Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) MARCH 2015

Nɔ ni Wɔkaseɔ yɛ Talɛntai lɛ Ahe Nɔkwɛmɔnɔ lɛ Mli

Nɔ ni Wɔkaseɔ yɛ Talɛntai lɛ Ahe Nɔkwɛmɔnɔ lɛ Mli

“Ehã mɔ kome talɛntai enumɔ, mɔ kome hu enyɔ, ni mɔ kroko hu ekome.”MATEO 25:15.

1, 2. Mɛni hewɔ Yesu gba abɛbua ni kɔɔ talɛntai lɛ ahe lɛ?

YESU gba abɛbua ni kɔɔ talɛntai lɛ ahe lɛ koni ekɛhã esɛɛnyiɛlɔi lɛ ale sɔ̃ ni kã amɛnɔ. Shi abɛbua nɛɛ kɔɔ Yesu kaselɔi fɛɛ ahe. No hewɔ lɛ, kɛ́ wɔhiɛnɔkamɔ ji akɛ wɔbaaya ŋwɛi jio, wɔbaahi shikpɔŋ lɛ nɔ jio, esa akɛ wɔnu abɛbua nɛɛ shishi.

2 Mɛɛ be Yesu gba abɛbua nɛɛ? Egba abɛbua nɛɛ be ni etsɔɔ ekaselɔi lɛ okadi ni baatsɔɔ akɛ ebɔi nɔyeli, ni naagbee gbii lɛ eje shishi lɛ. (Mateo 24:3) No hewɔ lɛ, abɛbua ni kɔɔ talɛntai lɛ ahe lɛ fata nakai okadi lɛ he, ni abɛbua nɛɛ miiba mli yɛ wɔbe nɛɛ mli.

3. Mɛni wɔkaseɔ yɛ abɛbuai ni yɔɔ Mateo yitso 24 kɛ 25 lɛ amli?

3 Be ni Yesu wieɔ naagbee lɛ he okadi lɛ he lɛ, egba abɛbuai ejwɛ komɛi, ni amɛteŋ ekome ji abɛbua ni kɔɔ talɛntai lɛ ahe lɛ. Abɛbuai ejwɛ nɛɛ fɛɛ wieɔ sui pɔtɛi ni esa akɛ esɛɛnyiɛlɔi lɛ aná lɛ ahe. Wɔbaanyɛ wɔkane abɛbuai nɛɛ yɛ Mateo 24:45 kɛyashi yitso 25:46 lɛ. Klɛŋklɛŋ abɛbua lɛ kɔɔ nyɔŋ anɔkwafo lɛ he. Nyɔŋ anɔkwafo nɛɛ ji mɛi ni afɔ amɛ mu lɛ ateŋ mɛi fioo komɛi ni tsuɔ nii akɛ kuu kɛtsɔɔ  Yehowa webii lɛ nii. Esa akɛ mɛi nɛɛ aye anɔkwa ni amɛhã amɛhiɛ akã shi. * (Kwɛmɔ shishigbɛ niŋmaa lɛ.) Abɛbua ni ji enyɔ lɛ kɔɔ oblayei froi nyɔŋma lɛ ahe. Yesu gba abɛbua nɛɛ kɛbɔ mɛi ni afɔ amɛ mu lɛ kɔkɔ akɛ esa akɛ amɛsaa amɛhe amɛto ni amɛhã amɛhiɛ ahi amɛhe nɔ, ejaakɛ amɛleee gbi loo ŋmɛlɛtswaa nɔ ni ebaaba. * (Kwɛmɔ shishigbɛ niŋmaa lɛ.) Abɛbua ni ji etɛ ni Yesu gba lɛ ji nɔ ni kɔɔ talɛntai lɛ ahe lɛ. Etsɔ abɛbua nɛɛ nɔ ehã mɛi ni afɔ amɛ mu lɛ fɛɛ le akɛ, akɛ Kristofoi lɛ, sɔ̃i komɛi jwere amɛnɔ ni no hewɔ lɛ esa akɛ amɛtsu nii waa. Naagbee lɛ, Yesu gba abɛbua ni kɔɔ gwantɛŋi lɛ kɛ abotiai lɛ ahe lɛ. Mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ ahewɔ Yesu gba abɛbua nɛɛ. Ehã efee faŋŋ ehã amɛ akɛ, esa akɛ amɛye anɔkwa ni amɛfee nɔ fɛɛ nɔ ni amɛbaanyɛ kɛfi enyɛmimɛi ni afɔ amɛ mu lɛ asɛɛ. * (Kwɛmɔ shishigbɛ niŋmaa lɛ.) Wɔbaawie abɛbua ni kɔɔ talɛntai lɛ ahe lɛ he yɛ nikasemɔ nɛɛ mli.

NUU KO HÃ ENYƆJI SHIKA BABAOO

4, 5. Namɔ nuu ni yɔɔ abɛbua lɛ mli lɛ damɔ shi kɛhã? Mɛni ji talɛnta?

4 Kanemɔ Mateo 25:14-30. Yɛ abɛbua ni kɔɔ talɛntai lɛ ahe lɛ mli lɛ, Yesu wie nuu ko ni fã gbɛ lɛ he. Yesu gba abɛbua kroko ni tamɔ abɛbua nɛɛ nɔŋŋ. Nakai abɛbua lɛ kɔɔ nuu ko ni fã gbɛ koni eyaŋɔ maŋtsɛyeli hewalɛ ehã ehe lɛ he. * (Kwɛmɔ shishigbɛ niŋmaa lɛ.) (Luka 19:12) Kɛjɛ jeeŋmɔ beebe lɛ, wɔwoji lɛ etsɔɔ mli akɛ, hii ni awie amɛhe yɛ abɛbuai enyɔ nɛɛ amli lɛ damɔ shi kɛhã Yesu be ni etee ŋwɛi yɛ afi 33 lɛ. Shi be ni Yesu tee ŋwɛi lɛ, awooo lɛ Maŋtsɛ amrɔ nɔŋŋ. Emɛ kɛyashi afi 1914, be ni aŋɔ “ehenyɛlɔi lɛ afee enajiashi maaŋoo” lɛ.Hebribii 10:12, 13.

5 Nuu ni Yesu wie ehe yɛ abɛbua lɛ mli lɛ hiɛ talɛntai kpaanyɔ. Enɛ jeee shika bibioo! * (Kwɛmɔ shishigbɛ niŋmaa lɛ.) Dani nuu lɛ baashi lɛ, ekɛ shika nɛɛ hã enyɔji lɛ. Ekɛɛ amɛ akɛ, amɛkɛ shika lɛ atsu nii koni amɛná eko amɛgbe yi amɛhã lɛ. Taakɛ eji yɛ nuu lɛ gbɛfaŋ lɛ, Yesu hu yɛ nɔ ko ni jara wa waa kɛhã lɛ. Mɛni ji no? No ji nitsumɔ ni etsu be ni eyɔɔ shikpɔŋ lɛ nɔ lɛ.

“Nyɛholea nyɛhiŋmɛii anɔ ni nyɛkwɛa ŋmɔji lɛ, akɛ amɛgba futaa ni sa kpamɔ”

6, 7. Mɛni talɛntai lɛ damɔ shi kɛhã?

6 Yesu kɛ shiɛmɔ nitsumɔ lɛ shwɛɛɛ kwraa. Shiɛmɔ ni eshiɛ lɛ hã mɛi babaoo batsɔmɔ ekaselɔi. (Kanemɔ Luka 4:43.) Shi ele akɛ nitsumɔ babaoo yɛ ni esa akɛ atsu, ejaakɛ mɛi babaoo yɛ lolo ni baabo sane kpakpa lɛ toi. Ekɛɛ ekaselɔi lɛ akɛ: “Nyɛholea nyɛhiŋmɛii anɔ  ni nyɛkwɛa ŋmɔji lɛ, akɛ amɛgba futaa ni sa kpamɔ.” (Yohane 4:35-38) Okwaafonyo kpakpa ko bɛ ni baashi ŋmɔ ko ni egba futaa ni sa kpamɔ lɛ ni efite. Yesu hu efeee nakai. No hewɔ lɛ, be ni eshwɛ fioo ni ebaaku esɛɛ eya ŋwɛi lɛ, efã esɛɛnyiɛlɔi lɛ akɛ: “Nyɛyaa nyɛyafea mɛi ni jɛ jeŋmaji lɛ fɛɛ mli lɛ kaselɔi.” (Mateo 28:18-20) Lɛɛlɛŋ, Yesu hã esɛɛnyiɛlɔi lɛ jwetri ko ni jara wa waa, no ji shiɛmɔ nitsumɔ lɛ.2 Korintobii 4:7.

7 Nuu ni yɔɔ abɛbua lɛ mli lɛ hã enyɔji lɛ shika babaoo, ni Yesu hu tuu kaselɔfeemɔ nitsumɔ lɛ ewo esɛɛnyiɛlɔi ni afɔ amɛ mu lɛ adɛŋ. (Mateo 25:14) No hewɔ lɛ, wɔbaanyɛ wɔmu sane naa akɛ talɛntai lɛ damɔ shi kɛhã sɔ̃ ni kã Yesu sɛɛnyiɛlɔi lɛ anɔ akɛ amɛshiɛ ni amɛfee mɛi kaselɔi lɛ.

8. Eyɛ mli akɛ esoro shika abɔ ni nyɔji lɛ anuŋtsɔ lɛ hã amɛteŋ mɔ fɛɛ mɔ moŋ, shi mɛni ekpa gbɛ akɛ amɛbaafee?

8 Yesu kɛɛ akɛ nyɔji lɛ anuŋtsɔ lɛ hã nyɔji lɛ ateŋ mɔ kome talɛntai enumɔ, ehã mɔ kroko hu talɛntai enyɔ, ni ehã mɔ ni ji etɛ lɛ talɛnta kome. (Mateo 25:15) Eyɛ mli akɛ esoro shika abɔ ni nyɔji lɛ anuŋtsɔ lɛ hã amɛteŋ mɔ fɛɛ mɔ moŋ, shi ekpa gbɛ akɛ amɛ fɛɛ amɛbaabɔ mɔdɛŋ ni amɛná shika lɛ eko amɛgbe nɔ ni ehã amɛ lɛ yi amɛhã lɛ. Nakai nɔŋŋ Yesu hu kpaa gbɛ akɛ esɛɛnyiɛlɔi ni afɔ amɛ mu lɛ kɛ amɛnyɛmɔ fɛɛ baatsu shiɛmɔ nitsumɔ lɛ. (Mateo 22:37; Kolosebii 3:23) Yɛ afi 33 Pentekoste gbi lɛ  nɔ lɛ, Yesu sɛɛnyiɛlɔi lɛ bɔi mɛi ni jɛ jeŋmaji fɛɛ anɔ lɛ kaselɔi feemɔ. Ni kɛ́ wɔkane Bɔfoi awolo lɛ, wɔnaa faŋŋ akɛ amɛtsu nii waa diɛŋtsɛ. * (Kwɛmɔ shishigbɛ niŋmaa lɛ.)Bɔfoi 6:7; 12:24; 19:20.

BƆ NI NYƆJI LƐ KƐ TALƐNTAI LƐ TSUƆ NII YƐ NAAGBEE GBII LƐ AMLI

9. (a) Mɛni nyɔji anɔkwafoi enyɔ lɛ kɛ shika ni ahã amɛ lɛ fee, ni mɛni wɔkaseɔ yɛ mli? (b) Mɛni esa akɛ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ afee?

9 Klɛŋklɛŋ nyɔji enyɔ ni kɛ amɛnuŋtsɔ lɛ shika lɛ tsu nii jogbaŋŋ lɛ damɔ shi kɛhã nyɛmimɛi hii kɛ yei ni afɔ amɛ mu ni yɔɔ wala mli yɛ naagbee gbii lɛ amli lɛ. Nyɛmimɛi nɛɛ kɛ amɛnyɛmɔ fɛɛ etsu shiɛmɔ nitsumɔ lɛ, titri lɛ kɛjɛ afi 1919. Yɛ abɛbua lɛ mli lɛ, esoro shika abɔ ni ahã nyɔji enyɔ nɛɛ ateŋ mɔ fɛɛ mɔ. Shi enɛ etsɔɔɔ akɛ ayɛ Kristofoi anɔkwafoi ni afɔ amɛ mu kui srɔtoi enyɔ. Nyɔji enyɔ lɛ fɛɛ tsu nii waa ni amɛku shika ni ahã amɛ lɛ amɛbɔ he toi enyɔ. Shi ani mɛi ni afɔ amɛ mu lɛ pɛ akpaa gbɛ akɛ amɛbaatsu nii waa yɛ shiɛmɔ nitsumɔ lɛ mli? Dabi. Yesu abɛbua ni kɔɔ gwantɛŋi lɛ kɛ abotiai lɛ ahe lɛ tsɔɔ wɔ akɛ, esa akɛ mɛi ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ lɛ nɔ lɛ aye abua mɛi ni afɔ amɛ mu lɛ kɛ shiɛmɔ nitsumɔ lɛ, ni amɛye amɛ anɔkwa. Amɛnaa lɛ akɛ eji hegbɛ kpele akɛ amɛaaye amɛbua mɛi ni afɔ amɛ mu lɛ. Lɛɛlɛŋ, Yehowa webii lɛ fɛɛ miitsu nii waa akɛ “tooku kome” yɛ kaselɔfeemɔ nitsumɔ lɛ mli.Yohane 10:16.

10. Mɛni ji nɔ kome ni hãa wɔnaa faŋŋ akɛ wɔyɛ naagbee gbii lɛ amli?

10 Yesu miikpa gbɛ akɛ esɛɛnyiɛlɔi lɛ fɛɛ baatsu nii waa koni amɛye amɛbua mɛi babaoo ni amɛbatsɔmɔ kaselɔi. Nakai pɛpɛɛpɛ ekaselɔi ni hi shi yɛ klɛŋklɛŋ afii 100 lɛ mli lɛ fee. Akɛni abɛbua ni kɔɔ talɛntai lɛ ahe lɛ kɔɔ naagbee gbii  ni wɔyɔɔ mli nɛɛ ahe hewɔ lɛ, wɔbaanyɛ wɔbi akɛ, ‘Ani Yesu sɛɛnyiɛlɔi ni yɔɔ ŋmɛnɛ lɛ miitsu nitsumɔ ni ekɛwo amɛdɛŋ lɛ?’ Hɛɛ, amɛmiitsu. Ŋmɛnɛ lɛ, aashiɛ sane kpakpa lɛ fe bei fɛɛ ni eho, ni mɛi babaoo miitsɔmɔ kaselɔi. Hiɛdɔɔ ni Yesu sɛɛnyiɛlɔi lɛ fɛɛ kɛtsuɔ nii lɛ hewɔ lɛ, abaptisiɔ mɛi akpei ohai abɔ daa afi. Mɛi nɛɛ bafataa Yesu sɛɛnyiɛlɔi lɛ ahe kɛtsuɔ shiɛmɔ nitsumɔ lɛ. Nitsumɔ ni atsuɔ nɛɛ, kɛ yibii ni ewoɔ lɛ, hãa anaa faŋŋ akɛ shiɛmɔ nitsumɔ lɛ ji naagbee lɛ he okadi ni Yesu kɛhã lɛ fã ko ni he hiaa waa. Enɛ hewɔ lɛ, wɔbaanyɛ wɔwie kɛ nɔmimaa akɛ, Yesu yɛ enitsulɔi lɛ ahe miishɛɛ!

Yesu ehã etsuji lɛ jwetri ko ni jara wa waa, no ji sɔ̃ ni he hiaa waa ni kã amɛnɔ akɛ amɛshiɛ lɛ (Kwɛmɔ kuku 10)

MƐƐ BE NUŊTSƆ LƐ BAABA?

11. Mɛni hewɔ wɔkɛɔ akɛ Yesu baaba ni ekɛ enyɔji lɛ ababu akɔntaa yɛ amanehulu kpeteŋkpele lɛ mli lɛ?

11 Yesu wie yɛ abɛbua lɛ mli akɛ: “Be kplaŋŋ sɛɛ lɛ, nakai nyɔji lɛ anuŋtsɔ lɛ ba, ni ekɛ amɛ babu akɔntaa.” (Mateo 25:19) Yesu, ni ji Nuŋtsɔ lɛ, baafee enɛ yɛ amanehulu kpeteŋkpele lɛ naagbee gbɛ. Mɛni hewɔ wɔkɛɔ nakai? Yɛ Yesu gbalɛ ni aŋma yɛ Mateo yitso 24 kɛ 25 lɛ mli lɛ, ewie ebaa lɛ he shii abɔ. Be ni Yesu wieɔ wɔsɛɛ be kojomɔ ni ebaatsu he nii yɛ amanehulu kpeteŋkpele lɛ mli lɛ he lɛ, ewie akɛ mɛi baana “gbɔmɔ Bi lɛ akɛ eeba yɛ ŋwɛi atatui lɛ anɔ.” Agbɛnɛ hu, ebɔ esɛɛnyiɛlɔi ni baahi shi yɛ naagbee gbii lɛ amli lɛ kɔkɔ ni amɛya nɔ amɛbu. Ekɛɛ amɛ akɛ: “Nyɛleee gbi nɔ ni nyɛ-Nuŋtsɔ lɛ baaba,” ni ewie hu akɛ, “Nɔ ŋmɛlɛtswaa ni nyɛsusuuu akɛ no ni lɛ, gbɔmɔ Bi lɛ baaba.” (Mateo 24:30, 42, 44) No hewɔ lɛ, yɛ abɛbua ni kɔɔ talɛntai lɛ ahe lɛ mli lɛ, be ni Yesu baaba ni ebakojo mɛi, ni ekpata Satan je lɛ hiɛ lɛ nɔŋŋ he ewieɔ lɛ. *—Kwɛmɔ shishigbɛ niŋmaa lɛ.

12, 13. (a) Mɛni nuŋtsɔ lɛ kɛɛ nyɔji enyɔ lɛ? Ni mɛni hewɔ? (b) Mɛɛ be abaasɔo mɛi ni afɔ amɛ mu lɛ anaa nɔ ni ji naagbee nɔ? (Kwɛmɔ akrabatsa ni ji “ Amɛnine Shɛɔ Juromɔnɔ lɛ nɔ kɛ́ Amɛgboi.”) (d) Mɛɛ juromɔnɔ mɛi ni fata mɛi ni afɔ amɛ mu lɛ ahe kɛshiɛ lɛ baaná?

12 Be ni nyɔji lɛ anuŋtsɔ lɛ ba lɛ, ena akɛ nyɔŋ ni ehã lɛ talɛntai enumɔ lɛ ená enumɔ efata he, ni mɔ ni ehã lɛ talɛntai enyɔ lɛ hu ená enyɔ efata he. Nuŋtsɔ lɛ kɛɛ amɛteŋ mɔ fɛɛ mɔ akɛ: “Aekoo, nyɔŋ kpakpa kɛ anɔkwafo! Oye anɔkwa yɛ nii fioo he. Maŋɔ bo mato nibii  babaoo nɔ.” (Mateo 25:21, 23) Kɛ́ Yesu, ni ji Nuŋtsɔ lɛ, ba wɔsɛɛ lɛ, mɛni ebaafee?

13 Kɛ́ eshwɛ fioo ni amanehulu kpeteŋkpele lɛ baaba lɛ, Nyɔŋmɔ baasɔo mɛi ni afɔ amɛ mu ni tsuɔ nii waa ni yɔɔ shikpɔŋ lɛ nɔ lolo yɛ nakai beiaŋ lɛ anaa nɔ ni ji naagbee nɔ. Ni tsɔɔ akɛ ebaakpɛlɛ amɛnɔ kwraa. (Kpojiemɔ 7:1-3) No sɛɛ lɛ, Yesu baaŋɔ amɛ kɛya ŋwɛi dani Harmagedon ta lɛ aje shishi; no baafee amɛjuromɔnɔ. Ni mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ, ní fata mɛi ni afɔ amɛ mu lɛ ahe kɛtsu shiɛmɔ nitsumɔ lɛ hu? Kɛ́ Yesu bɔi mɛi kojomɔ lɛ, ebaabu mɛi nɛɛ akɛ gwantɛŋi. Ni yɛ Nyɔŋmɔ Maŋtsɛyeli lɛ mli lɛ, ebaahã amɛ wala yɛ shikpɔŋ lɛ nɔ akɛ juromɔnɔ.Mateo 25:34.

NYƆŊ FƆŊ KƐ ANIHAOLƆ LƐ

14, 15. Ani nɔ ni Yesu wie yɛ abɛbua lɛ mli lɛ tsɔɔ akɛ mɛi ni afɔ amɛ mu lɛ ateŋ mɛi babaoo batsɔmɔ mɛi fɔji kɛ anihaolɔi? Tsɔɔmɔ mli.

14 Yesu wie nyɔŋ ni ahã lɛ talɛnta kome lɛ hu he yɛ abɛbua lɛ mli. Nyɔŋ nɛɛ kɛ shika ni ahã lɛ lɛ tsuuu nii ní ebaaná eko efata he, ni asaŋ ekɛyahãaa shikatolɔi hu, koni ená he kpa. Moŋ lɛ, eyafũ shika lɛ. Nuŋtsɔ lɛ kɛɛ nakai nyɔŋ lɛ akɛ eji nyɔŋ fɔŋ kɛ anihaolɔ. Enuŋtsɔ lɛ he talɛnta lɛ yɛ edɛŋ ni ekɛhã klɛŋklɛŋ nyɔŋ lɛ. No sɛɛ lɛ, ehã ashɛ nyɔŋ fɔŋ lɛ afɔ̃ “agbonaa duŋ lɛ mli,” ni jɛmɛ eyafo yɔɔ yɛ.Mateo 25:24-30; Luka 19:22, 23.

15 Ani wiemɔ ni Yesu wie akɛ nyɔji etɛ lɛ ateŋ mɔ kome ji mɔ fɔŋ kɛ anihaolɔ lɛ, tsɔɔ akɛ mɛi ni afɔ amɛ mu lɛ amlijaa etɛ mli ekome baafee amɛnii tamɔ nakai nyɔŋ lɛ? Dabi, etsɔɔɔ nakai. Abɛbuai enyɔ krokomɛi ni Yesu gba lɛ  yeɔ buaa wɔ ni wɔleɔ enɛ. Yɛ abɛbua ni kɔɔ nyɔŋ anɔkwafo kɛ hiɛshikalɔ lɛ he lɛ mli lɛ, Yesu wie nyɔŋ fɔŋ ko ni wa nyɔji krokomɛi ayi lɛ he. Nɔ ni Yesu wie nɛɛ etsɔɔɔ akɛ mɛi ni feɔ nyɔŋ anɔkwafo kɛ hiɛshikalɔ lɛ ateŋ mɔ ko baafee mɔ fɔŋ. Moŋ lɛ, ewie nakai kɛbɔ mɛi ni afɔ amɛ mu ni baasɔmɔ akɛ nyɔŋ lɛ kɔkɔ akɛ amɛkafee amɛnii tamɔ nakai nyɔŋ fɔŋ lɛ. Agbɛnɛ hu, yɛ abɛbua ni kɔɔ oblayei froi nyɔŋma lɛ ahe lɛ mli lɛ, Yesu tsĩ oblayei froi kwashiai enumɔ atã. Enɛ etsɔɔɔ akɛ mɛi ni afɔ amɛ mu lɛ amlijaa enyɔ mli ekome baafee kwashiai. Moŋ lɛ, Yesu miibɔ amɛ kɔkɔ yɛ nɔ ni baaba amɛnɔ kɛji amɛsaaa amɛhe amɛtooo ní amɛbaahã amɛhiɛ ahi amɛhe nɔ lɛ he. * (Kwɛmɔ shishigbɛ niŋmaa lɛ.) Nakai nɔŋŋ eji yɛ abɛbua ni kɔɔ talɛntai lɛ ahe lɛ mli. Nɔ ni Yesu wie lɛ etsɔɔɔ akɛ mɛi ni afɔ amɛ mu ni baahi wala mli yɛ naagbee gbii lɛ amli lɛ ateŋ mɛi babaoo baatsɔmɔ mɛi fɔji kɛ anihaolɔi. Moŋ lɛ, ekɛ nakai wiemɔ lɛ miibɔ mɛi ni afɔ amɛ mu lɛ kɔkɔ akɛ, amɛkafee amɛnii tamɔ nakai nyɔŋ fɔŋ lɛ, shi moŋ amɛya nɔ amɛshiɛ kɛ amɛnyɛmɔ fɛɛ.Mateo 25:16.

Yesu baajuro ekaselɔi fɛɛ ni kɛ amɛnyɛmɔ fɛɛ tsuɔ shiɛmɔ nitsumɔ lɛ

16. (a) Mɛɛ nibii enyɔ wɔkaseɔ yɛ abɛbua ni kɔɔ talɛntai lɛ ahe lɛ mli? (b) Mɛɛ gbɛ nɔ nikasemɔ nɛɛ eye ebua wɔ ni wɔnu abɛbua ni kɔɔ talɛntai lɛ ahe lɛ shishi? (Kwɛmɔ akrabatsa ni ji “ Te Esa akɛ Wɔnu Abɛbua ni Kɔɔ Talentai lɛ Ahe lɛ Shishi Tɛŋŋ?”)

16 Mɛɛ nibii enyɔ wɔkaseɔ yɛ abɛbua ni kɔɔ talɛntai lɛ ahe lɛ mli? Klɛŋklɛŋ nɔ lɛ ji akɛ, Yesu hã ekaselɔi ni afɔ amɛ mu lɛ jwetri ko ni jara wa waa, no ji sɔ̃ ni he hiaa waa ni kã amɛnɔ akɛ amɛshiɛ ni amɛfee mɛi kaselɔi lɛ. Nɔ ni ji enyɔ lɛ ji akɛ, Yesu miikpa gbɛ akɛ wɔ fɛɛ wɔbaatsu nii waa yɛ shiɛmɔ nitsumɔ lɛ mli. Kɛ́ wɔfi shi yɛ nitsumɔ nɛɛ mli, ni wɔtee nɔ wɔbo Yesu toi ni wɔye lɛ anɔkwa lɛ, bɔ fɛɛ bɔ ni fee lɛ ebaajuro wɔ.Mateo 25:21, 23, 34.

^ kk. 3 July 15, 2013, Buu-Mɔɔ lɛ, baafa 21-22, kuku 8-10 lɛ, gbalaa mɔ ni nyɔŋ anɔkwafo kɛ hiɛshikalɔ lɛ ji lɛ mli.

^ kk. 3 Yɛ nikasemɔ ni tsɔ hiɛ lɛ mli lɛ, ahã wɔle mɛi ni oblayei froi lɛ feɔ amɛhe mfoniri.

^ kk. 3 Atsɔɔ abɛbua ni kɔɔ gwantɛŋi lɛ kɛ abotiai lɛ ahe lɛ mli yɛ October 15, 1995, Buu-Mɔɔ lɛ, baafa 23-28 lɛ mli, ni nikasemɔ ni nyiɛ sɛɛ lɛ hu wieɔ abɛbua nɛɛ he.

^ kk. 5 Yɛ Yesu beiaŋ lɛ, dani mɔ ko baaná talɛnta kome lɛ, ja etsu nii afii 20 sɔŋŋ.

^ kk. 8 Yɛ bɔfoi lɛ agbele sɛɛ nɔŋŋ lɛ, Kristofoi pii kwa anɔkwa jamɔ lɛ. Enɛ hewɔ lɛ, afii ohai abɔ ho ni atsuuu shiɛmɔ nitsumɔ lɛ jogbaŋŋ. Shi yɛ “nikpamɔ be lɛ,” ni ji naagbee gbii lɛ amli lɛ, akɛ ekãa bɔi shiɛmɔ ekoŋŋ. (Mateo 13:24-30, 36-43) Kwɛmɔ July 15, 2013, Buu-Mɔɔ lɛ, baafa 9-12 lɛ.

^ kk. 15 Kwɛmɔ nikasemɔ ni yitso ji “Ani ‘Obaaya nɔ Obu’?” lɛ kuku 13 lɛ.