Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ) JANUARY 2014

“Omaŋtsɛyeli lɛ Aba”—Shi Mɛɛ Be?

“Omaŋtsɛyeli lɛ Aba”—Shi Mɛɛ Be?

“Beni nyɛaana nii nɛɛ fɛɛ lɛ, nyɛlea akɛ eshɛ agbói lɛ anaa etã.”MAT. 24:33.

1, 2. (a) Mɛni haa mɔ ko hiɛ hoɔ nii anɔ? (b) Mɛni wɔle yɛ Nyɔŋmɔ Maŋtsɛyeli lɛ he?

EKOLƐ okpa shi ona akɛ, kɛ́ mɛi komɛi ye nifeemɔ ko he odase lɛ, esoro nɔ ni amɛteŋ mɔ fɛɛ mɔ wieɔ yɛ he. Nakai nɔŋŋ kɛ́ mɔ ko yana datrɛfonyo lɛ, ekolɛ ebaawa akɛ ebaakai nɔ fɛɛ nɔ ni datrɛfonyo lɛ wie beni ekwɛɔ lɛ lɛ. Aloo ekolɛ mɔ ko baatao esamfee loo ehiŋmɛi glase aahu, tsɛbelɛ, ekã emasɛi nɔŋŋ. Mɛni hewɔ shihilɛi ni tamɔ nɛkɛ lɛ baa? Niiamlitaolɔi tsɔɔ akɛ, kɛ́ mɔ ko bɔ mɔdɛŋ akɛ ebaafee nibii pii yɛ be kome too mli lɛ, ehaa ehiɛ hoɔ nii anɔ, ni enɛ ji shwilamɔ henɔ ko. Eka shi faŋŋ akɛ, wɔjwɛŋmɔ hiɔ nɔ kome nɔ yɛ be pɔtɛɛ ko mli.

2 Ŋmɛnɛ lɛ, mɛi babaoo yɛ ni miiye shwilamɔ hela ko ni tamɔ nakai nɔŋŋ yɛ nibii ni yaa nɔ yɛ je lɛ mli lɛ ahe. Ekolɛ amɛbaakpɛlɛ nɔ akɛ je lɛŋ shihilɛ etsake kwraa kɛjɛ afi 1914 kɛbaa moŋ, shi amɛnuuu nɔ ni nibii nɛɛ tsɔɔ diɛŋtsɛ lɛ shishi. Akɛ mɛi ni kaseɔ Biblia lɛ, wɔle akɛ ato Nyɔŋmɔ Maŋtsɛyeli lɛ shishi yɛ afi 1914 mli, beni awo Yesu Maŋtsɛ yɛ ŋwɛi lɛ. Shi wɔle akɛ ahako sɔlemɔ ni wɔsɔleɔ akɛ, “Omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ” hetoo kɛmɔko shi. (Mat. 6:10) Abaaha sɔlemɔ  nɛɛ hetoo kɛmɔ shi beni akpata jeŋ fɔŋ nɛɛ hiɛ lɛ. Ja enɛ eba mli dani abaanyɛ afee Nyɔŋmɔ suɔmɔnaa nii yɛ shikpɔŋ lɛ nɔ taakɛ afeɔ yɛ ŋwɛi lɛ.

3. Mɛni Biblia lɛ ni wɔkaseɔ lɛ haa wɔnaa ní mɛi krokomɛi enaaa?

3 Akɛni wɔkaseɔ Nyɔŋmɔ Wiemɔ lɛ daa hewɔ lɛ, wɔmiina akɛ gbalɛi babaoo miiba mli amrɔ nɛɛ. Shi mɛi babaoo enaaa lɛ nakai. Amɛnitsumɔ kɛ daa gbi shihilɛ mli nibii ehe amɛjwɛŋmɔ aahu akɛ, amɛnaaa okadi ni tsɔɔ akɛ Kristo ebɔi nɔyeli kɛjɛ afi 1914, ni akɛ, etsɛŋ ni ebaakpata jeŋ fɔŋ nɛɛ hiɛ lɛ. Shi bi ohe akɛ: ‘Ani miheɔ miyeɔ lolo akɛ je nɛɛ naagbee lɛ ebɛŋkɛ, ni akɛ, nibii ni yaa nɔ amrɔ nɛɛ tsɔɔ nakai?’ Kɛ́ oba anɔkwale lɛ mli etsɛko po lɛ, mɛni titri heɔ ojwɛŋmɔ? Bɔ fɛɛ bɔ ni wɔbaaha hetoo wɔha lɛ, nyɛhaa wɔsusua yiŋtoi etɛ komɛi ni he hiaa waa ni haa wɔnaa akɛ etsɛŋ ni Nyɔŋmɔ yiŋtoo kɛha shikpɔŋ lɛ baaba mli lɛ ahe wɔkwɛa.

OKPƆŊƆNƆTARALƆI LƐ ESHƐ SHI

4, 5. (a) Mɛni Yesu etsu kɛjɛ afi 1914 kɛbaa nɛɛ? (Kwɛmɔ mfoniri ni yɔɔ nikasemɔ lɛ shishijee lɛ.) (b) Mɛni okpɔŋɔnɔtaralɔi ni ba yɛ Yesu sɛɛ lɛ damɔ shi kɛha? Mɛɛ gbɛ nɔ gbalɛ nɛɛ eba mli?

4 Yɛ afi 1914 lɛ, awo Yesu Kristo—mɔ ni afee ehe mfoniri akɛ eta okpɔŋɔ yɛŋ nɔ lɛ—akɛ Nyɔŋmɔ Maŋtsɛyeli lɛ nɔ Maŋtsɛ yɛ ŋwɛi. No sɛɛ nɔŋŋ lɛ, efã ta koni ekɛkpata Satan nibii agbɛjianɔtoo fɔŋ lɛ hiɛ. (Nyɛkanea Kpojiemɔ 6:1, 2.) Gbalɛ ni yɔɔ Kpojiemɔ yitso 6 lɛ haa wɔnaa akɛ, kɛ́ ato Nyɔŋmɔ Maŋtsɛyeli lɛ shishi nɔŋŋ lɛ, nibii amli baawo wu oyayaayai yɛ je lɛ mli—tai, hɔji, tsɛŋemɔ helai, kɛ nibii krokomɛi ni kɛ gbele baa baaba. Akɛ okpɔŋɔnɔtaralɔi etɛ ni ba yɛ Yesu Kristo sɛɛ lɛ fee shihilɛi nɛɛ ahe mfoniri yɛ gbalɛ lɛ mli.Kpoj. 6:3-8.

5 Eyɛ mli akɛ maji babaoo ewo shi akɛ amɛbaabɔ mɔdɛŋ ni amɛkɛ toiŋjɔlɛ aba shikpɔŋ lɛ nɔ moŋ, shi taakɛ gbalɛ lɛ tsɔɔ lɛ, ‘ajie toiŋjɔlɛ kɛjɛ shikpɔŋ lɛ nɔ.’ Jeŋ Ta I lɛ ji tai ni ekpata nibii ahiɛ waa lɛ ateŋ klɛŋklɛŋ nɔ ni ha toiŋjɔlɛ laaje yɛ shikpɔŋ lɛ nɔ. Eyɛ mli akɛ kɛjɛ afi 1914 kɛbaa nɛɛ, atee hiɛ yɛ bɔ ni aaafee aná shihilɛ mli hiamɔ nii kɛ jeŋ shikpámɔ mli moŋ, shi niyenii ni anáaa lɛ kã he eegba mɛi anaa lolo. Agbɛnɛ hu, daa afi lɛ, helai, adebɔɔ naa osharai, kɛ osharai krokomɛi kpataa mɛi akpekpei abɔ hiɛ. Nibii nɛɛ anaa wala, efɔɔ baa, ni egbe mɛi babaoo fe bei fɛɛ ni eho. Ani oona nɔ ni enɛɛmɛi fɛɛ tsɔɔ?

Okpɔŋɔnɔtaralɔi lɛ eha je lɛŋ shihilɛ mli miiwo wu lolo (Kwɛmɔ kuku 4, 5)

6. Namɛi yɔse Biblia mli gbalɛ ni ba mli lɛ, ni mɛni no ha amɛfee?

6 Mɛi babaoo kɛ amɛjwɛŋmɔ tee Jeŋ Ta I lɛ kɛ Spania flu lɛ nɔ aahu akɛ, amɛyɔseee akɛ “jeŋmaji abe lɛ” eba naagbee. Shi no mli lɛ, Kristofoi ni afɔ amɛ mu lɛ le akɛ “jeŋmaji abe lɛ” baaba naagbee yɛ afi 1914 mli. (Luka 21:24) Eyɛ mli akɛ amɛleee nɔ tuuntu ni baaba moŋ, shi amɛle akɛ nɔ krɛdɛɛ ko baaya nɔ yɛ Nyɔŋmɔ Maŋtsɛyeli lɛ mli yɛ afi 1914. Beni amɛyɔse akɛ Biblia mli gbalɛ eba mli nɔŋŋ kɛkɛ ni amɛkɛ ekãa jaje akɛ Nyɔŋmɔ ebɔi nɔyeli. Awa mɛi babaoo ni shiɛ Maŋtsɛyeli lɛ he sane lɛ ayi waa. Enɛ ni tee nɔ yɛ maji babaoo anɔ lɛ hu ji gbalɛ mlibaa. Yɛ afii babaoo ni nyiɛ sɛɛ lɛ amli lɛ, mɛi ni teɔ shi amɛwoɔ Maŋtsɛyeli lɛ ‘tsɔ mla nɔ amɛye sane fɔŋ.’ Afee nyɛmimɛi lɛ ekomɛi niseniianii, awo mɛi komɛi tsuŋ, asɛŋ mɛi komɛi, atswara mɛi komɛi tu, ni afolɔ mɛi komɛi ayitsei po.Lala 94:20; Kpoj. 12:15.

7. Mɛni hewɔ mɛi babaoo nuuu nibii ni yaa nɔ yɛ je lɛŋ amrɔ nɛɛ shishi lɛ?

7 Akɛni odaseyelii babaoo yɛ ni tsɔɔ  akɛ ato Nyɔŋmɔ Maŋtsɛyeli lɛ shishi yɛ ŋwɛi momo hewɔ lɛ, mɛni hewɔ mɛi babaoo yɔseee lɛ? Mɛni hewɔ amɛnaaa akɛ nibii ni yaa nɔ yɛ je lɛŋ amrɔ nɛɛ ji Biblia mli gbalɛi amlibaa, taakɛ Nyɔŋmɔ webii lɛ kɛ afii babaoo ejaje lɛ? Ani eeenyɛ efee akɛ mɛi babaoo kɛ amɛjwɛŋmɔ ema nibii ni amɛkɛ amɛhiŋmɛii naa lɛ pɛ anɔ? (2 Kor. 5:7) Ani amɛshihilɛ mli nibii ehe amɛjwɛŋmɔ aahu akɛ amɛnaaa nɔ ni Nyɔŋmɔ tsuɔ lɛ? (Mat. 24:37-39) Ani nibii ni Satan je lɛ wieɔ eshiɔ Nyɔŋmɔ webii lɛ kɛ otii ni je lɛ woɔ he hewalɛ lɛ miigbala amɛjwɛŋmɔ? (2 Kor. 4:4) Ja mɔ ko yɛ hemɔkɛyeli ni enuɔ mumɔŋ nibii ashishi dani ebaanyɛ enu nɔ ni yaa nɔ yɛ Nyɔŋmɔ Maŋtsɛyeli lɛ mli lɛ shishi. Kwɛ miishɛɛ ni eji akɛ wɔshwilako, shi moŋ wɔmiina nibii ni yaa nɔ lɛ!

EFƆŊFEEMƆ MLI MIIWO WU

8-10. (a) Mɛɛ gbɛ nɔ 2 Timoteo 3:1-5 lɛ eba mli? (b) Mɛni hewɔ wɔbaanyɛ wɔkɛɛ akɛ efɔŋfeemɔ mli miiwo wu lɛ?

8 Yiŋtoo ni ji enyɔ hewɔ ni wɔle akɛ etsɛŋ ni Nyɔŋmɔ Maŋtsɛyeli lɛ baabɔi shikpɔŋ lɛ nɔ yeli lɛ ji akɛ, adesai anɔfɔŋfeemɔ mli miiwo wu. Nɔ ni miihe ashɛ afii 100 nɛ lɛ, wɔna akɛ gbalɛ ni yɔɔ 2 Timoteo 3:1-5 lɛ eba mli. Kɛ́ hooo kwraa lɛ, sui ni awie he yɛ ŋmalɛ nɛɛ mli lɛ miihe shi yɛ je lɛŋ fɛɛ. Ani onaaa akɛ nibii ni awie he yɛ gbalɛ nɛɛ mli lɛ hu mli miiwo wu? Nyɛhaa wɔsusua nɔkwɛmɔnii komɛi ahe wɔkwɛa.Nyɛkanea 2 Timoteo 3:1, 13.

9 Susumɔ nɔ ni yɛ afi 1940 loo afi 1950 afii lɛ amli lɛ abuɔ lɛ akɛ esaaa, kɛ nɔ ni ŋmɛnɛ lɛ eyaa nɔ yɛ nitsumɔhei, hiɛtserɛjiemɔ mli, kpɔiaŋgbɔlemɔ mli, kɛ bɔ ni mɛi saa amɛhe amɛhaa lɛ he okwɛ. Yiwalɛ nifeemɔ kɛ jeŋba sha eyi he fɛɛ he. Mɛi sumɔɔ ni ana amɛ akɛ amɛji mɛi ni hiɛ yɔɔ la fe fɛɛ, amɛjeŋba ekpɔtɔ fe mɔ fɛɛ mɔ, loo mɛi ni yiŋ wa fe fɛɛ. Tɛlivishiŋ nɔ nifeemɔi ni yɛ afi 1950 afii lɛ amli lɛ abuɔ akɛ esaaa lɛ ji nɔ ni ŋmɛnɛ lɛ ajieɔ yi akɛ wekui baanyɛ akwɛ. Ni mɛi babaoo eyɔse akɛ, hii ni kɛ hii feɔ yakayaka nii loo yei ni kɛ yei feɔ yakayaka nii lɛ náa mɛi anɔ hewalɛ waa yɛ hiɛtserɛjiemɔ  kɛ hesaamɔ mli, ni amɛwieɔ amɛjeŋba gbonyo lɛ he yɛ faŋŋ ni efeee amɛ hiɛgbele. Eŋɔɔ wɔnaa waa akɛ wɔle bɔ ni Nyɔŋmɔ buɔ nifeemɔi nɛɛ ehaa!Nyɛkanea Yuda 14, 15.

10 Agbɛnɛ hu, susumɔ nɔ ni kɛ́ gbekɛ ko fee yɛ afi 1950 afii lɛ amli lɛ abuɔ lɛ akɛ eji atuatsemɔ, kɛ nɔ ni yaa nɔ ŋmɛnɛ lɛ he okwɛ. Akɛ nɔkwɛmɔnɔ lɛ, yɛ nakai beaŋ lɛ, fɔlɔi atsui yeɔ kɛ́ amɛna akɛ amɛbii miishɛre tawa, amɛmiinu dãa, loo amɛmiijo joi ni esaaa. Shi ŋmɛnɛ lɛ, wɔnuɔ saji ni kɛ́ ojwɛŋ he lɛ, ojwɛŋmɔ shɛɛɛ he tamɔ: Skul gbekɛ ko ni eye afii 15 ni etswara eklasbii tu, ni mɛi 2 egboi ni mɛi 13 hu epila. Oblahii komɛi ni etɔrɔ dãa egbe gbekɛ yoo ko ni ená afii nɛɛhu, ni amɛyi etsɛ kɛ enyɛmi ko. Adafitswaa kroko hu tsɔɔ akɛ, yɛ Asia maŋ ko mli lɛ, oblahii kɛ oblayei ji mɛi titri ni ye awui waa yɛ afii nyɔŋma akɔntaa ko ni abu lɛ mli. Ani enɛ etsɔɔɔ akɛ nibii amli miiwo wu ŋmɛnɛ?

11. Mɛni hewɔ mɛi babaoo yɔseee akɛ nibii amli miiwo wu lɛ?

11 Bɔfo Petro wie akɛ: “Naagbee gbii lɛ anɔ lɛ hefɛoyelɔi aaaba kɛ hefɛoyeli, mɛi ní aaanyiɛ yɛ amɛ diɛŋtsɛ amɛkɔnɔi lɛ anaa, ni amɛaakɛɛ: Nɛgbɛ ebaa lɛ he shiwoo lɛ yɔɔ? ejaakɛ kɛjɛ beyinɔ ní tsɛmɛi lɛ tee yawɔwɔi nɛɛ, bɔ ni nibii yɔɔ kɛjɛ jeŋbɔɔ shishijee mli lɛ, nakai nɔŋŋ amɛyɔɔ nɛɛ,” ni esane ja. (2 Pet. 3:3, 4) Mɛni hewɔ mɛi komɛi feɔ amɛnii yɛ nɛkɛ gbɛ nɔ? Etamɔ nɔ ni kɛ́ shihilɛ ko tee nɔ be kpalaŋŋ lɛ, mɛi ebuuu lɛ nɔ ko dɔŋŋ. Kɛ́ wɔnaanyo ko jeŋba tsake shwiaa lɛ, ekolɛ wɔnaa baakpɛ wɔhe, shi kɛ́ bɔ ni mɛi baa amɛjeŋ amɛhaa lɛ tsake fiofio yɛ be kpalaŋŋ mli lɛ, ekolɛ wɔyɔseŋ. Fɛɛ sɛɛ lɛ, esaaa akɛ wɔbuɔ tsakemɔ nɛɛ akɛ ejeee nɔ ko.

12, 13. (a) Mɛni hewɔ esaaa akɛ wɔhaa shihilɛi ni yaa nɔ yɛ je lɛŋ lɛ jeɔ wɔnijiaŋ wui lɛ? (b) Mɛni baaye abua wɔ ni wɔkpee “jaramɔ bei” nɛɛ anaa?

12 Bɔfo Paulo bɔ wɔ kɔkɔ akɛ, yɛ “naagbee gbii lɛ anɔ lɛ, jaramɔ bei baaba.” (2 Tim. 3:1) Shi shihilɛ lɛ jaraŋ bɔ ni wɔnyɛŋ naa wɔkpee, no hewɔ lɛ, esaaa akɛ wɔsheɔ gbeyei. Yɛ Yehowa, emumɔ lɛ, kɛ Kristofoi asafo lɛ yelikɛbuamɔ naa lɛ, wɔbaanyɛ wɔkpee shihilɛ fɛɛ shihilɛ ni wɔkɛbaakpe lɛ naa shweshweeshwe. Wɔbaanyɛ wɔya nɔ wɔye anɔkwa. Nyɔŋmɔ baaha wɔ “hewalɛ ní fá kɛteke nɔ.”2 Kor. 4:7-10.

13 Paulo kɛ wiemɔ “ná enɛ ole” lɛ je gbalɛ ni kɔɔ naagbee gbii ahe lɛ shishi. Wiemɔ nɛɛ maa nɔ mi akɛ gbalɛ nɛɛ baaba mli. Ŋwanejee ko bɛ he akɛ, nibii ni yaa nɔ yɛ je lɛ mli lɛ mli baaya nɔ awo wu kɛyashi Yehowa kɛ naagbee lɛ baaba. Yinɔsaneŋmalɔi haa wɔleɔ akɛ, beni akutsei komɛi loo maji komɛi amli bii ajeŋba kpɔtɔ lɛ, akpata akutso lɛ loo maŋ muu lɛ fɛɛ hiɛ. Shi be ko bako pɛŋ ni mɛi ajeŋba ekpɔtɔ yɛ jeŋ fɛɛ tamɔ bɔ ni eji amrɔ nɛɛ. Ekolɛ mɛi babaoo baabu enɛ akɛ ejeee nɔ ko, shi esa akɛ tsakemɔ kpele ni eba kɛjɛ afi 1914 lɛ aha wɔna faŋŋ akɛ, etsɛŋ ni Nyɔŋmɔ Maŋtsɛyeli lɛ baajie efɔŋfeemɔ kɛya.

NƐKƐ YINƆ NƐƐ HOŊ

14-16. Mɛni ji yiŋtoo ni ji etɛ hewɔ ni wɔheɔ wɔyeɔ akɛ etsɛŋ ni Nyɔŋmɔ Maŋtsɛyeli lɛ ‘baaba’ lɛ?

14 Nɔ ni etee nɔ yɛ Nyɔŋmɔ webii lɛ ateŋ lɛ ji yiŋtoo ni ji etɛ hewɔ ni wɔyɔɔ nɔmimaa akɛ naagbee lɛ ebɛŋkɛ lɛ. Akɛ nɔkwɛmɔnɔ lɛ, dani abaato Nyɔŋmɔ Maŋtsɛyeli lɛ shishi yɛ ŋwɛi lɛ, no mli lɛ, ayɛ anɔkwafoi akuu fioo ko ni afɔ amɛ mu ni miisɔmɔ Nyɔŋmɔ yɛ  shikpɔŋ lɛ nɔ. Beni nibii komɛi ni amɛkpaa gbɛ akɛ ebaaba mli yɛ afi 1914 lɛ baaa mli lɛ, mɛni amɛfee? Amɛteŋ mɛi babaoo fĩ shi yɛ kaa kɛ yiwaa ni akɛba amɛnɔ lɛ mli, ni amɛtee nɔ amɛsɔmɔ Yehowa. Yɛ afii ni eho lɛ amli lɛ, mɛi ni afɔ amɛ mu nɛɛ ateŋ mɛi babaoo loo ekolɛ amɛ fɛɛ po amɛye anɔkwa kɛtee gbele mli.

15 Yɛ Yesu gbalɛ ni kɔɔ nibii agbɛjianɔtoo nɛɛ naagbee lɛ he lɛ mli lɛ, ewie akɛ: “Nɛkɛ yinɔ nɛɛ hoŋ, ja nii nɛɛ fɛɛ eba mli dã.” (Nyɛkanea Mateo 24:33-35.) Wɔnuɔ shishi akɛ, “nɛkɛ yinɔ nɛɛ” ni Yesu tsĩ tã lɛ kɔɔ Kristofoi ni afɔ amɛ mu akui enyɔ he. Klɛŋklɛŋ kuu lɛ ji mɛi ni yɔɔ wala mli yɛ afi 1914, ni nu shishi akɛ Kristo ebɔi nɔyeli yɛ nakai afi lɛ mli lɛ. Jeee akɛ mɛi nɛɛ yɛ wala mli yɛ afi 1914 lɛ mli kɛkɛ, shi moŋ, no mli lɛ akɛ mumɔ efɔ amɛ mu akɛ Nyɔŋmɔ bii dani afi 1914 lɛ shɛ loo afɔ amɛ mu yɛ nakai afi lɛ mli.Rom. 8:14-17.

16 Kuu ni ji enyɔ ni “nɛkɛ yinɔ nɛɛ” kɔɔ amɛhe lɛ ji mɛi ni banina klɛŋklɛŋ kuu lɛ mli bii lɛ ekomɛi. Jeee akɛ amɛbanina amɛ kɛkɛ, shi amɛ hu afɔ amɛ mu beni klɛŋklɛŋ kuu lɛ mli bii lɛ ekomɛi yɔɔ shikpɔŋ nɔ lolo lɛ. Belɛ, jeee mɛi ni afɔ amɛ mu ni yɔɔ ŋmɛnɛ lɛ ateŋ mɔ fɛɛ mɔ fata “nɛkɛ yinɔ nɛɛ” ni Yesu tsĩ tã lɛ he. Ŋmɛnɛ lɛ, mɛi ni yɔɔ kuu ni ji enyɔ lɛ mli lɛ miigbɔlɔ. Kɛlɛ, Yesu wiemɔi ni yɔɔ Mateo 24:34 lɛ haa wɔnáa nɔmimaa akɛ, “nɛkɛ yinɔ nɛɛ” ateŋ mɛi komɛi gboiŋ dani amanehulu kpeteŋkpele lɛ baaje shishi. Enɛ hu maa nɔ mi waa kɛhaa wɔ akɛ, be ni eshwɛ ni Nyɔŋmɔ Maŋtsɛyeli lɛ nɔ Maŋtsɛ lɛ baakpata nibii agbɛjianɔtoo fɔŋ nɛɛ hiɛ, ni ekɛ jalɛ jeŋ hee lɛ aba lɛ faaa dɔŋŋ.2 Pet. 3:13.

ETSƐŊ KRISTO BAAGBE EKUNIMYELI LƐ NAA

17. Mɛni Biblia mli gbalɛi etɛ ni wɔsusu he nɛɛ haa wɔnaa faŋŋ?

17 Mɛni Biblia mli gbalɛi etɛ ni wɔsusu he nɛɛ haa wɔnaa faŋŋ? Yesu bɔ wɔ kɔkɔ akɛ, wɔleŋ nɔ gbi loo nɔ ŋmɛlɛtswaa nɔ ni naagbee lɛ baaba, ni yɛ anɔkwale mli lɛ, wɔleee hu. (Mat. 24:36; 25:13) Shi taakɛ Paulo tsĩ tã lɛ, wɔbaanyɛ wɔle “be lɛ,” ni ji naagbee gbii lɛ, ni wɔle hu. (Nyɛkanea Romabii 13:11.) Wɔyɛ nakai be, ni ji naagbee gbii lɛ amli. Kɛ́ wɔjwɛŋ Biblia mli gbalɛi kɛ nɔ ni Yehowa Nyɔŋmɔ kɛ Yesu Kristo tsuɔ lɛ nɔ jogbaŋŋ lɛ, ebaaha wɔna faŋŋ akɛ nibii agbɛjianɔtoo fɔŋ nɛɛ naagbee lɛ ebɛŋkɛ lɛɛlɛŋ.

18. Mɛni baaba mɛi ni ekpɛlɛɛɛ Yesu Kristo nɔ akɛ Maŋtsɛ lɛ anɔ?

18 Etsɛŋ, mɛi ni ekpɛlɛɛɛ hegbɛ ni akɛha Yesu Kristo, ni ji mɔ ni ta okpɔŋɔ yɛŋ lɛ nɔ lɛ nɔ lɛ baana akɛ amɛlaka amɛhe kwraa. Amɛnyɛŋ amɛjo kojomɔ ni akɛbaaba amɛnɔ lɛ naa foi. Kɛ́ eba lɛ nakai lɛ, amɛbaabo kɛ gbeyeishemɔ akɛ: “Namɔ aaanyɛ shi adamɔ?” (Kpoj. 6:15-17) Kɛlɛ, Kpojiemɔ yitso 7 lɛ haa wɔnaa hetoo lɛ. Mɛi ni afɔ amɛ mu lɛ kɛ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ ‘baadamɔ shi,’ ejaakɛ Nyɔŋmɔ kpɛlɛɔ amɛnɔ. No sɛɛ lɛ, abaabaa “asafo babaoo” ni jɛ tooi krokomɛi lɛ ateŋ lɛ ayi kɛfo amanehulu kpeteŋkpele lɛ.Kpoj. 7:9, 13-15.

19. Akɛni oyɛ nɔmimaa akɛ naagbee lɛ ebɛŋkɛ hewɔ lɛ, mɛni gbɛ okpaa?

19 Kɛ́ wɔjwɛŋ Biblia mli gbalɛi ni baa mli yɛ wɔbei nɛɛ amli lɛ anɔ jogbaŋŋ lɛ, Satan je lɛ gbalaŋ wɔjwɛŋmɔ, ni wɔbaana nɔ ni nibii ni yaa nɔ yɛ je lɛŋ lɛ tsɔɔ. Etsɛŋ, Kristo baatsɔ Harmagedon ta lɛ nɔ ekpata jeŋ fɔŋ nɛɛ hiɛ, ni ebaagbe ekunimyeli lɛ naa kwraa. (Kpoj. 19:11, 19-21) Kwɛ miishɛɛ ni wɔbaaná yɛ no sɛɛ!Kpoj. 20:1-3, 6; 21:3, 4.