Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) APRIL 2014

Mɔ ko Nyɛŋ Asɔmɔ Nuŋtsɔmɛi Enyɔ

Mɔ ko Nyɛŋ Asɔmɔ Nuŋtsɔmɛi Enyɔ

“Mɔ ko nyɛŋ nuŋtsɔmɛi enyɔ asɔmɔ . . . Nyɛnyɛŋ Nyɔŋmɔ kɛ mamona [nifalɛ] nyɛsɔmɔ.”MAT. 6:24.

1-3. (a) Mɛɛ shika he naagba wekui babaoo kɛkpeɔ ŋmɛnɛ, ni mɛɛ gbɛ nɔ mɛi komɛi tsɔɔ amɛtsuɔ he nii? (Kwɛmɔ mfoniri ni yɔɔ nikasemɔ lɛ shishijee lɛ.) (b) Kɛ́ fɔlɔi miikpɛ amɛyiŋ akɛ amɛbaafã gbɛ amɛshi amɛweku lɛ, mɛni baa amɛjwɛŋmɔŋ yɛ amɛbii lɛ atsɔsemɔ he?

YOO ko ni atsɛɔ Marilyn * lɛ kɛɛ akɛ: “Daa nɛɛ ni miwu James baajɛ nitsumɔ eba lɛ, etɔ lɛ bliboo, ni shika ni ekɛbaa shĩa lɛ hu shɛɛɛ nɔ ko, fe nɔ ni he hiaa wɔ lɛ kɛkɛ.” Ekɛfata he akɛ: “Miitao maye mabua lɛ, ni miitao mahe nibii fɛfɛji ni wɔbinuu ni atsɛɔ lɛ Jimmy lɛ skulbii lɛ yɔɔ lɛ eko lɛ mahã Jimmy.” Marilyn miitao ni eye ebua ewekumɛi krokomɛi lɛ hu, ní ekɛ shika ko hu ato kɛhã wɔsɛɛ. Enanemɛi babaoo efã gbɛ kɛtee maŋsɛɛ koni amɛyatao shika babaoo. Lɛ hu eetao efã gbɛ kɛya maŋsɛɛ, shi kɛ́ ejwɛŋ gbɛ ni ebaafã lɛ he lɛ, eyiŋ feɔ lɛ enyɔnyɔɔnyɔ. Mɛni hewɔ?

2 Kɛ́ Marilyn susu shi ni ebaashi eweku ni esumɔɔ lɛ, kɛ bɔ ni enyɛŋ ekɛ eweku lɛ afee ekome kɛsɔmɔ Yehowa lɛ he lɛ, edɔɔ lɛ waa. Fɛɛ sɛɛ lɛ, eshwie eyiŋ akɛ, mɛi komɛi efã gbɛ kɛtee maŋsɛɛ be saŋŋ nɛ, ni etamɔ nɔ ni amɛweku lɛ miisɔmɔ Yehowa jogbaŋŋ lolo. Shi nakai beaŋ nɔŋŋ lɛ, esusu bɔ ni ebaafee etsɔse ebi Jimmy kɛjɛ he ni ebaafã gbɛ kɛya lɛ hu he. Ani ebaanyɛ etsɔ Intanɛt lɛ nɔ etsɔse ebinuu lɛ jogbaŋŋ yɛ “Nuŋtsɔ [Yehowa] tsɔsemɔ kɛ ŋaawoo lɛ mli”?Efe. 6:4.

3 Marilyn bi ŋaawoo. Ewu sumɔɔɔ ni efãa gbɛ lɛ, shi ekɛɛ etsiŋ yoo lɛ naa kɛ́ ekɛɛ eesumɔ ni eya. Asafoŋ onukpai lɛ  kɛ mɛi krokomɛi ni yɔɔ asafo lɛ mli lɛ wo lɛ ŋaa ni ekaya, shi nyɛmimɛi yei babaoo wo lɛ hewalɛ ni eya. Amɛkɛɛ lɛ akɛ: “Kɛ́ osumɔɔ oweku lɛ, obaaya. Obaanyɛ oya nɔ osɔmɔ Yehowa.” Yɛ Marilyn yiŋ ni etɛ̃ɛɛ lɛ lɛ fɛɛ sɛɛ lɛ, eshi ewu James kɛ ebinuu Jimmy ni etee maŋsɛɛ koni eyatsu nii. Ewo amɛ shi akɛ: “Etsɛŋ ni maba.”

OKƐ BIBLIA MLI SHISHITOO MLAI ATSU OWEKU SƆ̃I AHE NII

4. Mɛni hewɔ mɛi babaoo fãa gbɛ, ni bei pii lɛ, namɛi amɛshiɔ amɛbii amɛhãa?

4 Yehowa sumɔɔɔ ni hɔmɔ yeɔ ewebii. Kɛjɛ blema tɔ̃ɔ lɛ, mɛi fãa kɛyaa he kroko yɛ hɔmɔ hewɔ. (Lala 37:25; Abɛi 30:8) Blematsɛ Yakob tsu ebihii lɛ kɛtee Mizraim ní amɛyahe niyenii kɛba, koni hɔmɔ akagbe amɛ. * (1 Mose 42:1, 2) Shi ŋmɛnɛ lɛ, jeee hɔmɔ hewɔ mɛi babaoo fãa gbɛ lɛ. Belɛ, mɛni hewɔ amɛyaa mɔ? Amɛteŋ mɛi pii hiɛ nyɔmɔ babaoo. Mɛi komɛi hu lɛ, amɛmiitao amɛweku lɛ aná shihilɛ kpakpa. Enɛ hewɔ lɛ, amɛshiɔ amɛweku lɛ kɛyaa he ko ni ewaaa akɛ amɛbaaná shika yɛ, kɛ́ eji amɛmaŋ lɛ nɔŋŋ mli he ko jio, maŋsɛɛ jio. Bei pii lɛ, amɛshiɔ amɛbii ni darako lɛ amɛhãa amɛhefatalɔ, amɛbii ni edara, amɛfɔlɔi, wekumɛi krokomɛi, loo amɛnanemɛi. Eyɛ mli akɛ edɔɔ mɛi ni fãa gbɛ nɛɛ akɛ amɛaashi amɛhefatalɔi loo amɛbii moŋ, shi amɛteŋ mɛi babaoo nuɔ he akɛ nɔ ko bɛ ni amɛbaafee yɛ he.

5, 6. (a) Mɛni Yesu wie yɛ bɔ ni aaafee aná miishɛɛ ni afeee yeyeeye lɛ he? (b) Mɛɛ heloonaa nii Yesu tsɔɔ esɛɛnyiɛlɔi lɛ ni amɛbi kɛ́ amɛmiisɔle? (d) Mɛɛ gbɛ nɔ Yehowa jɔɔ wɔ?

5 Be ni Yesu yɔɔ shikpɔŋ lɛ nɔ lɛ, no mli lɛ mɛi babaoo yeɔ ohia, ni ekolɛ amɛsusu akɛ kɛ́ amɛná shika lɛ, ebaahã amɛná miishɛɛ, ni amɛfeŋ yeyeeye. (Mar. 14:7) Shi Yesu miisumɔ ni mɛi lɛ kɛ amɛhiɛ afɔ̃ nɔ kroko moŋ nɔ. Eesumɔ ni amɛkɛ amɛhiɛ afɔ̃ Yehowa, mɔ ni jɔɔmɔi hiɔ shi kɛyaa naanɔ lɛ nɔ. Yɛ Yesu Gɔŋ nɔ Shiɛmɔ lɛ mli lɛ, etsɔɔ akɛ, Yehowa ni akɛaabɔ naanyo lɛ ji nɔ ni hãa mɔ náa miishɛɛ diɛŋtsɛ ni efeee yeyeeye, shi jeee heloonaa nibii loo mɔ lɛ diɛŋtsɛ mɔdɛŋbɔɔ.

6 Be ni Yesu tsɔɔ bɔ ni asɔleɔ ahãa lɛ, ekɛɛ wɔbi ni ahã wɔ “wɔboloo kɛhã gbi nɛɛ,” ni tsɔɔ akɛ wɔsɔle wɔbi wɔdaa gbi hiamɔ nii, shi jeee ni wɔbi ni ahã wɔná ogbɔjɔ shihilɛ. Ekɛɛ etoibolɔi lɛ faŋŋ akɛ: “Nyɛkpaa jwetrii ni nyɛbɔɔ nyɛhãa nyɛhe yɛ shikpɔŋ lɛ nɔ lɛ . . . Moŋ lɛ, nyɛbɔa jwetrii nyɛhãa nyɛhe yɛ ŋwɛi.” (Mat. 6:9, 11, 19, 20, NW) Wɔbaanyɛ wɔkɛ wɔhiɛ afɔ̃ Yehowa nɔ akɛ ebaajɔɔ wɔ taakɛ ewo shi lɛ. Jeee akɛ ebaasumɔ wɔsane pɛ kɛkɛ, moŋ lɛ, ebaahã wɔ nibii ni he hiaa wɔ lɛɛlɛŋ lɛ. Anɔkwa, gbɛ pɛ ni wɔbaanyɛ wɔtsɔ nɔ wɔná miishɛɛ diɛŋtsɛ ni wɔkafee yeyeeye ji, ni wɔkɛ wɔhiɛ afɔ̃ wɔ-Tsɛ ni sumɔɔ wɔ lɛ nɔ moŋ fe shika.Nyɛkanea Mateo 6:24, 25, 31-34.

7. (a) Namɛi Yehowa kɛ bii atsɔsemɔ ewo amɛdɛŋ? (b) Mɛni hewɔ esa akɛ fɔlɔi enyɔ lɛ fɛɛ ahi he kome kɛtsɔse amɛbii lɛ?

7 ‘Nyɔŋmɔ jalɛ lɛ’ ni wɔɔtao tsutsu lɛ biɔ ni wɔtsu weku sɔ̃i ni jwere wɔnɔ lɛ ahe nii taakɛ Yehowa kpaa gbɛ lɛ. Shishitoo mla ko yɛ Mose Mla lɛ mli ni kɔɔ Kristofoi ahe, no ji akɛ: Esa akɛ fɔlɔi diɛŋtsɛ atsɔɔ amɛbii lɛ bɔ ni esa akɛ amɛsɔmɔ Yehowa amɛhã. (Nyɛkanea 5 Mose 6:6, 7.) Nyɔŋmɔ kɛ́ nitsumɔ nɛɛ ewo fɔlɔi enyɔ lɛ fɛɛ adɛŋ, jeee bii lɛ aniimɛi kɛ amɛnaamɛi loo mɔ kroko. Maŋtsɛ Salomo wie akɛ: “Mibi, bo otsɛ tsɔsemɔ lɛ toi, ni kaashɛ onyɛ mla lɛ ofɔ!” (Abɛi 1:8) Yehowa miisumɔ ni fɔlɔi enyɔ lɛ fɛɛ ahi he kome kɛtsɔɔ amɛbii lɛ anii, ni amɛtsɔse amɛ. (Abɛi 31:10, 27, 28) Kɛ́ bii lɛ nu ni amɛfɔlɔi lɛ miigba Yehowa he sane gbi fɛɛ gbi, ni amɛna bɔ ni fɔlɔi lɛ sɔmɔɔ Yehowa amɛhãa lɛ, amɛ hu amɛbaafee nakai nɔŋŋ.

 NAAGBAI NI AKPAAA GBƐ BAANYƐ ABA

8, 9. (a) Kɛ́ fɔlɔ ko shi eweku lɛ, mɛɛ tsakemɔi enɛ kɛbaa? (b) Kɛ́ fɔlɔ ko kɛ ebii bɛ he kome lɛ, mɛɛ naagbai ekɛbaa?

8 Mɛi babaoo yɛ ni dani amɛbaafã gbɛ lɛ, amɛsusuɔ naagbai ni baanyɛ ajɛ mli kɛba kɛ nibii ni ebaabi ni amɛkɛshã afɔle lɛ he. Shi onyɛŋ ole bɔ ni yiŋkpɛɛ nɛɛ baasa oweku lɛ he ahã. (Abɛi 22:3) * Be ni Marilyn fã gbɛ lɛ sɛɛ etsɛɛɛ lɛ, ehiɛ bɔi eweku lɛ tsemɔ waa. Nakai nɔŋŋ ewu kɛ ebi lɛ hu hiɛ tse lɛ waa. Daa nɛɛ, ebinuu Jimmy biɔ lɛ akɛ: “Mɛni hewɔ oshi mi lɛ?” Marilyn to akɛ eyaaye nyɔji fioo ko, shi be ni eye fe afi lɛ, eyɔse akɛ wekukpaa ni yɔɔ ekɛ eweku lɛ teŋ lɛ miitsake. Jimmy tsake ewo lɛ kwraa. Ekɛ lɛ egbaaa sane tamɔ tsutsu lɛ, ni ekɛ nibii teɔ lɛ hu. Marilyn kɛ dɔlɛ wie akɛ: “Suɔmɔ ni eyɔɔ kɛhã mi lɛ tã kwraa.”

9 Kɛ́ fɔlɔ ko kɛ ebii bɛ he kome lɛ, ebaanyɛ efite amɛ miishɛɛ, ni ebaanyɛ esa amɛjeŋba hu he. * Kɛ́ bii lɛ darako ni ashi amɛ be kplaŋŋ lɛ, eyeɔ awui waa. Marilyn kɛɛ Jimmy akɛ, lɛ ehewɔ ni etɔɔ lɛ lɛ. Shi Jimmy hu nu he akɛ emami ekpoo lɛ. Shishijee mli lɛ, emli fu akɛ emami eshi lɛ. Shi sɛɛ mli lɛ, kɛ́ emami basara amɛ lɛ, ehe woɔ emli la. Jimmy booo emami toi ni esumɔɔɔ lɛ hu dɔŋŋ, taakɛ gbekɛbii ni ashiɔ amɛ lɛ ateŋ mɛi babaoo feɔ lɛ.Nyɛkanea Abɛi 29:15.

Onyɛŋ ofua obi lɛ yɛ Intanɛt lɛ nɔ (Kwɛmɔ kuku 10)

10. (a) Kɛ́ fɔlɔi kɛ heloonaa nibii maje amɛbii, moŋ fe ni amɛkɛ amɛ aaahi he kome lɛ, mɛni amɛtsɔɔ amɛbii lɛ? (b) Kɛ́ fɔlɔ ko kɛ ebii ateŋ jɛkɛ lɛ, mɛni enyɛŋ efee?

10 Akɛni Marilyn kɛ ebi Jimmy teŋ ejɛkɛ hewɔ lɛ, emajeɔ lɛ shika kɛ nibii krokomɛi koni no ahã ená miishɛɛ, shi sɛɛ mli lɛ eyɔse akɛ, asomoaŋ eedu suɔmɔ kɛhã heloonaa nibii moŋ eewo ebi lɛ tsuiŋ fe suɔmɔ ni esa akɛ ebi lɛ aná ahã eweku lɛ kɛ Yehowa lɛ. (Abɛi 22:6) Dɔlɛ sane ji akɛ, Jimmy kɛɛ lɛ akɛ: “Kaaba, bo lɛ yaa nɔ omaje mi nibii lɛ.” Etsɛɛɛ ni Marilyn yɔse akɛ, enyɛŋ etsɔ woji aŋmalamɔ, tɛlifoŋ, kɛ Intanɛt lɛ nɔ etsɔse ebi lɛ. Ewie akɛ: “Onyɛŋ ofua obi lɛ yɛ Intanɛt lɛ nɔ loo oshɔ enaa yɛ Intanɛt lɛ nɔ kɛ́ eyaawɔ.”

Kɛ́ ofã gbɛ oshi ohefatalɔ lɛ, mɛɛ shihilɛ ni esaaa obaanyɛ okɛkpe? (Kwɛmɔ kuku 11)

11. (a) Kɛ́ wu kɛ ŋa bɛ he kome lɛ yɛ nitsumɔ hewɔ lɛ, te esaa amɛgbalashihilɛ lɛ he ehãa tɛŋŋ? (b) Mɛɛ be Marilyn yɔse akɛ esa akɛ eku esɛɛ ni ekɛ eweku lɛ abahi he kome?

11 Gbɛ ni Marilyn fã lɛ sa wekukpaa ni kã ekɛ Yehowa teŋ, kɛ nɔ ni kã ekɛ ewu James teŋ lɛ he. Eyaa asafoŋ kpeei kɛ shiɛmɔ shi kome pɛ yɛ otsi mli, ni bei komɛi po lɛ eyaaa kwraa. Agbɛnɛ hu lɛ, enitsumɔtsɛ lɛ ka shii abɔ akɛ ekɛ lɛ baaná bɔlɛ. Akɛni James kɛ Marilyn teŋ  ejɛkɛ hewɔ lɛ, amɛnyɛɛɛ amɛgba naagbai ni amɛkɛkpeɔ lɛ ahe sane. Enɛ hã James kɛ yei krokomɛi bɔi sanegbaa, ni Marilyn hu kɛ hii krokomɛi bɔi sanegbaa, ni shwɛ sharao kulɛ amɛ fɛɛ amɛfite gbãla. Marilyn na akɛ, eyɛ mli akɛ ekɛ ewu lɛ fɛɛ fiteee gbãla moŋ, shi akɛni amɛbɛ he kome hewɔ lɛ, amɛnyɛɛɛ amɛná be kɛgba sane, amɛnyɛɛɛ amɛmɔ amɛnineshi, amɛfua amɛhe, amɛfee nibii krokomɛi kɛjie “suɔmɔ” kpo amɛtsɔɔ amɛhe, ni amɛnyɛɛɛ amɛtsu amɛgbalashihilɛ mli “gbɛnaa nii” lɛ he nii, taakɛ Biblia lɛ biɔ ni gbalashihilɛ mli bii afee lɛ. (Sal. Lal. 1:2; 1 Kor. 7:3, 5) Amɛnyɛɛɛ amɛkɛ amɛbinuu lɛ afee ekome kɛjá Yehowa hu. Marilyn kɛɛ akɛ: “Be ni awie yɛ kpee wulu ko shishi akɛ weku jamɔ ni aaafee daa otsi lɛ baaye abua wɔ koni ahere wɔyiwala yɛ Yehowa gbi wulu lɛ nɔ lɛ, miyɔse akɛ esa akɛ maku misɛɛ kɛya shĩa.” Ena akɛ, esa akɛ etswa eweku lɛ kɛ wekukpaa ni kã ekɛ Yehowa teŋ lɛ ema shi ekoŋŋ.

ŊAAWOO KPAKPA KƐ ŊAAWOO GBONYO

12. Mɛɛ ŋaawoo ni jɛ Biblia lɛ mli baanyɛ aye abua mɛi ni efã gbɛ kɛshi amɛwekui lɛ?

12 Be ni Marilyn kpɛ eyiŋ akɛ ebaaku esɛɛ kɛya shĩa lɛ, mɛi komɛi wo lɛ ŋaa kpakpa, mɛi komɛi hu wo lɛ ŋaa gbonyo. Asafoŋ onukpai ni yɔɔ asafo ni eyɔɔ mli yɛ maŋsɛɛ lɛ mli lɛ jie eyi akɛ ekpɛ eyiŋ nakai. Shi mɛi krokomɛi ni amɛ hu amɛshi amɛwekui ni amɛmiitsu nii yɛ maŋsɛɛ tamɔ lɛ nɔŋŋ lɛ bɔ mɔdɛŋ akɛ amɛaakɔne eyiŋ koni ehi shi. Yɛ nɔ najiaŋ ni amɛaanyiɛ enɔkwɛmɔnɔ kpakpa lɛ sɛɛ lɛ, amɛbɔ mɔdɛŋ akɛ amɛbaaje enijiaŋ wui, ni amɛkɛɛ lɛ akɛ, kɛji eku esɛɛ etee lɛ, enaŋ nitsumɔ ni baahã ená shika babaoo. Amɛkɛɛ lɛ hu akɛ: “Etsɛŋ ni obaaku osɛɛ oba ekoŋŋ.” Yɛ nɔ najiaŋ ni Kristofoi aaawie wiemɔi ni tamɔ nɛkɛ ni jeɔ mɔ nijiaŋ wui lɛ, esa akɛ amɛtsɔɔ “oblayei lɛ ni amɛsumɔ amɛwumɛi, amɛsumɔ amɛbii, . . . amɛbaa amɛwe yi jogbaŋŋ,” loo amɛkwɛ amɛ diɛŋtsɛ amɛshĩa, “koni akawie Nyɔŋmɔ wiemɔ lɛ he musubɔɔ wiemɔ.”Nyɛkanea Tito 2:3-5.

13, 14. Mɛni hewɔ ja mɔ ko yɛ hemɔkɛyeli dani ebaanyɛ efee nɔ ni sa Yehowa hiɛ, fe ni eeefee nɔ ni ewekumɛi sumɔɔ lɛ? Okɛ enɛ he nɔkwɛmɔnɔ ahã.

13 Mɛi ni efã gbɛ kɛshi amɛwekui nɛɛ babaoo jɛ hei ni mɛi nuɔ he akɛ esa akɛ akɛ woo ahã wekumɛi fe mɔ fɛɛ mɔ, titri lɛ, fɔlɔi. Ja Kristofonyo ko ená hemɔkɛyeli ni mli wa dani ebaanyɛ ewu eshi nɔ ni ewekumɛi sumɔɔ akɛ efee ni esaaa Yehowa hiɛ lɛ.

14 Hã wɔsusu nyɛmi yoo ko ni atsɛɔ lɛ Carin lɛ he akɛ nɔkwɛmɔnɔ. Ewie akɛ: “Be ni mifɔ mibinuu Don lɛ, no mli lɛ mi kɛ miwu fɛɛ miitsu nii yɛ maŋsɛɛ, ni akɛ mi bɔi Biblia lɛ kasemɔ etsɛko. Miwekumɛi  lɛ ateŋ mɔ fɛɛ mɔ miikpa gbɛ akɛ mikɛ Don baamaje mifɔlɔi yɛ wɔmaŋ koni amɛtsɔse lɛ kɛyashi wɔbaaná shika babaoo.” Be ni Carin kɛɛ lɛ diɛŋtsɛ ebaatsɔse Don lɛ, ewekumɛi, ni ewu po fata he lɛ, kɛɛ eji anihaolɔ, ejaakɛ amɛsusu akɛ esumɔɔ ni etsuɔ nii kɛwaa ewu lɛ, ni amɛŋmɔ lɛ. Carin kɛɛ akɛ: “Yɛ anɔkwale mli lɛ, nakai beaŋ lɛ, minaaa tɔmɔ ni yɔɔ he akɛ mahã mifɔlɔi akwɛ Don afii fioo komɛi. Shi mile akɛ Yehowa etu bii akwɛmɔ ewo wɔ, ni ji fɔlɔi lɛ adɛŋ.” Be ni Carin ŋɔ hɔ ekoŋŋ lɛ, ewu ni jeee Odasefonyo lɛ kɛɛ lɛ akɛ eyajie musu lɛ. Akɛni Carin kpɛ eyiŋ jogbaŋŋ yɛ klɛŋklɛŋ shihilɛ lɛ mli hewɔ lɛ, no waje hemɔkɛyeli ni eyɔɔ yɛ Yehowa mli lɛ, ni shi kome ekoŋŋ lɛ, efee nɔ ni sa Yehowa hiɛ. Ŋmɛnɛ lɛ, eŋɔɔ lɛ, ewu, kɛ ebii lɛ fɛɛ naa akɛ amɛ fɛɛ amɛhi he kome. Eji Carin kɛ ebii lɛ ateŋ mɔ kome loo mɛi enyɔ lɛ fɛɛ tee emaŋ koni mɛi krokomɛi akwɛ amɛ kulɛ, amɛnaŋ miishɛɛ nɛkɛ.

15, 16. (a) Te atsɔse Vicky yɛ egbekɛbiiashi ahã tɛŋŋ? (b) Mɛni hewɔ ekpɛ eyiŋ akɛ etsɔseŋ ebiyoo lɛ nakai lɛ?

15 Odasefonyo ko ni atsɛɔ lɛ Vicky lɛ wie akɛ: “Minaa kwɛ mi afii fioo komɛi be ni mifɔlɔi miikwɛ minyɛmi yoo fioo lɛ. Be ni mikuɔ misɛɛ mikɛ mifɔlɔi lɛ ayahi shi ekoŋŋ lɛ, suɔmɔ ni miyɔɔ kɛhã amɛ lɛ etsake kwraa. Minyɛmi yoo lɛ nyɛɔ ekɛ amɛ gbaa nɔ fɛɛ nɔ he sane, efuaa amɛ, ni ekɛ amɛ bɔɔ gbagbalii. Mi lɛ, minyɛɛɛ mabɛŋkɛ amɛ tamɔ minyɛmi yoo lɛ, ni amrɔ nɛɛ ní mida nɛɛ po lɛ, jeee nɔ fɛɛ nɔ minyɛɔ mikɛɔ amɛ. Mi kɛ minyɛmi yoo lɛ fɛɛ ewo wɔfɔlɔi ashi akɛ wɔbaakwɛ amɛ kɛ́ amɛgbɔlɔ. Shi mafee nakai akɛni eji sɔ̃ lɛ hewɔ, shi minyɛmi yoo lɛ baajɛ suɔmɔ mli efee nakai.”

16 Vicky kɛɛ akɛ: “Amrɔ nɛɛ, mimami miitao ni mi hu mikɛ mibiyoo lɛ amaje lɛ ni etsɔse lɛ taakɛ ekɛ mi hã emami lɛ. Mitsɔ ŋaa gbɛ nɔ mikpoo.” Etsa nɔ akɛ: “Mi kɛ miwu miitao wɔtsɔse wɔ diɛŋtsɛ wɔbi lɛ bɔ ni Yehowa taoɔ. Ni misumɔŋ ni wɔsɛɛ lɛ, suɔmɔ ni yɔɔ mi kɛ mibi lɛ teŋ lɛ afite.” Vicky eyɔse akɛ, gbɛ ni hi fe fɛɛ ji, ní esumɔ Yehowa ni ekɛ eshishitoo mlai lɛ aye heloonaa nibii asɛɛtiumɔ kɛ nɔ ni ewekumɛi sumɔɔ lɛ hiɛ. Yesu wie faŋŋ akɛ: “Mɔ ko nyɛŋ nuŋtsɔmɛi enyɔ asɔmɔ,” ni ji Nyɔŋmɔ kɛ nifalɛ.Mat. 6:24; 2 Mose 23:2.

YEHOWA JƆƆ WƆMƆDƐŊBƆI LƐ ANƆ

17, 18. (a) Be fɛɛ be lɛ, mɛni Kristofonyo ko baanyɛ ahala akɛ ebaafee? (b) Mɛɛ sanebimɔi ahe wɔbaasusu yɛ nikasemɔ ni nyiɛ sɛɛ lɛ mli?

17 Wɔ-Tsɛ Yehowa ewo wɔ shi akɛ, ebaahã wɔ nɔ fɛɛ nɔ ni he hiaa wɔ kɛ́ wɔkɛ Maŋtsɛyeli lɛ kɛ ejalɛ lɛ ye klɛŋklɛŋ gbɛhe yɛ wɔshihilɛ mli. (Mat. 6:33) No hewɔ lɛ, be fɛɛ be lɛ, anɔkwa Kristofoi yɛ hegbɛ ni amɛhalaa nɔ ni amɛsumɔɔ. Kɛ́ wɔkɛ shihilɛ ni jaraa kpe po lɛ, gbɛ ko kɛ̃ yɛ ni wɔbaanyɛ wɔtsɔ nɔ wɔkɛ Biblia mli shishitoo mlai atsu nii, ni wɔfee nɔ ni sa Yehowa hiɛ, ejaakɛ ewo shi akɛ ‘ebaaje gbɛ’ ehã wɔ. (Nyɛkanea 1 Korintobii 10:13.) Kɛ́ osɔle obi nilee kɛ gbɛtsɔɔmɔ, ni okɛ Yehowa mlai kɛ eshishitoo mlai lɛ tsu nii lɛ, no tsɔɔ akɛ ‘ooto otsui shi oomɛ’ lɛ ni ‘okɛ ohiɛ fɔɔ enɔ,’ “ni eeefee” nɔ ni otaoɔ ehã bo. (Lala 37:5, 7) Yehowa baana mɔdɛŋ ni wɔbɔɔ koni wɔsɔmɔ lɛ lɛ, ni ebaahã wɔ nɔ fɛɛ nɔ ni wɔtaoɔ. Kɛ́ wɔkɛ lɛ ye klɛŋklɛŋ gbɛhe yɛ nɔ fɛɛ nɔ mli lɛ, ebaahã nɔ fɛɛ nɔ ni wɔfeɔ lɛ ‘ashwere.’—Okɛto 1 Mose 39:3 lɛ he.

18 Shi te wɔɔfee tɛŋŋ wɔsaa wekukpaa ni yɔɔ wɔ kɛ wɔweku lɛ teŋ kɛji wɔku wɔsɛɛ kɛjɛ gbɛfãa mli wɔba? Mɛni wɔbaanyɛ wɔfee kɛkwɛ wɔweku lɛ koni wɔkafã gbɛ kɛtee wɔyatao nitsumɔ yɛ he kroko? Ni te wɔɔfee tɛŋŋ wɔye wɔbua mɛi krokomɛi koni amɛkafã gbɛ amɛshi amɛweku lɛ? Wɔbaasusu sanebimɔi nɛɛ ahe yɛ nikasemɔ ni nyiɛ sɛɛ lɛ mli.

^ kk. 1 Atsake mɛi lɛ agbɛ́i.

^ kk. 4 Be fɛɛ be ni Yakob bihii lɛ yaheɔ niyenii yɛ Mizraim lɛ, kɛhooo kwraa lɛ, amɛshiɔ amɛwekui lɛ otsii etɛ. Sɛɛ mli be ni Yakob kɛ ebihii lɛ fã kɛtee Mizraim lɛ, amɛkɛ amɛŋamɛi kɛ amɛbii lɛ fɛɛ tee.1 Mose 46:6, 7.

^ kk. 8 Kwɛmɔ February 2013 Awake! lɛ mli sane ni yitso ji “Immigration—Dreams and Realities” lɛ.

^ kk. 9 Amaniɛbɔi ni jɛ maji srɔtoi anɔ lɛ tsɔɔ akɛ, kɛ́ mɔ ko shi ehefatalɔ loo ebii kɛtee maŋsɛɛ koni eyatsu nii lɛ, ekɛ naagbai ni yɔɔ hiɛdɔɔ baa. Naagbai nɛɛ ekomɛi ji gbalafitemɔ, hii kɛ hii loo yei kɛ yei ni kɛ amɛhe náa bɔlɛ, loo wekunyo ni bɛŋkɛ kpaakpa ni akɛnáa bɔlɛ. Ekolɛ gbekɛbii lɛ kɛ naagbai baakpe yɛ skul. Gbekɛbii lɛ ekomɛi hu amli fuɔ, amɛfeɔ yeyeeye, amɛhaoɔ, loo amɛkaa akɛ amɛbaagbe amɛhe po.