Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  August 2014

Ani Ooná ‘Niyenii yɛ Be ni Sa Mli’?

Ani Ooná ‘Niyenii yɛ Be ni Sa Mli’?

BEI ni wɔyɔɔ mli lɛ ji jaramɔ bei fe bei fɛɛ ni eho. (2 Tim. 3:1-5) Daa gbi lɛ, wɔkɛ shihilɛi ni hãa ewaa kɛhãa wɔ akɛ wɔɔya nɔ wɔsumɔ Yehowa, ni wɔhiɛ wɔfai shi ni wɔtswa akɛ wɔbaaye lɛ anɔkwa lɛ mli lɛ kpeɔ. Yesu tsɔ hiɛ ena enɛ, ni ewo esɛɛnyiɛlɔi lɛ shi akɛ, abaawo amɛ hewalɛ ni amɛya nɔ amɛfi shi kɛyawula shi. (Mat. 24:3, 13; 28:20) Enɛ hewɔ lɛ, ehala nyɔŋ anɔkwafo ko koni ehã amɛ mumɔŋ ‘niyenii yɛ be ni sa mli.’Mat. 24:45, 46.

Kɛjɛ afi 1919 ni ahala nyɔŋ anɔkwafo lɛ, abua Nuŋtsɔ lɛ ‘webii’ akpekpei abɔ naa kɛjɛ wiemɔi srɔtoi fɛɛ mli kɛba Nyɔŋmɔ gbɛjianɔtoo lɛ mli, ni aalɛ amɛ yɛ mumɔŋ. (Mat. 24:14; Kpoj. 22:17) Kɛ̃lɛ, jeee wiemɔ fɛɛ wiemɔ mli atsɔɔ wɔwoji kɛ nibii krokomɛi lɛ ashishi kɛtee, ni jeee mɔ fɛɛ mɔ nyɛɔ enáa nibii ni akɛwoɔ Intanɛt lɛ nɔ lɛ. Akɛ nɔkwɛmɔnɔ lɛ, mɛi pii anine shɛɛɛ vidioi kɛ saji ni yɔɔ jw.org nɔ pɛ lɛ eko nɔ. Shi ani enɛ tsɔɔ akɛ mɛi komɛi anine shɛɛɛ niyenii ni baahã amɛhe awa yɛ mumɔŋ lɛ ekomɛi anɔ? Bɔ ni afee ni wɔna sane nɛɛ naa lɛ, hã wɔsusu sanebimɔi ejwɛ komɛi ahe wɔkwɛ.

 1. Mɛni ji nɔ titri ni akɛhoɔ mumɔŋ niyenii ni wɔnáa kɛjɛɔ Yehowa ŋɔɔ lɛ?

Be ni Satan ka Yesu koni etsɔ tɛi aboloo lɛ, Yesu kɛɛ lɛ akɛ: “Jeee aboloo kɛkɛ hãa gbɔmɔ yi naa wala; shi moŋ wiemɔ fɛɛ wiemɔ ni jɛɔ Nyɔŋmɔ daaŋ lɛ.” (Mat. 4:3, 4) Yehowa wiemɔi lɛ yɛ Biblia lɛ mli. (2 Pet. 1:20, 21) No hewɔ lɛ, Biblia lɛ ji nɔ titri ni akɛhoɔ mumɔŋ niyenii lɛ.2 Tim. 3:16, 17.

Yehowa gbɛjianɔtoo lɛ ekala New World Translation of the Holy Scriptures muu lɛ fɛɛ loo efã ko yɛ wiemɔi ni fa fe 120 mli, ni daa afi lɛ akalaa yɛ wiemɔi krokomɛi hu amli. Kɛfata he lɛ, Biblia shishitsɔɔlɔi krokomɛi hu ekala Biblia muu lɛ fɛɛ loo efã ko akpekpe toi akpei abɔ yɛ wiemɔi akpei abɔ mli. Enɛ kɛ Yehowa suɔmɔnaa nii akɛ, “ehere gbɔmɛi fɛɛ yiwala, koni amɛshɛ anɔkwale lɛ lee mli” lɛ kpaa gbee. (1 Tim. 2:3, 4) Ni akɛni “ateee bɔɔ nɔ ko yɛ [Yehowa hiɛ]” hewɔ lɛ, wɔbaanyɛ wɔná nɔmimaa akɛ ebaagbala ‘mɛi ni hiɛ yɔɔ amɛmumɔŋ hiamɔ nii anɔ lɛ’ kɛba egbɛjianɔtoo lɛ mli, ní elɛ amɛ yɛ mumɔŋ.Heb. 4:13; Mat. 5:3, 6; Yoh. 6:44; 10:14.

2. Mɛɛ gbɛ nɔ wɔwoji kɛ nibii krokomɛi ni wɔfeɔ lɛ hãa wɔnáa mumɔŋ niyenii?

Jeee Biblia lɛ ni mɔ ko baakane lɛ pɛ ji nɔ ni baahã mɔ lɛ aná hemɔkɛyeli ni mli wa. Esa akɛ enu nɔ ni ekaneɔ lɛ shishi, ni ekɛtsu nii hu. (Yak. 1:22-25) Yɛ klɛŋklɛŋ afii 100 lɛ mli lɛ, Etiopia piafonyo ko na nɔ hewɔ ni enɛ he hiaa lɛ. No mli lɛ, eekane Nyɔŋmɔ Wiemɔ lɛ, ni Filipo bi lɛ akɛ: “Ani oonu nɔ ni okaneɔ lɛ shishi lo?” Piafonyo lɛ hã lɛ hetoo akɛ: “Te mafee tɛŋŋ ni manyɛŋ, akɛ ja mɔ ko tsɔɔ mi?” (Bɔf. 8:26-31) Filipo ye ebua piafonyo lɛ ni ená anɔkwa nilee kɛjɛ Nyɔŋmɔ Wiemɔ lɛ mli. Nɔ ni piafonyo lɛ kase lɛ ta etsuiŋ aahu akɛ ehã abaptisi lɛ. (Bɔf. 8:32-38) Nakai nɔŋŋ wɔwoji kɛ nibii ni damɔ Biblia lɛ nɔ lɛ yeɔ ebuaa wɔ ni wɔnáa anɔkwa nilee. Amɛtaa wɔtsuiŋ, ni amɛtsirɛɔ wɔ ní wɔkɛ nɔ ni wɔkaseɔ lɛ atsu nii.Kol. 1:9, 10.

Yehowa webii náa mumɔŋ nibii kpakpai babaoo amɛyeɔ kɛjɛɔ woji kɛ nibii krokomɛi ni afeɔ lɛ amli. (Yes. 65:13) Akɛ nɔkwɛmɔnɔ lɛ, akalaa Buu-Mɔɔ lɛ yɛ wiemɔi ni fa fe 210 mli, ni egbalaa Biblia mli gbalɛi amli, eyeɔ ebuaa wɔ ni wɔnuɔ anɔkwalei ni shishinumɔ wala lɛ ashishi, ni ewajeɔ wɔ ni wɔhiɔ shi yɛ Biblia mli shishitoo mlai anaa. Akalaa Awake! wolo tɛtrɛɛ lɛ hu yɛ wiemɔi aaafee 100 mli, ehãa wɔleɔ Yehowa adebɔɔ nibii lɛ ahe saji babaoo, ni etsɔɔ wɔ bɔ ni wɔɔfee wɔkɛ Biblia mli ŋaawoi atsu nii. (Abɛi 3:21-23; Rom. 1:20) Nyɔŋ anɔkwafo lɛ hãa wɔnine shɛɔ woji kɛ nibii anɔ yɛ wiemɔi ni fa fe 680 mli! Ani otoɔ gbɛjianɔ kɛkaneɔ Biblia lɛ gbi fɛɛ gbi? Ani okaneɔ woji tɛtrɛbii lɛ ni baa daa nyɔɔŋ kɛ woji ni ajieɔ amɛ kpo yɛ owiemɔ mli daa afi lɛ eko fɛɛ eko?

Yɛ woji kɛ nibii ni Yehowa gbɛjianɔtoo lɛ feɔ lɛ sɛɛ lɛ, akalaa wiemɔhamɔ he woji ni damɔ Biblia lɛ nɔ, ni akɛhãa wiemɔi yɛ asafoŋ kpeei, kpeei bibii, kɛ kpeei wuji ashishi. Ani onyaa wiemɔi ni ahãa, drama, nɔkwɛmɔnii, kɛ saji ni abibiɔ mɛi yɛ henaabuamɔi nɛɛ ashishi lɛ ahe? Yehowa ŋmɛɔ wɔ mumɔŋ okpɔlɔ lɛɛlɛŋ!Yes. 25:6.

 3. Kɛ́ obɛ woji kɛ nibii krokomɛi ni afeɔ lɛ ekomɛi yɛ owiemɔ mli lɛ, ani ohe waŋ yɛ mumɔŋ?

Dabi. Esaaa akɛ wɔnaa kpɛɔ wɔhe akɛ bei komɛi lɛ, Yehowa webii komɛi náa mumɔŋ niyenii babaoo fe mɛi krokomɛi. Mɛni hewɔ? Susumɔ Yesu bɔfoi lɛ ahe okwɛ. Amɛnine shɛ gbɛtsɔɔmɔi babaoo nɔ fe kaselɔi krokomɛi ni hi shi yɛ klɛŋklɛŋ afii 100 lɛ mli lɛ. (Mar. 4:10; 9:35-37) Fɛɛ sɛɛ lɛ, kaselɔi krokomɛi lɛ anine shɛ nɔ ni he hiaa amɛ lɛ nɔ; amɛgbɔjɔɔɔ yɛ mumɔŋ.Efe. 4:20-24; 1 Pet. 1:8.

Nɔ ko hu ni sa kadimɔ waa ji akɛ, nibii ni Yesu wie kɛ nibii ni efee lɛ babaoo yɛ ni aŋmalako yɛ Sanekpakpai lɛ amli. Bɔfo Yohane ŋma akɛ: “Shi nii krokomɛi pii hu yɛ ni Yesu fee, ni kɛji akɛɛ aaaŋma fɛɛ ekomekome lɛ, misusuɔ akɛ je lɛ diɛŋtsɛ nyɛŋ woji ni kulɛ aaaŋma lɛ ato.” (Yoh. 21:25) Eyɛ mli akɛ Yesu kaselɔi ni hi shi yɛ klɛŋklɛŋ afii 100 lɛ mli lɛ le bɔ ni Yesu fee enii ehã akɛ nuu ni eye emuu lɛ fe wɔ moŋ, kɛ̃lɛ nɔ ko eŋmɛɛɛ wɔ. Yehowa ekwɛ ni wɔnine eshɛ nibii ni he hiaa ni kɔɔ Yesu he lɛ anɔ bɔ ni afee ni wɔnyɛ wɔnyiɛ enanemaahei lɛ asɛɛ.1 Pet. 2:21.

Susumɔ woji ni bɔfoi lɛ ŋmala klɛŋklɛŋ afii 100 lɛ mli asafoi lɛ he okwɛ. Kɛ́ hooo kwraa lɛ, woji ni Paulo ŋmala lɛ ateŋ ekome bɛ Biblia lɛ mli. (Kol. 4:16) Shi ani mumɔŋ niyenii ni wɔnine shɛɔ nɔ lɛ faaa hãaa wɔ akɛni wɔbɛ nakai wolo lɛ hewɔ? Dabi. Yehowa le nɔ ni he hiaa wɔ, ni ehã wɔ niyenii bɔ ni sa ni baahã wɔhe awa yɛ mumɔŋ.Mat. 6:8.

Yehowa le nɔ ni he hiaa wɔ, ni ehã wɔ niyenii bɔ ni sa ni baahã wɔhe awa yɛ mumɔŋ

Ŋmɛnɛ lɛ, Yehowa tsuji lɛ ekomɛi náa mumɔŋ niyenii babaoo fe mɛi krokomɛi. Ani woji fioo komɛi pɛ yɔɔ owiemɔ mli? Kɛ́ nakai ni lɛ, ná nɔmimaa akɛ Yehowa susuɔ ohe. Kasemɔ woji ni ayɔɔ yɛ owiemɔ mli lɛ, ni kɛ́ eeehi lɛ, yaa kpeei ni afeɔ yɛ wiemɔ ni onuɔ shishi lɛ mli. Ni ná nɔmimaa akɛ Yehowa baahã ohe awa yɛ mumɔŋ.Lala 1:2; Heb. 10:24, 25.

4. Kɛ́ onyɛɛɛ oya intanɛt lɛ nɔ ní okane loo okwɛ nibii ni yɔɔ jw.org Wɛb saiti lɛ nɔ lɛ, ani obaagbɔjɔ yɛ mumɔŋ?

Akɛ wɔwoji tɛtrɛbii lɛ kɛ woji krokomɛi ni akɛkaseɔ Biblia lɛ ewo wɔ-Wɛb saiti lɛ nɔ. Nibii yɛ wɔ-Wɛb saiti lɛ nɔ ni baanyɛ aye abua gbalashihilɛ mli bii, oblahii kɛ oblayei, kɛ mɛi ni yɔɔ bii bibii. Kɛ́ wekui susu nibii ni yɔɔ jɛmɛ lɛ eko he yɛ amɛ-Weku Jamɔ mli lɛ, amɛnáa he sɛɛ waa. Kɛfata he lɛ, wɔ-Wɛb saiti lɛ bɔɔ nifeemɔi krɛdɛi tamɔ Gilead Skul lɛ naagbee nifeemɔi kɛ daa afi kpee lɛ he amaniɛ, ni ehãa wɔnyɛmimɛi ni yɔɔ jeŋ fɛɛ lɛ leɔ saji ni kɔɔ adebɔɔ naa osharai ni esa Yehowa webii ahe kɛ Yehowa webii asaji ni ayeɔ yɛ saneyelihei lɛ he. (1 Pet. 5:8, 9) Kɛfata he lɛ, wɔ-Wɛb saiti lɛ yeɔ ebuaa waa yɛ shiɛmɔ nitsumɔ lɛ mli, ni ehãa sane kpakpa lɛ yashɛɔ maji ni agu wɔnitsumɔ lɛ loo atsĩ wɔnaa yɛ jɛmɛ lɛ po anɔ.

Kɛ̃lɛ, kɛ́ onyɛɔ oyaa wɔ-Wɛb saiti lɛ nɔ jio, onyɛɛɛ oya nɔ jio lɛ, ohe baanyɛ awa yɛ mumɔŋ. Nyɔŋ lɛ bɔɔ mɔdɛŋ waa ekalaa woji babaoo koni anyɛ alɛ Nuŋtsɔ lɛ webii lɛ ateŋ mɔ fɛɛ mɔ jogbaŋŋ yɛ mumɔŋ. No hewɔ lɛ, kɛ́ onyɛɛɛ oya jw.org Wɛb saiti lɛ nɔ yɛ kɔmpiuta kɛ ehenɔi lɛ eko ni obɛ lɛ hewɔ lɛ, ejeee doo akɛ oyahe eko. Mɛi komɛi baanyɛ ato gbɛjianɔ koni amɛprinti nibii ni yɔɔ wɔ-Wɛb saiti lɛ nɔ lɛ ekomɛi amɛhã mɛi ni nyɛŋ aya Intanɛt lɛ nɔ lɛ, shi ejeee doo akɛ asafo lɛ afee nakai.

Eŋɔɔ wɔnaa akɛ Yesu miiye shi ni ewo akɛ ebaahã wɔ wɔmumɔŋ hiamɔ nii lɛ nɔ. Be ni naagbee gbii ni jaraa nɛɛ baa enaagbee oyayaayai lɛ, wɔbaanyɛ wɔná nɔmimaa akɛ Yehowa baaya nɔ ehã wɔ mumɔŋ ‘niyenii yɛ be ni sa mli.’