Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) OCTOBER 2014

“Nii ni Yɔɔ Ŋwɛi lɛ Ahe Nyɛjwɛŋa”

“Nii ni Yɔɔ Ŋwɛi lɛ Ahe Nyɛjwɛŋa”

“Nii ni yɔɔ ŋwɛi lɛ ahe nyɛjwɛŋa, jeee nii ni yɔɔ shikpɔŋ lɛ nɔ lɛ.”KOLOSEBII 3:2.

1, 2. (a) Mɛni hewɔ kulɛ ekomefeemɔ ni yɔɔ Kolose asafo lɛ mli lɛ heɔ afite lɛ? (b) Mɛɛ ŋaawoo ye ebua nyɛmimɛi ni yɔɔ Kolose lɛ ni amɛtee nɔ amɛhiɛ wekukpaa kpakpa ni yɔɔ amɛ kɛ Nyɔŋmɔ teŋ lɛ mli?

SHWƐ fioo ni sane ko ni ba klɛŋklɛŋ afii 100 lɛ mli Kolose asafo lɛ mli lɛ kɛ mligbalamɔ aba nyɛmimɛi lɛ ateŋ! Nyɛmimɛi komɛi kɛɛ esa akɛ mɔ fɛɛ mɔ aye Mose Mla lɛ nɔ. Mɛi krokomɛi hu kɛɛ esaaa akɛ anáa miishɛɛ yɛ shihilɛ mli. Paulo bɔ amɛ kɔkɔ yɛ nɔ ni baanyɛ ajɛ susumɔi srɔtoi ni amɛhiɛ lɛ mli kɛba lɛ he. Ewie akɛ: “Nyɛkwɛa nyɛhe ni ahia, koni mɔ ko kɛ jeŋ nilee kɛ yaka shishiumɔ akaŋɔ nyɛ nom, yɛ gbɔmɛi ablema saji kɛ je nɛŋ shishijee nibii ni jeee Kristo lɛ anaa.”Kolosebii 2:8.

2 Kɛ́ Kristofoi ni afɔ amɛ mu nɛɛ di adesai asusumɔi asɛɛ lɛ, amɛbaakpoo hegbɛ ni amɛná akɛ amɛbaatsɔmɔ Nyɔŋmɔ bii lɛ. (Kolosebii 2:20-23) Bɔ ni afee ni amɛhiɛ wekukpaa kpakpa ni yɔɔ amɛ kɛ Nyɔŋmɔ teŋ lɛ mli lɛ, Paulo kɛɛ amɛ akɛ: “Nii ni yɔɔ ŋwɛi lɛ ahe nyɛjwɛŋa, jeee  nii ni yɔɔ shikpɔŋ lɛ nɔ lɛ.” (Kolosebii 3:2) Esa akɛ Kristofoi nɛɛ ahã hiɛnɔkamɔ krɛdɛɛ ni amɛyɔɔ akɛ amɛbaahi shi kɛya naanɔ yɛ ŋwɛi lɛ ahi amɛjwɛŋmɔ mli.Kolosebii 1:4, 5.

3. (a) Mɛɛ hiɛnɔkamɔ Kristofoi ni afɔ amɛ mu lɛ yɔɔ? (b) Mɛɛ sanebimɔi ahe wɔbaasusu yɛ nikasemɔ nɛɛ mli?

3 Kristofoi ni afɔ amɛ mu ni yɔɔ ŋmɛnɛ lɛ hu hãa amɛjwɛŋmɔ hiɔ Nyɔŋmɔ Maŋtsɛyeli lɛ kɛ hiɛnɔkamɔ ni amɛyɔɔ akɛ amɛbaatsɔmɔ “Kristo nanemɛi niyelɔi” yɛ ŋwɛi lɛ nɔ. (Romabii 8:14-17) Shi mɛi ni hiɛ kã nɔ akɛ amɛbaahi shikpɔŋ lɛ nɔ lɛ hu? Mɛɛ gbɛ nɔ Paulo wiemɔi lɛ kɔɔ amɛhe? Te amɛaafee tɛŋŋ amɛjwɛŋ “nii ni yɔɔ ŋwɛi lɛ” ahe lɛ? (Yohane 10:16) Abraham kɛ Mose jwɛŋ nii ni yɔɔ ŋwɛi lɛ ahe yɛ shihilɛi ni jaraa po amli. Mɛɛ gbɛ nɔ wɔbaanyɛ wɔkase amɛ?

NƆ NI ATSƆƆ KƐ́ AKƐƐ AJWƐŊ NII NI YƆƆ ŊWƐI LƐ AHE

4. Te Kristofoi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ aaafee tɛŋŋ ajwɛŋ nii ni yɔɔ ŋwɛi lɛ ahe lɛ?

4 Esa akɛ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ ajwɛŋ nii ni yɔɔ ŋwɛi lɛ ahe. Amɛbaanyɛ amɛfee enɛ kɛtsɔ Yehowa kɛ e-Maŋtsɛyeli lɛ ni amɛkɛaaye klɛŋklɛŋ gbɛhe yɛ amɛshihilɛ mli lɛ nɔ. (Luka 10:25-27) Nakai Kristo fee, ni nakai esa akɛ wɔ hu wɔfee. (1 Petro 2:21) No mli lɛ, susumɔi ni ejaaa, adesai anilee, kɛ heloonaa nibii asɛɛtiumɔ ehe shi yɛ Kristofoi ni hi shi yɛ klɛŋklɛŋ afii 100 lɛ mli lɛ abeaŋ. Ŋmɛnɛ lɛ, nibii nɛɛ nɔŋŋ wɔkɛkpeɔ yɛ Satan nibii agbɛjianɔtoo lɛ mli. (Nyɛkanea 2 Korintobii 10:5.) Esa akɛ wɔkase Yesu, ní wɔkpoo nɔ fɛɛ nɔ ni baanyɛ afite wɔ kɛ Yehowa teŋ wekukpaa lɛ.

Ani wɔŋmɛ gbɛ ni susumɔ ni je lɛ hiɛ yɛ shika kɛ heloonaa nibii ahe lɛ miiná wɔnɔ hewalɛ?

5. Mɛɛ saji wɔbaanyɛ wɔbi wɔhe yɛ shika kɛ heloonaa nibii ahe?

5 Ani wɔŋmɛ gbɛ ni susumɔ ni je lɛ hiɛ yɛ shika kɛ heloonaa nibii ahe lɛ miiná wɔnɔ hewalɛ? Nibii ni wɔsusuɔ he kɛ nibii ni wɔfeɔ lɛ ji nɔ ni hãa anaa nɔ tuuntu ni wɔsumɔɔ. Yesu tsɔɔ enɛ mli faŋŋ be ni ewie akɛ: “He ni nyɛjwetri yɔɔ lɛ, jɛi nyɛtsui aaahi” lɛ. (Mateo 6:21) Esa akɛ wɔbi wɔhe akɛ, mɛni wɔbuɔ akɛ ehe hiaa fe fɛɛ yɛ wɔshihilɛ mli? Ani shika, nitsumɔ kpakpa ni wɔbaaná, loo ogbɔjɔ shihilɛ ni wɔbaaná lɛ heɔ wɔjwɛŋmɔ fɛɛ? Aloo wɔbɔɔ mɔdɛŋ akɛ wɔbaahã wɔshihilɛ afee mlɛo, ní wɔkɛ wɔjwɛŋmɔ ama wɔ kɛ Yehowa teŋ wekukpaa lɛ nɔ? (Mateo 6:22) Yesu wie akɛ, kɛ́ wɔkɛ wɔjwɛŋmɔ ma ‘jwetrii ni wɔɔbɔ yɛ shikpɔŋ lɛ nɔ’ lɛ nɔ lɛ, ebaanyɛ efite wekukpaa ni yɔɔ wɔ kɛ Yehowa teŋ lɛ.Mateo 6:19, 20, 24.

Ja wɔjwɛŋ nii ni yɔɔ ŋwɛi lɛ ahe dani wɔbaanyɛ wɔwu wɔshi wɔgbɔjɔmɔi

6. Te wɔɔfee tɛŋŋ wɔwu wɔshi wɔgbɔjɔmɔi lɛ?

6 Akɛni wɔyeee emuu hewɔ lɛ, ewaaa akɛ wɔɔfee nibii ni ejaaa. (Nyɛkanea Romabii 7:21-25.) Kɛ́ wɔkɛ wɔhiɛ efɔ̃ɔɔ Nyɔŋmɔ mumɔ krɔŋkrɔŋ lɛ nɔ lɛ, no baanyɛ ahã wɔkɛ wɔhe awo  “hiɛtserɛjiemɔi ni yɔɔ hoo kɛ dãatɔɔ,” bɔlɛnamɔ jeŋba sha, loo “efɔŋ ni akɛ kuɛŋtimɔ feɔ” mli, ni wɔkɛ Nyɔŋmɔ mlai lɛ tsuŋ nii. (Romabii 13:12, 13, NW) Be fɛɛ be nɛɛ, wɔmiiwu wɔmiishi wɔgbɔjɔmɔi lɛ. Ja wɔjwɛŋ nii ni yɔɔ ŋwɛi lɛ ahe dani wɔbaanyɛ wɔye omanye yɛ enɛ mli. Enɛ biɔ mɔdɛŋbɔɔ, ni no hewɔ Paulo wie akɛ: “Migbalaa mi diɛŋtsɛ migbɔmɔtso lɛ mai ni miyeɔ lɛ nyɔŋ” lɛ. (1 Korintobii 9:27) Esa akɛ wɔ hu wɔmia wɔhiɛ waa ni wɔye wɔhe nɔ. Hã wɔsusu hii anɔkwafoi enyɔ komɛi ni fee nibii ni sa Nyɔŋmɔ hiɛ lɛ ahe wɔkwɛ.Hebribii 11:6.

ABRAHAM HE “YEHOWA EYE”

7, 8. (a) Mɛɛ naagbai Abraham kɛ Sara kɛkpe? (b) Mɛni he Abraham jwɛŋ be fɛɛ be?

7 Be ni Yehowa kɛɛ Abraham ni ekɛ eweku lɛ afã kɛya Kanaan shikpɔŋ lɛ nɔ lɛ, ejɛ esuɔmɔ mli ebo toi. Akɛni Abraham he Yehowa eye ní ebo lɛ toi hewɔ lɛ, Yehowa kɛ lɛ kpaŋ kpaŋmɔ ko. Yehowa kɛɛ lɛ akɛ: “Mahã otsɔ jeŋmaŋ kpeteŋkpele, ni majɔɔo.” (1 Mose 12:2) Afii babaoo ho ni Abraham kɛ Sara bɛ bi ko. Ani Abraham susu akɛ Yehowa hiɛ ekpa shi ni ewo lɛ lɛ nɔ? Yɛ nakai beaŋ lɛ, Abraham náaa shihilɛ lɛ mlɛo kwraa. No mli lɛ, eshi ogbɔjɔ shihilɛ ni yɔɔ Ur, ni ji maŋtiase ni shika yɔɔ mli lɛ mli, ni efã gbɛ nɔ ni fe kilomitai 1,600 kɛtee Kanaan shikpɔŋ lɛ nɔ. Lɛ kɛ eweku lɛ hi bui amli, hɔmɔ ye amɛ bei komɛi, ni shihilɛ mli ni amɛyaje lɛ hewɔ lɛ, ojoyeli tai baanyɛ atutua amɛ po. (1 Mose 12:5, 10; 13:18; 14:10-16) Kɛ̃lɛ, no mli lɛ Abraham kɛ eweku lɛ sumɔɔɔ ni amɛkuɔ amɛsɛɛ kɛyaa ogbɔjɔ shihilɛ ni yɔɔ Ur lɛ mli.Nyɛkanea Hebribii 11:8-12, 15.

8 Abraham he “Yehowa eye,” ni ekɛ ejwɛŋmɔ emaaa “nii ni yɔɔ shikpɔŋ lɛ nɔ” lɛ anɔ. (1 Mose 15:6) Ejwɛŋ shi ni Nyɔŋmɔ wo lɛ lɛ he be fɛɛ be. Yehowa na hemɔkɛyeli ni Abraham yɔɔ lɛ, ni ekɛɛ lɛ akɛ: “Kwɛmɔ ŋwɛi ko, ni okane ŋulamii, akɛ ooonyɛ amɛ okane lo? Ni ekɛɛ lɛ akɛ: Bɔ ni oseshi aaatamɔ nɛ.” (1 Mose 15:5) Enɛ hã Abraham na akɛ, Yehowa hiɛ kpako enɔ. Be fɛɛ be ni eeewo ehiɛ nɔ ekwɛ ŋulamii lɛ, ebaakai lɛ shi ni Yehowa ewo lɛ akɛ ebaahã eshwiei afa babaoo lɛ. Be ni Yehowa be ni eto lɛ shɛ lɛ, Abraham fɔ binuu, taakɛ Yehowa ewo lɛ shi lɛ pɛpɛɛpɛ.1 Mose 21:1, 2.

9. Te wɔɔfee tɛŋŋ wɔkase Abraham?

9 Wɔ hu wɔmiimɛ ní Yehowa shiwoi lɛ aba mli, taakɛ Abraham mɛ lɛ. (2 Petro 3:13) Kɛ́ wɔjwɛŋŋŋ nii ni yɔɔ ŋwɛi lɛ ahe lɛ, ekolɛ wɔbaanu he akɛ shiwoi nɛɛ asɛɛ miitsɛ, ni ekãa ni wɔkɛsɔmɔɔ Yehowa lɛ naa baaba shi. Ekolɛ, be ko ni eho lɛ wɔkɛ nibii shã afɔle wɔhã Yehowa koni wɔnyɛ wɔsɔmɔ akɛ daa gbɛgbalɔi, loo ní wɔlɛɛ wɔsɔɔmɔ lɛ mli yɛ gbɛ kroko nɔ. Shi amrɔ nɛɛ, mɛni wɔfeɔ? Ani wɔmiifee wɔnii tamɔ Abraham, mɔ ni kɛ enyɛmɔ fɛɛ sɔmɔ Yehowa, ní ekɛ ehiɛ fɔ̃  jɔɔmɔi ni baaba wɔsɛɛ lɛ anɔ lɛ? (Hebribii 11:10) Abraham “he Nyɔŋmɔ eye,” ni abu lɛ Nyɔŋmɔ shieŋtsɛ.Romabii 4:3.

MOSE NA “MƆ NI ANAAA LƐ LƐ”

10. Mɛɛ tsɔsemɔ Mose ná?

10 Mɔ kroko hu ni jwɛŋ nii ni yɔɔ ŋwɛi lɛ ahe lɛ ji Mose. Atsɔse lɛ yɛ Mizraim odehei aweku lɛ mli, ni nakai beaŋ lɛ Mizraim ji jeŋ hewalɛ. Biblia lɛ kɛɔ akɛ, “atsɔɔ Mose Mizraim nilee fɛɛ.” Nibii kpelei ni ekase nɛɛ hã “ená hewalɛ yɛ wiemɔi kɛ nitsumɔi amli.” (Bɔfoi lɛ Asaji 7:22) Yɛ tsɔsemɔ ni Mose ná lɛ hewɔ lɛ, kulɛ eyɛ hegbɛi babaoo ni baahã etsɔ gbɔmɔ wulu yɛ Mizraim. Shi no mli lɛ, Mose jwɛŋmɔ yɛ nikasemɔ kroko ni yɛ hiɛ kwraa fe no lɛ nɔ.

11, 12. Mɛɛ nikasemɔ Mose bu akɛ enɔ kwɔ kwraa fe nɔ fɛɛ nɔ? Te wɔfeɔ tɛŋŋ wɔleɔ enɛ?

11 Be ni Mose edako lɛ, enyɛ Yokebed tsɔɔ lɛ Hebribii lɛ a-Nyɔŋmɔ lɛ he nii. Mose bu Yehowa he nilee nɛɛ akɛ enɔ kwɔ kwraa fe nɔ fɛɛ nɔ. Ejɛ esuɔmɔ mli ekpoo ninamɔ kɛ gbɛhe ni kulɛ ebaaná lɛ, bɔ ni afee ni enyɛ efee Nyɔŋmɔ suɔmɔnaa nii. (Nyɛkanea Hebribii 11:24-27.) Tsɔsemɔ ni Mose ná kɛjɛ egbekɛbiiashi kɛ hemɔkɛyeli ni eyɔɔ yɛ Yehowa mli lɛ ye ebua lɛ ni ejwɛŋ nii ni yɔɔ ŋwɛi lɛ ahe.

Mose jɛ esuɔmɔ mli ekpoo ninamɔ kɛ gbɛhe ni kulɛ ebaaná lɛ, bɔ ni afee ni enyɛ efee Nyɔŋmɔ suɔmɔnaa nii

12 Eyɛ mli akɛ Mose ná nikasemɔ ni fe fɛɛ ni abaanyɛ aná yɛ Mizraim moŋ, shi ekɛ nikasemɔ nɛɛ tsuuu nii kɛtaooo gbɛhe, ni asaŋ ekɛheee gbɛ́i, loo ní eeetsɔ niiatsɛ. Anɔkwa, Biblia lɛ tsɔɔ akɛ, ekpa “yɛ enɔ, be ni eda lɛ, akɛ akatsɛ lɛ Farao biyoo lɛ bi, eesumɔ moŋ akɛ ekɛ Nyɔŋmɔ maŋ lɛ ana amanehulu, fe nɔ ni eeeye esha mli ŋɔɔmɔ be fioo ko.” Sɛɛ mli lɛ, Mose kɛ nilee ni eyɔɔ yɛ Yehowa he lɛ tsu nii kɛnyiɛ Nyɔŋmɔ webii lɛ ahiɛ.

13, 14. (a) Dani Mose baanyɛ ahã Yehowa webii lɛ aye amɛhe lɛ, mɛɛ sui ehe bahia ni ekase? (b) Mɛɛ sui ehe baahia ni wɔ hu wɔkase?

13 Mose sumɔɔ Yehowa kɛ E-webii ní no mli lɛ amɛji nyɔji yɛ Mizraim lɛ. Be ni Mose ná afii 40 lɛ, enu he akɛ be eshɛ ní esa akɛ ehã Nyɔŋmɔ webii lɛ aye amɛhe. (Bɔfoi lɛ Asaji 7:23-25) Shi no mli lɛ, Yehowa le akɛ Mose ekaseko sui ni baahã enyɛ etsu  nitsumɔ nɛɛ. Esa akɛ ekase heshibaa, tsuishitoo, mlijɔlɛ, kɛ henɔyeli. (Abɛi 15:33) Ehe baahia ni atsɔse Mose ni enyɛ etsu naagbai wuji ni ekɛbaakpe lɛ ahe nii. Afii 40 ni ekɛsɔmɔ akɛ tookwɛlɔ lɛ ye ebua lɛ ni ená sui nɛɛ.

14 Ani tsɔsemɔ nɛɛ ye ebua Mose? Hɛɛ, ejaakɛ Biblia lɛ kɛɔ akɛ, ebatsɔ mɔ ni ‘he jɔ fe gbɔmɛi fɛɛ ni yɔɔ shikpɔŋ nɛɛ nɔ.’ (4 Mose 12:3) Akɛni ekase heshibaa hewɔ lɛ, enyɛ eto etsui shi ehã mɛi srɔtoi kɛ naagbai ni amɛhiɛ lɛ. (2 Mose 18:26) Wɔ hu esa akɛ wɔná sui ni baaye ebua wɔ ni wɔfo “amanehulu kpeteŋkpele lɛ,” ní wɔbote Nyɔŋmɔ jeŋ hee lɛ mli. (Kpojiemɔ 7:14) Ani wɔnyɛɔ wɔkɛ mɛi hiɔ shi jogbaŋŋ, ní mɛi ni etamɔ nɔ ni amɛtsui shaa amɛ loo sane dɔɔ amɛ lɛ fata he? Bɔfo Petro wiemɔi nɛɛ baanyɛ aye abua wɔ. Ewie akɛ: “Nyɛwoa mɛi fɛɛ; nyɛsumɔa nyɛnyɛmimɛi.”1 Petro 2:17.

ESA AKƐ WƆJWƐŊ NII NI YƆƆ ŊWƐI LƐ AHE

15, 16. (a) Mɛni hewɔ esa akɛ wɔjwɛŋ nibii kpakpai ahe lɛ? (b) Mɛni hewɔ esa akɛ Kristofoi aba amɛjeŋ jogbaŋŋ lɛ?

15 Wɔyɛ “jaramɔ bei” amli. (2 Timoteo 3:1) No hewɔ ni esa akɛ wɔjwɛŋ  nibii kpakpai ahe, bɔ ni afee ni wɔhi Nyɔŋmɔ masɛi daa lɛ. (1 Tesalonikabii 5:6-9) Hã wɔkwɛ gbɛi etɛ ni wɔbaanyɛ wɔtsɔ nɔ wɔfee enɛ.

16 Wɔjeŋba: Petro tsɔɔ mli akɛ, jeŋba kpakpa he miihia waa be ni ewie akɛ: ‘Nyɛbaa nyɛjeŋ jogbaŋŋ yɛ jeŋmajiaŋbii lɛ ateŋ’ lɛ. Ekɛfata he akɛ, ekolɛ mɛi ni leee Yehowa lɛ baayɔse bɔ ni wɔbaa wɔjeŋ wɔhãa lɛ, ni no baahã ‘amɛwo Nyɔŋmɔ hiɛ nyam.’ (1 Petro 2:12) Kɛ́ wɔyɛ shĩa jio, nitsumɔhe jio, skul jio, wɔmiijie wɔhiɛtserɛ jio, loo wɔmiishiɛ jio lɛ, esa akɛ wɔfee bɔ fɛɛ bɔ ni wɔɔnyɛ kɛwo Yehowa hiɛ nyam, kɛtsɔ wɔjeŋba nɔ. Eji anɔkwale akɛ, wɔ fɛɛ wɔyeee emuu, ni wɔtɔ̃ɔ. (Romabii 3:23) Shi esaaa akɛ wɔnijiaŋ jeɔ wui. Yɛ Yehowa yelikɛbuamɔ naa lɛ, wɔbaanyɛ wɔwu “hemɔkɛyeli he ta kpakpa lɛ.”1 Timoteo 6:12.

Kɛ́ wɔná Kristo jwɛŋmɔ lɛ eko lɛ, wɔ hu wɔbaaba wɔhe shi, ni wɔkɛ ekãa baashiɛ

17. Te wɔɔfee tɛŋŋ wɔná Yesu jwɛŋmɔ lɛ eko lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

17 Jwɛŋmɔ ní esa akɛ wɔná: Bɔ ni afee ni wɔba wɔjeŋ jogbaŋŋ lɛ, esa akɛ wɔná jwɛŋmɔ ni ja. Bɔfo Paulo wie akɛ: “Nɔ ni Kristo Yesu hu jwɛŋ lɛ, no nɔŋŋ nyɛjwɛŋa yɛ nyɛmli.” (Filipibii 2:5) Mɛɛ jwɛŋmɔ Yesu ná? Eba ehe shi, ni no tsirɛ lɛ ni ekɛ enyɛmɔ fɛɛ sɔmɔ Yehowa. Nyɔŋmɔ Maŋtsɛyeli lɛ he sane kpakpa lɛ ní eeeshiɛ lɛ ji nɔ ni he ejwɛŋmɔ fɛɛ. (Marko 1:38; 13:10) Yesu na Nyɔŋmɔ Wiemɔ lɛ akɛ no ji gbɛtsɔɔmɔ ni he hiaa fe fɛɛ. (Yohane 7:16; 8:28) Ekase Ŋmalɛ Krɔŋkrɔŋ lɛ jogbaŋŋ bɔ ni afee ni enyɛ etsɛ yisɛɛ, ekɛfã anɔkwale lɛ he, ni etsɔɔ mli. Kɛ́ wɔná Kristo jwɛŋmɔ lɛ eko lɛ, wɔ hu wɔbaaba wɔhe shi, wɔkɛ ekãa baashiɛ, ni wɔkɛ hiɛdɔɔ baakase Biblia lɛ.

Nyɔŋmɔ Maŋtsɛyeli lɛ he sane kpakpa lɛ ní Yesu baashiɛ lɛ ji nɔ ni he ejwɛŋmɔ fɛɛ (Kwɛmɔ kuku 17)

18. Mɛɛ nibii ni he hiaa wɔbaanyɛ wɔfee kɛye wɔbua kɛtsu Yehowa nitsumɔ lɛ?

18 Yelikɛbuamɔ ní esa akɛ wɔkɛhã: Eji Nyɔŋmɔ yiŋtoo akɛ, “mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ” lɛ aba amɛhe shi amɛhã Yesu. (Filipibii 2:9-11) Eyɛ mli akɛ Yesu yɛ gbɛhe wulu moŋ, shi ebaa ehe shi ehãa e-Tsɛ lɛ. Esa akɛ wɔ hu wɔfee nakai nɔŋŋ. (1 Korintobii 15:28) Kɛ́ ‘wɔmiifee jeŋmaji fɛɛ Yesu kaselɔi lɛ,’ belɛ wɔkɛ Yehowa miitsu nii. (Mateo 28:19) Ni agbɛnɛ hu, kɛ́ wɔmiifee wɔkutsoŋbii kɛ wɔnyɛmimɛi lɛ ejurɔ lɛ, belɛ ‘wɔmiifee mɛi fɛɛ ejurɔ.’Galatabii 6:10.

19. Mɛni esa akɛ wɔtswa wɔfai shi akɛ wɔbaafee?

19 Eŋɔɔ wɔnaa waa akɛ Yehowa kaiɔ wɔ ni wɔjwɛŋ nii ni yɔɔ ŋwɛi lɛ ahe! Esa akɛ “wɔkɛ hiɛmiamɔ ada foi” lɛ, ní wɔhã wɔjwɛŋmɔ ahi nibii kpakpai anɔ. (Hebribii 12:1, Ga Biblia hee) Nyɛhãa wɔtswaa wɔfai shi akɛ ‘wɔbaajie wɔmusuŋ wɔtsu nii, taakɛ Nuŋtsɔ Yehowa wɔtsuɔ wɔhãa lɛ,’ ejaakɛ wɔle akɛ wɔ-Tsɛ ni yɔɔ ŋwɛi lɛ baajɔɔ wɔ babaoo.Kolosebii 3:23, 24.