Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ) JULY 2013

Atsɔ Mɛi Fioo Nɔ Alɛ Mɛi Babaoo

Atsɔ Mɛi Fioo Nɔ Alɛ Mɛi Babaoo

‘Yesu kumɔ aboloo lɛ mli, ni eŋɔha ekaselɔi lɛ, ni ekaselɔi lɛ ŋɔha asafoi lɛ.’MAT. 14:19.

1-3. Tsɔɔmɔ gbɛ nɔ ni Yesu tsɔ elɛ asafo babaoo ko yɛ Betsaida. (Kwɛmɔ mfoniri ni yɔɔ nikasemɔ lɛ shishijee lɛ.)

FEEMƆ shihilɛ ni nyiɛ sɛɛ nɛɛ he mfoniri okwɛ. (Nyɛkanea Mateo 14:14-21.) No mli lɛ eshwɛ fioo ni abaaye Hehoo lɛ yɛ afi 32 Ŋ.B. Asafo babaoo ko ni hii aaafee 5,000 kɛ yei kɛ gbekɛbii ni aleee amɛyibɔ lɛ fata Yesu kɛ ekaselɔi lɛ ahe yɛ ŋa ko nɔ yɛ akrowa ko ni kã Galilea Ŋshɔ lɛ kooyigbɛ ni atsɛɔ lɛ Betsaida lɛ mli.

2 Beni Yesu na asafo babaoo lɛ, emusuŋ tsɔ lɛ yɛ amɛhewɔ, no hewɔ lɛ etsa helatsɛmɛi ni yɔɔ amɛteŋ lɛ, ni etsɔɔ amɛ Nyɔŋmɔ Maŋtsɛyeli lɛ he nii babaoo. Beni je bɔi namɔ lɛ, Yesu kaselɔi lɛ bakɛɛ lɛ koni ewo asafo lɛ gbɛ ni amɛya akrowai ni bɛŋkɛ lɛ amli amɛyahe niyenii. Shi Yesu kɛɛ ekaselɔi lɛ akɛ: “Nyɛhaa amɛ nii amɛyea.” Eeenyɛ efee akɛ nɔ ni ewie lɛ ha ekaselɔi lɛ ahiɛ fee amɛ yaa, ejaakɛ no mli lɛ, nɔ ko fioo pɛ amɛyɔɔ—aboloi enumɔ kɛ loi bibii enyɔ.

3 Yesu musuŋ tsɔ lɛ ni efee naakpɛɛ nii—enɛ pɛ ji naakpɛɛ nii ni Sanekpakpa ŋmalɔi ejwɛ lɛ fɛɛ bɔ he amaniɛ. (Mar. 6:35-44; Luka 9:10-17; Yoh. 6:1-13) Yesu ha ekaselɔi lɛ kɛɛ asafo babaoo lɛ ní amɛtara shi kuikui yɛ ohahai kɛ nyɔŋmai enumɔenumɔi amli yɛ jwɛifɔ lɛ nɔ. Ni beni ejɔɔ aboloi lɛ kɛ loi lɛ anɔ lɛ sɛɛ lɛ, ekumɔ mli. No sɛɛ lɛ, yɛ nɔ najiaŋ ni Yesu diɛŋtsɛ aaaŋɔ aboloi lɛ eha asafoi lɛ, ‘eŋɔha ekaselɔi lɛ, ni ekaselɔi lɛ hu ŋɔha asafoi lɛ.’ Naakpɛɛ sane ji akɛ, mɔ fɛɛ mɔ ná eko eye ni eko po shwɛ! Bo lɛ susumɔ he okwɛ: Yesu tsɔ mɛi fioo, ni ji ekaselɔi lɛ anɔ elɛ mɛi akpei abɔ. *

4. (a) Mɛɛ niyenii kã Yesu tsui nɔ waa akɛ ekɛaaha, ni mɛni hewɔ? (b) Mɛni he wɔbaasusu yɛ nikasemɔ nɛɛ kɛ nɔ ni nyiɛ sɛɛ lɛ mli?

4 Shi no mli lɛ nɔ ni kã Yesu tsui nɔ waa moŋ  ji bɔ ni eeefee eha esɛɛnyiɛlɔi lɛ mumɔŋ niyenii, ni ji Nyɔŋmɔ Wiemɔ lɛ mli anɔkwalei lɛ. Ele akɛ anɔkwalei ni yɔɔ Nyɔŋmɔ Wiemɔ lɛ mli lɛ haa mɔ náa naanɔ wala. (Yoh. 6:26, 27; 17:3) Bɔ ni Yesu musuŋ tsɔ lɛ ni no ha ekɛ aboloo kɛ loo lɛ asafoi lɛ, nakai nɔŋŋ emusuŋ tsɔ lɛ ni ekɛ ŋmɛlɛtswai babaoo tsɔɔ esɛɛnyiɛlɔi lɛ anii. (Mar. 6:34) Shi ele hu akɛ be ni ebaaye yɛ shikpɔŋ nɛɛ nɔ lɛ faaa, ni akɛ ebaaku esɛɛ kɛya ŋwɛi ekoŋŋ. (Mat. 16:21; Yoh. 14:12) Te Yesu aaafee tɛŋŋ elɛ esɛɛnyiɛlɔi ni yɔɔ shikpɔŋ lɛ nɔ lɛ jogbaŋŋ yɛ mumɔŋ beni etee ŋwɛi lɛ? Ebaatsɔ gbɛ ni etsɔ nɔ elɛ amɛ beni eyɔɔ shikpɔŋ lɛ nɔ lɛ nɔŋŋ nɔ—ebaatsɔ mɛi fioo nɔ elɛ mɛi babaoo. Shi namɛi baafee mɛi fioo nɛɛ? Nyɛhaa wɔkwɛa gbɛ ni Yesu tsɔ mɛi fioo nɔ elɛ esɛɛnyiɛlɔi babaoo ni afɔ amɛ mu ni hi shi yɛ klɛŋklɛŋ afii 100 lɛ mli lɛ. No sɛɛ lɛ, wɔbaasusu sanebimɔ ko ni he hiaa wɔteŋ mɔ fɛɛ mɔ nɛɛ he yɛ nikasemɔ ni nyiɛ sɛɛ lɛ mli akɛ: Te wɔɔfee tɛŋŋ wɔyɔse mɛi fioo ni Kristo tsɔɔ amɛnɔ elɛɔ wɔ ŋmɛnɛ lɛ?

Atsɔ mɛi fioo nɔ alɛ mɛi akpei abɔ (Kwɛmɔ kuku 4)

YESU HALA MƐI FIOO LƐ

5, 6. (a) Mɛɛ yiŋ ko ni he hiaa waa Yesu kpɛ koni nɔ ko he akahia esɛɛnyiɛlɔi lɛ yɛ mumɔŋ yɛ egbele sɛɛ? (b) Mɛɛ gbɛ nɔ Yesu tsɔ esaa ebɔfoi lɛ eto bɔni afee ni amɛtsu nitsumɔ ko ni he hiaa waa yɛ egbele sɛɛ?

5 Weku yitso ni susuɔ eweku lɛ he waa lɛ toɔ gbɛjianɔ koni kɛ́ egbo lɛ nɔ ko he akahia eweku lɛ. Nakai nɔŋŋ Yesu—mɔ ni batsɔ Kristofoi asafo lɛ yitso yɛ sɛɛ mli lɛ—to gbɛjianɔ koni nɔ ko he akahia esɛɛnyiɛlɔi lɛ yɛ mumɔŋ yɛ egbele sɛɛ. (Efe. 1:22) Akɛ nɔkwɛmɔnɔ lɛ, beni eshwɛ aaafee afii enyɔ dani Yesu baagbo lɛ, ekpɛ yiŋ ko ni he hiaa waa. Ehala mɛi fioo ni ebaatsɔ amɛnɔ elɛ mɛi babaoo lɛ ateŋ klɛŋklɛŋbii lɛ. Susumɔ nɔ ni ba lɛ he okwɛ.

6 Beni Yesu eshi kpe nyɔɔŋnyɔɔŋ fɛɛ kɛsɔle lɛ, ebua ekaselɔi lɛ fɛɛ anaa ni ehala amɛteŋ mɛi 12 akɛ ebɔfoi. (Luka 6:12-16) Yɛ afii enyɔ ni nyiɛ be nɛɛ sɛɛ lɛ amli lɛ, ekɛ mɛi 12 lɛ bɔ gbagbalii, ni etsɔ ewiemɔ kɛ enifeemɔ nɔ etsɔɔ amɛ nii. Ele akɛ nibii babaoo yɛ ni esa akɛ amɛkase lolo, ni no hewɔ lɛ, atee nɔ atsɛ amɛ ‘kaselɔi.’ (Mat. 11:1; 20:17) Ewo amɛ ŋaa, ni ekɛ be babaoo tsɔse amɛ yɛ sɔɔmɔ nitsumɔ lɛ mli. (Mat. 10:1-42; 20:20-23; Luka 8:1; 9:52-55) Eka shi faŋŋ akɛ, no mli lɛ eesaa amɛ eeto nitsumɔ ko ni he hiaa waa ni amɛbaatsu beni egbo ni eku esɛɛ kɛtee ŋwɛi lɛ sɛɛ.

7. Mɛɛ gbɛ nɔ Yesu ha ana nɔ titri ni ebɔfoi lɛ baatsu?

7 Mɛɛ nitsumɔ bɔfoi lɛ baatsu? Beni eshwɛ fioo ni afi 33 Ŋ.B. Pentekoste gbi lɛ baashɛ lɛ, ebafee faŋŋ akɛ bɔfoi lɛ baatsu ‘nɔkwɛmɔ nitsumɔ’ ko. (Bɔf. 1:20) Shi mɛni titri amɛbaatsu? Beni atee Yesu shi lɛ sɛɛ lɛ, sane ko ni ekɛ Petro gba lɛ haa anaa nɔ ni amɛbaatsu. (Nyɛkanea Yohane 21:1, 2, 15-17.) Yesu kɛɛ Petro yɛ bɔfoi lɛ ekomɛi ahiɛ akɛ: “Lɛɛ mitooi lɛ!” Yesu ha efee faŋŋ akɛ ebɔfoi lɛ baafata mɛi fioo ni ebaatsɔ amɛnɔ ekɛ mumɔŋ niyenii aha mɛi babaoo lɛ ahe. Enɛ tsɔɔ lɛɛlɛŋ akɛ Yesu dɔɔ ‘etooi lɛ’ ahe waa! *

ALƐ MƐI BABAOO LƐ KƐJƐ PENTEKOSTE GBI LƐ NƆ KƐYAA

8. Mɛɛ gbɛ nɔ mɛi ni batsɔmɔ héyelilɔi yɛ Pentekoste gbi lɛ nɔ lɛ tsɔɔ akɛ amɛyɔse gbɛ ni Kristo tsɔɔ nɔ ekɛ mumɔŋ niyenii haa lɛ faŋŋ?

8 Kɛjɛ afi 33 Ŋ.B. Pentekoste gbi lɛ nɔ lɛ, Kristo ni atee lɛ shi lɛ tsɔ ebɔfoi lɛ anɔ elɛ ekaselɔi krokomɛi ni afɔ amɛ mu lɛ. (Nyɛkanea Bɔfoi lɛ Asaji 2:41, 42.) Yudafoi kɛ jeŋmajiaŋbii ni ebatsɔmɔ Yudafoi ni batsɔmɔ Kristofoi, ni akɛ mumɔ fɔ amɛ mu nakai gbi lɛ fɛɛ yɔse faŋŋ  akɛ bɔfoi lɛ ji mɛi ni Yesu tsɔɔ amɛnɔ elɛɔ amɛ lɛ. Kɛkɛ ni ‘amɛtee nɔ amɛhiɛ bɔfoi lɛ atsɔɔmɔ lɛ mli.’ Woloŋlelɔ ko tsɔɔ mli akɛ, Hela feemɔwiemɔ ni atsɔɔ shishi akɛ ‘amɛtee nɔ amɛhiɛ mli’ lɛ baanyɛ atsɔɔ “he ni akɛkpɛtɛɔ nifeemɔ pɔtɛɛ ko he ni agbugbaaa.” Héyelilɔi hei nɛɛ miishwe waa koni amɛle Nyɔŋmɔ Wiemɔ lɛ mli anɔkwalei lɛ, ni amɛle mɛi tuuntu ni baatsɔɔ amɛ anɔkwalei nɛɛ. Amɛtee nɔ amɛkwɛ bɔfoi lɛ agbɛ ní amɛgbala Yesu wiemɔi kɛ enifeemɔi lɛ amli amɛtsɔɔ amɛ, ní amɛgbala ŋmalɛi ni kɔɔ ehe lɛ hu mli amɛtsɔɔ amɛ. *Bɔf. 2:22-36.

9. Mɛɛ gbɛ nɔ bɔfoi lɛ haaa nɔ ko nɔ ko agbala amɛjwɛŋmɔ kɛjɛ amɛnitsumɔ akɛ amɛlɛ Yesu tooi lɛ he?

9 Bɔfoi lɛ haaa nɔ ko nɔ ko agbala amɛjwɛŋmɔ kɛjɛ amɛnitsumɔ akɛ amɛlɛ Yesu tooi lɛ he. Akɛ nɔkwɛmɔnɔ lɛ, kwɛmɔ bɔ ni amɛtsu sane ko ni eji akwɛɛɛ ni ahi kulɛ ekɛ mligbalamɔ baaba asafo hee ní ato shishi lɛ mli lɛ he nii amɛha. Naakpɛɛ sane ji akɛ, sane lɛ kɔɔ niyenii he—heloonaa niyenii. Bei pii lɛ, hiɛ kpaa yei okulafoi ni ji Helenibii lɛ anɔ yɛ daa niyenii ni ajaa lɛ mli, shi hiɛ kpaaa yei okulafoi ni ji Hebribii lɛ anɔ. Te bɔfoi lɛ tsu naagba nɛɛ he nii amɛha tɛŋŋ? “Mɛi nyɔŋma kɛ enyɔ lɛ” hala hii kpawo ni sa koni amɛkwɛ “nitsumɔ ni he hiaa,” ni ji niyenii lɛ jaa lɛ nɔ. Bɔfoi lɛ—ní eka shi faŋŋ akɛ amɛteŋ tsiimɔ fata mɛi ni Yesu ha amɛkɛ niyenii lɛ ha asafoi lɛ ahe lɛ—yɔse akɛ ehe miihia ni amɛkɛ amɛjwɛŋmɔ ama mumɔŋ niyenii ni amɛkɛaaha lɛ moŋ nɔ. No hewɔ lɛ, amɛtu amɛhe amɛha “wiemɔ lɛ he sɔɔmɔ lɛ” moŋ.Bɔf. 6:1-6.

10. Mɛɛ gbɛ nɔ Kristo kɛ bɔfoi lɛ kɛ onukpai lɛ ni yɔɔ Yerusalem lɛ tsu nii?

10 Beni shɛɔ afi 49 Ŋ.B. lɛ, asafoŋ onukpai krokomɛi ni sa ebafata bɔfoi lɛ ateŋ mɛi ni yɔɔ wala mli lolo lɛ ahe. (Nyɛkanea Bɔfoi lɛ Asaji 15:1, 2.) “Bɔfoi lɛ kɛ onukpai lɛ ni yɔɔ Yerusalem lɛ” sɔmɔ akɛ gbɛtsɔɔmɔ kuu. Kristo, ni ji asafo lɛ Yitso lɛ tsɔ hii ni sa ni feɔ kuu fioo nɛɛ nɔ etsu saji ni kɔɔ Kristofoi ahemɔkɛyeli lɛ he lɛ he nii, ni eha amɛkwɛ Maŋtsɛyeli lɛ he sanekpakpa lɛ shiɛmɔ kɛ etsɔɔmɔ lɛ nɔ.Bɔf. 15:6-29; 21:17-19; Kol. 1:18.

11, 12. (a) Mɛni tsɔɔ akɛ Yehowa jɔɔ gbɛjianɔtoo ni e-Bi lɛ tsɔ nɔ elɛ klɛŋklɛŋ afii 100 lɛ mli asafoi lɛ nɔ? (b) Mɛɛ gbɛ nɔ ayɔse gbɛjianɔtoo ni Kristo tsɔ nɔ ekɛ mumɔŋ niyenii ha lɛ faŋŋ?

11 Ani Yehowa jɔɔ gbɛjianɔtoo ni e-Bi  lɛ tsɔ nɔ elɛ klɛŋklɛŋ afii 100 lɛ mli asafoi lɛ nɔ? Aahu! Mɛni hewɔ wɔkɛɔ nakai? Bɔfoi lɛ Asaji lɛ bɔ amaniɛ akɛ: “Shi beni amɛkpaa maji lɛ anɔ lɛ, amɛkɛ mlai ní bɔfoi lɛ kɛ onukpai lɛ ní yɔɔ Yerusalem lɛ wo lɛ ha amɛ, koni amɛye nɔ. Agbɛnɛ asafoi lɛ ná hewalɛ yɛ hemɔkɛyeli mli, ni amɛyi fáa daa nɛɛ.” (Bɔf. 16:4, 5) Kadimɔ akɛ, nakai asafoi lɛ shwere akɛni amɛtee nɔ amɛbo gbɛtsɔɔmɔ kuu ni yɔɔ Yerusalem lɛ toi lɛ hewɔ. Ani enɛ etsɔɔɔ faŋŋ akɛ Yehowa jɔɔ gbɛjianɔtoo ni e-Bi lɛ tsɔ nɔ elɛ asafoi lɛ nɔ? Esa akɛ wɔkai akɛ, Yehowa jɔɔmɔ pɛ ji nɔ ni haa Nyɔŋmɔ webii náa toiŋjɔlɛ ni amɛshwereɔ.Abɛi 10:22; 1 Kor. 3:6, 7.

12 No hewɔ lɛ, kɛbashi he ni wɔshɛ nɛɛ, wɔna akɛ Yesu tsɔ gbɛ pɔtɛɛ ko nɔ elɛ esɛɛnyiɛlɔi lɛ: Etsɔ mɛi fioo nɔ elɛ mɛi babaoo. Ayɔse gbɛ ni etsɔɔ nɔ ekɛ mumɔŋ niyenii haa lɛ faŋŋ. Kɛfata he lɛ, bɔfoi lɛ—ni ji mɛi diɛŋtsɛ ni akɛto gbɛtsɔɔmɔ kuu lɛ shishi lɛ—fee nibii ni tsɔɔ akɛ Nyɔŋmɔ miifi amɛsɛɛ. Bɔfoi lɛ Asaji 5:12 lɛ kɛɔ akɛ: “Atsɔ bɔfoi lɛ aniji anɔ afee okadii kɛ naakpɛɛ nii pii yɛ maŋ lɛ mli.” * No hewɔ lɛ, mɛi ni batsɔmɔ Kristofoi lɛ yɔse mɛi tuuntu ni Kristo tsɔɔ amɛnɔ elɛɔ etooi lɛ. Shi beni shɛ klɛŋklɛŋ afii 100 lɛ naagbee lɛ, nibii tsake kwraa.

Yɛ klɛŋklɛŋ afii 100 lɛ mli lɛ, ana mɛi ni Yesu tsɔɔ amɛnɔ elɛɔ asafo lɛ faŋŋ (Kwɛmɔ kuku 12)

BE NI JWƐI LƐ BAFA FE ŊMAA LƐ

13, 14. (a) Mɛni Yesu gba akɛ ebaaba Kristofoi asafo lɛ nɔ, ni mɛɛ be enɛ bɔi mli baa? (b) Nɛgbɛ nɔ ni agba akɛ ebaaba asafo lɛ nɔ lɛ baajɛ kɛba? (Kwɛmɔ saji ni sa kadimɔ lɛ.)

13 Yesu gba akɛ amale Kristofoi baabafutu Kristofoi asafo lɛ. Kaimɔ akɛ, yɛ abɛbua ni kɔɔ ŋmaa lɛ kɛ jwɛi lɛ he lɛ mli lɛ, Yesu gba akɛ abaadu jwɛi (amale Kristofoi) afutu ŋmaa ni kpaako adu (Kristofoi ni afɔ amɛ mu) lɛ mli. Ewie akɛ, abaaŋmɛ kui enyɔ lɛ fɛɛ gbɛ ni amɛkwɛ̃ shi kome—ní ataaa amɛhe kɛyashi ŋmaakpamɔ be lɛ, ni ji ‘nibii agbɛjianɔtoo ko naagbee’ lɛ. (Mat. 13:24-30, 36-43) Eyeee be ko ni nɔ ni Yesu wie lɛ bɔi mli baa. *

14 Hemɔkɛyeli kwamɔ lɛ je shishi yɛ klɛŋklɛŋ afii 100 lɛ mli, shi Yesu bɔfoi anɔkwafoi lɛ ‘tsĩ enɛ gbɛ,’ ni amɛhaaa mɛi kɛ apasa tsɔɔmɔi afutu anɔkwa jamɔ mli. (2 Tes. 2:3, 6, 7) Shi beni bɔfoi lɛ fɛɛ egboi sɛɛ lɛ, hemɔkɛyeli kwamɔ lɛ he shi ni eshwere be kplaŋŋ, ni etee nɔ afii ohai abɔ. Kɛfata he lɛ, yɛ nakai be lɛ mli lɛ, jwɛi lɛ ayi bafa kwraa fe ŋmaa fioo lɛ. No mli lɛ, gbɛ pɔtɛɛ ko bɛ ni atsɔɔ nɔ akɛ mumɔŋ niyenii haa. Shi enɛ tsake yɛ sɛɛ mli. Mɛɛ be?

NAMƆ BAALƐ MƐI LƐ YƐ ŊMAAKPAMƆ BE LƐ MLI?

15, 16. Mɛni jɛ hiɛdɔɔ ni Biblia Kaselɔi lɛ kɛkase Ŋmalɛ lɛ mli kɛba, ni mɛɛ sanebimɔ enɛ teɔ lɛ shi?

15 Beni ŋmaakpamɔ be lɛ bɛŋkɛɔ lɛ, no mli lɛ mɛi babaoo ená Biblia mli anɔkwale lɛ he miishɛɛ. Kaimɔ akɛ, yɛ afi 1870 afii lɛ amli lɛ, kuu fioo ko ni miitao anɔkwale lɛ to Biblia kasemɔ kui ashishi, ni amɛtse amɛhe kɛjɛ jwɛi lɛ—amale Kristofoi fɛɛ ni yɔɔ sɔlemɔi srɔtoi lɛ kɛ Kristendom kui srɔtoi lɛ amli lɛ ahe. Biblia Kaselɔi nɛɛ to amɛtsui shi kɛpɛi Ŋmalɛ lɛ mli, ni amɛjɛ heshibaa mli amɛkpɛlɛ anɔkwalei hei ni amɛnaa lɛ anɔ.Mat. 11:25.

16 Hiɛdɔɔ ni Biblia Kaselɔi lɛ kɛkase Ŋmalɛ lɛ wo yibii waa. Nakai hii kɛ yei anɔkwafoi lɛ kpa apasa tsɔɔmɔi lɛ ahe mama, ni amɛgbɛ anɔkwale lɛ amɛshwã kɛtsɔ Biblia kasemɔ woji ni amɛkala ní amɛjara kɛtee hei srɔtoi babaoo lɛ nɔ. Amɛnitsumɔ lɛ sa mɛi babaoo ni miitao ale Biblia mli anɔkwale lɛ atsui he.  Enɛ ha sanebimɔ ko shi akɛ: Ani Biblia Kaselɔi ni hi shi yɛ afii ni tsɔ afi 1914 lɛ hiɛ lɛ amli lɛ ji mɛi ni Kristo baatsɔ amɛnɔ elɛ etooi lɛ? Dabi. No mli lɛ dumɔnii lɛ miikwɛ̃ lolo, ni kpaako gbɛjianɔtoo ni abaatsɔ nɔ akɛ mumɔŋ niyenii aha lɛ baajie ehe kpo. Be ni abaabua amale Kristofoi ni jwɛi lɛ feɔ amɛhe mfoniri lɛ anaa kɛjɛ anɔkwa Kristofoi ni ŋmaa lɛ feɔ amɛhe mfoniri lɛ ateŋ lɛ shɛko.

17. Mɛɛ nifeemɔi komɛi ni he hiaa bɔi mlibaa kɛjɛ afi 1914?

17 Taakɛ wɔkase yɛ nikasemɔ ni tsɔ hiɛ lɛ mli lɛ, ŋmaakpamɔ be lɛ je shishi yɛ afi 1914. Yɛ nakai afi lɛ mli lɛ, nifeemɔi komɛi ni he hiaa waa bɔi mlibaa. Awo Yesu Maŋtsɛ, ni naagbee gbii lɛ je shishi. (Kpoj. 11:15) Kɛjɛ afi 1914 kɛyashi afi 1919 shishijee gbɛ lɛ, Yesu fata e-Tsɛ he kɛbasara mumɔŋ sɔlemɔwe lɛ, ni amɛtsuu he. * (Mal. 3:1-4) Ni kɛjɛ afi 1919 lɛ, abɔi ŋmaa lɛ naabuamɔ. Ani be eshɛ ni Kristo baatsɔ gbɛjianɔtoo pɔtɛɛ ko nɔ ekɛ mumɔŋ niyenii aha? Hɛɛ!

18. Mɛni Yesu gba akɛ ebaafee, ni mɛɛ sanebimɔ ko ni he hiaa waa te shi beni naagbee gbii lɛ je shishi lɛ?

18 Yɛ Yesu gbalɛ ni kɔɔ naagbee gbii lɛ ahe lɛ mli lɛ, egba akɛ ebaatsɔ gbɛ pɔtɛɛ ko nɔ ekɛ mumɔŋ niyenii aha “yɛ be ni sa nɔ.” (Mat. 24:45-47) Mɛɛ gbɛ ebaatsɔ nɔ? Taakɛ Yesu fee yɛ klɛŋklɛŋ afii 100 lɛ mli lɛ, ebaasaa etsɔ mɛi fioo ko nɔ elɛ mɛi babaoo. Shi beni naagbee gbii lɛ je shishi nɔŋŋ lɛ, sanebimɔ ko ni he hiaa waa ni te shi ji, Namɛi baafee mɛi fioo nɛɛ? Abaasusu sanebimɔ nɛɛ kɛ sanebimɔi krokomɛi ni kɔɔ Yesu gbalɛ lɛ he lɛ ahe yɛ nikasemɔ ni nyiɛ sɛɛ lɛ mli.

 

^ kk. 3 Kuku 3: Sɛɛ mli beni Yesu tsɔ naakpɛɛ gbɛ nɔ elɛ hii 4,000 kɛ yei kɛ gbekɛbii ni aleee amɛyibɔ lɛ, esaa eŋɔ niyenii lɛ eha “ekaselɔi lɛ, ni ekaselɔi lɛ ŋɔha asafoi lɛ.”—Mat. 15:32-38.

^ kk. 7 Kuku 7: ‘Tooi’ ni esa akɛ alɛ amɛ beni Petro yɔɔ wala mli lɛ fɛɛ hiɛ kã nɔ akɛ amɛbaaya ŋwɛi.

^ kk. 8 Kuku 8: Anɔkwale ni eji akɛ héyelilɔi hei lɛ ‘tee nɔ amɛhiɛ bɔfoi lɛ atsɔɔmɔ lɛ mli’ lɛ tsɔɔ akɛ bɔfoi lɛ tsɔɔ nii be fɛɛ be. Aŋmala bɔfoi lɛ atsɔɔmɔi lɛ ekomɛi awo woji ni ajɛ mumɔŋ aŋma ni amrɔ nɛɛ amɛfata Kristofoi a-Hela Ŋmalɛi lɛ ahe lɛ mli.

^ kk. 12 Kuku 12: Eyɛ mli akɛ mɛi krokomɛi ni fataaa bɔfoi lɛ ahe lɛ hu ná mumɔŋ duromɔ keenii moŋ, shi etamɔ nɔ ni bei pii lɛ, akɛhaa mɛi tɛ̃ɛ beni bɔfoi lɛ ateŋ mɔ ko yɛ jɛmɛ, loo ekolɛ bɔfoi lɛ eko ji mɔ ni kɛhaa lɛ.—Bɔf. 8:14-18; 10:44, 45.

^ kk. 13 Kuku 13: Bɔfo Paulo wiemɔi ni yɔɔ Bɔfoi lɛ Asaji 20:29, 30 lɛ tsɔɔ akɛ hemɔkɛyeli kwamɔ ni agba akɛ ebaaba lɛ baajɛ hei enyɔ. Klɛŋklɛŋ lɛ, amale Kristofoi (“jwɛi”) “baabote” anɔkwa Kristofoi lɛ ‘ateŋ.’ Nɔ ni ji enyɔ lɛ, hii ni wieɔ “nii ni ejaaa” aaate shi yɛ anɔkwa Kristofoi lɛ ‘ateŋ.’

^ kk. 17 Kuku 17: Kwɛmɔ Buu-Mɔɔ nɛɛ baafa 11, kuku 6 lɛ.