Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) MAY 2013

 WALA SHIHILƐ HE SANE

Nɔ Hewɔ ni Wɔhe Yɔɔ Sɛɛnamɔ Lɛ

Nɔ Hewɔ ni Wɔhe Yɔɔ Sɛɛnamɔ Lɛ

BENI mifɔ́ mibinuu Gary yɛ afi 1958 mli lɛ, mina amrɔ nɔŋŋ akɛ ebɛ hewalɛ. Shi ehé datrɛfoi lɛ nyɔji nyɔŋma dani amɛna hela ni yeɔ lɛ, ni ehe afii enumɔ kroko hu dani London datrɛfoi ni he esa waa lɛ ma nɔ ni klɛŋklɛŋ datrɛfoi lɛ ná lɛ nɔ mi. Shi mitsui kumɔ waa beni yɛ afii nɛɛhu sɛɛ lɛ, mifɔ́ Louise, ní lɛ hu okadii pii tsɔɔ akɛ eyɛ hela ko ni mli wa kwraa fe Gary nɔ lɛ.

Datrɛfoi lɛ kɛ mlihilɛ kɛɛ mi akɛ: “Obii enyɔ lɛ fɛɛ miiye LMBB * hela lɛ eko.” Nakai beaŋ lɛ, nɔ ko fioo pɛ ale yɛ fɔmɔ mli hela nɛɛ he. Hela nɛɛ he okadii komɛi ji, nii ni anaaa jogbaŋŋ ni haa ashwilaa yɛ sɛɛ mli, shwi ni ashwiɔ fe nine, nine loo nane waobii ni faa fe enumɔ, sikli hela, wuiaŋ hela, kɛ sabai amli helai kɛ ekrokomɛi. No hewɔ lɛ, mina akɛ mibii lɛ akwɛmɔ ebafeŋ mlɛo kwraa. Niiamlitaomɔ ko ni afee nyɛsɛɛ nɛɛ tsɔɔ akɛ, mɛi 125,000 mli mɔ kome ni yɔɔ Britain lɛ yɛ hela nɛɛ eko, tsɛ ekolɛ mɛi babaoo hu yɛ eko shi emli waaa tsɔ.

YEHOWA BAFEE ‘WƆBOBAAHE’

Beni mibote gbalashihilɛ mli etsɛɛɛ lɛ, mikɛ Yehowa Odasefonyo ko gba sane, ni amrɔ nɔŋŋ lɛ miyɔse akɛ amɛ ji mɛi ni tsɔɔ anɔkwale lɛ. Shi miwu bɛ anɔkwale lɛ he miishɛɛ kwraa. Yɛ enitsumɔ hewɔ lɛ, wɔhiii he kome, no hewɔ lɛ minyɛɛɛ mikɛ asafo ko abɔ. Shi mitee nɔ mikane Biblia lɛ ni misɔle miha Yehowa hu. Beni mikane akɛ, “Yehowa aaatsɔ abobaahe aha mɔ ni awaa lɛ yi lɛ, abobaahe yɛ fimɔ bei amli,” ni akɛ, ‘ekwaaa mɛi ni taoɔ esɛɛgbɛ lɛ,’ eshɛje mimii waa!—Lala 9:10, 11.

Akɛni Gary enaaa nii jogbaŋŋ hewɔ lɛ, beni ená afii ekpaa lɛ akɛ lɛ tee skul krɛdɛɛ ko ni awɔɔ jɛmɛ yɛ England wuoyigbɛ. Etswaa mi yɛ be kɛ beaŋ ni ekɛɔ mi nibii ni gbaa enaa, ni mikɛ lɛ susuɔ Biblia mli shishitoo mlai ni sa lɛ ahe yɛ tɛlifoŋ lɛ nɔ. Beni mifɔ́ Louise lɛ sɛɛ afii komɛi lɛ, hela ko ni haa mɔ kumɔɔ kɛ eko hu ni haa mɔ wuiaŋ kpeɔ lɛ bamɔ mi hu. Gary jɛ skul lɛ eba shĩa beni eye afii 16. Shi ehiŋmɛi bɔi enaa gbamɔ waa, ni yɛ afi 1975 lɛ abu lɛ akɛ shwilafo. Miwu hu shi wɔ yɛ afi 1977.

Beni Gary ba shĩa lɛ sɛɛ etsɛɛɛ lɛ, wɔkɛ asafo ko bɔi bɔɔ waa, ni abaptisi mi yɛ afi 1974. Mihiɛ sɔ yelikɛbuamɔ ni asafoŋ onukpa ko kɛha Gary koni enyɛ ekpee tsakemɔi ni ba eshihilɛ mli beni eye afii 13 kɛmiimɔ afii 19 lɛ. Odasefoi krokomɛi ye amɛbua mi kɛ shĩa nifeemɔi, ni sɛɛ mli lɛ, maŋ lɛ nitsumɔhe ni kwɛɔ maŋbii ahilɛkɛhamɔ nɔ lɛ hala nyɛmimɛi nɛɛ ateŋ mɛi enumɔ akɛ wɔyelikɛbualɔi, ni awoɔ amɛ nyɔmɔ. Enɛ bafee jɔɔmɔ diɛŋtsɛ kɛha wɔ!

Gary tee ehiɛ yɛ anɔkwale lɛ mli, ni abaptisi lɛ yɛ afi 1982. Gbɛgbalɔi awamɔ nitsumɔ lɛ kã etsui nɔ waa. No hewɔ lɛ, mikpɛ miyiŋ akɛ mafata ehe kɛtsu, ni mifee nakai afii babaoo. Be ko sɛɛ lɛ, wɔkpokpaa nɔkwɛlɔ lɛ bi mibinuu lɛ akɛ, “Gary, mɛni hewɔ okɛ ohe wooo gbɛgbamɔ nitsumɔ lɛ mli lɛ?” Ni enɛ ha emii shɛ ehe waa. Enɛ nɔŋŋ ji hewalɛwoo ni he hiaa Gary, ni yɛ afi 1990 lɛ, etsɔ daa gbɛgbalɔ.

 Afee Gary joŋku opireshɛŋ shii enyɔ sɔŋŋ, klɛŋklɛŋ nɔ lɛ yɛ afi 1999, ni nɔ ni ji enyɔ lɛ yɛ afi 2008, shi gbɔmɔtsoŋ naagbai ni Louise kɛkpe lɛ naa wa waa. Beni mifɔ́ lɛ lɛ eshwila, ni beni mina akɛ enane kome hiɛ waobii ekpaa lɛ, miyɔse akɛ lɛ hu eeye LMBB hela lɛ eko. Etsɛɛɛ ni datrɛfoi lɛ na akɛ naagba yɛ egbɔmɔtso lɛ mli nibii babaoo he. Yɛ afii ni eho lɛ amli lɛ, afee lɛ opireshɛŋ wuji srɔtoi, ni afee enumɔ yɛ esabai ahe. Lɛ hu eeye sikli hela tamɔ Gary nɔŋŋ.

Akɛni Louise le naagbai ni baanyɛ aba yɛ opireshɛŋfeemɔ mli hewɔ lɛ, etsɔɔ hiɛ ekɛ datrɛfoi kɛ mɛi ni kwɛɔ lɛ lɛ wieɔ, ni egbalaa nɔ hewɔ ni esumɔŋ ni ehe lá lɛ mli etsɔɔ amɛ. Enɛ hewɔ lɛ, mɛi ni kwɛɔ lɛ lɛ fɛɛ kɛ lɛ yeɔ jogbaŋŋ.

SHIHILƐ NI HAA MƆ TSUI NYƆƆ EMLI

Nifeemɔi titrii ni yaa nɔ yɛ wɔshĩa lɛ kɔɔ Yehowa jamɔ he. Dani ilɛtrɔnik tsɔnei aaabu lɛ, mikɛ ŋmɛlɛtswai babaoo kaneɔ nii mihaa Gary kɛ Louise. Amrɔ nɛɛ, CD, DVD, kɛ nibii srɔtoi ni wɔjieɔ kɛjɛɔ www.jw.org saiti lɛ yeɔ ebuaa wɔ ni wɔkaseɔ Biblia mli nikasemɔi kɛha otsi fɛɛ otsi lɛ, ni wɔnyɛɔ wɔkɛ wɔhe woɔ asafoŋ kpeei amli jogbaŋŋ.

Wɔhiɛ sɔɔ anɔkwalei ni nɔ bɛ ni yɔɔ Yehowa Wiemɔ ni ajɛ mumɔŋ aŋma lɛ mli lɛ waa!

Bei komɛi lɛ, Gary mɔmɔɔ saji ni ebaasumɔ ni eha amɛhetoi lɛ ewoɔ eyitsoŋ, ni kɛ́ eyɛ nifeemɔ yɛ Teokrase Sɔɔmɔ Skul lɛ mli lɛ, enyɛɔ ehaa wiemɔ ni ekwɛɛɛ nɔ ko nɔ. Awo lɛ asafoŋ sɔɔlɔ yɛ afi 1995, ni be fɛɛ be nɛɛ eetsu nɔ ko yɛ Maŋtsɛyeli Asa lɛ nɔ, ekpeɔ mɛi kɛbaa kpeei lɛ ashishi, ni ekwɛɔ tsɔne ni akɛtswaa lala lɛ nɔ.

Nyɛmimɛi lɛ waa Gary yɛ shiɛmɔ nitsumɔ lɛ mli, ni bei pii lɛ amɛtsiɔ shwiili ni etaa mli akɛni etalɔiaŋ fuɔ ni ewaa ehe lɛ hewɔ. Odasefonyo ko ye ebua lɛ ni ekɛ mɔ ko ni yɔɔ wiemɔ lɛ he miishɛɛ kase nii. Gary enyɛ eye ebua Kristofonyo ko ni fee kpɔkee afii 25 lɛ hu. Amrɔ nɛɛ, mɛi enyɔ lɛ fɛɛ baa asafoŋ kpeei.

Beni Louise ye afii nɛɛhu lɛ, ekase nilóo kɛjɛ enaa dɛŋ, ni mi kɛ mɛi ni kwɛɔ lɛ lɛ ateŋ mɔ kome tsɔɔ lɛ joromifeemɔ. Akɛni enyaa nilóo he lolo hewɔ lɛ, eloɔ kuntui fɛfɛji ehaa abifabii kɛ mɛi ni efɔ̃ nɔ yɛ afii amli ni yɔɔ asafo lɛ mli lɛ. Agbɛnɛ hu, ekɛ mfonirii bibii feɔ kaadii ní akɛmajeɔ mɛi. Mɛi ni nine shɛɔ kaadii nɛɛ anɔ lɛ ahiɛ sɔɔ waa. Beni Louise ye aaafee afii 13 kɛmiimɔ 15 lɛ, ekase bɔ ni ataipiɔ nii ahaa. Amrɔ nɛɛ, etsɔɔ kɔmpiuta krɛdɛɛ ko ni wieɔ nɔ ekɛ enanemɛi sharaa kɛtsɔ e-mail nɔ. Abaptisi Louise beni eye afii 17. Be fɛɛ be ni abaafã shiɛmɔyaa he ta krɛdɛɛ ko lɛ, wɔ fɛɛ wɔkɛ wɔhe woɔ gbɛgbalɔi awamɔ nitsumɔ lɛ mli. Taakɛ Gary feɔ lɛ, Louise hu mɔmɔɔ ŋmalɛi komɛi ewoɔ eyitsoŋ koni enyɛ ekɛtsɔɔ akɛ eyɛ hemɔkɛyeli yɛ jeŋ ko ni “aaagbele shwilafoi ahiŋmɛii” ni “maŋbii lɛ ateŋ mɔ ko ekɛŋ akɛ: Migbɔjɔ!” ni Nyɔŋmɔ ewo he shi lɛ mli.—Yes. 33:24; 35:5.

Wɔhiɛ sɔɔ anɔkwalei ni nɔ bɛ ni yɔɔ Yehowa Wiemɔ ni ajɛ mumɔŋ aŋma lɛ mli lɛ waa! Wɔhiɛ sɔɔ suɔmɔ mli ni wɔsafo lɛ mli bii lɛ jɛɔ amɛfiɔ wɔsɛɛ lɛ waa, ejaakɛ kɛ́ jeee nakai kulɛ, wɔnyɛŋ nɔ ko kwraa wɔfee. Ni titri lɛ, Yehowa eye ebua wɔ ni wɔna akɛ sɛɛnamɔ diɛŋtsɛ yɛ wɔhe.

^ kk. 5 Datrɛfoi ejwɛ ni yɔse fɔmɔ mli hela nɛɛ agbɛ́i ji nɔ ni akɛwo LMBB (Laurence-Moon-Bardet-Biedl syndrome) hela lɛ. Ŋmɛnɛ lɛ, afɔɔ hela nɛɛ tsɛmɔ akɛ Bardet-Biedl. Abɛ enaa tsabaa.