Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) NOVEMBER 2013

 AJIE KƐJƐ WƆNITOOHE LƐ

“Mitsɔ Tamɔ Akpokpolonto”

“Mitsɔ Tamɔ Akpokpolonto”

YƐ August kɛ September 1929 lɛ, shiɛlɔi ni fa fe 10,000 kɛ amɛhe wo tafãa krɛdɛɛ ko ni he gbii nɛɛhu lɛ mli yɛ United States. Amɛjara woji kɛ woji bibii aaashɛ 250,000. Colporteurs, ni amrɔ nɛɛ atsɛɔ amɛ daa gbɛgbalɔi lɛ, aaafee akpe fata Maŋtsɛyeli shiɛlɔi nɛɛ ahe. Amrɔ nɛɛ amɛyi efa waa diɛŋtsɛ! Bulletin * lɛ wie akɛ, “eyɛ naakpɛɛ waa” akɛ gbɛgbalɔi lɛ ayifalɛ eku ebɔ he toi etɛ kɛjɛ afi 1927 kɛyashi afi 1929.

Yɛ afi 1929 naagbee gbɛ lɛ, shika he naagba wulu ko ba. Yɛ Jufɔ, October 29, 1929 lɛ, shika ni mɛi kɛwo nitsumɔi srɔtoi amli yɛ jarayelihe wulu ni yɔɔ New York lɛ hiɛ kpata, ni no sa jarayelii ni yaa nɔ yɛ jeŋ fɛɛ lɛ he waa, ni enɛ kɛ jaramɔ shihilɛ ko ni naa wa waa ba jeŋ fɛɛ. Shikatoohei babaoo kpa nitsumɔ. Mɛi ni hũɔ ŋmɔji wuji kɛ mɛi ni lɛɔ kooloi babaoo lɛ anitsumɔ fite. Nitsumɔhei wuji hu kpa nitsumɔ. Mɛi akpekpei abɔ anitsumɔ ŋmɛɛ amɛ. Yɛ afi 1933 lɛ, kɛ́ hooo lɛ, daa gbi lɛ aheɔ aaafee mɛi 1,000 ashĩai yɛ amɛdɛŋ yɛ U.S. akɛni amɛhiɛ nitsumɔhei komɛi nyɔmɔ lɛ hewɔ.

Te mɛi ni kɛ amɛbe fɛɛ shiɛɔ lɛ aaafee tɛŋŋ amɛkpee shihilɛ nɛɛ naa lɛ? Nɔ ko ni ye ebua ji amɛtsɔji ni amɛkɛfee shĩai ni amɛwɔ mli. Awooo tsɔji ni awɔɔ mli lɛ ahe nyɔmɔ ko, ni awooo he too hu. Eye ebua gbɛgbalɔi babaoo ni amɛnyɛ amɛtsu gbɛgbamɔ nitsumɔ lɛ ní amɛbɔɔɔ nyɔmɔ babaoo. * Ni kɛ́ amɛtee kpeei lɛ, amɛwɔɔ amɛtsɔji nɛɛ amli. Yɛ afi 1934 lɛ, Bulletin lɛ tsɔɔ bɔ ni abaanyɛ afee tsũi ni awɔɔ mli yɛ tsɔji amli ni nɔ fɛɛ nɔ ni he hiaa yɛ shĩa, tamɔ paipi, saatso ni akotaa, kɛ nibii ni haa tsũ mli dɔɔ yɛ mli.

Shiɛlɔi babaoo ni yɔɔ je lɛŋ fɛɛ ni le ŋaa lɛ fee amɛtsɔji bɔ ni abaanyɛ awɔ mli. Nyɛmi nuu ko ni atsɛɔ lɛ Victor Blackwell lɛ wie akɛ: “Noa leee bɔ ni akpɛɔ lɛlɛ ahaa, ni mi hu mileee bɔ ni afeɔ tsɔne ni awɔɔ mli.” Shi enyɛ efee eko kɛ̃.

Tsɔne ko ni awɔɔ mli ni akɛyaafo faa yɛ India yɛ nugbɔnɛmɔ beaŋ

Avery Bristow kɛ eŋa Lovenia Bristow hu yɛ tsɔne ni afee lɛ bɔ ni awɔɔ mli. Avery kɛɛ akɛ: “Mitsɔ tamɔ akpokpolonto—he fɛɛ he ni maya lɛ, mikɛ mitsũ yaa.” Bristow weku lɛ kɛ Nyɛminuu Harvey Conrow kɛ eŋa Anne Conrow fɛɛ ji gbɛgbalɔi ni kɛ wolo titirii ni akɛ kootaa fee eha amɛtsɔne lɛ he fɛɛ. Be fɛɛ be ni amɛbaafã tsɔne lɛ, woji lɛ eko kpɔlɔɔ. Nyɛminuu Avery kɛɛ akɛ: “Mɔ ko enako tsɔne ni awɔɔ mli ni tamɔ nɛkɛ pɛŋ, ni kɛjɛ nakai beaŋ kɛbaa nɛɛ hu lɛ, mɔ ko enako eko!” Shi Nyɛminuu Avery kɛɛ akɛ, Nyɛminuu Conrow kɛ eŋa kɛ amɛbihii enyɔ lɛ ji “weku ko ni yɔɔ miishɛɛ waa.” Nyɛminuu Harvey Conrow ŋma akɛ: “Nɔ ko ehiaaa wɔ, ni wɔle akɛ Yehowa baaya nɔ ekwɛ wɔ jogbaŋŋ yɛ esɔɔmɔ lɛ mli.” Sɛɛ mli lɛ, weku nɛɛ mli bii lɛ fɛɛ tee Gilead Skul lɛ eko, ni aha amɛyasɔmɔ akɛ maŋsɛɛ sɔɔlɔi yɛ Peru.

Nyɛminuu Giusto Battaino kɛ eŋa Vincenza Battaino hu sɔmɔ akɛ gbɛgbalɔi. Beni yoo lɛ ná musu lɛ, amɛfee amɛtsɔne ko ni afee lɛ afi 1929 lɛ bɔ ni abaanyɛ awɔ mli, ni ‘emli yɛ fɛo waa’ fe buu ni kulɛ amɛwɔɔ mli lɛ. Amɛkɛ amɛbiyoo fioo lɛ tee nɔ  amɛtsu gbɛgbamɔ nitsumɔ lɛ, ni amɛshiɛ amɛha Italiabii ni yɔɔ United States lɛ.

Mɛi babaoo bo sane kpakpa lɛ toi, shi bei pii lɛ, kɛ́ aha ohiafoi kɛ mɛi ni bɛ nitsumɔ lɛ woji lɛ, amɛnáaa shika ni amɛkɛbaawo nyɔmɔ. No hewɔ lɛ, amɛhaa nibii krokomɛi kɛyeɔ najiaŋ. Gbɛgbalɔi enyɔ komɛi ŋmala nibii srɔtoi 64 ni amɛná kɛjɛ mɛi ni yɔɔ wiemɔ lɛ he miishɛɛ lɛ adɛŋ lɛ amɛwo wolo nɔ. Nibii ni aŋmala lɛ “tamɔ nibii ni ahɔɔ yɛ shwapo mli.”

Nyɛmi nuu ko ni atsɛɔ lɛ Fred Anderson lɛ kɛ okwaafonyo ko ni miitao wɔwoji lɛ ekomɛi lɛ kpe, ni ekɛ woji ni etaoɔ lɛ ha lɛ, ni lɛ hu ekɛ emami hiŋmɛi glase ha kɛwo nyɔmɔ. Beni eyashɛ ŋmɔ ni tsa nɔ lɛ mli lɛ, eyanina nuu ko, ni nuu lɛ ná wɔwoji lɛ ahe miishɛɛ, shi nuu lɛ kɛɛ akɛ, “Mibɛ hiŋmɛi glase ni mikɛbaakane.” Shi ni ekɛ klɛŋklɛŋ okwaafonyo lɛ hiŋmɛi glase lɛ ha lɛ, enyɛ ekɛkane woji lɛ jogbaŋŋ, ni ewo woji lɛ kɛ hiŋmɛi glase lɛ he nyɔmɔ.

Nyɛmi nuu ko ni atsɛɔ lɛ Herbert Abbott yɛ wuɔi atsu pɛmpɛoo ko yɛ etsɔne lɛ mli. Kɛ́ eha woji ni aha lɛ wuɔi aaafee etɛ loo ejwɛ lɛ, ekɛyaa jara nɔ eyahɔɔ ni ekɛheɔ pɛtro ewoɔ etsɔne lɛ mli. Eŋma akɛ: “Anɔkwa, be shɛɔ ni wɔhiɛɛɛ tɔrɔ po, shi wɔhaaa no aje wɔnijiaŋ wui. Kɛ́ wɔyɛ pɛtro yɛ wɔtsɔne lɛ mli lɛ, wɔyaa nɔ wɔshiɛɔ ni wɔkɛ wɔhiɛ fɔ̃ɔ Yehowa nɔ kwraa.”

Yehowa webii lɛ kɛ amɛhe fɔ̃ enɔ ni amɛgbugbaaa, ni no ji nɔ ni ye ebua amɛ yɛ nakai afii ni jaraa lɛ amli. Be ko beni nugbɔ nɛɔ waa lɛ, nyɛmi nuu ko ni atsɛɔ lɛ Maxwell Lewis kɛ eŋa Emmy Lewis lɛ ahe fee oya ni amɛshi amɛtsɔne ni awɔɔ mli lɛ mli dani tso ko bagbee tsɔne lɛ nɔ ni eja mli enyɔ. Nyɛminuu Maxwell ŋma akɛ: “Nibii nɛɛ jeee gbɛtsĩi nii, amɛji osharai kɛkɛ, ni amɛhaaa wɔnijiaŋ aje wui po. Nitsumɔ babaoo yɛ lolo, ni wɔtswa wɔfai shi akɛ wɔbaatsu.” Nyɛminuu Lewis kɛ eŋa lɛ anijiaŋ ejeee wui, ni amɛnanemɛi komɛi ye amɛbua amɛ ni amɛsaa amɛtsɔne ni awɔɔ mli lɛ ekoŋŋ.

Yɛ wɔbei ni jaraa nɛɛ amli hu lɛ, Yehowa Odasefoi akpekpei abɔ kɛ amɛhe shãa afɔle nakai nɔŋŋ. Taakɛ gbɛgbalɔi ni hi shi yɛ blema lɛ fee lɛ, wɔ hu wɔtswa wɔfai shi akɛ wɔbaaya nɔ wɔshiɛ kɛyashi Yehowa baakɛɛ akɛ ehi.

^ kk. 3 Amrɔ nɛɛ atsɛɔ lɛ Wɔ Maŋtsɛyeli Sɔɔmɔ.

^ kk. 5 Nakai beaŋ lɛ, gbɛgbalɔi pii tsuuu heloonaa nitsumɔ. Akɛni no mli lɛ ahɔɔ wɔwoji lɛ hewɔ lɛ, atseɔ nɔ ahaa amɛ, ni kɛ́ amɛhɔɔ lɛ amɛnáa sɛɛ, ni no amɛkɛkwɛɔ amɛhe.