Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) APRIL 2013

Kanemɔ Biblia lɛ ni Oná He Sɛɛ Kɛmɔ Shi

Kanemɔ Biblia lɛ ni Oná He Sɛɛ Kɛmɔ Shi

‘Mimii shɛɔ mihe yɛ Nyɔŋmɔ mla lɛ he.’ROM. 7:22.

1-3. Kɛ́ wɔkane Biblia lɛ ni wɔkɛ nɔ ni wɔkaneɔ lɛ tsu nii lɛ, mɛɛ sɛɛ wɔbaaná?

NYƐMI YOO ko kɛɛ akɛ: “Daa leebi lɛ, midaa Yehowa shi akɛ ehaa minuɔ Biblia lɛ shishi.” Nyɛmi yoo onukpa nɛɛ ekane Biblia tso muu lɛ fɛɛ fe shii 40, ni ekã he eekane lolo. Nyɛmi yoo oblayoo ko hu ŋma akɛ, Biblia lɛ ni ekaneɔ lɛ eha ena akɛ Yehowa ji mɔ ko ni yɔɔ diɛŋtsɛ. Enɛ eha wekukpaa ni kã ekɛ Yehowa teŋ lɛ mli ewa waa. Etsɔɔ mli akɛ, “Minako miishɛɛ ni tamɔ nɛkɛ yɛ mishihilɛ mli pɛŋ!”

2 Bɔfo Petro wo wɔ fɛɛ hewalɛ ni ‘wɔshwe wiemɔ lɛ mli fufɔ krɔŋŋ lɛ.’ (1 Pet. 2:2) Mɛi ni tsuɔ shwelɛ nɛɛ he nii kɛtsɔ Biblia lɛ kasemɔ nɔ, ni amɛkɛ nɔ ni Biblia lɛ tsɔɔ lɛ tsuɔ nii lɛ ená henilee krɔŋŋ, ni amɛna yiŋtoo hewɔ ni amɛyɔɔ shihilɛ mli. Ehaa amɛkɛ mɛi krokomɛi ni sumɔɔ anɔkwa Nyɔŋmɔ ni amɛsɔmɔɔ lɛ lɛ bɔɔ naanyo gbagbalii. Enɛɛmɛi fɛɛ ji yiŋtoi kpakpai ahewɔ ni esa akɛ ‘wɔmii ashɛ Nyɔŋmɔ mla lɛ he’ lɛ. (Rom. 7:22) Shi sɛɛnamɔi babaoo yɛ lolo. Mɛni ji ekomɛi?

3 Babaoo ni okaseɔ Yehowa kɛ e-Bi lɛ he nii lɛ, babaoo ni suɔmɔ ni oyɔɔ kɛha amɛ kɛ onaanyo gbɔmɔ lɛ mli waa. Biblia mli anɔkwa nilee lɛ haa onaa bɔ ni Nyɔŋmɔ baahere adesai ni boɔ lɛ toi lɛ ayiwala beni ekpataa mɛi fɔji lɛ ahiɛ yɛ be ni kã wɔhiɛ lɛ mli lɛ. Ehaa onáa sanekpakpa ni okɛbaaha mɛi yɛ shiɛmɔ nitsumɔ lɛ mli. Yehowa hu baajɔɔ bo beni otsɔɔ mɛi nibii ni okane kɛjɛ Nyɔŋmɔ Wiemɔ lɛ mli lɛ.

KANEMƆ NI OJWƐŊ NƆ

4. Mɛni Biblia lɛ ni aaakane ni ‘ajwɛŋ he’ lɛ tsɔɔ?

4 Yehowa sumɔɔɔ ni etsuji lɛ kɛ kplakplafeemɔ kaneɔ e-Wiemɔ lɛ. Ekɛɛ Yoshua akɛ: ‘Kaaha nɛkɛ mla wolo nɛɛ mli wiemɔi lɛ miikpa yɛ odaaŋ, shi jwɛŋmɔ he nyɔɔŋ kɛ shwane.’ (Yosh. 1:8; Lala 1:2) Ani enɛ  tsɔɔ doo akɛ esa akɛ wɔkane Biblia muu lɛ fɛɛ waa loo yɛ ablɛbiaŋ? Dabi. Etsɔɔ moŋ akɛ, esa akɛ oto otsui shi kɛkane lɛ bɔ ni baaha ojwɛŋ nɔ ni okaneɔ lɛ nɔ. Enɛ baaye abua bo koni ojwɛŋ kukuji ni he hiaa waa ni baanyɛ awo bo hewalɛ yɛ nakai be lɛ mli lɛ anɔ. Kɛ́ ona wiemɔi, kukuji, loo amaniɛbɔi ni tamɔ nakai lɛ, too otsui shi kɛkane, ni otsɛ wiemɔi lɛ yɛ onaabu po. No dani oti ni yɔɔ nɔ ni okaneɔ lɛ mli lɛ baanyɛ ashɛ otsui he. Mɛni hewɔ enɛ he hiaa lɛ? Ejaakɛ kɛ́ onu ŋaa ni Nyɔŋmɔ woɔ bo lɛ shishi jogbaŋŋ lɛ, no baakanya bo koni okɛtsu nii.

5-7. Okɛ nɔkwɛmɔnii aha kɛtsɔɔ nɔ hewɔ ni kɛ́ ookane Nyɔŋmɔ Wiemɔ lɛ ebaaye ebua bo koni (a) oye Yehowa jeŋba he mlai lɛ anɔ; (b) okɛ mɛi aye yɛ tsuishitoo kɛ mlihilɛ mli; (d) oná hekɛnɔfɔɔ yɛ Yehowa mli beni ohe efi bo lɛ.

5 Kɛ́ okane Biblia mli woji ni oleee amɛmli saji jogbaŋŋ lɛ yɛ nɛkɛ gbɛ nɔ lɛ, ebaaye ebua bo waa. Susumɔ shihilɛi etɛ komɛi ahe okwɛ. Klɛŋklɛŋ lɛ, susumɔ Kristofonyo oblanyo ko ni miikane Biblia lɛ, ni eyashɛ Hoshea wolo lɛ nɔ lɛ he okwɛ. Beni ekaneɔ yitso 4 lɛ, emɛ fioo beni eshɛ kuku 11 kɛyashi 13 lɛ, ni ejwɛŋ he. (Nyɛkanea Hoshea 4:11-13.) Mɛni hewɔ? Kukuji nɛɛ ta etsuiŋ waa, ejaakɛ ekɛ jeŋba sha he kaa miikpe yɛ skul. Shi beni ejwɛŋɔ kukuji nɛɛ ahe lɛ, esusu eyiŋ akɛ: ‘Yehowa naa nibii gbohii ni mɛi feɔ yɛ dujiaŋshi lɛ po. Misumɔŋ mafee nɔ ko ni esumɔɔɔ.’ Nyɛmi nuu lɛ kpɛ mli akɛ ebaabɔ mɔdɛŋ ni ehi shi yɛ Yehowa jeŋba he mlai lɛ anaa.

6 Yɛ shihilɛ ni ji enyɔ lɛ mli lɛ, nyɛmi yoo ko miikane Yoel wolo lɛ ni eyashɛ yitso 2 kuku 13 lɛ. (Nyɛkanea Yoel 2:13.) Beni ejwɛŋɔ nakai kuku lɛ nɔ lɛ, eyɔse akɛ esa akɛ ekase Yehowa, mɔ ni ji ‘durolɔ kɛ mlitsɔlɔ, ni mli fuuu mra, ni emɔbɔnalɛ fá’ lɛ. Ekpɛ mli akɛ ebaatsake, ejaakɛ bei komɛi lɛ ekɛ ewu kɛ mɛi krokomɛi wieɔ kɛ mlifu, ni ekɛ jɛmɔ wiemɔi tsuɔ nii.

7 Nɔ ni ji etɛ lɛ, susumɔ tsɛ ko ni eji Kristofonyo ni nitsumɔ eŋmɛɛ lɛ ni ehao yɛ bɔ ni eeefee ekwɛ eŋa kɛ ebii lɛ he lɛ he okwɛ. Beni ekaneɔ Nahum wolo lɛ, eto etsui shi ejwɛŋ Nahum 1:7 lɛ ni tsɔɔ akɛ Yehowa ‘le mɛi ni baa lɛ abo,’ ni ebaabu amɛhe “yɛ fimɔ gbi nɔ” lɛ nɔ. Nakai sane lɛ shɛje emii waa. Eyɔse akɛ Yehowa susuɔ lɛ kɛ eweku lɛ he waa, no hewɔ lɛ efeee yeyeeye dɔŋŋ. Kɛkɛ ni ekane Nahum 2:1 lɛ ni ejwɛŋ nɔ. (Nyɛkanea Nahum 2:1.) Wɔnyɛmi nuu lɛ yɔse akɛ, kɛ́ eshiɛ sanekpakpa lɛ beni eyɔɔ fimɔ mli lɛ, no tsɔɔ lɛɛlɛŋ akɛ ekɛ Yehowa miifee emɔɔ ni wa. Eyɛ mli akɛ nyɛmi nuu lɛ kã he eetao nitsumɔ moŋ, shi ekɛ ehe woɔ otsi teŋ shiɛmɔ lɛ mli waa.

8. Tsɔɔmɔ nɔ ko ni okase yɛ o-Biblia kanemɔ lɛ mli.

8 Otii ni he yɔɔ sɛɛnamɔ ni wɔtsĩ tã nɛɛ yɛ Biblia mli woji ni mɛi buɔ akɛ amɛshishinumɔ wala lɛ amli. Beni okaneɔ Hoshea, Yoel, kɛ Nahum woji lɛ kɛshwelɛ lɛ akɛ ootao okase nɔ ko lɛ, obaana akɛ kukuji komɛi yɛ mli ni obaasumɔ ni ojwɛŋ nɔ. Kwɛ nilee kɛ miishɛjemɔ wiemɔi ni yɔɔ nakai gbalɔi lɛ awoji lɛ amli ni obaanyɛ oná he sɛɛ! Ni Biblia mli woji krokomɛi lɛ hu? Nyɔŋmɔ Wiemɔ lɛ tamɔ he ko ni atsaa daimente yɛ waa. Tsaa nakai shikpɔŋ lɛ jogbaŋŋ! Hɛɛ, kanemɔ Biblia muu lɛ fɛɛ, kɛjwɛŋmɔ lɛ akɛ obaaná ojarawa tɛi ni jɛ Nyɔŋmɔ ŋɔɔ ni baatsɔɔ bo gbɛ, ni baawo bo hewalɛ hu.

MIAMƆ OHIƐ NI ONU NƆ NI OKANEƆ LƐ SHISHI

9. Mɛni wɔbaanyɛ wɔfee koni wɔnu Biblia lɛ shishi jogbaŋŋ?

9 Eyɛ mli akɛ ehe miihia ni okane Biblia lɛ daa gbi moŋ, shi esa akɛ omia ohiɛ ni onu nɔ ni okaneɔ lɛ shishi jogbaŋŋ.  No hewɔ lɛ, okɛ woji ni Yehowa asafo lɛ kalaa lɛ atsu nii kɛtao saji ni kɔɔ mɛi, maji, kɛ nibii ni okaneɔ lɛ ahe lɛ mli. Aloo kɛ́ onaaa bɔ ni okɛ nɔ ko ni okane yɛ Biblia lɛ mli lɛ baatsu nii oha lɛ, obaanyɛ obi asafoŋ onukpa ko loo nyɛmi nuu loo nyɛmi yoo ko ni eda yɛ mumɔŋ lɛ koni eye ebua bo. Bɔni afee ni wɔna nɔ hewɔ ni ehe hiaa ni wɔnu nibii ni wɔkaneɔ lɛ shishi jogbaŋŋ lɛ, nyɛhaa wɔsusua klɛŋklɛŋ afii 100 lɛ mli Kristofonyo ko ni bɔ mɔdɛŋ akɛ eeefee nakai lɛ he wɔkwɛa. Egbɛ́i ji Apolo.

10, 11. (a) Mɛɛ gbɛ nɔ aye abua Apolo ni etee ehiɛ yɛ shiɛmɔ nitsumɔ lɛ mli? (b) Mɛni wɔbaanyɛ wɔkase kɛjɛ Apolo sane lɛ mli? (Kwɛmɔ akrabatsa ni yitso ji “Ani Nɔ ni Otsɔɔ lɛ Kɛ Tsakemɔi ni Afee lɛ Nyiɛ?” lɛ.)

10 Apolo ji Yudafonyo ni ebatsɔ Kristofonyo ni “yɔɔ hewalɛ yɛ ŋmalɛi lɛ amli,” ni agbɛnɛ hu lɛ, eyɛ “ekãa yɛ mumɔ mli.” Bɔfoi lɛ Asaji awolo lɛ wie ehe akɛ: “Ewieɔ ni etsɔɔ Yesu he nii fitsofitso, tsɛ Yohane baptisimɔ lɛ kɛkɛ ele.” Shi Apolo leee akɛ nibii ni etsɔɔ yɛ baptisimɔ he lɛ be eho. Beni Akwila kɛ eŋa Priskila ni ji Kristofoi lɛ nu ni eetsɔɔ nii yɛ Efeso lɛ, amɛtsɔɔ lɛ “Nyɔŋmɔ gbɛ lɛ fitsofitso.” (Bɔf. 18:24-26) Te Apolo ná enɛ he sɛɛ eha tɛŋŋ?

11 Beni Apolo etsɔɔ nii yɛ Efeso sɛɛ lɛ, etee Akaia. “Be ni eba jɛi lɛ, ewa mɛi ni etsɔ duromɔ lɛ nɔ ehe eye lɛ babaoo. Ejaakɛ ekɛ hewalɛ ku Yudafoi lɛ anaa yɛ maŋ hiɛ ni ekɛ ŋmalɛi lɛ tsɔɔ amɛ faŋŋ akɛ Yesu ji Kristo lɛ.” (Bɔf. 18:27, 28, Ga Biblia hee) Yɛ be nɛɛ mli lɛ, Apolo nyɛɔ egbalaa nɔ ni Kristofoi abaptisimɔ tsɔɔ lɛ mli jogbaŋŋ. Akɛni enu nibii ashishi jogbaŋŋ hewɔ lɛ, “ewa” mɛi hei lɛ “babaoo” ni amɛtee amɛhiɛ yɛ anɔkwa jamɔ mli. Mɛni wɔkaseɔ kɛjɛɔ sane nɛɛ mli? Taakɛ Apolo fee lɛ, wɔmiaa wɔhiɛ akɛ wɔbaanu nɔ ni wɔkaneɔ yɛ Biblia lɛ mli lɛ shishi.  Shi kɛ́ Kristofonyo ko ni eda yɛ mumɔŋ lɛ wo wɔ ŋaa yɛ bɔ ni wɔɔfee wɔtsɔɔ nii jogbaŋŋ lɛ he lɛ, esa akɛ wɔjɛ heshibaa mli wɔkpɛlɛ nɔ, ni wɔda lɛ shi. Kɛ́ wɔfee nakai lɛ, ebaaha wɔya wɔhiɛ yɛ sɔɔmɔ krɔŋŋ lɛ mli.

OKƐ NƆ NI OKASEƆ LƐ AYE ABUA MƐI KROKOMƐI

12, 13. Mɛɛ gbɛ nɔ obaanyɛ okɛ Biblia lɛ atsu nii yɛ nilee mli kɛye obua Biblia mli nikaselɔ ko koni eya ehiɛ?

12 Taakɛ Priskila, Akwila, kɛ Apolo fee lɛ, wɔ hu wɔbaanyɛ wɔye wɔbua mɛi krokomɛi. Kɛ́ oye obua mɔ ko ni yɔɔ wiemɔ lɛ he miishɛɛ ni efee tsakemɔi yɛ eshihilɛ mli koni eya ehiɛ yɛ anɔkwale lɛ mli lɛ, te onuɔ he ohaa tɛŋŋ? Aloo kɛ́ oji asafoŋ onukpa lɛ, te onuɔ he ohaa tɛŋŋ kɛji Kristofonyo ko da bo shi yɛ ŋaawoo ko ni ojɛ Ŋmalɛ lɛ mli okɛha lɛ ni ye ebua lɛ yɛ shihilɛ ni mli wa ni ekɛkpe lɛ mli lɛ he lɛ? Eka shi faŋŋ akɛ, kɛ́ okɛ Nyɔŋmɔ Wiemɔ lɛ tsu nii kɛye obua mɛi krokomɛi ni amɛfee tsakemɔi yɛ amɛshihilɛ mli lɛ, otsui nyɔɔ omli ni onáa miishɛɛ waa. * Te ooofee tɛŋŋ ofee enɛ lɛ?

13 Israelbii ni hi shi yɛ Elia beaŋ lɛ ateŋ mɛi babaoo didãa yɛ anɔkwa jamɔ kɛ apasa jamɔ teŋ. Ŋaa ni Elia wo amɛ lɛ baanyɛ aye abua Biblia mli nikaselɔ ko ni nyɛko akpɛ eyiŋ akɛ ebaasɔmɔ Yehowa lɛ waa. (Nyɛkanea 1 Maŋtsɛmɛi 18:21.) Shihilɛ kroko nɛ: Kɛ́ mɔ ko ni yɔɔ wiemɔ lɛ he miishɛɛ lɛ miishe gbeyei akɛ enanemɛi loo ewekumɛi baawie amɛshi lɛ yɛ Biblia lɛ ni ekaseɔ lɛ hewɔ lɛ, obaanyɛ okɛ lɛ asusu Yesaia 51:12, 13 (nyɛkanea) lɛ he, koni no awaje efai shi ni etswa akɛ ebaajá Yehowa lɛ.

14. Mɛni baaye abua bo ni okai Biblia mli saji kɛ́ amɛhe miihia bo ni okɛye obua mɛi krokomɛi?

14 Ŋwanejee ko bɛ he akɛ wiemɔi babaoo yɛ Biblia lɛ mli ni baanyɛ awo wɔ hewalɛ, ejaje wɔ, loo ewaje wɔ. Shi ekolɛ obaabi akɛ, ‘Te mafee tɛŋŋ male ŋmalɛ ni mikɛbaatsu nii yɛ shihilɛ pɔtɛɛ ko mli lɛ?’ Kanemɔ Biblia lɛ daa gbi, ni ojwɛŋ nɔ ni okaneɔ lɛ nɔ. Kɛ́ ofee nakai lɛ, fiofio lɛ obaale saji babaoo ni Yehowa mumɔ lɛ baanyɛ aye abua bo ni okai kɛ́ amɛhe miihia bo.—Mar. 13:11; nyɛkanea Yohane 14:26. *

15. Mɛni baaye abua bo koni onu Nyɔŋmɔ Wiemɔ lɛ shishi jogbaŋŋ?

15 Taakɛ Maŋtsɛ Salomo fee lɛ, sɔlemɔ ni Yehowa aha bo nilee ni okɛtsu shiɛmɔ nitsumɔ lɛ kɛ asafoŋ sɔ̃i ahe nii. (2 Kron. 1:7-10) Kasemɔ gbalɔi lɛ, ni otao Nyɔŋmɔ Wiemɔ lɛ mli fitsofitso, ni enɛ baaye abua bo ni ole anɔkwale ni kɔɔ Yehowa kɛ esuɔmɔnaa nii he lɛ. (1 Pet. 1:10-12) Bɔfo Paulo wo Timoteo hewalɛ koni ekɛ “hemɔkɛyeli kɛ tsɔɔmɔ kpakpa” lɛ awaje ehe. (1 Tim. 4:6) Kɛ́ ofee nakai lɛ, obaanu shishi jogbaŋŋ, ni obaanyɛ okɛye obua mɛi ni amɛya amɛhiɛ yɛ mumɔŋ. Nakai beaŋ nɔŋŋ lɛ, ohemɔkɛyeli lɛ mli baawa waa.

BIBLIA LƐ KANEMƆ BUƆ WƆHE

16. (a) Mɛɛ gbɛ nɔ Beroiabii lɛ ná ‘ŋmalɛi lɛ amli ni amɛkwɛɔ daa gbi’ lɛ he sɛɛ? (b) Mɛni hewɔ esa akɛ wɔkane Biblia lɛ daa gbi lɛ?

16 Yudafoi ni yɔɔ Makedonia maŋtiase ni ji Beroia lɛ ‘kpaa ŋmalɛi lɛ amli amɛkwɛɔ daa gbi.’ Beni Paulo yashiɛ sanekpakpa lɛ etsɔɔ nakai Yudafoi lɛ, amɛkɛ nibii ni etsɔɔ amɛ lɛ to nɔ ni amɛle yɛ Ŋmalɛi lɛ amli lɛ he. Mɛni jɛ mli kɛba?  Mɛi babaoo yiŋ tsɔ akɛ nɔ ni etsɔɔ lɛ ji anɔkwale, ni “amɛteŋ mɛi pii hé ye.” (Bɔf. 17:10-12) Enɛ tsɔɔ akɛ, Biblia lɛ ni wɔkaneɔ daa gbi lɛ wajeɔ hemɔkɛyeli ni wɔyɔɔ yɛ Yehowa mli lɛ. Nakai hemɔkɛyeli lɛ, ni ji “nii ni mɛi ahiɛ kã nɔ lɛ anɔ hewalɛnamɔ” lɛ, ji nɔ ni baaha abaa wɔyi kɛya Nyɔŋmɔ jeŋ hee lɛ mli.—Heb. 11:1.

17, 18. (a) Mɛɛ gbɛ nɔ hemɔkɛyeli ni mli wa kɛ suɔmɔ buɔ wɔfonirifeemɔŋ tsui lɛ he? (b) Mɛɛ gbɛ nɔ hiɛnɔkamɔ buɔ wɔhe?

17 Paulo ŋma akɛ: “Wɔ lɛ, akɛni shwanebii ji wɔ hewɔ lɛ, nyɛhaa wɔhiɛ akãa shi, ni wɔwo hemɔkɛyeli kɛ suɔmɔ dama lɛ, ni wɔbumɔ dadefai ni ji yiwalaheremɔ nɔhiɛkamɔ lɛ.” (1 Tes. 5:8) Esa akɛ asraafonyo abu etsui he yɛ ehenyɛlɔ hewɔ. Nakai nɔŋŋ esa akɛ Kristofonyo abu efonirifeemɔŋ tsui lɛ he kɛjɛ esha he. Kɛ́ Yehowa jálɔ ko ná hemɔkɛyeli ni mli wa yɛ Nyɔŋmɔ shiwoi lɛ amli, ni ená suɔmɔ hu eha Nyɔŋmɔ kɛ enaanyo gbɔmɔ lɛ, mɛni jɛɔ mli kɛbaa? No haa ewoɔ mumɔŋ dama ni yɔɔ hewalɛ fe fɛɛ lɛ. Ebaawa akɛ ebaafee nɔ ko ni Nyɔŋmɔ sumɔɔɔ.

18 Paulo tsĩ dadefai, “ni ji yiwalaheremɔ nɔhiɛkamɔ lɛ” hu tã. Yɛ blema lɛ, kɛ́ asraafonyo ko ebuuu eyitso he lɛ, abaanyɛ agbe lɛ yɛ ta mli. Shi kɛ ebu dadefai ni hi jogbaŋŋ ni ko tswa eyitso lɛ, eyeŋ lɛ awui ko tsɔ. Nyɔŋmɔ Wiemɔ lɛ ni wɔkaseɔ lɛ haa hekɛnɔfɔɔ ni wɔyɔɔ yɛ emli akɛ ebaahere wɔ lɛ mli waa. Hemɔkɛyeli ni mli wa yeɔ ebuaa wɔ ni wɔtsiɔ wɔhe kɛjɛɔ hemɔkɛyeli kwalɔi kɛ ‘amɛyakayaka sanegbaa’ ni baanyɛ afite nii waa yɛ asafo lɛ mli lɛ he. (2 Tim. 2:16-19) Wɔhiɛnɔkamɔ lɛ hu baawaje wɔ ni wɔtsi wɔhe kɛjɛ nifeemɔi ni Yehowa nyɛɔ lɛ ahe.

BIBLIA LƐ KANEMƆ BAABAA WƆYI

19, 20. Mɛni hewɔ wɔsumɔɔ Nyɔŋmɔ Wiemɔ lɛ waa lɛ, ni mɛɛ gbɛ nɔ wɔtsɔɔ akɛ wɔhiɛ sɔɔ Nyɔŋmɔ Wiemɔ lɛ? (Kwɛmɔ akrabatsa ni yitso ji “Yehowa Haa Mi Nɔ Pɛ ni He Hiaa Mi Lɛ.”)

19 Ehe miihia ni wɔkɛ wɔhe afɔ̃ Yehowa Wiemɔ lɛ nɔ waa beni wɔboteɔ nibii agbɛjianɔtoo nɛɛ naagbee lɛ mli vii lɛ. Ŋaawoo ni wɔnáa kɛjɛɔ mli lɛ yeɔ ebuaa wɔ ni wɔtsiɔ wɔhe kɛjɛɔ subaŋi gbohii ahe, ni wɔwuɔ wɔshiɔ esha akɔnɔi. Ebaashɛje wɔmii ni ebaawo wɔ hewalɛ ni wɔmia wɔhiɛ kɛkpee kai ni Satan kɛ eje lɛ kɛbaa wɔnɔ lɛ anaa. Gbɛtsɔɔmɔi ni yɔɔ Yehowa Wiemɔ lɛ mli lɛ baaye abua wɔ ni wɔya nɔ wɔnyiɛ wala gbɛ lɛ nɔ.

20 Kaimɔ akɛ Nyɔŋmɔ miisumɔ ni “ehere gbɔmɛi fɛɛ yiwala.” Yehowa tsuji hu fata “gbɔmɛi fɛɛ” lɛ ahe. Mɛi ni boɔ wɔshiɛmɔ lɛ kɛ wɔnitsɔɔmɔ lɛ toi lɛ hu fata he. Shi esa akɛ mɛi fɛɛ ni miisumɔ ni ahere amɛyiwala lɛ ashɛ “anɔkwale lɛ lee mli.” (1 Tim. 2:4) Enɛ tsɔɔ akɛ, kɛ́ abaabaa wɔyi lɛ, esa akɛ wɔkane Biblia lɛ, ni wɔkɛ nɔ ni wɔkaneɔ lɛ atsu nii. Kɛ́ wɔkaneɔ Biblia lɛ daa gbi lɛ, no tsɔɔ akɛ wɔhiɛ sɔɔ Yehowa Wiemɔ lɛ waa.—Yoh. 17:17.

^ kk. 12 Esaaa akɛ wɔkɛ Biblia mli ŋaawoo nyɛɔ mɛi anɔ ni amɛtsake loo wɔkɛɛ amɛ akɛ amɛji gbɔmɛi gbohii. Esa akɛ wɔkase Yehowa ni wɔto wɔtsui shi ni wɔjie mlihilɛ kpo wɔtsɔɔ mɛi ni wɔkɛkaseɔ Biblia lɛ.—Lala 103:8.

^ kk. 14 Shi kɛ́ ekolɛ okaiɔ ŋmalɛ lɛ mli wiemɔi komɛi, shi okaiii he ni ejeɔ kpo yɛ hu? Kɛ́ otao nakai wiemɔi lɛ yɛ wiemɔi ni ato naa yɛ New World Translation lɛ sɛɛ, Watchtower Library lɛ nɔ, loo yɛ wiemɔi ni ato naa yɛ wolo ni ji Comprehensive Concordance lɛ mli lɛ, obaanyɛ ona he ni ŋmalɛ lɛ jeɔ kpo yɛ.