Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) SEPTEMBER 2014

Sanebimɔi ni Jɛ Kanelɔi Adɛŋ

Sanebimɔi ni Jɛ Kanelɔi Adɛŋ

Ani nɔ ni David wie yɛ Lala 37:25 kɛ nɔ ni Yesu wie yɛ Mateo 6:33 lɛ tsɔɔ akɛ, Yehowa eŋmɛŋ gbɛ kɔkɔɔkɔ ní Kristofonyo ko he afĩ lɛ yɛ niyenii gbɛfaŋ?

David ŋma akɛ, enako “jalɔ ko ni akwa lɛ loo ni eseshibii miisisɛ̃ [loo miitao, NW] aboloo pɛŋ.” Lɛ diɛŋtsɛ eniiashikpamɔ hã ewie nakai lɛ. Ele akɛ Nyɔŋmɔ kwɛɔ etsuji be fɛɛ be. (Lala 37:25) Kɛ̃lɛ, David wiemɔi lɛ etsɔɔɔ akɛ ebako pɛŋ akɛ nɔ ko efĩ Yehowa jálɔ ko, ni ebaŋ lɛ nakai kɔkɔɔkɔ.

Bei komɛi lɛ, David diɛŋtsɛ kɛ shihilɛi ni jaraa kpeɔ. Shihilɛ ko ni tamɔ nakai ba be ni ejoɔ Saul naa foi lɛ. Niyenii he bahia David, no hewɔ lɛ etee eyabi ní ahã lɛ kɛ mɛi ni fata ehe lɛ aboloo. (1 Sam. 21:2-7) No hewɔ lɛ, David ‘tao aboloo’ yɛ shihilɛ nɛɛ mli. Kɛ̃lɛ, yɛ nakai shihilɛ ni jaraa lɛ mli lɛ, ele akɛ Yehowa kwako lɛ. Anɔkwa sane lɛ ji akɛ, Biblia lɛ ewieee yɛ he ko he ko akɛ David yabala niyenii koni ekagbo.

Yesu hu wo shi yɛ Mateo 6:33 lɛ akɛ, Nyɔŋmɔ baahã enɔkwa tsuji ni kɛ Maŋtsɛyeli lɛ he nibii yeɔ klɛŋklɛŋ gbɛhe yɛ amɛshihilɛ mli lɛ nibii ni he hiaa amɛ. Ewie akɛ: “Nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ [ní nɔ ni abaaye, nɔ ni abaanu, kɛ nɔ ni abaawo fata he lɛ] aaafata he ahã nyɛ.” Shi Yesu tsɔɔ mli hu akɛ, akɛni abaawa ‘enyɛmimɛi’ lɛ ayi hewɔ lɛ, hɔmɔ baaye amɛ. (Mat. 25:35, 37, 40) Nakai eba lɛ yɛ bɔfo Paulo gbɛfaŋ. Hɔmɔ ye lɛ, ni kumai hu ye lɛ yɛ bei komɛi amli.2 Kor. 11:27.

Yehowa ehã wɔle akɛ abaawa wɔ yi yɛ gbɛi srɔtoi anɔ. Ekolɛ ebaaŋmɛ gbɛ ní nɔ ko afĩ wɔ koni no ahã ená hetoo ehã mpoa ni Abonsam tswaa lɛ lɛ. (Hiob 2:3-5) Akɛ nɔkwɛmɔnɔ lɛ, wɔnyɛmimɛi Kristofoi lɛ ekomɛi, tamɔ mɛi ni awa amɛ yi yɛ Nazi yiwaa nsarai amli lɛ, na nɔ babaoo yɛ amɛyi ni awa lɛ hewɔ. Gbɛ kome ni ehiii kwraa ní atsɔ nɔ aka akɛ abaahã Odasefoi lɛ aŋmɛɛ anɔkwa ni amɛyeɔ Yehowa lɛ he ji niyenii ni fa bɔ ni sa ni ahãaa amɛ lɛ. Odasefoi anɔkwafoi lɛ tee nɔ amɛbo Yehowa toi, ni ekwaaa amɛ. Eŋmɛ gbɛ ni amɛtsɔ jaramɔ shihilɛ nɛɛ mli, taakɛ eŋmɛɔ gbɛ ni Kristofoi fɛɛ tsɔɔ jaramɔ shihilɛi srɔtoi amli lɛ. Kɛ̃lɛ, ŋwanejee ko bɛ he akɛ Yehowa yeɔ ebuaa mɛi fɛɛ ni naa nɔ yɛ egbɛ́i lɛ hewɔ lɛ. (1 Kor. 10:13) Esa akɛ wɔhã wiemɔi ni yɔɔ Filipibii 1:29 lɛ ahi wɔjwɛŋmɔŋ, jɛmɛ kɛɔ akɛ: “Nyɛ lɛ aduro nyɛ yɛ Kristo hewɔ, jeee enɔ hemɔkɛyeli kɛkɛ, shi moŋ akɛ nyɛna nɔ yɛ ehewɔ hu.”

Yehowa ewo etsuji shi akɛ ekɛ amɛ baahi shi. Akɛ nɔkwɛmɔnɔ lɛ, Yesaia 54:17 lɛ kɛɔ akɛ: “Tawuu nii ní asɔ̃ɔ ashiɔo lɛ eko eko nyɛŋ nɔ ko afee.” Shiwoo nɛɛ kɛ ekrokomɛi ni tamɔ no lɛ maa nɔ mi kɛhãa wɔ akɛ, Nyɔŋmɔ baabu ewebii lɛ ahe akɛ kuu. Kɛ̃lɛ, akɛ aŋkroaŋkroi lɛ, ekolɛ Kristofoi kɛ jaramɔ shihilɛi baakpe, ni ekolɛ amɛbaagboi po.