GUY HOLLIS PIERCE, ni eji Yehowa Odasefoi a-Gbɛtsɔɔmɔ Kuu lɛ mli nyo lɛ gbe eshikpɔŋ lɛ nɔ sɔɔmɔ lɛ naa Jufɔ, March 18, 2014 be ni eye afii 79. Akɛ Kristo nyɛmimɛi lɛ ateŋ mɔ kome lɛ, atee lɛ shi kɛtee ŋwɛi ni enine shɛ enyɔmɔwoo lɛ nɔ.—Hebribii 2:10-12; 1 Petro 3:18.

Afɔ Guy Pierce November 6, 1934, yɛ Auburn, ni yɔɔ California, yɛ U.S.A. lɛ, ni abaptisi lɛ yɛ afi 1955 mli. Ekɛ eŋa ni esumɔɔ waa, ni atsɛɔ lɛ Penny lɛ, bote gbalashihilɛ mli yɛ afi 1977, ni amɛfɔ bii. Etsɔ tamɔ tsɛ kɛhã mɛi krokomɛi babaoo hu. Yɛ afi 1982 lɛ, ekɛ Penny fɛɛ bɔi gbɛgbamɔ nitsumɔ lɛ. Ebɔi sɔɔmɔ akɛ kpokpaa nɔkwɛlɔ yɛ United States yɛ afi 1986, ni ekɛ afii 11 sɔmɔ.

Yɛ afi 1997 lɛ, Guy Pierce kɛ eŋa Penny bɔi sɔɔmɔ akɛ United States Betel weku lɛ mli bii. Nyɛminuu Pierce tsu nii yɛ Service Department lɛ, ni yɛ afi 1998 lɛ, ahala lɛ akɛ yelikɛbualɔ kɛhã Gbɛtsɔɔmɔ Kuu lɛ Ajinafoi Akuu ni Kwɛɔ Betel Nitsulɔi Anɔ lɛ. Yɛ afi kpee ni afee yɛ October 2, 1999 lɛ, atswa adafi akɛ ahala lɛ akɛ Gbɛtsɔɔmɔ Kuu lɛ mli nyo. Yɛ bei ni nyiɛ sɛɛ lɛ amli lɛ, esɔmɔ yɛ ajinafoi akui srɔtoi amli yɛ bei srɔtoi amli. Esɔmɔ akɛ Ajinafoi Akuu ni Kwɛɔ Betel Nitsulɔi Anɔ, Niŋmaa Ajinafoi Akuu, Wolokalamɔ Ajinafoi Akuu, kɛ Nɔkwɛlɔi Ajinafoi Akuu lɛ mli nyo.

Nyɛminuu Pierce hiɛ yɛ ŋmɔlɔŋmɔlɔ be fɛɛ be, ni ewoɔ mɛi anaa ŋmɔlɔ hu. Mɛi ni jɛ hei kɛ shihilɛi srɔtoi amli lɛ náa miishɛɛ kɛ́ amɛyɛ emasɛi. Shi nɔ ni hã mɛi nyɛ amɛbɛŋkɛ lɛ waa ji suɔmɔ ni eyɔɔ kɛhã mɛi, bɔ ni ebaa ehe shi, bulɛ ni eyɔɔ kɛhã Nyɔŋmɔ mlai kɛ eshishitoo mlai lɛ, kɛ hemɔkɛyeli ni mli wa ni eyɔɔ yɛ Yehowa mli lɛ. Guy Pierce fɔɔ wiemɔ akɛ, kɛ́ hulu yanyɔ shi ni eteee shi po lɛ, Yehowa shiwoi lɛ baaba mli, ni ená he miishɛɛ waa akɛ ehã jeŋ fɛɛ ale enɛ.

Nyɛminuu Pierce tsu nii waa ehã Yehowa. Daa gbi lɛ, ejeɔ nitsumɔ shishi leebi maŋkpa, ni bei pii lɛ, etsuɔ nii aahu kɛyashiɔ gbɛkɛ tuu. Efã gbɛ kɛkpa je lɛŋ hei srɔtoi koni ewo enyɛmimɛi Kristofoi lɛ hewalɛ, ni ená dekã ehã mɛi fɛɛ ni miitao yelikɛbuamɔ loo ŋaawoo. Afii pii asɛɛ po lɛ, enanemɛi héyelilɔi lɛ kaiɔ bɔ ni efeɔ mɔ gbɔ, bɔ ni etseɔ ehiɛ ehãa mɛi, kɛ bɔ ni ejɛɔ Ŋmalɛ lɛ mli ewoɔ mɔ hewalɛ lɛ.

Guy Pierce ji wɔnyɛmi kɛ wɔnaanyo kpakpa, ni wɔle akɛ eŋa, ebii ekpaa lɛ, enabii, enanakansowai, kɛ emumɔŋ bii babaoo lɛ ahiɛ baatse lɛ waa. Mark Sanderson, ni lɛ hu eji Gbɛtsɔɔmɔ Kuu lɛ mli nyo lɛ, ji mɔ ni hã wiemɔ lɛ yɛ Nyɛminuu Pierce yara lɛ, ní afee yɛ Brooklyn Betel yɛ Hɔɔ, March 22, 2014 lɛ shishi. Ewie hiɛnɔkamɔ ni Nyɛminuu Pierce yɔɔ akɛ ebaaya ŋwɛi lɛ he, ni ekane Yesu wiemɔi ni nyiɛ sɛɛ nɛɛ etsɔɔ toibolɔi lɛ: “Shihilɛhei pii yɛ mitsɛ we lɛ . . . Kɛji mitee ni miyasaa gbɛhe mito nyɛ lɛ, mibaba ekoŋŋ ni mibabaŋɔ nyɛ kɛya he ni mi diɛŋtsɛ miyɔɔ lɛ, koni he ni miyɔɔ lɛ nyɛ hu nyɛhi jɛi. Ni he ni miyaa lɛ, nyɛle, ni gbɛ lɛ hu, nyɛle.”—Yohane 14:2-4.

Wɔhiɛ baatse Nyɛminuu Pierce waa diɛŋtsɛ. Shi wɔyɛ miishɛɛ waa akɛ ‘ele gbɛ’ ni yaa he ni ebaahi kɛya naanɔ lɛ.