Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  September 2014

Fɔlɔi—Nyɛkwɛa Nyɛbii lɛ Tamɔ Tookwɛlɔi

Fɔlɔi—Nyɛkwɛa Nyɛbii lɛ Tamɔ Tookwɛlɔi

“Bɔɔ mɔdɛŋ ni ole bɔ ni otooi lɛ yɔɔ.”ABƐI 27:23.

1, 2. (a) Mɛni ji nibii komɛi ni tookwɛlɔi ni hi shi yɛ blema Israel lɛ feɔ? (b) Mɛɛ gbɛ nɔ fɔlɔi tamɔ tookwɛlɔi?

TOOKWƐLƆI ni hi shi yɛ blema Israel lɛ anitsumɔ lɛ bɛ mlɛo kwraa. Latsaa beaŋ jio, fɛ̃i beaŋ jio lɛ, amɛtsuɔ nii, ni esa akɛ amɛbu amɛtooi lɛ ahe kɛjɛ kooloi awuiyelɔi kɛ julɔi ahe. Be fɛɛ be lɛ, amɛkwɛɔ akɛ tooi lɛ ateŋ eko fɛɛ eko yɛ hewalɛ lo, ni kɛ́ eko bɛ hewalɛ lɛ, amɛyeɔ amɛbuaa lɛ koni ená hewalɛ, ni kɛ́ eko epila hu lɛ, amɛtoɔ epilamɔ lɛ nɔ. Amɛnáa deka amɛhãa toobii lɛ hu, ejaakɛ amɛbɛ hewalɛ tamɔ tooi ni edara lɛ.1 Mose 33:13.

2 Esa akɛ fɔlɔi ni ji Kristofoi lɛ afee amɛnii tamɔ tookwɛlɔi feɔ lɛ pɛpɛɛpɛ. Eji fɔlɔi lɛ asɔ̃ akɛ amɛtsɔse amɛbii lɛ yɛ Yehowa gbɛtsɔɔmɔi lɛ anaa. (Efe. 6:4) Ani enɛ feemɔ yɛ mlɛo? Dabi! Gbekɛbii kɛ shihilɛi ni Satan woɔ he hewalɛ kpeɔ be fɛɛ be. Kɛfata he lɛ, ehe miihia ni gbekɛbii lɛ awu ashi amɛ diɛŋtsɛ amɛfatɔi. (2 Tim. 2:22; 1 Yoh. 2:16) Te ooofee tɛŋŋ oye obua obii lɛ? Nyɛhãa wɔsusua gbɛi etɛ ni wɔɔtsɔ nɔ wɔye wɔbua wɔbii lɛ tamɔ tookwɛlɔ feɔ lɛ he. Esa akɛ: (1) wɔle amɛ, (2) wɔlɛ amɛ, ni (3) wɔtsɔɔ amɛ gbɛ.

 NYƐLEA NYƐBII LƐ

3. Te fɔlɔi aaafee tɛŋŋ amɛle amɛbii jogbaŋŋ lɛ?

3 Tookwɛlɔ kpakpa lɛ kwɛɔ etooi lɛ ateŋ eko fɛɛ eko jogbaŋŋ, ejaakɛ eetao ekwɛ akɛ amɛyɛ hewalɛ lo. Biblia lɛ kɛɔ akɛ: “Bɔɔ mɔdɛŋ ni ole bɔ ni otooi lɛ yɔɔ.” (Abɛi 27:23) Akɛ fɔlɔ lɛ, esa akɛ ole bɔ ni “otooi,” ni ji obii lɛ yɔɔ lɛ jogbaŋŋ. Kɛ́ ole bɔ ni obii lɛ feɔ amɛnii amɛhãa, bɔ ni amɛsusuɔ nii ahe amɛhãa, kɛ bɔ ni amɛnuɔ nii ahe amɛhãa lɛ, no baaye abua bo ni ole amɛ jogbaŋŋ. Te ooofee tɛŋŋ ofee enɛ? Esa akɛ okɛ obii lɛ afɔ sanegbaa.

4, 5. (a) Mɛni fɔlɔi baanyɛ afee koni amɛbii agba amɛ amɛyitsoŋ sane kɛ bɔ ni amɛnuɔ he amɛhãa? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni ofeɔ ní hãa efeɔ mlɛo kɛhãa obii lɛ akɛ amɛkɛ bo aaagba sane?

4 Fɔlɔi komɛi ena akɛ, kɛ́ amɛbii lɛ ye kɛjɛ afii 13 kɛyashi afii 19 lɛ, ewa akɛ amɛkɛ amɛ aaagba sane. Kɛ́ amɛshɛ nɛkɛ beaŋ lɛ, amɛsumɔɔɔ akɛ amɛkɛ mɛi gbaa amɛyitsoŋ sane kɛ bɔ ni amɛnuɔ he amɛhãa. Kɛ́ nakai obii lɛ feɔ lɛ, mɛni obaanyɛ ofee? Yɛ nɔ najiaŋ ni obaatsɛ amɛ ota shi ni okɛ amɛ awie be kakadaŋŋ lɛ, obaanyɛ okɛ amɛ awie kpitiokpitio be fɛɛ be ni nyɛmiifee nibii krokomɛi. (5 Mose 6:6, 7) Nyɛfea ekome kɛyasharaa shi yɛ akutso lɛ mli. Nyɛfea ekome kɛshwɛa. Ni nyɛfea ekome kɛtsua shĩa nii. Yɛ shihilɛi ni tamɔ nɛkɛ mli lɛ, ewaŋ kɛhãŋ amɛ akɛ amɛaagba bo amɛyitsoŋ sane kɛ bɔ ni amɛnuɔ he amɛhãa.

5 Shi kɛ́ loloolo lɛ, obi lɛ kɛ bo egbaaa sane hu? Kaa nɔ kroko okwɛ. Akɛ nɔkwɛmɔnɔ lɛ, yɛ nɔ najiaŋ ni ooobi obiyoo lɛ akɛ te nibii tee lɛ tɛŋŋ yɛ egbi lɛ mli lɛ, gbaa lɛ bɔ ni nibii tee lɛ yɛ bo ogbɛfaŋ. Ekolɛ enɛ baahã efee mlɛo kɛhã lɛ akɛ eeegba bo bɔ ni nibii tee lɛ yɛ lɛ hu egbɛfaŋ. Aloo kɛ́ ootao ole bɔ ni obiyoo lɛ naa sane ko ehãa lɛ, bi lɛ saji ni kɔɔ nakai sane lɛ he, shi kaabi lɛ bɔ ni lɛ enaa lɛ ehãa lɛ tɛɛ. Obaanyɛ obi lɛ bɔ ni enanemɛi naa nakai sane lɛ amɛhãa. No sɛɛ lɛ, obaanyɛ obi lɛ ŋaa ni ewoɔ enanemɛi lɛ yɛ nakai sane lɛ he.

6. Te obii lɛ aaafee tɛŋŋ amɛna akɛ oyɛ deka kɛhã amɛ, ni ewaaa akɛ akɛ bo aaagba sane lɛ?

6 Kɛ́ obii lɛ na akɛ be fɛɛ be lɛ ofee klalo akɛ obaabo amɛ toi, ni okɛ sanegbaa waaa lɛ, amɛbaasumɔ ni amɛkɛ bo agba sane. Shi kɛ́ daa nɛɛ obii lɛ nuɔ he akɛ obɛ deka lɛ, amɛkɛ bo egbaŋ amɛnaagbai lɛ ahe sane. Te ooofee tɛŋŋ ohã amɛna akɛ amɛbaanyɛ amɛkɛ bo agba sane lɛ? Kaawie kɛkɛ akɛ, “Nyɛbaanyɛ nyɛkɛ mi agba sane be fɛɛ be.” Moŋ lɛ, hã obii lɛ ana akɛ obaaná amɛhe tsui, ni omli fuŋ hu kɛ́ amɛkɛ bo miigba sane. Esa akɛ ohã amɛna hu akɛ, amɛnaagbai lɛ kã otsui nɔ waa. Oblayoo ko ni eye afii 19 ni atsɛɔ lɛ Kayla lɛ wie akɛ: “Manyɛ mikɛ mitsɛ agba nɔ fɛɛ nɔ he sane. Kɛ́ mikɛ lɛ miigba sane lɛ, efooo minaa, ekojooo mi; eboɔ mi toi jogbaŋŋ. No sɛɛ lɛ, ekɛ ŋaawoo ni sa hãa mi.”

7. (a) Mɛɛ gbɛ nɔ fɔlɔi baanyɛ aŋmɛ pɛpɛɛpɛ kɛ́ amɛkɛ amɛbii lɛ miisusu saji tamɔ nyiɛmɔ ni tsɔɔ gbalashihilɛ hiɛ lɛ he? (b) Mɛɛ gbɛ nɔ fɔlɔi anifeemɔ baanyɛ awo amɛbii lɛ amli la?

7 Ehe miihia ni bei komɛi lɛ, okɛ obii lɛ asusu saji ni he wiemɔ wa, tamɔ nyiɛmɔ ni tsɔɔ gbalashihilɛ hiɛ lɛ he. Kɛ́ okɛ amɛ miisusu he lɛ, tsɔɔmɔ amɛ gbɛ kpakpa ni amɛbaanyɛ amɛtsɔ nɔ amɛtsu he nii. Akɛ nɔkwɛmɔnɔ lɛ, kɛ́ oyaahe niyenii yɛ he ko, ni ona akɛ abɔ kɔkɔ yɛ wolo ni tsɔɔ niyenii srɔtoi ni ahɔ̃ɔ yɛ jɛmɛ lɛ mli akɛ, niyenii ni ahɔ̃ɔ yɛ jɛmɛ lɛ baanyɛ awo mɔ hela lɛ, ani obaahe niyenii lɛ yɛ jɛmɛ? Ekolɛ obaashi jɛmɛ kɛya he kroko. Nakai nɔŋŋ ebaanyɛ eba lɛ yɛ obii lɛ agbɛfaŋ. Kɛ́ be fɛɛ be ni okɛ amɛ baawie nyiɛmɔ ni tsɔɔ gbalashihilɛ hiɛ lɛ he lɛ, oobɔ amɛ kɔkɔ sɔŋŋ lɛ, ebaawo amɛmli la ni amɛbiŋ odɛŋ ŋaawoo yɛ he dɔŋŋ. (Nyɛkanea Kolosebii 3:21.) No hewɔ lɛ, bɔɔ mɔdɛŋ ni oŋmɛ pɛpɛɛpɛ. Oblayoo ko ni atsɛɔ lɛ  Emily lɛ wie akɛ: “Kɛ́ mifɔlɔi kɛ mi miisusu nyiɛmɔ ni tsɔɔ gbalashihilɛ hiɛ lɛ he lɛ, amɛhãaa manu he akɛ eji nɔ ko gbonyo. Amɛhãa minaa akɛ kɛ́ ootao ole mɔ ko jogbaŋŋ kɛhã gbalashihilɛ lɛ, eyɛ miishɛɛ waa, ni kɛ́ oná mɔ ko ni okɛbaabote gbalashihilɛ mli lɛ, onáa miishɛɛ. Enɛ eye ebua mi ni minyɛɔ mikɛ amɛ susuɔ saji nɛɛ ahe yɛ gbɛ ni waaa nɔ. Anɔkwa, misumɔɔɔ akɛ mishiuɔ amɛ nɔ ko nɔ yɛ nyiɛmɔ fɛɛ nyiɛmɔ ni tsɔɔ gbalashihilɛ hiɛ ni mikɛ mɔ ko baaje shishi lɛ mli.”

8, 9. (a) Kɛ́ fɔlɔi to amɛtsui shi kɛbo amɛbii lɛ atoi lɛ, mɛɛ sɛɛnamɔi jɛɔ mli kɛbaa? (b) Mɛni ejɛ obii lɛ atoi ni oboɔ jogbaŋŋ lɛ mli kɛba?

8 Too otsui shi ní obo obi lɛ toi jogbaŋŋ. Enɛ baahã ena akɛ okɛ sanegbaa waaa. (Nyɛkanea Yakobo 1:19.) Yoo ko ni atsɛɔ lɛ Katia ní ekome ekwɛɔ ebi lɛ wie akɛ: “Tsutsu ko lɛ, mináaa tsui mihãaa mibiyoo lɛ kwraa. Kɛ́ eewie nɔ ko lɛ, miŋmɛɛɛ gbɛ ni egbe naa. Ekolɛ etɔ mi fe nine loo misumɔɔɔ ni mɔ ko kɛ sane ko bagbaa minaa. Amrɔ nɛɛ ni mitsake bɔ ni mifeɔ minii mihãa lɛ, mibiyoo lɛ hu etsake. Amrɔ nɛɛ enyɛɔ ekɛ mi gbaa sane jogbaŋŋ.”

Bo amɛ toi koni ole amɛ (Kwɛmɔ kuku 3-9)

9 Nuu ko ni atsɛɔ lɛ Ronald lɛ hu gba niiashikpamɔ ko ni tamɔ nakai nɔŋŋ yɛ ekɛ ebiyoo ni eye afii 16 lɛ he. Ewie akɛ: “Be ni ekɛɛ mi akɛ eesumɔ oblanyo ko ni ekɛyaa skul lɛ, amrɔ lɛ mimli fu.” Ekɛfata he akɛ: “Shi be ni mijwɛŋ bɔ ni Yehowa toɔ etsui shi ehãa etsuji ní enuɔ amɛ shishi lɛ he lɛ, miyɔse akɛ nilee yɛ mli akɛ maŋmɛ mibiyoo lɛ gbɛ ni ewie bɔ ni enuɔ he ehãa lɛ he, dani mijaje lɛ. Eŋɔɔ minaa akɛ mifee nakai! Be nɛɛ ji be klɛŋklɛŋ kwraa ni minu bɔ ni mibiyoo lɛ nuɔ he ehãa lɛ shishi. Be ni ewie egbe naa lɛ, minyɛ mikɛ lɛ wie yɛ naajɔlɛ mli. Naakpɛɛ sane ji akɛ, emɔ ŋaa ni miwo lɛ lɛ mli. Ehã mile akɛ, ebaatsake susumɔ ni ehiɛ lɛ.” Kɛ́ okɛ obii lɛ fɔɔ sane gbaa lɛ, ebaaye ebua bo ni ole nɔ ni amɛsusuɔ kɛ bɔ ni amɛnuɔ he amɛhãa diɛŋtsɛ. Ni no baahã oye obua amɛ ni amɛkpɛ amɛyiŋ jogbaŋŋ yɛ shihilɛ mli. *

NYƐLƐA NYƐBII LƐ

10, 11. Te ooofee tɛŋŋ oye obua obii lɛ koni amɛkashi anɔkwale lɛ?

10 Tookwɛlɔ kpakpa le akɛ etooi lɛ baanyɛ adu gbɛ. Ekolɛ tooi lɛ eko baabɔi jwɛi kpemɔ yɛ he ko ni kɛ he ni tooku lɛ yɔɔ jɛkɛɛɛ tsɔ. Ebaatse ehe fiofio kɛyashi  ekɛ tooku lɛ teŋ baajɛkɛ kwraa. Obi lɛ baanyɛ afee nɔ ko ni tamɔ nakai nɔŋŋ. Ebaatse ehe kɛjɛ anɔkwale lɛ he fiofio. Ekolɛ ekɛ mɛi gbohii baabɔi bɔɔ loo ekɛ ehe baawo hiɛtserɛjiemɔi ni esaaa amli. (Abɛi 13:20) Te ooofee tɛŋŋ otsĩ shihilɛ ni tamɔ nɛkɛ naa lɛ?

11 Kɛ́ ootsɔɔ obii lɛ anii lɛ, kaashashao shi kwraa akɛ oooye obua amɛ yɛ hei ni onaa akɛ esa akɛ amɛfee tsakemɔi yɛ lɛ. Agbɛnɛ hu, ye obua amɛ koni amɛjie sui kpakpa ni amɛyɔɔ lɛ kpo jogbaŋŋ fe tsutsu lɛ. (2 Pet. 1:5-8) Be ni hi jogbaŋŋ ni obaanyɛ okɛye obua amɛ ji be ni nyɛfeɔ weku jamɔ lɛ. October 2008 Wɔ Maŋtsɛyeli Sɔɔmɔ lɛ wie akɛ: “Aawo wekuyitsei hewalɛ ni amɛtsu sɔ̃ ni Yehowa kɛfɔ̃ amɛnɔ akɛ amɛto weku Biblia nikasemɔ ni mɔ̃ɔ shi, ni afeɔ kɛtsaraa nɔ lɛ he gbɛjianɔ lɛ he nii.” Ani okɛ be nɛɛ miitsu nii yɛ nilee mli koni onyɛ oye obua obii lɛ? Ná nɔmimaa akɛ obii lɛ ahiɛ sɔɔ mɔdɛŋ fɛɛ ni obɔɔ koni oye obua amɛ lɛ.Mat. 5:3; Fil. 1:10.

Lɛɛ amɛ jogbaŋŋ (Kwɛmɔ kuku 10-12)

12. (a) Mɛɛ gbɛ nɔ oblahii kɛ oblayei ená weku jamɔ ni afolɔɔɔ mli lɛ he sɛɛ? (Kwɛmɔ akrabatsa ni yitso ji “ Amɛyɛ He Miishɛɛ” lɛ hu.) (b) Mɛɛ gbɛ nɔ oná weku jamɔ lɛ he sɛɛ?

12 Oblayoo ko ni atsɛɔ lɛ Carissa, ni eye afii 19 lɛ kɛ eweku lɛ ená Weku Jamɔ gbɛjianɔtoo lɛ he sɛɛ waa. Ewie akɛ: “Eŋɔɔ minaa akɛ wɔ fɛɛ wɔɔtara shi kɛgba sane. Enɛ hãa wɔbɛŋkɛɔ wɔhe kpaakpa, ni wɔsɛɛ lɛ wɔbaakai nibii ni wɔfeɔ lɛ kɛ miishɛɛ. Mitsɛ hãaa wɔfolɔ wɔgbɛkɛ Weku Jamɔ mli. Ekɛshwɛɛɛ kwraa, ni enɛ hewɔ lɛ, mi hu mikɛshwɛɛɛ kwraa. Agbɛnɛ hu, no hãa mibuɔ lɛ waa akɛ mitsɛ kɛ mɔ ni nyiɛɔ wɔhiɛ yɛ Nyɔŋmɔjamɔ mli.” Oblayoo kroko ni atsɛɔ lɛ Brittney ni eye afii 23 lɛ hu wie akɛ: “Weku jamɔ ehã mibɛŋkɛ mifɔlɔi kpaakpa. Ehãa minaa akɛ amɛsumɔɔ ni amɛle naagbai ni mikɛkpeɔ, ni amɛsusuɔ mihe. Etswaa wɔweku lɛ emaa shi, ni ehãa wɔfeɔ ekome.” Oti titri ni ma fɔlɔi ahiɛ ji, ní amɛtsɔɔ amɛbii lɛ ni amɛsumɔ Yehowa. Weku jamɔ ji gbɛi ni hi fe fɛɛ ni obaanyɛ otsɔ nɔ ofee enɛ lɛ ateŋ ekome. *

NYƐTSƆA NYƐBII LƐ GBƐ

13. Te ooofee tɛŋŋ oye obua obii lɛ ni amɛsɔmɔ Yehowa?

13 Tookwɛlɔ kpakpa lɛ kɛ tso tsɔɔ etooku lɛ gbɛ, ni ebuɔ amɛhe. Oti titri ni ma ehiɛ ji, ni ekɛ etooi lɛ aya “lɛɛhe kpakpa.” (Ezek. 34:13, 14) Akɛ fɔlɔ lɛ, bo hu no nɔŋŋ ji oti ni ma ohiɛ. Ootao otsɔɔ obii lɛ ní amɛsɔmɔ Yehowa. Ootao ni obii lɛ ajɛ amɛsuɔmɔ mli amɛjá Nyɔŋmɔ taakɛ lalatsɛ lɛ wie lɛ. Ewie akɛ: “Mi-Nyɔŋmɔ, eŋɔɔ minaa akɛ mafee osuɔmɔnaa nii ni omla lɛ yɛ mitsui mli.” (Lala 40:9) Kɛ́ obii lɛ hu nu he nakai lɛ, no baahã amɛjɔɔ amɛhe nɔ amɛhã Yehowa ni amɛhã abaptisi amɛ. Ehe miihia ni amɛnu nibii ashishi jogbaŋŋ dani amɛkpɛ yiŋ ni he hiaa nɛɛ, ni esa akɛ amɛ diɛŋtsɛ amɛnu he akɛ amɛmiisumɔ ni amɛsɔmɔ Yehowa.

14, 15. (a) Mɛni esa akɛ efee oti ni ma fɔlɔi ahiɛ? (b) Mɛni hewɔ ekolɛ oblanyo loo oblayoo ko yiŋ baafee lɛ kɔshikɔshi yɛ anɔkwale lɛ he lɛ?

14 Ekolɛ obii lɛ eyaaa amɛhiɛ yɛ Yehowa sɔɔmɔ mli. Ekolɛ amɛheee amɛyeee po akɛ nɔ ni Yehowa Odasefoi tsɔɔ lɛ ji anɔkwale lɛ. Mɛni obaafee? Okɛ amɛ asusu nii ahe, ni otsɔɔ amɛ ní amɛjɛ amɛtsuiŋ amɛsumɔ Yehowa. Tsɔɔmɔ amɛ ni amɛhiɛ asɔ nɔ fɛɛ nɔ ni Nyɔŋmɔ efee ehã amɛ lɛ. (Kpoj. 4:11) Kɛkɛ lɛ, kɛ́ amɛfee klalo lɛ, amɛ diɛŋtsɛ amɛbaakpɛ amɛyiŋ akɛ amɛbaasɔmɔ Yehowa.

15 Kɛ́ obii lɛ heee yeee akɛ nɔ ni Yehowa Odasefoi heɔ yeɔ lɛ ji anɔkwale lɛ, too otsui shi ni otsɔɔ amɛ gbɛ. Ye obua amɛ ni amɛna akɛ, Yehowa sɔɔmɔ ji gbɛ ni hi  fe fɛɛ, ni sɛɛnamɔi babaoo jɛɔ mli kɛbaa. Agbɛnɛ hu, taomɔ nɔ hewɔ ni amɛyiŋ etɛɛɛ amɛ lɛ. Akɛ nɔkwɛmɔnɔ lɛ, lɛɛlɛŋ akɛ obinuu lɛ ekpɛlɛɛɛ nɔ ni Biblia lɛ tsɔɔ lɛ nɔ, aloo eeshe gbeyei akɛ eeeye gbekɛbii krokomɛi odase? Lɛɛlɛŋ akɛ obiyoo lɛ yiŋ etɛɛɛ lɛ akɛ nilee yɛ Nyɔŋmɔ kitai lɛ amli, aloo enuɔ he akɛ ehe efee shoo, ni mɛi krokomɛi ekpoo lɛ?

Tsɔɔmɔ amɛ gbɛ (Kwɛmɔ kuku 13-18)

16, 17. Mɛɛ gbɛi komɛi anɔ fɔlɔi baanyɛ atsɔ amɛye amɛbua amɛbii ní amɛná amɛ kɛ Yehowa teŋ wekukpaa?

16 Te ooofee tɛŋŋ oye obua obii lɛ koni amɛyiŋ akafee amɛ kɔshikɔshi yɛ anɔkwale lɛ he lɛ? Fɔlɔi pii etsɔ sanebimɔi ni nyiɛ sɛɛ nɛɛ ni amɛbibii amɛbii lɛ anɔ amɛye amɛbua amɛ: “Ani ewa kɛhã bo akɛ ooohi shi akɛ Kristofonyo, aloo eyɛ mlɛo kɛhã bo? Kɛ́ okwɛ lɛ, mɛɛ jɔɔmɔi mɔ ko náa kɛ́ eji Kristofonyo? Kɛ́ mɔ ko miisɔmɔ Yehowa lɛ, mɛɛ nibii ŋmɛɔ lɛ? Te onaa jɔɔmɔi ní wɔnáa amrɔ nɛɛ kɛ nɔ ni wɔbaaná wɔsɛɛ lɛ ohãa tɛŋŋ? Ani amɛhe hiaa fe nibii ni ŋmɛɔ wɔ lɛ?” Jɛɛ otsuiŋ obi saji nɛɛ yɛ bo diɛŋtsɛ owiemɔ mli. Kaahã obii lɛ nu he akɛ ookojo amɛ. Obaanyɛ okɛ amɛ asusu Marko 10:29, 30 lɛ he. Ekolɛ oblahii kɛ oblayei komɛi baaŋmala jɔɔmɔi ni mɔ ko náa akɛ Kristofonyo lɛ, ní amɛŋmala nibii ni ŋmɛɔ mɔ ko akɛ Kristofonyo lɛ hu yɛ afã. Enɛ baaye abua bo kɛ obii lɛ fɛɛ ni nyɛna nɔ ni hãaa amɛya amɛhiɛ, kɛ nɔ ni nyɛbaanyɛ nyɛfee koni amɛya amɛhiɛ. Kɛ́ esa akɛ wɔkɛ mɛi ni yɔɔ wiemɔ lɛ he miishɛɛ lɛ akase Biblia lɛ TsɔɔNyɔŋmɔ Suɔmɔwoji lɛ, enyiɛ nɔŋŋ esaaa akɛ wɔkɛ wɔ diɛŋtsɛ wɔbii lɛ kaseɔ! Ani oofee nakai?

17 Be ni obii lɛ daraa lɛ, esa akɛ amɛ diɛŋtsɛ amɛkpɛ amɛyiŋ kɛji amɛbaajá Yehowa loo amɛjáaa lɛ. Kaasusu akɛ, akɛni okpɛ oyiŋ akɛ obaajá Yehowa hewɔ lɛ, amɛ hu amɛbaafee nakai. Esa akɛ obii lɛ diɛŋtsɛ hu aná amɛ kɛ Yehowa teŋ wekukpaa. (Abɛi 3:1, 2) Ni kɛ́ ewa kɛhã obi lɛ akɛ eeetsi ebɛŋkɛ Nyɔŋmɔ hu? Ye obua lɛ ni ekɛ sanebimɔi ni nyiɛ sɛɛ nɛɛ apɛi nibii ni eheɔ eyeɔ lɛ mli: ‘Te mifeɔ tɛŋŋ mileɔ akɛ Nyɔŋmɔ yɛ lɛɛlɛŋ lɛ? Mɛni tsɔɔ akɛ Yehowa susuɔ mihe lɛɛlɛŋ? Ani miheɔ miyeɔ lɛɛlɛŋ akɛ, kɛ́ mibo Nyɔŋmɔ kitai lɛ atoi lɛ maná he sɛɛ?’ Fɔlɔi, nyɛfea nyɛhe tookwɛlɔi kpakpai, ni nyɛtoa nyɛtsui shi kɛtsɔa nyɛbii lɛ gbɛ. Nyɛyea nyɛbuaa amɛ ni amɛ diɛŋtsɛ amɛna akɛ Yehowa sɔɔmɔ ji gbɛ ni hi fe fɛɛ yɛ shihilɛ mli. *Rom. 12:2.

18. Te fɔlɔi aaafee tɛŋŋ amɛkase Yehowa, ni ji Tookwɛlɔ Kpeteŋkpele lɛ?

18 Anɔkwa Kristofoi fɛɛ miisumɔ ni amɛkase Yehowa, ni ji Tookwɛlɔ Kpeteŋkpele lɛ. (Efe. 5:1; 1 Pet. 2:25) Esa akɛ fɔlɔi titri ale amɛtooku, ni ji amɛ diɛŋtsɛ amɛbii ni amɛsumɔɔ lɛ. Esa akɛ fɔlɔi atsɔɔ amɛbii lɛ gbɛ bɔ ni afee ni amɛbii lɛ anine ashɛ jɔɔmɔi ni Nyɔŋmɔ ewo he shi lɛ anɔ. Bɔɔ mɔdɛŋ ni okwɛ obii lɛ taakɛ tookwɛlɔ feɔ lɛ, ni otsɔse amɛ ni amɛsumɔ Yehowa!

^ kk. 9 Kɛ́ ootao enɛ he saji babaoo lɛ, kwɛmɔ August 1, 2008 Buu-Mɔɔ lɛ, baafa 10-12 lɛ.

^ kk. 12 Kɛ́ ootao ole enɛ he saji babaoo lɛ, kwɛmɔ saneyitso ni ji “Weku Jamɔ—Ehe Miihia Kɛha Yibaamɔ!” ni je kpo yɛ October 15, 2009 Buu-Mɔɔ lɛ, baafa 29-31 lɛ.

^ kk. 17 Kɛ́ ootao enɛ he saji babaoo lɛ, kwɛmɔ February 1, 2012 Buu-Mɔɔ lɛ, baafa 18-21 lɛ.