Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) OCTOBER 2013

‘Nyɛsɔmɔa Nuŋtsɔ Yehowa Tamɔ Nyɔji’

‘Nyɛsɔmɔa Nuŋtsɔ Yehowa Tamɔ Nyɔji’

“Nyɛmɔdɛŋbɔɔ lɛ naa akabaa shi; . . . Nyɛsɔmɔa Nuŋtsɔ [Yehowa].”—ROM. 12:11.

1. Mɛɛ srɔtofeemɔ yɔɔ bɔ ni mɛi buɔ nyɔŋyeli kɛ nyɔŋyeli ni Romabii 12:11 lɛ wieɔ he lɛ teŋ?

KƐ AKƐƐ mɔ ko ji nyɔŋ lɛ, nɔ ni baa mɛi babaoo ajwɛŋmɔŋ nɔŋŋ ji, mɔ ko ni enuŋtsɔ miiye enɔ dɛŋdɛŋ. Shi esoro nyɔji ni Kristofoi ji lɛ kwraa. Nyɔŋmɔ Wiemɔ lɛ tsɔɔ akɛ, mɔ ko baanyɛ ajɛ esuɔmɔ mli esɔmɔ Nuŋtsɔ ni yɔɔ suɔmɔ lɛ. Beni bɔfo Paulo kɛɛ klɛŋklɛŋ afii 100 lɛ mli Kristofoi lɛ akɛ, ‘amɛsɔmɔ Nuŋtsɔ Yehowa tamɔ nyɔji’ lɛ, no mli lɛ eeewo amɛ hewalɛ ni amɛha suɔmɔ ni amɛyɔɔ kɛha Nyɔŋmɔ lɛ atsirɛ amɛ koni amɛkɛ sɔɔmɔ krɔŋŋ aha lɛ. (Rom. 12:11) Mɛni nyɔŋyeli nɛɛ biɔ ni afee? Mɛni esa akɛ wɔfee koni wɔkatsɔmɔ nyɔji wɔha Satan kɛ eje lɛ? Ni kɛ́ mɔ ko sɔmɔ Yehowa akɛ nyɔŋ lɛ, mɛni ekɛjuroɔ lɛ?

“MIISUMƆ MINUŊTSƆ LƐ”

2. (a) Mɛni hewɔ ekolɛ Israelnyo ko ni ji nyɔŋ lɛ baakpɛ eyiŋ akɛ eshiŋ enuŋtsɔ lɛ? (b) Kɛ́ nyɔŋ lɛ ha agbu etoi lɛ, mɛni no tsɔɔ?

2 Kɛ́ wɔkane Mla ni Nyɔŋmɔ kɛha Israelbii lɛ, wɔnaa nɔ ni ebiɔ ni mɔ afee koni ebatsɔ Yehowa nyɔŋ. Kɛ́ Hebri nyɔŋ ko sɔmɔ enuŋtsɔ afii kpawo lɛ, eyɛ hegbɛ ni eyeɔ ehe. (2 Mose 21:2) Kɛlɛ, kɛ́ nyɔŋ ko sumɔɔ enuŋtsɔ lɛ waa, ni esumɔɔɔ ni eshiɔ lɛ lɛ, ebaanyɛ eya nɔ esɔmɔ lɛ, ejaakɛ Yehowa Mla lɛ ŋmɛɔ enɛ gbɛ. Kɛ́ eba lɛ nakai lɛ, enuŋtsɔ lɛ kɛ lɛ baaya shinaa loo shinaatso he, ni ekɛ fitii baagbu etoi. (2 Mose 21:5, 6) Nɔ ko ni sa kadimɔ waa ji toi lɛ ni agbuɔ lɛ. Yɛ Hebri wiemɔ mli lɛ, jwɛŋmɔ ni hɔ toiboo sɛɛ lɛ kɔɔ sane toi ni aaabo lɛ he. No hewɔ lɛ, kɛ́ agbu nyɔŋ lɛ toi lɛ, no tsɔɔ akɛ eesumɔ ni eya nɔ ebo enuŋtsɔ lɛ toi ni esɔmɔ lɛ. Enɛ haa wɔnaa nɔ ni wɔhe nɔ ni wɔjɔɔ wɔhaa Yehowa lɛ tsɔɔ—akɛ suɔmɔ ni wɔyɔɔ kɛha lɛ lɛ hewɔ lɛ, wɔmiisumɔ ni wɔbo lɛ toi.

3. Mɛni hewɔ wɔjɔɔ wɔhe nɔ wɔhaa Nyɔŋmɔ lɛ?

3 Wɔkpɛ wɔyiŋ akɛ wɔbaasɔmɔ Yehowa akɛ enyɔji dani abaptisi wɔ akɛ Kristofoi. Shwelɛ ni wɔyɔɔ akɛ wɔbaabo Yehowa toi ni wɔfee esuɔmɔnaa nii lɛ  ji nɔ ni tsirɛ wɔ ni wɔjɔɔ wɔhe nɔ wɔha lɛ lɛ. Mɔ ko mɔ ko enyɛɛɛ wɔnɔ ni wɔfee enɛ. Yɛ anɔkwale mli lɛ, gbekɛbii po jɔɔ amɛhe nɔ amɛhaa Yehowa dani abaptisiɔ amɛ, ni amɛfeee nakai koni amɛkɛsa amɛfɔlɔi ahiɛ. Suɔmɔ ni wɔyɔɔ kɛha Yehowa, wɔ-Nuŋtsɔ ni yɔɔ ŋwɛi lɛ ji nɔ ni tsirɛɔ wɔ koni wɔjɔɔ wɔhe nɔ wɔha lɛ lɛ. Bɔfo Yohane ŋma akɛ: “Enɛ ji Nyɔŋmɔ suɔmɔ lɛ, akɛ wɔye ekitai lɛ anɔ.”—1 Yoh. 5:3.

WƆYE WƆHE KƐLƐ NYƆJI JI WƆ

4. Mɛni ebaabi ni wɔfee koni wɔtsɔmɔ ‘jalɛ nyɔji’?

4 Eŋɔɔ wɔnaa waa akɛ Yehowa eduro wɔ nɔ ni he hiaa wɔ koni wɔtsɔmɔ enyɔji! Hemɔkɛyeli ni wɔyɔɔ yɛ Kristo kpɔmɔ afɔleshaa lɛ mli lɛ hewɔ lɛ, wɔye wɔhe kɛjɛ esha nyɔŋyeli lɛ mli. Eyɛ mli akɛ wɔyeee emuu moŋ, shi Yehowa kɛ Yesu ebatsɔmɔ wɔ-Nuŋtsɔmɛi. Paulo tsɔɔ enɛ mli faŋŋ yɛ woji ni ejɛ mumɔŋ eŋma lɛ ateŋ ekome mli akɛ: “Nyɛbua nyɛhe akɛ mɛi ni egboi eha esha, ni amɛhiɛ kamɔ ha Nyɔŋmɔ kɛ Yesu Kristo, wɔ-Nuŋtsɔ lɛ.” No sɛɛ lɛ, ebɔ wɔ kɔkɔ akɛ: “Ani nyɛleee akɛ, mɔ ni nyɛŋɔɔ nyɛhe nyɛfeɔ [nyɔji] nyɛhaa ní nyɛboɔ lɛ toi lɛ, lɛ nɔŋŋ [enyɔji] ji nyɛ ni nyɛboɔ lɛ toi, esha nɔ ni kɛ mɔ yaa gbele mli lɛ jio, aloo toiboo ni kɛ mɔ yaa jalɛ mli lɛ jio? Shi shidaa aha Nyɔŋmɔ, akɛ kulɛ sa lɛ esha [nyɔji] ji nyɛ, shi agbɛnɛ nyɛjɛ nyɛtsuii fiaa mli nyɛbo nɛkɛ tsɔɔmɔ ni aŋɔ nyɛ awo mli lɛ toi. Shi nɔ ni akpɔ nyɛ yɛ esha dɛŋ ni nyɛye nyɛhe lɛ, nyɛtsɔmɔ jalɛ [nyɔji].” (Rom. 6:11, 16-18) Kadimɔ akɛ bɔfo lɛ kɛɛ, ‘wɔjɛ wɔtsuii fiaa mli wɔbo toi.’ Enɛ tsɔɔ lɛɛlɛŋ akɛ, kɛ́ wɔjɔɔ wɔhe nɔ wɔha Yehowa lɛ, wɔtsɔmɔɔ ‘jalɛ nyɔji.’

5. Mɛni wɔ fɛɛ wɔwuɔ wɔshiɔ, ni mɛni hewɔ?

5 Fɛɛ sɛɛ lɛ, nibii komɛi yɛ ni baanyɛ aha ewa kɛha wɔ akɛ wɔɔhi shi yɛ wɔhenɔjɔɔmɔ lɛ naa. Nibii enyɔ komɛi yɛ ni esa akɛ wɔwu wɔshi. Klɛŋklɛŋ nɔ lɛ ji nɔ ni Paulo hu wu eshi lɛ. Eŋma akɛ: “Mimligbɛ gbɔmɔ lɛ mii shɛɔ yɛ Nyɔŋmɔ mla lɛ he; shi minaa mla kroko yɛ mihenii lɛ amli ni kɛ mijwɛŋmɔ mla lɛ wuɔ ta ni eŋɔɔ mi nom ehaa esha mla lɛ ni yɔɔ mihenii lɛ amli lɛ.” (Rom. 7:22, 23) Wɔ hu emuu ni wɔyeee lɛ gbaa wɔnaa. Enɛ hewɔ lɛ, esa akɛ wɔwu wɔshi wɔheloo akɔnɔi lɛ daa. Bɔfo Petro wo wɔ hewalɛ ni wɔhi shi akɛ ‘mɛi ni eye amɛhe, shi jeee mɛi ni kɛ amɛheyeli lɛ aaafee efɔŋ nɔhaanɔ, shi moŋ akɛ Nyɔŋmɔ nyɔji.’—1 Pet. 2:16.

6, 7. Mɛɛ gbɛ nɔ Satan kɛ eje lɛ lakaa wɔ?

6 Nɔ ni ji enyɔ ni esa akɛ wɔwu wɔshi ji, je ni daimonioi lɛ kudɔɔ lɛ. Satan, ni ji je nɛŋ nɔyelɔ lɛ, miifee bɔ fɛɛ bɔ ni eeenyɛ koni eha wɔku anɔkwa ni wɔyeɔ Yehowa kɛ Yesu lɛ mli. Satan miisumɔ ni wɔsumɔ eje lɛ koni wɔtsɔmɔ enyɔji. (Nyɛkanea Efesobii 6:11, 12.) Gbɛ kome ni etsɔɔ nɔ efeɔ enɛ ji nibii ni yɔɔ eje lɛ mli ni ekɛlakaa wɔ lɛ. Bɔfo Yohane bɔ wɔ kɔkɔ akɛ: “Kɛji mɔ ko miisumɔ je lɛ, belɛ tsɛ lɛ suɔmɔ lɛ bɛ emli; ejaakɛ nɔ fɛɛ nɔ ni yɔɔ je lɛŋ lɛ, heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ, ejɛɛɛ tsɛ lɛ mli, shi moŋ je lɛ mli ejɛ.”—1 Yoh. 2:15, 16.

7 Yɛ je lɛŋ fɛɛ lɛ, mɛi miisumɔ ni amɛná nii babaoo. Satan haa mɛi susuɔ akɛ kɛ́ amɛná shika babaoo lɛ, no baaha amɛná miishɛɛ. Agbele shwapoi wujiwuji yɛ he fɛɛ he. Jarayeli he adafitswai haa mɛi nuɔ he akɛ esa akɛ amɛná nibii babaoo ni amɛjie amɛhiɛtserɛ. Mɛi ni kwɛɔ gbɛfaa nɔ lɛ toɔ gbɛjianɔ koni mɛi ayashɛra shi yɛ hei ni yɔɔ fɛo, ni bei pii lɛ, mɛi ni yaa lɛ ateŋ mɛi pii susuɔ nii ahe tamɔ je lɛ. Anɔkwa, he fɛɛ he ni obaatsɔ lɛ, nɔ ni akɛɔ nɔŋŋ ji, bɔɔ mɔdɛŋ ni oye omanye yɛ shihilɛ mli—shi aatsɔɔ omanye ni aaaye yɛ je lɛ mli.

8, 9. Mɛni ewaaa kwraa akɛ eeeba mɔ ko nɔ, ni mɛni hewɔ?

 8 Yɛ klɛŋklɛŋ afii 100 lɛ mli lɛ, Petro bɔ Kristofoi lɛ kɔkɔ yɛ mɛi ni yɔɔ asafoi lɛ amli ni susuɔ nii ahe tamɔ je lɛ ahe akɛ: “Amɛbuɔ daa ahoshwibɔɔ akɛ nii ni ŋɔɔ; mujiatsɛmɛi ní he yɔɔ taŋ ni; amɛbɔɔ ahoshwi yɛ amɛgbɛdũi lɛ amli, beni amɛkɛ nyɛ yeɔ nii lɛ. Ejaakɛ akɛni naafuu wiemɔi wuji jeɔ amɛnaa hewɔ lɛ, amɛtsɔɔ heloo akɔnɔi anɔ amɛkɛ nyenyeŋtswibɔɔ lakaa mɛi ni je mɛi ni baa amɛjeŋ yɛ shishiumɔ mli adɛŋ etsɛko lɛ; amɛwoɔ amɛ shi akɛ amɛaaye amɛhe, tsɛ amɛ diɛŋtsɛ lɛ fitemɔ nyɔji ji amɛ; ejaakɛ mɔ ni eye mɔ ko nɔ lɛ, lɛ nɔŋŋ enyɔŋ ji lɛ.”—2 Pet. 2:13, 18, 19.

9 Kɛ́ mɔ ko tiu “hiŋmɛii lɛ asɛɛdii nii” lɛ asɛɛ lɛ, no haŋ ená heyeli. Shi moŋ, ebaatsɔ Satan Abonsam, ni ji je nɛŋ nuŋtsɔ lɛ nyɔŋ. (1 Yoh. 5:19) Ewaaa kwraa akɛ mɔ ko aaatsɔ nyɔŋ eha heloonaa nii asɛɛtiumɔ. Ni ebaawa akɛ mɔ ko ni eyaje nyɔŋyeli nɛɛ shishi lɛ aaaye ehe.

NITSUMƆ NI HAA MƆ TSUI NYƆƆ EMLI

10, 11. Ŋmɛnɛ lɛ, namɛi titri Satan ejie ehiɛ eka, ni mɛɛ gbɛ nɔ yunivɛsiti ni ayaa lɛ baanyɛ aha ewa kɛha amɛ akɛ amɛaasɔmɔ Yehowa?

10 Ŋmɛnɛ hu lɛ, Satan ejie ehiɛ eka mɛi ni bɛ niiashikpamɔ tsɔ lɛ taakɛ efee yɛ Eden abɔɔ lɛ mli lɛ. Mɛi titri ni ejie ehiɛ eka ji oblahii kɛ oblayei. Satan náaa oblahii kɛ oblayei kɛ mɛi fɛɛ ni tuɔ amɛhe amɛhaa Yehowa akɛ nyɔji lɛ ahe miishɛɛ kwraa. Nyɔŋmɔ henyɛlɔ lɛ sumɔɔɔ ni mɛi fɛɛ ni ejɔɔ amɛhe nɔ amɛha Yehowa lɛ yaa nɔ amɛyeɔ Yehowa anɔkwa.

11 Nyɛhaa wɔsusua nyɔŋ lɛ ni ha agbu etoi lɛ he ekoŋŋ wɔkwɛa. Nyɔŋ nɛɛ toi ni agbu lɛ baaha epiŋ fioo, shi etsɛŋ ni esɛɛ baafo, ni no sɛɛ lɛ ebaatsɔ okadi ni tsɔɔ akɛ ekpɛ mli akɛ ebaaya nɔ esɔmɔ enuŋtsɔ lɛ. Nakai nɔŋŋ ebaanyɛ efee nɔ ni wa kɛha oblanyo loo oblayoo ko akɛ eeekɔ gbɛ ko ni yɔɔ srɔto kwraa yɛ enanemɛi anɔ he. Satan haa mɛi susuɔ akɛ kɛ́ amɛná nitsumɔ yɛ eje lɛ mli lɛ, amɛbaaná miishɛɛ, shi esa akɛ Kristofoi aha ehi amɛjwɛŋmɔŋ akɛ, ja amɛtiu mumɔŋ nibii asɛɛ dani amɛtsui baanyɔ amɛmli. Yesu wie akɛ: “Mɛi ni le akɛ mumɔŋ nibii ahe miihia amɛ lɛ yɛ miishɛɛ.” (Mat. 5:3, NW) Kristofoi ni ejɔɔ amɛhe nɔ amɛha Nyɔŋmɔ lɛ feɔ Nyɔŋmɔ suɔmɔnaa nii, shi jeee Satan. Amɛmii shɛɔ Yehowa mla lɛ he, ni amɛjwɛŋɔ nɔ shwane kɛ nyɔɔŋ. (Nyɛkanea Lala 1:1-3.) Shi ŋmɛnɛ lɛ, yunivɛsiti yaa haaa Yehowa tsuji aná be ni amɛkɛjwɛŋ nii anɔ, ni amɛsɔmɔ Yehowa hu.

12. Ŋmɛnɛ lɛ, mɛɛ yiŋ ebiɔ ni oblahii kɛ oblayei babaoo akpɛ?

 12 Kɛ́ Kristofonyo ko ni ji nyɔŋ lɛ yɛ nuŋtsɔ ni ji je lɛŋ nyo lɛ, ebaanyɛ ewa kɛha lɛ akɛ eeesɔmɔ Nyɔŋmɔ. Beni Paulo ŋma e-klɛŋklɛŋ wolo lɛ eyaha Korintobii lɛ, ekɛɛ akɛ: “Kɛ́ [nyɔŋ] jio ni atsɛo jiŋŋ, kaaha miidɔo; shi kɛ́ ooonyɛ ohe oye lɛ, bɔɔ he mɔdɛŋ.” (1 Kor. 7:21) Kɛ́ nyɔŋ ko yɛ nuŋtsɔ ko ni ejeee Kristofonyo, ni eeha eewa kɛmiiha lɛ akɛ esɔmɔ Nyɔŋmɔ lɛ, no lɛ ehi jogbaŋŋ akɛ kɛ́ ená hegbɛ ni ekɛaaye ehe lɛ, efee nakai. Ŋmɛnɛ lɛ, yɛ maji babaoo anɔ lɛ, awo mla akɛ mɔ fɛɛ mɔ kɛ afii pɔtɛɛ ko aya skul dani ekpɛ mli akɛ ebaatsa nɔ loo etsaaa nɔ. Kɛ́ skulnyo lɛ gbe naa ni ekpɛ mli akɛ ebaaya yunivɛsiti koni no aha ená nitsumɔ yɛ je lɛ mli lɛ, ebaawa kɛha lɛ akɛ ekɛ ehe aaawo be fɛɛ sɔɔmɔ nitsumɔ lɛ mli.—Nyɛkanea 1 Korintobii 7:23.

Mɛɛ nuŋtsɔ obaasɔmɔ akɛ nyɔŋ?

ANI OBAAKƆ YUNIVƐSITI WOLOKASEMƆ ALOO WOLOKASEMƆ NI HI FE FƐƐ LƐ?

13. Mɛɛ wolokasemɔ yeɔ ebuaa Yehowa tsuji waa?

13 Paulo bɔ Kristofoi ni yɔɔ Kolose lɛ kɔkɔ akɛ: “Nyɛkwɛa nyɛhe ni ahia, koni mɔ ko kɛ jeŋ nilee kɛ yaka shishiumɔ akaŋɔ nyɛ nom, yɛ gbɔmɛi ablemasaji kɛ je nɛŋ shishijee nibii ni jeee Kristo lɛ anaa.” (Kol. 2:8) Ŋmɛnɛ lɛ, tsɔɔlɔi babaoo tsɔɔ “jeŋ nilee kɛ yaka shishiumɔ . . . yɛ gbɔmɛi ablemasaji” anaa. Yɛ tsɔɔmɔi nɛɛ ni atsɔɔ yɛ yunivɛsiti lɛ fɛɛ sɛɛ lɛ, bei pii lɛ, beni mɛi baagbe naa lɛ amɛkaseko ninenaa nitsumɔ ko, ni no hewɔ lɛ amɛleee bɔ ni amɛaafee amɛkpee shihilɛ mli naagbai anaa. Shi Yehowa tsuji halaa wolokasemɔ ni baaye abua amɛ ni amɛkase ninenaa nitsumɔ ko ni baaha amɛshihilɛ afee mlɛo, koni amɛnyɛ amɛsɔmɔ Nyɔŋmɔ. Amɛboɔ ŋaa ni Paulo wo Timoteo lɛ toi. Ekɛɛ akɛ: “Lɛɛlɛŋ, ninámɔ kpeteŋkpele ji Nyɔŋmɔjamɔ, kɛji mɔ ko mii shɛ enii ahe lɛ. Shi kɛ́ wɔyɛ ŋmaa kɛ hehaanii kɛkɛ lɛ, esa akɛ wɔmii ashɛ he.” (1 Tim. 6:6, 8) Yɛ nɔ najiaŋ ni anɔkwa Kristofoi aaatao yunivɛsiti yijiemɔ woji koni akɛ gbɛ́i wuji atsɛ amɛ lɛ, amɛsumɔɔ moŋ ni amɛkɛ amɛnyɛmɔ fɛɛ ashiɛ koni amɛná “yijiemɔ woji,” ni ji mɛi ni amɛye amɛbua ni amɛbatsɔmɔ Yesu kaselɔi lɛ.—Nyɛkanea 2 Korintobii 3:1-3.

14. Taakɛ Filipibii 3:8 lɛ tsɔɔ lɛ, te Paulo bu hegbɛ ni ená akɛ esɔmɔ Nyɔŋmɔ kɛ Kristo akɛ nyɔŋ lɛ eha tɛŋŋ?

14 Wɔbaanyɛ wɔkase nɔ ko kɛjɛ bɔfo Paulo nɔkwɛmɔnɔ lɛ mli. Yudafoi a-Mlalelɔ Gamaliel ni tsɔɔ lɛ nii. Wolokasemɔ  ni Paulo nine shɛ nɔ lɛ tamɔ ŋmɛnɛ yunivɛsiti wolokasemɔ nɔŋŋ. Shi beni Paulo kɛ nɔ ni ekase lɛ to hegbɛ ni ená akɛ esɔmɔ Nyɔŋmɔ kɛ Kristo akɛ nyɔŋ lɛ he lɛ, te ena lɛ tɛŋŋ? Eŋma akɛ: “Mibuɔ fɛɛ laajemɔ nii yɛ Kristo Yesu, mi-Nuŋtsɔ lɛ, he nilee ni fe fɛɛ lɛ hewɔ.” Ni ekɛshi sɛɛ akɛ: “Lɛ ehewɔ ni nii fɛɛ ebɔ mi, ni mibuɔ amɛ akɛ tumu nɔ nii, koni Kristo moŋ afee minɔ.” (Fil. 3:8) Bɔ ni Paulo mu saji anaa lɛ yeɔ ebuaa Kristofoi oblahii kɛ oblayei kɛ amɛfɔlɔi koni amɛkɛ hiɛshikamɔ akpɛ amɛyiŋ yɛ wolokasemɔ ni amɛbaahala lɛ he. (Kwɛmɔ mfonirii lɛ.)

OBAANYƐ ONÁ WOLOKASEMƆ NI HI FE FƐƐ LƐ HE SƐƐ

15, 16. Mɛɛ wolokasemɔ Yehowa asafo lɛ kɛhaa wɔ, ni mɛni ji yiŋtoo pɔtɛɛ ni yɔɔ sɛɛ?

15 Mɛɛ shihilɛi yaa nɔ yɛ yunivɛsitii babaoo amli? Bei pii lɛ, mɛi ni yɔɔ jɛmɛ lɛ tseɔ amralo lɛ kɛ skul onukpai lɛ ahiɛ atua. (Efe. 2:2) Shi Yehowa asafo lɛ kɛ wolokasemɔ ni hi fe fɛɛ lɛ haa wɔ yɛ asafoi ni toiŋjɔlɛ yɔɔ mli lɛ amli. Wɔteŋ mɔ fɛɛ mɔ baanyɛ ená Teokrase Sɔɔmɔ Skul ni afeɔ daa otsi lɛ he sɛɛ. Ayɛ skul krɛdɛi kɛha nyɛmimɛi hii oshijafoi ni ji gbɛgbalɔi (Biblia Skul Kɛha Nyɛmimɛi Hii Oshijafoi) kɛ ekroko hu kɛha gbalashihilɛ mli hefatalɔi ni ji gbɛgbalɔi (Biblia Skul Kɛha Kristofoi Gbalashihilɛ mli Hefatalɔi). Skul srɔtoi nɛɛ fɛɛ yeɔ ebuaa wɔ koni wɔbo Yehowa, wɔ-Nuŋtsɔ ni yɔɔ ŋwɛi lɛ toi.

16 Wɔbaanyɛ wɔná anɔkwale lɛ he nilee babaoo hu kɛjɛ Watch Tower Publications Index lɛ loo Watchtower Library ni akɛwo CD nɔ lɛ mli. Yiŋtoo pɔtɛɛ ni yɔɔ wolokasemɔ nɛɛ sɛɛ ji ni eye ebua wɔ ni wɔjá Yehowa. Agbɛnɛ hu, wolokasemɔ nɛɛ haa wɔleɔ bɔ ni wɔɔfee wɔye wɔbua mɛi koni amɛha akpata amɛ kɛ Nyɔŋmɔ teŋ. (2 Kor. 5:20) No sɛɛ lɛ, mɛi ni wɔtsɔɔ amɛ nii lɛ hu baanyɛ atsɔɔ mɛi krokomɛi anii.—2 Tim. 2:2.

NƆ NI AKƐBAAJURO NYƆŊ LƐ

17. Kɛ́ wɔhala wolokasemɔ ni hi fe fɛɛ lɛ, mɛɛ sɛɛ wɔnáa?

17 Yɛ Yesu abɛbua ni kɔɔ talentai lɛ ahe lɛ mli lɛ, ewie akɛ aha nyɔji anɔkwafoi enyɔ lɛ ahekoo, ni no ha amɛ kɛ amɛnuŋtsɔ lɛ fɛɛ ná miishɛɛ, ni amɛnuŋtsɔ lɛ juro amɛ kɛ nitsumɔ babaoo. (Nyɛkanea Mateo 25:21, 23.) Kɛ́ wɔhala wolokasemɔ ni hi fe fɛɛ lɛ ŋmɛnɛ lɛ, ebaaha wɔná miishɛɛ, ni abaajuro wɔ hu. Akɛ nɔkwɛmɔnɔ lɛ, nyɛmi nuu ko ni atsɛɔ lɛ Michael lɛ bɔ mɔdɛŋ yɛ skul waa. Beni etsɔɔlɔi lɛ kɛ lɛ kpe koni amɛkɛ lɛ asusu bɔ ni ebaafee ená yunivɛsiti ko lɛ he lɛ, amɛnaa kpɛ amɛhe waa akɛ ekpɛ eyiŋ akɛ eyaŋ yunivɛsiti. Yɛ no najiaŋ lɛ, Michael hala akɛ ebaaya skul ko ni baaha ekɛ be kukuoo akase ninenaa nitsumɔ. Enɛ ye ebua lɛ ni enyɛ ekwɛ ehe, ni enyɛ ekɛ ehe wo gbɛgbamɔ nitsumɔ lɛ mli. Ani enu he akɛ ekpɛ yiŋ ni ejaaa? Ekɛɛ akɛ: “Teokrase tsɔsemɔ ni miná akɛ gbɛgbalɔ, kɛ agbɛnɛ hu, akɛ asafoŋ onukpa lɛ, eye ebua mi waa.” Ekɛfata he akɛ: “Jɔɔmɔi kɛ sɔɔmɔ hegbɛi ni miná lɛ hi kwraa fe shika ni kulɛ maná lɛ. Eŋɔɔ minaa waa akɛ miyaaa yunivɛsiti.”

18. Mɛni hewɔ esa akɛ ohala wolokasemɔ ni hi fe fɛɛ lɛ?

18 Wolokasemɔ ni hi fe fɛɛ lɛ haa wɔleɔ Nyɔŋmɔ suɔmɔnaa nii, ni eyeɔ ebuaa wɔ ni wɔsɔmɔ Yehowa akɛ nyɔji. Ehaa wɔnáa hiɛnɔkamɔ akɛ wɔsɛɛ lɛ, ‘wɔbaaye wɔhe kɛjɛ fitemɔ nyɔŋyeli mli,’ ni naagbee kwraa lɛ, wɔbaaya “Nyɔŋmɔ bii lɛ anunyam heyeli lɛ mli.” (Rom. 8:21) Nɔ ni fe fɛɛ lɛ, no ji gbɛ ni hi fe fɛɛ ni wɔɔtsɔ nɔ wɔtsɔɔ akɛ wɔsumɔɔ Yehowa, wɔ-Nuŋtsɔ ni yɔɔ ŋwɛi lɛ lɛɛlɛŋ.—2 Mose 21:5..