Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) OCTOBER 2013

 WALA SHIHILƐ HE SANE

Wɔhe ni Wɔkɛfɔ̃ Yehowa nɔ lɛ Eha Wɔná Jɔɔmɔi Babaoo

Wɔhe ni Wɔkɛfɔ̃ Yehowa nɔ lɛ Eha Wɔná Jɔɔmɔi Babaoo

Shihilɛ jaraa, ni bei komɛi lɛ oleee nɔ ni baaba wɔ. Shi Yehowa jɔɔ mɛi ni kɛ amɛhiɛ fɔ̃ɔ enɔ ni amɛkɛ amɛhe kpasaaa amɛ diɛŋtsɛ amɛjwɛŋmɔ lɛ. Enɛ ji nɔ ni mi kɛ miŋa fɛɛ ena yɛ wɔwala shihilɛ ni mli eyi kɛ jɔɔmɔi lɛ mli. Ha magba bo wɔshihilɛ mli sane fioo ko.

MITSƐ kɛ minyɛ kpe yɛ kpokpaa wulu nɔ kpee ko ni Majimaji Ateŋ Biblia Kaselɔi lɛ fee yɛ Cedar Point, yɛ Ohio ni yɔɔ U.S.A. lɛ yɛ afi 1919 lɛ shishi. Amɛbote gbalashihilɛ mli sɛɛ mli yɛ nakai afi lɛ nɔŋŋ mli. Afɔ mi afi 1922, ni no sɛɛ afii enyɔ lɛ afɔ minyɛmi nuu Paul. Afɔ miŋa Grace afi 1930. Atsɛɔ etsɛ Roy Howell kɛ enyɛ hu Ruth Howell. Atsɔse amɛyi enyɔ lɛ fɛɛ akɛ Biblia Kaselɔi, ni enii kɛ enaa hu ji Biblia Kaselɔi, ni amɛnaanyo ji Nyɛminuu Charles Taze Russell.

Mikɛ Grace kpe afi 1947, ni wɔbote gbalashihilɛ mli July 16, 1949. Dani wɔbaabote gbalashihilɛ mli lɛ, wɔjɛ wɔtsuiŋ wɔsusu bɔ ni wɔ fɛɛ wɔbaasumɔ akɛ wɔgbalashihilɛ lɛ aya lɛ aha lɛ he. Wɔkpɛ mli akɛ wɔkɛ wɔhe baawo be fɛɛ sɔɔmɔ nitsumɔ lɛ mli, ni wɔfɔŋ bii hu. Wɔje gbɛgbamɔ nitsumɔ lɛ shishi October 1, 1950. Kɛkɛ ni yɛ afi 1952 lɛ, afɔ̃ wɔ nine kɛha kpokpaa nɔkwɛmɔ nitsumɔ lɛ.

GBƐFAA NITSUMƆ LƐ KƐ GILEAD SKUL TSƆSEMƆ

Wɔ fɛɛ wɔyɔse akɛ yelikɛbuamɔ he miihia wɔ yɛ wɔsɔɔmɔ hee nɛɛ mli. Mikase nii kɛjɛ nyɛmimɛi hii ni le nitsumɔ nɛɛ mli lɛ aŋɔɔ, ni mitao mɛi hu ni baanyɛ aye abua Grace. Miyana nyɛmi nuu ko ni atsɛɔ lɛ Marvin Holien, ni kɛ afii babaoo esɔmɔ akɛ nɔkwɛlɔ gbɛfalɔ, ni ekɛ wɔweku lɛ ebɔ be kpalaŋŋ lɛ, ni mibi lɛ akɛ: “Grace hiɛ fãko tsɔ, ni ebɛ niiashikpamɔ hu. Ani ole mɔ ko ni ebaanyɛ ekɛtsu nii be fioo ko ni baanyɛ aye abua lɛ?” Eto he akɛ: “Hɛɛ. Nyɛmiyoo Edna Winkle ji gbɛgbalɔ ko ni he ekwakwao, ni ebaanyɛ eye ebua lɛ babaoo.” Sɛɛ mli lɛ, Grace wie yɛ Edna he akɛ: “Eha mibale bɔ ni akɛ mɛi gbaa sane yɛ gbɛ ni waaa nɔ yɛ shinai anaa, bɔ ni ayeɔ mɛi ni tsĩɔ sanegbaa naa lɛ anɔ, kɛ bɔ ni aboɔ shĩatsɛmɛi atoi jogbaŋŋ koni ale hetoo ni sa ni akɛbaaha. Eye ebua mi waa!”

Kɛjɛ abɛkugbɛ: Nathan Knorr, Malcolm Allen, Fred Rusk, Lyle Reusch, Andrew Wagner

Mi kɛ Grace sɔmɔ kpokpai enyɔ yɛ Iowa maŋ lɛ mli, kɛ hei komɛi yɛ Minnesota kɛ South Dakota maji lɛ amli. No sɛɛ lɛ, aha wɔshi kɛtee New York Kpokpaa 1 lɛ mli, ni wɔyasɔmɔ asafoi ni yɔɔ  Brooklyn kɛ Queens lɛ. Nɔ ko ni wɔhiɛ kpaŋ nɔ ji akɛ, beni wɔsɔmɔɔ nakai kpokpaa lɛ wɔnu he akɛ wɔbɛ niiashikpamɔ ko kwraa. Brooklyn Heights Asafo ni kpeɔ yɛ Maŋtsɛyeli Asa ni yɔɔ Betel, ni Betel weku lɛ mli bii babaoo ni yɔɔ niiashikpamɔ yɔɔ mli lɛ yɛ nakai kpokpaa lɛ nɔ. Beni miha mi-klɛŋklɛŋ sɔɔmɔ wiemɔ yɛ nakai asafo lɛ mli lɛ, Nyɛminuu Nathan Knorr bakɛɛ mi akɛ: “Malcolm, owo wɔ ŋaa waa, ni oŋaawoo lɛ sa hu. Kaaha ohiɛ kpa nɔ akɛ, kɛji oyeee obuaaa wɔ kɛtsɔ ŋaawoo ni sa ni okɛaaha wɔ lɛ nɔ lɛ, no lɛ, asafo lɛ naŋ ohe sɛɛ. Yaa nɔ nakai nɔŋŋ.” Beni wɔkpa asafoŋ kpee lɛ, mibɔ Grace. No sɛɛ lɛ, wɔkwɔ kɛtee wɔtsũ ni akɛha wɔ yɛ Betel lɛ mli. Bɔ ni wɔfee yeyeeye lɛ sɔŋŋ ha wɔjwa yaafo.

“Kɛji oyeee obuaaa wɔ kɛtsɔ ŋaawoo ni sa ni okɛaaha wɔ lɛ nɔ lɛ, no lɛ, asafo lɛ naŋ ohe sɛɛ. Yaa nɔ nakai nɔŋŋ”

Nyɔji fioo komɛi asɛɛ lɛ, afɔ̃ wɔ nine koni wɔya Gilead Skul lɛ klas ni ji 24 nɔ ni abaagbe naa February 1955 lɛ. Atsɔ hiɛ aha wɔle akɛ, jeee maŋsɛɛ sɔɔmɔ nitsumɔ lɛ titri hewɔ akɛ wɔ yaa skul lɛ. Shi moŋ, akɛ wɔ miiya koni akɛtsɔse wɔ ni wɔnyɛ wɔtsu gbɛfaa nitsumɔ lɛ jogbaŋŋ. Skul nɛɛ ni wɔtee lɛ ye ebua wɔ waa ni eha wɔna akɛ asomoaŋ wɔleee nɔ ko nɔ ko kwraa.

Ŋwɛigbɛ: Fern Couch kɛ George Couch kɛ mi kɛ Grace yɛ Gilead, afi 1954

Beni wɔgbe naa lɛ, aha wɔyasɔmɔ yɛ kpokpaa wulu nɔkwɛmɔ nitsumɔ lɛ mli. Maji ni yɔɔ wɔkpokpaa wulu lɛ mli ji Indiana, Michigan, kɛ Ohio. Kɛkɛ ni trukaa yɛ December 1955 mli lɛ, Nyɛminuu Knorr ŋma wɔ wolo ko akɛ: “Nyɛkɛa mi nɔ ni yɔɔ nyɛtsuiŋ, ni nyɛkashiua mi nɔ ko nɔ yɛ sane nɛɛ mli. Kɛji nyɛmiisumɔ ni nyɛba Betel ni nyɛbahi biɛ kwraa kɛsɔmɔ . . . aloo nyɛmiisumɔ ni nyɛbasɔmɔ yɛ Betel be fioo ni no sɛɛ lɛ nyɛyasɔmɔ yɛ maŋ kroko nɔ lɛ, nyɛhaa malea. Kɛji nyɛmiisumɔ kpokpaa wulu kɛ kpokpaa nɔkwɛmɔ nitsumɔ lɛ hu lɛ, nyɛhaa malea.” Wɔha lɛ hetoo akɛ, nɔ fɛɛ nɔ ni abaakɛɛ wɔfee lɛ, wɔbaafee. Amrɔ nɔŋŋ lɛ, akɛɛ wɔba Betel!

WƆKƐ MIISHƐƐ SƆMƆ YƐ BETEL

Nitsumɔi ni mitsu yɛ Betel ni mina he miishɛɛ waa lɛ ateŋ ekome ji, wiemɔi ni miyaha yɛ asafoi amli, kpeei bibii kɛ kpeei wuji ashishi yɛ United States fɛɛ lɛ. Mitsɔɔ oblahii babaoo nii ni miye mibua amɛteŋ mɛi pii hu, ni sɛɛ mli lɛ, akɛ sɔ̃i wuji wo amɛteŋ mɛi babaoo adɛŋ yɛ Yehowa asafo lɛ mli. Sɛɛ mli lɛ, miyatsu nii akɛ Nyɛminuu Knorr woloŋmalɔ yɛ ɔfis ni atoɔ jeŋ fɛɛ shiɛmɔ nitsumɔ lɛ he gbɛjianɔ yɛ lɛ.

Beni mitsuɔ nii yɛ Service Department lɛ, afi 1956

Miná afii ni mikɛtsu nii yɛ Service Department lɛ ahe miishɛɛ waa. Beni miyɔɔ jɛmɛ lɛ, mikɛ Nyɛminuu T. J. (Bud) Sullivan tsu nii. Ekɛ afii babaoo  esɔmɔ akɛ nakai nitsumɔhe lɛ nɔkwɛlɔ. Shi mikase nii babaoo kɛjɛ mɛi krokomɛi hu adɛŋ. Amɛteŋ mɔ kome ji Fred Rusk, mɔ ni aha etsɔɔ mi nitsumɔ lɛ. Mikaiɔ akɛ be ko lɛ mibi lɛ akɛ, “Fred, mɛni hewɔ kɛ́ miŋma wolo ko lɛ, otsakeɔ nibii babaoo yɛ mli lɛ?” Eŋmɔ, ni ekɛɛ mi akɛ, “Malcolm, kɛ oowie lɛ, obaanyɛ ogbála nibii babaoo amli yɛ owiemɔ lɛ mli, shi kɛji oŋma wolo, titri lɛ kɛji ejɛ biɛ lɛ, esa akɛ oha nɔ ni otaoɔ okɛɛ lɛ afee faŋŋ ni efee nɔ ni ja hu.” Kɛkɛ ni ejɛ mlihilɛ mli ekɛɛ mi akɛ, “Kaashe gbeyei—oobɔ mɔdɛŋ waa, ni etsɛŋ ohe baakpɔ.”

Grace tsu nitsumɔi srɔtoi yɛ afii ni wɔkɛsɔmɔ yɛ Betel lɛ amli, ni eko ji tsũ mli saamɔ. Enya nakai nitsumɔ lɛ he waa. Kɛbashi ŋmɛnɛ po lɛ, kɛ́ wɔkɛ nyɛmimɛi hii ni no mli lɛ amɛji oblahii yɛ nakai beaŋ yɛ Betel lɛ ekomɛi kpe lɛ, amɛkɛ miishɛɛ kɛɔ Grace akɛ, “Bo otsɔɔ mi bɔ ni asaa saatso nɔ ahaa, ni anɔkwa, mimami hiɛ sɔ nɔ ni otsɔɔ mi nɛɛ waa.” Grace nya nitsumɔ ni eyatsu yɛ Magazine Department, Correspondence Department, Tape Duplicating Department lɛ ahe waa. Nitsumɔi nɛɛ ye ebua lɛ ni ena akɛ, nɔ fɛɛ nɔ ni wɔtsuɔ loo he fɛɛ he ni wɔsɔmɔɔ yɛ, yɛ Yehowa asafo lɛ mli lɛ, eji hegbɛ ni wɔná kɛ jɔɔmɔ hu. Ni nakai nɔŋŋ enuɔ he kɛbashi ŋmɛnɛ.

TSAKEMƆI NI WƆFEE

Yɛ afi 1970 afii lɛ teŋgbɛ lɛ, wɔyɔse akɛ ehe miihia ni wɔyaye wɔbua wɔfɔlɔi ni efɔ̃ nɔ yɛ afii amli lɛ. Enɛ hewɔ lɛ, ehe bahia ni wɔkpɛ yiŋ ko ni wa waa. Wɔsumɔɔɔ akɛ wɔshiɔ Betel kɛ Yehowa tsuji krokomɛi ni wɔbasumɔ waa lɛ. Shi fɛɛ sɛɛ lɛ, minu he akɛ eji misɔ̃ akɛ makwɛ wɔfɔlɔi lɛ. No hewɔ lɛ, sɛɛ mli lɛ, wɔshi Betel kɛ jwɛŋmɔ lɛ akɛ, kɛ́ nibii hi fioo lɛ, wɔbaaku wɔsɛɛ.

Mikɛ ŋshuɔrans nitsumɔhe ko bɔi nitsumɔ bɔni afee ni wɔná shika kɛkwɛ wɔhe. Mihiɛ kpaŋ nɔ ni maneja ko kɛɛ mi beni etsɔɔ mi nitsumɔ lɛ mli lɛ nɔ kɔkɔɔkɔ. Ekɛɛ akɛ: “Nitsumɔ nɛɛ biɔ ni oya mɛi aŋɔɔ gbɛkɛgbɛkɛ. Ejaakɛ nakai beaŋ obaana mɛi lɛ. Mɛi lɛ ni obaana daa gbɛkɛ lɛ ji nɔ ni he hiaa fe fɛɛ.Mito he miha lɛ akɛ, “Miina akɛ oowie kɛmiijɛ oniiashikpamɔ mli, ni ehi. Shi mi hu mitsuɔ Kristofoi asɔ̃i komɛi ahe nii ni mifoko mli pɛŋ, ni mitoko miyiŋ akɛ mafo mli bianɛ. Maya mɛi aŋɔɔ gbɛkɛgbɛkɛ, shi Jufɔ kɛ Soo gbɛkɛ lɛ, minyɛŋ maya, ejaakɛ maya kpeei komɛi ni he hiaa waa.” Yehowa jɔɔ mi waa diɛŋtsɛ akɛni mifooo asafoŋ kpeei amli yɛ minitsumɔ lɛ hewɔ lɛ.

Wɔdamɔ minyɛ masɛi yɛ he ni akwɛɔ mɛi ni edara yɛ lɛ beni egbo yɛ July 1987 lɛ. Nɛɛsifonyo nukpa ni yɔɔ jɛmɛ lɛ bakɛɛ Grace akɛ: “Owulaŋa Allen, yaa shĩa ni oyajɔɔ ohe. Mɔ fɛɛ mɔ le akɛ onane kpaaa yɛ biɛ yɛ oshaayoo lɛ hewɔ. Ha otsui anyɔ omli, ni kaashwa ohe hu.”

Wɔŋmala woji anɔ nii kɛha Betel sɔɔmɔ ni wɔnyaa he waa lɛ ekoŋŋ yɛ December 1987 mli.  Shi gbii fioo sɛɛ lɛ, aha Grace le akɛ ená kansa yɛ emusuŋ kotoku lɛ he. Beni afee lɛ opireshɛŋ ni ehe wa lɛ sɛɛ lɛ, aha ele akɛ kansa lɛ etee. Shi yɛ be nɛɛ mli nɔŋŋ lɛ, wɔnine shɛ wolo nɔ kɛjɛ Betel akɛ, wɔya nɔ wɔye wɔbua asafo ni wɔyɔɔ mli lɛ. Wɔtswa wɔfai shi akɛ wɔbaatsu Maŋtsɛyeli nitsumɔ lɛ kɛ wɔnyɛmɔ fɛɛ.

Sɛɛ mli lɛ, miná nitsumɔ ko yɛ Texas. Wɔna akɛ kɔɔyɔŋ tsakemɔ ni yɔɔ jɛmɛ lɛ baahi aha wɔ waa, ni nakai pɛpɛɛpɛ eji. Wɔná nyɛmimɛi hii kɛ yei ni sumɔɔ wɔ waa, ni wɔkɛ amɛ ehi biɛ yɛ Texas aaafee afii 25.

NIBII NI WƆKASE YƐ SHIHILƐ MLI

Grace ená kansa yɛ emusuŋ kotoku lɛ he kɛ esɛŋ, ni nyɛsɛɛ nɛɛ ená kansa lɛ ekoŋŋ yɛ efufɔ mli. Shi emii shɛɔ nɔ fɛɛ nɔ ni eyɔɔ yɛ shihilɛ mli lɛ he, ni eteee shi ewooo miyitsoyeli lɛ, shi moŋ eyeɔ ebuaa mi yɛ nɔ fɛɛ nɔ mli. Bei pii lɛ, mɛi biɔ lɛ akɛ, “Mɛni eye ebua nyɛ ni nyɛtee nɔ nyɛhi shi akɛ wu kɛ ŋa, ni mɛni hewɔ daa nɛɛ nyɛyɔɔ miishɛɛ lɛ?” Etsɔɔ amɛ nibii ejwɛ ahewɔ ni wɔyɔɔ miishɛɛ lɛ, akɛ: “Nanemɛi ji wɔ. Wɔfɔɔ sanegbaa daa gbi. Wɔfeɔ ekome kɛyasaraa mɛi daa. Ni kɛ́ béi ba wɔteŋ lɛ, wɔsaa dani wɔkamɔɔ shi.” Eyɛ mli akɛ bei komɛi lɛ, wɔteŋ mɔ kome feɔ nɔ ko ni mɔ kroko lɛ sumɔɔɔ moŋ, shi wɔkɛfaa wɔhe—ni enɛ yeɔ ebuaa wɔ waa.

“Esa akɛ okɛ ohe afɔ̃ Yehowa nɔ daa ni okpɛlɛ nɔ ni ebaaŋmɛ gbɛ ni eba lɛ nɔ”

Yɛ shihilɛi ni jaraa ni wɔkɛkpe lɛ fɛɛ amli lɛ, wɔkase nibii kpakpai komɛi kɛjɛ mli:

  1.  Esa akɛ okɛ ohe afɔ̃ Yehowa nɔ daa ni okpɛlɛ nɔ ni ebaaŋmɛ gbɛ ni eba lɛ nɔ. Okɛ ohe akakpasa bo diɛŋtsɛ ojwɛŋmɔ kɔkɔɔkɔ.—Abɛi 3:5, 6; Yer. 17:7.

  2.  Shihilɛ fɛɛ shihilɛ ni okɛbaakpe lɛ, taomɔ gbɛtsɔɔmɔ kɛjɛ Yehowa Wiemɔ lɛ mli. Kɛ́ obo Yehowa kɛ emlai lɛ atoi lɛ, obaaná he sɛɛ. Nibii enyɔ nɛɛ ateŋ ekome pɛ obaanyɛ ofee—akɛ obaabo toi aloo obooo toi—adamɔɔɔ teŋ.—Rom. 6:16; Heb. 4:12.

  3.  Nɔ kome pɛ he hiaa yɛ shihilɛ mli—ní obaafee gbɛ́i kpakpa yɛ Yehowa hiɛ. Okɛ nɔ ni esumɔɔ lɛ aye klɛŋklɛŋ gbɛhe, jeee heloonaa nibii asɛɛtiumɔ.—Abɛi 28:20; Jaj. 7:1; Mat. 6:33, 34.

  4.  Sɔlemɔ ni onyɛ okɛ ohe awo Yehowa sɔɔmɔ lɛ mli, ni ofee babaoo. Okɛ ojwɛŋmɔ ama nɔ ni obaanyɛ ofee lɛ nɔ, shi jeee nɔ ni onyɛɛɛ ofee lɛ.—Mat. 22:37; 2 Tim. 4:2.

  5.  Ná ole akɛ, kɛjɛ asafo nɛɛ sɛɛ lɛ, eko eko bɛ dɔŋŋ ni Yehowa kpɛlɛɔ nɔ, ni ejɔɔmɔ yɔɔ nɔ hu.—Yoh. 6:68.

Mikɛ nɔ ni fe afii 75 esɔmɔ Yehowa, ni nakai nɔŋŋ eji yɛ Grace gbɛfaŋ, ni kɛjɛ beni wɔbote gbalashihilɛ mli nɛɛ, wɔkɛ nɔ ni miihe ashɛ afii 65 esɔmɔ lɛ. Ni yɛ afii nyɔŋmai abɔ nɛɛ mli fɛɛ lɛ, wɔkɛ miishɛɛ diɛŋtsɛ esɔmɔ Yehowa akɛ wu kɛ ŋa. Wɔshwelɛ ji akɛ, wɔnyɛmimɛi hii kɛ yei lɛ fɛɛ kɛ amɛhe baafɔ̃ Yehowa nɔ, ni amɛ hu amɛná jɔɔmɔi babaoo.