Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) APRIL 2013

‘Nyɛyoa Nii ni Hi Titri Lɛ’

‘Nyɛyoa Nii ni Hi Titri Lɛ’

‘Nyɛyoa nii ni hi titri lɛ.’—FIL. 1:10.

1, 2. Mɛɛ gbalɛ ni kɔɔ naagbee gbii lɛ ahe ekolɛ eha Yesu kaselɔi lɛ anaa kpɛ amɛhe waa, ni mɛni hewɔ?

ESHWƐ Petro, Yakobo, Yohane, kɛ Andrea kɛ amɛ-Nuŋtsɔ lɛ pɛ. Amɛmiisusu nɔ ni Yesu wie mra mli yɛ sɔlemɔtsu lɛ he lɛ he waa. (Mar. 13:1-4) No hewɔ lɛ, amɛbi lɛ akɛ: “Kɛɛmɔ wɔ, Mɛɛ be mli nibii nɛɛ baaba, ni mɛni baafee ba ni oba lɛ kɛ nibii agbɛjianɔtoo lɛ naagbee lɛ he okadi?” (Mat. 24:1-3, NW) Yesu bɔi amɛ nibii ni baaya nɔ dani abaakpata Yerusalem maŋ lɛ hiɛ, kɛ nibii ni baaya nɔ yɛ Satan nibii agbɛjianɔtoo fɔŋ lɛ naagbee gbii lɛ mli lɛ kɛɛmɔ. Eeenyɛ efee akɛ, nibii ni Yesu kɛɛ amɛ lɛ ateŋ ekome ha amɛnaa kpɛ amɛhe waa. Beni Yesu ewie shihilɛi ni jaraa tamɔ tai, hɔ̃ji, kɛ mlakwamɔ ni baafa lɛ he sɛɛ lɛ, egba akɛ nɔ ko kpakpa ko hu baakadi naagbee gbii lɛ. Ewie akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.”—Mat. 24:7-14.

2 No mli lɛ, Yesu kaselɔi lɛ fata ehe kɛmiishiɛ Maŋtsɛyeli lɛ he sanekpakpa lɛ momo. (Luka 8:1; 9:1, 2) Ekolɛ amɛkai akɛ Yesu kɛɛ akɛ: “Nikpamɔ lɛ fa, shi nitsulɔi lɛ faaa; no hewɔ lɛ nyɛkpaa nikpamɔ nuŋtsɔ lɛ fai, koni etsu nitsulɔi kɛba enikpamɔ lɛ mli.” (Luka 10:2) Shi te amɛaafee tɛŋŋ amɛshiɛ “yɛ je nɛŋ fɛɛ,” ni amɛye “jeŋmaji lɛ fɛɛ odase” lɛ? Nɛgbɛ nitsulɔi lɛ baajɛ aba? Kaselɔi lɛ nyɛŋ ayɔse naakpɛɛ gbɛ nɔ ni wiemɔi ni yɔɔ Mateo 24:14 lɛ baatsɔ aba mli lɛ kɔkɔɔkɔ!

3. Mɛɛ gbɛ nɔ Luka 21:34 lɛ baa mli ŋmɛnɛ, ni mɛɛ saji esa akɛ wɔbi wɔhe?

3 Wɔyɛ be ni Yesu gbalɛ lɛ miiná emlibaa lɛ mli. Mɛi akpekpei abɔ miishiɛ Maŋtsɛyeli lɛ he  sanekpakpa lɛ yɛ shikpɔŋ lɛ nɔ fɛɛ. (Yes. 60:22) Shi Yesu tsɔɔ akɛ, ebaawa kɛha mɛi komɛi akɛ amɛbaaha amɛhiɛ ahi amɛhe nɔ yɛ naagbee gbii nɛɛ amli. Nibii komɛi baagbala amɛjwɛŋmɔ, ni ‘ebaahe amɛtsuii.’ (Nyɛkanea Luka 21:34.) Nakai wiemɔi lɛ hu miiba mli. Nyɔŋmɔ webii lɛ ekomɛi miiha nibii komɛi miigbala amɛjwɛŋmɔ. Wɔnaa enɛ faŋŋ yɛ yiŋ ni amɛkpɛɔ yɛ nitsumɔ, wolokasemɔ ni yaa hiɛ, loo heloonaa nibii asɛɛtiumɔ, kɛ be ni amɛyeɔ kɛgbɔleɔ amɛkpɔiaŋ loo amɛkɛjieɔ amɛhiɛtserɛ he lɛ mli. Daa gbi shihilɛ mli yeyeeyefeemɔ eha eeetɔ mɛi komɛi. Bi ohe akɛ: ‘Te mishihilɛ tamɔ tɛŋŋ? Mɛni yiŋ ni mikpɛɔ yɛ shihilɛ mli lɛ haa anaa akɛ mikɛyeɔ klɛŋklɛŋ gbɛhe?’

4. (a) Mɛni he Paulo sɔle yɛ eha Kristofoi ni yɔɔ Filipi lɛ, ni mɛni hewɔ? (b) Mɛni he wɔbaasusu yɛ nikasemɔ nɛɛ kɛ nɔ ni baanyiɛ sɛɛ lɛ mli, ni te wɔbaaná he sɛɛ wɔha tɛŋŋ?

4 Ehe bahia ni klɛŋklɛŋ afii 100 lɛ mli Kristofoi lɛ amia amɛhiɛ ni amɛkɛ mumɔŋ nibii aye klɛŋklɛŋ gbɛhe daa gbi. No hewɔ ni bɔfo Paulo sɔle eha Filipibii lɛ koni ‘amɛyoo nii ni hi titri lɛ.’ (Nyɛkanea Filipibii 1:9-11.) Taakɛ Paulo fee lɛ, Kristofoi lɛ babaoo ná ‘ekãa babaoo fe tsutsu lɛ kɛjaje Nyɔŋmɔ wiemɔ lɛ ni amɛsheee gbeyei.’ (Fil. 1:12-14) Nakai nɔŋŋ ŋmɛnɛ lɛ, wɔteŋ mɛi babaoo kɛ ekãa miijaje Nyɔŋmɔ Wiemɔ lɛ. Fɛɛ sɛɛ lɛ, kɛ́ wɔsusu nibii babaoo ni atsuɔ amrɔ nɛɛ yɛ Yehowa gbɛjianɔtoo lɛ mli lɛ he lɛ, ebaanyɛ ewo wɔ hewalɛ koni wɔkɛ shiɛmɔ nitsumɔ lɛ afee oti titri yɛ wɔshihilɛ mli. Yɛ nikasemɔ nɛɛ mli lɛ, wɔbaasusu gbɛjianɔ ni Yehowa eto koni gbalɛ ni yɔɔ Mateo 24:14 lɛ aba mli lɛ he. Mɛni ji oti ni ma Yehowa gbɛjianɔtoo lɛ hiɛ, ni te enɛ ni wɔɔle lɛ baanyɛ awo wɔ kɛ wɔwekui lɛ hewalɛ eha tɛŋŋ? Wɔbaasusu nɔ ni baaye abua wɔ ni wɔmia wɔhiɛ yɛ Nyɔŋmɔ sɔɔmɔ lɛ mli ni wɔya nɔ wɔkɛ Yehowa gbɛjianɔtoo lɛ anyiɛ lɛ he yɛ nikasemɔ ni baanyiɛ sɛɛ lɛ mli.

YEHOWA GBƐJIANƆTOO LƐ FÃ NI YƆƆ ŊWƐI LƐ

5, 6. (a) Mɛni hewɔ Yehowa kɛ egbɛjianɔtoo lɛ fã ni yɔɔ ŋwɛi lɛ he ninaa ha lɛ? (b) Mɛni Ezekiel na yɛ ninaa mli?

5 Nibii pii yɛ ni Yehowa haaa aŋmala awo Biblia lɛ mli. Akɛ nɔkwɛmɔnɔ lɛ, ehaaa wɔle nibii ni kɔɔ adesa ansɔ lɛ loo jeŋ muu lɛ fɛɛ he lɛ fitsofitso, eyɛ mli akɛ kulɛ saji ni tamɔ nɛkɛ lɛ baafee miishɛɛ waa! Moŋ lɛ, Yehowa kɛ saji ni he hiaa wɔ ni baaha wɔle nɔ ni esuɔmɔnaa nii ji koni wɔhi shi yɛ naa lɛ eha wɔ. (2 Tim. 3:16, 17) Belɛ, kwɛ miishɛɛ ni eji akɛ Biblia lɛ haa wɔleɔ Yehowa gbɛjianɔtoo lɛ fã ni anaaa lɛ he nɔ ko! Wɔmii shɛɔ wɔhe waa kɛ́ wɔkane Yehowa gbɛjianɔtoo lɛ fã ni yɔɔ ŋwɛi lɛ he saji ni yɔɔ Yesaia, Ezekiel, Daniel, kɛ Kpojiemɔ woji lɛ amli lɛ. (Yes. 6:1-4; Ezek. 1:4-14, 22-24; Dan. 7:9-14; Kpoj. 4:1-11) Mɛni hewɔ Yehowa eha wɔle nibii ni yaa nɔ yɛ ŋwɛi lɛ ahe nɔ ko lɛ?

6 Yehowa miisumɔ ni ehi wɔjwɛŋmɔŋ daa akɛ, wɔfata jeŋ muu fɛɛ gbɛjianɔtoo ko he. Yehowa gbɛjianɔtoo lɛ fã ni anaaa lɛ miitsu nii waa kɛmiifee Yehowa suɔmɔnaa nii. Akɛ nɔkwɛmɔnɔ lɛ, Ezekiel na ni akɛ shwiili agbo ko efee Yehowa gbɛjianɔtoo lɛ fã ni anaaa lɛ he mfoniri yɛ ninaa ko mli. Shwiili nɛɛ joɔ foi waa, ni enyɛɔ etsakeɔ gbɛ ni enyiɛ nɔ lɛ oyayaayai. (Ezek. 1:15-21) Kɛ́ etai lɛ fo  ehe shi kome lɛ, eyaa shɔŋŋ. Ezekiel na mɔ ni ta shwiili lɛ mli lɛ hu yɛ ninaa lɛ mli. Ewie akɛ: “Mina akɛ ejije tamɔ shika ní kpɛ́ɔ; ni . . . la ebɔle lɛ kɛkpe . . . Enɛ ji Yehowa anunyam lɛ kpɛmɔ lɛ kpojiemɔ.” (Ezek. 1:25-28) Kwɛ bɔ ni Ezekiel naa baakpɛ ehe aha yɛ nɔ ni ena nɛɛ hewɔ! Ena Yehowa ni eekudɔ egbɛjianɔtoo lɛ, ni etsɔɔ emumɔ krɔŋkrɔŋ lɛ nɔ efeɔ enɛ. Bɔ ni ninaa lɛ mli shwiili lɛ tsuɔ nii ehaa lɛ haa wɔnuɔ bɔ ni Yehowa gbɛjianɔtoo lɛ fã ni yɔɔ ŋwɛi lɛ tsuɔ nii ehaa lɛ shishi jogbaŋŋ!

7. Mɛɛ hekɛnɔfɔɔ ninaa ni ajie kpo atsɔɔ Daniel lɛ haa wɔnáa?

7 Daniel hu na ninaa ko ni haa wɔnáa hekɛnɔfɔɔ yɛ Yehowa kɛ Yesu mli. Aha ena Yehowa, ni ji “mɔ ni eye gbii pii” lɛ, ni eta maŋtsɛsɛi ni lalilɛii ebɔle he nɔ. Kokrolontoi yɛ maŋtsɛsɛi lɛ he. (Dan. 7:9) Yehowa miisumɔ ni Daniel ana akɛ E-gbɛjianɔtoo lɛ miinyiɛ, ni tsɔɔ akɛ eeetsu lɛ Yehowa lɛ yiŋtoo he nii. Daniel saa ena “mɔ ko tamɔ gbɔmɔ bi,” ni ji Yesu, ni aha lɛ hegbɛ akɛ ekwɛ Yehowa gbɛjianɔtoo ni yɔɔ shikpɔŋ lɛ nɔ lɛ nɔ. Yesu nɔyeli lɛ ehiŋ shi afii fioo komɛi pɛ. Moŋ lɛ, eji ‘naanɔ nɔyeli ní hoŋ eyaŋ, ni emaŋtsɛyeli lɛ, nɔ ni fiteŋ ni.’ (Dan. 7:13, 14) Enɛ tsirɛɔ wɔ ni wɔnáa hekɛnɔfɔɔ yɛ Yehowa mli, ni wɔnaa nɔ ni etsuɔ lɛ. Ni akɛni Yehowa ji mɔ ni kɛ nɔyeli hegbɛ lɛ ha Yesu hewɔ lɛ, ninaa nɛɛ tsirɛɔ wɔ ni wɔnáa hekɛnɔfɔɔ yɛ Yesu hu mli akɛ wɔ-Hiɛnyiɛlɔ.

8. Te Yehowa gbɛjianɔtoo lɛ he ninai ni Ezekiel kɛ Yesaia na lɛ ná amɛnɔ hewalɛ eha tɛŋŋ, ni te esa akɛ ená wɔ hu wɔnɔ hewalɛ eha tɛŋŋ?

 8 Te esa akɛ Yehowa gbɛjianɔtoo lɛ he ninai nɛɛ aná wɔnɔ hewalɛ aha tɛŋŋ? Taakɛ eji yɛ Ezekiel gbɛfaŋ lɛ, wɔ hu nibii ni Yehowa tsuɔ lɛ haa wɔnaa kpɛɔ wɔhe waa. (Ezek. 1:28) Kɛ́ wɔjwɛŋ nibii ni Yehowa gbɛjianɔtoo lɛ tsuɔ lɛ nɔ lɛ, ebaanyɛ ekanya wɔ tamɔ ekanya Yesaia lɛ. Beni aha lɛ hegbɛ lɛ akɛ egba mɛi krokomɛi nɔ ni Yehowa feɔ lɛ, eshashaooo shi kwraa. (Nyɛkanea Yesaia 6:5, 8.) Yesaia ná nɔmimaa akɛ, yɛ Yehowa yelikɛbuamɔ naa lɛ, ebaanyɛ ekpee shihilɛi ni jaraa ni ekɛbaakpe lɛ fɛɛ naa. Nakai nɔŋŋ wɔ hu ninaa nɛɛ woɔ wɔ hewalɛ koni wɔfĩ Yehowa gbɛjianɔtoo lɛ sɛɛ kɛtsɔ babaoo ni wɔbaatsu yɛ Nyɔŋmɔ sɔɔmɔ lɛ mli lɛ nɔ. Kwɛ bɔ ni eji miishɛɛ sane akɛ wɔɔle akɛ wɔfata gbɛjianɔtoo ko ni kɛ hiɛdɔɔ miifee Yehowa suɔmɔnaa nii daa lɛ he!

YEHOWA GBƐJIANƆTOO LƐ FÃ NI YƆƆ SHIKPƆŊ LƐ NƆ LƐ

9, 10. Mɛni hewɔ esa akɛ aná Yehowa gbɛjianɔtoo ko yɛ shikpɔŋ lɛ nɔ lɛ?

9 Yehowa tsɔ e-Bi lɛ nɔ eto gbɛjianɔ ko yɛ shikpɔŋ nɛɛ nɔ ni kɛ nɔ ni yɔɔ ŋwɛi lɛ feɔ ekome kɛtsuɔ nii. Mɛni hewɔ esa akɛ aná gbɛjianɔtoo ko yɛ shikpɔŋ lɛ nɔ koni anyɛ atsu nitsumɔ ni Mateo 24:14 lɛ wieɔ he lɛ? Nyɛhaa wɔsusua otii etɛ komɛi ahe.

10 Klɛŋklɛŋ lɛ, Yesu kɛɛ ekaselɔi lɛ baashiɛ “kɛyashi shikpɔŋ lɛ naagbeehei lɛ.” (Bɔf. 1:8) Nɔ ni ji enyɔ lɛ, esa akɛ ato gbɛjianɔ ni abaatsɔ nɔ aha mɛi ni kɛ amɛhe baawo nitsumɔ nɛɛ mli lɛ mumɔŋ niyenii, ni akwɛ amɛ hu. (Yoh. 21:15-17) Nɔ ni ji etɛ lɛ, esa akɛ ato gbɛjianɔ hu koni mɛi ni shiɛɔ sanekpakpa lɛ akpe kɛjá Yehowa, ni atsɔɔ amɛ bɔ ni amɛaafee amɛtsu nitsumɔ lɛ. (Heb. 10:24, 25) Dani abaanyɛ afee enɛ fɛɛ lɛ, esa akɛ ato Kristo sɛɛnyiɛlɔi lɛ ahe gbɛjianɔ jogbaŋŋ.

11. Te wɔɔfee tɛŋŋ wɔfĩ Yehowa gbɛjianɔtoo lɛ sɛɛ lɛ?

11 Te wɔɔfee tɛŋŋ wɔfĩ Yehowa gbɛjianɔtoo lɛ sɛɛ lɛ? Gbɛ kome ni sa jogbaŋŋ ji, ni wɔná hekɛnɔfɔɔ yɛ mɛi ni Yehowa kɛ Yesu ehala akɛ amɛnyiɛ shiɛmɔ nitsumɔ lɛ hiɛ lɛ mli. Ŋmɛnɛ lɛ, naagbai pii yɛ je lɛ mli ni kulɛ nyɛmimɛi hii nɛɛ baanyɛ amɛkɛ amɛbe kɛ amɛnyɛmɔ atsu he nii, shi amɛfeee nakai. Kɛlɛ, mɛni ji oti titri ni ma Yehowa gbɛjianɔtoo lɛ fã ni yɔɔ shikpɔŋ lɛ nɔ lɛ hiɛ?

AMƐKƐ “NII NI HI TITRI LƐ” YEƆ KLƐŊKLƐŊ GBƐHE

12, 13. Mɛɛ gbɛ nɔ asafoŋ onukpai tsɔɔ amɛtsuɔ nitsumɔ ni akɛwo amɛdɛŋ lɛ, ni mɛni hewɔ enɛ woɔ wɔ hewalɛ waa lɛ?

12 Ahala asafoŋ onukpai ni yɔɔ niiashikpamɔ koni amɛto shiɛmɔ nitsumɔ lɛ he gbɛjianɔ ni amɛnyiɛ hiɛ yɛ maji ni amɛsɔmɔɔ yɛ mli lɛ amli. Dani nyɛmimɛi nɛɛ baakpɛ amɛyiŋ yɛ sane ko he lɛ, amɛkwɛɔ Biblia lɛ mli ni amɛhaa efeɔ ‘kane kɛhaa amɛnane kɛ la hu yɛ amɛtempɔŋ nɔ’ ni amɛsɔleɔ koni Yehowa aye abua amɛ.—Lala 119:105; Mat. 7:7, 8.

13 Taakɛ klɛŋklɛŋ afii 100 lɛ mli asafoŋ onukpai lɛ fee lɛ, asafoŋ onukpai ni toɔ shiɛmɔ nitsumɔ lɛ he gbɛjianɔ ŋmɛnɛ lɛ tuɔ amɛhe amɛhaa “wiemɔ lɛ he sɔɔmɔ lɛ.” (Bɔf. 6:4) Amɛmii shɛɔ amɛhe waa yɛ bɔ ni shiɛmɔ nitsumɔ lɛ shwereɔ yɛ hei ni amɛyɔɔ lɛ, kɛ agbɛnɛ lɛ yɛ je lɛŋ fɛɛ lɛ he. (Bɔf. 21:19, 20) Yɛ nɔ najiaŋ ni amɛaawo mlai tsaralaa  lɛ, amɛnyiɛɔ Ŋmalɛ lɛ kɛ Nyɔŋmɔ mumɔ krɔŋkrɔŋ lɛ gbɛtsɔɔmɔ sɛɛ kɛtoɔ gbɛjianɔ koni shiɛmɔ nitsumɔ lɛ ashwere. (Nyɛkanea Bɔfoi lɛ Asaji 15:28.) Nyɛmimɛi nɛɛ tsɔɔ nɛkɛ gbɛ nɔ amɛfeɔ nɔkwɛmɔnɔ ni nɔ bɛ amɛhaa wɔ mɛi ni wɔyɔɔ asafoi srɔtoi ni yɔɔ jeŋ fɛɛ lɛ amli lɛ.—Efe. 4:11, 12.

14, 15. (a) Mɛɛ gbɛjianɔi ato koni shiɛmɔ nitsumɔ lɛ aya nɔ jogbaŋŋ yɛ jeŋ fɛɛ? (b) Te onuɔ he ohaa tɛŋŋ yɛ gbɛfaŋnɔ ni otsuɔ yɛ shiɛmɔ nitsumɔ lɛ mli lɛ he?

14 Nɔ ko ni amɛfeɔ ni wɔnaaa ji bɔ ni amɛgboɔ deŋme kɛtoɔ woji, asafoŋ kpeei, kɛ kpeei wuji ahe gbɛjianɔ lɛ. Akɛ nɔkwɛmɔnɔ lɛ, mɛi akpei abɔ ni kɛ amɛhe eha gboɔ deŋme kɛtsɔɔ woji ashishi kɛyaa wiemɔi aaafee 600 mli. Enɛ haa mɛi babaoo nyɛɔ amɛkaseɔ “Nyɔŋmɔ niwuji lɛ” yɛ amɛ diɛŋtsɛ amɛwiemɔ mli. (Bɔf. 2:7-11) Nyɛmimɛi oblahii kɛ oblayei kɛ tsɔji ni kalaa woji oyayaayai kalaa woji nɛɛ. No sɛɛ lɛ, akɛ woji nɛɛ yahaa asafoi po ni yɔɔ shikpɔŋ lɛ naagbeehei lɛ.

15 Ato gbɛjianɔi srɔtoi yɛ wɔsafoi lɛ amli koni akɛye abua wɔ ni wɔshiɛ sanekpakpa lɛ. Akɛ nɔkwɛmɔnɔ lɛ, mɛi akpei abɔ kɛ amɛhe haa kɛmamɔɔ Maŋtsɛyeli Asai kɛ Kpee Asai. Mɛi komɛi yeɔ amɛbuaa mɛi ni adebɔɔ naa oshara enina amɛ loo mɛi ni ebaabi ni aye abua amɛ yɛ helatsamɔ gbɛfaŋ lɛ. Mɛi komɛi hu toɔ kpeei bibii kɛ kpeei wuji ahe gbɛjianɔ, ni mɛi komɛi tsɔɔ nii yɛ Biblia skul srɔtoi ashishi. Mɛni hewɔ afeɔ enɛɛmɛi fɛɛ lɛ? Bɔni afee ni akɛye abua wɔ ni wɔshiɛ sanekpakpa lɛ, wɔya wɔhiɛ yɛ anɔkwale lɛ mli, ni wɔye wɔbua mɛi babaoo ni amɛbajá Yehowa. Yehowa gbɛjianɔtoo lɛ fã ni yɔɔ shikpɔŋ lɛ nɔ lɛ kɛ nii ni hi titri lɛ miiye klɛŋklɛŋ gbɛhe lɛɛlɛŋ!

NYIƐMƆ YEHOWA GBƐJIANƆTOO LƐ NƆKWƐMƆNƆ LƐ SƐƐ

16. Kɛ́ nyɛmiifee nyɛgbɛkɛ weku jamɔ loo aŋkro nikasemɔ lɛ, mɛni he saji nyɛbaanyɛ nyɛtao?

16 Bei komɛi lɛ, ani wɔŋɔɔ be kɛjwɛŋɔ nibii ni Yehowa gbɛjianɔtoo lɛ tsuɔ lɛ nɔ? Mɛi komɛi eto akɛ amɛbaatao Yehowa gbɛjianɔtoo lɛ he saji amli kɛ́ amɛmiifee amɛweku jamɔ loo aŋkro nikasemɔ, ní amɛjwɛŋ nibii ni amɛbaakase yɛ he lɛ nɔ. Ebaafee miishɛɛ waa akɛ wɔɔkase ninai ni Yesaia, Ezekiel, Daniel, kɛ Yohane na lɛ ahe nii. Wolo ni ji Jehovah’s Witnesses—Proclaimers of God’s Kingdom lɛ kɛ woji krokomɛi loo DVD srɔtoi ni afee ni yɔɔ owiemɔ mli lɛ baanyɛ aye abua bo ni okase Yehowa gbɛjianɔtoo lɛ he nii.

17, 18. (a) Mɛɛ gbɛ nɔ oná nikasemɔ nɛɛ he sɛɛ? (b) Mɛɛ saji esa akɛ obi ohe?

17 Kɛ́ wɔjwɛŋ bɔ ni Yehowa tsɔɔ egbɛjianɔtoo lɛ nɔ efĩɔ shiɛmɔ nitsumɔ lɛ sɛɛ lɛ nɔ lɛ, wɔbaaná he sɛɛ waa. Nyɛhaa wɔkɛ gbɛjianɔtoo ni nɔ bɛ nɛɛ afea ekome ni wɔkɛ wɔjwɛŋmɔ ama nii ni hi titri lɛ anɔ. Kɛ́ wɔfee nakai lɛ, wɔbaanu he tamɔ Paulo nu he lɛ, mɔ ni ŋma akɛ: “Akɛni akɛ sɔɔmɔ nɛɛ eha wɔ yɛ Nyɔŋmɔ mɔbɔnalɛ naa lɛ, wɔnijiaŋ ejeee wui.” (2 Kor. 4:1, Ga Biblia hee) Ewo nyɛmimɛi lɛ hewalɛ hu akɛ: “Nyɛkahaa ekpakpafeemɔ miitɔa wɔ, ejaakɛ kɛ́ wɔnijiaŋ ejeee wui lɛ, wɔbaakpa hu yɛ be ni sa mli.”—Gal. 6:9.

18 Akɛ aŋkroaŋkroi loo wekui lɛ, ani ehe baahia ni wɔfee tsakemɔi komɛi bɔni afee ni wɔyoo nii ni hi titri lɛ yɛ wɔ daa gbi nifeemɔi amli? Ani obaanyɛ oha oshihilɛ afee mlɛo koni onyɛ otsu babaoo yɛ shiɛmɔ nitsumɔ lɛ mli? Wɔbaasusu nibii enumɔ ni baaye abua wɔ ni wɔkɛ Yehowa gbɛjianɔtoo lɛ anyiɛ pɛpɛɛpɛ lɛ ahe yɛ nikasemɔ ni nyiɛ sɛɛ lɛ mli.