Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  August 2013

Sanebimɔi ni Jɛ Kanelɔi Adɛŋ

Sanebimɔi ni Jɛ Kanelɔi Adɛŋ

Ani eja gbɛ akɛ fɔlɔi ni ji Kristofoi lɛ kɛ amɛbi ni ashwie lɛ lɛ baata he kome yɛ asafoŋ kpeei ashishi?

Ehe ehiaaa ni wɔhao wɔhe yɛ he ni esa akɛ mɔ ko ni ashwie lɛ lɛ ata yɛ Maŋtsɛyeli Asa lɛ nɔ lɛ he. Buu-Mɔɔ lɛ etee nɔ ewo fɔlɔi ni ji Kristofoi lɛ hewalɛ koni amɛye amɛbua amɛbi ni ashwie lɛ ni kã he ekɛ amɛ yɔɔ shĩa lɛ yɛ mumɔŋ kɛ́ eeehi. Taakɛ atsɔɔ yɛ November 15, 1988 Blɔfo Buu-Mɔɔ, baafa 19 kɛ 20 lɛ, fɔlɔi baanyɛ amɛkɛ amɛbii ni darako ni ashwie amɛ ni amɛkɛ amɛ yɔɔ shĩa lolo lɛ akase Biblia lɛ po. Afeɔ enɛ kɛ gbɛkpamɔ lɛ akɛ, no baaye abua gbekɛ lɛ ni ejaje gbɛ ni ekɔ lɛ.

Naagba ko bɛ he akɛ gbekɛ ni ashwie lɛ lɛ baata shi dioo yɛ efɔlɔi amasɛi yɛ Maŋtsɛyeli Asa lɛ nɔ. Akɛni ejeee mla akɛ mɛi ni ashwie amɛ lɛ ata sɛɛgbɛ yɛ Maŋtsɛyeli Asa lɛ nɔ hewɔ lɛ, kɛji gbekɛ ko ni edako shi ashwie lɛ lɛ ta efɔlɔi amasɛi lɛ, esaaa akɛ mɔ ko wieɔ eshiɔ, ekɔɔɔ he eko he ni amɛtara. Eka shi faŋŋ akɛ, beni fɔlɔi lɛ yaa nɔ amɛyeɔ amɛbuaa amɛbi lɛ ni esaa ekɛ Yehowa teŋ lɛ, amɛbaasumɔ ni amɛna kɛji eeeja nɔ ni yaa nɔ yɛ asafoŋ kpeei lɛ ashishi lɛ sɛɛ mo. No hewɔ lɛ, kɛji gbekɛ lɛ ta amɛmasɛi lɛ, no moŋ baaye abua amɛ fe kɛ́ eta he kroko.

Shi kɛ́ gbekɛ ni edako ni ashwie lɛ lɛ kɛ efɔlɔi bɛ shĩa dɔŋŋ hu? Ani enɛ tsɔɔ akɛ enyɛŋ ekɛ efɔlɔi ata he kome? Be ko ni eho lɛ, Buu-Mɔɔ lɛ tsɔɔ bɔ ni esa akɛ Kristofonyo kɛ ewekunyo ko ni ashwie lɛ ni ekɛ lɛ bɛ shĩa kome mli lɛ abɔ aha lɛ mli faŋŋ. * Shi srɔtofeemɔ agbo yɛ mɔ ko ni ashwie lɛ ni baata ewekumɛi amasɛi beni asafoŋ kpeei miiya nɔ, kɛ nakai mɔ lɛ ni amɛkɛ lɛ aaabɔ yɛ gbɛ ni esaaa nɔ lɛ teŋ. Kɛ́ mɔ ni ashwie lɛ lɛ wekumɛi ni yɔɔ asafo lɛ mli lɛ kɛ lɛ yeɔ yɛ gbɛ ni sa nɔ, ni amɛbɔɔ mɔdɛŋ akɛ amɛbaabo Ŋmalɛ naa ŋaawoo ni kɔɔ bɔ ni esa akɛ amɛkɛ lɛ abɔ lɛ toi lɛ, no lɛ ehe ehiaaa ni wɔhao wɔhe yɛ he ni mɔ ni ashwie lɛ lɛ baata lɛ he.1 Kor. 5:11, 13; 2 Yoh. 11.

Kɛ́ mɔ ko ni ashwie lɛ lɛ ta ewekunyo ko loo asafoŋnyo ko masɛi, ni ehaaa naagba ko lɛ, no lɛ esaaa akɛ wɔsusuɔ akɛ naagba yɛ he. Kɛ́ wɔwo mla yɛ he ni esa akɛ mɔ ko ata yɛ asafoŋ kpeei ashishi lɛ he lɛ, ebaanyɛ ekɛ naagba aba yɛ shihilɛi komɛi amli. Kɛ́ mɛi fɛɛ ni eba asafoŋ kpee lɛ, ni mɔ ni ashwie lɛ lɛ wekumɛi ni yɔɔ asafo lɛ mli lɛ fata he lɛ bɔ mɔdɛŋ akɛ amɛkɛ Biblia mli shishitoo mlai ni kɔɔ bɔ ni esa akɛ akɛ mɛi ni ashwie lɛ aye aha lɛ baatsu nii, ni amɛnifeemɔ lɛ etooo mɔ ko pampi lɛ, ehe ebahiaŋ ni agba he naa yɛ he ni esa akɛ mɔ ko ata yɛ Kristofoi akpeei ashishi lɛ he. *

^ kk. 5 Kwɛmɔ September 15, 1981 Blɔfo Buu-Mɔɔ, baafa 29 kɛ 30 lɛ.

^ kk. 6 Akɛ sane nɛɛ miiye nɔ ni aŋma yɛ April 1, 1953 Blɔfo Buu-Mɔɔ, baafa 223 lɛ najiaŋ.