Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  January 2014

Amɛkɛ Amɛhe Ha Yɛ Amɛsuɔmɔ Naa—Yɛ Afrika Anaigbɛ

Amɛkɛ Amɛhe Ha Yɛ Amɛsuɔmɔ Naa—Yɛ Afrika Anaigbɛ

BENI oblanyo ko ni atsɛɔ lɛ Pascal lɛ ji gbekɛ ni eyɔɔ maŋ ko ni mɛi pii yeɔ ohia yɛ mli lɛ mli yɛ Côte d’Ivoire lɛ, eshwe waa ni ená shihilɛ kpakpa wɔsɛɛ. Akɛni eji mɔ ko ni miikase atswɛrɛnɔmɔ hewɔ lɛ, eshwie eyiŋ akɛ, ‘Nɛgbɛ kwraa manyɛ maya ni mafee gbɛ́i yɛ kpɔiaŋgbɔlemɔ mli, ní maná shika pii?’ Beni eye aaafee afii 25 lɛ, ena akɛ Yuropa ji he ni esa akɛ eya. Shi akɛni ebɛ gbɛfãa woji hewɔ lɛ, ekpɛ eyiŋ akɛ ebaaju shi kɛya Yuropa mɔ.

Yɛ afi 1998 beni Pascal eye afii 27 lɛ, eje egbɛfãa lɛ shishi. Ejɛ Côte d’Ivoire kɛtee Ghana, etsa nɔ kɛtee Togo, kɛjɛ Togo kɛtee Benin, ni naagbee kwraa lɛ, eyashɛ Birni Nkonni, ni ji maŋ ko ni yɔɔ Niger lɛ. Agbɛnɛ, eshɛ egbɛfãa lɛ he ni yɔɔ oshara fe fɛɛ lɛ. Ehe bahia ni ekɛ lɔle afã gbɛ kɛfo Sahara Shia Ŋa lɛ kɛya kooyigbɛ. Kɛkɛ lɛ, kɛ́ eyashɛ Mediteranea Ŋshɔ lɛ naa lɛ, ekwɔ lɛlɛ kɛtee Yuropa. Nakai ji bɔ ni ekpɛ eyiŋ, shi nibii enyɔ komɛi ba yɛ Niger ni tsĩ enaa.

Klɛŋklɛŋ lɛ, eshika tã. Nɔ ni ji enyɔ lɛ, ekɛ gbɛgbalɔ ko ni atsɛɔ lɛ Noé lɛ kpe. Noé kɛ lɛ bɔi Biblia lɛ kasemɔ, ni nɔ ni ekase lɛ ta etsuiŋ waa ni etsake eyiŋkpɛɛ lɛ. Ekɛ mumɔŋ otii ye heloonaa otii ni mamɔ ehiɛ lɛ anajiaŋ. Abaptisi Pascal yɛ December 1999. Akɛni ehiɛ esɔ nɔ ni Yehowa efee eha lɛ lɛ hewɔ lɛ, yɛ afi 2001 lɛ, ekɛ ehe wo gbɛgbamɔ nitsumɔ lɛ mli yɛ maŋ tuuntu ni ekase anɔkwale lɛ yɛ mli lɛ mli yɛ Niger. Te enaa esɔɔmɔ lɛ tɛŋŋ? Ekɛ miishɛɛ wie akɛ, “Miná shihilɛ ni hi fe fɛɛ!”

AMƐMIINÁ SHIHILƐ NI HI FE FƐƐ—YƐ AFRIKA

Anne-Rakel

Taakɛ eji yɛ Pascal gbɛfaŋ lɛ, mɛi babaoo eyɔse akɛ, kɛ́ amɛtiu mumɔŋ otii asɛɛ lɛ, no baaha amɛtsui anyɔ amɛmli. Mɛi komɛi eshi Yuropa kɛtee Afrika ní amɛyasɔmɔ yɛ hei ni Maŋtsɛyeli shiɛlɔi ahe miihia waa yɛ, koni amɛnyɛ amɛshɛ mumɔŋ otii ni amɛkɛmamɔ amɛhiɛ lɛ ahe. Yɛ anɔkwale mli lɛ, Odasefoi aaafee 65 ni eye afii 17 kɛmiimɔ afii 70 lɛ efã kɛjɛ Yuropa kɛtee Afrika Anaigbɛ maji ni ji Benin, Burkina Faso, Niger, kɛ Togo lɛ amli. * Mɛni tsirɛ amɛ ni amɛkpɛ yiŋ ni tamɔ nakai, ni te nibii anaa yakpa ha amɛ tɛŋŋ?

Nyɛmi yoo ko ni atsɛɔ lɛ Anne-Rakel ni jɛ Denmark lɛ wie akɛ: “Mifɔlɔi yasɔmɔ akɛ maŋsɛɛ sɔɔlɔi yɛ Senegal. Be fɛɛ be lɛ, amɛkɛ miishɛɛ wieɔ maŋsɛɛ sɔɔmɔ he aahu akɛ mishwe waa akɛ mi hu mayasɔmɔ yɛ maŋsɛɛ.” Aaafee afii 15 ni eho nɛ, beni Anne-Rakel eye aaafee afii 22 lɛ, efã kɛtee Togo, ni amrɔ nɛɛ eesɔmɔ yɛ mumuii awiemɔ asafo ko mli yɛ jɛmɛ. Mɛɛ gbɛ nɔ fã ni efã lɛ wo mɛi krokomɛi hewalɛ? Ewie akɛ: “Sɛɛ mli lɛ, minyɛmi yoo fioo kɛ minyɛmi nuu hu nyiɛ misɛɛ kɛba Togo.”

Albert-Fayette kɛ Aurele

 Nyɛmi nuu ko ni ebote gbalashihilɛ mli ni eye afii 70 ni jɛ France ni atsɛɔ lɛ Aurele lɛ kɛɛ akɛ: “Afii enumɔ ni eho nɛ beni miba nitsumɔ mli hejɔɔmɔ lɛ, ehe bahia ni makpɛ miyiŋ: ani mahi shi kpoo yɛ France ni mamɛ Paradeiso lɛ, aloo malɛɛ misɔɔmɔ lɛ mli?” Aurele lɛɛ esɔɔmɔ lɛ mli. Aaafee afii etɛ ni eho nɛ lɛ, ekɛ eŋa Albert-Fayette fã kɛtee Benin. Aurele wie akɛ: “Wɔhe ni wɔkɛha akɛ wɔbaasɔmɔ Yehowa yɛ biɛ lɛ ji yiŋ ni hi fe fɛɛ ni wɔkpɛ.” Eŋmɔ muɛɛ ni ekɛfata he akɛ: “Eyaba lɛ akɛ, hei ni wɔshiɛɔ yɛ lɛ ekomɛi bɛŋkɛ ŋshɔ lɛ, ni bɔ ni jɛmɛ yɔɔ fɛo waa lɛ haa mifeɔ Paradeiso lɛ he mfoniri.”

Nyɛmi nuu ko ni atsɛɔ lɛ Clodomir kɛ eŋa Lysiane lɛ fã kɛjɛ France kɛtee Benin afii 16 ni eho nɛ. Shishijee mli lɛ, amɛhiɛ tse amɛwekumɛi kɛ amɛnanemɛi ni yɔɔ France lɛ waa, ni amɛnu he akɛ amɛnyɛŋ amɛkpee shihilɛ hee ni amɛyaje mli lɛ naa. Kulɛ esaaa akɛ amɛsheɔ gbeyei, ejaakɛ amɛná miishɛɛ waa. Clodomir kɛɛ akɛ: “Yɛ afii 16 ni wɔkɛhi biɛ lɛ mli lɛ, kɛ́ hooo kwraa lɛ, daa afi lɛ wɔyeɔ wɔbuaa mɔ kome ni ebaleɔ anɔkwale lɛ.”

Lysiane kɛ Clodomir kɛ mɛi komɛi ni amɛye amɛbua ni amɛbale anɔkwale lɛ

Johanna kɛ Sébastien

Nyɛmi nuu ko ni atsɛɔ lɛ Sébastien kɛ eŋa Johanna lɛ fã kɛjɛ France kɛtee Benin yɛ afi 2010 mli. Sébastien wie akɛ: “Nitsumɔi pii yɛ asafo lɛ mli.” Etsɔɔ mli akɛ, sɔɔmɔ ni amɛsɔmɔɔ yɛ jɛmɛ lɛ eha amɛkase nibii pii yɛ be kukuoo mli! Te mɛi feɔ amɛnii amɛhaa tɛŋŋ yɛ shiɛmɔ nitsumɔ lɛ mli? Johanna kɛɛ akɛ: “Anɔkwale lɛ he kumai miiye mɛi. Kɛ́ wɔnyiɛɛɛ shiɛmɔ nɔ po lɛ, mɛi komɛi waa wɔ ni amɛbiɔ wɔ Biblia mli saji, ni amɛbiɔ ni wɔha amɛ wɔwoji lɛ eko.” Te fã ni amɛfã lɛ ená amɛgbãla lɛ nɔ hewalɛ eha tɛŋŋ? Sébastien wie akɛ: “Ewaje wɔgbalashihilɛ lɛ waa. Bei komɛi lɛ, mi kɛ miŋa yeɔ gbi muu fɛɛ yɛ shiɛmɔ nitsumɔ lɛ mli, ni enɛ haa wɔnáa miishɛɛ waa.”

Nyɛmi nuu ko ni atsɛɔ lɛ Eric kɛ eŋa Katy lɛ sɔmɔɔ akɛ gbɛgbalɔi yɛ Benin kooyigbɛ he ko ni mɛi faaa tsɔ yɛ jɛmɛ. Afii nyɔŋma ni eho nɛ beni amɛyɔɔ France lɛ, amɛbɔi sɔɔmɔ ni aaasɔmɔ yɛ hei ni Maŋtsɛyeli shiɛlɔi ahe miihia waa yɛ lɛ he saji kanemɔ, ni amɛkɛ mɛi ni yɔɔ be fɛɛ sɔɔmɔ lɛ mli lɛ gba sane. Enɛ ha amɛshwe akɛ amɛbaafã kɛya maŋsɛɛ, ni amɛfee nakai yɛ afi 2005 mli. Bɔ ni asafo lɛ eshwere kɛjɛ be ni amɛtee jɛmɛ lɛ yɛ naakpɛɛ waa. Eric kɛɛ akɛ: “Afii enyɔ ni eho nɛ lɛ, kulɛ wɔyɛ shiɛlɔi 9 yɛ kuu ni yɔɔ Tanguiéta maŋ lɛ mli lɛ mli; amrɔ nɛɛ wɔyɛ shiɛlɔi 30. Kɛ́ shɛ Hɔgbaa lɛ, mɛi 50 kɛmiimɔ 80 baa asafoŋ kpee. Shweremɔ nɛɛ haa wɔmii shɛɔ wɔhe pam!”

Katy kɛ Eric

YƆSEMƆ NAAGBAI LƐ, NI OTSU AMƐHE NII

Benjamin

Mɛɛ naagbai mɛi ni yasɔmɔɔ yɛ hei ni hiamɔ lɛ da yɛ lɛ ekomɛi kɛkpe? Anne-Rakel nyɛmi nuu Benjamin  ni eye afii 33 lɛ kɛ maŋsɛɛ sɔɔlɔ ko ni sɔmɔ yɛ Togo lɛ kpe yɛ Denmark yɛ afi 2000 mli. Benjamin wie akɛ: “Beni mikɛɛ maŋsɛɛ sɔɔlɔ lɛ akɛ miisumɔ ni matsɔ gbɛgbalɔ lɛ, ekɛɛ mi akɛ: ‘Kɛ́ oyatsu gbɛgbamɔ nitsumɔ lɛ yɛ Togo lɛ, ebaahi waa.’” Benjamin susu sane lɛ he. Ewie akɛ: “Nakai beaŋ lɛ, minako afii 20 po, shi no mli lɛ, minyɛmimɛi yei enyɔ miisɔmɔ yɛ Togo momo. Enɛ ha efee mlɛo eha mi akɛ mafã kɛya jɛi.” No hewɔ lɛ, efã kɛtee jɛmɛ. Shi, ekɛ naagba ko kpe. Benjamin wie akɛ: “Mileee wiemɔ kome po yɛ French mli. Mináaa klɛŋklɛŋ nyɔji ekpaa ni miye yɛ jɛmɛ lɛ mlɛo kwraa, ejaakɛ minyɛɛɛ mikɛ mɛi agba sane.” Kɛlɛ, beni be shwie mli lɛ, ehe basa. Amrɔ nɛɛ, Benjamin miisɔmɔ yɛ Benin Betel; ekɛ lɔle yajaa woji ehaa asafoi lɛ, ni ewaa mɛi ni tsuɔ kɔmpiuta he nii lɛ hu.

Marie-Agnès kɛ Michel

Eric kɛ Katy ni atsĩ amɛtã kɛtsɔ hiɛ lɛ sɔmɔ yɛ France he ko ni awieɔ wiemɔ kroko yɛ, dani amɛfã kɛtee Benin. Te Afrika Anaigbɛ shihilɛ ji ha tɛŋŋ? Katy wie akɛ: “Etɔ wɔ waa dani wɔná he ko kpakpa wɔhi. Wɔkɛ nyɔji babaoo hi shĩa ko ni nu kɛ srawa hewalɛ bɛ mli lɛ mli.” Eric kɛfata he akɛ: “Atswaa lala hoo yɛ akutso lɛ mli kɛyashiɔ nyɔɔŋteŋ. Esa akɛ omia ohiɛ kɛkpee shihilɛi ni tamɔ nakai lɛ anaa, ni otsake ohe owo shihilɛ fɛɛ shihilɛ mli.” Amɛ fɛɛ amɛwie akɛ: “Miishɛɛ ni wɔnáa yɛ sɔɔmɔ ni wɔsɔmɔɔ yɛ he ko ni ashiɛko yɛ jɛmɛ tsɔ lɛ da kwraa fe naagbai ni wɔkɛkpe lɛ.”

Nyɛmi nuu ko ni atsɛɔ lɛ Michel kɛ eŋa Marie-Agnès ni amɛjɛ France, ni amɛ fɛɛ amɛye aaafee afii 58 lɛ fã kɛtee Benin aaafee afii enumɔ ni eho nɛ. Shishijee mli lɛ, amɛfee yeyeeye. Michel kɛɛ akɛ: “Mɛi komɛi kɛ fã ni wɔfã lɛ to mɔ ko ni nyiɛ kpãa nɔ ni eetsi shwiili kɛ etai kome ní mɛi komɛi tara mli lɛ he—ni wɔ ji mɛi ni tara shwiili lɛ mli lɛ! Kɛji oleee akɛ Yehowa ji mɔ ni nyiɛ kpãa lɛ nɔ lɛ, obaashe gbeyei. No hewɔ lɛ, wɔfã kɛyasɔmɔ Yehowa, ni eye ebua wɔ.”

BƆ NI OOOFEE OSAA OHE

Nɔ ni mɛi ni yasɔmɔɔ yɛ hei ni hiamɔ lɛ da yɛ lɛ kɛɔ ji akɛ, tsɔ hiɛ oto gbɛjianɔ. Kasemɔ bɔ ni ooofee otsake ohe owo shihilɛ lɛ mli. Kaafite shika fe bɔ ni okpɛ mli akɛ obaafite. Okɛ ohe afɔ̃ Yehowa nɔ.Luka 14:28-30.

Sébastien ni atsĩ etã kɛtsɔ hiɛ lɛ wie akɛ: “Dani mi kɛ Johanna baafã lɛ, wɔgbɔ́ shika ni wɔfiteɔ yɛ hiɛtserɛjiemɔ kɛ nibii ni he ehiaaa tsɔ he lɛ nɔ afii enyɔ, ni enɛ ha wɔtĩa shika.” Bɔni afee ni amɛya nɔ amɛsɔmɔ yɛ Benin lɛ, daa afi lɛ amɛkɛ nyɔji fioo yatsuɔ nii yɛ Yuropa, ni no haa amɛnyɛɔ amɛyatsuɔ gbɛgbamɔ nitsumɔ lɛ yɛ nyɔji ni eshwɛ yɛ afi lɛ mli lɛ amli yɛ Benin.

Marie-Thérèse

 Marie-Thérèse fata nyɛmimɛi yei oshijafoi 20 ni jɛ maŋsɛɛ ni yasɔmɔ yɛ Afrika Anaigbɛ lɛ ahe. Nyɛmi yoo nɛɛ kudɔɔ bɔs yɛ France; shi yɛ afi 2006 mli lɛ, eba nitsumɔ mli hejɔɔmɔ afi kome, ni ekɛyatsu gbɛgbamɔ nitsumɔ lɛ yɛ Niger. Etsɛɛɛ ni eyɔse akɛ, enɛ ji nɔ tuuntu ni eesumɔ ni etsu. Marie-Thérèse kɛɛ akɛ: “Beni miku misɛɛ kɛtee France lɛ, miha nitsumɔtsɛ lɛ le akɛ miitao matsake be ni mikɛtsuɔ nii lɛ mli, ni ekpɛlɛ nɔ. Amrɔ nɛɛ, mitsuɔ nii akɛ bɔs kudɔlɔ yɛ France kɛjɛ May kɛyashi August, ni kɛjɛ September kɛyashi April lɛ, miyatsuɔ gbɛgbamɔ nitsumɔ lɛ yɛ Niger.”

Saphira

Mɛi ni ‘taoɔ Maŋtsɛyeli lɛ klɛŋklɛŋ’ lɛ baanyɛ amɛkɛ amɛhe afɔ̃ Yehowa nɔ akɛ ebaaha amɛ ‘nii fɛɛ ni he hiaa’ amɛ lɛ. (Mat 6:33) Akɛ nɔkwɛmɔnɔ lɛ, susumɔ nyɛmi yoo oshijafo ko ni atsɛɔ lɛ Saphira ni jɛ France ni eye aaafee afii 28 ni miisɔmɔ akɛ gbɛgbalɔ yɛ Benin lɛ niiashikpamɔ lɛ he okwɛ. Yɛ afi 2011 lɛ, etee France koni eyatsu nii kɛtao shika ni ekɛbaakwɛ ehe yɛ afi ni nyiɛ sɛɛ lɛ mli (afi ni ji ekpaa nɔ) yɛ Afrika. Saphira wie akɛ: “Beni shɛ Sohaa, ni ji naagbee gbi yɛ nitsumɔ ni miná lɛ mli lɛ, ehe bahia ni masaa matsu nii gbii nyɔŋma dani shika ni mitaoɔ kɛkwɛ mihe yɛ afi ni baa lɛ mli lɛ baashɛ. Otsii enyɔ pɛ eshwɛ mi yɛ France. Misɔle miha Yehowa, ni mitsɔɔ lɛ misane lɛ mli faŋŋ. No sɛɛ etsɛɛɛ lɛ, nitsumɔhe ko ni taoɔ nitsumɔ amɛhaa mɛi lɛ tswa mi, ni amɛbi kɛji masumɔ ni mayaye mɔ ko najiaŋ otsii enyɔ yɛ nitsumɔ ko mli.” Enɔ Ju lɛ, Saphira tee nitsumɔhe lɛ koni mɔ ni eyaaye enajiaŋ lɛ atsɔɔ lɛ nitsumɔ lɛ. Ewie akɛ: “Beni miná mile akɛ mɔ ni miyaye enajiaŋ lɛ ji wɔnyɛmi yoo Kristofonyo ko ni lɛ hu eetao gbii nyɔŋma nitsumɔ mli hejɔɔmɔ koni enyɛ eya Gbɛgbamɔ Sɔɔmɔ Skul lɛ, minaa kpɛ mihe waa! No mli lɛ, enitsumɔtsɛ lɛ kɛɛ ja ená mɔ ko ni baaye enajiaŋ dani ebaaŋmɛ lɛ gbɛ ni eya. Esɔle eha Yehowa koni eye ebua lɛ taakɛ mi hu mifee lɛ nɔŋŋ.”

NITSUMƆ NI HAA MƆ TSUI NYƆƆ EMLI DIƐŊTSƐ

Nyɛmimɛi hii kɛ yei komɛi hu etee eyasɔmɔ yɛ Afrika Anaigbɛ afii babaoo, ni amɛkɛ jɛmɛ efee amɛmaŋ. Mɛi komɛi hu hi shi afii fioo komɛi, ni amɛku amɛsɛɛ kɛtee amɛmaŋ. Shi ŋmɛnɛ po lɛ, mɛi ni eyasɔmɔ pɛŋ yɛ hei ni hiamɔ lɛ da yɛ lɛ kã he amɛmiiná sɔɔmɔ ni amɛyasɔmɔ yɛ maŋsɛɛ lɛ he sɛɛ. Amɛyɔse akɛ, Yehowa sɔɔmɔ lɛ ji nɔ ni haa mɔ tsui nyɔɔ emli diɛŋtsɛ.

^ kk. 6 Benin nitsumɔhe nine lɛ kwɛɔ nitsumɔ ni atsuɔ yɛ maji ejwɛ nɛɛ fɛɛ ní awieɔ French yɛ mli lɛ anɔ.

Pascal ni miisɔmɔ yɛ Niger