kojomɔ lɛ baaya nɔ yɛ amanehulu kpeteŋkpele lɛ naagbee gbɛ, ni wɔle akɛ be nɛɛ eshɛ etã. Agbɛnɛ hu, kɛ́ Yesu ba lɛ wɔle nɔ ni ebaadamɔ nɔ ekojo mɔ ko akɛ gwantɛŋ loo abotia, no ji, bɔ ni mɔ lɛ kɛ mɛi ni afɔ amɛ mu lɛ ateŋ mɛi ni yɔɔ shikpɔŋ lɛ nɔ lolo lɛ ye ehã. Wɔmii shɛɔ wɔhe waa akɛ Yehowa eye ebua wɔ fiofio ni wɔnu abɛbua nɛɛ kɛ abɛbuai krokomɛi ni yɔɔ Mateo yitso 24 kɛ 25 lɛ ashishi!

ABƐBUA NƐƐ TSƆƆ WƆ NƆ HEWƆ NI SHIƐMƆ NITSUMƆ LƐ HE HIAA WAA LƐ

8, 9. Mɛni hewɔ Yesu tsɛ gwantɛŋi lɛ “jalɔi” lɛ?

8 Yesu kɛ wiemɔ ni ji “shiɛ” loo “shiɛmɔ nitsumɔ” tsuuu nii yɛ abɛbua ni kɔɔ gwantɛŋi lɛ kɛ abotiai lɛ ahe lɛ mli. No hewɔ lɛ, te wɔfeɔ tɛŋŋ wɔleɔ akɛ abɛbua nɛɛ kɔɔ nɔ hewɔ ni shiɛmɔ nitsumɔ lɛ he hiaa waa lɛ he?

9 Dani wɔbaanyɛ wɔhã sanebimɔ nɛɛ hetoo lɛ, esa akɛ wɔkai akɛ Yesu gba abɛbua lɛ koni ekɛtsɔɔ esɛɛnyiɛlɔi lɛ nii. Jeee gwantɛŋi kɛ abotiai diɛŋtsɛ ahe Yesu wieɔ lɛ. Ni nakai nɔŋŋ abɛbua lɛ etsɔɔɔ akɛ esa akɛ mɛi ni abaakojo amɛ akɛ gwantɛŋi lɛ ateŋ mɔ fɛɛ mɔ ahã mɛi ni afɔ amɛ mu lɛ niyenii kɛ atade, amɛkwɛ amɛ kɛ́ amɛhe miiye, loo amɛyasara amɛ kɛ́ awo amɛ tsuŋ. Moŋ lɛ, nɔ ni Yesu tsɔɔ ji akɛ, abaabu gwantɛŋi lɛ “jalɔi,” ejaakɛ amɛna mɛi ni afɔ amɛ mu lɛ akɛ Yesu nyɛmimɛi, ni amɛye amɛ anɔkwa yɛ naagbee gbii ni jaraa nɛɛ amli.Mateo 10:40-42; 25:40, 46; 2 Timoteo 3:1-5.

10. Mɛni gwantɛŋi lɛ baanyɛ afee kɛye abua Kristo nyɛmimɛi lɛ?

10 Be ni Yesu gba abɛbua ni kɔɔ gwantɛŋi lɛ kɛ abotiai lɛ ahe lɛ, no mli lɛ eewie nibii ni baaya nɔ yɛ naagbee gbii lɛ amli lɛ he. (Mateo 24:3) Akɛ nɔkwɛmɔnɔ lɛ, ewie akɛ: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ.” (Mateo 24:14) Ni be ni egba abɛbua ni kɔɔ talɛntai lɛ ahe lɛ sɛɛ nɔŋŋ ni egba abɛbua ni kɔɔ gwantɛŋi lɛ kɛ abotiai lɛ ahe lɛ. Yesu gba abɛbua ni kɔɔ talɛntai lɛ ahe lɛ ni ekɛtsɔɔ mɛi ni afɔ amɛ mu lɛ akɛ, esa akɛ amɛkɛ amɛnyɛmɔ fɛɛ atsu shiɛmɔ nitsumɔ lɛ. Shi mɛi ni afɔ amɛ mu lɛ ateŋ mɛi ni eshwɛ  yɛ shikpɔŋ lɛ nɔ lɛ ayi faaa, ni nitsumɔ ni akɛwo amɛdɛŋ lɛ da! Yesu ekɛɛ amɛ akɛ esa akɛ amɛshiɛ yɛ “jeŋmaji lɛ fɛɛ” mli dani naagbee lɛ aba. Abɛbua ni kɔɔ gwantɛŋi lɛ kɛ abotiai lɛ ahe lɛ hãa wɔleɔ akɛ, “gwantɛŋi lɛ” yeɔ amɛbuaa Yesu nyɛmimɛi lɛ. Ni nibii ni hi waa ni amɛbaanyɛ amɛfee kɛye amɛbua mɛi ni afɔ amɛmu lɛ ateŋ ekome ji, ni amɛbaaye amɛbua amɛ koni amɛnyɛ amɛtsu shiɛmɔ nitsumɔ lɛ. Esa akɛ amɛtsu onia kɛfi nitsumɔ nɛɛ sɛɛ, ní amɛwo mɛi ni afɔ amɛ mu lɛ hewalɛ ni amɛya nɔ amɛtsu shiɛmɔ nitsumɔ lɛ. Shi ani no pɛ kɛkɛ fa?

NAMƐI ESA AKƐ AMƐSHIƐ?

11. Mɛɛ sane ekolɛ mɛi komɛi baabi, ni mɛni hewɔ?

11 Ŋmɛnɛ lɛ, Yesu kaselɔi lɛ ayibɔ eshɛ akpekpei kpaanyɔ, ni amɛteŋ mɛi pii jeee mɛi ni afɔ amɛ mu. Yesu kɛ talɛntai lɛ hãaa mɛi ni afɔko amɛ mu lɛ. Enyɛmimɛi ni afɔ amɛ mu lɛ pɛ ekɛhã. (Mateo 25:14-18) No hewɔ lɛ, ekolɛ mɔ ko baabi akɛ, ‘Kɛ́ Yesu hãaa amɛ talɛntai lɛ eko lɛ, belɛ ani ehe miihia ni amɛshiɛ?’ Hɛɛ, ehe miihia. Nyɛhãa wɔkwɛa nɔ hewɔ.

12. Mɛni wɔkaseɔ yɛ Yesu famɔ ni yɔɔ Mateo 28:19, 20 lɛ mli?

12 Yesu fã esɛɛnyiɛlɔi lɛ fɛɛ akɛ amɛshiɛ. Be ni atee Yesu shi lɛ, ekɛɛ esɛɛnyiɛlɔi lɛ akɛ ‘amɛfee mɛi kaselɔi’ ni amɛtsɔɔ amɛ ni amɛye “nii fiaa” ni efã amɛ lɛ nɔ. Ni tsɔɔ akɛ, esa akɛ mɛi ni abaafee amɛ kaselɔi lɛ hu aye Yesu famɔ akɛ ashiɛ lɛ nɔ. (Kanemɔ Mateo 28:19, 20.) No hewɔ lɛ eyɛ faŋŋ akɛ, kɛ́ wɔhiɛnɔkamɔ ji akɛ wɔbaaya ŋwɛi jio, wɔbaahi shikpɔŋ lɛ nɔ jio, esa akɛ wɔ fɛɛ wɔshiɛ.Bɔfoi 10:42.

Kɛ́ wɔhiɛnɔkamɔ ji akɛ wɔbaaya ŋwɛi jio, wɔbaahi shikpɔŋ lɛ nɔ jio, esa akɛ wɔ fɛɛ wɔshiɛ

13. Mɛni wɔkaseɔ yɛ ninaa ni ajie atsɔɔ Yohane lɛ mli?

13 Kpojiemɔ wolo lɛ hãa wɔleɔ akɛ mɛi krokomɛi baafata mɛi ni afɔ amɛ mu lɛ ahe kɛtsu shiɛmɔ nitsumɔ lɛ. Yɛ ninaa ko ni Yesu jie etsɔɔ Yohane lɛ mli lɛ, ena “ayemforo” ko ni miifɔ̃ mɛi nine akɛ amɛba ni amɛbanu nu ko ni hãa mɔ wala. Ayemforo lɛ ji mɛi 144,000 ni afɔ amɛ mu ni kɛ Yesu baaye nɔ akɛ maŋtsɛmɛi yɛ ŋwɛi lɛ. (Kpojiemɔ 14:1, 3; 22:17) Nu lɛ damɔ shi kɛhã Yesu kpɔmɔ afɔleshãa lɛ ni baaye abua mɛi ni amɛhi shi akɛ mɛi ni esha kɛ gbele bɛ amɛnɔ hewalɛ lɛ. (Mateo 20:28; Yohane 3:16; 1 Yohane 4:9, 10) Mɛi ni afɔ amɛ mu lɛ kɛ ekãa tsɔɔ mɛi kpɔmɔnɔ lɛ kɛ bɔ ni amɛbaafee amɛná he sɛɛ lɛ he nii. (1 Korintobii 1:23) Shi yɛ ninaa lɛ mli lɛ, ena mɛi krokomɛi hu. Mɛi nɛɛ fataaa mɛi ni afɔ amɛ mu lɛ ahe, ni amɛhiɛnɔkamɔ ji akɛ amɛbaahi shikpɔŋ lɛ nɔ. Amɛ hu afã amɛ ni amɛkɛɛ mɛi akɛ: “Ba!” Amɛboɔ famɔ nɛɛ toi ni amɛtsɔɔ mɛi sane kpakpa lɛ. No hewɔ lɛ, ninaa nɛɛ hãa wɔnaa akɛ, esa akɛ mɛi fɛɛ ni boɔ sane kpakpa lɛ toi lɛ ashiɛ ahã mɛi krokomɛi.

14. Mɛni kɛ́ wɔfee lɛ no baatsɔɔ akɛ wɔmiiye “Kristo lɛ mla lɛ” nɔ?

14 Esa akɛ mɛi fɛɛ ni boɔ “Kristo lɛ mla lɛ” toi lɛ ashiɛ. (Galatiabii 6:2) Mlai  ni Yehowa kɛhã mɛi ni afɔ amɛ mu lɛ, no nɔŋŋ ekɛhã mɛi ni afɔko amɛ mu lɛ, ni eekpa gbɛ akɛ amɛ fɛɛ amɛbaaye nɔ. Yɛ blema lɛ, Yehowa kpa gbɛ akɛ Israelbii lɛ kɛ gbɔi ni ebahi amɛŋɔɔ ní amɛjeee Israelbii lɛ fɛɛ baaye emlai lɛ anɔ. (2 Mose 12:49; 3 Mose 24:22) Ŋmɛnɛ lɛ, ehe ehiaaa ni wɔye mlai fɛɛ ni Nyɔŋmɔ kɛhã Israelbii lɛ anɔ. Moŋ lɛ, esa akɛ wɔye “Kristo lɛ mla lɛ” nɔ, ekɔɔɔ he eko kɛji afɔ wɔ mu loo afɔko wɔ mu. Suɔmɔ ji nɔ kome ni he hiaa waa ni Yesu tsɔɔ wɔ. (Yohane 13:35; Yakobo 2:8) Esa akɛ wɔsumɔ Yehowa, Yesu, kɛ gbɔmɛi. Gbɛ ni hi fe fɛɛ ni wɔbaanyɛ wɔtsɔ nɔ wɔjie suɔmɔ nɛɛ kpo ji, ni wɔbaagba mɛi Maŋtsɛyeli lɛ he sane kpakpa lɛ.Yohane 15:10; Bɔfoi 1:8.

15. Mɛni hewɔ wɔbaanyɛ wɔkɛɛ akɛ famɔ ni Yesu kɛhã akɛ ashiɛ lɛ kɔɔ ekaselɔi lɛ fɛɛ ahe lɛ?

15 Nibii ni Yesu kɛɛ ekaselɔi lɛ ateŋ mɛi fioo komɛi lɛ baanyɛ akɔ ekaselɔi babaoo hu ahe. Akɛ nɔkwɛmɔnɔ lɛ, Yesu kɛ ekaselɔi lɛ ateŋ mɛi 11 fee kpaŋmɔ, ni ewo amɛ shi akɛ amɛ kɛ lɛ baaye maŋtsɛ yɛ e-Maŋtsɛyeli lɛ mli. Shi kpaŋmɔ nɛɛ kɔɔ mɛi 144,000 ni kɛ lɛ baaye nɔ lɛ fɛɛ ahe. (Luka 22:29, 30; Kpojiemɔ 5:10; 7:4-8) Be ni atee Yesu shi lɛ, ekaselɔi fioo komɛi pɛ nu famɔ ni ekɛhã akɛ amɛyashiɛ lɛ. (Bɔfoi 10:40-42; 1 Korintobii 15:6) Kɛ̃lɛ, Yesu kaselɔi ni hi shi yɛ klɛŋklɛŋ afii 100 lɛ mli lɛ fɛɛ bo nakai famɔ lɛ toi. (Bɔfoi 8:4; 1 Petro 1:8) Ŋmɛnɛ hu lɛ, eyɛ mli akɛ wɔnuko Yesu gbee ni eekɛɛ wɔ akɛ wɔyashiɛ moŋ, shi  wɔle akɛ esa akɛ wɔshiɛ. Yɛ anɔkwale mli lɛ, mɛi akpekpei kpaanyɔ miitsu nitsumɔ nɛɛ. Wɔle akɛ shiɛmɔ ni wɔshiɛɔ lɛ hãa anaa faŋŋ akɛ wɔyɛ hemɔkɛyeli yɛ Yesu mli.Yakobo 2:18.

AMRƆ NƐƐ JI BE NI ESA AKƐ WƆYE ANƆKWA

16-18. Mɛni wɔbaanyɛ wɔfee kɛye wɔbua Kristo nyɛmimɛi lɛ? Ni mɛni hewɔ esa akɛ wɔɔfee nakai amrɔ nɛɛ?

16 Daa gbi lɛ, Satan miimia tutuamɔ ni ekɛbaa Kristo nyɛmimɛi ni afɔ amɛ mu ni yɔɔ shikpɔŋ lɛ nɔ lolo lɛ anɔ lɛ mli, ni ele akɛ “be fioo kɛkɛ eyɔɔ.” (Kpojiemɔ 12:9, 12, 17) Fɛɛ sɛɛ lɛ, mɛi ni afɔ amɛ mu lɛ miinyiɛ hiɛ yɛ shiɛmɔ nitsumɔ lɛ mli lolo, ni mɛi babaoo miinu sane kpakpa lɛ fe bei fɛɛ ni eho. Ŋwanejee ko kwraa bɛ he akɛ, Yesu kɛ mɛi ni afɔ amɛ mu lɛ yɛ, ni eekudɔ amɛ.Mateo 28:20.

Eji hegbɛ ni wɔná akɛ wɔɔye wɔbua Kristo nyɛmimɛi lɛ

17 Wɔnuɔ he akɛ eji hegbɛ ni wɔná akɛ wɔɔye wɔbua Kristo nyɛmimɛi lɛ. Wɔyeɔ wɔbuaa amɛ kɛtsɔ shiɛmɔ nitsumɔ lɛ ni wɔfataa amɛhe kɛtsuɔ lɛ nɔ. Kɛfata he lɛ, wɔyeɔ wɔbuaa amɛ kɛtsɔ onia ni wɔtsuɔ lɛ, kɛ wamɔ ni wɔwaa kɛmamɔɔ Maŋtsɛyeli Asai, Kpee Asai, kɛ nitsumɔhe niji lɛ anɔ. Kɛ́ wɔbo asafoŋ onukpai kɛ hii krokomɛi ni “nyɔŋ anɔkwafo kɛ hiɛshikalɔ lɛ” ehala lɛ atoi be fɛɛ be lɛ, no hu tsɔɔ akɛ wɔmiisumɔ ni wɔye wɔbua Kristo nyɛmimɛi lɛ.Mateo 24:45-47; Hebribii 13:17.

18 Etsɛŋ, abaasɔo mɛi ni afɔ amɛ mu lɛ ateŋ mɛi ni eshwɛ yɛ shikpɔŋ lɛ nɔ lɛ anaa nɔ ni ji naagbee nɔ. No sɛɛ lɛ, ŋwɛibɔfoi lɛ baaŋmɛɛ “shikpɔŋ lɛ kɔɔyɔi ejwɛ lɛ” ahe, ni amanehulu kpeteŋkpele lɛ baaje shishi. (Kpojiemɔ 7:1-3) Dani Harmagedon ta lɛ baaje shishi lɛ, Yesu baaŋɔ mɛi ni afɔ amɛ mu lɛ kɛya ŋwɛi. (Mateo 13:41-43) No hewɔ lɛ, kɛ́ wɔmiitao ni Yesu akojo wɔ akɛ gwantɛŋi kɛ́ eba lɛ, no lɛ amrɔ nɛɛ ji be ni esa akɛ wɔye Kristo nyɛmimɛi ni afɔ amɛ mu lɛ anɔkwa.

Wɔyeɔ wɔbuaa Kristo nyɛmimɛi lɛ yɛ gbɛi srɔtoi anɔ (Kwɛmɔ kuku 17)

^ kk. 6 Kɛ́ ootao ole abɛbua nɛɛ mlitsɔɔmɔ fitsofitso lɛ, kwɛmɔ nikasemɔ ni yitso ji, “Te Oshidaamɔ Baafee Tɛŋŋ yɛ Kojomɔ Sɛi lɛ Hiɛ?” kɛ nɔ ni yitso ji, “Mɛɛ Wɔsɛɛ Be Yɔɔ Kɛha Gwantɛŋi kɛ Abotiai Lɛ?” ni je kpo yɛ October 15, 1995, Buu-Mɔɔ lɛ mli lɛ.