Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) MARCH 2015

“Enɛ Ji Gbɛ ni Okpɛlɛ Nɔ”

“Enɛ Ji Gbɛ ni Okpɛlɛ Nɔ”

“Oŋɔ nibii nɛɛ otee hiɛshikalɔi kɛ nilelɔi jogbaŋŋ, ni ojie amɛ kpo otsɔɔ gbekɛbii bibii.”LUKA 10:21.

1. Mɛni hewɔ Yesu mli “fili lɛ yɛ mumɔ krɔŋkrɔŋ lɛ mli” lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

ANI obaanyɛ ofee bɔ ni Yesu fee enii ehã be ni “emli fili lɛ yɛ mumɔ krɔŋkrɔŋ lɛ mli” lɛ he mfoniri? Ekolɛ eŋmɔ mugɛɛ ni ehiɛ su hã ana akɛ lɛɛlɛŋ ená miishɛɛ. Shi mɛni hã emli fili lɛ lɛ? No mli lɛ, etsu ekaselɔi lɛ ateŋ mɛi 70 ni amɛyashiɛ Nyɔŋmɔ Maŋtsɛyeli lɛ he sane kpakpa lɛ. Shi akɛni hiɛnaanɔbii babaoo yɛ ni baate shi awo sane kpakpa lɛ hewɔ lɛ, Yesu shwe waa ni ele bɔ ni ekaselɔi lɛ baatsu nitsumɔ ni ekɛwo amɛdɛŋ lɛ he nii amɛhã. Hiɛnaanɔbii nɛɛ ateŋ mɛi komɛi ji woloŋmalɔi kɛ Farisifoi ní etee skul waa ní le ŋaa lɛ. Amɛmiitao ni mɛi abu Yesu akɛ kapintafonyo ko kɛkɛ, ní abu ekaselɔi lɛ hu akɛ “mɛi ni leee woloŋ kɛ mɛi foji.” (Bɔfoi 4:13; Marko 6:3) Kɛ̃lɛ, kaselɔi lɛ ku amɛsɛɛ kɛ miishɛɛ. Yɛ shiteekɛwoo ni amɛkɛkpe lɛ fɛɛ sɛɛ lɛ, amɛnyɛ amɛshiɛ, ni daimonioi po nyɛɛɛ atsĩ amɛnaa! Mɛni hã kaselɔi lɛ ná miishɛɛ ni amɛfee ekãa lɛ?Kanemɔ Luka 10:1, 17-21.

Nyɔŋmɔ webii lɛ etee nɔ amɛtsɔɔ nii yɛ gbɛ ni baahã nibii afee faŋŋ ni anu shishi oya nɔ

2. (a) Mɛni hewɔ Yesu tsɛ ekaselɔi lɛ gbekɛbii lɛ? (b) Mɛni ye ebua Yesu kaselɔi lɛ ni amɛnu Biblia mli anɔkwalei ni shishinumɔ wa lɛ ashishi?

2 Yesu kɛɛ Yehowa akɛ: “Miijie oyi yɛ faŋŋ, Ataa, ŋwɛi kɛ  shikpɔŋ Nuŋtsɔ, ejaakɛ oŋɔ nibii nɛɛ otee hiɛshikalɔi kɛ nilelɔi, ni ojie amɛ kpo otsɔɔ gbekɛbii bibii. Hɛɛ, Ataa, ejaakɛ enɛ ji gbɛ ni okpɛlɛ nɔ.” (Mateo 11:25, 26) Mɛni hewɔ Yesu tsɛ ekaselɔi lɛ gbekɛbii bibii lɛ? Etsɛ amɛ nakai ejaakɛ amɛmiisumɔ ni atsɔɔ amɛ nii tamɔ gbekɛbii, ni amɛtamɔɔɔ woloŋmalɔi kɛ Farisifoi ní etee skul waa ní susuɔ akɛ amɛhiɛ kã shi lɛ. Kaselɔi nɛɛ holeee amɛhe nɔ, amɛbaa amɛhe shi. (Mateo 18:1-4) Ni akɛni amɛbaa amɛhe shi hewɔ lɛ, Yehowa kɛ emumɔ krɔŋkrɔŋ lɛ ye ebua amɛ ni amɛnu Biblia mli anɔkwalei ni shishinumɔ wa lɛ ashishi. Shi akɛni Yudafoi ajamɔŋ hiɛnyiɛlɔi lɛ holeɔ amɛhe nɔ hewɔ lɛ, Satan tee nɔ eshwila amɛ.

3. Mɛni he wɔbaasusu yɛ nikasemɔ nɛɛ mli?

3 Ebɛ naakpɛɛ mɔ akɛ Yesu mli fili lɛ waa nakai! Emii shɛ ehe yɛ gbɛ ni Yehowa tsɔ nɔ etsɔɔ mɛi ni baa amɛhe shi, ní eyako skul pii po lɛ Biblia mli anɔkwalei ni shishinumɔ wa lɛ. Nyɔŋmɔ kpɛlɛɔ nitsɔɔmɔ gbɛ nɛɛ nɔ, ni etsakeko. Mɛni Nyɔŋmɔ feɔ kɛtsɔɔ akɛ ekpɛlɛɔ nitsɔɔmɔ gbɛ nɛɛ nɔ lolo? Yɛ nikasemɔ nɛɛ mli lɛ, wɔbaakwɛ bɔ ni Yehowa etsɔɔ mɛi ni baa amɛhe shi ŋmɛnɛ lɛ Biblia mli anɔkwalei ni shishinumɔ wa lɛ.

MƐI FƐƐ BAANYƐ ANU ANƆKWALEI NI SHISHINUMƆ WA LƐ ASHISHI

4. Mɛɛ gbɛi anɔ Buu-Mɔɔ henɔ hee ní afee lɛ ji nikeenii?

4 Yɛ afii fioo ni eho nɛɛ amli lɛ, Yehowa asafo lɛ ehã ana faŋŋ akɛ, ehe miihia ni atsɔɔ mɛi nii yɛ gbɛ ni baahã nibii afee faŋŋ ni anu shishi oya nɔ. Nyɛhãa wɔsusua nibii etɛ komɛi ni tsɔɔ nakai lɛ ahe. Klɛŋklɛŋ nɔ lɛ ji, Buu-Mɔɔ lɛ henɔ ko ní afee ní kanemɔ waaa lɛ. * (Kwɛmɔ shishigbɛ niŋmaa lɛ.) Nikeenii nɛɛ eye ebua mɛi babaoo, ni mɛi nɛɛ ateŋ mɛi komɛi ji mɛi ni nyɛɛɛ akane nii jogbaŋŋ, loo mɛi ni miikase wiemɔ hee. Fɔlɔi pii hu eyɔse akɛ Buu-Mɔɔ hee nɛɛ hewɔ lɛ, amɛbii lɛ nuɔ nɔ ni akaseɔ lɛ shishi jogbaŋŋ. Mɛi babaoo eŋmala Gbɛtsɔɔmɔ Kuu lɛ woji kɛtsɔɔ bɔ ni amɛhiɛ esɔ nikeenii nɛɛ. Nyɛmi yoo ko wie akɛ, tsutsu ko lɛ esheɔ gbeyei akɛ ebaahã saji ahetoo yɛ Buu-Mɔɔ Nikasemɔ lɛ shishi. Shi amrɔ nɛɛ, esheee gbeyei dɔŋŋ! Be ni ekɛ Buu-Mɔɔ henɔ hee lɛ bɔi nitsumɔ lɛ, ewie akɛ: “Amrɔ nɛɛ mihãa hetoo fe shi kome, ni misheee gbeyei dɔŋŋ! Miida Yehowa kɛ nyɛ fɛɛ shi.”

5. Tsɔɔmɔ sɛɛnamɔi komɛi ni yɔɔ New World Translation of the Holy Scriptures hee lɛ he.

5 Nɔ ni ji enyɔ lɛ ji New World Translation of the Holy Scriptures hee lɛ, ni ajie lɛ kpo yɛ Blɔfo mli yɛ afi kpee ni afee yɛ October 5, 2013 lɛ. * (Kwɛmɔ shishigbɛ niŋmaa lɛ.) Yɛ Biblia hee nɛɛ mli lɛ, atse wiemɔi abɔ ni akɛtsu nii yɛ ŋmalɛi komɛi amli lɛ nɔ, kɛ̃lɛ otii ni yɔɔ ŋmalɛi nɛɛ amli lɛ tsakeko ni efee faŋŋ fe tsutsu  lɛ. Akɛ nɔkwɛmɔnɔ lɛ, atse wiemɔi abɔ ni yɔɔ Hiob 10:1 lɛ nɔ kɛjɛ 27 kɛba 19, ni atse Abɛi 8:6 lɛ hu nɔ kɛjɛ 20 kɛba 13. Biblia hee nɛɛ ehã ŋmalɛi enyɔ nɛɛ fɛɛ ashishinumɔ efee faŋŋ fe tsutsu lɛ. Nyɛmi nuu ko ni afɔ lɛ mu ni kɛ afii babaoo esɔmɔ Yehowa yɛ anɔkwayeli mli lɛ wie akɛ, “Bianɛ nɔŋŋ mikane Hiob wolo lɛ migbe naa yɛ Biblia hee lɛ mli, ni etamɔ nɔ ni kpaako kwraa minuɔ shishi!” Mɛi babaoo ewie nibii tamɔ nakai.

6. Te onuɔ he tɛŋŋ yɛ bɔ ni ahã wɔnu Mateo 24:45-47 lɛ shishi jogbaŋŋ lɛ he?

6 Nɔ ni ji etɛ lɛ ji tsakemɔi komɛi ni afee yɛ bɔ ni wɔnuɔ ŋmalɛi komɛi ashishi wɔhãa lɛ mli. Akɛ nɔkwɛmɔnɔ lɛ, yɛ July 15, 2013, Buu-Mɔɔ lɛ mli lɛ, ahã wɔnu mɔ ni “nyɔŋ anɔkwafo kɛ hiɛshikalɔ” lɛ ji lɛ shishi jogbaŋŋ. (Mateo 24:45-47) Atsɔɔ mli yɛ nakai Buu-Mɔɔ lɛ mli akɛ, nyɔŋ anɔkwafo lɛ ji Gbɛtsɔɔmɔ Kuu lɛ. Ni ‘webii’ lɛ ji mɛi fɛɛ ni nyɔŋ anɔkwafo lɛ lɛɔ amɛ lɛ, ekɔɔɔ he eko kɛ́ amɛji mɛi ni afɔ amɛ mu loo “gwantɛŋi krokomɛi” lɛ mli bii. (Yohane 10:16) Eŋɔɔ wɔnaa waa akɛ wɔmiikase anɔkwalei nɛɛ, ni wɔyɛ he miishɛɛ akɛ wɔɔtsɔɔ mɛi krokomɛi hu! Mɛɛ gbɛi krokomɛi anɔ Yehowa ehã ana akɛ, kɛ́ atsɔɔ nii yɛ gbɛ ni baahã nibii afee faŋŋ ni anu shishi oya nɔ lɛ, ekpɛlɛɔ nɔ?

AGBALA BIBLIA LƐ MLI SAJI LƐ AMLI JOGBAŊŊ FE TSUTSU LƐ

7, 8. Mɛɛ saji komɛi yɔɔ Biblia lɛ mli ní feɔ nibii ni baaba wɔsɛɛ lɛ ahe mfoniri?

7 Kɛ́ obɔi Yehowa sɔɔmɔ afii babaoo ni eho nɛ lɛ, ekolɛ okadi akɛ atsake bɔ ni agbalaa Biblia lɛ mli saji amli ahãa yɛ wɔwoji lɛ amli lɛ. Tsutsu ko lɛ, afɔɔ kɛɛmɔ akɛ saji komɛi ni yɔɔ Biblia lɛ mli lɛ feɔ nibii komɛi ni baaba wɔsɛɛ lɛ ahe mfoniri. Ani nɔ ko yɛ ni abaanyɛ adamɔ nɔ atsɔɔ Biblia lɛ mli saji ashishi yɛ gbɛ ni tamɔ nɛkɛ nɔ? Hɛɛ. Akɛ nɔkwɛmɔnɔ lɛ, Yesu wie “gbalɔ Yona okadi lɛ” he. (Kanemɔ Mateo 12:39, 40.) Yesu tsɔɔ mli akɛ, gbii abɔ ni Yona ye yɛ loo lɛ musuŋ lɛ feɔ gbii abɔ ni lɛ, Yesu lɛ, ebaaye yɛ gbonyo bu lɛ mli lɛ he mfoniri.

Kɛ́ wɔkase Biblia lɛ mli saji ni tamɔ nakai kɛ nɔ ni amɛfeɔ he mfoniri lɛ ahe nii lɛ, ewajeɔ wɔhemɔkɛyeli

8 Biblia lɛ mli saji krokomɛi yɛ ni feɔ nibii ni baaba wɔsɛɛ lɛ ahe mfoniri. Bɔfo Paulo wie saji ni tamɔ nakai lɛ babaoo ahe. Akɛ nɔkwɛmɔnɔ lɛ, ewie akɛ wekukpaa ni kã Abraham, Hagar, kɛ Sara teŋ lɛ feɔ wekukpaa ni kã Yehowa, Israel maŋ lɛ, kɛ Nyɔŋmɔ gbɛjianɔtoo lɛ fã ni yɔɔ ŋwɛi lɛ teŋ lɛ he mfoniri. (Galatiabii 4:22-26) Nakai nɔŋŋ kpeebuu lɛ, sɔlemɔwe lɛ, Kpatamɔ Gbi lɛ, osɔfonukpa lɛ, kɛ Mla lɛ mli nibii krokomɛi lɛ hu fee “nibii kpakpai ni baaba lɛ ahɔɔŋ” loo amɛhe mfoniri. (Hebribii 9:23-25; 10:1) Kɛ́ wɔkase Biblia lɛ mli saji ni tamɔ nakai kɛ nɔ ni amɛfeɔ he mfoniri lɛ ahe nii lɛ, ewajeɔ wɔhemɔkɛyeli. Shi ani enɛ tsɔɔ akɛ gbɔmɛi, nibii ni tee nɔ, kɛ nibii krokomɛi fɛɛ ni awie he yɛ Biblia lɛ mli lɛ feɔ mɔ ko loo nɔ ko he mfoniri?

9. Be ko ni eho lɛ, te agbala Biblia lɛ mli sane ni kɔɔ Nabot he lɛ mli tɛŋŋ?

9 Be ko ni eho lɛ, afɔɔ wiemɔ yɛ wɔwoji lɛ amli akɛ gbɔmɛi, nibii ni tee nɔ,  kɛ nibii krokomɛi fɛɛ ni awie he yɛ Biblia lɛ mli saji komɛi amli lɛ feɔ mɔ ko loo nɔ ko he mfoniri. Akɛ nɔkwɛmɔnɔ lɛ, awie nɔ ko nakai yɛ Nabot sane lɛ he. Maŋnyɛ Yezebel yitsoŋwalɔ lɛ hã agbe Nabot, bɔ ni afee ni ewu Ahab anyɛ aŋɔ Nabot weintrom lɛ. (1 Maŋtsɛmɛi 21:1-16) Yɛ afi 1932 lɛ, Buu-Mɔɔ lɛ tsɔɔ mli akɛ, Ahab kɛ Yezebel feɔ Satan kɛ egbɛjianɔtoo lɛ he mfoniri, Nabot feɔ Yesu he mfoniri, ni Nabot gbele lɛ feɔ Yesu gbele lɛ he mfoniri. Sɛɛ mli yɛ afi 1961 lɛ, wolo ni ji “Let Your Name Be Sanctified” lɛ wie akɛ, Nabot feɔ mɛi ni afɔ amɛ mu lɛ he mfoniri, ni Yezebel feɔ Kristendom he mfoniri. Wolo lɛ kɛfata he akɛ, bɔ ni Yezebel wa Nabot yi lɛ, feɔ bɔ ni awaa mɛi ni afɔ amɛ mu lɛ ayi yɛ naagbee gbii lɛ amli lɛ he mfoniri. Niiamlitsɔɔmɔi ni tamɔ nɛkɛ ewaje Nyɔŋmɔ webii lɛ ahemɔkɛyeli afii babaoo. Kɛ́ nakai ni lɛ, mɛni hewɔ ŋmɛnɛ lɛ, ehe ebahia ni wɔtsake bɔ ni wɔtsɔɔ Biblia lɛ mli saji amli wɔhãa lɛ?

10. (a) Amrɔ nɛɛ, dani nyɔŋ anɔkwafo lɛ baawie akɛ Biblia lɛ mli sane ko feɔ nɔ ko ni baaba wɔsɛɛ lɛ he mfoniri lɛ, mɛni ekwɛɔ? (b) Ŋmɛnɛ lɛ, mɛni nɔ wɔwoji lɛ gbalaa jwɛŋmɔ kɛyaa titri?

10 Yehowa etee nɔ eye ebua “nyɔŋ anɔkwafo kɛ hiɛshikalɔ” lɛ koni ehiɛ akã shi fe tsutsu lɛ, ní ekwɛ bɔ ni etsɔɔ Biblia lɛ mli saji amli ehãa lɛ jogbaŋŋ. Yɛ mɛɛ gbɛ nɔ? Amrɔ nɛɛ, dani nyɔŋ  anɔkwafo lɛ baawie akɛ Biblia lɛ mli sane ko feɔ nɔ ko ni baaba wɔsɛɛ lɛ he mfoniri lɛ, ja ena faŋŋ yɛ Ŋmalɛ lɛ mli akɛ nakai eji. Bɔ ni atsɔɔ Biblia lɛ mli saji komɛi kɛ nibii ni amɛfeɔ he mfoniri lɛ amli ahã yɛ blema lɛ, hã ewa kɛhã nyɛmimɛi lɛ akɛ amɛaanu shishi, amɛkai, ni amɛkɛtsu nii. Nɔ ni fe fɛɛ lɛ, kɛ́ agbala jwɛŋmɔ kɛtee nibii ni Biblia lɛ mli saji lɛ feɔ amɛhe mfoniri lɛ anɔ fe nine lɛ, ehãaa mɛi ajwɛŋmɔ aya nɔ ni amɛbaanyɛ amɛkase yɛ saji nɛɛ amli lɛ nɔ. No hewɔ lɛ, ŋmɛnɛ lɛ, wɔwoji lɛ gbalaa jwɛŋmɔ kɛyaa nibii ni shishinumɔ waaa, ní wɔbaanyɛ wɔkase yɛ Biblia lɛ mli saji amli lɛ anɔ titri. Nikasemɔi nɛɛ kɔɔ sui tamɔ hemɔkɛyeli, shifimɔ, Nyɔŋmɔjamɔ su, kɛ sui kpakpai krokomɛi ahe. *—Kwɛmɔ shishigbɛ niŋmaa lɛ.

Wɔbaanyɛ wɔkase nɔ ko kpele diɛŋtsɛ yɛ Nabot nɔkwɛmɔnɔ lɛ mli (Kwɛmɔ kuku 11)

11. (a) Amrɔ nɛɛ, te atsɔɔ Nabot sane lɛ mli tɛŋŋ? Ni mɛni wɔkaseɔ yɛ esane lɛ mli? (b) Yɛ afii fioo ni eho nɛɛ amli lɛ, mɛni hewɔ afɔɔɔ kɛɛmɔ yɛ wɔwoji lɛ amli akɛ saji komɛi ni yɔɔ Biblia lɛ mli lɛ feɔ nibii ni baaba wɔsɛɛ lɛ ahe mfoniri lɛ? (Kwɛmɔ “Sanebimɔi ni Jɛ Kanelɔi Adɛŋ” ni yɔɔ Buu-Mɔɔ nɛɛ mli lɛ.)

11 Amrɔ nɛɛ, bɔ ni atsɔɔ Nabot sane lɛ mli ahãa lɛ yɛ faŋŋ, ni eshishinumɔ waaa. Jeee Yesu loo mɛi ni afɔ amɛ mu lɛ ahe mfoniri ni Nabot feɔ loo efeee lɛ hewɔ agbe lɛ lɛ. Moŋ lɛ, efai shi ni etswa akɛ ebaaye Nyɔŋmɔ anɔkwa lɛ hewɔ agbe lɛ. Yɛ eyi ni Ahab wa waa lɛ fɛɛ sɛɛ lɛ, etee nɔ ebo Yehowa Mla lɛ toi. (4 Mose 36:7; 1 Maŋtsɛmɛi 21:3) Nɔ ni efee lɛ ji nɔkwɛmɔnɔ ni nɔ bɛ kɛhã Nyɔŋmɔ tsuji fɛɛ ni yɔɔ ŋmɛnɛ ni awaa amɛ yi lɛ. (Kanemɔ 2 Timoteo 3:12.) Kristofoi fɛɛ baanyɛ anu bɔ ni atsɔɔ sane nɛɛ mli bianɛ lɛ shishi, amɛkai nikasemɔi ni yɔɔ mli lɛ, ní amɛkɛtsu nii, koni ewaje amɛhemɔkɛyeli lɛ.

12. (a) Mɛɛ jwɛŋmɔ esaaa akɛ wɔnáa yɛ Biblia lɛ mli saji ahe? (b) Mɛni hewɔ anyɛɔ agbalaa Biblia lɛ mli saji ni shishinumɔ wa lɛ po amli faŋŋ ahãa wɔ lɛ? (Kwɛmɔ shishigbɛ niŋmaa lɛ.)

12 No hewɔ lɛ, ani esa akɛ wɔmu sane naa akɛ, yɛ sui kpakpai ni wɔbaanyɛ wɔkase yɛ Biblia lɛ mli saji amli lɛ sɛɛ lɛ, nɔ ko bɛ dɔŋŋ ni wɔbaanyɛ wɔkase yɛ amɛmli? Dabi, esaaa akɛ wɔmuɔ sane naa nakai. Kɛ̃lɛ, amrɔ nɛɛ, yɛ nɔ najiaŋ ni wɔwoji lɛ baagbala jwɛŋmɔ kɛya nɔ ni Biblia lɛ mli sane ko feɔ he mfoniri lɛ nɔ lɛ, amɛgbalaa jwɛŋmɔ kɛyaa bɔ ni ekɔɔ Biblia lɛ mli sane kroko he lɛ moŋ nɔ. Akɛ nɔkwɛmɔnɔ lɛ, bɔ ni Nabot ye Yehowa anɔkwa yɛ eyi ni awa lɛ fɛɛ sɛɛ kɛyashi egbo lɛ, kaiɔ wɔ bɔ ni Kristo kɛ mɛi ni afɔ amɛ mu lɛ yeɔ Yehowa anɔkwa lɛ. Kɛ̃lɛ, ekaiɔ wɔ bɔ ni “gwantɛŋi krokomɛi” lɛ mli bii babaoo yeɔ Yehowa anɔkwa lɛ hu. Eyɛ faŋŋ akɛ nibii ni  Yehowa tsɔɔ wɔ lɛ ashishinumɔ waaa. *—Kwɛmɔ shishigbɛ niŋmaa lɛ.

AHÃ WƆNU YESU NƆKWƐMƆNII LƐ ASHISHI JOGBAŊŊ

13. Mɛɛ nɔkwɛmɔnii tsɔɔ akɛ amrɔ nɛɛ bɔ ni wɔgbalaa Yesu nɔkwɛmɔnii lɛ amli wɔhãa lɛ ehã amɛshishinumɔ efee faŋŋ, ni efee mlɛo hu?

13 Yesu Kristo ji Tsɔɔlɔ ni fe fɛɛ ni ehi shi pɛŋ. Kɛ́ Yesu miitsɔɔ mɛi nii lɛ, ekɛ nɔkwɛmɔnii fɔɔ nitsumɔ. (Mateo 13:34) Nɔkwɛmɔnii hãa nitsɔɔmɔ mɔɔ shi waa, ejaakɛ anyɛɔ akɛtsuɔ nii kɛgbalaa sane ko ni shishinumɔ wa lɛ mli yɛ gbɛ ní baahã eshishinumɔ afee mlɛo, eta mɔ tsuiŋ, ní ehã mɔ asusu nii ahe lɛ nɔ. Yɛ afii fioo komɛi ni eho nɛɛ amli lɛ, bɔ ni wɔwoji lɛ egbala Yesu nɔkwɛmɔnii lɛ amli lɛ ehã amɛshishinumɔ efee faŋŋ, ni efee mlɛo hu. Akɛ nɔkwɛmɔnɔ lɛ, July 15, 2008, Buu-Mɔɔ lɛ yeɔ ebuaa wɔ ni wɔnuɔ Yesu nɔkwɛmɔnii ni kɔɔ masha lɛ, sinapi wu lɛ, kɛ tsãani loo yaa lɛ he lɛ ashishi jogbaŋŋ. Amrɔ nɛɛ, wɔbale akɛ nɔkwɛmɔnii nɛɛ kɔɔ Nyɔŋmɔ Maŋtsɛyeli lɛ, kɛ bɔ ni eye ebua mɛi babaoo koni amɛtsi amɛhe kɛje jeŋ fɔŋ nɛɛ he ní amɛbatsɔmɔ Kristo kaselɔi lɛ he.

Nɔkwɛmɔnii hãa nitsɔɔmɔ mɔɔ shi waa, ejaakɛ anyɛɔ akɛtsuɔ nii kɛgbalaa sane ko ni shishinumɔ wa lɛ mli yɛ gbɛ ní baahã eshishinumɔ afee mlɛo, eta mɔ tsuiŋ, ní ehã mɔ asusu nii ahe lɛ nɔ

14. (a) Be ko ni eho lɛ, te wɔtsɔɔ abɛbua ni kɔɔ Samarianyo ni jie mlihilɛ kpo lɛ mli tɛŋŋ? (b) Amrɔ nɛɛ, te wɔnuɔ abɛbua nɛɛ shishi tɛŋŋ?

14 Te esa akɛ wɔnu adesãi loo abɛbuai ni yɔɔ fitsofitso ni Yesu gba lɛ ashishi tɛŋŋ? Abɛbuai nɛɛ ekomɛi feɔ nibii ni baaba wɔsɛɛ lɛ ahe mfoniri, ni ekomɛi hu tsɔɔ wɔ sui ni esa akɛ wɔjie lɛ kpo yɛ shihilɛ mli ŋmɛnɛ. Shi te wɔɔfee tɛŋŋ wɔle saji nɛɛ ateŋ nɔ ni feɔ nibii ni baaba wɔsɛɛ lɛ ahe mfoniri kɛ nɔ ni efeee nɔ ko he mfoniri? Sanebimɔ nɛɛ hetoo etee nɔ efee faŋŋ. Akɛ nɔkwɛmɔnɔ lɛ, susumɔ bɔ ni be ko ni eho lɛ wɔgbalaa Yesu abɛbua ni kɔɔ Samarianyo ni jie mlihilɛ kpo lɛ he lɛ mli wɔhãa lɛ he okwɛ. (Luka 10:30-37) Yɛ afi 1924 lɛ, Buu-Mɔɔ lɛ tsɔɔ mli akɛ, Samarianyo lɛ feɔ Yesu he mfoniri, ni gbɛ ni kpelekeɔ shi kɛjɛɔ Yerusalem kɛyaa Yeriko lɛ feɔ bɔ ni adesai ashihilɛ etee nɔ efite kɛjɛ be ni atse atua yɛ Eden abɔɔ lɛ mli lɛ he mfoniri. Agbɛnɛ hu, atsɔɔ mli akɛ, ojoyelɔi loo julɔi ni yɔɔ gbɛ lɛ nɔ lɛ feɔ nitsumɔhei wuji kɛ jarayelɔi amimyelɔi ahe mfoniri, ni osɔfo lɛ kɛ Levinyo lɛ feɔ Kristendom he mfoniri. Shi ŋmɛnɛ lɛ, wɔwoji lɛ kɛ nɔkwɛmɔnɔ nɛɛ kaiɔ Kristofoi fɛɛ akɛ esa akɛ amɛkɛ mɛi fɛɛ aye jogbaŋŋ. Esa akɛ wɔye wɔbua mɛi ni ehia amɛ lɛ, titri lɛ kɛtsɔ anɔkwalei ni kɔɔ Nyɔŋmɔ he lɛ ni wɔɔtsɔɔ amɛ lɛ nɔ. Kɛ́ wɔsusu bɔ ni Yehowa ehã anɔkwale lɛ efee faŋŋ lɛ he lɛ, wɔmii shɛɔ wɔhe waa!

15. Mɛni he wɔbaasusu yɛ nikasemɔ ni nyiɛ sɛɛ lɛ mli?

15 Yɛ nikasemɔ ni nyiɛ sɛɛ lɛ mli lɛ, wɔbaasusu Yesu nɔkwɛmɔnɔ ni kɔɔ oblayei froi nyɔŋma lɛ ahe lɛ he. (Mateo 25:1-13) Te Yesu taoɔ ni esɛɛnyiɛlɔi ni baahi shi yɛ naagbee gbii lɛ amli lɛ anu nɔkwɛmɔnɔ nɛɛ shishi ahã tɛŋŋ? Ani Yesu miitao etsɔɔ akɛ gbɔmɛi ni yɔɔ nɔkwɛmɔnɔ nɛɛ mli, nibii ni tee nɔ yɛ mli, kɛ nibii krokomɛi fɛɛ ni yɔɔ mli lɛ feɔ mɔ ko loo nɔ ko ni baaba wɔsɛɛ lɛ he mfoniri? Aloo eetao ekɛtsɔɔ wɔ nɔ ko ní baaye abua wɔ yɛ naagbee gbii nɛɛ amli? Nyɛhãa wɔkwɛa.

^ kk. 4 Afee Buu-Mɔɔ henɔ hee nɛɛ klɛŋklɛŋ kwraa yɛ Blɔfo mli yɛ July 2011. Kɛjɛ no sɛɛ kɛbaa nɛɛ, afee eko yɛ wiemɔi fioo komɛi hu amli.

^ kk. 5 Abaafee Biblia hee nɛɛ yɛ wiemɔi krokomɛi hu amli.

^ kk. 10 Akɛ nɔkwɛmɔnɔ lɛ, wolo ni ji Kasemɔ Amɛhemɔkɛyeli Lɛ wieɔ mɛi 14 ni atsĩ amɛtã yɛ Biblia lɛ mli lɛ ahe. Wolo lɛ gbalaa jwɛŋmɔ kɛyaa nibii ni wɔbaanyɛ wɔkase yɛ mɛi nɛɛ ahe lɛ nɔ, shi jeee nibii ni amɛfeɔ he mfoniri lɛ.

^ kk. 12 Nibii komɛi hu yɛ Nyɔŋmɔ Wiemɔ lɛ mli ni “shishinumɔ wa,” tamɔ Paulo wiemɔi lɛ ekomɛi nɛkɛ. Kɛ̃lɛ, mumɔ krɔŋkrɔŋ lɛ ji nɔ ni kudɔ mɛi fɛɛ ni ŋmala Biblia lɛ. Ŋmɛnɛ lɛ, nakai mumɔ lɛ nɔŋŋ yeɔ ebuaa Kristofoi koni amɛnu Biblia lɛ shishi. Ehãa amɛnuɔ “Nyɔŋmɔ nibii ni mli kwɔlɔ lɛ po” ashishi.2 Petro 3:16, 17; 1 Korintobii 2:10.