Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) DECEMBER 2013

Bɔ ni Ooofee Okpee Ohefatalɔ Gbele Naa

Bɔ ni Ooofee Okpee Ohefatalɔ Gbele Naa

BIBLIA lɛ feɔ lɛ faŋŋ akɛ, esa akɛ wu “asumɔ lɛ diɛŋtsɛ eŋa . . . tamɔ lɛ diɛŋtsɛ ehe.” Nakai nɔŋŋ esa akɛ ŋa lɛ hu “ashe ewu.” Esa akɛ amɛ fɛɛ amɛtsu amɛsɔ̃i ahe nii akɛ “heloo kome.” (Efe. 5:33; 1 Mose 2:23, 24) Beni be shwieɔ mli lɛ, amɛbɛŋkɛɔ amɛhe kpaakpa ni suɔmɔ ni yɔɔ amɛteŋ lɛ hu mli waa. Obaanyɛ okɛto bɔ ni tsei enyɔ ni bɛŋkɛ lɛ ashishifãi balaa amɛhe lɛ he. Henumɔi ni wu kɛ ŋa ni yɔɔ miishɛɛ yɔɔ kɛha amɛhe lɛ mli waa ni ebalaa tamɔ tsei ni bɛŋkɛ lɛ ashishifãi.

Shi mɛni baa kɛji wu lɛ loo ŋa lɛ gbo? Nɔ ni baa ji akɛ, wekukpaa ni mli wa ni yɔɔ amɛteŋ tamɔ kpaa ni ehiii tsemɔ lɛ tseɔ. Bei pii lɛ, okulafo lɛ tsui kumɔɔ, ehe feɔ shoo, ni ekolɛ emli baafu loo ebaashwa ehe po. Yoo ko ni atsɛɔ lɛ Daniella ni kɛ ewu hi shi afii 58 lɛ le mɛi babaoo ni hefatalɔi egboi. * Shi beni ewu gbo lɛ, ekɛɛ akɛ: “Misusuuu akɛ nɛkɛ eyɔɔ dɔlɛ. Onyɛŋ onu shishi kɔkɔɔkɔ, ja bo hu okɛkpe.”

DƆLƐ NI FEƆ TAMƆ NƆ NI EBAAA NAAGBEE

Niiamlitaolɔi komɛi kɛɔ akɛ, nɔ ko bɛ ni yɔɔ dɔlɛ fe mɔ ko hefatalɔ ni esumɔɔ lɛ lɛ gbele. Okulafoi pii hu wieɔ nakai nɔŋŋ. Yoo ko ni atsɛɔ lɛ Millie lɛ wu gbo nɛɛ, afii babaoo nɛ. Beni ewieɔ bɔ ni enuɔ he ehaa akɛ okulafo lɛ he lɛ, ekɛɛ akɛ, “Minuɔ he tamɔ nɔ ni mitsɔ obubuafo.” No mli lɛ, eewie bɔ ni enuɔ he ehaa yɛ ewu ni ekɛ lɛ ehi shi afii 25 lɛ he.

 Be ko ni eho lɛ, yoo ko ni atsɛɔ lɛ Susan lɛ susu akɛ yei okulafoi ni yaa nɔ amɛyeɔ amɛwu ni egbo afii babaoo lɛ he awerɛho lɛ miifee nɔ ko tsɔ. Shi lɛ hu ewu ni ekɛ lɛ ehi shi afii 38 lɛ bagbo. Nɔ ni fe afii 20 eho moŋ, kɛlɛ ekɛɔ akɛ, “Mijwɛŋɔ ehe gbi fɛɛ gbi.” Akɛni eshweɔ lɛ waa hewɔ lɛ, bei pii lɛ efoɔ.

Biblia lɛ hu tsɔɔ akɛ kɛ́ mɔ ko hefatalɔ gbo lɛ eyɛ dɔlɛ waa, ni dɔlɛ nɛɛ sɛɛ tsɛɔ. Beni Sara gbo lɛ, ewu Abraham “baye Sara he ŋkɔmɔ ni ebafó lɛ.” (1 Mose 23:1, 2) Eyɛ mli akɛ Abraham heɔ eyeɔ akɛ abaatee gbohii ashi moŋ, shi beni esuɔlɔ lɛ gbo lɛ, edɔ lɛ waa. (Heb. 11:17-19) Beni Rahel, ni ji Yakob ŋa ni esumɔɔ waa lɛ gbo lɛ, Yakob hiɛ kpaaa enɔ amrɔ nɔŋŋ. Ewie ehe etsɔɔ ebihii lɛ bɔ ni ha ana akɛ esumɔɔ lɛ.—1 Mose 44:27; 48:7.

Mɛni wɔbaanyɛ wɔkase kɛjɛ Biblia mli nɔkwɛmɔnii nɛɛ amli? Kɛ́ nuu loo yoo ko hefatalɔ gbo lɛ, enuɔ dɔlɛ lɛ he afii babaoo. Esaaa akɛ wɔnaa awerɛho ni amɛyeɔ kɛ fó ni amɛfoɔ lɛ akɛ amɛmiifee nɔ ko tsɔ, shi moŋ akɛ dɔlɛ ni amɛnuɔ he yɛ shihilɛ ni amɛyaje mli lɛ hewɔ. Ehe baahia ni wɔshɛje amɛmii ni wɔye wɔbua amɛ be kpalaŋŋ.

“GBI FƐƐ GBI NƆ EFƆŊ LƐ FÁ HA LƐ”

Kɛ́ mɔ ko wu loo eŋa gbo lɛ, ebɛ mlɛo akɛ eeeku sɛɛ ehi shi akɛ oshija ekoŋŋ. Kɛ́ nuu kɛ yoo hi shi afii babaoo lɛ, wu lɛ leɔ bɔ ni efeɔ eshɛjeɔ eŋa lɛ mii, ni ewoɔ lɛ hewalɛ kɛ́ ekɛ naagba kpe loo ehao. Kɛ́ nuu lɛ gbo lɛ, mɔ ko bɛ ni baajie suɔmɔ kpo etsɔɔ lɛ ni eshɛje emii. Nakai nɔŋŋ kɛ́ nuu kɛ yoo hi shi afii babaoo lɛ, yoo lɛ leɔ nɔ ni esa akɛ efee ni ewu lɛ aná miishɛɛ ni etsui anyɔ emli. Bɔ ni emɔɔ emli ehaa, bɔ ni ekɛ nuu lɛ wieɔ kɛ naajɔlɛ, bɔ ni efeɔ nɔ ni esumɔɔ ni etsuɔ ehiamɔ nii ahe nii lɛ nɔ bɛ. Kɛ́ yoo lɛ gbo lɛ, ewu lɛ feɔ shwɛm. Enɛ hewɔ lɛ, mɛi komɛi ni amɛhefatalɔi egboi lɛ nuɔ he akɛ amɛgbe amɛjeŋ naa. Mɛɛ Biblia mli shishitoo mla baanyɛ aye abua amɛ ni amɛtsui anyɔ amɛmli ni amɛtoiŋ hu ajɔ amɛ?

Nyɔŋmɔ baanyɛ aye abua bo ni okpee shihilɛ ni okɛkpeɔ gbi fɛɛ gbi lɛ naa

Biblia lɛ kɛɔ akɛ: “Nyɛkahaoa nyɛhe nyɛtoa wɔ; ejaakɛ wɔ diɛŋtsɛ aaahao yɛ enii ahe. Gbi fɛɛ gbi nɔ efɔŋ lɛ fá ha lɛ.” (Mat. 6:34) Yesu wiemɔi nɛɛ kɔɔ heloonaa hiamɔ nii ahe titri, shi eye ebua mɛi babaoo ni amɛnyɛ amɛkpee dɔlɛ ni suɔlɔ ko gbele haa anuɔ he lɛ naa. Beni nuu ko ni atsɛɔ lɛ Charles lɛ ŋa gbo lɛ, eŋma yɛ nyɔji komɛi asɛɛ akɛ: “Bɔ ni mishweɔ Monique mihaa lɛ mli wa waa lolo, ni bei komɛi lɛ minyɛɛɛ naa makpee. Shi miyɔse akɛ nakai nɔŋŋ manu he, ni akɛ, kɛ́ be shwie mli lɛ, dɔlɛ lɛ naa baaba shi.”

Ehe bahia ni Charles aya nɔ adamɔ dɔlɛ lɛ naa kɛyashi “be” ko. Mɛni ye ebua lɛ? Ekɛɛ akɛ, ‘Yɛ Yehowa yelikɛbuamɔ naa lɛ, mihaooo mihe mitooo wɔ, shi mibɔɔ mɔdɛŋ mikpeɔ shihilɛ ni mikɛkpeɔ gbi fɛɛ gbi lɛ naa.’ Charles haaa awerɛhoyeli aye enɔ. Dɔlɛ lɛ eyaaa gbi kome, shi ehaaa no aŋɔ lɛ nom. Kɛ́ ohefatalɔ egbo lɛ, bɔɔ mɔdɛŋ ni okpee shihilɛ ni okɛkpeɔ yɛ gbi fɛɛ gbi mli lɛ naa, ni okahao ohe oto wɔ. Oleee nɔ kpakpa ni  obaaná wɔ, ni nakai nɔŋŋ oleee he ni hewalɛwoo baajɛ aba wɔ.

Kɛjɛ shishijee lɛ, ejeee Yehowa yiŋtoo akɛ adesai agboi. Shi moŋ, gbele fata “abonsam nitsumɔi lɛ” ahe. (1 Yoh. 3:8; Rom. 6:23) Gbele kɛ gbeyei ni asheɔ akɛ abaagbo lɛ hewɔ lɛ, mɛi pii etsɔmɔ nyɔji amɛha Satan, ni eha amɛbɛ hiɛnɔkamɔ ko. (Heb. 2:14, 15) Kɛ́ mɔ ko hiɛnɔkamɔ fɛɛ tã akɛ enaŋ miishɛɛ ni etsui enyɔŋ emli amrɔ nɛɛ kɛ agbɛnɛ lɛ yɛ Nyɔŋmɔ jeŋ hee lɛ mli po lɛ, eŋɔɔ Satan naa waa. Kɛ́ mɔ ko hefatalɔ gbo lɛ, dɔlɛ he ni enuɔ lɛ jɛ esha ni Adam fee kɛ atua ni Satan tse lɛ. (Rom. 5:12) Yehowa baajie gbele kɛ nibii gbohii fɛɛ ni Satan kɛba lɛ kɛya kwraa. Mɛi ni baaye amɛhe kɛjɛ gbele gbeyeishemɔ ni Satan kɛŋɔ mɛi nom lɛ mli lɛ ateŋ mɛi pii baafee mɛi ni amɛhefatalɔi egboi, ni ekolɛ bo hu ofata he lɛ.

Yɛ gbohiiashitee lɛ sɛɛ lɛ, tsakemɔi babaoo baaba yɛ jeŋ hee lɛ mli, ni wekukpaa ni yɔɔ adesai ateŋ lɛ hu baatsake. Akɛ nɔkwɛmɔnɔ lɛ, fɔlɔi, naamɛi kɛ niimɛi, kɛ blematsɛmɛi krokomɛi ni abaatee amɛ shi lɛ kɛ amɛbii kɛ amɛnabii fɛɛ baaye emuu fiofio. Abaajie gbɔlɛ kɛya. Ekolɛ ebaasoro bɔ ni mɛi ni darako lɛ naa mɛi ni egbɔlɔ ŋmɛnɛ lɛ yɛ bɔ ni amɛbaana amɛ yɛ nakai beaŋ lɛ he kwraa. Ani oheee oyeee akɛ tsakemɔi ni tamɔ nɛkɛ lɛ fata tsakemɔi kpakpai ni baaba adesai ashihilɛ mli lɛ ahe?

Ekolɛ oyɛ sanebimɔi pii ni kɔɔ mɛi ni abaatee amɛ shi lɛ ahe. Akɛ nɔkwɛmɔnɔ lɛ, kɛ́ mɔ  ko kɛ hefatalɔi ni fa fe ekome hi shi ni amɛ fɛɛ amɛgboi lɛ, te ebaafee tɛŋŋ wɔsɛɛ? Sadukifoi lɛ bi sane yɛ yoo ko ni klɛŋklɛŋ wu gbo, mɔ ni ji enyɔ nɔ gbo, ni nakai nɔŋŋ eba lɛ yɛ hii krokomɛi ni ekɛhi shi lɛ agbɛfaŋ lɛ he. (Luka 20:27-33) Kɛ́ atee mɛi nɛɛ ashi lɛ, mɛɛ wekukpaa baahi amɛteŋ? Wɔleee, ni ehe ehiaaa ni wɔka wɔyiŋ loo wɔhao wɔhe yɛ nibii ni wɔleee lɛ ahe. Amrɔ nɛɛ nɔ pɛ ni wɔbaanyɛ wɔfee ji, ni wɔkɛ wɔhe afɔ̃ Nyɔŋmɔ nɔ. Wɔyɛ nɔmimaa akɛ, nɔ fɛɛ nɔ ni Yehowa baafee eha wɔ wɔsɛɛ lɛ baafee nɔ ko ni hi, jeee nɔ ko ni esa akɛ wɔshe he gbeyei.

GBOHIIASHITEE HE HIƐNƆKAMƆ LƐ SHƐJEƆ MƆ MII

Biblia mli tsɔɔmɔi ni mli kã shi faŋŋ lɛ ateŋ ekome ji akɛ abaatee wɔsuɔlɔi ni egboi lɛ ashi lɛ. Biblia mli amaniɛbɔi ni kɔɔ mɛi ni atee amɛ shi lɛ ahe lɛ maa nɔ mi akɛ, “mɛi fɛɛ ni yɔɔ gbohiiabui lɛ amli lɛ aaanu [Yesu gbee], ni amɛaaje kpo.” (Yoh. 5:28, 29) Mɛi ni yɔɔ wala mli nakai beaŋ lɛ baaná miishɛɛ waa kɛ́ amɛna mɛi ni atee amɛ shi lɛ. Wɔjwɛŋmɔ nyɛŋ ashɛ miishɛɛ ni mɛi ni abaatee amɛ shi lɛ baaná lɛ he.

Kɛ́ atee mɛi ni egboi lɛ ashi lɛ, shikpɔŋ lɛ nɔ baayi kɛ miishɛɛ ni wɔnako eko dã. Abaatee mɛi akpekpe toi akpei abɔ shi kɛba wala mli ekoŋŋ. (Mar. 5:39-42; Kpoj. 20:13) Kɛ́ mɛi fɛɛ ni amɛsuɔlɔi egboi lɛ jwɛŋ naakpɛɛ nii ni baaya nɔ wɔsɛɛ nɛɛ nɔ lɛ, ebaashɛje amɛmii waa.

Ani mɔ ko baaye awerɛho ekoŋŋ kɛ́ atee gbohii lɛ ashi? Hetoo ni Biblia lɛ kɛhaa ji, dabi. Yesaia 25:8 lɛ tsɔɔ akɛ, “[Yehowa baami] gbele kɛaatee naanɔ.” Ni nɔ ni fata enɛ he ji akɛ, abaajie dɔlɛ ni gbele kɛbaa lɛ fɛɛ kɛya, ejaakɛ nakai gbalɛ lɛ tsa nɔ akɛ: “Nuŋtsɔ Yehowa aaatsumɔ hiɛaŋ fɛɛ yaafonui.” Kɛ́ amrɔ nɛɛ oyeɔ awerɛho yɛ ohefatalɔ ko gbele hewɔ lɛ, gbohiiashitee lɛ baaha oná miishɛɛ.

Adesa ko adesa ko leee nibii fɛɛ ni Nyɔŋmɔ baafee yɛ jeŋ hee lɛ mli lɛ. Yehowa wie akɛ: “Bɔ ni ŋwɛi kwɔ fe shikpɔŋ lɛ, nakai migbɛi lɛ kwɔ fe nyɛgbɛi lɛ, ni mijwɛŋmɔi lɛ hu kwɔ fe nyɛjwɛŋmɔi lɛ!” (Yes. 55:9) Kɛ́ wɔhe Yesu shiwoo ni kɔɔ gbohiiashitee lɛ he lɛ wɔye lɛ, no tsɔɔ  akɛ wɔyɛ hekɛnɔfɔɔ yɛ Yehowa mli tamɔ Abraham. Amrɔ nɛɛ, nɔ ni esa akɛ Kristofonyo fɛɛ Kristofonyo afee ji, ni efee nɔ ni Nyɔŋmɔ taoɔ yɛ edɛŋ, koni ‘esa jeŋ ni baa lɛ namɔ’ ni ekɛ mɛi ni abaatee amɛ shi lɛ ahi shi.—Luka 20:35.

NƆ HEWƆ NI WƆYƆƆ HIƐNƆKAMƆ

Kɛ́ ojwɛŋ ohiɛnɔkamɔ lɛ nɔ daa lɛ, ehaŋ ohao yɛ wɔsɛɛ he. Adesai babaoo bɛ hiɛnɔkamɔ ko kɛha wɔsɛɛ. Shi Yehowa ewo wɔ shi akɛ ekɛ nɔ ko kpakpa baaha wɔ. Wɔnyɛŋ wɔle gbɛ ni Yehowa baatsɔ nɔ etsu wɔhiamɔ nii kɛ nibii ni wɔshweɔ lɛ fɛɛ ahe nii eha wɔ, shi wɔbaanyɛ wɔná nɔmimaa akɛ ebaafee. Bɔfo Paulo ŋma akɛ: “Nɔhiɛkamɔ ni anaa lɛ, ejeee nɔhiɛkamɔ: shi namɔ hiɛ kãa nɔ ni enaa lɛ nɔ? Shi kɛ́ nɔ ni wɔnaaa lɛ nɔ wɔhiɛ kã lɛ, belɛ wɔkɛ tsuishiŋmɛɛ kwɛɔ lɛ gbɛ.” (Rom. 8:24, 25) Kɛ́ hiɛnɔkamɔ ni oyɔɔ yɛ Nyɔŋmɔ shiwoi lɛ amli lɛ mli wa lɛ, obaanyɛ okpee ohefatalɔ lɛ gbele lɛ naa. Kɛ́ omia ohiɛ lɛ, obaahi jeŋ ni Yehowa ewo shi akɛ “eeehao nii ni otsui taoɔ” yɛ jɛmɛ lɛ mli. Ebaaha ‘nɔ fɛɛ nɔ ní hiɛ kã atɔ kɛ nii ní etaoɔ.’—Lala 37:4; 145:16; Luka 21:19.

Okɛ ohe afɔ̃ shi ni Yehowa ewo akɛ obaaná miishɛɛ wɔsɛɛ lɛ nɔ

Beni eshwɛ fioo ni Yesu baagbo lɛ, ebɔfoi lɛ fee basaa. Yesu kɛ wiemɔi nɛɛ shɛje amɛmii akɛ: “Nyɛkayea nyɛtsuii; nyɛhea Nyɔŋmɔ nɔ nyɛyea, ni mi hu nyɛhea minɔ nyɛyea.” Ekɛɛ amɛ akɛ: “Mishiŋ nyɛ awusai, miiba nyɛŋɔɔ.” (Yoh. 14:1-4, 18, 27) Ewiemɔi lɛ baaha esɛɛnyiɛlɔi ni afɔ amɛ mu lɛ aná hiɛnɔkamɔ ni amɛfi shi yɛ afii ohai abɔ ni baanyiɛ sɛɛ lɛ amli. Nakai nɔŋŋ esaaa akɛ mɛi ni shweɔ akɛ amɛbaana amɛsuɔlɔi ni egboi beni atee amɛ shi lɛ ahiɛnɔkamɔ tãa. Yehowa kɛ e-Bi lɛ kwaŋ amɛ, abaatee amɛsuɔlɔi ni egboi lɛ ashi. Shiwoo nɛɛ baaba mli lɛɛlɛŋ!

^ kk. 3 Atsake mɛi lɛ agbɛ́i.

Ekrokromɛi Hu Nɛ

Nɔ ko Nɔ ko Nyɛŋ ‘Agbála Wɔkɛ Nyɔŋmɔ Suɔmɔ lɛ Mli’

Kaabo amale akɛ Nyɔŋmɔ sumɔɔɔ bo ni ohe bɛ sɛɛnamɔ yɛ ehiɛ lɛ toi.