Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) NOVEMBER 2014

Nɔ Hewɔ ni Esa akɛ Wɔfee Krɔŋkrɔŋ

Nɔ Hewɔ ni Esa akɛ Wɔfee Krɔŋkrɔŋ

“Nyɛfea krɔŋkrɔŋ.”3 MOSE 11:45.

1. Mɛɛ gbɛ nɔ Mose Wolo ni Ji Etɛ lɛ baanyɛ aye abua wɔ?

YEHOWA miikpa gbɛ akɛ etsuji fɛɛ afee krɔŋkrɔŋ. Eyɛ mli akɛ Biblia tso muu lɛ fɛɛ wieɔ krɔŋkrɔŋfeemɔ he moŋ, shi Mose Wolo ni Ji Etɛ lɛ ji Biblia mli wolo ni wieɔ he fe fɛɛ. Kɛ́ wɔnu saji ni yɔɔ wolo nɛɛ mli lɛ ashishi ni wɔyɔse nɔ ni ebiɔ ni wɔfee lɛ, ebaaye ebua wɔ ni wɔfee krɔŋkrɔŋ.

2. Mɛɛ nibii komɛi yɔɔ Mose Wolo ni Ji Etɛ lɛ mli?

2 Mose ji mɔ ni ŋma Mose Wolo ni Ji Etɛ lɛ, ni efata “ŋmalɛ fɛɛ ŋmalɛ” ni hi “hã nitsɔɔmɔ” lɛ he. (2 Timoteo 3:16) Yɛ wolo nɛɛ yitso fɛɛ yitso mli lɛ, atsĩ gbɛ́i Yehowa lɛ tã aaafee shii nyɔŋma sɔŋŋ. Kɛ́ wɔnu Mose Wolo ni Ji Etɛ mli saji lɛ ashishi lɛ, ebaawaje wɔ ni wɔkafee nɔ ko nɔ ko ni baagbe Nyɔŋmɔ gbɛ́i lɛ he guɔ. (3 Mose 22:32) Wiemɔ ko ni akɛtsu nii shii abɔ yɛ wolo nɛɛ mli ji “miji Yehowa,” ni wiemɔ nɛɛ tsɔɔ wɔ akɛ esa akɛ wɔbo Nyɔŋmɔ toi. Yɛ nikasemɔ nɛɛ kɛ nɔ ni nyiɛ sɛɛ lɛ mli lɛ, wɔbaana nibii kpakpai komɛi yɛ Mose Wolo ni Ji Etɛ lɛ mli ní baaye abua wɔ koni wɔfee krɔŋkrɔŋ yɛ jamɔ ni wɔkɛhãa Nyɔŋmɔ lɛ mli.

 ESA AKƐ WƆFEE KRƆŊKRƆŊ

3, 4. Mɛni Aaron kɛ ebihii lɛ ahe ni aju kɛ nu lɛ damɔ shi kɛhã? (Kwɛmɔ mfoniri ni yɔɔ nikasemɔ lɛ shishijee lɛ.)

3 Nyɛkanea 3 Mose 8:5, 6. Yehowa hala Aaron akɛ esɔmɔ akɛ Israel osɔfonukpa, ni ehala ebihii lɛ akɛ amɛsɔmɔ akɛ osɔfoi kɛhã Israel. Aaron damɔ shi kɛhã Yesu, ni Aaron bihii lɛ hu damɔ shi kɛhã Kristofoi ni afɔ amɛ mu lɛ. Mɛni Aaron he ni aju kɛ nu lɛ hu damɔ shi kɛhã? Ani no tsɔɔ akɛ esa akɛ atsuu Yesu hu he? Dabi. Ejaakɛ Yesu efeee esha ni “kpa ko bɛ” ehe. (Hebribii 7:26; 9:14) Kɛ̃lɛ, be ni aju Aaron he kɛ nu atã lɛ, ebadamɔ shi kɛhã Yesu, mɔ ni he tse ni eja lɛ. Belɛ, mɛni Aaron bihii lɛ ni akɛ nu ju amɛhe lɛ damɔ shi kɛhã?

4 Aaron bihii lɛ ni akɛ nu ju amɛhe lɛ damɔ shi kɛhã mɛi ni ahala ni baasɔmɔ akɛ osɔfoi yɛ ŋwɛi lɛ ahetsuumɔ. Ani amɛhetsuumɔ nɛɛ kɛ amɛbaptisimɔ lɛ yɛ tsakpaa ko? Dabi, ejaakɛ baptisimɔ ejieee eshai kɛyaaa. Moŋ lɛ, baptisimɔ tsɔɔ akɛ mɔ ko ejɔɔ ehe nɔ ehã Nyɔŋmɔ. Akɛni ‘atsuu mɛi ni afɔ amɛ mu lɛ ahe yɛ wiemɔ lɛ mli’ hewɔ lɛ, esa akɛ amɛhi shi yɛ Kristo tsɔɔmɔi lɛ anaa be fɛɛ be. (Efesobii 5:25-27) Enɛ baahã amɛfee krɔŋkrɔŋ ni amɛhe atse. Shi “tooi krokomɛi lɛ” hu?Yohane 10:16.

Kɛ́ Yehowa na akɛ ewebii lɛ fɛɛ he tse ni amɛfee ekome lɛ, emii shɛɔ ehe waa

5. Mɛni hewɔ abaanyɛ akɛɛ akɛ Nyɔŋmɔ Wiemɔ lɛ nɔ atsɔɔ atsuɔ tooi krokomɛi lɛ ahe lɛ?

5 Aaron bihii lɛ damɔɔɔ shi kɛhãaa “asafo babaoo” ní amɛ hu amɛfata Yesu tooi krokomɛi lɛ ahe lɛ. (Kpojiemɔ 7:9) Kɛ̃lɛ, Nyɔŋmɔ Wiemɔ lɛ nɔ atsɔɔ atsuɔ tooi krokomɛi lɛ hu ahe ni afeɔ amɛ krɔŋkrɔŋ. Kɛ́ mɛi ni hiɛ kã nɔ akɛ amɛbaahi shikpɔŋ lɛ nɔ lɛ he nɔ ni Biblia lɛ kɛɔ akɛ Yesu afɔle lɛ baanyɛ atsu lɛ amɛye lɛ, no tsirɛɔ amɛ ni amɛjáa Yehowa “nyɔɔŋ kɛ shwane.” (Kpojiemɔ 7:13-15) Mɛi ni  afɔ amɛ mu lɛ kɛ tooi krokomɛi lɛ ahetsuumɔ lɛ yaa nɔ be fɛɛ be. Enɛ hewɔ lɛ, daa nɛɛ amɛjeŋba he tse. (1 Petro 2:12) Kɛ́ Yehowa na akɛ ewebii lɛ fɛɛ he tse ni amɛfee ekome kɛmiibo amɛ-Kwɛlɔ Yesu toi, ni amɛmiinyiɛ esɛɛ be fɛɛ be lɛ, emii shɛɔ ehe waa!

6. Mɛni hewɔ esa akɛ wɔpɛi wɔmli wɔkwɛ yɛ be kɛ beaŋ lɛ?

6 Mɛni Israel osɔfoi lɛ ni abi ni amɛhe atse yɛ gbɔmɔtsoŋ lɛ tsɔɔ wɔ ŋmɛnɛ? Mɛi ni wɔkɛkaseɔ Biblia lɛ ateŋ mɛi babaoo yɔseɔ akɛ wɔhe tse, wɔsaa wɔhe jogbaŋŋ, ni wɔjamɔhei lɛ hu tse. Kɛfata he lɛ, esa akɛ mɛi ni miisumɔ ni amɛjá Yehowa lɛ ‘atsui mli atse.’ (Nyɛkanea Lala 24:3, 4; Yesaia 2:2, 3.) No hewɔ lɛ, esa akɛ wɔkɛ jwɛŋmɔ ni mli tse, tsui ni mli tse, kɛ gbɔmɔtso ni he tse asɔmɔ Yehowa. Esa akɛ wɔpɛi wɔmli wɔkwɛ yɛ be kɛ beaŋ. Bei komɛi lɛ, ekolɛ wɔbaana akɛ ehe miihia ni wɔfee tsakemɔi wuji koni wɔfee krɔŋkrɔŋ. (2 Korintobii 13:5) Akɛ nɔkwɛmɔnɔ lɛ, esa akɛ mɔ ko ni abaptisi lɛ ni kwɛɔ ponografi lɛ abi ehe akɛ, ‘Ani miifee krɔŋkrɔŋ?’ Esa akɛ ehã aye abua lɛ koni ekpa nii gbonyo nɛɛ kwɛmɔ.Yakobo 5:14.

TOIBOO HÃA WƆFEƆ KRƆŊKRƆŊ

7. Mɛni nɔ ni afee osɔfoi lɛ yɛ 3 Mose 8:22-24 lɛ tsɔɔ? Mɛɛ nɔkwɛmɔnɔ Yesu fee yɛ enɛ gbɛfaŋ?

7 Be ni ato osɔfoyeli lɛ shishi yɛ Israel lɛ, akɛ too gwantɛŋ nuu lá sa Osɔfonukpa Aaron kɛ ebihii lɛ anine jurɔ toi, amɛnine jurɔ gɔnti, kɛ amɛnane jurɔ gɔnti naa. (Nyɛkanea 3 Mose 8:22-24.) Bɔ ni akɛ lá lɛ tsu nii ahã lɛ tsɔɔ akɛ, osɔfoi lɛ baabo nɔ fɛɛ nɔ ni abaakɛɛ amɛ lɛ toi ni amɛbaatsu he nii pɛpɛɛpɛ. Nakai nɔŋŋ Yesu, ni ji Osɔfonukpa lɛ fee nɔkwɛmɔnɔ kpakpa ehã mɛi ni afɔ amɛ mu lɛ kɛ tooi krokomɛi lɛ fɛɛ. Ebo Nyɔŋmɔ gbɛtsɔɔmɔ toi, efee Yehowa suɔmɔnaa nii, ni eba ejeŋ yɛ gbɛ krɔŋkrɔŋ nɔ.Yohane 4:31-34.

8. Mɛni esa akɛ wɔ fɛɛ wɔfee?

8 Akɛ Yehowa jálɔi lɛ, esa akɛ wɔ fɛɛ wɔkase Yesu, mɔ ni ye Nyɔŋmɔ anɔkwa lɛ. Esa akɛ wɔbo Nyɔŋmɔ gbɛtsɔɔmɔi ni yɔɔ Biblia lɛ mli lɛ toi jogbaŋŋ, koni wɔkafee “Nyɔŋmɔ Mumɔ krɔŋkrɔŋ lɛ nidɔɔ nii.” (Efesobii 4:30) Tswaa ofai shi akɛ, ‘obaaya nɔ ojaje onajiashi gbɛi lɛ ní onyiɛ trɔmɔɔ.’Hebribii 12:13.

Esa akɛ wɔbo Nyɔŋmɔ gbɛtsɔɔmɔi ni yɔɔ Biblia lɛ mli lɛ toi jogbaŋŋ, koni wɔkafee “Nyɔŋmɔ Mumɔ krɔŋkrɔŋ lɛ nidɔɔ nii”

9. Mɛni nyɛmimɛi hii etɛ komɛi ni kɛ Gbɛtsɔɔmɔ Kuu lɛ mli bii etsu nii afii babaoo lɛ wie? Mɛɛ gbɛ nɔ nɔ ni amɛwie lɛ baanyɛ aye abua bo ni ofee krɔŋkrɔŋ?

9 Nyɛhãa wɔsusua nɔ ni nyɛmimɛi hii etɛ komɛi ni kɛ Gbɛtsɔɔmɔ Kuu lɛ mli bii etsu nii afii babaoo lɛ wie lɛ he wɔkwɛa. Amɛteŋ mɔ kome wie akɛ: “Eyɛ mli akɛ sɔɔmɔ hegbɛ nɛɛ nɔ bɛ moŋ, shi bɔ ni mikɛ nyɛmimɛi hii nɛɛ bɔɔ gbagbalii lɛ hãa yɛ be kɛ beaŋ lɛ minaa akɛ, eyɛ mli akɛ afɔ amɛ mu moŋ, shi amɛyeee emuu. Shi kɛjɛ blema beebe lɛ, otii ni ma mihiɛ lɛ ateŋ ekome ji, ní mabo mɛi ni nyiɛɔ hiɛ lɛ toi.” Nyɛmi nuu ni ji  enyɔ lɛ wie akɛ: “Ŋmalɛi tamɔ 2 Korintobii 10:5 lɛ, ní wieɔ ‘toi ni aaafee ahã Kristo’ lɛ he lɛ eye ebua mi ni mibo mɛi ni nyiɛɔ hiɛ lɛ toi, ni mikɛ amɛ efee ekome kɛtsu nii. Mijɛɔ mitsuiŋ miboɔ amɛ toi.” Nyɛmi nuu ni ji etɛ lɛ wie akɛ: “Kɛ́ misumɔɔ nɔ ni Yehowa sumɔɔ ni minyɛɔ nɔ ni enyɛɔ, ni agbɛnɛ hu, miyaa nɔ mibiɔ edɛŋ gbɛtsɔɔmɔ ni mifeɔ nɔ ni sa ehiɛ lɛ, no lɛ esa akɛ mabo egbɛjianɔtoo lɛ kɛ mɛi ni ekɛtsuɔ nii koni eyiŋtoo kɛhã shikpɔŋ lɛ aba mli lɛ toi.” Nyɛmi nuu nɛɛ kaiɔ Nathan Knorr nɔkwɛmɔnɔ lɛ. Nyɛminuu Knorr, ní sɛɛ mli lɛ ebatsɔ Gbɛtsɔɔmɔ Kuu lɛ mli nyo lɛ kpɛlɛ afi 1925 Buu-Mɔɔ lɛ mli sane ni yitso ji “Birth of the Nation” (Maŋ lɛ Fɔmɔ) lɛ nɔ, eyɛ mli akɛ mɛi komɛi ekpɛlɛɛɛ nɔ. Bɔ ni Nyɛminuu Knorr fee toi lɛ ta nyɛmi nuu nɛɛ tsuiŋ waa. Kɛ́ ojwɛŋ nibii ni nyɛmimɛi hii etɛ nɛɛ ewie lɛ nɔ lɛ, ebaaye ebua bo ni obo Nyɔŋmɔ toi, ní oya nɔ ofee krɔŋkrɔŋ.

BO NYƆŊMƆ MLA NI KƆƆ LÁ HE LƐ TOI KONI OFEE KRƆŊKRƆŊ

10. Mɛni hewɔ ehe hiaa ni wɔbo Nyɔŋmɔ mla ni kɔɔ lá he lɛ toi lɛ?

10 Nyɛkanea 3 Mose 17:10. Yehowa kɛɛ Israelbii lɛ akɛ, amɛhi “lá fɛɛ lá.” Afã Kristofoi fɛɛ hu ni amɛhi adesai kɛ kooloi alá. (Bɔfoi lɛ Asaji 15:28, 29) Wɔsumɔɔɔ akɛ wɔbaafee nɔ ko ni baahã Nyɔŋmɔ akpoo wɔ, ní eshwie wɔ kɛjɛ esafo lɛ mli. Wɔsumɔɔ Yehowa, ni wɔmiisumɔ ni wɔbo lɛ toi. Kɛ́ wɔwala yaje oshara mli po lɛ, wɔboŋ mɛi ni leee Yehowa, ní amɛbuuu lɛ, ní biɔ ni wɔgbo enɔ toi lɛ toi. Wɔle akɛ mɛi komɛi baaye wɔhe fɛo yɛ wɔhe ni wɔtsiɔ kɛjɛɔ lá he lɛ hewɔ, shi wɔsumɔɔ ni wɔbo Nyɔŋmɔ toi. (Yuda 17, 18) Mɛni baaye abua wɔ ní wɔtswa wɔfai shi akɛ wɔyeŋ lá, ni wɔhaŋ agbala lá awo wɔmli hu?5 Mose 12:23.

Wɔsumɔɔ Yehowa, ni wɔmiisumɔ ni wɔbo lɛ toi

11. Mɛni hewɔ wɔbaanyɛ wɔkɛɛ akɛ, nibii ni afeɔ yɛ Kpatamɔ Gbi lɛ nɔ lɛ jeee jamɔŋ nifeemɔi komɛi kɛkɛ lɛ?

11 Nɔ ni Israel osɔfonukpa lɛ feɔ shi kome daa afi yɛ Kpatamɔ Gbi lɛ nɔ lɛ yeɔ ebuaa wɔ ni wɔnaa bɔ ni Nyɔŋmɔ naa lá ehãa. Akɛ lá tsu nii kɛhã yiŋtoo krɛdɛɛ ko. Akɛtsu nii koni akɛ Israelbii lɛ ahe eshai afa amɛ, ní no ahã wekukpaa kpakpa abakã amɛ kɛ Nyɔŋmɔ teŋ. Atsɔɔ tsina nuu lá kɛ too kpakpo lá lɛ ashwãa kpatamɔ sɛi lɛ hiɛgbɛ. (3 Mose 16:14, 15, 19) Nyɔŋmɔ tsɔɔ nakai lá lɛ nɔ ekɛ Israelbii lɛ ahe eshai faa amɛ. Yehowa kɛɛ amɛ hu akɛ, kɛ́ mɔ ko gbe kooloo ko ní ebaaye lɛ, esa akɛ efɔse elá lɛ eshwie shikpɔŋ, ni ekɛ sũ atsĩ nɔ, ejaakɛ “heloo fɛɛ heloo wala lɛ, elá lɛ nɔŋŋ mli ewala lɛ yɔɔ.” (3 Mose 17:11-14) Ani enɛɛmɛi ji jamɔŋ nifeemɔi komɛi kɛkɛ? Dabi. Afii ohai abɔ ni tsɔ hiɛ lɛ, Nyɔŋmɔ fã Noa kɛ eseshibii lɛ akɛ amɛkaye lá. (1 Mose 9:3-6) Mɛni Kristofoi baanyɛ akase yɛ enɛ mli?

12. Mɛɛ gbɛ nɔ Paulo tsɔɔ tsakpaa ni yɔɔ lá kɛ eshaifaa teŋ?

12 Bɔfo Paulo tsɔɔ mli akɛ, anyɛɔ akɛ lá tsuɔ nii ahe. Ewie akɛ: “Shwɛ fioo ni lá aŋɔtsuɔ nii fɛɛ he yɛ mla lɛ  naa; ni kɛ́ ashwieee lá shi lɛ, aŋɔfaaa.” (Hebribii 9:22) Shi, sɛɛnamɔ ni yɔɔ afɔlei ni akɛ kooloi shãa lɛ he lɛ sɛɛ etsɛɛɛ. Paulo wie akɛ, afɔlei nɛɛ hãa Israelbii lɛ kaiɔ akɛ amɛji eshafeelɔi, ni afɔle ni hi fe no, ní baanyɛ ajie amɛhe eshai lɛ kɛya kwraa lɛ he miihia amɛ. Mla lɛ ji “nii kpakpai ni baaba lɛ asusuma kɛkɛ . . . ni jeee nibii lɛ asubaŋ diɛŋtsɛ ni.” (Hebribii 10:1-4) No hewɔ lɛ, te aaafee tɛŋŋ akɛ eshai afa lɛ?

13. Mɛni Nyɔŋmɔ hiɛ ni Yesu yapue yɛ koni adesai aná elá ni ekɛsha afɔle lɛ he sɛɛ lɛ baanyɛ atsɔɔ kɛhã bo?

13 Nyɛkanea Efesobii 1:7. Yesu gbele lɛ ji afɔle kɛhã adesai fɛɛ, ni ejara wa waa kɛhã mɛi ni sumɔɔ lɛ kɛ e-Tsɛ lɛ. (Galatabii 2:20) Kɛ̃lɛ, nɔ ni Yesu fee be ni atee lɛ shi lɛ sɛɛ lɛ ji nɔ ni hãa wɔnáa eshaifaa, taakɛ akɛ nɔ ni afeɔ yɛ Kpatamɔ Gbi lɛ nɔ lɛ fee he mfoniri lɛ. Kɛ́ osɔfonukpa lɛ bote He Krɔŋkrɔŋ Fe Fɛɛ lɛ, etamɔ nɔ ni etee Nyɔŋmɔ hiɛ. Jɛmɛ osɔfo lɛ kɛ kooloo lɛ lá lɛ yahãa Nyɔŋmɔ yɛ. (3 Mose 16:11-15) Yɛ Yesu shitee lɛ sɛɛ lɛ, lɛ hu etee ŋwɛi ni eyapue yɛ Nyɔŋmɔ hiɛ koni adesai aná elá ni ekɛshã afɔle lɛ he sɛɛ. (Hebribii 9:6, 7, 11-14, 24-28) Eŋɔɔ wɔnaa waa akɛ, yɛ Yesu lá lɛ mli hemɔkɛyeli hewɔ lɛ, abaanyɛ akɛ  wɔhe eshai afa wɔ ní wɔná henilee kpakpa!

14, 15. Mɛni hewɔ ehe hiaa ni wɔnu Yehowa mla ni kɔɔ lá he lɛ shishi, ní wɔbo toi lɛ?

14 Amrɔ nɛɛ, ekolɛ ona nɔ hewɔ ni Yehowa fã akɛ ahi “lá fɛɛ lá lɛ.” (3 Mose 17:10) Ani onu nɔ hewɔ ni lá yɔɔ krɔŋkrɔŋ kɛhã Nyɔŋmɔ lɛ shishi? Lá damɔ shi kɛhã wala. (1 Mose 9:4) Ŋwanejee ko bɛ he akɛ, okpɛlɛɔ nɔ akɛ esa akɛ wɔna lá taakɛ Nyɔŋmɔ naa lɛ lɛ nɔŋŋ, ní wɔbo Nyɔŋmɔ famɔ akɛ wɔhi lá lɛ hu toi. Nɔ pɛ ni baahã toiŋjɔlɛ ahi wɔ kɛ Nyɔŋmɔ teŋ ji, ni wɔná hemɔkɛyeli yɛ Yesu kpɔmɔ afɔle lɛ mli, ni wɔyɔse hu akɛ lá ji nɔ ko ni jara wa waa kɛhã wɔ-Bɔlɔ lɛ.Kolosebii 1:19, 20.

Ani otswa ofai shi akɛ obaabo Yehowa mla ni kɔɔ lá he lɛ toi? (Kwɛmɔ kuku 14, 15)

15 Nɔ ko ni akpaaa gbɛ baanyɛ aba ní baabi ni wɔkpɛ wɔyiŋ yɛ lá ni aaahã wɔ, nibii ni anáa kɛjɛɔ nibii titrii ejwɛ ni feɔ lá lɛ mli lɛ eko ní aaahã wɔ, loo wɔlá ni akɛaatsu nii yɛ wɔtsamɔ mli lɛ he. No hewɔ lɛ, ehe miihia ni osɔle ohã Yehowa, otao nii amli, ni okpɛ oyiŋ yɛ nɔ ni obaafee he dani shihilɛ ko ni tamɔ nakai aba. Enɛ baahã wɔná ekãa kɛtsi wɔhe kɛjɛ lá he. Wɔsumɔŋ ni wɔfee nɔ ko ni baadɔ Yehowa kɛtsɔ nɔ ko ni enyɛɔ ní wɔɔfee lɛ nɔ! Ŋmɛnɛ lɛ, datrɛfoi pii kɛ mɛi krokomɛi woɔ wɔ hewalɛ ni wɔhã agbala wɔlá koni akɛbaa mɛi krokomɛi awala yi. Shi akɛ Nyɔŋmɔ webii ni yɔɔ krɔŋkrɔŋ lɛ, wɔle akɛ Yehowa yɛ hegbɛ akɛ etsɔɔ bɔ ni esa akɛ akɛ lá atsu nii ahã. Ebuɔ “lá fɛɛ lá” akɛ eyɛ krɔŋkrɔŋ. No hewɔ lɛ, esa akɛ wɔtswa wɔfai shi akɛ wɔbaabo emla ni kɔɔ lá he lɛ toi. Kɛ́ wɔhã wɔjeŋba fee krɔŋkrɔŋ lɛ, no hu hãa Nyɔŋmɔ naa akɛ wɔhiɛ sɔɔ Yesu lá ni afɔse ashwie shi lɛ. Elá lɛ pɛ nɔ abaanyɛ adamɔ akɛ eshai afa, ní wɔná naanɔ wala.Yohane 3:16.

Esa akɛ wɔtswa wɔfai shi akɛ wɔbaabo Nyɔŋmɔ mla ni kɔɔ lá he lɛ toi

NƆ HEWƆ NI YEHOWA KPAA GBƐ AKƐ WƆFEE KRƆŊKRƆŊ

16. Mɛni hewɔ esa akɛ Yehowa webii afee krɔŋkrɔŋ lɛ?

16 Be ni Yehowa jie Israelbii lɛ kɛjɛ nyɔŋyeli mli yɛ Mizraim lɛ, ekɛɛ amɛ akɛ: “Miji Yehowa, mɔ ni jie nyɛ kɛjɛ Mizraim shikpɔŋ lɛ nɔ, koni matsɔ Nyɔŋmɔ mahã nyɛ; no hewɔ lɛ nyɛfea krɔŋkrɔŋ, ejaakɛ mɔ krɔŋkrɔŋ ji mi.” (3 Mose 11:45) Akɛni Yehowa yɛ krɔŋkrɔŋ hewɔ lɛ, ekpa gbɛ akɛ Israelbii lɛ hu afee krɔŋkrɔŋ. Ni nakai nɔŋŋ ekpaa gbɛ yɛ wɔdɛŋ ŋmɛnɛ. Mose Wolo ni Ji Etɛ lɛ feɔ enɛ faŋŋ.

17. Amrɔ nɛɛ te onaa Mose Wolo ni Ji Etɛ lɛ ohãa tɛŋŋ?

17 Ŋwanejee ko bɛ he akɛ, oná otii fioo ni wɔsusu he yɛ Mose Wolo ni Ji Etɛ lɛ mli lɛ ahe sɛɛ waa. Eyɛ faŋŋ akɛ, onya Biblia mli wolo nɛɛ he fe tsutsu lɛ, ni onu yiŋtoi ahewɔ ni esa akɛ wɔfee krɔŋkrɔŋ lɛ hu shishi jogbaŋŋ fe tsutsu lɛ. Kɛ̃lɛ, mɛɛ nibii krokomɛi hu wɔbaanyɛ wɔkase yɛ Mose Wolo ni Ji Etɛ mli? Mɛɛ gbɛ nɔ Biblia mli wolo nɛɛ baanyɛ aye abua wɔ ni wɔjá Nyɔŋmɔ yɛ gbɛ ni he tse nɔ? Wɔbaasusu enɛɛmɛi ahe yɛ nikasemɔ ni nyiɛ sɛɛ lɛ mli.