Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) JUNE 2014

Ani Okaiɔ?

Ani Okaiɔ?

Ani okane Buu-Mɔɔ srɔtoi ni ba nyɛsɛɛ nɛɛ jogbaŋŋ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:

Mɛɛ be esa akɛ agbe Hehoo toobi lɛ yɛ Nisan 14 lɛ nɔ?

Biblia shishitsɔɔmɔi komɛi tsɔɔ akɛ, esa akɛ agbe toobi lɛ yɛ “gbɛkɛnaashi kɛ gbɛkɛ teŋ,” ni tsɔɔ akɛ be ni hulu enyɔ shi loo be ni je ebɔi naa, shi duŋ woko. (2 Mose 12:6)12/15, baafa 18-19.

Mɛɛ Biblia mli shishitoo mlai baaye abua oblahii kɛ oblayei ni amɛkɛ hiɛshikamɔ akpɛ amɛyiŋ?

Amɛmli etɛ ji (1) Taomɔ Nyɔŋmɔ Maŋtsɛyeli lɛ kɛ ejalɛ lɛ tsutsu. (Mat. 6:19-34) (2) Sɔɔmɔ mɛi krokomɛi koni oná miishɛɛ. (Bɔf. 20:35) (3) Okɛ miishɛɛ asɔmɔ Yehowa yɛ oblahiiaŋ. (Jaj. 12:1)1/15, baafa 19-20.

Kɛjɛ afi 1914 kɛbaa nɛɛ, mɛɛ okpɔŋɔnɔtaralɔi ejwɛ etee nɔ etsu nii?

Yesu, ni ji mɔ ni ta okpɔŋɔ yɛŋ lɛ nɔ lɛ eshwie Satan kɛ edaimonioi lɛ kɛjɛ ŋwɛi. Mɔ ni ta okpɔŋɔ tsuru lɛ nɔ lɛ damɔ shi kɛhã tai ni ekpata adesai ahiɛ lɛ. Mɔ ni ta okpɔŋɔ diŋ lɛ nɔ lɛ damɔ shi kɛhã hɔmɔ. Mɔ ni ta okpɔŋɔ lamulu lɛ nɔ lɛ gbeɔ mɛi akpekpei abɔ kɛtsɔ gbelehela nɔ. (Kpoj. 6:2-8)2/1, baafa 6-7.

Mɛɛ be “toobi lɛ yookpeemɔ lɛ” baaba nɔ? (Kpoj. 19:7)

“Toobi lɛ yookpeemɔ lɛ” baaba nɔ be ni Yesu Kristo, ni ji Maŋtsɛ lɛ egbe ekunimyeli lɛ naa, ni tsɔɔ akɛ, be ni akpãta Babilon Kpeteŋkpele lɛ hiɛ ni awu Harmagedon ta lɛ sɛɛ.2/15, baafa 10.

Mɛni hewɔ Yudafoi ni hi shi yɛ Yesu beaŋ lɛ ‘ahiɛ kã nɔ’ akɛ Mesia lɛ baaba yɛ amɛbeaŋ lɛ? (Luka 3:15)

Wɔnyɛŋ wɔwie kɛ nɔmimaa akɛ Yudafoi ni hi shi yɛ klɛŋklɛŋ afii 100 lɛ mli lɛ nu Daniel gbalɛ ni kɔɔ Mesia lɛ he lɛ shishi, taakɛ wɔnuɔ shishi ŋmɛnɛ lɛ. (Dan. 9:24-27) Fɛɛ sɛɛ lɛ, eeenyɛ efee akɛ amɛnu nɔ ni ŋwɛibɔfo lɛ kɛɛ tookwɛlɔi komɛi lɛ loo nɔ ni gbalɔyoo Hana wie be ni akɛ abifao Yesu tee sɔlemɔwe lɛ ni ena lɛ lɛ. Kɛfata he lɛ, ŋulamiiaŋkwɛlɔi komɛi tee amɛyatao “Yudafoi amaŋtsɛ ni afɔ lɛ.” (Mat. 2:1, 2) Sɛɛ mli lɛ, Yohane Baptisilɔ lɛ hu wie akɛ etsɛŋ ni Kristo lɛ baapue.2/15, baafa 26-27.

Mɛni esa akɛ wɔfee koni wɔhɛɛ akafee dabi? (2 Kor. 1:18)

Eji anɔkwale akɛ, ekolɛ bei komɛi lɛ, yɛ shihilɛi ni wɔnyɛŋ he nɔ ko wɔfee lɛ hewɔ lɛ, wɔyeŋ wɔwiemɔi anɔ. Shi kɛ́ wɔwo shi loo wɔfee kpaŋmɔ ko lɛ, esa akɛ wɔfee bɔ fɛɛ bɔ ni wɔɔnyɛ ni wɔye nɔ.3/15, baafa 32.

Kɛ́ onu he akɛ okwɛ nibii ni teɔ bɔlɛnamɔ akɔnɔ shi lɛ, te ooofee tɛŋŋ oye nɔ?

Gbɛi etɛ ni baanyɛ aye abua bo ji (1) Kɛ́ ohiŋmɛi gba nɔ ko ni teɔ bɔlɛnamɔ akɔnɔ shi nɔ lɛ, tsɔ ohiɛ oto afã oya. (2) Kudɔmɔ ojwɛŋmɔ kɛtsɔ nibii kpakpai ahe ni ooojwɛŋ kɛ sɔlemɔ ni ooosɔle ohã Nyɔŋmɔ lɛ nɔ. (3) Lé onanenaa kwɛmɔ kɛtsɔ sinii loo Wɛb saitii ni nibii ni teɔ bɔlɛnamɔ akɔnɔ shi yɔɔ nɔ ni oookpoo lɛ nɔ.4/1, baafa 10-12.

Mɛɛ nibii ni akpaaa gbɛ baanyɛ aba kɛ́ Kristofonyo ko shi eweku koni eyatao shika yɛ maŋ kroko nɔ?

Kɛ́ fɔlɔi ehiii he kome akɛ weku lɛ, ebaanyɛ efite amɛbii lɛ amiishɛɛ, ni ebaanyɛ esa amɛjeŋba hu he. Ekolɛ, amɛmli baafu akɛ amɛfɔlɔ loo fɔlɔi lɛ shi amɛ. Ni mɛi ni kɛ amɛhefatalɔi bɛ he kome lɛ baanyɛ amɛkɛ shihilɛi ni baanyɛ ahã amɛfite gbãla lɛ akpe.4/15, baafa 19-20.

Mɛni hewɔ akumɔɔ efɔŋfeelɔi ni asɛŋɔ amɛ yɛ tso nɔ lɛ anaji lɛ?

Romabii lɛ sɛŋ efɔŋfeelɔi komɛi yɛ tso nɔ. Yudafoi lɛ yabi koni akumɔ ojotswalɔi ni asɛŋ afata Yesu he lɛ anaji. Enɛ baahã ewa kɛhã mɔ ni asɛŋ lɛ lɛ akɛ eeemu, ni no baahã egbo oya. Kɛ́ eba lɛ nakai lɛ, ehe ebahiaŋ ni mɔ lɛ ahi tso lɛ nɔ jenamɔ muu fɛɛ. (5 Mose 21:22, 23)5/1, baafa 11.

Mɛɛ sanebimɔi ejwɛ esa akɛ wɔhã ehi wɔjwɛŋmɔŋ kɛ́ wɔkɛ mɛi yaagba sane yɛ shiɛmɔ nitsumɔ lɛ mli?

Namɛi mikɛyaagba sane lɛ? Nɛgbɛ mikɛ amɛ yaagba sane lɛ yɛ? Mɛɛ be esa akɛ miya amɛŋɔɔ? Te esa akɛ mije sane lɛ shishi miha tɛŋŋ?5/15, baafa 12-15.

Mɛi enyiɛ tawashɛremɔ gbeɔ?

Yɛ nyɛsɛɛ afii 100 lɛ mli lɛ, egbe mɛi 100,000,000. Amrɔ nɛɛ, egbeɔ mɛi 6,000,000 daa afi.6/1, baafa 3.