Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) JUNE 2014

Sanebimɔi ni Jɛ Kanelɔi Adɛŋ

Sanebimɔi ni Jɛ Kanelɔi Adɛŋ

Ani eja gbɛ akɛ Kristofoi aaahã ashã amɛ kɛ́ amɛgboi?

Nɔ ko bɛ Ŋmalɛ lɛ mli ni tsɔɔ akɛ gbohii ni aaashã lɛ esaaa.

Biblia mli saji yɛ ni tsɔɔ akɛ ashã mɛi komɛi ni egboi lɛ loo amɛwui. (Yosh. 7:25; 2 Kron. 34:4, 5) Eeenyɛ efee akɛ, no tsɔɔ akɛ nakai mɛi lɛ esaaa fuu kpakpa. Shi jeee be fɛɛ be mɛi ni egboi ni ashã yɛ nakai beaŋ lɛ tsɔɔ akɛ amɛsaaa fuu kpakpa.

Wɔnaa enɛ yɛ sane ni kɔɔ Maŋtsɛ Saul kɛ ebihii etɛ lɛ agbele he lɛ mli. Amɛ fɛɛ amɛgboi be ni amɛkɛ Filistibii lɛ miiwu ta. Ebihii lɛ ateŋ mɔ kome ji Yonatan, ni ji David naanyo anɔkwafo ni fĩ esɛɛ lɛ. Be ni Israelbii kãkãlɔi ni yɔɔ Yabesh-Gilead lɛ ná le nɔ ni eba lɛ, amɛtee amɛyajie gbohii ejwɛ lɛ, amɛshã amɛ, ni amɛfu amɛwui lɛ. Sɛɛ mli lɛ, David jie nakai Israelbii lɛ ayi yɛ nɔ ni amɛfee lɛ hewɔ.1 Sam. 31:2, 8-13; 2 Sam. 2:4-6.

Ŋmalɛ naa hiɛnɔkamɔ ni yɔɔ kɛhã gbohii lɛ ji gbohiiashitee, ni ji wala mli ni Nyɔŋmɔ kɛ lɛ aaaba ekoŋŋ lɛ. Kɛji ashã mɔ ni egbo lɛ jio, ashãaa lɛ jio lɛ, Yehowa baanyɛ atee lɛ shi kɛba wala mli ekoŋŋ kɛ gbɔmɔtso hee. Hebribii anɔkwafoi etɛ lɛ ni Maŋtsɛ Nebukadnezar hã akɛ amɛ wo la kɛ flɔnɔɔ lɛ mli lɛ eyasheee gbeyei akɛ Nyɔŋmɔ nyɛŋ atee amɛ shi, kɛji la lɛ kpata amɛhiɛ. (Dan. 3:16-18) Nakai nɔŋŋ eji yɛ Yehowa tsuji anɔkwafoi ni abu amɛ gbele fɔ, ni ashã amɛ yɛ Nazi yiwaa nsarai amli lɛ agbɛfaŋ. Okplɛmii ekpata Nyɔŋmɔ tsuji anɔkwafoi komɛi hu ahiɛ, ni mɛi krokomɛi hu egboi ni akɔɔɔ amɛwu po. Kɛ̃lɛ, wɔyɛ nɔmimaa akɛ abaatee amɛ shi.Kpoj. 20:13.

Ehe ehiaaa ni Yehowa atsara mɔ ko gbɔmɔtso momo lɛ dani enyɛ etee lɛ shi. Bɔ ni Nyɔŋmɔ teɔ Kristofoi ni afɔ amɛ mu lɛ ashi kɛyaa ŋwɛi lɛ hãa enɛ feɔ faŋŋ. Taakɛ eba lɛ yɛ Yesu, mɔ ni “ahã lɛ wala yɛ mumɔ gbɛfaŋ” lɛ gbɛfaŋ lɛ, kɛ́ Kristofoi ni afɔ amɛ mu lɛ ateŋ mɔ ko gbo ni atee lɛ shi lɛ, ahãa lɛ gbɔmɔtso kroko, ni ji mumɔŋ gbɔmɔtso. Amɛkɛ amɛtsutsu heloŋ gbɔmɔtso lɛ eyaaa ŋwɛi.1 Pet. 3:18; 1 Kor. 15:42-53; 1 Yoh. 3:2.

Hiɛnɔkamɔ ni wɔyɔɔ yɛ gbohiiashitee lɛ mli lɛ damɔɔɔ nɔ ni akɛ wɔgbɔmɔtsei baafee be ni wɔgboi lɛ nɔ, shi moŋ edamɔ hemɔkɛyeli ni wɔyɔɔ yɛ Nyɔŋmɔ mli akɛ ebaanyɛ etee wɔ shi, ni akɛ eeshwe ni efee nakai lɛ nɔ. (Bɔf. 24:15) Wɔnyɛŋ wɔnu gbɛ ni Nyɔŋmɔ tsɔ nɔ etee mɛi ashi yɛ blema kɛ nɔ ni ebaafee wɔsɛɛ lɛ shishi jogbaŋŋ. Fɛɛ sɛɛ lɛ, wɔheɔ Yehowa wɔyeɔ. Ekɛ shi ni etee Yesu kɛjɛ gbohii ateŋ lɛ “maa enɛ nɔ mi.”Bɔf. 17:31, Ga Biblia hee; Luka 24:2, 3.

Esa akɛ Kristofoi asusu kusumii ni yɔɔ he ni amɛyɔɔ, bɔ ni mɛi naa nifeemɔ nɛɛ amɛhãa, kɛ mlai ni kɔɔ bɔ ni esa akɛ atsu gbohii ahe nii ahã lɛ he lɛ ahe. (2 Kor. 6:3, 4) Kɛkɛ lɛ, kɛ́ mɔ ko baasumɔ ni kɛji egbo lɛ ashã lɛ jio, akashã lɛ jio lɛ, eji mɔ lɛ loo ewekumɛi ayiŋkpɛɛ.