Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) FEBRUARY 2014

Ajuro Yoo Okulafo ni Yɔɔ Zarefat lɛ yɛ Ehemɔkɛyeli lɛ Hewɔ

Ajuro Yoo Okulafo ni Yɔɔ Zarefat lɛ yɛ Ehemɔkɛyeli lɛ Hewɔ

BINUU koome pɛ ni yoo okulafo ohiafo ko yɔɔ lɛ gbo. Ewo gbekɛ lɛ gbonyo lɛ mɔbɔmɔbɔ ewo ekpɔkɔiaŋ. Shi amrɔ nɛɛ, eena ni atee ebi lɛ shi ni gbekɛ lɛ miiŋmɔ kɛ miishɛɛ. Enaa ekpɛ ehe waa. Mɔ ko ni ebato lɛ gbɔ lɛ kɛɛ lɛ akɛ, “Kwɛ, obi lɛ yi ená wala!” Yoo lɛ fua ebinuu lɛ.

Nakai gbohiiashitee ni ha yoo lɛ ná miishɛɛ lɛ ba aaafee afii 3,000 ni eho nɛ. Obaanyɛ okane enɛ he sane yɛ 1 Maŋtsɛmɛi yitso 17 lɛ. Mɔ ni yato yoo nɛɛ gbɔ lɛ ji Nyɔŋmɔ gbalɔ Elia. Ni yoo lɛ hu? Eji yoo okulafo ko ni atsĩii egbɛ́i tã, ni hi Zarefat. Nibii ni waje ehemɔkɛyeli waa yɛ eshihilɛ mli lɛ ateŋ ekome ji ebinuu ní atee lɛ shi lɛ. Wɔbaakase nibii ni he hiaa waa beni wɔsusuɔ yoo nɛɛ he lɛ.

ELIA NA YOO OKULAFO KO NI YƆƆ HEMƆKƐYELI

Yehowa eto eyiŋ akɛ ehaŋ nugbɔ anɛ be kplaŋŋ yɛ Ahab, ni ji maŋtsɛ fɔŋ ni yeɔ Israel nɔ lɛ beaŋ. Beni Elia wie akɛ nu hɔmɔ baaba lɛ sɛɛ lɛ, Nyɔŋmɔ ŋɔ lɛ etee Ahab, ni etsɔ naakpɛɛ gbɛ nɔ eha kwaakwaalabitei yalɛ gbalɔ nɛɛ kɛ aboloo kɛ loo. Kɛkɛ ni Yehowa kɛɛ Elia akɛ: “Tée shi ni oya Zarefat ni ji Zidonbii aŋɔɔ, ni oyahi jɛi; naa, mifã yoo okulafo ko yɛ jɛi ni elɛo!”1 Maŋ. 17:1-9.

Beni Elia yashɛ Zarefat lɛ, ena yoo okulafo ohiafo ko ni miibua lai ŋmɛŋmɛlɛbii anaa. Ani eeenyɛ efee akɛ lɛ ji yoo ni baalɛ gbalɔ lɛ? Te eeefee tɛŋŋ elɛ lɛ, akɛni lɛ diɛŋtsɛ lɛ eeye ohia lɛ? Eeenyɛ efee akɛ Elia susu eyiŋ nɛkɛ yɛ yoo lɛ he moŋ, shi kɛlɛ, ekɛ lɛ bɔi sanegbaa. Ekɛɛ yoo lɛ akɛ: “Ofainɛ, yaayɛ nu fioo owo nɔ̃ mli obaha mi ni manu!” Beni yoo lɛ miiya eyayɛ nu lɛ, Elia kɛshi sɛɛ akɛ: “Ofainɛ, ni oŋɔ aboloo atrɔma ko ohiɛ odɛ̃ obaha mi!” (1 Maŋ. 17:10, 11) Ewaaa kɛhaaa yoo okulafo lɛ akɛ ebaaha gbɔ lɛ nu, shi aboloo lɛ ji naagba lɛ.

 Yoo lɛ ha hetoo akɛ: “Gbii abɔ ni Yehowa, o-Nyɔŋmɔ lɛ, hiɛ kã nɛɛ, mibɛ kaka ko, akɛ ja mamu dɛ̃kɔkɔ obɔ̃ yɛ gbɛ́ mli kɛ mu fioo yɛ tɔ mli: ni naa, miilɛ́ lai ŋmɛŋmɛlɛbii enyɔoo ko, koni maya mikɛyasaa kaka maha mikɛ mibi lɛ, ni wɔye ni wɔgboi!” (1 Maŋ. 17:12) Nyɛhaa wɔsusua nɔ ni wɔbaanyɛ wɔkase kɛjɛ sanegbaa nɛɛ mli lɛ he.

Yoo okulafo lɛ na Elia akɛ Israelnyo ni sheɔ Nyɔŋmɔ gbeyei. Wiemɔ ni ewie akɛ, “gbii abɔ ni Yehowa, o-Nyɔŋmɔ lɛ, hiɛ kã nɛɛ” tsɔɔ nakai. Eyɛ mli akɛ ele Israel Nyɔŋmɔ, Yehowa lɛ he nɔ ko moŋ, shi eeenyɛ efee akɛ, eleee lɛ bɔ ni ebaanyɛ etsɛ lɛ akɛ “mi-Nyɔŋmɔ.” Ehi Zarefat, ni ekolɛ eji maŋ ni yɔɔ Foinikebii amaŋtiase ni ji Zidon lɛ mli, loo ekolɛ Zidonbii lɛ ni yeɔ Zarefat nɔ. Eeenyɛ efee akɛ, Zarefatbii lɛ ji Baal jálɔi. Fɛɛ sɛɛ lɛ, Yehowa na nɔ kpakpa ko yɛ yoo okulafo nɛɛ he.

Eyɛ mli akɛ yoo okulafo ohiafo ni yɔɔ Zarefat lɛ hi wɔŋjalɔi ateŋ moŋ, shi ehe Israel Nyɔŋmɔ lɛ eye. Yehowa tsu Elia kɛtee yoo lɛ ŋɔɔ, koni yoo lɛ kɛ gbalɔ lɛ fɛɛ yi aná wala. Wɔbaanyɛ wɔkase nɔ ko kpele kɛjɛ enɛ mli.

Jeee Zarefat maŋ lɛ mli bii ni ale akɛ amɛjáa Baal lɛ fɛɛ ekpɔtɔ kwraa. Tsu ni Yehowa tsu Elia kɛtee yoo okulafo nɛɛ ŋɔɔ lɛ tsɔɔ akɛ, E-le aŋkroaŋkroi fɛɛ ni hiɛ tsui kpakpa ni bɔiko Lɛ sɔɔmɔ lɛ. Hɛɛ, “maŋ fɛɛ maŋ mli lɛ, mɔ ni sheɔ [Nyɔŋmɔ] gbeyei ni etsuɔ jalɛ nii lɛ, lɛ ji mɔ ni saa ehiɛ.”Bɔf. 10:35.

Mɛi enyiɛ yɔɔ oshikpɔŋkuku lɛ mli ni tamɔ yoo okulafo ni yɔɔ Zarefat lɛ? Eyɛ mli akɛ ekolɛ apasa jálɔi ebɔle amɛ moŋ, shi ekolɛ amɛbaasumɔ ni amɛnu sane kpakpa ko. Ekolɛ amɛle Yehowa he nɔ ko fioo pɛ loo amɛleee ehe nɔ ko kwraa, no hewɔ lɛ ja aye abua amɛ dani amɛbaanyɛ amɛmɔ anɔkwa jamɔ mli. Ani otaoɔ mɛi ni tamɔ nɛkɛ ni oyeɔ obuaa amɛ?

“ŊƆƆ EKO OFEE KAKA FIOO KO OBAHA MI TSUTSU DÔ

Susumɔ nɔ ni Elia bi ni yoo okulafo lɛ afee lɛ he jogbaŋŋ okwɛ. Yoo lɛ etsɔ hiɛ ekɛɛ lɛ akɛ, kɛ́ ekɛ mamu ni eshwɛ lɛ fee kaka eha ehe kɛ ebi lɛ ni amɛye lɛ, amɛnaŋ nɔ ko amɛye dɔŋŋ, ni amɛbaagboi. Fɛɛ sɛɛ lɛ, mɛni Elia kɛɛ lɛ? Ekɛɛ lɛ akɛ: “Kaashe gbeyei! Yaa ni oyafee bɔ ni okɛɛ lɛ; kɛlɛ ŋɔɔ eko ofee kaka fioo ko obaha mi tsutsu dã, ni okɛbaha mi; no sɛɛ dani ofee bo kɛ obi lɛ nɔ lɛ. Ejaakɛ bɔ ni Yehowa, Israel Nyɔŋmɔ lɛ, kɛɛ nɛ: Mamu kɛ gbɛ́ lɛ etaŋ, ni mu kɛ tɔ lɛ hu sɛɛ efoŋ aahu kɛyashi gbi nɔ ni Yehowa aaaha nugbɔ abanɛ yɛ shikpɔŋ lɛ nɔ!”1 Maŋ. 17:11-14.

Mɔ ko ni kulɛ ebaakɛɛ akɛ, ‘Mikɛ wɔnaagbee niyenii lɛ aha bo? Ohiɛ edɔko.’ Shi jeee nakai yoo okulafo nɛɛ fee. Eyɛ mli akɛ Yehowa he nɔ ko fioo pɛ ele moŋ, shi ehe Elia eye, ni efee nɔ ni Elia kɛɛ lɛ lɛ. Enɛ ji hemɔkɛyeli he kaa kpele diɛŋtsɛ kɛha yoo lɛ—shi yiŋ ni ekpɛ lɛ ja!

Hemɔkɛyeli ni yoo okulafo lɛ ná yɛ Yehowa, ni ji Elia Nyɔŋmɔ lɛ mli lɛ baa lɛ kɛ ebinuu lɛ yi

Nyɔŋmɔ kwaaa nakai yoo okulafo ohiafo lɛ. Taakɛ Elia wo lɛ shi lɛ, Yehowa jɔɔ enii fioo ni eyɔɔ lɛ nɔ ni eshwere, ni Elia, yoo lɛ, kɛ ebinuu lɛ fɛɛ ye aahu kɛyashi nu hɔmɔ lɛ sɛɛ fo. Anɔkwa, “mamu kɛ gbɛ́ lɛ etãaa, ni mu kɛ tɔ lɛ hu sɛɛ efooo, taakɛ bɔ ni Yehowa tsɔ Elia nine nɔ ewie  lɛ.” (1 Maŋ. 17:16; 18:1) Eji yoo lɛ haaa Elia niyenii lɛ kulɛ, kaka ni ekɛ emamu kɛ mu fioo lɛ baafee lɛ baafee enaagbee niyenii lɛɛlɛŋ. Moŋ lɛ, ehe Yehowa eye ni ekɛ ehe fɔ̃ enɔ, ni ekɛ niyenii lɛ ha Elia klɛŋklɛŋ.

Nɔ ni wɔbaanyɛ wɔkase yɛ sane nɛɛ mli ji akɛ, Nyɔŋmɔ jɔɔ mɛi ni heɔ lɛ amɛyeɔ lɛ. Kɛ́ okɛ anɔkwayeli he kaa kpe, ni okɛ ohe fɔ̃ Yehowa nɔ lɛ, ebaaye ebua bo. Ebaatsɔ o-Durolɔ, o-Hebulɔ, kɛ o-Shieŋtsɛ bɔni afee ni onyɛ okpee kaa lɛ naa.2 Mose 3:13-15.

Yɛ afi 1898 mli lɛ, Zion’s Watch Tower lɛ wie nɔ ni wɔbaanyɛ wɔkase kɛjɛ yoo okulafo nɛɛ sane lɛ mli lɛ he akɛ: “Kɛ́ yoo lɛ yɛ hemɔkɛyeli bɔ ni ekɛaabo nɔ ni akɛɛ lɛ lɛ toi lɛ, belɛ Nuŋtsɔ lɛ baabu lɛ akɛ mɔ ni sa akɛ etsɔ Gbalɔ lɛ nɔ eye ebua lɛ; eji ejieee hemɔkɛyeli kpo kulɛ, ekolɛ abaaná yoo okulafo kroko ni aye abua lɛ. Nakai nɔŋŋ eji yɛ wɔ hu wɔgbɛfaŋ—yɛ wɔwala he gbɛfãa lɛ mli lɛ, eshɛɔ he ko ni Nuŋtsɔ lɛ kaa wɔhemɔkɛyeli lɛ. Kɛ́ wɔjie hemɔkɛyeli kpo lɛ, ebaajɔɔ wɔ; kɛ́ wɔfeee nakai lɛ, jɔɔmɔ lɛ baaŋmɛɛ wɔ.”

Kɛ́ wɔkɛ kai pɔtɛi komɛi kpe lɛ, esa akɛ wɔtao Nyɔŋmɔ gbɛtsɔɔmɔ kɛjɛ Ŋmalɛ lɛ kɛ asafo lɛ woji lɛ amli. No sɛɛ lɛ, esa akɛ wɔkɛ Yehowa gbɛtsɔɔmɔ lɛ atsu nii, ekɔɔɔ he eko bɔ ni ekolɛ ekɛ nitsumɔ baawa aha. Kɛ́ wɔbo abɛ ni nilee yɔɔ mli ni nyiɛ sɛɛ nɛɛ toi lɛ, abaajɔɔ wɔ waa. Ekɛɔ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ!”Abɛi 3:5, 6.

‘ANI OBA MIŊƆƆ NI OBAGBE MIBINUU LƐ?’

Yoo okulafo lɛ kɛ ehemɔkɛyeli lɛ he kaa kroko kpe. Biblia lɛ kɛɔ akɛ: “Nɛkɛ saji nɛɛ asɛɛ lɛ eba mli akɛ yoo lɛ, ni ji shianyɛ lɛ, bi lɛ he baye, ni ehela lɛ mli wa aahu po ni emuuu dɔŋŋ.” Akɛni yoo ni yeɔ awerɛho nɛɛ nuuu shihilɛ nɛɛ shishi hewɔ lɛ, ekɛɛ Elia akɛ: “Mɛɛ sane mikɛo yɔɔ, bo Nyɔŋmɔ gbɔmɔ? Ani oba miŋɔɔ ni ohã akai mihe esha lɛ ni agbe mibinuu lɛ?” (1 Maŋ. 17:17, 18) Mɛni nakai dɔlɛ wiemɔi lɛ tsɔɔ?

Ani yoo lɛ ekai esha ko ni efee ní miigbá ehenilee naa? Ani esusu akɛ Nyɔŋmɔ miigbala etoi, ni no hewɔ etsu Elia koni ebagbe ebinuu lɛ? Biblia lɛ ewieee, shi nɔ kome yɛ faŋŋ: Yoo okulafo lɛ kɛ sane fɔŋ ko shwaaa Nyɔŋmɔ.

Eeenyɛ efee akɛ, yoo okulafo lɛ binuu lɛ gbele lɛ, kɛ jwɛŋmɔ ni ená akɛ ba ni Elia ba jɛmɛ lɛ ji nɔ ni ha ebinuu lɛ gbo lɛ gba gbalɔ lɛ naa. Beni Elia wo gbekɛ nuu lɛ gbonyo lɛ kɛtee eŋwɛi tsu lɛ nɔ lɛ, gbalɔ lɛ bo akɛ: “Yehowa, mi-Nyɔŋmɔ! Aso yoo okulafo ni mibato eŋɔɔ nɛɛ hu okɛyeɔ sane fɔŋ ni ogbeɔ ebi lɛ nɛɛ?” Elia nu he akɛ, enyɛŋ edamɔ ahora ni abaabɔ Yehowa lɛ naa kɛji Yehowa ŋmɛ gbɛ ni yoo ni mli hi, ni fee lɛ gbɔ nɛɛ na nɔ. No hewɔ lɛ, Elia kpa fai akɛ: “Yehowa, mi-Nyɔŋmɔ! Miikpao fai, ha gbekɛ nɛɛ susuma akpale aba emli ekoŋŋ!”1 Maŋ. 17:20, 21.

“KWƐ, OBI LƐ YI ENÁ WALA!”

Beni esɔle lɛ, Yehowa bo lɛ toi. Yoo okulafo lɛ eha E-gbalɔ lɛ niyenii, ni ejie hemɔkɛyeli hu kpo. Eeenyɛ efee akɛ, Nyɔŋmɔ ŋmɛ gbɛ ni gbekɛ lɛ hela lɛ gbe lɛ, ejaakɛ ele akɛ ebaatee lɛ shi, ni enɛ baaha yinɔbii ni baaba yɛ sɛɛ lɛ aná hiɛnɔkamɔ akɛ abaatee gbohii ashi wɔsɛɛ. Gbohiiashitee nɛɛ ji klɛŋklɛŋ nɔ ní abɔ he amaniɛ yɛ Biblia lɛ mli. Beni Elia kpa Yehowa fai lɛ, Yehowa tee gbekɛ lɛ shi. Bo lɛ kwɛ miishɛɛ ni yoo okulafo lɛ baaná beni Elia kɛɛ akɛ: “Kwɛ, obi lɛ yi ená wala” lɛ! Kɛkɛ ni yoo okulafo lɛ kɛɛ Elia akɛ: “Kpaako miná mile akɛ Nyɔŋmɔ gbɔmɔ jio, ni akɛ Yehowa wiemɔ ni yɔɔ onaa lɛ anɔkwale ni!”1 Maŋ. 17:22-24.

Saji ni wɔsusu he nɛɛ pɛ ji nɔ ni 1 Maŋtsɛmɛi yitso 17 lɛ haa wɔleɔ yɛ yoo nɛɛ he. Shi akɛni Yesu wie yoo nɛɛ he ekpakpa hewɔ lɛ, eeenyɛ efee akɛ, yoo lɛ sɔmɔ Yehowa kɛyashi egbo. (Luka 4:25, 26) Esane lɛ haa wɔnaa akɛ, Nyɔŋmɔ jɔɔ mɛi ni feɔ etsuji ejurɔ lɛ. (Mat. 25:34-40) Ehaa wɔnaa hu akɛ, Nyɔŋmɔ haa enɔkwafoi lɛ amɛhiamɔ nii, ni efeɔ nakai yɛ shihilɛi ni jaraa po amli. (Mat. 6:25-34) Kɛfata he lɛ, sane nɛɛ haa wɔnaa akɛ, Yehowa miishwe ni etee gbohii lɛ ashi, ni ebaafee nakai hu. (Bɔf. 24:15) Hɛɛ, enɛɛmɛi ji yiŋtoi kpakpai ahewɔ ni wɔkaiɔ yoo okulafo ni yɔɔ Zarefat lɛ.