Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) FEBRUARY 2014

Kwɛmɔ “Yehowa Mlihilɛ Lɛ”

Kwɛmɔ “Yehowa Mlihilɛ Lɛ”

Shihilɛi ni jaraa baanyɛ aná wɔnɔ hewalɛ waa. Ebaanyɛ ewo wɔ jwɛŋmɔ, eha wɔgbɔjɔ, ni ebaanyɛ esa wɔshihilɛ he hu. Maŋtsɛ David ni hi shi yɛ blema Israel lɛ kɛ jaramɔ shihilɛi babaoo kpe. Te efee tɛŋŋ ekpee naa lɛ? Yɛ lala ko ni taa mɔ tsuiŋ ni David fo lɛ mli lɛ, ewie akɛ: “Mikɛ migbee bolɔɔ mitsɛɔ Yehowa; mikɛ migbee kpaa Yehowa fai. Mifɔseɔ mikɔmɔyeli mishwieɔ ehiɛ, mijajeɔ mihaomɔ lɛ yɛ ehiɛ. Beni mimumɔ tɔ biti yɛ mimli lɛ, bo ole migbɛ lɛ.” David jɛ heshibaa mli esɔle koni Nyɔŋmɔ aye abua lɛ.Lala 142:2-4.

Beni David yaje jaramɔ shihilɛ mli lɛ, esɔle eha Yehowa kɛha yelikɛbuamɔ

Yɛ lala kroko ni David fo lɛ mli lɛ, elá akɛ: “Nɔ̃ koome mibiɔ yɛ Yehowa dɛŋ, no sɛɛgbɛ mitaoɔ: akɛ mahi shi yɛ Yehowa we lɛ miwala gbii abɔ fɛɛ, ni mana Yehowa mlihilɛ lɛ, ni makwɛ esɔlemɔwe lɛ.” (Lala 27:4) Eyɛ mli akɛ David jeee Levinyo moŋ, shi bo lɛ feemɔ ehe mfoniri ni edamɔ kpeebuu lɛ kpo krɔŋkrɔŋ lɛ sɛɛ, he ni bɛŋkɛ he ni ajáa anɔkwa Nyɔŋmɔ lɛ yɛ lɛ. David hiɛ sɔ nɔ ni ena lɛ aahu akɛ, eshwe akɛ ebaaye ewala gbii ni eshwɛ lɛ yɛ jɛmɛ koni ena “Yehowa mlihilɛ lɛ.”

Wiemɔ ni ji “mlihilɛ” lɛ kɔɔ ekpakpa ni aaafee lɛ he. Be fɛɛ be lɛ, David hiɛ sɔɔ gbɛjianɔ ni Nyɔŋmɔ eto koni atsɔ nɔ ajá lɛ lɛ. Wɔbaanyɛ wɔbi wɔhe akɛ, ‘Ani minuɔ he taakɛ David nu he lɛ?’

OKƐ ‘HIƐSƆƆ AKWƐ’ NYƆŊMƆ GBƐJIANƆTOO LƐ

Yɛ wɔgbii nɛɛ amli hu lɛ, jeee tsu ko ni ama nɔ atsɔɔ ajáa Yehowa. Shi moŋ, atsɔɔ Nyɔŋmɔ mfonirifeemɔŋ sɔlemɔtsu kpeteŋkpele lɛ, ni ji gbɛjianɔ ni eto kɛha anɔkwa jamɔ lɛ nɔ. * Kɛ́ wɔkɛ ‘hiɛsɔɔ kwɛ’ gbɛjianɔtoo nɛɛ lɛ, wɔ hu wɔbaanyɛ wɔna “Yehowa mlihilɛ lɛ.”

Susumɔ akɔɔble afɔleshaa latɛ ni ma kpeebuu lɛ shinaa lɛ shi lɛ he okwɛ. (2 Mose 38:1, 2; 40:6) Nakai afɔleshaa latɛ lɛ damɔ shi kɛha shwelɛ ni Nyɔŋmɔ yɔɔ akɛ ebaakpɛlɛ afɔle ni Yesu kɛ egbɔmɔtso bashã lɛ nɔ. (Heb. 10:5-10) Susumɔ bɔ ni wɔnáa enɛ he sɛɛ wɔhaa lɛ he okwɛ! Bɔfo Paulo ŋma akɛ: “Be mli ni wɔji henyɛlɔi lɛ ni akɛ Nyɔŋmɔ bi lɛ gbele lɛ bakpata wɔkɛ Nyɔŋmɔ teŋ.” (Rom. 5:10) Kɛ́ wɔná hemɔkɛyeli yɛ Yesu lá ni afɔse ashwie shi lɛ mli lɛ, ebaaha wɔtsɔmɔ Nyɔŋmɔ nanemɛi ni wɔbaaná ehiɛ duromɔ, ni ebaamu efɔ wɔnɔ. Enɛ baaha ‘Yehowa ajie eyitsoŋ sane etsɔɔ wɔ.’Lala 25:14.

Akɛni ‘agbe wɔhe eshai lɛ’ hewɔ lɛ, wɔnáa “hejɔɔmɔ yinɔ” loo henilee kpakpa yɛ Yehowa hiɛ. (Bɔf. 3:19, 20) Wɔshihilɛ lɛ tamɔ gboklɛfonyo ko ni shwa ehe yɛ enifɔjianii lɛ ahe, ni eefee tsakemɔi yɛ eshihilɛ mli beni emɛɔ be ni ato ni akɛbaagbe lɛ lɛ. Enɛ tsirɛ kojolɔ ko ni mli hi lɛ ni ekɛ nɔ ni efee lɛ ke lɛ koni akagbe lɛ dɔŋŋ. Enɛ ha gboklɛfonyo lɛ tsui nyɔ emli, ni ená miishɛɛ waa! Taakɛ nakai kojolɔ lɛ fee lɛ, Yehowa naa adesai ni tsakeɔ amɛtsui lɛ mɔbɔ, ni ejieɔ gbele fɔbuu lɛ yɛ amɛnɔ.

NÁ ANƆKWA JAMƆ HE MIISHƐƐ

Nibii ni afeɔ yɛ anɔkwa jamɔ mli ni eeenyɛ efee akɛ David na yɛ Yehowa we lɛ ekomɛi ji, enanemɛi Israelbii babaoo ni buaa amɛhe naa, Mla lɛ ni akaneɔ ahaa maŋbii lɛ ni agbalaa  mli, tsofa-kɛŋma ni ashãa, kɛ sɔɔmɔ krɔŋŋ ni osɔfoi lɛ kɛ Levibii lɛ kɛhaa lɛ. (2 Mose 30:34-38; 4 Mose 3:5-8; 5 Mose 31:9-12) Nibii nɛɛ ni tee nɔ yɛ anɔkwa jamɔ mli yɛ blema Israel lɛ henɔ miiya nɔ ŋmɛnɛ.

Taakɛ eji yɛ blema lɛ, ŋmɛnɛ lɛ “kwɛ bɔ ni ehi, bɔ ni eyɔɔ fɛo, kɛ́ nyɛmimɛi fee ekome kɛhi shi!” (Lala 133:1) Mɛi babaoo ebafata wɔjeŋ muu fɛɛ ‘nyɛmimɛi’ lɛ ahe. (1 Pet. 2:17) Akaneɔ Nyɔŋmɔ Wiemɔ lɛ ni agbálaa mli yɛ wɔsafoŋ kpeei lɛ ashishi. Yehowa tsɔɔ egbɛjianɔtoo lɛ nɔ etsɔɔ wɔ nii babaoo. Kɛfata he lɛ, wɔyɛ mumɔŋ niyenii babaoo ni akala ni wɔbaanyɛ wɔkɛfee aŋkro nikasemɔ kɛ weku nikasemɔ hu. Gbɛtsɔɔmɔ Kuu lɛ mli nyo ko wie akɛ: “Kɛ́ mijwɛŋ Yehowa Wiemɔ lɛ nɔ, misusu nɔ ni etsɔɔ lɛ he, ni mitao sɛɛyoomɔ kɛ saneshishinumɔ lɛ, mináa mumɔŋ jwetrii babaoo, ni mitsui nyɔɔ mimli daa nɛɛ.” Anɔkwa, ‘nilee baanyɛ aŋɔɔ wɔsusuma naa.’Abɛi 2:10.

Ŋmɛnɛ lɛ, sɔlemɔi ni sa ni Nyɔŋmɔ tsuji lɛ sɔleɔ lɛ yaa Yehowa ŋɔɔ gbi fɛɛ gbi. Sɔlemɔi nɛɛ jeɔ ŋma ewoɔ Yehowa tamɔ tsofa-kɛŋma. (Lala 141:2) Eŋɔɔ wɔnaa waa akɛ Yehowa Nyɔŋmɔ yɛ he miishɛɛ akɛ wɔɔtsi wɔbɛŋkɛ lɛ, ni wɔjɛ heshibaa mli wɔsɔle wɔha lɛ!

Mose sɔle akɛ: “Yehowa, wɔ-Nyɔŋmɔ lɛ, mlihilɛ lɛ ahi wɔnɔ, ni wɔniji anaa nitsumɔ lɛ ha ashwere aha wɔ.” (Lala 90:17) Kɛ́ wɔkɛ ekãa shiɛ lɛ, Yehowa baajɔɔ wɔ. (Abɛi 10:22) Ekolɛ wɔye wɔbua mɔ ko ni ebale anɔkwale lɛ. Ekolɛ yɛ wiemɔ lɛ toi ni abooo, hela, henumɔŋ naagba, loo yiwaa ni wɔkɛkpeɔ lɛ fɛɛ sɛɛ lɛ, wɔtee nɔ wɔkɛ afii babaoo eshiɛ. (1 Tes. 2:2) Yɛ shihilɛi nɛɛ fɛɛ sɛɛ lɛ, ani wɔnako “Yehowa mlihilɛ lɛ,” ni wɔnako akɛ wɔŋwɛi Tsɛ lɛ hiɛ sɔɔ mɔdɛŋ fɛɛ ni wɔbɔɔ lɛ waa?

David lá akɛ: “Yehowa ji migboshinii kɛ mikpulu mli gbɛfaŋnɔ; bo ohiɛ mishiki mli! Mihũsũ kpãi eyaje he ni yɔɔ fɛo eha mi.” (Lala 16:5, 6) David hiɛ sɔ ‘egboshinii,’ ni ji wekukpaa kpakpa ni kã ekɛ Yehowa teŋ kɛ hegbɛ ni ená kɛsɔmɔ lɛ lɛ. Taakɛ eba lɛ yɛ David gbɛfaŋ lɛ, ekolɛ wɔ hu wɔkɛ jaramɔ shihilɛi baakpe, shi wɔyɛ mumɔŋ jɔɔmɔi babaoo! Belɛ, nyɛhaa wɔyaa nɔ wɔnáa anɔkwa jamɔ he miishɛɛ, ni wɔkɛ ‘hiɛsɔɔ akwɛ’ Yehowa mfonirifeemɔŋ sɔlemɔtsu lɛ.

^ kk. 6 Kwɛmɔ July 1, 1996 Buu-Mɔɔ baafa 14-24 lɛ.