Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ) MARCH 2014

Nyɛwoa Mɛi ni Egbɔlɔ ni Yɔɔ Nyɛteŋ Lɛ

Nyɛwoa Mɛi ni Egbɔlɔ ni Yɔɔ Nyɛteŋ Lɛ

‘Wo nuumo hiɛ nyam.’3 MOSE 19:32.

1. Mɛɛ shihilɛ ni yɔɔ mɔbɔ adesai yɔɔ mli ŋmɛnɛ?

JEEE Yehowa yiŋtoo ji akɛ adesai ana nɔ, amɛgbɔjɔ, ni amɛgbɔlɔ. Eyiŋtoo moŋ ji akɛ, hii kɛ yei ahi shi ni amɛná gbɔmɔtsoŋ hewalɛ kpakpa yɛ Paradeiso. Shi amrɔ nɛɛ, ‘bɔɔ nii lɛ fɛɛ dɔmɔɔ ŋtsɔi ni amɛkɔ̃mɔɔ.’ (Rom. 8:22) Kɛ́ okwɛ lɛ, te Nyɔŋmɔ baanu he eha tɛŋŋ kɛ́ ena bɔ ni esha eha adesai naa nɔ lɛ? Mɔbɔ sane ji akɛ, mɛi ni egbɔlɔ lɛ ateŋ mɛi babaoo náaa mɛi ni baakwɛ amɛ beni yelikɛbuamɔ he hiaa amɛ waa lɛ.Lala 39:5; 2 Tim. 3:3.

2. Mɛni hewɔ eŋɔɔ Kristofoi anaa akɛ amɛyɛ mɛi ni egbɔlɔ yɛ amɛsafoi lɛ amli lɛ?

2 Akɛ Yehowa webii lɛ, eŋɔɔ wɔnaa akɛ wɔyɛ mɛi ni egbɔlɔ yɛ wɔsafoi lɛ amli. Wɔnáa amɛnilee lɛ he sɛɛ, ni wɔkaseɔ amɛhemɔkɛyeli lɛ hu. Wɔteŋ mɛi pii lɛ, wɔwekumɛi ji mɛi ni egbɔlɔ nɛɛ. Shi kɛ́ nyɛmimɛi ni egbɔlɔ nɛɛ ji wɔwekumɛi jio, amɛjeee wɔwekumɛi jio lɛ, amɛsane kã wɔtsui nɔ. (Gal. 6:10; 1 Pet. 1:22) Wɔbaasusu bɔ ni Nyɔŋmɔ naa mɛi ni egbɔlɔ lɛ ehaa lɛ he, ní wɔkwɛ bɔ ni wɔbaaná he sɛɛ wɔha. Kɛfata he lɛ, wɔbaasusu sɔ̃i ni esa akɛ mɛi ni egbɔlɔ lɛ awekumɛi kɛ asafo lɛ atsu he nii kɛkwɛ amɛ lɛ ahe.

 “KAASHƐ MI OFƆ̃”

3, 4. (a) Mɛni mɔ ni ŋma Lala 71 lɛ bi Yehowa? (b) Mɛni asafo lɛ mli bii ni egbɔlɔ lɛ baanyɛ abi Nyɔŋmɔ?

3 Lala 71:9 lɛ kɛɔ akɛ: “Kaashɛ mi ofɔ̃ yɛ migbɔlɛ be lɛŋ; kɛ́ mihewalɛ tã.” Eeenyɛ efee akɛ David ji mɔ ni ŋma lala nɛɛ, ejaakɛ etamɔ nɔ ni etsa Lala 70 ni ekuku kome lɛ tsɔɔ akɛ, David ni ŋma lɛ nɔ. No hewɔ lɛ, eeenyɛ efee akɛ David ji mɔ ni wie nɔ ni aŋma yɛ Lala 71:9 lɛ. Esɔmɔ Nyɔŋmɔ ewala gbii abɔ fɛɛ, ni Yehowa kɛ lɛ tsu nibii wuji. (1 Sam. 17:33-37, 50; 1 Maŋ. 2:1-3, 10) Eyɛ mli akɛ David etsu nibii babaoo yɛ Yehowa sɔɔmɔ lɛ mli moŋ, shi yɛ egbɔlɛ beaŋ lɛ, ebi Yehowa ni ekwɛ lɛ.Nyɛkanea Lala 71:17, 18.

4 Ŋmɛnɛ lɛ, mɛi babaoo ashihilɛ tamɔ David nɔ lɛ. Eyɛ mli akɛ amɛmiigbɔlɔ ni amɛyɛ jaramɔ shihilɛ mli moŋ, kɛlɛ amɛyaa nɔ amɛkɛ amɛnyɛmɔ fɛɛ jieɔ Nyɔŋmɔ yi. (Jaj. 12:1-7) Ekolɛ amɛteŋ mɛi pii nyɛɛɛ amɛfee nibii ni tsutsu lɛ amɛfeɔ lɛ dɔŋŋ, ni nakai nɔŋŋ eji yɛ shiɛmɔ nitsumɔ lɛ mli po. Shi amɛ hu amɛbaanyɛ amɛkpa Yehowa fai ni eya nɔ ejɔɔ amɛ ni ekwɛ amɛ. Anɔkwafoi ni egbɔlɔ nɛɛ baanyɛ aná nɔmimaa akɛ Nyɔŋmɔ baaha amɛsɔlemɔi lɛ ahetoo. Nɔ hewɔ ni wɔkɛɔ nakai lɛ ji akɛ, Yehowa kɛ emumɔ lɛ tsirɛ David ni eŋma sɔlemɔ ko ni kɔɔ shihilɛ ni mɛi ni egbɔlɔ lɛ yɔɔ mli lɛ he.

5. Te Yehowa naa anɔkwafoi ni egbɔlɔ lɛ ehaa tɛŋŋ?

5 Ŋmalɛ lɛ feɔ lɛ faŋŋ akɛ anɔkwafoi ni egbɔlɔ lɛ ajara wa waa yɛ Yehowa hiɛ, ni eesumɔ ni etsuji kɛ woo aha amɛ. (Lala 22:25-27; Abɛi 16:31; 20:29) Biblia lɛ kɛɔ yɛ 3 Mose 19:32 lɛ akɛ: “Tee shi yɛ yiteŋwajiatsɛ hiɛ, ni owo nuumo hiɛ nyam, ni oshe o-Nyɔŋmɔ lɛ; miji Yehowa.” Beni aŋmala wiemɔi nɛɛ, no mli lɛ abuɔ woo ni akɛaaha mɛi ni egbɔlɔ lɛ akɛ eji nɔ ko ni he hiaa waa, ni nakai nɔŋŋ eji ŋmɛnɛ. Shi namɔ sɔ̃ eji akɛ ekwɛ mɛi ni egbɔlɔ lɛ?

WEKU LƐ SƆ̃

6. Mɛɛ nɔkwɛmɔnɔ Yesu fee yɛ fɔlɔi akwɛmɔ gbɛfaŋ?

6 Nyɔŋmɔ Wiemɔ lɛ kɛɔ akɛ: “Wo otsɛ kɛ onyɛ.” (2 Mose 20:12; Efe. 6:2) Yesu tsɔɔ akɛ, famɔ nɛɛ he miihia waa beni ebu Farisifoi kɛ woloŋmalɔi lɛ ni kpoo akɛ amɛaakwɛ amɛfɔlɔi lɛ fɔ lɛ. (Mar. 7:5, 10-13) Yesu diɛŋtsɛ fee enɛ he nɔkwɛmɔnɔ ni nɔ bɛ. Beni egboɔ yɛ sɛŋmɔtso lɛ nɔ lɛ, eto gbɛjianɔ koni Yohane, ni ji kaselɔ ni esumɔɔ lɛ lɛ akwɛ enyɛ, ní no mli lɛ eeenyɛ efee akɛ eji okulafo lɛ.Yoh. 19:26, 27.

7. (a) Mɛɛ shishitoo mla Paulo wie he yɛ fɔlɔi akwɛmɔ he? (b) Mɛni he Paulo wieɔ beni etsĩ shishitoo mla nɛɛ tã lɛ?

7 Akɛ mumɔ tsirɛ bɔfo Paulo ni eŋma Timoteo akɛ, esa akɛ Kristofoi akwɛ amɛ diɛŋtsɛ amɛshĩabii. (Nyɛkanea 1 Timoteo 5:4, 8, 16.) Susumɔ nɔ ni Paulo wieɔ he beni etsĩ enɛ tã lɛ he okwɛ. No mli lɛ, eewie mɛi ni asafo lɛ baanyɛ aye abua amɛ shika gbɛfaŋ lɛ he. Eha efee faŋŋ akɛ, okulafoi ni egbɔlɔ lɛ abii, amɛnabii, kɛ amɛwekumɛi krokomɛi lɛ ji mɛi titri ni sɔ̃ lɛ kã amɛ nɔ akɛ amɛkwɛ okulafoi nɛɛ. Enɛ haŋ asafo lɛ afite shika bɔ ni esaaa. Ŋmɛnɛ hu lɛ, gbɛ kome ni Kristofoi tsɔɔ akɛ ‘amɛsheɔ Nyɔŋmɔ gbeyei’ ji akɛ, amɛhaa amɛwekumɛi ni ehia amɛ lɛ nibii ni he hiaa amɛ.

8. Mɛni hewɔ ehi waa akɛ Biblia lɛ kɛ gbɛtsɔɔmɔi pɔtɛɛ komɛi haaa yɛ bɔ ni aaafee akwɛ fɔlɔi ni egbɔlɔ lɛ he lɛ?

8 Eji bii ni edara lɛ asɔ̃ akɛ amɛkwɛ amɛfɔlɔi. Eyɛ mli akɛ Paulo miiwie wekumɛi ni ji héyelilɔi lɛ ahe moŋ, shi esa akɛ akwɛ fɔlɔi ni jeee Kristofoi lɛ hu. Akɛni esoro weku fɛɛ weku hewɔ lɛ, esoro bɔ ni weku fɛɛ weku baato fɔlɔi ni egbɔlɔ lɛ akwɛmɔ he gbɛjianɔ  amɛha. Esoro mɔ fɛɛ mɔ gbɔmɔtsoŋ hewalɛnamɔ, ehiamɔ nii, kɛ esui. Mɛi ni egbɔlɔ lɛ ateŋ mɛi komɛi yɛ bii pii, ni mɛi komɛi hu lɛ, bi kome pɛ amɛyɔɔ. Mɛi komɛi yɛ ni baanyɛ aná yelikɛbuamɔ kɛjɛ amralo lɛ dɛŋ, ni mɛi komɛi hu naŋ yelikɛbuamɔ ni tamɔ nakai. Agbɛnɛ hu lɛ, esoro nɔ ni mɛi ni akwɛɔ amɛ lɛ ateŋ mɔ fɛɛ mɔ sumɔɔ. No hewɔ lɛ, nilee bɛ mli, akɛ wɔɔwie wɔshi gbɛ ni mɛi ni miibɔ mɔdɛŋ waa akɛ amɛkwɛ amɛwekumɛi ni egbɔlɔ lɛ tsɔɔ nɔ amɛkwɛɔ amɛ lɛ, ni etsɔɔɔ suɔmɔ hu. Ejaakɛ Yehowa baanyɛ ajɔɔ yiŋ fɛɛ yiŋ ni wɔdamɔɔ Biblia lɛ nɔ wɔkpɛɔ lɛ nɔ, ni eha eye omanye, taakɛ efee kɛjɛ Mose beaŋ lɛ.4 Mose 11:23.

9-11. (a) Mɛni hewɔ ebaanyɛ efee nɔ ni wa kɛha mɛi komɛi akɛ amɛaakwɛ amɛfɔlɔi ni egbɔlɔ lɛ? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni hewɔ esaaa akɛ bii ni edara lɛ yeɔ amɛhe oyai kɛshiɔ be fɛɛ sɔɔmɔ lɛ? Okɛ enɛ he nɔkwɛmɔnɔ aha.

9 Kɛ́ he ni bii lɛ yɔɔ lɛ kɛ amɛfɔlɔi ateŋ jɛkɛ lɛ, ebaanyɛ efee nɔ ni wa akɛ amɛaakwɛ amɛfɔlɔi ni egbɔlɔ lɛ. Kɛ́ fɔlɔi lɛ gbee shi, amɛwu ko ku, loo amɛkɛ naagba kroko ni yɔɔ hiɛdɔɔ kpe lɛ, ehe baahia ni ayasara amɛ nɔŋŋ. No sɛɛ lɛ, ekolɛ ehe baahia ni aye abua fɔlɔ lɛ—be kukuoo loo be kpalaŋŋ. *

10 Ekolɛ ebaawa kɛha be fɛɛ sɔɔlɔi, ni amɛsɔɔmɔ nitsumɔ lɛ eha amɛmiisɔmɔ yɛ hei ni kɛ amɛfɔlɔi ateŋ jɛkɛ lɛ akɛ amɛaakpɛ amɛyiŋ yɛ amɛfɔlɔi lɛ akwɛmɔ he. Mɛi ni sɔmɔɔ yɛ Betel, maŋsɛɛ sɔɔlɔi, kɛ nɔkwɛlɔi gbɛfalɔi fɛɛ buɔ amɛsɔɔmɔ lɛ akɛ jɔɔmɔ ni nɔ bɛ ni jɛ Yehowa ŋɔɔ. Shi enɛ fɛɛ sɛɛ lɛ, kɛ́ amɛfɔlɔi bɛ hewalɛ lɛ, nɔ klɛŋklɛŋ ni baanyɛ aba amɛjwɛŋmɔŋ ji, ‘Esa akɛ wɔshi wɔsɔɔmɔ lɛ ni wɔya wɔyakwɛ wɔfɔlɔi.’ Kɛlɛ, nilee yɛ mli akɛ aaasɔle yɛ nɔ tuuntu ni esa akɛ afee lɛ he, ni asusu he jogbaŋŋ. Esaaa akɛ mɔ ko yeɔ ehe oyai kɛshiɔ esɔɔmɔ lɛ, ni bei pii po lɛ, ehe ehiaaa ni afee nakai. Ani eeenyɛ efee akɛ hela lɛ sɛɛ etsɛŋ bɔ ni mɛi ni yɔɔ asafo ni fɔlɔi lɛ yɔɔ mli lɛ mli lɛ baanyɛ aye abua?Abɛi 21:5.

11 Akɛ nɔkwɛmɔnɔ lɛ, susumɔ mɔ kɛ enyɛmi ko ni sɔmɔ yɛ he ko ni kɛ amɛmaŋ jɛkɛ lɛ he okwɛ. Mɔ kome sɔmɔ akɛ maŋsɛɛ sɔɔlɔ yɛ Paraguay, ni mɔ kroko lɛ hu sɔmɔ yɛ asafo lɛ yitso ni yɔɔ Brooklyn yɛ New York lɛ. Yelikɛbuamɔ he bahia amɛfɔlɔi ni egbɔlɔ lɛ. No hewɔ lɛ, amɛkɛ amɛŋamɛi ku amɛsɛɛ kɛtee Japan koni amɛyakwɛ nɔ ni amɛbaanyɛ amɛfee kɛye amɛbua amɛfɔlɔi lɛ. Sɛɛ mli lɛ, efee mɔ ni yɔɔ Paraguay lɛ kɛ eŋa lɛ akɛ amɛshi amɛsɔɔmɔ lɛ ni amɛya amɛmaŋ amɛyakwɛ efɔlɔi lɛ. Kɛkɛ ni asafo ni efɔlɔi lɛ yɔɔ mli lɛ onukpai akuu lɛ asaji ahe gbɛjianɔtolɔ lɛ tswa amɛ akɛ, onukpai akuu lɛ ekpɛ mli akɛ amɛbaaye amɛbua amɛfɔlɔi ni egbɔlɔ lɛ. Asafoŋ onukpai lɛ yɛ gbalashihilɛ mli bii lɛ anitsumɔ lɛ he miishɛɛ, no hewɔ lɛ, amɛtswa amɛfai shi akɛ amɛbaafee bɔ fɛɛ bɔ ni amɛbaanyɛ kɛye abua bii lɛ kɛkwɛ amɛfɔlɔi lɛ koni bii lɛ aya nɔ amɛtsu amɛsɔɔmɔ nitsumɔ lɛ. Weku muu lɛ fɛɛ hiɛ sɔ yelikɛbuamɔ ni onukpai lɛ kɛha amɛ lɛ waa.

12. Kɛ́ Kristofoi aweku ko miikpɛ amɛyiŋ yɛ bɔ ni amɛbaakwɛ amɛfɔlɔi ni egbɔlɔ lɛ he lɛ, mɛni esa akɛ amɛha ehi amɛjwɛŋmɔŋ?

12 Bɔ fɛɛ bɔ ni Kristofoi aweku ko baato gbɛjianɔ kɛkwɛ amɛfɔlɔi ni egbɔlɔ lɛ amɛha lɛ, esa akɛ yiŋ ni amɛbaakpɛ lɛ awo Nyɔŋmɔ gbɛ́i lɛ hiɛ nyam. Esaaa akɛ wɔfeɔ wɔnii tamɔ jamɔŋ hiɛnyiɛlɔi ni hi shi yɛ Yesu beaŋ lɛ. (Mat. 15:3-6) Moŋ lɛ, esa akɛ yiŋ fɛɛ yiŋ ni wɔbaakpɛ lɛ aha ajie Nyɔŋmɔ kɛ asafo lɛ yi.2 Kor. 6:3.

 ASAFO LƐ SƆ̃

13, 14. Mɛɛ gbɛ nɔ Biblia lɛ haa wɔnaa akɛ esa akɛ asafoi lɛ aye abua kɛkwɛ mɛi ni egbɔlɔ lɛ?

13 Jeee mɔ fɛɛ mɔ baanyɛ aye abua be fɛɛ sɔɔlɔi taakɛ asafo ni awie he kɛtsɔ hiɛ lɛ fee lɛ. Shi Biblia lɛ tsɔɔ akɛ, esa akɛ asafoi lɛ afee nɔ fɛɛ nɔ ni amɛbaanyɛ kɛye amɛbua nyɛmimɛi ni egbɔlɔ ni feɔ nɔkwɛmɔnɔ kpakpa lɛ. No mli lɛ, “mɔ ko mɔ ko bɛ” klɛŋklɛŋ afii 100 lɛ mli asafo ni yɔɔ Yerusalem lɛ mli “ni efiɔ lɛ.” Enɛ etsɔɔɔ akɛ amɛ fɛɛ amɛyɛ nii. Eka shi faŋŋ akɛ, amɛteŋ mɛi komɛi bɛ nɔ ko tsɔ, shi ‘ajaa nii ni ahɔɔ lɛ yinii lɛ ahaa mɔ fɛɛ mɔ bɔ ni he hiaa lɛ.’ (Bɔf. 4:34, 35) Sɛɛ mli lɛ, sane ko ni yɔɔ hiɛdɔɔ te shi yɛ nakai asafo lɛ mli. Hiɛ kpaa yei okulafoi lɛ ekomɛi anɔ “yɛ daa kwɛmɔ lɛ gbɛfaŋ.” No hewɔ lɛ, bɔfoi lɛ hala hii komɛi ni sa koni amɛkwɛ ni okulafoi lɛ anine ashɛ amɛhiamɔ nii anɔ, ni hiɛaŋkwɛmɔ bɛ mli. (Bɔf. 6:1-5) Yɛ afi 33 Ŋ.B. Pentekoste gbi lɛ nɔ lɛ, maŋsɛɛ bii babaoo batsɔmɔ Kristofoi ni amɛhi Yerusalem koni amɛwaje amɛhemɔkɛyeli lɛ. Eyɛ mli akɛ daa kwɛmɔ lɛ ji gbɛjianɔ ko ni bɔfoi lɛ to be kukuoo koni akɛkwɛ mɛi ni ebatsɔmɔ Kristofoi nɛɛ moŋ, shi yiŋkpɛɛ nɛɛ tsɔɔ akɛ, asafoi lɛ baanyɛ aye abua kɛkwɛ nyɛmimɛi ni egbɔlɔ ni feɔ nɔkwɛmɔnɔ kpakpa, ní ehia amɛ lɛ.

14 Paulo tsɔɔ Timoteo nibii ni esa akɛ asafo lɛ adamɔ nɔ kɛkwɛ akɛ yei okulafoi ni ji Kristofoi lɛ sa kɛha heloŋ gbɛfaŋ yelikɛbuamɔ lo. (1 Tim. 5:3-16) Akɛ mumɔ tsirɛ Yakobo hu ni eŋma akɛ, eji Kristofonyo fɛɛ Kristofonyo sɔ̃ akɛ ekwɛ awusãi, okulafoi, kɛ mɛi krokomɛi, kɛ́ amɛhe fi amɛ loo amɛyaje shihilɛi ni jaraa amli. (Yak. 1:27; 2:15-17) Bɔfo Yohane hu ŋma akɛ: “Mɔ ni yɔɔ je nɛŋ nii, ni enaa akɛ efi enyɛmi, ni emli joɔ yɛ enɔ lɛ: te aaafee tɛŋŋ ni Nyɔŋmɔ suɔmɔ lɛ aaahi emliŋ?” (1 Yoh. 3:17) Kɛ́ eji Kristofonyo fɛɛ Kristofonyo sɔ̃ akɛ eye ebua mɛi ni efi amɛ lɛ, enyiɛ nɔŋŋ esaaa akɛ asafo lɛ hu feɔ nakai?

Kɛ́ oshara ko ba lɛ, te asafo lɛ aaafee tɛŋŋ eye ebua lɛ? (Kwɛmɔ kuku 15, 16)

15. Mɛɛ nibii komɛi baanyɛ aha ewa kɛha bii akɛ amɛaakwɛ amɛfɔlɔi ni egbɔlɔ lɛ jogbaŋŋ?

15 Yɛ maji komɛi anɔ lɛ, amralo lɛ baanyɛ ato pɛŋshɛŋ kɛ nibii krokomɛi ahe gbɛjianɔ eha mɛi ni egbɔlɔ lɛ. (Rom. 13:6) Shi yɛ hei krokomɛi lɛ, gbɛjianɔtoo ni tamɔ nɛkɛ bɛ. No hewɔ lɛ, wamɔ ni mɛi ni egbɔlɔ lɛ awekumɛi kɛ asafo lɛ kɛbaaha amɛ lɛ baadamɔ bɔ ni shihilɛ lɛ ji yɛ he ni amɛyɔɔ lɛ nɔ. Kɛ́ he ni bii ni ji Kristofoi lɛ yɔɔ lɛ kɛ amɛfɔlɔi lɛ ateŋ jɛkɛ lɛ, ebaanyɛ ewa kɛha amɛ akɛ amɛaakwɛ amɛfɔlɔi lɛ jogbaŋŋ. Esa akɛ bii lɛ kɛ asafoŋ onukpai ni yɔɔ amɛfɔlɔi lɛ asafo lɛ  mli lɛ ashara koni no aha amɛ fɛɛ amɛle nɔ ni yaa nɔ. Akɛ nɔkwɛmɔnɔ lɛ, ekolɛ asafoŋ onukpai lɛ baanyɛ aha fɔlɔi lɛ ale gbɛjianɔ ni amralo lɛ loo nitsumɔ kuu ko eto kɛha mɛi ni tamɔ nakai ni yɔɔ he ni amɛyɔɔ lɛ, kɛ bɔ ni amɛaafee ni amɛnine ashɛ nɔ. Ekolɛ amɛbaayɔse nibii komɛi hu ni ehe baahia ni bii lɛ ale, tamɔ majemɔ woji ni he hiaa ni atserɛko amɛnaa loo tsofai komɛi ni fɔlɔi lɛ enuko. Kɛ́ bii lɛ kɛ asafoŋ onukpai lɛ shara jogbaŋŋ lɛ, amɛbaana bɔ ni amɛaafee amɛtsu shihilɛi komɛi ahe nii. Kɛ́ mɔ ko bɛŋkɛ mɔ ni egbɔ lɛ, ni baanyɛ ewo bii lɛ atoi nɔ loo ewo amɛ ŋaa yɛ shihilɛi komɛi ahe lɛ, no baanyɛ atsĩ naagbai komɛi ni mli baanyɛ awo wu lɛ anaa, ni ehaŋ weku lɛ afee yeyeeye tsɔ.

16. Mɛni Kristofoi komɛi feɔ kɛyeɔ amɛbuaa mɛi ni egbɔlɔ ni yɔɔ amɛsafo lɛ mli lɛ?

16 Akɛni Kristofoi sumɔɔ nyɛmimɛi ni egbɔlɔ nɛɛ waa hewɔ lɛ, amɛteŋ mɛi komɛi kɛ amɛbe kɛ amɛhewalɛ yeɔ amɛbuaa amɛ bɔ ni amɛbaanyɛ. Amɛkwɛɔ mɛi ni egbɔlɔ ni yɔɔ asafo lɛ mli lɛ tamɔ amɛ diɛŋtsɛ amɛwekumɛi. Mɛi komɛi hu toɔ naa kɛkwɛɔ mɛi ni egbɔlɔ ni yɔɔ amɛsafo lɛ mli lɛ. Eyɛ mli akɛ mɛi ni kwɛɔ mɛi nɛɛ ashihilɛ eŋmɛɛɛ amɛ gbɛ ni amɛkɛ amɛhe awo be fɛɛ sɔɔmɔ lɛ mli moŋ, shi eŋɔɔ amɛnaa akɛ amɛaaye amɛbua mɛi ni egbɔlɔ lɛ abii koni amɛya nɔ amɛhi be fɛɛ sɔɔmɔ nitsumɔ lɛ mli bɔ ni amɛaanyɛ. Nyɛmimɛi ni tamɔ nɛkɛ lɛ sa yijiemɔ waa! Kɛlɛ, ejurɔ ni amɛfeɔ mɛi ni egbɔlɔ nɛɛ wooo sɔ̃ ni kã amɛbii lɛ anɔ lɛ kɛjeee amɛnɔ.

OKƐ WIEMƆI NI WOƆ MƆ HEWALƐ AWO MƐI NI EGBƆLƆ LƐ AHIƐ NYAM

17, 18. Mɛni baanyɛ aha mɛi ni egbɔlɔ lɛ akwɛmɔ afee mlɛo?

17 Kɛ́ mɛi ni egbɔlɔ lɛ kɛ mɛi ni kwɛɔ amɛ lɛ fɛɛ jie su kpakpa kpo lɛ, ebaanyɛ eye ebua koni nibii afee mlɛo kɛha amɛ fɛɛ. Bei komɛi lɛ, gbɔlɛ haa mɔ nijiaŋ jeɔ wui loo ehaa ehaoɔ po. No hewɔ lɛ, ebaabi ni owo nyɛmimɛi ni egbɔlɔ nɛɛ hewalɛ, ni owo amɛhiɛ nyam hu kɛtsɔ sane ni tswaa mɔ emaa shi ni okɛ amɛ aaagba lɛ nɔ. Amɛteŋ mɛi ni kɛ afii babaoo esɔmɔ Yehowa lɛ sa yijiemɔ. Yehowa hiɛ kpaŋ nɔ ni amɛfee yɛ esɔɔmɔ lɛ mli lɛ nɔ, ni nakai nɔŋŋ eji yɛ amɛnyɛmimɛi Kristofoi lɛ hu agbɛfaŋ.Nyɛkanea Maleaki 3:16; Hebribii 6:10.

18 Kɛfata he lɛ, kɛ́ mɛi ni egbɔlɔ kɛ mɛi ni kwɛɔ amɛ lɛ kɛ nibii komɛi feɔ ŋmɔlɔ lɛ, ebaaha nitsumɔi komɛi ni wa ni atsuɔ daa gbi lɛ afee mlɛo. (Jaj. 3:1, 4) Mɛi ni egbɔlɔ lɛ ateŋ mɛi pii kpaaa babaoo gbɛ kɛjɛɛɛ mɛi ni kwɛɔ amɛ lɛ adɛŋ. Amɛyɔseɔ akɛ, bɔ ni amɛfeɔ amɛnii amɛhaa lɛ baanyɛ aha mɛi afɔ amɛ saramɔ, ní amɛná dekã babaoo amɛha amɛ. Bei pii lɛ, mɛi ni yasaraa mɛi ni egbɔlɔ lɛ ateŋ mɛi babaoo kɛɔ akɛ, “Mitee lɛ hewalɛwoo, shi beni mishiɔ jɛmɛ lɛ, lɛ hu ewo mi hewalɛ.”Abɛi 15:13; 17:22.

19. Mɛni baaye abua mɛi ni edara kɛ mɛi ni darako fɛɛ koni amɛnyɛ amɛkpee shihilɛi ni jaraa anaa?

19 Wɔmiishwe be ni nɔnaa, gbɔlɛ, kɛ emuu ni ayeee lɛ fɛɛ sɛɛ baafo. Kɛyashi nakai be lɛ baashɛ lɛ, esa akɛ Nyɔŋmɔ tsuji kɛ amɛhiɛ afɔ̃ jɔɔmɔi ni wɔbaaná kɛya naanɔ lɛ anɔ. Wɔle akɛ hemɔkɛyeli ni wɔyɔɔ yɛ Nyɔŋmɔ shiwoi lɛ amli lɛ baawaje wɔ beni wɔkɛ shihilɛi ni jaraa kpeɔ lɛ. Hemɔkɛyeli nɛɛ hewɔ lɛ, “wɔtsui efãaa . . . shi moŋ kɛ́ wɔkponɔgbɛ gbɔmɔ lɛ fiteɔ kwraa tete lɛ, kɛ̃lɛ wɔmli gbɔmɔ lɛ tsɔ̃ɔ ehee gbi fɛɛ gbi.” (2 Kor. 4:16-18; Heb. 6:18, 19) Mɛni hu baaye abua bo ni onyɛ okwɛ mɛi ni egbɔlɔ lɛ jogbaŋŋ? Wɔbaasusu ŋaawoi komɛi ni sa lɛ ahe yɛ nikasemɔ ni nyiɛ sɛɛ lɛ mli.

^ kk. 9 Nikasemɔ ni nyiɛ sɛɛ lɛ baawie gbɛjianɔi komɛi ni bii kɛ fɔlɔi ni egbɔlɔ lɛ baanyɛ ato kɛha fɔlɔi lɛ akwɛmɔ lɛ he.