Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) APRIL 2013

 WALA SHIHILƐ HE SANE

Afii 50 yɛ Be Fɛɛ Sɔɔmɔ lɛ mli yɛ He ko ni Bɛŋkɛ Arctic Circle Lɛ

Afii 50 yɛ Be Fɛɛ Sɔɔmɔ lɛ mli yɛ He ko ni Bɛŋkɛ Arctic Circle Lɛ

Wɔkɛɛ wɔnaanyo ko ni ji be fɛɛ sɔɔlɔ lɛ akɛ, “Ewaaa haaa bo akɛ obaatsɔ gbɛgbalɔ. Ofɔlɔi fɛɛ yɛ anɔkwale lɛ mli, ni amɛbaanyɛ amɛye amɛbua bo.” Shi ehere nɔ akɛ, “Nyɛboa toi! Wɔ fɛɛ wɔyɛ Tsɛ kome.” Sane ko ni he hiaa waa yɛ sane ni ewie nɛɛ mli: Wɔŋwɛi Tsɛ lɛ kwɛɔ etsuji ni ewajeɔ amɛ. Hɛɛ, wɔshihilɛ mli niiashikpamɔi nɛɛ maa anɔkwa sane nɛɛ nɔ mi.

 AFƆ́ wɔyi nyɔŋma awo weku ko ni yeɔ okwaa mli yɛ Ostrobothnia Kooyigbɛ yɛ Finland. Beni awuɔ Jeŋ Ta II lɛ, no mli lɛ wɔji gbekɛbii. Eyɛ mli akɛ he ni awuɔ ta lɛ yɛ lɛ kɛ he ni wɔyɔɔ lɛ jɛkɛ moŋ, shi wɔle akɛ mɛi miipiŋ waa. Beni atswa okplɛm awo Oulu kɛ Kalajoki maŋtiasei lɛ amli lɛ, wɔna ni kɔɔyɔɔ lɛ mli fɛɛ etsu kɛ la. Wɔfɔlɔi kɛɛ wɔ akɛ kɛ́ wɔna kɔɔyɔŋ lɛji ni akɛwuɔ ta yɛ ŋwɛi lɛ, wɔtee wɔhe amrɔ nɔŋŋ. No hewɔ lɛ, beni wɔnyɛmi nuu onukpa Tauno lɛ gba wɔ shikpɔŋ nɔ paradeiso ni jalɛsane ni ayeee ehiŋ jɛmɛ lɛ he sane lɛ, eta wɔtsuiŋ waa.

Tauno kase Biblia mli anɔkwalei lɛ beni eye afii 14 kɛjɛ Biblia Kaselɔi lɛ awolo ko mli. Beni Jeŋ Ta II lɛ je shishi lɛ, ekpoo akɛ ekɛ ehe aaawo asraafoi anitsumɔ mli yɛ nɔ ni ekase yɛ Biblia lɛ mli lɛ hewɔ, ni no ha awo lɛ tsuŋ. Afee lɛ niseniianii waa yɛ jɛmɛ. No wo efai shi ni etswa akɛ ebaasɔmɔ Yehowa lɛ mli hewalɛ, ni beni ajie lɛ lɛ ekɛ ekãa ni fe tsutsu nɔ lɛ tsu sɔɔmɔ nitsumɔ lɛ. Nɔkwɛmɔnɔ kpakpa ni wɔnyɛmi nuu lɛ fee lɛ wo wɔ hewɔ lɛ ni wɔtee asafoŋ kpeei ni Odasefoi lɛ feɔ yɛ akrowa ko ni bɛŋkɛ he ni wɔyɔɔ lɛ. Wɔtsu nii ni wɔbua shika naa koni wɔnyɛ wɔya kpeei wuji hu. Wɔdu sabolai, wɔbua tsei ayibii anaa, ni wɔkpɛ nii wɔha wɔkutsoŋbii lɛ. Akɛni wɔyɛ nitsumɔ babaoo yɛ ŋmɔ lɛ mli hewɔ lɛ, bei pii lɛ wɔnyɛɛɛ wɔya kpeei lɛ kutuu, no hewɔ lɛ kɛ́ mɔ nɛ tee ŋmɛnɛ lɛ, wɔ lɛ mɔ nɛ hu baaya.

Kɛjɛ abɛkugbɛ: Matti (tsɛ), Tauno, Saimi, Maria Emilia (mami), Väinö (abifao), Aili, kɛ Annikki yɛ afi 1935

Anɔkwale ni kɔɔ Yehowa kɛ eyiŋtoi lɛ he nii ni wɔkase lɛ waje suɔmɔ ni wɔyɔɔ kɛha lɛ lɛ, ni wɔkpɛ wɔyiŋ akɛ wɔbaajɔɔ wɔwala nɔ wɔha lɛ. Yɛ afi 1947 mli lɛ, wɔyi enyɔ lɛ fɛɛ wɔkɛ nu mli baptisimɔ fee wɔhenɔjɔɔmɔ lɛ he okadi—no mli lɛ Annikki eye afii 15 ni Aili eye afii 17. Abaptisi wɔnyɛmi yoo Saimi yɛ nakai afi lɛ nɔŋŋ mli. Wɔkɛ wɔnyɛmi yoo Linnea ni no mli lɛ ebote gbalashihilɛ mli lɛ hu kase Biblia lɛ. Lɛ hu ekɛ eweku lɛ batsɔmɔ Yehowa Odasefoi. Beni abaptisi wɔ sɛɛ lɛ, wɔkɛma wɔhiɛ akɛ wɔbaasɔmɔ akɛ gbɛgbalɔi awalɔi yɛ be kɛ beaŋ.

WƆJE BE FƐƐ SƆƆMƆ NITSUMƆ LƐ SHISHI

Kɛjɛ abɛkugbɛ: Eeva Kallio, Saimi Mattila-Syrjälä, Aili, Annikki, kɛ Saara Noponen yɛ afi 1949

Yɛ afi 1955 mli lɛ, wɔfã wɔyahi Kemi ni ji maŋ ko ni yɔɔ kooyigbɛ shɔŋŋ lɛ mli. Eyɛ mli akɛ wɔ fɛɛ wɔkɛ wɔbe fɛɛ miitsu nii moŋ, shi wɔmiitao wɔtsɔmɔ gbɛgbalɔi, ni wɔshe gbeyei akɛ wɔnyɛŋ wɔkwɛ wɔhe. Wɔsusu akɛ esa akɛ wɔbua shika ko naa wɔto dã. Nakai beaŋ ji be ni wɔkɛ nyɛmi yoo gbɛgbalɔ ni wɔtsi etã kɛtsɔ hiɛ lɛ gba sane lɛ. Enɛ ye ebua wɔ ni wɔna akɛ Yehowa ni aaasɔmɔ lɛ yɛ be fɛɛ sɔɔmɔ lɛ mli lɛ damɔɔɔ nii ni wɔyɔɔ loo wɔwekumɛi ayelikɛbuamɔ nɔ. Nɔ ni he hiaa fe fɛɛ ji akɛ, wɔkɛ wɔhe baafɔ̃ wɔŋwɛi Tsɛ lɛ nɔ.

Wɔtee kpee yɛ Kuopio yɛ afi 1952. Kɛjɛ abɛkugbɛ: Annikki, Aili, Eeva Kallio

Nakai beaŋ lɛ, wɔyɛ shika saŋŋ ni wɔkɛbaakwɛ wɔhe nyɔji enyɔ. No hewɔ lɛ, yɛ May 1957 mli lɛ, wɔbi ni aha wɔkɛ nyɔji enyɔ ayasɔmɔ akɛ gbɛgbalɔi  yɛ Pello, ni ji maŋ ko ni yɔɔ Lapland, yɛ Arctic Circle lɛ yiteŋgbɛ lɛ. Yɛ nyɔji enyɔ lɛ sɛɛ lɛ, wɔhiɛ wɔshika lɛ fɛɛ lolo, no hewɔ lɛ wɔsaa wɔbi ni aha wɔkɛ nyɔji enyɔ kroko asɔmɔ. Yɛ nakai nyɔji enyɔ lɛ hu sɛɛ lɛ, wɔshika lɛ yɛ lolo. Agbɛnɛ lɛ, wɔná nɔmimaa akɛ Yehowa baakwɛ wɔ. Yɛ afii 50 ni wɔkɛsɔmɔ akɛ gbɛgbalɔi lɛ amli fɛɛ lɛ, wɔtaaa wɔshika lɛ he da! Kɛ́ wɔjwɛŋ he lɛ wɔnuɔ he tamɔ nɔ ni Yehowa hiɛ wɔniji amli ni eekɛɛ wɔ akɛ: ‘Nyɛkashea gbeyei! maye mabua nyɛ!’—Yes. 41:13.

Kaisu Reikko kɛ Aili ni nyiɛ shiɛmɔ nɔ

Yɛ afi 1958 lɛ, wɔkpokpaa nɔkwɛlɔ lɛ jie yi akɛ wɔbaanyɛ wɔyasɔmɔ akɛ gbɛgbalɔi krɛdɛɛi yɛ Sodankylä yɛ Lapland. Nakai beaŋ lɛ, Odasefonyo yoo kome pɛ yɔɔ nakai kpokpaa lɛ nɔ. Gbɛ nɔ ni etsɔ ekase anɔkwale lɛ yɛ miishɛɛ waa. Ebinuu kɛ eklasbii lɛ tee shisharamɔ yɛ Helsinki, ni ji Finland maŋtiase lɛ mli. Beni klasbii lɛ sharaa shi yɛ maŋ lɛ mli lɛ, nyɛmi yoo ko ni eda yɛ afii amli ha ebinuu lɛ Buu-Mɔɔ wolo tɛtrɛɛ lɛ eko, ni ekɛɛ lɛ ni ekɛyaha emami. Gbekɛ nuu lɛ fee nakai, ni beni emami kane lɛ, eyɔse amrɔ nɔŋŋ akɛ anɔkwale lɛ nɛ.

Wɔhai ŋwɛi tsũ ko ni eshishi lɛ akɛ tsɔne gbalaa tsei yɛ jɛmɛ. Wɔfeɔ asafoŋ kpeei yɛ jɛmɛ. Shishijee lɛ, wɔyi enyɔ lɛ kɛ nyɛmiyoo lɛ kɛ ebiyoo ko pɛ ji mɛi ni baa. Daa otsi lɛ, wɔfeɔ ekome kɛkaneɔ nɔ ni ato he gbɛjianɔ ni abaakase lɛ. Sɛɛ mli lɛ, nuu ko ni kɛ Odasefoi ekase Biblia lɛ batsu nii yɛ nitsumɔhe ni gbalaa tsei ni yɔɔ ŋwɛi tsũ lɛ shishi lɛ mli. Ekɛ eweku lɛ bafata wɔhe kɛbɔi kpeei yaa. Yɛ be ko sɛɛ lɛ, abaptisi ekɛ eŋa lɛ fɛɛ. Nyɛmi nuu nɛɛ bɔi wɔkpeei lɛ anɔ kwɛmɔ. Kɛfata he lɛ, hii ni tsuɔ nii yɛ nitsumɔhe nɛɛ ateŋ mɛi komɛi bɔi kpeei baa, ni amɛmɔ anɔkwale lɛ mli. Etsɛɛɛ kwraa ni wɔkuu lɛ da ni ebatsɔ asafo.

SHIƐMƆ NITSUMƆ LƐ WA

Hei ni jɛkɛ ni wɔyashiɛɔ yɛ lɛ ha shiɛmɔ wa. Yɛ hulutsoo be mli lɛ, wɔnyiɛɔ, wɔtaa okɔɔkpe, ni bei komɛi po lɛ wɔtaa lɛlɛ mli kɛyaa mɛi lɛ aŋɔɔ ni wɔyashiɛɔ wɔhaa amɛ. Okɔɔkpe lɛ ye ebua wɔ waa. Wɔtaa kɛyaa kpeei wuji hu, ni wɔtaa kɛyasaraa wɔfɔlɔi ni kɛ wɔteŋ jɛkɛ shitoi ohai abɔ lɛ hu. Yɛ fɛ̃i beaŋ lɛ, wɔwoɔ bɔɔs leebi maŋkpa kɛyaa akrowai lɛ eko mli, kɛkɛ lɛ wɔnyiɛ kɛtee shĩa kɛ shĩa. Kɛ́ wɔshiɛ yɛ akrowa kome mli wɔgbe naa lɛ, wɔyaa nɔ ni tsa nɔ lɛ hu mli. Bei komɛi lɛ, snoo ni nɛɔ shwieɔ shi lɛ fa, ni jeee be fɛɛ be ajieɔ yɛ gbɛjegbɛi lɛ anɔ. Wɔfɔɔ okpɔŋɔi ni gbalaa nii  lɛ anaji anaa nyiɛmɔ. Yɛ March naagbee gbɛ lɛ, snoo lɛ sereɔ, ni enɛ haa nyiɛmɔ waa.

Wɔmiiya shiɛmɔ yɛ fɛ̃i beaŋ

Jeŋ ni jɔɔ ŋanii kɛ snoo ni nɛɔ lɛ haa wɔwoɔ atadei ni haa wɔhe feɔ kulɔkulɔ. Wɔwoɔ nɔ ko ni tamɔ sɔks kakadaji dani wɔwoɔ sɔks enyɔ loo etɛ wɔshwie nɔ, no sɛɛ lɛ wɔwoɔ aspaatere kakadaji ni taa wɔnakutsei anaa hu. Loloolo lɛ, bei pii lɛ snoo lɛ boteɔ wɔtokotai lɛ amli beni wɔnyiɛɔ lɛ. Kɛ́ wɔshɛ mɔ ko shinaa naa lɛ, wɔjieɔ wɔtokotai lɛ ni wɔ hwanyaa snoo lɛ yɛ mli wɔshwieɔ. Agbɛnɛ hu lɛ, kootu kakadaji ni wɔwo lɛ anaa fɔɔ beni wɔnyiɛɔ snoo lɛ mli lɛ. Kɛkɛ lɛ, kɛ aisi lɛ mɔ lɛ lɛ, eshɔ̃ keketee. Yoo ko kɛɛ akɛ, “Nyɛsuɔmɔ mli ní nyɛjɛ nyɛshiɛɔ yɛ fɛ̃i nɛɛ mli lɛ tsɔɔ akɛ nyɛhemɔkɛyeli lɛ mli wa waa.” Wɔnyiɛɔ nɔ ni fe kilomitai 11 dani wɔshɛɔ nakai shĩa lɛ.

Akɛni hei ni wɔyaa lɛ jɛkɛ hewɔ lɛ, bei pii lɛ wɔwɔɔ mɛi ashĩai kɛ je na wɔ. Kɛ́ je bɔi namɔ lɛ, wɔbiɔ kɛ́ abaana he ko aha wɔ ni wɔwɔ. Mɛi aŋɔɔ ni wɔyahiɔ lɛ bɛ nɔ ko, shi amɛhe yɛ miishɛɛ ni amli hi, ni jeee wɔɔhe pɛ amɛhaa wɔ, shi nɔ ni wɔbaaye hu. Bei pii lɛ, wɔwɔɔ sai ni akɛ kooloi ahe woji fee lɛ anɔ. Bei komɛi hu lɛ, wɔyeɔ ŋɔɔmɔ fioo. Akɛ nɔkwɛmɔnɔ lɛ, yoo ko ni yɔɔ ŋwɛi tsũ shĩa ko mli lɛ kɛ wɔ tee gbɔiatoohe ni yɔɔ ŋwɛi tsũ lɛ nɔ lɛ mli, ni asaa saatso fɛfɛo ko kɛ enɔ saanɔbo yɛŋ futaa aha wɔ. Bei pii lɛ, wɔkɛ mɛi ni feɔ wɔ gbɔ lɛ gbaa Biblia lɛ mli saji aahu kɛyashiɔ jenamɔ yi waa. Be ko lɛ, wɔkɛ nuu ko kɛ eŋa wɔ tsũ kome mli, amɛkã afã ni wɔ hu wɔkã afã. Biblia mli sane ni wɔkɛ amɛ gba lɛ bote duŋ lɛ mli aahu kɛyashi maŋkɛ̃. Loloolo lɛ, nuu lɛ kɛ eŋa lɛ miibibii saji babaoo—kɛ mɔ nɛ bi lɛ kɛkɛ lɛ mɔ nɛ hu ebi.

WƆYE OMANYE YƐ SƆƆMƆ LƐ MLI

Eyɛ mli akɛ tsei faaa yɛ Lapland moŋ, shi eji maŋ fɛfɛo. Shi wɔna akɛ mɛi ni kaseɔ Yehowa he nii lɛ ahe yɛ fɛo kwraa fe maŋ lɛ. Mɛi ni wɔshiɛɔ wɔhaa amɛ lɛ ateŋ mɛi komɛi ji gbɔi ni ebato Lapland kɛha tsei agbalamɔ. Bei komɛi lɛ, wɔyaninaa hii babaoo yɛ shĩai lɛ ekomɛi amli. Hii nɛɛ nyaa Biblia mli sane lɛ he waa ni amɛsumɔɔ hu ni amɛkane wɔwoji lɛ.

Wɔná niiashikpamɔi ni yɔɔ miishɛɛ babaoo. Be ko lɛ, watsi ni yɔɔ tsɔji amaamɔhe lɛ ho he minitii enumɔ, ni no ha wɔbɔɔs lɛ shi wɔ. Wɔkpɛ wɔyiŋ akɛ wɔbaawo bɔɔs kroko kɛya akrowa kroko mli. Wɔshiɛko yɛ jɛmɛ pɛŋ. Oblayoo ko ni wɔkɛkpe yɛ klɛŋklɛŋ shĩa ni wɔtee mli lɛ kɛɛ akɛ, ‘Miikpa nyɛ gbɛ, ni nyɛba hu.’ Wɔkɛ enyɛmi yoo ko kaseɔ Biblia lɛ. Oblayoo lɛ ekɛɛ enyɛmi yoo lɛ koni ekɛɛ wɔ ni wɔbasara lɛ nakai gbi lɛ. Shi wɔnine shɛɛɛ eshɛɛ lɛ nɔ. Wɔkɛ lɛ kɛ ewekumɛi komɛi ni ekɛyɔɔ akutso mli lɛ bɔi Biblia lɛ kasemɔ. Etsɛɛɛ tsɔ ni wɔtsa nikasemɔi nɛɛ fɛɛ wɔfee lɛ ekome, ni mɛi 12 baa. Kɛjɛ nakai beaŋ kɛbaa nɛɛ, weku nɛɛ mli bii babaoo ebatsɔmɔ Yehowa Odasefoi.

 Yɛ afi 1965 lɛ, akɛwɔ tee asafo ni wɔyɔɔ mli amrɔ nɛɛ mli yɛ Kuusamo yɛ Arctic Circle lɛ shishigbɛ kpaakpa lɛ. Nakai beaŋ lɛ, shiɛlɔi fioo pɛ yɔɔ asafo lɛ mli. Shishijee lɛ, ewa kɛha wɔ akɛ wɔɔshiɛ yɛ shikpɔŋkuku lɛ mli. Mɛi ni yɔɔ jɛmɛ lɛ sumɔɔ Nyɔŋmɔjamɔ waa, shi amɛsumɔɔɔ Odasefoi asane. Shi, amɛteŋ mɛi babaoo buɔ Biblia lɛ, ni no ye ebua ni wɔnyɛ wɔkɛ amɛ gba sane. No hewɔ lɛ, fiofio lɛ wɔbɔ mɔdɛŋ wɔle amɛ, ni yɛ afii enyɔ sɛɛ lɛ, ewaaa haaa wɔ dɔŋŋ akɛ wɔɔje Biblia mli nikasemɔi ashishi.

WƆYƐ EKÃA LOLO YƐ SƆƆMƆ LƐ MLI

Mɛi ni wɔkɛkase nii lɛ ateŋ mɛi komɛi

Ŋmɛnɛ lɛ, wɔbɛ hewalɛ ni baaha wɔnyɛ wɔtsɛ waa yɛ shiɛmɔ nitsumɔ lɛ mli moŋ, shi kɛ hoo lɛ wɔyaa shiɛmɔ gbi fɛɛ gbi. Sanekpakpa lɛ ni wɔshiɛɔ yɛ wɔshikpɔŋkuku ni da nɛɛ mli lɛ bafee mlɛo kwraa beni wɔnyɛmi Tauno binuu wo Aili hewalɛ ni ekase tsɔne kudɔmɔ lɛ, ni Aili nine shɛ tsɔne kudɔmɔ he gbɛŋmɛɛ wolo nɔ afi 1987 beni eye afii 56. Atee nɔ aye abua wɔ beni amã Maŋtsɛyeli Asa hee ni wɔfã kɛyahi tsũ ni tsa he lɛ mli lɛ.

Mɛi babaoo ni emɔ anɔkwale lɛ mli yɛ Finland kooyigbɛ lɛ haa wɔnáa miishɛɛ waa. Beni wɔje be fɛɛ sɔɔmɔ lɛ shishi yɛ maŋ nɛɛ mli lɛ, no mli lɛ shiɛlɔi komekomei pɛ yɔɔ biɛ. Shi amrɔ nɛɛ amɛyɛ kpokpaa kome kɛ emli asafoi babaoo. Bei pii kɛ́ wɔtee kpeei bibii kɛ kpeei wuji lɛ, mɛi baa wɔŋɔɔ amɛbajieɔ amɛhe shi amɛtsɔɔ wɔ ni amɛkɛɔ akɛ, beni amɛji gbekɛbii lɛ wɔkɛ amɛweku lɛ bakase Biblia lɛ. Dumɔwui ni akɛ afii loo afii nyɔŋmai abɔ du be ko ni eho lɛ ewo yibii!—1 Kor. 3:6.

Yɛ nugbɔnɛmɔ beaŋ po lɛ, wɔkɛ miishɛɛ shiɛɔ

Beni shɛɔ afi 2008 lɛ, wɔná afii 50 akɛ gbɛgbalɔi krɛdɛi. Wɔdaa Yehowa shi akɛ wɔnyɛ wɔwo wɔhe hewalɛ ni wɔtee nɔ wɔsɔmɔ lɛ. Wɔshihilɛ yɛ mlɛo, shi nɔ ko he ehiako wɔ pɛŋ. (Lala 23:1) Amrɔ nɛɛ, wɔna akɛ kulɛ ehe ehiaaa ni wɔhao wɔhe tamɔ wɔfee be ni wɔje gbɛgbamɔ lɛ shishi lɛ! Miishɛɛ sane ji akɛ, yɛ afii nɛɛ amli fɛɛ lɛ, Yehowa ewaje wɔ taakɛ ewo shi yɛ Yesaia 41:10 lɛ akɛ: “Mawajeo, ni maye mabuao; ni mahiɛ omli kɛ mijalɛ ninejurɔ lɛ.”

Yɛ afii 50 ni wɔkɛsɔmɔ akɛ gbɛgbalɔi lɛ amli fɛɛ lɛ, wɔtaaa wɔshika lɛ he da!