Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  January 2014

Kristo Eye Nɔ Afii 100—Te Oná He Sɛɛ Oha Tɛŋŋ?

Kristo Eye Nɔ Afii 100—Te Oná He Sɛɛ Oha Tɛŋŋ?

“Onitsumɔi lɛ dara ni amɛyɛ naakpɛɛ, Nuŋtsɔ Nyɔŋmɔ Ofe; . . . bo jeŋmaji lɛ amaŋtsɛ.”KPOJ. 15:3.

1, 2. Mɛni Nyɔŋmɔ baatsɔ Maŋtsɛyeli lɛ nɔ efee, ni mɛni hewɔ wɔyɔɔ nɔmimaa akɛ Maŋtsɛyeli lɛ baaba lɛ?

BENI Yesu Kristo kɛ esɛɛnyiɛlɔi lɛ yɔɔ gɔŋ ko ni yɔɔ Kapernaum masɛi lɛ nɔ yɛ April mli yɛ afi 31 Ŋ.B. lɛ, etsɔɔ amɛ ni amɛsɔle akɛ: “Omaŋtsɛyeli lɛ aba.” (Mat. 6:10) Ŋmɛnɛ lɛ, mɛi pii heee yeee akɛ Maŋtsɛyeli lɛ baaba. Shi wɔyɛ nɔmimaa akɛ, abaaha sɔlemɔ ni wɔjɛɔ wɔtsuiŋ wɔsɔleɔ akɛ Nyɔŋmɔ Maŋtsɛyeli lɛ aba lɛ hetoo.

2 Yehowa baatsɔ Maŋtsɛyeli lɛ nɔ efee eweku ni yɔɔ ŋwɛi kɛ shikpɔŋ lɛ nɔ lɛ ekome. Yehowa yiŋtoo nɛɛ baaba mli. (Yes. 55:10, 11) Nibii ni etee nɔ yɛ afii 100 ni eho nɛ lɛ mli lɛ maa nɔ mi akɛ Yehowa etsɔ Maŋtsɛ momo! Nyɔŋmɔ miifee nibii babaoo kɛmiiha etsuji anɔkwafoi akpekpei abɔ. (Zak. 14:9; Kpoj. 15:3) Shi srɔtofeemɔ yɛ Maŋtsɛ ni Yehowa etsɔ lɛ kɛ Nyɔŋmɔ Maŋtsɛyeli lɛ ni Yesu tsɔɔ wɔ ni wɔsɔle akɛ eba lɛ teŋ. Mɛɛ srɔtofeemɔ yɔɔ enyɔ nɛɛ teŋ, ni te wɔnáa he sɛɛ tɛŋŋ?

MAŊTSƐ NI YEHOWA EHALA LƐ JE NITSUMƆ SHISHI

3. (a) Mɛɛ be awo Yesu Maŋtsɛ, ni yɛ nɛgbɛ? (b) Te ooofee tɛŋŋ otsɔɔ akɛ Yesu bɔi nɔyeli yɛ afi 1914? (Kwɛmɔ shishigbɛ niŋmaa lɛ.)

3 Aaafee afii 20 dani afi 1900 afii lɛ baaje shishi lɛ, Nyɔŋmɔ tsuji nu gbalɛ ko ni Daniel gba aaafee afii 2,500 ni eho nɛ lɛ shishi. Egba akɛ: “Nɛkɛ maŋtsɛmɛi nɛɛ ayinɔ lɛ Nyɔŋmɔ ní yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ.” (Dan. 2:44) Biblia Kaselɔi lɛ kɛ afii nyɔŋmai abɔ  shiɛ akɛ afi 1914 baafee afi ko ni sa kadimɔ waa. Mɛi ni yɔɔ wala mli yɛ nakai beaŋ lɛ ateŋ mɛi babaoo susu akɛ nibii baahi wɔsɛɛ. Woloŋmalɔ ko ŋma akɛ: “No mli lɛ, afi 1914 je lɛ eyi obɔ kɛ hiɛnɔkamɔ kɛ shiwoo.” Shi sɛɛ mli yɛ nakai afi lɛ nɔŋŋ mli lɛ, Jeŋ Ta I lɛ je shishi, ni no ha Biblia mli gbalɛ ba mli. Hɔji, shikpɔŋhosomɔi, tsɛŋemɔ helai, kɛ Biblia mli gbalɛi krokomɛi ni ba mli lɛ ma nɔ mi akɛ Yesu Kristo ebɔi nɔyeli yɛ ŋwɛi akɛ Nyɔŋmɔ Maŋtsɛyeli lɛ nɔ Maŋtsɛ yɛ afi 1914. * Yehowa batsɔ Maŋtsɛ yɛ gbɛ kroko nɔ beni ewo e-Bi lɛ akɛ Mesia Maŋtsɛ lɛ!

4. Mɛni Maŋtsɛ hee lɛ fee klɛŋklɛŋ? No sɛɛ lɛ mɛni efee?

4 Nɔ klɛŋklɛŋ ni Maŋtsɛ hee ni Nyɔŋmɔ wo lɛ fee ji, efã ta eshi Satan, ni ji e-Tsɛ lɛ Henyɛlɔ ni fe fɛɛ lɛ. Yesu kɛ ebɔfoi lɛ shwie Abonsam kɛ edaimonioi lɛ kɛjɛ ŋwɛi. Enɛ ha miishɛɛ kpele ba ŋwɛi, shi ekɛ nɔnaa babaoo ba shikpɔŋ lɛ nɔ fe bei fɛɛ ni eho. (Nyɛkanea Kpojiemɔ 12:7-9, 12.) No sɛɛ lɛ, Maŋtsɛ lɛ je shishi akɛ ebaatsuu etsuji ni yɔɔ shikpɔŋ lɛ nɔ lɛ ahe, etsɔɔ amɛ nii, ni eto amɛhe gbɛjianɔ koni amɛfee Nyɔŋmɔ suɔmɔnaa nii. Nyɛhaa wɔkwɛa nɔ ni wɔbaanyɛ wɔkase kɛjɛ Yesu gbɛtsɔɔmɔ toi ni amɛbo lɛ mli ŋmɛnɛ.

MESIA MAŊTSƐ LƐ TSUU ETSUJI ANƆKWAFOI LƐ AHE

5. Mɛni tee nɔ kɛjɛ afi 1914 kɛyashi afi 1919 shishijee gbɛ?

5 Beni Yesu, ni ji Maŋtsɛ lɛ eshwie Satan kɛ edaimonioi lɛ kɛjɛ ŋwɛi sɛɛ lɛ, Yehowa ha Yesu basara etsuji ni yɔɔ shikpɔŋ lɛ nɔ lɛ, ni etsuu amɛhe. Gbalɔ Maleaki wie hetsuumɔ nɛɛ he akɛ eji mumɔŋ nɔ. (Mal. 3:1-3) Yinɔsane haa wɔleɔ akɛ, nifeemɔ nɛɛ tee nɔ kɛjɛ afi 1914 kɛyashi afi 1919 shishijee gbɛ. * Kɛ́ wɔmiitao wɔfee Yehowa jeŋ muu fɛɛ weku lɛ fã lɛ, esa akɛ wɔhe atse loo wɔfee krɔŋŋ. (1 Pet. 1:15, 16) Esaaa akɛ wɔkɛ wɔhe woɔ apasa jamɔ loo maŋkwramɔŋ nifeemɔ ko kwraa mli kɛwoɔ wɔhe muji.

6. Te feɔ tɛŋŋ wɔnine shɛɔ mumɔŋ niyenii nɔ lɛ, ni mɛni hewɔ ehe hiaa waa lɛ?

6 No sɛɛ lɛ, Yesu kɛ hegbɛ ni eyɔɔ akɛ Maŋtsɛ lɛ tsu nii kɛhala “nyɔŋ anɔkwafo kɛ hiɛshikalɔ” lɛ. Nyɔŋ nɛɛ baaha mɛi fɛɛ ni fata Yesu ‘tooku’ lɛ he lɛ amɛmumɔŋ ŋmaa daa. (Mat. 24:45-47, NW; Yoh. 10:16) Kɛjɛ afi 1919 lɛ, kuu fioo ni ji nyɛmimɛi hii ni afɔ amɛ mu lɛ etee nɔ amɛha Yesu ‘webii’ lɛ ŋmaa, ni enɛ ji nitsumɔ ni he hiaa waa. Mumɔŋ niyenii babaoo ni wɔnine shɛɔ nɔ kɛjɛɔ nyɔŋ anɔkwafo kɛ hiɛshikalɔ lɛ dɛŋ lɛ haa wɔhemɔkɛyeli lɛ mli waa. Ewajeɔ wɔfai shi ni wɔtswa akɛ wɔbaaha wɔjamɔ, wɔjeŋba, wɔsusumɔi, kɛ wɔgbɔmɔtsei ahe atse lɛ. Mumɔŋ niyenii nɛɛ hu tsɔseɔ wɔ ni eyeɔ ebuaa wɔ koni wɔnyɛ wɔtsu shiɛmɔ nitsumɔ lɛ waa, ni enɛ ji nitsumɔ ni he hiaa fe fɛɛ yɛ shikpɔŋ lɛ nɔ. Ani oyeɔ mumɔŋ niyenii nɛɛ daa?

MAŊTSƐ LƐ TSƆƆ ETSUJI LƐ ANII KONI AMƐSHIƐ YƐ JEŊ FƐƐ

7. Mɛɛ nitsumɔ ni he hiaa Yesu je shishi beni eyɔɔ shikpɔŋ lɛ nɔ lɛ, ni mɛɛ be ebaaba naagbee?

7 Beni Yesu je esɔɔmɔ nitsumɔ lɛ shishi yɛ shikpɔŋ lɛ nɔ lɛ, ewie akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ mitsɔɔ maji krokomɛi hu, ejaakɛ no hewɔ atsu mi.” (Luka 4:43) Enɛ ji nitsumɔ ni he hiaa Yesu fe fɛɛ yɛ eshihilɛ mli, ni ekɛ afii etɛ kɛ fã tsu. Ekɛɛ ekaselɔi lɛ akɛ: “Shi ni nyɛyaa nɛɛ, nyɛshiɛa nyɛkɛa akɛ: Ŋwɛi maŋtsɛyeli lɛ eshɛ shi etã.” (Mat. 10:7) Beni atee Yesu shi sɛɛ lɛ,  egba akɛ esɛɛnyiɛlɔi lɛ baashiɛ sane nɛɛ “kɛyashi shikpɔŋ lɛ naagbeehei lɛ.” (Bɔf. 1:8) Ewo amɛ shi akɛ ebaaya nɔ eye ebua amɛ yɛ nitsumɔ ni he hiaa nɛɛ mli kɛyashi nibii agbɛjianɔtoo nɛɛ naagbee.Mat. 28:19, 20.

8. Mɛɛ gbɛ nɔ Maŋtsɛ lɛ wo esɛɛnyiɛlɔi ni yɔɔ shikpɔŋ lɛ nɔ lɛ hewalɛ ni amɛshiɛ?

8 Yɛ afi 1919 lɛ, akɛ hewalɛ hee wo “maŋtsɛyeli lɛ he sane kpakpa” lɛ jajemɔ lɛ mli. (Mat. 24:14) No mli lɛ, Maŋtsɛ lɛ miiye nɔ yɛ ŋwɛi, ni ebua mɛi fioo ko ni etsuu amɛhe lɛ naa yɛ shikpɔŋ lɛ nɔ. Mɛi nɛɛ kɛ ekãa tsu Yesu fãmɔ akɛ ashiɛ Nyɔŋmɔ Maŋtsɛyeli ni ato shishi yɛ ŋwɛi lɛ he sane kpakpa lɛ he nii! (Bɔf. 10:42) Akɛ nɔkwɛmɔnɔ lɛ, Maŋtsɛyeli lɛ sɛɛfilɔi aaafee 20,000 tee majimaji ateŋ kpee ko ni afee yɛ Cedar Point, yɛ Ohio ni yɔɔ U.S.A. lɛ, yɛ September 1922. Amɛná miishɛɛ waa beni Nyɛminuu Rutherford ha wiemɔ ni yitso ji, “Maŋtsɛyeli Lɛ,” ni ejaje akɛ: “Naa, Maŋtsɛ lɛ miiye nɔ! Nyɛji enajiaŋdamɔlɔi sanejajelɔi. No hewɔ lɛ, nyɛtswaa, nyɛtswaa, nyɛtswaa Maŋtsɛ lɛ kɛ emaŋtsɛyeli lɛ he adafi” lɛ. Enɔ jetsɛremɔ lɛ, amɛteŋ mɛi akpei enyɔ kɛ amɛhe wo shiɛmɔ nitsumɔ lɛ mli, ni mɛi komɛi po shiɛ kɛtee hei ni kɛ he ni afeɔ kpee lɛ yɛ lɛ teŋ jɛkɛmɔ aaafee kilomitai 72. Nyɛmi nuu ko wie akɛ: “Mihiɛ kpaŋ ninefɔɔ ni akɛha akɛ atswa Maŋtsɛyeli lɛ he adafi, kɛ ekãa ni mɛi ni eba kpee lɛ jie lɛ kpo lɛ nɔ kɔkɔɔkɔ!” Ni nakai nɔŋŋ mɛi babaoo hu nu he.

9, 10. (a) Mɛɛ skul srɔtoi ato he gbɛjianɔ koni akɛtsɔse Maŋtsɛyeli shiɛlɔi? (b) Te oná tsɔsemɔ nɛɛ he sɛɛ oha tɛŋŋ?

9 Beni shɛɔ afi 1922 lɛ, Maŋtsɛyeli shiɛlɔi ni fa fe 17,000 miishiɛ yɛ maji 58 anɔ yɛ jeŋ fɛɛ. Shi ehe bahia ni atsɔse amɛ. Yɛ klɛŋklɛŋ afii 100 lɛ mli lɛ, Yesu tsɔɔ ekaselɔi lɛ nɔ ni esa akɛ amɛshiɛ, he ni esa akɛ amɛshiɛ yɛ, kɛ bɔ ni esa akɛ amɛshiɛ amɛha. (Mat. 10:5-7; Luka 9:1-6; 10:1-11) Ŋmɛnɛ hu lɛ, Yesu kwɛɔ koni atsɔɔ mɛi fɛɛ ni kɛ amɛhe woɔ Maŋtsɛyeli shiɛmɔ nitsumɔ lɛ mli lɛ nii, ni amɛnine ashɛ dɛŋdadei ni baaye abua amɛ ni amɛshiɛ jogbaŋŋ lɛ anɔ. (2 Tim. 3:17) Yesu tsɔɔ Kristofoi asafo lɛ nɔ etsɔseɔ eshishi bii lɛ kɛha shiɛmɔ nitsumɔ lɛ. Gbɛ kome ni etsɔɔ nɔ etsɔseɔ amɛ ji, kɛtsɔ Teokrase Sɔɔmɔ Skul lɛ ni afeɔ yɛ asafoi ni fa fe 111,000 ni yɔɔ jeŋ fɛɛ lɛ mli lɛ nɔ. Atsɔɔ skul nɛɛ nɔ atsɔɔ shiɛlɔi ni fa fe akpekpei kpawo bɔ ni esa akɛ amɛshiɛ kɛ bɔ ni esa akɛ amɛtsɔɔ nii koni “mɛi fɛɛ” aná he sɛɛ.Nyɛkanea 1 Korintobii 9:20-23.

10 Yɛ Teokrase Sɔɔmɔ Skul lɛ sɛɛ lɛ, ato Biblia skul krokomɛi ahe gbɛjianɔ koni akɛtsɔse asafoŋ onukpai, daa gbɛgbalɔi, nyɛmimɛi hii oshijafoi, Kristofoi gbalashihilɛ mli hefatalɔi, Nitsumɔhe Nine Ajinafoi Akuu mli bii kɛ amɛŋamɛi, nɔkwɛlɔi gbɛfalɔi kɛ amɛŋamɛi, kɛ  maŋsɛɛ sɔɔlɔi. * Gbalashihilɛ mli hefatalɔi komɛi ni tee Biblia Skul Kɛha Kristofoi Gbalashihilɛ mli Hefatalɔi lɛ eko lɛ wie akɛ: “Tsɔsemɔ krɛdɛɛ ni akɛha wɔ lɛ eha suɔmɔ ni wɔyɔɔ kɛha Yehowa lɛ mli ewa, ni ewaje wɔ jogbaŋŋ koni wɔnyɛ wɔye wɔbua mɛi krokomɛi.”

11. Yɛ Satan tutuamɔi lɛ fɛɛ sɛɛ lɛ, mɛni eye ebua Maŋtsɛyeli shiɛlɔi lɛ ni amɛtee nɔ amɛshiɛ?

11 Satan, ni ji henyɛlɔ lɛ naa mɔdɛŋ fɛɛ ni abɔɔ kɛshiɛɔ sane kpakpa lɛ, kɛ mɔdɛŋ ni abɔɔ kɛtsɔɔ mɛi anii yɛ jeŋ fɛɛ lɛ. Ebɔɔ mɔdɛŋ akɛ ebaatsɔ gbɛ ni yɔɔ nigii kɛ gbɛ ni yɔɔ tɛ̃ɛ nɔ etsĩ Maŋtsɛyeli lɛ he sane kpakpa lɛ kɛ mɛi ni shiɛɔ lɛ anaa. Shi mɔdɛŋ ni henyɛlɔ lɛ bɔɔ lɛ fɛɛ baafee yaka. Yehowa eha e-Bi lɛ hegbɛ “yɛ onukpayeli kɛ hegbɛ kɛ hewalɛ kɛ nɔyeli fɛɛ kɛ gbɛ́i-fɛɛ-gbɛ́i” nɔ. (Efe. 1:20-22) Akɛ Maŋtsɛ lɛ, Yesu kɛ hegbɛ ni eyɔɔ lɛ tsuɔ nii kɛbuɔ ekaselɔi lɛ ahe ni etsɔɔ amɛ gbɛ, bɔni afee ni amɛfee e-Tsɛ lɛ suɔmɔnaa nii. * Aashiɛ sane kpakpa lɛ, ni aatsɔɔ mɛi akpekpei abɔ ni hiɛ tsui kpakpa lɛ bɔ ni amɛaafee amɛjá Yehowa. Eji hegbɛ ni wɔná akɛ wɔkɛ wɔhe aaawo nitsumɔ kpele nɛɛ mli!

MAŊTSƐ LƐ TO ETSUJI LƐ AHE GBƐJIANƆ KƐHA NITSUMƆ BABAOO

12. Tsɔɔmɔ tsakemɔi komɛi ni afee yɛ bɔ ni ato Nyɔŋmɔ webii lɛ ahe gbɛjianɔ aha lɛ mli kɛjɛ beni ato Maŋtsɛyeli lɛ shishi nɛɛ.

12 Kɛjɛ beni ato Maŋtsɛyeli lɛ shishi yɛ afi 1914 nɛɛ, Maŋtsɛ lɛ etee nɔ etsake bɔ ni atoɔ Nyɔŋmɔ webii lɛ ahe gbɛjianɔ koni amɛfee e-Tsɛ suɔmɔnaa nii lɛ mli. (Nyɛkanea Yesaia 60:17.) Yɛ afi 1919 lɛ, abɔi sɔɔmɔ nɔkwɛlɔ halamɔ yɛ asafo fɛɛ asafo mli koni ekwɛ shiɛmɔ nitsumɔ lɛ nɔ. Yɛ afi 1927 lɛ, ato gbɛjianɔ koni daa Hɔgbaa lɛ ayashiɛ yɛ shĩa fɛɛ shĩa. Yɛ afi 1931 beni wɔŋɔ Ŋmalɛ naa gbɛ́i ni ji Yehowa Odasefoi lɛ, ekanya Yehowa tsuji lɛ ni amɛkɛ ekãa babaoo shiɛ. (Yes. 43:10-12) Yɛ afi 1938 lɛ, akpa oshiki ni afɔ̃ɔ kɛhalaa mɛi ni baanyiɛ hiɛ yɛ asafo lɛ mli lɛ, ni yɛ no najiaŋ lɛ, adamɔ Ŋmalɛ naa taomɔ nii anɔ ahala amɛ. Yɛ afi 1972 lɛ, ato gbɛjianɔ koni asafoŋ onukpai akuu akwɛ asafo lɛ nɔ moŋ fe ni aaahala mɔ kome ni esɔmɔ akɛ asafo nɔkwɛlɔ. Awo hii fɛɛ ni sɔmɔɔ akɛ asafoŋ onukpai kɛ asafoŋ sɔɔlɔi lɛ hewalɛ ni ‘amɛkwɛ Nyɔŋmɔ asafoku’ lɛ nɔ. (1 Pet. 5:2) Ni yɛ afi 1976 lɛ, ato ajinafoi akui ekpaa yɛ Gbɛtsɔɔmɔ Kuu lɛ mli koni amɛkwɛ Maŋtsɛyeli nitsumɔ lɛ nɔ yɛ jeŋ fɛɛ. Kɛjɛ nakai beaŋ kɛbaa nɛɛ, Yesu etee nɔ eto esɛɛnyiɛlɔi lɛ ahe gbɛjianɔ koni amɛya nɔ amɛtsu nii yɛ Nyɔŋmɔ gbɛ nɔ loo teokrase gbɛ nɔ.

13. Te oná nibii ni Mesia Maŋtsɛ lɛ etsu yɛ afii 100 ni ekɛye nɔ lɛ mli lɛ ahe sɛɛ oha tɛŋŋ?

 13 Kɛ́ ojwɛŋ nibii ni Mesia Maŋtsɛ lɛ enyɛ etsu yɛ afii 100 ni ekɛye nɔ lɛ mli lɛ ahe lɛ, eyɛ naakpɛɛ waa. Etsuu mɛi komɛi ahe akɛ Yehowa najiaŋdamɔlɔi. Ekudɔ Maŋtsɛyeli lɛ he sane kpakpa ni ashiɛɔ yɛ shikpɔji 239 anɔ lɛ ni etsɔse mɛi akpekpei abɔ koni amɛjá Yehowa. Efee eshishi bii ni fa fe akpekpei kpawo lɛ ekome, ni amɛteŋ mɔ fɛɛ mɔ kɛ ehe eha kɛmiifee e-Tsɛ lɛ suɔmɔnaa nii. (Lala 110:3) Eji anɔkwale akɛ, nɔ ni Yehowa etsɔ Mesia Maŋtsɛyeli lɛ nɔ etsu lɛ yɛ naakpɛɛ waa. Shi nibii kpakpai babaoo yɛ lolo ni ebaatsu!

JƆƆMƆI NI MESIA MAŊTSƐYELI LƐ KƐBAABA WƆSƐƐ

14. (a) Kɛ́ wɔsɔle akɛ: “Omaŋtsɛyeli lɛ aba” lɛ, belɛ mɛni wɔbiɔ ni Nyɔŋmɔ afee lɛ? (b) Mɛni ji afi 2014 afi ŋmalɛ lɛ, ni mɛni hewɔ esa jogbaŋŋ lɛ?

14 Eyɛ mli akɛ Yehowa wó e-Bi Yesu Kristo Mesia Maŋtsɛyeli lɛ nɔ Maŋtsɛ yɛ afi 1914 moŋ, shi no haaa sɔlemɔ ni wɔsɔleɔ akɛ “omaŋtsɛyeli lɛ aba” lɛ hetoo kɛmɔɔɔ shi. (Mat. 6:10) Agba yɛ Biblia lɛ mli akɛ Yesu ‘baaye lumɔ yɛ ehenyɛlɔi lɛ ateŋ!’ (Lala 110:2) Adesai nɔyelɔi ni Satan kudɔɔ amɛ lɛ teɔ shi amɛwoɔ Maŋtsɛyeli lɛ. Kɛ́ wɔsɔle akɛ Nyɔŋmɔ Maŋtsɛyeli lɛ aba lɛ, belɛ wɔmiibi Nyɔŋmɔ ni eha Mesia Maŋtsɛ lɛ kɛ ehefatalɔi 144,000 lɛ afo adesa nɔyeli sɛɛ, ni amɛjie mɛi ni teɔ shi amɛwoɔ Maŋtsɛyeli lɛ yɛ shikpɔŋ lɛ nɔ lɛ kɛya. Kɛ́ enɛ ba mli lɛ, ebaaha gbalɛ ni yɔɔ Daniel 2:44 ni tsɔɔ akɛ Nyɔŋmɔ Maŋtsɛyeli lɛ ‘baajwara maŋtsɛyelii fɛɛ wɔtsɔwɔtsɔ, ni ekpata amɛhiɛ’ lɛ aba mli. Ebaakpata adesai nɔyelɔi ni teɔ shi woɔ Maŋtsɛyeli lɛ fɛɛ ahiɛ. (Kpoj. 6:1, 2; 13:1-18; 19:11-21) Be ni ekɛbaafee enɛ lɛ ebɛŋkɛ kpaakpa. Enɛ hewɔ lɛ, afi 2014 ní bafeɔ afii 100 kɛjɛ beni ato Nyɔŋmɔ Maŋtsɛyeli lɛ shishi yɛ ŋwɛi lɛ afi ŋmalɛ lɛ damɔ Mateo 6:10 lɛ nɔ, ni jɛmɛ kɛɔ akɛ: “Omaŋtsɛyeli lɛ aba,” ni eji ŋmalɛ ni sa jogbaŋŋ.

Afi 2014 afi ŋmalɛ lɛ ji: “Omaŋtsɛyeli lɛ aba.”Mateo 6:10

15, 16. (a) Mɛɛ nifeemɔi ni sa kadimɔ waa baaya nɔ yɛ Afii Akpe Nɔyeli lɛ mli? (b) Mɛni ji naagbee nii ni Yesu baafee akɛ Mesia Maŋtsɛ, ni te no baasa Yehowa yiŋtoo kɛha ebɔɔ nii lɛ fɛɛ he eha tɛŋŋ?

15 Kɛ́ Mesia Maŋtsɛ lɛ kpata Nyɔŋmɔ henyɛlɔi lɛ ahiɛ sɛɛ lɛ, ebaaŋɔ Satan kɛ edaimonioi lɛ ewo bu kwɔŋkwɔŋ lɛ mli afii akpe. (Kpoj. 20:1-3) Akɛni Satan naŋ mɛi anɔ hewalɛ dɔŋŋ hewɔ lɛ, Maŋtsɛ lɛ baaye abua mɛi koni amɛná kpɔ̃mɔ afɔleshaa lɛ he sɛɛ, ni ebaaha amɛye amɛhe kɛjɛ nibii ni ejɛ esha ni Adam fee lɛ mli kɛba lɛ ahe. Maŋtsɛ lɛ baatee mɛi akpekpei abɔ ni ewɔ yɛ gbohii abui amli lɛ ashi, ni ebaato gbɛjianɔ ni atsɔɔ mɛi nɛɛ Yehowa he nii. (Kpoj. 20:12, 13) Taakɛ Eden abɔɔ lɛ ji lɛ, shikpɔŋ muu lɛ fɛɛ baatsɔ paradeiso. Ni adesai anɔkwafoi lɛ fɛɛ baaye emuu.

16 Beni Kristo Afii Akpe Nɔyeli lɛ baaba naagbee aahu lɛ, Yehowa yiŋtoo kɛha shikpɔŋ lɛ eba mli. Kɛkɛ lɛ, Yesu kɛ Maŋtsɛyeli lɛ baaha e-Tsɛ. (Nyɛkanea 1 Korintobii 15:24-28.) Ehe ebahiaŋ dɔŋŋ ni aná Yehowa kɛ ebii ni yɔɔ shikpɔŋ lɛ nɔ lɛ ateŋdamɔlɔ. Nyɔŋmɔ bihii ni yɔɔ ŋwɛi kɛ ebii ni yɔɔ shikpɔŋ lɛ nɔ lɛ fɛɛ kɛ amɛŋwɛi Tsɛ lɛ baafee ekome akɛ jeŋ muu fɛɛ weku.

17. Mɛni otswa ofai shi akɛ obaafee yɛ Maŋtsɛyeli lɛ hewɔ?

17 Nibii ni sa kadimɔ ni Kristo etsu yɛ afii 100 ni ekɛye nɔ lɛ mli lɛ maa nɔ mi akɛ Yehowa miikudɔ nibii, ni akɛ, eyiŋtoo kɛha shikpɔŋ lɛ baaba mli. Nyɛhaa wɔyaa nɔ wɔsɔmɔa lɛ, ni wɔtswa Maŋtsɛ lɛ kɛ e-Maŋtsɛyeli lɛ he adafi. Wɔyɛ nɔmimaa akɛ etsɛŋ, Yehowa baaha sɔlemɔ ni wɔsɔleɔ akɛ: “Omaŋtsɛyeli lɛ aba” lɛ hetoo!

^ kk. 10 Kwɛmɔ sane ni yitso ji, “Teokrase Skul Srɔtoi—Amɛtsɔɔ akɛ Yehowa Sumɔɔ Wɔ” ni yɔɔ September 15, 2012 Buu-Mɔɔ, baafa 13-17 lɛ.

^ kk. 11 Kɛ́ ootao kunim ni aye yɛ saneyelihei yɛ maji babaoo anɔ lɛ he sane lɛ, kwɛmɔ December 1, 1998, Buu-Mɔɔ, baafa 19-22 lɛ.