Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) DECEMBER 2013

Ani Obaashã Afɔle yɛ Maŋtsɛyeli lɛ Hewɔ?

Ani Obaashã Afɔle yɛ Maŋtsɛyeli lɛ Hewɔ?

“Tsuijurɔnaa halɔ Nyɔŋmɔ sumɔɔ.” —2 KOR. 9:7.

1. Mɛɛ afɔlei mɛi babaoo shãa, ni mɛni hewɔ?

MƐI jɛɔ amɛsuɔmɔ mli amɛkɛ nibii shãa afɔle yɛ nibii ni he hiaa amɛ lɛ ahewɔ. Fɔlɔi kɛ amɛbe, amɛshika, kɛ amɛhewalɛ tsuɔ nii koni amɛbii aná he sɛɛ. Beni oblahii kɛ oblayei ni miitao amɛyashĩ Olimpis akaŋ lɛ eko amɛha amɛmaŋ lɛ ananemɛi miijie amɛhiɛtserɛ lɛ, belɛ amɛ hu amɛkɛ ŋmɛlɛtswai babaoo miigbɔle amɛkpɔiaŋ kɛmiitsɔse amɛhe kɛha akaŋshii lɛ. Yesu hu kɛ nibii shã afɔle yɛ nibii ni he hiaa lɛ lɛ ahewɔ. Etiuuu ogbɔjɔ shihilɛ sɛɛ, ni efɔɔɔ bii hu. Yɛ no najiaŋ lɛ, ekɛ ehewalɛ fɛɛ tiu Maŋtsɛyeli lɛ he nibii lɛ asɛɛ. (Mat. 4:17; Luka 9:58) Esɛɛnyiɛlɔi lɛ hu kɛ nibii shã afɔle yɛ Nyɔŋmɔ Maŋtsɛyeli lɛ hewɔ. Akɛni Nyɔŋmɔ Maŋtsɛyeli lɛ ji nɔ ni he hiaa amɛ fe fɛɛ yɛ amɛshihilɛ mli hewɔ lɛ, amɛkɛ nibii shã afɔle bɔni afee ni amɛnyɛ amɛfi Maŋtsɛyeli lɛ sɛɛ waa. (Mat. 4:18-22; 19:27) No hewɔ lɛ, bi ohe akɛ, ‘Mɛni ji nɔ ni he hiaa mi fe fɛɛ yɛ mishihilɛ mli?’

2. (a) Mɛɛ afɔlei esa akɛ anɔkwa Kristofoi fɛɛ ashã? (b) Mɛɛ afɔlei krokomɛi mɛi komɛi shãa?

2 Afɔlei komɛi yɛ ni esa akɛ Kristofoi fɛɛ ashã bɔni afee ni wekukpaa kpakpa ahi amɛ kɛ Yehowa teŋ. Afɔlei nɛɛ ji wɔbe kɛ wɔnyɛmɔ ni wɔkɛsɔleɔ, wɔkɛkaneɔ Biblia lɛ, wɔkɛfeɔ weku jamɔ, wɔkɛyaa asafoŋ kpeei, ni wɔkɛyaa shiɛmɔ lɛ. * (Yosh. 1:8; Mat. 28:19, 20; Heb. 10:24, 25) Enɛɛmɛi ni wɔfeɔ kɛ jɔɔmɔ ni Yehowa jɔɔ wɔ lɛ hewɔ lɛ, shiɛmɔ nitsumɔ lɛ miiwoo yibii waa, ni mɛi babaoo miike kɛmiiba “Yehowa we lɛ gɔŋ lɛ” he. (Yes. 2:2) Mɛi babaoo hu shãa afɔle kɛtsɔ sɔɔmɔ ni amɛyasɔmɔɔ yɛ Betel, amɛyayeɔ amɛbuaa kɛmamɔɔ Maŋtsɛyeli Asai kɛ Kpee Asai, amɛtoɔ kpeei wuji ahe gbɛjianɔ, loo amɛyayeɔ amɛbuaa mɛi  ni adebɔɔ naa oshara enina amɛ lɛ, ni amɛfeɔ enɛɛmɛi fɛɛ yɛ Maŋtsɛyeli lɛ hewɔ. Eyɛ mli akɛ Yehowa kpaaa gbɛ akɛ wɔshã afɔlei krokomɛi nɛɛ dani ehere wɔyiwala moŋ, shi amɛhe miihia ŋmɛnɛ koni akɛfi Maŋtsɛyeli lɛ nitsumɔi lɛ asɛɛ.

3. (a) Kɛ́ wɔshã afɔle yɛ Maŋtsɛyeli lɛ hewɔ lɛ, te wɔnáa he sɛɛ tɛŋŋ? (b) Mɛɛ sanebimɔi ahe wɔbaasusu?

3 Ŋmɛnɛ lɛ, ehe miihia ni wɔfee babaoo kɛfi Maŋtsɛyeli lɛ sɛɛ fe bei fɛɛ ni eho. Eŋɔɔ wɔnaa waa akɛ mɛi babaoo jɛɔ amɛsuɔmɔ mli amɛshãa afɔle amɛhaa Yehowa! (Nyɛkanea Lala 54:8.) Kɛ́ wɔshã afɔle lɛ, ehaa wɔnáa miishɛɛ waa beni wɔmɛɔ Nyɔŋmɔ Maŋtsɛyeli lɛ. (5 Mose 16:15; Bɔf. 20:35) Shi esa akɛ wɔ fɛɛ wɔkɛ sanebimɔi ni nyiɛ sɛɛ nɛɛ apɛi wɔmli jogbaŋŋ. Ani wɔbaanyɛ wɔshã afɔlei krokomɛi yɛ Maŋtsɛyeli lɛ hewɔ? Mɛni wɔkɛ wɔbe, wɔshika, wɔhewalɛ, kɛ wɔhesai feɔ? Kɛ́ wɔmiishã afɔle lɛ, mɛni esa akɛ wɔkwɛ jogbaŋŋ yɛ he? Nyɛhaa wɔsusua nɔ ni wɔbaanyɛ wɔkase kɛjɛ tsuijurɔnaa afɔlei komɛi ni ashã lɛ amli, ni no baaye abua wɔ ni wɔná miishɛɛ babaoo.

AFƆLEI NI ASHÃ YƐ BLEMA ISRAEL

4. Mɛɛ gbɛ nɔ Israelbii lɛ ná afɔlei ni amɛshã ahe sɛɛ?

4 Ehe bahia ni blema Israelbii lɛ ashã afɔlei dani akɛ amɛhe eshai afa amɛ. Afɔlei ni amɛshãa lɛ ji nɔ ni haa amɛsaa Yehowa hiɛ. Afɔlei lɛ ekomɛi yɛ ni akpa gbɛ akɛ amɛshã, ni amɛshã ekomɛi hu yɛ tsuijurɔnaa, ni tsɔɔ akɛ amɛjɛ amɛsuɔmɔ mli amɛshã. (3 Mose 23:37, 38) Abaanyɛ ashã shãa afɔlei hu akɛ tsuijurɔnaa afɔle loo akɛ nikee nii ni akɛmiiha Yehowa. Afɔlei komɛi ni ashã ni sa kadimɔ waa ji nɔ ni ashã beni ajɔɔ sɔlemɔtsu lɛ nɔ yɛ Salomo beaŋ lɛ.—2 Kron. 7:4-6.

5. Mɛɛ gbɛjianɔ Yehowa to koni ohiafoi po anyɛ ashã afɔle amɛha lɛ?

5 Akɛni Yehowa yɛ suɔmɔ hewɔ lɛ, ena akɛ esoro bɔ ni mɔ fɛɛ mɔ baanyɛ aha, no hewɔ lɛ ebi ni mɔ fɛɛ mɔ aha yɛ enyɛmɔ naa. Yehowa mla lɛ bi ni kɛ́ akɛ kooloo baashã afɔle lɛ, afɔse elá, ni afɔlei nɛɛ ji “nii kpakpai ni baaba” kɛtsɔ e-Bi Yesu nɔ lɛ “asusuma kɛkɛ.” (Heb. 10:1-4) Shi Yehowa efeee kpɛŋŋ yɛ kooloo ni esa akɛ akɛshã afɔle lɛ he. Akɛ nɔkwɛmɔnɔ lɛ, kɛ́ mɔ ko nyɛɛɛ ekɛ too loo tsina abaha Nyɔŋmɔ, ni ekɛ kosɛɛ okpoi ba lɛ, ekpɛlɛɔ nɔ. No hewɔ lɛ, ohiafoi po nyɛɔ amɛkɛ miishɛɛ shãa afɔlei amɛhaa Yehowa. (3 Mose 1:3, 10, 14; 5:7) Eyɛ mli akɛ akɛ kooloi srɔtoi shã afɔle moŋ, shi nibii enyɔ komɛi yɛ ni Yehowa taoɔ yɛ mɔ fɛɛ mɔ ni shãa tsuijurɔnaa afɔle lɛ dɛŋ.

6. Mɛɛ nibii enyɔ ataoɔ yɛ mɔ ko ni miitao eshã afɔle lɛ dɛŋ, ni mɛni hewɔ ehe hiaa ni eye taomɔ nii lɛ anɔ lɛ?

 6 Klɛŋklɛŋ lɛ, esa akɛ nɔ ni akɛshãa afɔle lɛ afee nɔ ni hi fe fɛɛ. Yehowa kɛɛ Israelbii lɛ akɛ, ja kpa ko bɛ nɔ ni akɛbahaa lɛ he dani ‘ebaasa ehiɛ.’ (3 Mose 22:18, 20) Kɛ́ kooloo ko bɛ hewalɛ loo eje kpa lɛ, Yehowa ekpɛlɛŋ nakai afɔle lɛ nɔ. Nɔ ni ji enyɔ lɛ, esa akɛ mɔ ni baa ebashã afɔle lɛ afee mɔ ko ni he tse. Kɛ́ mɔ lɛ he tseee lɛ, esa akɛ eshã esha afɔle loo sɔ̃ afɔle ni ekɛsaa ekɛ Yehowa teŋ dani ekɛ etsuijurɔnaa afɔle lɛ aha. (3 Mose 5:5, 6, 15) Enɛ ji hiɛdɔɔ sane diɛŋtsɛ. Yehowa fã akɛ mɔ fɛɛ mɔ ni he tseee ni yeɔ naanyobɔɔ afɔle, ni eko ji tsuijurɔnaa afɔle lɛ eko beni etsuuko ehe lɛ, agbe lɛ. (3 Mose 7:20, 21, Ga Biblia hee) Shi kɛji mɔ ni kɛ́ afɔle lɛ ba lɛ he tse ni kpa ko bɛ nɔ ni ekɛbaashã afɔle lɛ he lɛ, mɔ lɛ baaná henilee kpakpa, ni ebaaná miishɛɛ.—Nyɛkanea 1 Kronika 29:9.

AFƆLEI NI ASHÃA ŊMƐNƐ

7, 8. (a) Kɛ́ mɛi shã afɔle yɛ Maŋtsɛyeli lɛ hewɔ lɛ, te amɛnuɔ he tɛŋŋ? (b) Mɛɛ nibii wɔbaanyɛ wɔkɛshã afɔle wɔha Yehowa?

7 Ŋmɛnɛ hu lɛ, mɛi babaoo miisumɔ ni amɛkɛ amɛhe ashã afɔle yɛ Yehowa sɔɔmɔ mli, ni Yehowa náa enɛ he miishɛɛ naakpa. Kɛ́ wɔfee nibii kɛye wɔbua wɔnyɛmimɛi lɛ, ehaa wɔtsui nyɔɔ wɔmli. Nyɛmi nuu ko ni yeɔ ebuaa kɛmamɔɔ Maŋtsɛyeli Asai, ní eyeɔ ebuaa mɛi ni adebɔɔ naa osharai efite amɛnibii hu lɛ tsɔɔ akɛ, enyɛŋ etsɔɔ bɔ ni etsui nyɔɔ emli ehaa lɛ mli kɛ́ eye ebua yɛ gbɛi nɛɛ anɔ. Ekɛɛ akɛ: “Kɛ́ mina bɔ ni nyɛmimɛi hii kɛ yei lɛ ahiɛ esɔ nɔ ni wɔfee wɔha amɛ lɛ, kɛ bɔ ni amɛmii shɛɔ amɛhe beni amɛtee amɛ-Maŋtsɛyeli Asa hee lɛ nɔ, loo beni aye abua amɛ yɛ adebɔɔ naa oshara ko sɛɛ lɛ, ehaa minaa akɛ sɛɛnamɔ yɛ nɔ ni wɔtsu lɛ he.”

Afɔle ni ashã yɛ blema lɛ ateŋ babaoo ji tsuijurɔnaa nɔ, taakɛ afɔlei ni wɔshãa ŋmɛnɛ lɛ ji lɛ (Kwɛmɔ kuku 7-13)

8 Yehowa gbɛjianɔtoo lɛ fã ni yɔɔ shikpɔŋ lɛ nɔ lɛ tsɔɔ gbɛi srɔtoi anɔ efiɔ Yehowa nitsumɔ lɛ sɛɛ be fɛɛ be. Yɛ afi 1904 lɛ, Nyɛminuu C. T. Russell ŋma akɛ: “Esa akɛ mɔ fɛɛ mɔ asusu lɛ diɛŋtsɛ ehe akɛ Nuŋtsɔ lɛ ehala lɛ akɛ nɔkwɛlɔ yɛ lɛ diɛŋtsɛ ebe, ehewalɛ, eshika, kɛ enibii krokomɛi anɔ, ni esa akɛ mɔ fɛɛ mɔ abɔ mɔdɛŋ akɛ ekɛ nɛkɛ nikee nii nɛɛ aaatsu nii bɔ ni eeenyɛ, kɛwo Nuŋtsɔ lɛ hiɛ nyam.” Eyɛ mli akɛ kɛ́ wɔmiishã afɔle wɔmiiha Yehowa lɛ, nibii komɛi ŋmɛɔ wɔ moŋ, shi wɔnáa jɔɔmɔi  babaoo yɛ no hewɔ. (2 Sam. 24:21-24) Ani wɔbaanyɛ wɔkɛ wɔnibii atsu nii jogbaŋŋ kɛshã afɔle wɔha Yehowa fe bɔ ni wɔfeɔ amrɔ nɛɛ?

Betelbii ni miitsu nii yɛ Australia Betel

9. Mɛni wɔbaanyɛ wɔkase kɛjɛ shishitoo mla ni yɔɔ Luka 10:2-4 lɛ ni kɔɔ bɔ ni esa akɛ wɔkɛ wɔbe atsu nii wɔha lɛ he lɛ mli?

9 Wɔbe. Woji ashishitsɔɔmɔ kɛ ekalamɔ, jamɔhei amaamɔ, kpeei wuji ahe gbɛjianɔtoo, yelikɛbuamɔ ni akɛhaa mɛi ni adebɔɔ naa oshara enina amɛ, kɛ teokrase nitsumɔi krokomɛi ni atsuɔ lɛ biɔ mɔdɛŋbɔɔ ni eheɔ be babaoo. Shi ŋmɛlɛtswai 24 pɛ wɔyɔɔ yɛ gbi fɛɛ gbi mli. Yesu tsɔɔ shishitoo mla ko ni baanyɛ aye abua wɔ ni wɔkɛ hiɛshikamɔ atsu wɔbe he nii. Beni etsuɔ ekaselɔi lɛ ni amɛyashiɛ lɛ, ekɛɛ amɛ akɛ ‘amɛkaŋa mɔ ko yɛ gbɛ lɛ nɔ.’ (Luka 10:2-4) Mɛni hewɔ Yesu kɛ gbɛtsɔɔmɔ ni tamɔ nɛkɛ ha amɛ lɛ? Biblia he nilelɔ ko kɛɛ akɛ: “Nɔ ni fataaa ŋamɔi ni yɔɔ Bokagbɛbii lɛ ateŋ taakɛ eji yɛ wɔ nɔ lɛ he lɛ ji hiɛshimaa fioo ko, aloo nine mli kpamɔ, shi nɔ ni afeɔ ji fuamɔi babaoo, kɛ yitso hosomɔ, kɛ gbɔmɔtso kɛ shifɔɔ shwɛtɛɛ yɛ shikpɔŋ po. Enɛɛmɛi fɛɛ biɔ be babaoo.” Jeee ni Yesu miiwo esɛɛnyiɛlɔi lɛ hewalɛ ni amɛkajie bulɛ kpo. Moŋ lɛ, eeye eebua amɛ ni amɛna akɛ be ni amɛyɔɔ lɛ faaa, ni akɛ, esa akɛ amɛkɛ be lɛ atsu nibii ni he hiaa titri lɛ ahe nii. (Efe. 5:16) Ani wɔbaanyɛ wɔkɛ shishitoo mla nɛɛ atsu nii koni wɔná be babaoo kɛfi Maŋtsɛyeli lɛ sɛɛ?

Maŋtsɛyeli shiɛlɔi komɛi yɛ Maŋtsɛyeli Asa ko nɔ yɛ Kenya yɛ Afrika

10, 11. (a) Mɛni ji nibii komɛi ni akɛ onia ni wɔtsuɔ kɛfiɔ jeŋ muu fɛɛ nitsumɔ lɛ sɛɛ lɛ tsuɔ? (b) Mɛɛ shishitoo mla yɔɔ 1 Korintobii 16:1, 2 lɛ mli ni baanyɛ aye abua wɔ?

10 Wɔshika. Shika babaoo he miihia kɛha jeŋ muu fɛɛ nitsumɔ lɛ. Akɛ dɔlai akpekpei nyɔŋmai abɔ kwɛɔ nɔkwɛlɔi gbɛfalɔi, gbɛgbalɔi krɛdɛi, kɛ maŋsɛɛ sɔɔlɔi daa afi. Kɛjɛ afi 1999 kɛbaa nɛɛ, amamɔ Maŋtsɛyeli Asai fe 24,500 yɛ maji ni bɛ nɔ ko tsɔ lɛ amli. Kɛlɛ, Maŋtsɛyeli Asai aaafee 6,400 ahe miihia lolo. Daa nyɔɔŋ lɛ, akalaa Buu-Mɔɔ Awake! woji tɛtrɛbii lɛ aaafee akpekpei 100. Onia ni ojɛɔ osuɔmɔ mli otsuɔ lɛ ji nɔ ni akɛfeɔ enɛɛmɛi fɛɛ.

11 Akɛ mumɔ tsirɛ Paulo ni eŋma shishitoo mla ko ni baaye abua wɔ yɛ oniatsumɔ mli. (Nyɛkanea 1 Korintobii 16:1, 2.) Ewo enyɛmimɛi ni yɔɔ Korinto lɛ hewalɛ ni kɛ́ otsi lɛ je shishi nɔŋŋ lɛ amɛkɛ nɔ ko ato kɛha oniatsumɔ yɛ nɔ ni amɛyɔɔ lɛ naa, moŋ fe ni amɛaamɛ kɛyashi otsi lɛ naagbee ní amɛkwɛ amɛshika ni eshwɛ dani amɛkpɛ amɛyiŋ yɛ nɔ ni amɛkɛbaaha lɛ he. Taakɛ eji yɛ klɛŋklɛŋ afii 100 lɛ mli lɛ, ŋmɛnɛ lɛ, nyɛmimɛi komɛi tsɔɔ hiɛ amɛtiaa nɔ ko yɛ nɔ ni amɛyɔɔ lɛ naa koni amɛkɛtsu onia. (Luka 21:1-4; Bɔf. 4:32-35) Yehowa hiɛ sɔɔ nihamɔ mumɔ nɛɛ waa.

Kpokpaa Tsumaa Ajinafoi Akuu mli nyo ko ni ejɛ esuɔmɔ mli eetsu nii yɛ Tuxedo ni yɔɔ New York yɛ U.S.A. lɛ

12, 13. Mɛni hewɔ mɛi komɛi baasusu akɛ amɛnyɛŋ amɛkɛ amɛhewalɛ kɛ amɛhesai afi Yehowa nitsumɔ lɛ sɛɛ lɛ? Shi mɛɛ gbɛ nɔ Yehowa baanyɛ aye abua amɛ?

12 Wɔhewalɛ kɛ wɔhesai. Yehowa yeɔ ebuaa wɔ koni wɔkɛ wɔhewalɛ kɛ wɔhesai afi Maŋtsɛyeli lɛ sɛɛ. Ewo shi akɛ ebaaye ebua wɔ kɛ́ etɔ wɔ. (Yes. 40:29-31) Ani wɔnuɔ he akɛ wɔbɛ hesai kɛha nitsumɔ lɛ? Ani wɔnuɔ he akɛ mɛi krokomɛi yɛ ni yɛ hesai fe wɔ kɛha nitsumɔ lɛ? Kaimɔ akɛ, Yehowa baanyɛ aye abua mɔ fɛɛ mɔ koni hesai ni eyɔɔ lɛ aya hiɛ taakɛ efee eha Bezaleel kɛ Oholiab lɛ.—2 Mose 31:1-6; kwɛmɔ mfoniri ni yɔɔ nikasemɔ lɛ shishijee lɛ.

13 Yehowa woɔ wɔ hewalɛ ni wɔkɛ wɔnibii kpakpai asɔmɔ lɛ, ni wɔkɛkakama lɛ. (Abɛi 3:27) Beni Yudafoi ni yɔɔ Yerusalem lɛ tswaa sɔlemɔtsu lɛ ekoŋŋ lɛ, Yehowa kɛɛ amɛ ni amɛjwɛŋ bɔ ni amɛtsuɔ nitsumɔ lɛ amɛhaa lɛ he waa. (Hag. 1:2-5) Nɔ hewɔ lɛ ji akɛ,  no mli lɛ amɛha nibii krokomɛi egbala amɛjwɛŋmɔ kɛjɛ Yehowa nitsumɔ lɛ nɔ, ni amɛkɛ esɔɔmɔ lɛ yeee klɛŋklɛŋ gbɛhe. Esa akɛ wɔbi wɔhe akɛ: Ani Yehowa suɔmɔnaa nii ji nɔ ni he hiaa mi fe nɔ fɛɛ nɔ? Ani wɔbaanyɛ ‘wɔjwɛŋ wɔgbɛi lɛ ahe,’ ni wɔkwɛ bɔ ni wɔɔfee wɔtsu babaoo kɛfi Maŋtsɛyeli nitsumɔ lɛ sɛɛ yɛ naagbee gbii nɛɛ amli?

AFƆLEI NI WƆSHÃA YƐ NƆ NI WƆYƆƆ LƐ NAA

14, 15. (a) Mɛɛ gbɛ nɔ wɔnyɛmimɛi ni bɛ nɔ ko tsɔ lɛ anɔkwɛmɔnɔ lɛ woɔ wɔ hewalɛ? (b) Mɛni esa akɛ wɔtswa wɔfai shi akɛ wɔbaafee?

14 Mɛi pii yɛ hei ni shihilɛ lɛ mli wa waa loo ayeɔ ohia waa yɛ jɛmɛ. Yehowa asafo lɛ bɔɔ mɔdɛŋ eyeɔ ebuaa nyɛmimɛi ni yɔɔ maji ni tamɔ nakai lɛ anɔ. (2 Kor. 8:14) Kɛlɛ, nyɛmimɛi ni bɛ nɔ ko tsɔ lɛ po yɛ he miishɛɛ akɛ amɛaatsu onia. Kɛ́ Yehowa na bɔ ni mɛi nɛɛ kɛ miishɛɛ tsuɔ onia lɛ, ehiɛ sɔɔ waa.—2 Kor. 9:7.

15 Yɛ Afrika maŋ ko ni ayeɔ ohia waa yɛ jɛmɛ lɛ mli lɛ, nyɛmimɛi komɛi foɔ amɛŋmɔ lɛ fã ko akɛ kɛ́ amɛhɔ̃ɔ ŋmɔshi nibii ni amɛbaaná yɛ jɛmɛ lɛ, amɛkɛbaafi Maŋtsɛyeli lɛ sɛɛ. Yɛ nakai maŋ lɛ nɔŋŋ mli lɛ, ato gbɛjianɔ akɛ abaama Maŋtsɛyeli Asa ko. Nyɛmimɛi hii kɛ yei ni yɔɔ jɛmɛ lɛ miisumɔ ni amɛye amɛbua, shi nakai beaŋ nɔŋŋ lɛ, eji amɛnidumɔ be. Shi akɛni amɛtswa amɛfai shi akɛ amɛbaaye amɛbua kɛma Maŋtsɛyeli Asa lɛ hewɔ lɛ, amɛbawaa kɛmaa tsu lɛ leebi, ni gbɛkɛnaashi lɛ, amɛyaa amɛŋmɔji lɛ amli amɛyaduɔ nii. Amɛkɛ amɛhe shã afɔle waa diɛŋtsɛ! Enɛ haa wɔkaiɔ nyɛmimɛi ni hi shi yɛ Makedonia yɛ klɛŋklɛŋ afii 100 lɛ mli lɛ. Eyɛ mli akɛ no mli lɛ amɛmiiye ‘ohĩa ni mli kwɔ’ moŋ, shi amɛkpa Paulo fai koni eha amɛkɛ shika amaje amɛnyɛmimɛi ni efi amɛ lɛ. (2 Kor. 8:1-4) Eba akɛ wɔ hu wɔbaaha yɛ ‘bɔ fɛɛ bɔ ni Yehowa, wɔ-Nyɔŋmɔ lɛ, ejɔɔ wɔ eha lɛ’ naa.—Nyɛkanea 5 Mose 16:17.

16. Mɛni esa akɛ wɔfee koni afɔle ni wɔshãa lɛ asa Yehowa hiɛ?

16 Shi nɔ ko yɛ ni esa wɔkadi. Taakɛ eji yɛ blema Israel lɛ, esa akɛ wɔtsuijurɔnaa afɔle lɛ afee nɔ ni Nyɔŋmɔ baakpɛlɛ nɔ. Mɛni baanyɛ aha Yehowa akpoo wɔfɔle lɛ? Esa akɛ wɔkwɛ jogbaŋŋ ni wɔkaku wɔhiɛ wɔshwie wɔweku lɛ hiamɔ nii kɛ Yehowa jamɔ nɔ. Esaaa akɛ wɔbe kɛ wɔnibii ni wɔkɛbaaye wɔbua mɛi lɛ haa wɔkuɔ wɔhiɛ wɔshwieɔ wɔweku lɛ mumɔŋ kɛ heloonaa hiamɔ nii anɔ. Kɛ́ wɔfee nakai lɛ, no baatsɔɔ akɛ wɔkɛ nɔ ko ni wɔbɛ miiha. (Nyɛkanea 2 Korintobii 8:12.) Kɛfata he lɛ, esa akɛ wekukpaa kpakpa akã he ahi wɔ kɛ Yehowa teŋ. (1 Kor. 9:26, 27) Wɔbaanyɛ wɔná nɔmimaa akɛ kɛ́ wɔhi shi yɛ Biblia mli shishitoo mlai anaa lɛ, wɔbaaná miishɛɛ ni afɔle ni wɔshãa lɛ ‘baasa Yehowa hiɛ.’

AFƆLEI NI WƆSHÃA LƐ AHE YƐ SƐƐNAMƆ WAA

17, 18. Te onaa mɛi ni kɛ amɛhe eshã afɔle yɛ gbɛi srɔtoi anɔ yɛ Maŋtsɛyeli lɛ hewɔ lɛ tɛŋŋ, ni mɛni esa akɛ wɔ fɛɛ wɔsusu he?

17 Wɔnyɛmimɛi hii kɛ yei lɛ babaoo kɛ amɛbe, amɛhewalɛ, kɛ amɛshika fiɔ Maŋtsɛyeli nitsumɔ lɛ sɛɛ. (Fil. 2:17) Wɔhiɛ sɔɔ nihamɔ mumɔ ni wɔnyɛmimɛi nɛɛ yɔɔ lɛ waa. Nyɛmimɛi hii ni nyiɛɔ hiɛ yɛ Maŋtsɛyeli nitsumɔ lɛ mli lɛ aŋamɛi kɛ amɛbii lɛ hu sa yijiemɔ yɛ amɛfɔleshãa lɛ hewɔ.

18 Ehe miihia ni wɔtsu nii waa kɛfi Maŋtsɛyeli lɛ sɛɛ. Nyɛhaa wɔkɛ hiɛdɔɔ asusua bɔ ni wɔɔfee wɔtsu babaoo yɛ Yehowa sɔɔmɔ lɛ mli lɛ he, ni wɔsɔle yɛ he. Kɛ́ wɔfee nakai lɛ, wɔbaaná jɔɔmɔi babaoo amrɔ nɛɛ, kɛ babaoo hu yɛ “jeŋ ni baaba lɛŋ.”—Mar. 10:28-30.

^ kk. 2 Kwɛmɔ sane ni yitso ji “Nyɛjɛa Nyɛtsuiŋ Fɛɛ Nyɛshãa Afɔlei Nyɛhaa Yehowa” ni je kpo yɛ January 15, 2012 Buu-Mɔɔ, baafa 21-25 lɛ.