Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) JUNE 2014

“Esa akɛ Osumɔ Onaanyo Gbɔmɔ Tamɔ Bo Diɛŋtsɛ Ohe”

“Esa akɛ Osumɔ Onaanyo Gbɔmɔ Tamɔ Bo Diɛŋtsɛ Ohe”

“[Kitã] ni ji enyɔ lɛ . . . ji: ‘Esa akɛ osumɔ onaanyo gbɔmɔ tamɔ bo diɛŋtsɛ ohe.’”—MAT. 22:39, NW.

1, 2. (a) Te kitãi lɛ ateŋ nɔ ni Yesu kɛɛ no ji Mla lɛŋ kitã ni ji enyɔ ni he hiaa fe fɛɛ lɛ? (b) Mɛɛ sanebimɔi ahe wɔbaasusu?

BE KO lɛ, Farisifonyo ko ni miitao eka Yesu lɛ bi lɛ akɛ: “Tsɔɔlɔ, te Mla lɛŋ kitãi lɛ ateŋ nɔ ni he hiaa fe fɛɛ lɛ?” Taakɛ wɔna yɛ nikasemɔ ni tsɔ hiɛ lɛ mli lɛ, Yesu to he ehã lɛ akɛ, “kitãi lɛ ateŋ nɔ ni he hiaa fe fɛɛ” ji: “Esa akɛ osumɔ Yehowa o-Nyɔŋmɔ lɛ kɛ otsui muu fɛɛ, kɛ osusuma muu fɛɛ, kɛ ojwɛŋmɔ muu fɛɛ.” Yesu kɛfata he akɛ: “Nɔ ni ji enyɔ lɛ tamɔ no, ni no ji: ‘Esa akɛ osumɔ onaanyo gbɔmɔ tamɔ bo diɛŋtsɛ ohe.’”Mat. 22:34-39, NW.

2 Yesu kɛɛ esa akɛ wɔsumɔ wɔnaanyo gbɔmɔ tamɔ wɔ diɛŋtsɛ wɔhe. No hewɔ lɛ, esa akɛ wɔbi wɔhe akɛ: Namɔ tuuntu ji wɔnaanyo gbɔmɔ? Te wɔɔfee tɛŋŋ wɔsumɔ wɔnaanyo gbɔmɔ?

NAMƆ TUUNTU JI WƆNAANYO GBƆMƆ?

3, 4. (a) Mɛɛ abɛbua Yesu kɛhã sanebimɔ ni ji: “Namɔ ji minaanyo?” lɛ hetoo? (b) Mɛɛ gbɛ nɔ Samarianyo lɛ ye ebua nuu ní atswa lɛ ojo, ayi lɛ, ni ashi lɛ ni egbo fã-kɛ-fã lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

3 Kɛ́ akɛɛ naanyo lɛ, ekolɛ mɔ ni baaba wɔjwɛŋmɔŋ ji, mɔ ko ni bɛŋkɛ wɔ ni wɔkɛbɔɔ ni yeɔ ebuaa wɔ. (Abɛi 27:10) Shi  susumɔ nɔ ni Yesu wie be ni nuu ko ni buɔ ehe jalɔ lɛ bi lɛ akɛ: “Namɔ ji minaanyo?” lɛ he okwɛ. Yesu kɛ abɛbua ni kɔɔ Samarianyo lɛ he lɛ hã lɛ hetoo. (Nyɛkanea Luka 10:29-37.) Kulɛ esa akɛ Israel osɔfo lɛ kɛ Levinyo lɛ moŋ aye abua nuu ni atswa lɛ ojo, ayi lɛ, ni ashi lɛ ni egbo fã-kɛ-fã lɛ. Shi be ni amɛna nuu lɛ, amɛtsɔ ehe kɛho ni amɛyeee amɛbuaaa lɛ. Samarianyo ko moŋ baye ebua lɛ. Nakai beaŋ lɛ, Yudafoi lɛ kɛ Samariabii lɛ yeee.Yoh. 4:9.

4 Samarianyo lɛ kɛ mu kɛ wein to nuu lɛ faji lɛ anɔ, koni efaji lɛ agboi oya. Kɛkɛ ni ekɛ lɛ tee gbɔiatoohe, ni ehã gbɔiatoohetsɛ lɛ denarioi enyɔ, ni ji gbii enyɔ nyɔmɔwoo koni akɛkwɛ lɛ. (Mat. 20:2) No hewɔ lɛ, eyɛ faŋŋ akɛ Samarianyo lɛ ji mɔ tuuntu ni tsɔɔ akɛ eji nuu ni apila lɛ lɛ naanyo. Yesu abɛbua lɛ hãa wɔnaa akɛ, esa akɛ wɔmusuŋ atsɔ wɔ yɛ wɔnaanyo gbɔmɔ he, ni wɔsumɔ lɛ.

Yehowa tsuji sumɔɔ amɛnaanyo gbɔmɔ (Kwɛmɔ kuku 5)

5. Be ni adebɔɔ naa oshara ko ba nyɛsɛɛ nɛɛ, mɛni Yehowa tsuji fee kɛtsɔɔ akɛ amɛsumɔɔ amɛnaanyo gbɔmɔ?

5 Bei pii lɛ, ewa akɛ obaana mɔ ko ni jieɔ musuŋtsɔlɛ kpo tamɔ Samarianyo lɛ, titri lɛ, yɛ “naagbee gbii” ni jaraa ni mɛi babaoo edɔɔɔ mɛi ahe, amɛhiɛ yɛ laŋlaŋ, ni amɛsumɔɔɔ ekpakpa nɛɛ amli. (2 Tim. 3:1-3) Akɛ nɔkwɛmɔnɔ lɛ, kɛ́ adebɔɔ naa oshara ko ba lɛ, ebaanyɛ ehã mɛi ahe afĩ amɛ waa. Susumɔ nɔ ni ba be ni lasuogbele ko ni atsɛɔ lɛ Hurricane Sandy lɛ fite nii waa yɛ New York City yɛ October 2012 naagbee gbɛ lɛ he okwɛ. Yɛ maŋtiase nɛɛ mli he ko lɛ, mɛi ni yɔɔ jɛmɛ lɛ náaa sarawa hewalɛ, fɛ̃i ye amɛ, ni amɛnáaa nibii krokomɛi hu ni he hiaa amɛ lɛ. Shi amane ni amɛnaa nɛɛ fɛɛ sɛɛ lɛ, mɛi komɛi hu yaloo amɛnibii kɛjo foi. Yɛ nakai akutso lɛ nɔŋŋ mli lɛ, Yehowa Odasefoi to gbɛjianɔ ni amɛye amɛbua amɛnyɛmimɛi lɛ kɛ mɛi krokomɛi hu. Nɔ hewɔ ni Kristofoi feɔ enɛ ji, amɛsumɔɔ amɛnaanyo gbɔmɔ. Mɛɛ gbɛi krokomɛi anɔ wɔbaanyɛ wɔtsɔ wɔtsɔɔ akɛ wɔsumɔɔ wɔnaanyo gbɔmɔ?

BƆ NI WƆƆFEE WƆSUMƆ WƆNAANYO GBƆMƆ

6. Mɛɛ gbɛ nɔ shiɛmɔ nitsumɔ lɛ tsɔɔ akɛ wɔsumɔɔ wɔnaanyo gbɔmɔ?

6 Jɛɛ Biblia lɛ mli oye obua mɛi. Wɔkɛ “ŋmalɛi lɛ amli miishɛjemɔ lɛ” shɛjeɔ mɛi amii yɛ shiɛmɔ nitsumɔ lɛ mli. (Rom. 15:4) Kɛ́ wɔgba mɛi Biblia mli anɔkwale lɛ yɛ shiɛmɔ nitsumɔ lɛ mli lɛ, no tsɔɔ akɛ wɔsumɔɔ wɔnaanyo gbɔmɔ. (Mat. 24:14) Kwɛ hegbɛ kpele ni wɔná akɛ wɔmiijaje Maŋtsɛyeli lɛ he sane ni jɛ “nɔhiɛkamɔ Nyɔŋmɔ lɛ” ŋɔɔ lɛ!Rom. 15:13.

7. Mɛɛ ŋaa Yesu wo yɛ Mateo 7:12 lɛ, ni kɛ́ wɔbo toi lɛ, mɛɛ jɔɔmɔ wɔbaaná?

7 Okɛ ŋaa ni Yesu wo yɛ Mateo 7:12 lɛ atsu nii. Yesu wie yɛ e-Gɔŋ nɔ Shiɛmɔ lɛ mli akɛ: “Nɔ fɛɛ nɔ ni nyɛtaoɔ akɛ mɛi aŋɔfee nyɛ lɛ, nyɛ hu nyɛfea amɛ nakai nɔŋŋ; ejaakɛ enɛ ji mla lɛ kɛ gbalɔi lɛ.” (Mat. 7:12) Kɛ́ wɔkɛ mɛi ye taakɛ Yesu tsɔɔ lɛ, belɛ wɔmiihi shi yɛ shishitoo mla ni yɔɔ “mla lɛ” (1 Mose kɛyashi 5 Mose) kɛ “gbalɔi lɛ” (gbalɛ woji ni yɔɔ Hebri Ŋmalɛi lɛ amli lɛ) mli lɛ naa. Nakai woji lɛ hãa wɔnaa akɛ, Nyɔŋmɔ jɔɔ mɛi ni sumɔɔ mɛi krokomɛi lɛ. Akɛ nɔkwɛmɔnɔ lɛ, Yehowa tsɔ gbalɔ Yesaia nɔ ni egba akɛ: “Nyɛyea kojomɔ nɔ, ni nyɛfea jalɛ nii. . . . Ajɔɔ adesa ní feɔ enɛ lɛ.” (Yes. 56:1, 2) Kɛ́ wɔsumɔ wɔnaanyo gbɔmɔ ni wɔbo ŋaa ni Yesu wo yɛ Mateo 7:12 lɛ toi lɛ, wɔbaaná jɔɔmɔi babaoo.

8. Mɛni hewɔ esa akɛ wɔsumɔ wɔhenyɛlɔi? Kɛ́ wɔfee nakai lɛ, mɛni baanyɛ ajɛ mli kɛba?

8 Suɔmɔ ohenyɛlɔi. Yesu wie akɛ: “Nyɛnu akɛ, akɛɛ akɛ: ‘Suɔmɔ onaanyo,’ ni onyɛ ohenyɛlɔ. Shi mi lɛ, miikɛɛ  nyɛ akɛ: Nyɛsumɔa nyɛhenyɛlɔi, nyɛjɔa mɛi ni lomɔɔ nyɛ, nyɛfea mɛi ni nyɛɔ nyɛ lɛ ekpakpa, ni nyɛsɔlea nyɛhaa mɛi ni haoɔ nyɛ ni amɛwaa nyɛ yi lɛ; koni nyɛtsɔmɔ nyɛtsɛ ni yɔɔ ŋwɛi lɛ bii.” (Mat. 5:43-45) Bɔfo Paulo wie nɔ ko ni tamɔ nakai nɔŋŋ be ni eŋma akɛ: “Kɛji hɔmɔ miiye ohenyɛlɔ lɛ, hã lɛ nii eye; kɛji kumai miiye lɛ lɛ, hã lɛ nu enu” lɛ. (Rom. 12:20; Abɛi 25:21) Mose Mla lɛ bi ni kɛji Israelnyo ko yana ni ehenyɛlɔ ko kooloo jatsu tsii fe lɛ lɛ, efata ehenyɛlɔ lɛ he kɛwo kooloo lɛ nɔ. (2 Mose 23:5) Eeenyɛ efee akɛ, gbɛtsɔɔmɔ nɛɛ ni amɛkɛtsu nii lɛ ye ebua mɛi komɛi ní kulɛ amɛji henyɛlɔi lɛ, ni amɛbatsɔmɔ nanemɛi kpakpai. Akɛni wɔsumɔɔ mɛi hewɔ lɛ, wɔhenyɛlɔi lɛ babaoo etsake bɔ ni amɛkɛ wɔ yeɔ amɛhãa lɛ. Kɛ́ wɔsumɔ wɔhenyɛlɔi—ní mɛi ni waa wɔ yi lɛ po fata he lɛ—wɔbaaná miishɛɛ waa kɛji amɛteŋ mɛi komɛi batsɔmɔ anɔkwa Kristofoi!

9. Mɛni Yesu kɛɛ wɔfee kɛ́ béi ba wɔ kɛ wɔnyɛmimɛi ateŋ?

9 “Nyɛtiua nyɛkɛ mɛi fɛɛ ateŋ hejɔlɛ sɛɛ.” (Heb. 12:14) Eji anɔkwale akɛ, wɔnyɛmimɛi Kristofoi lɛ fata mɛi fɛɛ ni esa akɛ wɔkɛhi shi yɛ toiŋjɔlɛ mli lɛ ahe, ejaakɛ Yesu wie akɛ: “Kɛji okɛ onɔkeenɔ lɛ baaŋmɛ afɔleshaa latɛ lɛ nɔ, ni okai yɛ jɛi akɛ onyɛmi kɛo teŋ yɛ sane ko lɛ, shi onɔkeenɔ lɛ yɛ jɛi yɛ afɔleshaa latɛ lɛ hiɛ ní oya okɛ onyɛmi lɛ ayakpata dã, koni oba ní okɛ onɔkeenɔ lɛ abahã.” (Mat. 5:23, 24) Kɛ́ wɔsumɔɔ wɔnyɛmi, ni wɔsaa béi ni yɔɔ wɔkɛ lɛ teŋ amrɔ nɔŋŋ lɛ, Yehowa baajɔɔ wɔ.

10. Mɛni hewɔ esaaa akɛ wɔtaoɔ nyɛmimɛi ahe tɔmɔi lɛ?

10 Kaatao nyɛmimɛi ahe tɔmɔi. Yesu wie akɛ: “Nyɛkakojoa, koni akakojo nyɛ. Shi nɔ kojomɔ ni nyɛŋɔkojoɔ lɛ, aaaŋɔkojo nyɛ; ni nɔ susumɔnɔ ni nyɛŋɔsusuɔ lɛ, aaaŋɔsusu ahã nyɛ. Shi mɛɛba onaa kuli ni yɔɔ onyɛmi hiŋmɛi mli lɛ, shi bo diɛŋtsɛ ohiŋmɛi mli mplaŋ lɛ, oyooo lɛ? Aloo té aaafee tɛŋŋ ni oookɛɛ onyɛmi akɛ: Hã majie kuli lɛ yɛ ohiŋmɛi mli, tsɛ mplaŋ yɛ bo diɛŋtsɛ ohiŋmɛi mli. Osatofo, jiemɔ mplaŋ lɛ yɛ bo diɛŋtsɛ ohiŋmɛi mli tsutsu, ni no dani ooona faŋŋ ni ojie kuli lɛ yɛ onyɛmi lɛ hiŋmɛi mli.” (Mat. 7:1-5) Nɔ ni wɔkaseɔ yɛ enɛ mli ji akɛ, esaaa akɛ kɛ́ wɔnyɛmimɛi tɔ̃ wɔnɔ lɛ, wɔwieɔ he nyanyaanya, ejaakɛ wɔ hu wɔtɔ̃ɔ babaoo.

 GBƐ NI FE FƐƐ NI WƆƆTSƆ NƆ WƆSUMƆ WƆNAANYO GBƆMƆ

11, 12. Mɛni ji gbɛ ni fe fɛɛ ni wɔtsɔɔ nɔ wɔsumɔɔ wɔnaanyo gbɔmɔ?

11 Gbɛi babaoo yɛ ni wɔbaanyɛ wɔtsɔ nɔ wɔsumɔ wɔnaanyo gbɔmɔ. Gbɛ ni fe fɛɛ ni wɔbaanyɛ wɔtsɔ nɔ wɔfee enɛ ji, ni wɔshiɛ Maŋtsɛyeli lɛ he sane kpakpa lɛ wɔhã amɛ, taakɛ Yesu fee lɛ. (Luka 8:1) Yesu fã esɛɛnyiɛlɔi lɛ ni ‘amɛfee jeŋmaji fɛɛ ekaselɔi.’ (Mat. 28:19, 20) Kɛ́ wɔbo Yesu fãmɔ nɛɛ toi lɛ, wɔbaaye wɔbua mɛi koni amɛshi gbɛ ni lɛɛ kɛ gbɛ tɛtrɛɛ ni kɛ mɔ yaa hiɛkpatamɔ mli lɛ nɔ, ní amɛbanyiɛ gbɛ ni etsa ni kɛ mɔ yaa naanɔ wala mli lɛ nɔ. (Mat. 7:13, 14) Ŋwanejee ko bɛ he akɛ, Yehowa baajɔɔ wɔmɔdɛŋbɔi lɛ anɔ.

12 Taakɛ Yesu fee lɛ, wɔ hu wɔbaanyɛ wɔye wɔbua mɛi koni amɛbasumɔ Yehowa. (Mat. 5:3) Kɛ́ amɛbo wɔ toi lɛ, wɔbaanyɛ wɔye wɔbua amɛ ni amɛtsi amɛbɛŋkɛ Yehowa kɛtsɔ “Nyɔŋmɔ sane kpakpa lɛ” ni wɔɔshiɛ wɔhã amɛ lɛ nɔ. (Rom. 1:1) Kɛ́ mɛi bo Maŋtsɛyeli lɛ he sane lɛ toi lɛ, atsɔɔ Yesu Kristo nɔ akpataa amɛ kɛ Nyɔŋmɔ teŋ. (2 Kor. 5:18, 19) Sane kpakpa lɛ ni wɔshiɛɔ lɛ ji gbɛ ni he hiaa fe fɛɛ ni wɔtsɔɔ nɔ wɔsumɔɔ wɔnaanyo gbɔmɔ.

13. Te onaa nitsumɔ ni fe fɛɛ ni otsuɔ akɛ Maŋtsɛyeli jajelɔ lɛ ohãa tɛŋŋ?

13 Kɛ́ wɔfee sɛɛkuukɛsaramɔi kɛ Biblia mli nikasemɔi ni mɔɔ shi lɛ, wɔyeɔ wɔbuaa mɛi ni amɛhiɔ shi yɛ Nyɔŋmɔ jalɛ shishitoo mlai lɛ anaa, ni enɛ hãa wɔtsui nyɔɔ wɔmli. Ekolɛ enɛ baahã Biblia mli nikaselɔ lɛ atsake ejeŋba. (1 Kor. 6:9-11) Anɔkwa, kɛ́ wɔna bɔ ni Nyɔŋmɔ eye ebua mɛi “ni hiɛ su kpakpa ni baanyɛ ahã amɛná naanɔ wala,” ni amɛtsake, ni amɛbatsɔmɔ enanemɛi lɛ, wɔtsui nyɔɔ wɔmli waa. (Bɔf. 13:48, NW) Amɛteŋ mɛi babaoo ni kulɛ amɛbɛ hiɛnɔkamɔ ko lɛ náa miishɛɛ, ni mɛi ni kulɛ amɛfee yeyeeye lɛ hu kɛ amɛhiɛ fɔ̃ɔ Yehowa nɔ. Kwɛ bɔ ni ehi akɛ wɔɔna ni mɛi hei lɛ miiya amɛhiɛ yɛ mumɔŋ! Eji hegbɛ kpele ni wɔná akɛ wɔɔsumɔ wɔnaanyo gbɔmɔ kɛtsɔ nitsumɔ ni fe fɛɛ ni wɔtsuɔ akɛ Maŋtsɛyeli jajelɔi lɛ nɔ.

PAULO TSƆƆ NƆ NI SUƆMƆ JI

14. Te Paulo tsɔɔ suɔmɔ mli ehã tɛŋŋ yɛ 1 Korintobii 13:4-8 lɛ?

14 Kɛ́ wɔsumɔɔ wɔnaanyo gbɔmɔ taakɛ Paulo tsɔɔ lɛ, wɔbaatsĩ naagbai pii anaa, wɔbaaná miishɛɛ, ni Nyɔŋmɔ baajɔɔ wɔ hu. (Nyɛkanea 1 Korintobii 13:4-8.) Nyɛhãa wɔsusua nɔ ni Paulo wie yɛ suɔmɔ he lɛ he, ni wɔkwɛ bɔ ni wɔɔfee wɔkɛ nɔ ni ewie lɛ atsu nii koni wɔsumɔ wɔnaanyo gbɔmɔ tamɔ wɔ diɛŋtsɛ wɔhe.

15. (a) Mɛni hewɔ esa akɛ wɔto wɔtsui shi ni wɔmli ahi? (b) Mɛni hewɔ esaaa akɛ wɔshwãa loo wɔfeɔ pupuupu?

15 “Suɔmɔ toɔ etsui shi, emli hi.” Taakɛ Nyɔŋmɔ toɔ etsui shi ehãa wɔ, ni emli hi yɛ wɔnɔ yɛ emuu ni wɔyeee lɛ fɛɛ sɛɛ lɛ, nakai nɔŋŋ kɛ́ mɛi tɔ̃ wɔnɔ loo amɛkɛ wɔ ye yɛ gbɛ ni esaaa nɔ po lɛ, esa akɛ wɔ hu wɔto wɔtsui shi wɔhã amɛ ni wɔmli ahi yɛ amɛnɔ. “Suɔmɔ he tsɛ̃ɛɛ mɔ,” no hewɔ lɛ, esaaa akɛ wɔyeɔ mɔ ko he awuŋa yɛ enii ni eyɔɔ loo sɔɔmɔ hegbɛi ni eyɔɔ yɛ asafo lɛ mli lɛ hewɔ. Kɛfata he lɛ, kɛ́ wɔsumɔɔ wɔnaanyo gbɔmɔ lɛ, wɔshwaŋ ni wɔfeŋ pupuupu hu. Biblia lɛ kɛɔ akɛ: “Henɔwomɔ kɛ hewoo tsui lɛ, efɔŋfeelɔi akane ni, ni esha ni.”—Abɛi. 21:4, Ga Biblia hee.

16, 17. Te wɔɔfee tɛŋŋ wɔhi shi yɛ 1 Korintobii 13:5, 6 lɛ naa?

16 Kɛ́ wɔsumɔɔ wɔnaanyo gbɔmɔ lɛ, wɔfeŋ nibii ni esaaa. Wɔmaleŋ, wɔjuŋ, ni wɔfeŋ nibii krokomɛi ni baate shi awo Yehowa mlai kɛ eshishitoo mlai lɛ. Akɛni suɔmɔ epeleee lɛ diɛŋtsɛ enɔ hewɔ lɛ, wɔbaafó wɔnyɛmimɛi hu anɔ mli.Fil. 2:4.

 17 Anɔkwa suɔmɔ mli wooo la, ni “eniŋŋ efɔŋ he,” ni tsɔɔ akɛ, wɔbuaaa tɔmɔi ni mɛi tɔ̃ɔ wɔnɔ lɛ fɛɛ naa wɔshwieee shi. (1 Tes. 5:15) Kɛ́ wɔbɛ mɛi wɔwo wɔmli lɛ, wɔsaŋ Nyɔŋmɔ hiɛ, ni wɔmlifu lɛ baafee tamɔ la ko ni miitso hɛrɛbii, ni baanyɛ ahere waa ni eye wɔ kɛ mɛi krokomɛi awui. (3 Mose 19:18) Suɔmɔ hãa wɔnyaa anɔkwale lɛ he, shi ehãaa ‘wɔnya nɔsha he,’ no hewɔ lɛ, kɛ́ aafee mɔ ko ni nyɛɔ wɔ lɛ niseniianii loo aaye lɛ sane ni ejaaa po lɛ, wɔnyaaa he.Nyɛkanea Abɛi 24:17, 18.

18. Mɛni wɔkaseɔ yɛ suɔmɔ he yɛ 1 Korintobii 13:7, 8 lɛ?

18 Paulo tee nɔ etsɔɔ nɔ ni suɔmɔ ji lɛ mli. Ewie akɛ, suɔmɔ ‘miɔ ŋɔɔ yɛ nii fɛɛ mli.’ Kɛ́ mɔ ko tɔ̃ wɔnɔ, ni mɔ lɛ bi ni wɔkɛfa lɛ lɛ, suɔmɔ tsirɛɔ wɔ ni wɔkɛfaa lɛ. Suɔmɔ “heɔ nii fɛɛ” ni yɔɔ Nyɔŋmɔ Wiemɔ lɛ mli lɛ eyeɔ, ni ehãa wɔhiɛ sɔɔ mumɔŋ niyenii ni wɔnine shɛɔ nɔ lɛ. Suɔmɔ hiɛ “kãa nii fɛɛ” ni aŋma yɛ Biblia lɛ mli lɛ nɔ, ni ehãa wɔgbaa mɛi krokomɛi wɔhiɛnɔkamɔ lɛ. (1 Pet. 3:15) Kɛ́ wɔkɛ shihilɛi ni jaraa kpe lɛ, wɔsɔleɔ ni wɔhiɛ kãa nɔ akɛ nibii baahi. Kɛ́ eba lɛ akɛ mɔ ko tɔ̃ wɔnɔ, awa wɔ yi, loo wɔkɛ shihilɛi krokomɛi ni jaraa kpe po lɛ, wɔmiaa wɔhiɛ, ejaakɛ suɔmɔ “toɔ etsui shi [loo emiaa ehiɛ] yɛ nii fɛɛ mli.” Kɛfata he lɛ, “suɔmɔ sɛɛ efooo gbi ko gbi ko.” Mɛi ni boɔ Yehowa toi lɛ baasumɔ amɛnaanyo gbɔmɔ kɛya naanɔ.

YAA NƆ OSUMƆ ONAANYO GBƆMƆ TAMƆ BO DIƐŊTSƐ OHE

19, 20. Mɛɛ ŋmalɛi tsɔɔ akɛ esa akɛ wɔya nɔ wɔsumɔ wɔnaanyo gbɔmɔ?

19 Kɛ́ wɔkɛ Biblia mli ŋaawoo tsu nii lɛ, ebaahã wɔya nɔ wɔsumɔ wɔnaanyo gbɔmɔ. Esa akɛ wɔjie suɔmɔ nɛɛ kpo wɔtsɔɔ mɛi fɛɛ, jeee mɛi ni wɔkɛ jɛ maŋ kome nɔ lɛ kɛkɛ. Esa akɛ wɔkai hu akɛ, Yesu wie akɛ: “Esa akɛ osumɔ onaanyo gbɔmɔ tamɔ bo diɛŋtsɛ ohe.” (Mat. 22:39NW) Nyɔŋmɔ kɛ Kristo fɛɛ miikpa gbɛ akɛ wɔbaasumɔ wɔnaanyo gbɔmɔ. Kɛ́ ewa kɛhã wɔ akɛ wɔɔsumɔ wɔnaanyo gbɔmɔ lɛ, esa akɛ wɔsɔle wɔbi ni Nyɔŋmɔ kɛ emumɔ krɔŋkrɔŋ lɛ aye abua wɔ. Kɛ́ wɔfee nakai lɛ, Yehowa baajɔɔ wɔ, ni ebaaye ebua wɔ ni wɔjie suɔmɔ kpo.Rom. 8:26, 27.

20 Atsɛ fãmɔ ni afã wɔ akɛ wɔsumɔ wɔnaanyo gbɔmɔ tamɔ wɔ diɛŋtsɛ wɔhe lɛ akɛ, “mla lɛ mli otu” yɛ Biblia lɛ mli. (Yak. 2:8) Be ni Paulo ewie Mose Mla lɛ mli kitãi lɛ ekomɛi ahe sɛɛ lɛ, ewie akɛ: “Kɛ́ kita kroko hu yɛ lɛ, fɛɛ hɔ nɛkɛ wiemɔ nɛɛ ni ji: ‘Suɔmɔ onaanyo taakɛ bɔ ni osumɔɔ bo diɛŋtsɛ ohe’ lɛ mli. Suɔmɔ efeee enaanyo efɔŋ ko, hewɔ lɛ suɔmɔ pɛ ji mla lɛ nɔyeli.” (Rom. 13:8-10) No hewɔ lɛ, esa akɛ wɔya nɔ wɔsumɔ wɔnaanyo gbɔmɔ.

21, 22. Mɛni hewɔ esa akɛ wɔsumɔ Nyɔŋmɔ kɛ wɔnaanyo gbɔmɔ lɛ?

21 Yesu wiemɔi akɛ, e-Tsɛ lɛ hãa “ehulu teɔ shi yɛ mɛi fɔji kɛ mɛi kpakpai anɔ, ni ehãa nugbɔ nɛɔ yɛ jalɔi kɛ mɛi ni bɛ jalɛ lɛ anɔ” lɛ hu hãa wɔnaa nɔ hewɔ ni esa akɛ wɔsumɔ wɔnaanyo gbɔmɔ. (Mat. 5:43-45) Esa akɛ wɔsumɔ mɔ fɛɛ mɔ, kɛ́ eji jalɔ jio, mɔ ni ejaaa jio. Taakɛ awie he kɛtsɔ hiɛ lɛ, gbɛ ni fe fɛɛ ni wɔbaanyɛ wɔtsɔ nɔ wɔsumɔ wɔnaanyo gbɔmɔ ji ni wɔshiɛ Maŋtsɛyeli lɛ he sane wɔhã lɛ. Kɛ́ mɛi kɛ nɔ ni amɛkaseɔ yɛ Biblia lɛ mli lɛ tsu nii lɛ, amɛbaanyɛ amɛbatsɔmɔ Nyɔŋmɔ nanemɛi, ni amɛbaaná miishɛɛ.

22 Wɔyɛ yiŋtoi babaoo ahewɔ ni esa akɛ wɔsumɔ Yehowa kɛ wɔtsui muu fɛɛ, wɔsusuma muu fɛɛ, kɛ wɔjwɛŋmɔ muu fɛɛ. Wɔyɛ gbɛi babaoo hu ni wɔbaanyɛ wɔtsɔ nɔ wɔsumɔ wɔnaanyo gbɔmɔ. Kɛ́ wɔsumɔɔ Nyɔŋmɔ kɛ wɔnaanyo gbɔmɔ lɛ, belɛ wɔmiiye kitãi ni Yesu wie he lɛ anɔ. Nɔ ni fe fɛɛ lɛ, wɔnifeemɔ baasa Yehowa, wɔ-Tsɛ ni yɔɔ ŋwɛi, ni yɔɔ suɔmɔ lɛ hiɛ.