Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) OCTOBER 2014

Omii Ashɛ Hegbɛ ni Oyɔɔ akɛ Okɛ Yehowa Miitsu Nii lɛ He!

Omii Ashɛ Hegbɛ ni Oyɔɔ akɛ Okɛ Yehowa Miitsu Nii lɛ He!

“Nyɔŋmɔ hefatalɔi nitsulɔi ji wɔ.”1 KORINTOBII 3:9.

1. Te Yehowa naa nitsumɔ ehãa tɛŋŋ? Mɛni no hãa efeɔ?

YEHOWA sumɔɔ nitsumɔ waa. (Lala 135:6; Yohane 5:17) Eesumɔ ni ŋwɛibɔfoi kɛ adesai hu amii ashɛ nɔ ni amɛtsuɔ lɛ he, no hewɔ lɛ ehãa amɛ nitsumɔ ni baahã amɛná miishɛɛ ni amɛtsui anyɔ amɛmli. Be ni Yehowa bɔɔ ade lɛ, ehã e-Kromɔbi lɛ fata ehe kɛtsu nii. (Nyɛkanea Kolosebii 1:15, 16.) Biblia lɛ kɛɔ akɛ, dani Yesu baaba shikpɔŋ lɛ nɔ lɛ, no mli lɛ ekɛ Nyɔŋmɔ yɛ ŋwɛi akɛ “ŋaalɔ.”Abɛi 8:30.

2. Mɛni tsɔɔ akɛ Nyɔŋmɔ kɛ nitsumɔ ni he hiaa ni hãa mɔ tsui nyɔɔ emli woɔ ŋwɛibɔfoi lɛ adɛŋ be fɛɛ be?

2 Kɛjɛ Mose klɛŋklɛŋ wolo lɛ kɛyashi Kpojiemɔ lɛ, Biblia lɛ tsɔɔ akɛ Yehowa hãa ŋwɛibɔfoi lɛ nitsumɔ be fɛɛ be. Be ni Adam kɛ Hawa fee esha ni ashwie amɛ kɛjɛ Paradeiso lɛ mli lɛ, Nyɔŋmɔ kɛ nitsumɔ ko wo ŋwɛibɔfoi lɛ adɛŋ. Mose klɛŋklɛŋ wolo lɛ tsɔɔ mli akɛ, Nyɔŋmɔ ŋɔ “kerubim kɛ lalilɛi klante ni tsɔmɔɔ ehe eto Eden trom lɛ hiɛ yɛ bokagbɛ, koni ebu wala tso lɛ naa gbɛ lɛ he.” (1 Mose 3:24) Ni Kpojiemɔ wolo lɛ hu tsɔɔ mli akɛ, Yehowa “tsu ebɔfo lɛ ni ebatsɔɔ etsuji nii ni sa akɛ aba oya.”Kpojiemɔ 22:6.

 NITSUMƆI NI AKƐWO ADESAI ADƐŊ

3. Be ni Yesu yɔɔ shikpɔŋ lɛ nɔ lɛ, mɛɛ gbɛ nɔ ekase e-Tsɛ lɛ?

3 Be ni Yesu yɔɔ shikpɔŋ lɛ nɔ lɛ, ekɛ miishɛɛ tsu nitsumɔ ni Yehowa kɛwo edɛŋ lɛ. Ni ekase e-Tsɛ lɛ kɛtsɔ nitsumɔi ni he hiaa ni ekɛwo ekaselɔi lɛ adɛŋ lɛ nɔ. Eesumɔ ni amɛná nitsumɔ ni ekɛwo amɛdɛŋ lɛ he miishɛɛ, no hewɔ lɛ ekɛɛ amɛ akɛ: “Lɛɛlɛŋ, lɛɛlɛŋ, miikɛɛ nyɛ akɛ: Mɔ ni heɔ minɔ yeɔ lɛ, nitsumɔi ni mitsuɔ lɛ, lɛ hu eeetsu, ni eeetsu nii ni fe nomɛi tete, ejaakɛ miiya tsɛ lɛ ŋɔɔ.” (Yohane 14:12) Akɛni Yesu miisumɔ ni ekaselɔi lɛ ana akɛ nitsumɔ ni ekɛwoɔ amɛdɛŋ lɛ he miihia waa hewɔ lɛ, ekɛɛ amɛ akɛ: “Wɔ lɛ, ní je etsɛre nɛɛ, ja wɔtsu mɔ ni tsu wɔ lɛ nitsumɔi lɛ; je baana, be ni mɔ ko nyɛŋ nii atsu.”Yohane 9:4.

4-6. (a) Mɛni hewɔ eŋɔɔ wɔnaa akɛ Noa kɛ Mose fee taakɛ Yehowa kɛɛ amɛ lɛ? (b) Kɛ́ adesai tsu nitsumɔ ni Nyɔŋmɔ kɛwo amɛdɛŋ lɛ, mɛɛ nibii enyɔ jɛɔ mli kɛbaa?

4 Jeeŋmɔ kwraa dani Yesu baaba shikpɔŋ lɛ nɔ lɛ, Yehowa kɛ nitsumɔi ni hãa mɔ tsui nyɔɔ emli wo adesai adɛŋ. Eyɛ mli akɛ Adam kɛ Hawa egbeee amɛnitsumɔ lɛ naa moŋ, shi adesai babaoo gbe nitsumɔ ni Nyɔŋmɔ kɛwo amɛdɛŋ lɛ naa. (1 Mose 1:28) Yehowa kɛ gbɛtsɔɔmɔi pɔtɛɛ ni tsɔɔ bɔ ni esa akɛ Noa akpɛ adeka lɛ ahã lɛ hã lɛ, koni ekɛbaa lɛ kɛ eweku lɛ yi yɛ Nu Afua lɛ mli. Noa fee taakɛ Yehowa kɛɛ lɛ lɛ pɛpɛɛpɛ. Akɛni ekɛ gbɛtsɔɔmɔi ni Yehowa kɛhã lɛ lɛ tsu nii jogbaŋŋ lɛ hewɔ wɔyɔɔ wala mli ŋmɛnɛ lɛ.1 Mose 6:14-16, 22; 2 Petro 2:5.

5 Yehowa kɛ gbɛtsɔɔmɔi pɔtɛɛ ni tsɔɔ bɔ ni esa akɛ Mose ama kpeebuu lɛ ahã, kɛ bɔ ni esa akɛ eto osɔfoyeli lɛ he gbɛjianɔ ehã lɛ hã lɛ. Mose fee taakɛ Yehowa kɛɛ lɛ lɛ pɛpɛɛpɛ. (2 Mose 39:32; 40:12-16) Te wɔnáa bɔ ni Mose tsu nii ehã kɛ Yehowa gbɛtsɔɔmɔi atoi ni ebo lɛ he sɛɛ wɔhãa tɛŋŋ? Bɔfo Paulo tsɔɔ mli akɛ, kpeebuu lɛ kɛ osɔfoyeli lɛ fee “nii kpakpai ni baaba lɛ” ahe mfoniri.Hebribii 9:1-5, 9; 10:1.

Kɛ́ wɔtsu nitsumɔ ni Yehowa kɛwo wɔdɛŋ lɛ, nɔ ni wɔtsuɔ lɛ woɔ ehiɛ nyam

6 Be ni Nyɔŋmɔ yiŋtoo lɛ baa mli fiofio lɛ, ekɛ nitsumɔi srɔtoi hã etsuji lɛ. Eyɛ mli akɛ esoro nitsumɔ ni ekɛhãa mɔ fɛɛ mɔ moŋ, shi be fɛɛ be lɛ, nɔ ni amɛtsuɔ lɛ woɔ Yehowa hiɛ nyam, ni adesai hu náa he sɛɛ. Anaa enɛ faŋŋ yɛ nɔ ni Yesu tsu dani eba shikpɔŋ lɛ nɔ kɛ nɔ ni etsu yɛ shikpɔŋ nɛɛ nɔ lɛ fɛɛ mli. (Yohane 4:34; 17:4) Ŋmɛnɛ lɛ, kɛ́ wɔtsu nitsumɔ ni Yehowa kɛwo wɔdɛŋ lɛ, nɔ ni wɔtsuɔ lɛ woɔ ehiɛ nyam. (Mateo 5:16; nyɛkanea 1 Korintobii 15:58.) Mɛni hewɔ wɔkɛɔ nakai?

NÁ JWƐŊMƆ NI JA YƐ NITSUMƆ HE

7, 8. (a) Tsɔɔmɔ nitsumɔ ni Kristofoi tsuɔ. (b) Te esa akɛ wɔfee wɔnii wɔhã tɛŋŋ yɛ gbɛtsɔɔmɔi ni Yehowa kɛhãa lɛ ahe lɛ?

7 Eji hegbɛ kpele diɛŋtsɛ akɛ Yehowa kɛ adesai ni yeee emuu lɛ baafee ekome kɛtsu nii. (1 Korintobii 3:9) Kristofoi komɛi ená hegbɛ lɛ akɛ amɛbaamamɔ tsũi tamɔ Noa kɛ Mose fee lɛ. Amɛteŋ mɛi komɛi yeɔ amɛbuaa kɛmamɔɔ Kpeei Asai, Maŋtsɛyeli Asai, kɛ nitsumɔhe niji. Kɛ́ ofata he kɛmiima Maŋtsɛyeli Asa momo ko ekoŋŋ yɛ  okutso lɛ mli jio, ooye oobua kɛmiima nitsumɔhe yitso ni amaa yɛ Warwick yɛ New York lɛ jio lɛ, omii ashɛ hegbɛ ni oná lɛ he! (Kwɛmɔ mfoniri ni atɛŋ ni yɔɔ nikasemɔ lɛ shishijee lɛ.) Eji nitsumɔ krɔŋkrɔŋ. Eyɛ mli akɛ Kristofoi ateŋ mɛi fioo pɛ tsuɔ tsumaa nitsumɔ lɛ moŋ, shi Kristofoi fɛɛ miitsu mumɔŋ tsumaa nitsumɔ ko. No ji shiɛmɔ nitsumɔ lɛ ní woɔ Yehowa hiɛ nyam, ní adesai hu náa he sɛɛ lɛ. (Bɔfoi lɛ Asaji 13:47-49) Nyɔŋmɔ gbɛjianɔtoo lɛ ji nɔ ni tsɔɔ wɔ bɔ ni esa akɛ wɔtsu shiɛmɔ nitsumɔ lɛ wɔhã. Enɛ hewɔ lɛ, bei komɛi lɛ ebaabi ni ahã wɔtsu nitsumɔ kroko.

8 Be fɛɛ be lɛ, Yehowa tsuji anɔkwafoi lɛ sumɔɔ akɛ amɛnyiɛ egbɛtsɔɔmɔi asɛɛ. (Nyɛkanea Hebribii 13:7, 17.) Kɛ́ akɛ nitsumɔ kroko loo gbɛtsɔɔmɔ hee ko hã wɔ lɛ, ekolɛ wɔnuŋ nɔ hewɔ ni akɛ nakai nitsumɔ lɛ loo gbɛtsɔɔmɔ lɛ hã wɔ lɛ shishi. Shi wɔkpɛlɛɔ nɔ ejaakɛ wɔle akɛ tsakemɔ lɛ jɛ Yehowa ŋɔɔ, ni nibii kpakpai baajɛ mli kɛba.

9. Mɛɛ nɔkwɛmɔnɔ kpakpa asafoŋ onukpai feɔ amɛhãa asafo lɛ?

9 Asafoŋ onukpai tsɔɔ akɛ amɛmiishwe waa ni amɛfee Yehowa suɔmɔnaa nii kɛtsɔ bɔ ni amɛnyiɛɔ hiɛ yɛ asafo lɛ mli lɛ nɔ. (2 Korintobii 1:24; 1 Tesalonikabii 5:12, 13) Asafoŋ onukpai sumɔɔ akɛ amɛtsu nii waa, ni amɛkɛ gbɛtsɔɔmɔi ni akɛhãa amɛ lɛ tsuɔ nii, ni amɛhe feɔ oya kɛkaseɔ shiɛmɔ gbɛi hei. Kɛ́ amɛto tɛlifoŋ nɔ odaseyeli, odase ni ayeɔ yɛ meelei amaamɔhei, loo maŋ odaseyeli he gbɛjianɔ lɛ, nibii kpakpai jɛɔ mli kɛbaa, eyɛ mli akɛ yɛ shishijee mli lɛ, ekolɛ mɛi komɛi baashashao shi akɛ amɛbaaka shiɛmɔ gbɛi nɛɛ amɛkwɛ. Akɛ nɔkwɛmɔnɔ lɛ, gbɛgbalɔi ejwɛ komɛi ni yɔɔ Germany lɛ kpɛ yiŋ akɛ amɛbaaye odase yɛ shikpɔŋkuku ko ní nitsumɔhei fa yɛ mli, ní atsu mli nii etsɛ lɛ mli. Amɛteŋ mɔ kome ní atsɛɔ lɛ Michael lɛ wie akɛ, akɛni amɛkɛ gbɛ nɛɛ tsu nii etsɛ hewɔ lɛ, amɛshe gbeyei. Ekɛfata he akɛ: “Efeɔ mi akɛ Yehowa le nakai, ejaakɛ ehã wɔná miishɛɛ waa yɛ shiɛmɔ nitsumɔ lɛ mli nakai leebi lɛ, ni wɔhiɛ kpaŋ nɔ kɔkɔɔkɔ. Eŋɔɔ wɔnaa waa akɛ wɔkɛ gbɛtsɔɔmɔ ni akɛhã yɛ Wɔ Maŋtsɛyeli Sɔɔmɔ lɛ mli lɛ tsu nii, ni wɔkɛ wɔhiɛ fɔ̃ Yehowa nɔ!” Ani oosumɔ ni oka shiɛmɔ gbɛi krokomɛi yɛ oshikpɔŋkuku lɛ mli okwɛ?

10. Mɛɛ tsakemɔi afee yɛ Yehowa asafo lɛ mli yɛ nyɛsɛɛ afii nɛɛ amli?

 10 Bei komɛi lɛ afeɔ tsakemɔi yɛ Betel. Akɛ nɔkwɛmɔnɔ lɛ, yɛ nyɛsɛɛ afii nɛɛ amli lɛ, aŋamɔ nitsumɔhe niji bibii komɛi, ni akɛ amɛnitsumɔ lɛ eyafata nitsumɔhe niji ni dara lɛ anɔ he. Enɛ sa mɛi ni tsuɔ nii yɛ nitsumɔhe niji nɛɛ ahe. Ehe bahia ní amɛfee tsakemɔi komɛi, shi sɛɛ mli lɛ amɛná he sɛɛ. (Jajelɔ 7:8) Eŋɔɔ nyɛmimɛi ni jɛ amɛsuɔmɔ mli amɛkɛ amɛhe hã nɛɛ anaa akɛ amɛfata he kɛmiitsu nibii ni Yehowa webii ni yɔɔ ŋmɛnɛ lɛ tsuɔ lɛ!

Ani oosumɔ ni oka shiɛmɔ gbɛi krokomɛi yɛ oshikpɔŋkuku lɛ mli okwɛ?

11-13. Mɛɛ naagbai komɛi mɛi kɛkpeɔ yɛ tsakemɔi ni afeɔ yɛ Yehowa asafo lɛ mli lɛ hewɔ?

11 Wɔbaanyɛ wɔkase nɔ ko ni he hiaa waa yɛ nyɛmimɛi ni tsuɔ nii yɛ nitsumɔhe niji ni afee amɛ ekome lɛ mli lɛ adɛŋ. Nyɛmimɛi hii kɛ yei nɛɛ ateŋ mɛi pii kɛ afii babaoo sɔmɔ yɛ nitsumɔhe niji nɛɛ amli. Ahã gbalashihilɛ mli bii komɛi ni sɔmɔ yɛ Betel ko ni mli bii faaa lɛ yafata nyɛmimɛi ni yɔɔ Mexico nitsumɔhe nine lɛ ahe. Mexico nitsumɔhe nine lɛ mli bii nɛɛ ayi fa fe Betelbii ni yɔɔ he ni nyɛmimɛi nɛɛ jɛ lɛ aaafee toi 30. Rogelio, ni ji nuu lɛ wie akɛ: “No mli lɛ, ewa waa kɛhã wɔ akɛ wɔbaashi wɔwekumɛi kɛ wɔnanemɛi.” Betelnyo kroko ni atsɛɔ lɛ Juan, ní ahã efã kɛtee Mexico lɛ hu nu he oookɛɛ eeje shihilɛ lɛ shishi ekoŋŋ. Ewie akɛ: “Esa akɛ obɔ nanemɛi hei. Ebiɔ ni okase kusumii hei, ni otsake bɔ ni osusuɔ nii ahe ohãa lɛ.”

12 Be ni afee nitsumɔhe niji komɛi ni yɔɔ Yuropa lɛ ekome lɛ, ahã Betelbii babaoo tee nitsumɔhe nine ni yɔɔ Germany lɛ. Amɛ hu amɛnáaa lɛ mlɛo, ejaakɛ ebi ni amɛshi amɛmaŋ kɛya he kroko. Mɛi ni jɛ Switzerland lɛ ahiɛ tse gɔji fɛfɛji ni yɔɔ he ni amɛjɛ lɛ, ni mɛi ni jɛ Austria lɛ hu ahiɛ tse shihilɛ ni amɛnáa mli ŋɔɔmɔ be ni amɛyɔɔ amɛtsutsu Betel ni mli bii faaa lɛ mli lɛ.

13 Ebiɔ ni nyɛmimɛi ni ahãa amɛyasɔmɔɔ yɛ nitsumɔhe niji ni yɔɔ maji krokomɛi anɔ lɛ afee tsakemɔi babaoo. Amɛyajeɔ shihilɛ hee mli, amɛkɛ mɛi hei tsuɔ nii, ni ekolɛ abaahã amɛtsu nitsumɔ kroko po. Akɛ amɛ yaa asafoi hei kɛ shikpɔŋkukuji hei amli, ni ekolɛ ehe baahia ni amɛkase wiemɔ kroko po. Tsakemɔi nɛɛ bɛ mlɛo, shi Betelbii babaoo kɛ miishɛɛ feɔ tsakemɔi nɛɛ. Mɛni hewɔ? Hã wɔkwɛ nɔ ni amɛteŋ mɛi komɛi yɔɔ kɛɛmɔ.

“Be ni mikai akɛ ninefɔɔ lɛ jɛ Yehowa ŋɔɔ lɛ, mimɔ mli kɛ mitsui fɛɛ”

14, 15. (a) Mɛɛ gbɛ nɔ mɛi babaoo etsɔɔ akɛ amɛmii shɛɔ hegbɛ ni amɛná akɛ amɛkɛ Yehowa miitsu nii lɛ he? (b) Mɛni wɔkaseɔ yɛ amɛnɔkwɛmɔnɔ lɛ mli?

14 Nyɛmi yoo ko ni atsɛɔ lɛ Grethel lɛ wie akɛ: “Mikpɛlɛ ninefɔɔ lɛ nɔ ejaakɛ miisumɔ ni mahã Yehowa ana akɛ misumɔɔ lɛ, ní akɛ jeee maŋ ko loo tsũ ko loo sɔɔmɔ hegbɛ ko hewɔ ni misumɔɔ lɛ lɛ.” Yoo ko ni atsɛɔ lɛ Dayska lɛ wie akɛ: “Be ni mikai akɛ ninefɔɔ lɛ jɛ Yehowa ŋɔɔ lɛ, mimɔ mli kɛ mitsui fɛɛ.” Nuu ko ni atsɛɔ lɛ André kɛ eŋa Gabriela lɛ hu kɛ lɛ kpaa gbee, amɛwie akɛ: “Wɔna akɛ enɛ ji hegbɛ ní wɔná ni wɔkɛbaasɔmɔ Yehowa, kɛtsɔ nibii ni wɔsumɔɔ lɛ ni wɔkɛbaaye gbɛhe ni ji enyɔ lɛ nɔ.” Amɛnuɔ he akɛ, kɛ́ afee tsakemɔi komɛi yɛ Yehowa gbɛjianɔtoo lɛ mli lɛ, ehi akɛ amɛkɛ miishɛɛ baakpɛlɛ nɔ fe ni amɛaakpoo.

Hegbɛ ni fe fɛɛ ni wɔyɔɔ ji, ni wɔtsu Yehowa nitsumɔ lɛ!

 15 Kɛ́ afee nitsumɔhe niji ekome lɛ, ahãa Betelbii lɛ ekomɛi yasɔmɔɔ akɛ gbɛgbalɔi. Nakai afee Betelbii babaoo ni yɔɔ Denmark, Norway, kɛ Sweden nitsumɔhe niji lɛ ní afee fɛɛ nitsumɔhe nine kome, ni ji Scandinavia nitsumɔhe nine lɛ. Nuu ko ni atsɛɔ lɛ Florian kɛ eŋa Anja lɛ wie akɛ: “Wɔnaa nitsumɔ ni akɛwo wɔdɛŋ amrɔ nɛɛ akɛ nitsumɔ ko ni wa shi ehãa mɔ náa miishɛɛ. Wɔ lɛ, ekɔɔɔ he eko he ni wɔsɔmɔɔ yɛ lɛ, eŋɔɔ wɔnaa akɛ Yehowa kɛ wɔ miitsu nii. Wɔbaanyɛ wɔwie kɛ wɔtsui fɛɛ akɛ, ajɔɔ wɔ waa!” Eyɛ mli akɛ wɔteŋ mɛi babaoo eyajeko shihilɛ ni tamɔ nɛkɛ mli moŋ, shi wɔbaanyɛ wɔkase bɔ ni nyɛmimɛi nɛɛ jɛ amɛsuɔmɔ mli amɛkɛ Maŋtsɛyeli lɛ ye klɛŋklɛŋ gbɛhe lɛ. (Yesaia 6:8) Be fɛɛ be lɛ, Yehowa jɔɔ mɛi fɛɛ ni hiɛ sɔɔ hegbɛ ni amɛná akɛ amɛkɛ lɛ miitsu nii lɛ, ekɔɔɔ he eko he ni amɛsɔmɔɔ yɛ.

YAA NƆ ONÁ HEGBƐ NI ONÁ AKƐ OKƐ YEHOWA MIITSU NII LƐ HE MIISHƐƐ!

16. (a) Mɛni Galatabii 6:4 lɛ woɔ wɔ hewalɛ ni wɔfee? (b) Mɛni ji sɔɔmɔ hegbɛ ni fe fɛɛ ni wɔyɔɔ?

16 Akɛni wɔyeee emuu hewɔ lɛ, bei pii lɛ wɔkɛ wɔhe toɔ mɛi krokomɛi ahe. Shi Nyɔŋmɔ Wiemɔ lɛ woɔ wɔ hewalɛ ni wɔkɛ wɔjwɛŋmɔ ama nɔ ni wɔ diɛŋtsɛ wɔnyɛɔ wɔtsuɔ lɛ nɔ. (Nyɛkanea Galatabii 6:4.) Jeee wɔ fɛɛ wɔbaanyɛ wɔsɔmɔ akɛ asafoŋ onukpai, gbɛgbalɔi, maŋsɛɛ sɔɔlɔi, loo Betelbii. Eyɛ mli akɛ enɛɛmɛi ji sɔɔmɔ hegbɛi ni sa moŋ, shi wɔ fɛɛ wɔyɛ sɔɔmɔ hegbɛ ko ni fe enɛɛmɛi. No ji sane kpakpa lɛ ní wɔshiɛɔ, ní hãa wɔbafeɔ Yehowa hefatalɔi nitsulɔi lɛ. Nyɛhãa wɔmii ashɛa hegbɛ nɛɛ he!

17. Mɛɛ shihilɛi wɔkɛkpeɔ yɛ nibii agbɛjianɔtoo nɛɛ mli? Shi mɛni hewɔ esaaa ni enɛ jeɔ wɔnijiaŋ wui lɛ?

17 Ekolɛ jeee nɔ fɛɛ nɔ wɔbaanyɛ wɔfee  yɛ Yehowa sɔɔmɔ lɛ mli yɛ nibii agbɛjianɔtoo nɛɛ mli. Ekolɛ shihilɛi komɛi yɛ ni wɔnyɛŋ he nɔ ko wɔfee, tamɔ weku sɔ̃i loo gbɔmɔtsoŋ naagbai. Kɛ̃lɛ, esaaa ni enɛ jeɔ wɔnijiaŋ wui. Ekɔɔɔ he eko naagbai ni wɔkɛkpeɔ lɛ, wɔbaanyɛ wɔhã mɛi ale Yehowa gbɛ́i lɛ kɛ e-Maŋtsɛyeli lɛ he sane. Nɔ ni he hiaa fe fɛɛ ji, ní wɔkɛ wɔnyɛmɔ fɛɛ asɔmɔ Yehowa, ní wɔsɔle wɔhã mɛi ni nyɛɔ amɛtsuɔ babaoo fe wɔ lɛ. Kaimɔ akɛ, mɔ fɛɛ mɔ ni jieɔ Yehowa gbɛ́i lɛ yi lɛ jara wa yɛ ehiɛ!

Mɔ fɛɛ mɔ ni jieɔ Yehowa gbɛ́i lɛ yi lɛ jara wa yɛ ehiɛ

18. Mɛni gbɛ wɔkpaa? Mɛɛ hegbɛ kpele wɔyɔɔ bianɛ?

18 Eyɛ mli akɛ wɔyeee emuu moŋ, shi Yehowa ehã wɔ hegbɛ akɛ wɔfee ehefatalɔi nitsulɔi. Eji hegbɛ kpele ni wɔná akɛ wɔkɛ wɔ-Nyɔŋmɔ lɛ baatsu nii yɛ naagbee gbii nɛɛ amli! Wɔmiikpa be ni wɔnine baashɛ “anɔkwa wala” lɛ nɔ lɛ gbɛ, be ni wɔbaaná miishɛɛ yɛ shihilɛ mli fe bɔ ni wɔnáa amrɔ nɛɛ. Etsɛŋ, Yehowa baahã wɔná miishɛɛ, toiŋjɔlɛ, kɛ naanɔ wala yɛ ejeŋ hee lɛ mli.1 Timoteo 6:18, 19.

Ani omii shɛɔ hegbɛ ni oyɔɔ akɛ oosɔmɔ Nyɔŋmɔ lɛ he? (See Kwɛmɔ kuku 16-18)

19. Mɛɛ shi Yehowa ewo wɔ?

19 Etsɛŋ, jeŋ hee ni Nyɔŋmɔ ewo he shi lɛ baaba. Enɛ hãa wɔkaiɔ nɔ ni Mose kɛɛ Israelbii lɛ dani amɛbote Shiwoo Shikpɔŋ lɛ nɔ lɛ. Ekɛɛ amɛ akɛ: “Yehowa, o-Nyɔŋmɔ lɛ, aaahã oshwere kɛteke nɔ yɛ onine naa nitsumɔi fɛɛ . . . agbɛfaŋ.” (5 Mose 30:9) Yɛ Harmagedon sɛɛ lɛ, Yehowa kɛ shikpɔŋ lɛ baahã ehefatalɔi nitsulɔi lɛ, taakɛ ewo shi lɛ. Kɛkɛ lɛ, nitsumɔ hee ni wɔbaatsu ji, ní wɔhã shikpɔŋ muu lɛ fɛɛ atsɔ paradeiso fɛfɛo!