Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  April 2014

Ani Oyɛ He Miishɛɛ Akɛ Yehowa Hiŋmɛi Kã Ohe?

Ani Oyɛ He Miishɛɛ Akɛ Yehowa Hiŋmɛi Kã Ohe?

“Yehowa hiŋmɛii yɛ he fɛɛ he, ni ekwɛɔ mɛi fɔji kɛ mɛi kpakpai fɛɛ.”ABƐI 15:3.

1, 2. Mɛɛ gbɛ nɔ esoro yiŋtoo ni Yehowa kɛkwɛɔ wɔ lɛ yɛ bɔ ni akɛ kamerai tsuɔ nii kɛkwɛɔ mɛi lɛ he?

YƐ MAJI pii anɔ lɛ, akɛ kamerai ewo gbɛjegbɛi ahe koni akɛna tsɔnekudɔlɔi ni kudɔɔɔ amɛtsɔji jogbaŋŋ kɛ osharai ni baa hu. Kɛ́ mɔ ko kɛ tsɔne tswa mɔ ko ni ejo foi lɛ, kamera lɛ baanyɛ aye abua amralofoi lɛ ni amɛmɔ lɛ. Kamerai nɛɛ ahewɔ lɛ, sɛɛkpee nɛɛ, ewa akɛ awuiyelɔi aaajo foi ni anaaa amɛ.

2 Ani Yehowa, wɔ-Tsɛ ni sumɔɔ wɔ lɛ kwɛɔ wɔ taakɛ akɛ kamerai nɛɛ tsuɔ nii lɛ? Biblia lɛ kɛɔ akɛ, ehiŋmɛii “yɛ he fɛɛ he.” (Abɛi 15:3) Shi ani enɛ tsɔɔ akɛ etsu ehiŋmɛii eshwie wɔnɔ koni kɛ́ wɔku emlai lɛ amli nɔŋŋ lɛ emɔ wɔ? Ani eemɛ koni kɛ́ wɔku emlai amli nɔŋŋ lɛ, egbala wɔtoi? (Yer. 16:17; Heb. 4:13) Dabi kwraa! Suɔmɔ ni Yehowa sumɔɔ wɔ lɛ hewɔ ni ekwɛɔ wɔteŋ mɔ fɛɛ mɔ lɛ, ni agbɛnɛ hu, wɔhilɛkɛhamɔ kã etsui nɔ.1 Pet. 3:12.

3. Mɛɛ gbɛi enumɔ ni Nyɔŋmɔ tsɔɔ nɔ ekwɛɔ wɔnɔ lɛ ahe wɔbaasusu?

3 Mɛni baaye abua wɔ koni wɔnu suɔmɔ ni Nyɔŋmɔ sumɔɔ wɔ lɛ shishi jogbaŋŋ? Wɔbaasusu gbɛi enumɔ ni Yehowa tsɔɔ nɔ ekwɛɔ wɔnɔ lɛ he yɛ nikasemɔ nɛɛ mli.  (1) Ebɔɔ wɔ kɔkɔ dani wɔfeɔ nɔ ko gbonyo. (2) Ekuneɔ wɔ loo ejajeɔ wɔ kɛ́ wɔkɔ gbɛ fɔŋ ko. (3) Ekɛ Biblia mli shishitoo mlai tsɔɔ wɔ gbɛ. (4) Ewaa wɔ kɛ́ wɔkɛ kai kpe. (5) Ejuroɔ wɔ kɛ́ wɔfee ekpakpa.

YEHOWA BƆƆ WƆ KƆKƆ

4. Mɛni hewɔ Yehowa bɔ Kain kɔkɔ dani efee esha lɛ?

4 Klɛŋklɛŋ lɛ, nyɛhãa wɔsusua bɔ ni Nyɔŋmɔ bɔɔ wɔ kɔkɔ dani wɔfeɔ nɔ ko gbonyo lɛ he. (1 Kron. 28:9) Akɛ nɔkwɛmɔnɔ lɛ, be ni Nyɔŋmɔ ekpɛlɛɛɛ Kain nɔ lɛ, “Kain mli wo la naakpa.” (Nyɛkanea 1 Mose 4:3-7.) Yehowa wo Kain hewalɛ ni ‘efee ekpakpa.’ Yehowa bɔ lɛ kɔkɔ akɛ, kɛ́ efeee nakai lɛ, “esha bu shinaa lɛ shi,” ni tsɔɔ akɛ ebaafee esha. Nyɔŋmɔ kɛɛ lɛ akɛ: “Ye enɔ.” Yehowa miitao Kain ‘hiɛ aba nyam.’ Eji Kain bo kɔkɔbɔɔ lɛ toi kulɛ, wekukpaa kpakpa baakã he ahi ekɛ Nyɔŋmɔ teŋ.

5. Mɛɛ gbɛi anɔ Yehowa tsɔɔ ebɔɔ wɔ kɔkɔ yɛ susumɔi ni esaaa ni ekolɛ wɔbaaná lɛ he?

5 Ni ŋmɛnɛ hu? Yehowa naa nɔ ni yɔɔ wɔtsuiŋ tɔ̃ɔ; wɔnyɛŋ wɔkɛ wɔsusumɔi kɛ wɔshwelɛi atee lɛ. Wɔ-Tsɛ lɛ sumɔɔ wɔ ni eetao wɔfee nɔ ni ja; kɛlɛ, enyɛɛɛ wɔnɔ. Kɛ́ wɔyaakɔ gbɛ ko ni ejaaa lɛ, etsɔɔ e-Wiemɔ ni ji Biblia lɛ nɔ ebɔɔ wɔ kɔkɔ. Yɛ mɛɛ gbɛ nɔ? Daa gbi kɛ́ wɔmiikane Biblia lɛ, efɔɔ kaa akɛ wɔnaa ŋmalɛi komɛi ni yeɔ ebuaa wɔ koni wɔye sui gbohii kɛ susumɔi ni esaaa anɔ. Kɛfata he lɛ, ekolɛ asafo lɛ woji lɛ egbala naagba ko ni wɔkɛmiikpe shi wɔnyɛko wɔtsu he nii lɛ mli, ni etsɔɔ bɔ ni wɔɔfee wɔkpee nakai naagba lɛ naa. Ni kɛ́ wɔtee asafoŋ kpeei hu lɛ, akɛ ŋaawoo ni baa yɛ ebe naa hãa wɔ fɛɛ!

6, 7. (a) Mɛni tsɔɔ akɛ Yehowa sumɔɔ etsuji lɛ ateŋ mɔ fɛɛ mɔ sane? (b) Te ooofee tɛŋŋ oná Yehowa kɔkɔbɔi lɛ ahe sɛɛ lɛ?

6 Kɔkɔbɔi ni tamɔ nɛkɛ ni yɔɔ Biblia lɛ mli lɛ tsɔɔ akɛ Yehowa sumɔɔ wɔteŋ mɔ fɛɛ mɔ sane lɛɛlɛŋ. Eyɛ mli akɛ aŋma Biblia lɛ kɛ asafo lɛ woji lɛ ahã mɛi akpekpei abɔ, ni ŋaawoo ni akɛhãa yɛ kpeei ashishi lɛ yɛ kɛhã asafo muu lɛ fɛɛ moŋ, shi Yehowa miikɛɛ bo akɛ, bo kɔkɔbɔi ni yɔɔ e-Wiemɔ lɛ mli lɛ toi, koni ofee nɔ ni ja. Enɛ tsɔɔ akɛ Yehowa susuɔ ohe.

Kɛ́ wɔkɛ Biblia lɛ tsɔse wɔhenilee lɛ, wɔbaaye wɔhe kɛjɛ osharai babaoo ahe (Kwɛmɔ kuku 6, 7)

7 Dani wɔbaaná kɔkɔbɔi ni Nyɔŋmɔ kɛhãa lɛ ahe sɛɛ lɛ, ja wɔyɔse akɛ esusuɔ wɔhe. No sɛɛ lɛ, esa akɛ wɔkɛ e-Wiemɔ lɛ atsu nii yɛ wɔshihilɛ mli, ní wɔbɔ mɔdɛŋ wɔtsake susumɔi fɛɛ ni kɛ nɔ ni Nyɔŋmɔ sumɔɔ lɛ kpãaa gbee lɛ amrɔ nɔŋŋ. (Nyɛkanea Yesaia 55:6, 7.) Kɛ́ wɔbo kɔkɔbɔi lɛ atoi amrɔ nɔŋŋ lɛ, wɔbaaye wɔhe kɛjɛ osharai babaoo ahe. Shi kɛ́ wɔbooo toi hu? Ani wɔ-Tsɛ ni sumɔɔ wɔ lɛ baaya nɔ eye ebua wɔ?

WƆTSƐ NI SUMƆƆ WƆ LƐ KUNEƆ WƆ

8, 9. Kɛ́ mɔ ko jɛ Ŋmalɛ lɛ mli ewo wɔ ŋaa lɛ, mɛɛ gbɛ nɔ no hãa wɔnaa akɛ Yehowa susuɔ wɔhe? Okɛ enɛ he nɔkwɛmɔnɔ ahã.

8 Kɛ́ Yehowa kune loo ejaje wɔ lɛ, wɔle akɛ wɔsane ni esumɔɔ lɛ hewɔ efeɔ nakai lɛ. (Nyɛkanea Hebribii 12:5, 6.) Eji anɔkwale akɛ, kɛ́ awo wɔ ŋaa, atsɔse wɔ, loo akune wɔ lɛ, wɔnáaa he miishɛɛ. (Heb. 12:11) Shi kɛ́ mɔ ko jɛ Ŋmalɛ lɛ mli ewo wɔ ŋaa lɛ, esa akɛ wɔsusu nɔ ni tee nɔ yɛ mɔ lɛ jwɛŋmɔ mli dani ewo wɔ ŋaa lɛ he. Mɔ lɛ wooo wɔ ŋaa akɛni eetao ekɛɛ wɔ nɔ ko ni baadɔ wɔ lɛ hewɔ, shi efee nakai ejaakɛ ena akɛ sane miihe aba wɔ kɛ Yehowa teŋ wekukpaa lɛ he. Ehe be, ni ejɛ Biblia lɛ mli eye ebua wɔ koni wɔna  nɔ ni kɛ́ wɔfee lɛ wɔbaasa Nyɔŋmɔ hiɛ. Wɔmiisumɔ ni wɔkɛ ŋaawoo ni tamɔ nɛkɛ lɛ atsu nii, ejaakɛ ejɛ Yehowa ŋɔɔ.

9 Nyɛhãa wɔsusua nɔkwɛmɔnɔ ko ni hãa wɔnaa akɛ, kɛ́ mɔ ko wo wɔ ŋaa lɛ, no tsɔɔ akɛ Nyɔŋmɔ susuɔ wɔhe lɛ he. Nyɛmi nuu ko fɔɔ mfonirii ni teɔ bɔlɛnamɔ akɔnɔ shi kwɛmɔ dani eba anɔkwale lɛ mli. Shi be ni eba anɔkwale lɛ mli lɛ, ebɔ mɔdɛŋ eye su gbonyo nɛɛ nɔ. Kɛ̃lɛ, su nɛɛ shishi efãaa kwraa. Be ni eyahe mobail foŋ hee lɛ, ekɛbɔi mfonirii ni teɔ bɔlɛnamɔ akɔnɔ shi kwɛmɔ ekoŋŋ yɛ Intanɛt lɛ nɔ. (Yak. 1:14, 15) Gbi ko lɛ, ekɛ efoŋ lɛ ma asafoŋ onukpa ko, ni asafoŋ onukpa lɛ na Wɛb saitii ni mfonirii ni teɔ bɔlɛnamɔ akɔnɔ shi yɔɔ jɛmɛ lɛ yɛ foŋ lɛ nɔ. Asafoŋ onukpa lɛ wo nyɛmi nuu lɛ ŋaa amrɔ nɔŋŋ. Nyɛmi nuu lɛ bo ŋaawoo lɛ toi, ni fiofio lɛ, enyɛ eye su gbonyo nɛɛ nɔ. Yehowa naa nibii gbohii ni wɔfeɔ yɛ teemɔŋ lɛ fɛɛ, ni ebaanyɛ ekune wɔ dani wɔ kɛ lɛ teŋ wekukpaa lɛ afite. Eŋɔɔ wɔnaa waa akɛ Yehowa susuɔ wɔhe.

KƐ WƆKƐ BIBLIA MLI SHISHITOO MLAI TSU NII LƐ, WƆNÁA HE SƐƐ

10, 11. (a) Mɛni esa akɛ wɔfee kɛtsɔɔ akɛ ‘wɔkaiɔ’ Nyɔŋmɔ? (b) Gbaa weku ko ni kɛ Yehowa gbɛtsɔɔmɔ tsu nii lɛ niiashikpamɔ.

10 Lalatsɛ lɛ lá ehã Yehowa akɛ: “Okɛ oŋaawoo lɛ aaatsɔɔ mi gbɛ.” (Lala 73:24) Kɛ́ wɔkwɛ Nyɔŋmɔ Wiemɔ lɛ mli kɛtao gbɛtsɔɔmɔ koni wɔna bɔ ni esusuɔ yɛ saji ahe lɛ, no tsɔɔ akɛ ‘wɔmiikai lɛ.’ Kɛ́ wɔkɛ Biblia mli shishitoo mlai tsu nii lɛ, ewajeɔ wɔ kɛ Yehowa teŋ wekukpaa lɛ, ni bei komɛi hu lɛ, ehãa wɔnyɛɔ wɔtsuɔ wɔheloonaa hiamɔ nii ahe nii.Abɛi 3:6.

11 Akɛ nɔkwɛmɔnɔ lɛ, nyɛmi nuu ko yaba nuu ko shikpɔŋ yɛ Philippines maŋ ni ji Masbate lɛ mli koni ekɛ eweku lɛ ahi nɔ ni amɛdu nii yɛ jɛmɛ. No mli lɛ, ekɛ eŋa fɛɛ miisɔmɔ akɛ daa gbɛgbalɔi, ni amɛyɛ bii babaoo. Gbi ko lɛ, amɛyɛ nɔŋŋ ni shikpɔŋtsɛ lɛ kɛɛ amɛfã. Mɛni eba? Asomoaŋ, mɔ ko eyafolɔ amɛnaa. Eyɛ mli akɛ nyɛmi nuu lɛ miisusu he ni ebaaná ni ekɛ eweku lɛ ayahi lɛ he moŋ, shi ewie akɛ: “Yehowa baatsɔɔ. Ehãa wɔ wɔhiamɔ nii daa gbi, ekɔɔɔ he eko nɔ ni baa.” Ehiɛ ni ekɛfɔ̃ Yehowa nɔ lɛ efeee efolo. Gbii komɛi asɛɛ lɛ, shikpɔŋtsɛ lɛ bakɛɛ amɛ akɛ amɛkafã dɔŋŋ, ni enɛ hã amɛtsui nyɔ  amɛmli waa. Mɛni hã etsake ejwɛŋmɔ? Shikpɔŋtsɛ lɛ na akɛ, yɛ nyɛmimɛi lɛ anaa ni afolɔ lɛ fɛɛ sɛɛ lɛ, amɛkɛ Biblia mli shishitoo mlai tsu nii, ni amɛtee nɔ amɛkɛ lɛ ye yɛ bulɛ mli, ni amɛfeee basabasa. Shikpɔŋtsɛ lɛ hiɛ sɔ bɔ ni amɛfee amɛnii lɛ aahu akɛ, eŋmɛ amɛ gbɛ akɛ amɛya nɔ amɛhi shikpɔŋ lɛ nɔ, ni esaa ehã amɛ shikpɔŋ lɛ eko efata he akɛ amɛhu nɔ. (Nyɛkanea 1 Petro 2:12.) Anɔkwa, Yehowa tsɔɔ e-Wiemɔ lɛ nɔ etsɔɔ wɔ gbɛ koni wɔnyɛ wɔdamɔ shihilɛ mli naagbai anaa.

NAANYO KO NI WAA WƆ KONI WƆDAMƆ KAI ANAA

12, 13. Mɛɛ shihilɛi amli ebaanyɛ ewa kɛhã wɔ akɛ wɔɔhe wɔye akɛ Nyɔŋmɔ susuɔ wɔhe?

12 Bei komɛi lɛ, wɔkɛ shihilɛi ni jaraa kpeɔ be kpalaŋŋ. Ebaanyɛ efee hela, shiteekɛwoo ni jɛ wekumɛi aŋɔɔ, loo yiwaa. Bei komɛi lɛ, fatɔi ni yɔɔ wɔ kɛ wɔnyɛmimɛi lɛ ahe lɛ baanyɛ ahã béi aba wɔteŋ, ni enɛ baanyɛ ahao wɔ waa.

13 Akɛ nɔkwɛmɔnɔ lɛ, ekolɛ nɔ ko ni nyɛmi ko wie lɛ dɔ bo waa. No hewɔ lɛ ekolɛ obaakɛɛ akɛ: ‘Ani nakai esa akɛ Yehowa tsulɔ kɛ enyɛmi awie?’ Fɛɛ sɛɛ lɛ, aahã nyɛmi nuu nɛɛ sɔɔmɔ hegbɛi yɛ asafo lɛ mli, ni etamɔ nɔ ni mɔ fɛɛ mɔ sumɔɔ esane. Ekolɛ obaasusu akɛ: ‘Mɛni hewɔ esa akɛ ahã mɔ ko ni tamɔ nɛkɛ lɛ sɔɔmɔ hegbɛi? Ani Yehowa enaaa? Ani efeŋ he nɔ ko?’Lala 13:1, 2; Hab. 1:2, 3.

14. Mɛni hewɔ ekolɛ Yehowa baahã wɔnyɛmimɛi lɛ akã wɔ hiɛ lɛ?

14 Ekolɛ yiŋtoo kpakpa ko hewɔ Yehowa eŋmɛ gbɛ ni nibii aya nɔ nakai lɛ. Akɛ nɔkwɛmɔnɔ lɛ, ekolɛ bo osusuɔ akɛ nɔ ni mɔ lɛ fee lɛ esaaa kwraa. Shi ekolɛ jeee nakai kwraa Nyɔŋmɔ naa sane lɛ. Ekolɛ yɛ Nyɔŋmɔ hiɛ lɛ, bo moŋ osane ejaaa. Ekolɛ nɔ ni onyɛmi lɛ wie ni dɔ bo waa lɛ ji ŋaawoo ko ni he hiaa bo waa diɛŋtsɛ ni esa akɛ osusu he. Yɛ Nyɛminuu Karl Klein, ni be ko ni eho lɛ eji Gbɛtsɔɔmɔ Kuu lɛ mli nyo lɛ wala shihilɛ he sane mli lɛ, ewie akɛ, be ko lɛ Nyɛminuu J. F. Rutherford kã ehiɛ waa. Sɛɛ mli lɛ, Nyɛminuu Rutherford kɛ Nyɛminuu Klein kpe, ni ekɛ miishɛɛ ŋa lɛ akɛ, “Hɛloo, Karl!” Shi akɛni sane lɛ miidɔ Nyɛminuu Klein lolo hewɔ lɛ, ehereee nɔ ekpakpa ko. No hewɔ lɛ, Nyɛminuu Rutherford kɛɛ lɛ akɛ: “Kwɛmɔ jogbaŋŋ. Abonsam miitao osɛɛgbɛ.” Ŋaawoo nɛɛ ye ebua Nyɛminuu Klein waa. Sɛɛ mli lɛ ewie akɛ, wɔnyɛmimɛi lɛ yɛ hegbɛ akɛ amɛwoɔ wɔ ŋaa, no hewɔ lɛ, kɛ́ amɛwo wɔ ŋaa ni wɔbɛ amɛ wɔwo wɔmli lɛ, Abonsam nine baashɛ wɔnɔ. *

15. Kɛ́ wɔkɛ shihilɛ ni jaraa kpe lɛ, mɛni esa akɛ wɔhã ehi wɔjwɛŋmɔŋ?

15 Kɛ̃lɛ, kɛ́ efee tamɔ nɔ ni shihilɛ ni jaraa ni wɔkɛkpeɔ lɛ sɛɛ efooo lɛ, ekolɛ wɔbaafee yeyeeye. Mɛni esa akɛ wɔfee kɛ́ eba lɛ nakai? Ŋɔɔ lɛ akɛ, ookudɔ tsɔne ni oyaka yɛ trafiki mli. Obaanyɛ oto otsui shi kɛyashi tsɔji lɛ baabɔi yaa. Shi kɛ́ onaaa tsui, ni otsɔ gbɛ kroko nɔ lɛ, ekolɛ no moŋ baahã olaaje, ni okpe sɛɛ kɛya he ni oyaa lɛ. Shi kɛ́ oná tsui ohi trafiki lɛ mli lɛ, ekolɛ obaayashɛ he ni oyaa lɛ yɛ be naa. Yɛ gbɛ ni tamɔ nakai nɔŋŋ nɔ lɛ, kɛ́ oto otsui shi okɛ Biblia mli shishitoo mlai tsu nii lɛ, Yehowa baaye ebua bo ni onyɛ okpee shihilɛ ni jaraa lɛ naa.

16. Mɛɛ yiŋtoo kroko hewɔ ekolɛ Yehowa baaŋmɛ gbɛ ni wɔtsɔ shihilɛ ni jaraa mli lɛ?

16 Ekolɛ Yehowa baaŋmɛ gbɛ ni wɔtsɔ shihilɛ ni jaraa mli, ejaakɛ eetao  etsɔ no nɔ esaa wɔ. (Nyɛkanea 1 Petro 5:6-10.) Shi esaaa akɛ wɔsusuɔ akɛ Nyɔŋmɔ ji mɔ ni hãa wɔkɛ shihilɛ ni jaraa lɛ kpeɔ. (Yak. 1:13) Mɔ ni kɛ naagbai ni wɔkɛkpeɔ lɛ babaoo baa moŋ ji, ‘wɔhenyɛlɔ, Abonsam lɛ.’ Kɛ̃lɛ, Nyɔŋmɔ baanyɛ etsɔ shihilɛ ko ni jaraa nɔ ehã wɔhe awa yɛ mumɔŋ. Enaa wɔpiŋmɔi lɛ, ni akɛni “ejwɛŋɔ” wɔnɔ hewɔ lɛ, ebaaŋmɛ gbɛ ni wɔpiŋ be “fioo” ko kɛkɛ. Ná nɔmimaa akɛ Yehowa susuɔ ohe, ni ebaahã bo hewalɛ ni fa ni okɛkpee naa.2 Kor. 4:7-9.

YEHOWA BAAJURO BO

17. Namɛi Yehowa taoɔ, ni mɛni hewɔ?

17 Naagbee kwraa lɛ, Yehowa pɛiɔ gbɔmɛi fɛɛ atsuiiaŋ koni ena mɛi ni sumɔɔ lɛ lɛɛlɛŋ lɛ. Etsɔ gbalɔ Hanani nɔ ekɛɛ Maŋtsɛ Asa akɛ: “Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehãa mɛi ni amɛtsui ehi kɛwula shi yɛ egbɛfaŋ lɛ.” (2 Kron. 16:9) Eyɛ mli akɛ Asa tsui ehiii kɛwulaaa shi yɛ Nyɔŋmɔ gbɛfaŋ moŋ, shi kɛ́ otee nɔ ofee nɔ ni ja lɛ, ‘ebaajie ehewalɛ lɛ kpo’ etsɔɔ bo, ni tsɔɔ akɛ, ebaabu ohe ni ebaajuro bo.

18. Kɛ́ onuɔ he akɛ asusuuu ohe lɛ, mɛni esa akɛ okai yɛ Yehowa he? (Kwɛmɔ mfoniri ni yɔɔ nikasemɔ lɛ shishijee lɛ.)

18 Nyɔŋmɔ miitao ni ‘wɔtao nɔ kpakpa,’ ‘wɔsumɔ nɔ kpakpa,’ ni ‘wɔfee nɔ kpakpa,’ koni ‘eduro’ wɔ. (Amos 5:14, 15; 1 Pet. 3:11, 12) Yehowa naa mɛi ni feɔ jalɛ nii lɛ, ni ejɔɔ amɛ. (Lala 34:16) Akɛ nɔkwɛmɔnɔ lɛ, susumɔ Shifra kɛ Pua, ni ji Hebriyei ni fɔ́ɔ mɛi lɛ ahe okwɛ. Be ni Israelbii lɛ yɔɔ nyɔŋyeli shishi yɛ Mizraim lɛ, Farao fã nɛkɛ yei enyɔ nɛɛ akɛ amɛgbe Hebri abifabii hii fɛɛ ni abaafɔ lɛ. Shi yei nɛɛ bo Nyɔŋmɔ moŋ toi fe Farao. Eka shi faŋŋ akɛ, amɛhenilee tsirɛ amɛ ni amɛbaa abifabii lɛ ayi. Yehowa na nɔ ni Shifra kɛ Pua fee lɛ, ni ejɔɔ amɛ ni amɛwo shwiei. (2 Mose 1:15-17, 20, 21) Ekolɛ bei komɛi lɛ, wɔbaanu he akɛ mɔ ko yɔseee ekpakpa ni wɔfeɔ lɛ. Shi Yehowa susuɔ wɔhe. Enaa nɔ kpakpa fɛɛ nɔ kpakpa ni wɔfeɔ lɛ, ni ebaajuro wɔ.Mat. 6:4, 6; 1 Tim. 5:25; Heb. 6:10.

19. Mɛɛ niiashikpamɔ nyɛmi yoo ko ná?

19 Nyɛmi yoo ko ni yɔɔ Austria lɛ ná niiashikpamɔ ni hã ena akɛ Nyɔŋmɔ naa nibii kpakpai fɛɛ ni wɔfeɔ lɛ. Akɛni ejɛ Hungary hewɔ lɛ, atsɔɔ lɛ he ni mɔ ko ni yɔɔ wiemɔ lɛ he miishɛɛ ni wieɔ Hungarian lɛ shĩa yɔɔ, koni ekɛ lɛ ayakase nii. Amrɔ nɔŋŋ lɛ, etee mɔ lɛ shĩa lɛ, shi eyanaaa mɔ ko. Eku sɛɛ etee jɛmɛ shii abɔ, shi fɛɛ lɛ, kranaa. Bei komɛi lɛ, enuɔ he akɛ mɔ ko yɛ shĩa lɛ, shi kɛ́ etswa shinaa lɛ mɔ ko mɔ ko hereee nɔ. No hewɔ lɛ, eshiɔ asafo lɛ woji lɛ eko, woji ni lɛ diɛŋtsɛ eŋmala, kɛ etɛlifoŋ nɔmba, kɛ nibii krokomɛi. Be ni etee jɛmɛ shii abɔ yɛ afi kɛ fã sɛɛ lɛ, gbi ko be ni etswa shinaa lɛ, yoo ko je kpo. Yoo lɛ kɛ miishɛɛ ŋa lɛ ni ekɛɛ: “Ofainɛ ba mli. Mikaneɔ woji ni obashiɔ lɛ fɛɛ, ni miikpa bo gbɛ.” No mli lɛ yoo lɛ bɛ hewalɛ, ni no hewɔ lɛ esumɔɔɔ ni ekɛ mɛi gbaa sane. Akɛ lɛ bɔi Biblia lɛ kasemɔ. Hɛɛ, Nyɔŋmɔ juro nyɛmi yoo lɛ yɛ mɔdɛŋ ni ebɔ lɛ hewɔ!

20. Te Yehowa hiŋmɛi ni kã ohe lɛ hãa onuɔ he ohãa tɛŋŋ?

20 Yehowa naa nɔ fɛɛ nɔ ni ofeɔ lɛ, ni ebaajuro bo yɛ be ni sa mli. Esaaa akɛ le ni wɔle akɛ Nyɔŋmɔ hiŋmɛi kã wɔhe lɛ hãa wɔnuɔ he akɛ eefee enii tamɔ kamera ko ni miitao asha tɔmɔi fɛɛ ni wɔfeɔ lɛ. Moŋ lɛ, eba akɛ obaatsi obɛŋkɛ Nyɔŋmɔ ni yɔɔ suɔmɔ lɛ kpaakpa, ejaakɛ ohilɛkɛhamɔ kã etsui nɔ!

^ kk. 14 Nyɛminuu Klein wala shihilɛ he sane lɛ yɛ October 1, 1984 Blɔfo Buu-Mɔɔ lɛ mli.