Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) AUGUST 2013

Fɔlɔi—Nyɛtsɔsea Nyɛbii lɛ Kɛjɛa Amɛbifabiiaŋ

Fɔlɔi—Nyɛtsɔsea Nyɛbii lɛ Kɛjɛa Amɛbifabiiaŋ

BIBLIA lɛ kɛɔ akɛ: “Naa, Yehowa gboshinii ni ehaa ji bii, ni nikeenii ji musuŋbii.” (Lala 127:3) No hewɔ lɛ, ebɛ naakpɛɛ akɛ fɔlɔi ni ji Kristofoi lɛ náa miishɛɛ waa kɛ́ amɛfɔ.

Shi yɛ miishɛɛ nɛɛ fɛɛ sɛɛ lɛ, fɔmɔ lɛ kɛ sɔ̃ kpele bafɔ̃ɔ fɔlɔi lɛ anɔ. Kɛ́ gbekɛ ko baada ni ebatsɔ onukpa ni yɔɔ gbɔmɔtsoŋ hewalɛ kpakpa lɛ, esa akɛ ená niyenii kpakpa eye daa. Nakai nɔŋŋ kɛ́ gbekɛ lɛ he baawa yɛ anɔkwa jamɔ mli lɛ, esa akɛ aha lɛ mumɔŋ niyenii kpakpai, ní efɔlɔi lɛ abɔ mɔdɛŋ amɛkɛ gbɛtsɔɔmɔ ni sa aha lɛ. (Abɛi 1:8) Mɛɛ be esa akɛ aje tsɔsemɔ nɛɛ shishi, ni mɛni ebiɔ?

 GBƐTSƆƆMƆ HE MIIHIA FƆLƆI

Susumɔ Manoa ni jɛ Dan akutso lɛ mli ni hi blema Israel maŋ ni atsɛɔ lɛ Zora lɛ mli lɛ he okwɛ. Yehowa bɔfo ko kɛɛ Manoa ŋa ni ji kene lɛ akɛ ebaafɔ binuu. (Koj. 13:2, 3) Ekã shi faŋŋ akɛ, nuu anɔkwafo Manoa kɛ eŋa lɛ mii shɛ amɛhe waa yɛ bi ni akɛɛ amɛbaafɔ lɛ hewɔ. Kɛlɛ amɛyɛ naagba ko hu. No hewɔ lɛ, Manoa sɔle akɛ: “Oo Nuŋtsɔ [Yehowa], miikpao fai, ha Nyɔŋmɔ gbɔmɔ lɛ ni otsu lɛ eba wɔŋɔɔ ekoŋŋ, ní ebatsɔɔ wɔ bɔ ni wɔɔtsɔ wɔhiɛ gbekɛ lɛ ni abaafɔ lɛ wɔha!” (Koj. 13:8) Bɔ ni Manoa kɛ eŋa lɛ baafee amɛtsɔse gbekɛ lɛ ji nɔ ni kã amɛtsui nɔ. Ŋwanejee ko bɛ he akɛ, amɛtsɔɔ amɛbi Samson Nyɔŋmɔ mla lɛ, ni amɛtsɔsemɔ lɛ wo yibii kpakpai. Biblia lɛ kɛɔ akɛ: “Ni Yehowa Mumɔ lɛ bɔ̃i [Samson he] taa.” Enɛ ha Samson, ni batsɔ Israel kojolɔi lɛ ateŋ mɔ kome lɛ tsu hewalɛ nibii babaoo.Koj. 13:25; 14:5, 6; 15:14, 15.

Manoa sɔle koni atsɔɔ lɛ bɔ ni esa akɛ amɛtsɔse bi ni amɛbaafɔ lɛ amɛha

Mɛɛ be esa akɛ abɔi gbekɛ lɛ tsɔsemɔ? Timoteo nyɛ Eunike kɛ enaa Loise kɛ “ŋmalɛi krɔŋkrɔŋi lɛ” tsɔse lɛ ‘kɛjɛ ebifabiiaŋ.’ (2 Tim. 1:5; 3:15) Hɛɛ, akɛ Ŋmalɛ lɛ bɔi Timoteo tsɔsemɔ beni eji abifao beebe.

Nilee yɛ mli akɛ fɔlɔi ni ji Kristofoi lɛ baasɔle kɛbi gbɛtsɔɔmɔ, ni amɛtsɔ hiɛ amɛto gbɛjianɔ koni amɛnyɛ amɛje amɛbii lɛ atsɔsemɔ shishi ‘kɛjɛ amɛbifabiiaŋ.’ Abɛi 21:5 lɛ kɛɔ akɛ: “Mɔdɛŋbɔlɔ jwɛŋmɔi lɛ, nifalɛ sɔŋŋ ekɛbaa.” Ŋwanejee ko bɛ he akɛ, fɔlɔi bɔɔ mɔdɛŋ akɛ amɛbaasaa amɛhe jogbaŋŋ dani afɔ́ gbekɛ lɛ. Ekolɛ, amɛbaaŋmala nibii ni he baahia gbekɛ lɛ fɛɛ yɛ wolo nɔ po. Ehe miihia ni amɛto bɔ ni amɛaafee amɛkɛ Nyɔŋmɔ wiemɔ lɛ atsɔse lɛ lɛ hu he gbɛjianɔ. Oti ni esa akɛ amɛkɛma amɛhiɛ ji, amɛbaaje tsɔsemɔ nɛɛ shishi mra beni gbekɛ lɛ ji abifao.

Wolo ko (Early Childhood Counts—A Programming Guide on Early Childhood Care for Development) wie akɛ: ‘Nyɔji ni nyiɛ abifao ko fɔmɔ sɛɛ nɔŋŋ lɛ ji be ni ansɔ lɛ kɛsaa. Yɛ be nɛɛ mli lɛ, nyɛmɔ ni ansɔ lɛ yɔɔ ni ekɛmɔmɔɔ nibii lɛ yaa hiɛ toi 20.’ Enɛ hewɔ lɛ, esa akɛ fɔlɔi adu Nyɔŋmɔ wiemɔ lɛ amɛwo amɛbii lɛ amli yɛ nɛkɛ be kukuoo ni ansɔ lɛ kɛsaa lɛ mli!

Nyɛmi yoo ko ni ji daa gbɛgbalɔ lɛ wie yɛ ebiyoo fioo ko he akɛ: “Beni eye nyɔɔŋ kome pɛ ni mikɛ lɛ bɔi shiɛmɔyaa. Eyɛ mli akɛ enuuu nɔ ni yaa nɔ lɛ shishi moŋ, shi mile akɛ enɛ ná enɔ hewalɛ waa. Beni eyeɔ afii enyɔ lɛ, ekɛ dɛhiɛmɔ woji miiha mɛi ni wɔkɛkpeɔ yɛ shiɛmɔ nitsumɔ lɛ mli lɛ.”

Kɛ́ fɔlɔi tsɔse amɛbii kɛjɛ amɛbifabiiaŋ lɛ, ewoɔ yibii kpakpai. Shi fɔlɔi le akɛ amɛnaŋ enɛ feemɔ mlɛo be fɛɛ be.

‘HEMƆ BE’

Bɔ ni gbekɛbii nyɛɛɛ ata shi diŋŋ be kplaŋŋ lɛ baanyɛ afee naagba wulu kɛha fɔlɔi. Gbekɛbii nyɛɛɛ amɛkɛ amɛjwɛŋmɔ ama nɔ kome nɔ be kplaŋŋ. Ejaakɛ amɛsumɔɔ ni amɛle nɔ fɛɛ nɔ he sane. Mɛni fɔlɔi baanyɛ afee kɛye amɛbua amɛbii lɛ ni amɛjwɛŋmɔ anyɛ amɔ nibii ni amɛtsɔɔ amɛ lɛ?

Susumɔ nɔ ni Mose wie yɛ 5 Mose 6:6, 7 lɛ he okwɛ. Ewie akɛ: “Nɛkɛ wiemɔi nɛɛ ni miwoɔo he kita ŋmɛnɛ gbi nɛɛ akã otsui nɔ, ni ojwɛŋ nɔ otsɔɔ obii, ni owie he, beni ota shi yɛ oshĩa lɛ kɛ beni onyiɛ gbɛ teŋ kɛ beni okã shi kɛ beni ote shi.” Hebri wiemɔ ni atsɔɔ shishi akɛ “ojwɛŋ nɔ otsɔɔ” lɛ biɔ ni atsɔɔ mɔ ko nɔ ko shii abɔ. Gbekɛbii tamɔ tsofɔ ko ni ebaabi ni ashwie nɔ nu kpitiokpitio. Akɛni niiamlitĩi yeɔ ebuaa onukpai ni amɛkaiɔ saji ni he hiaa hewɔ lɛ, eka shi faŋŋ akɛ niiamlitĩi baaye abua gbekɛbii hu!

Kɛ́ fɔlɔi miitao amɛtsɔɔ amɛbii Nyɔŋmɔ he anɔkwa saji lɛ, ebaabi ni amɛná be amɛha amɛ. Yɛ jeŋ ni dekã bɛ mli kwraa nɛɛ mli lɛ, ebɛ mlɛo akɛ fɔlɔi aaaná be amɛha amɛbii. Shi bɔfo Paulo wo wɔ ŋaa akɛ ‘wɔhe be’ kɛtsu Kristofoi anifeemɔi ni he hiaa lɛ ahe nii. (Efe. 5:15, 16, NW) Te fɔlɔi aaafee tɛŋŋ afee enɛ lɛ? Ehe bahia ni Kristofonyo ko ni eji asafoŋ onukpa ni eŋa hu ji daa gbɛgbalɔ lɛ ato gbɛjianɔ jogbaŋŋ koni ená be ni sa kɛtsɔse ebi, ená be kɛtsu eteokrase sɔ̃i ahe nii, ni nakai beaŋ nɔŋŋ lɛ, ená be kɛtsu  eheloonaa nitsumɔ. Te amɛaafee tɛŋŋ amɛná be kɛtsɔse amɛbiyoo lɛ? Tsɛ lɛ kɛɛ akɛ: “Daa leebi dani maya nitsumɔ lɛ, mikɛ miŋa kaneɔ Mi-Wolo ni Gbaa Biblia Mli Saji loo Ŋmalɛi lɛ Amli ni Wɔɔkwɛ Daa wolo lɛ wɔhaa lɛ. Gbɛkɛ lɛ, wɔbɔɔ mɔdɛŋ akɛ wɔbaakane wolo ko wɔha lɛ dani ewɔ, ni kɛ́ wɔmiiya shiɛmɔ lɛ, wɔkɛ lɛ yaa. Wɔsumɔɔɔ akɛ wɔŋmɛɔ ehe yɛ ewalashihilɛ mli klɛŋklɛŋ afii nɛɛ amli.”

‘BII TAMƆ GAIMLIBII’

Wɔmiisumɔ ni wɔbii lɛ adara kɛbatsɔmɔ onukpai kpakpai. Kɛlɛ, yiŋtoo titri hewɔ ni wɔtsɔseɔ amɛ lɛ ji ni wɔha amɛjɛ amɛtsuiŋ amɛsumɔ Nyɔŋmɔ.Mar. 12:28-30.

Lala 127:4 lɛ kɛɔ akɛ: “Bɔ ni gaimlibii yɔɔ yɛ ekãalɔ dɛŋ lɛ, nakai oblahiiaŋ bihii yɔɔ.” No hewɔ lɛ, gbekɛbii tamɔ gaimlibii ni esa akɛ atsɛ̃rɛ amɛ jogbaŋŋ kɛyashɛ oti ko he. Kɛ́ gaitsɛlɔ ko tsɛ gai lɛ, enyɛŋ egbala sɛɛ dɔŋŋ. “Gaimlibii,” ni ji gbekɛbii lɛ, hiɔ amɛfɔlɔi adɛŋ be kukuoo ko pɛ. Esa akɛ fɔlɔi lɛ adu Biblia mli shishitoo mlai amɛwo amɛtsui kɛ amɛjwɛŋmɔ mli yɛ nɛkɛ be nɛɛ mli.

Bɔfo Yohane ŋma yɛ ebii ni eyɔɔ yɛ Kristo mli lɛ ahe akɛ: “Mibɛ miishɛɛ ni fa fe enɛ akɛ manu akɛ mibii lɛ nyiɛɔ anɔkwale mli.” (3 Yoh. 4) Kɛ́ fɔlɔi ni ji Kristofoi lɛ na akɛ amɛbii lɛ ‘miinyiɛ anɔkwale lɛ mli’ lɛ, amɛ hu amɛbaaná miishɛɛ nakai nɔŋŋ.