Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ—Nikasemɔ Nɔ  |  April 2013

Amɛkɛ Amɛhe Ha yɛ Amɛsuɔmɔ Naa—Yɛ Mexico

Amɛkɛ Amɛhe Ha yɛ Amɛsuɔmɔ Naa—Yɛ Mexico

EJI miishɛɛ sane akɛ wɔɔle akɛ Odasefoi oblahii kɛ oblayei babaoo miiha amɛshihilɛ miifee mlɛo bɔni afee ni amɛnyɛ amɛlɛɛ amɛ-Kristofoi asɔɔmɔ lɛ mli. (Mat. 6:22) Mɛɛ tsakemɔi amɛfeɔ? Mɛɛ naagbai amɛkɛkpeɔ? Kɛha sanebimɔi nɛɛ ahetoo lɛ, ha wɔsusu mɛi komɛi ni miisɔmɔ yɛ Mexico amrɔ nɛɛ lɛ ahe wɔkwɛ.

“ESA AKƐ WƆFEE TSAKEMƆI”

Dustin Jassa ni jɛ United States lɛ bote gbalashihilɛ mli yɛ January 2007. No sɛɛ etsɛɛɛ nɔŋŋ lɛ, amɛhe lɛlɛ ko ni tsũ kɛ nɔ fɛɛ nɔ yɛ mli ni amɛhi mli afi muu fɛɛ yɛ nu hiɛ—enɛ ji nɔ ko ni amɛshwe aahu. Amɛŋmɛ lɛlɛ lɛ sɛkɛ yɛ he ko ni bɛŋkɛ Astoria ni yɔɔ Oregon, yɛ U.S.A. maŋ fɛfɛo ko ni tsei kɛ gɔji ni snoo enɛ eshwie nɔ yɔɔ mli lɛ mli, ni jɛmɛ kɛ Pacific Ocean lɛ jɛkɛɛɛ kwraa. Dustin kɛɛ akɛ, “Nɔ fɛɛ nɔ ni ohiŋmɛi baagba nɔ yɛ jɛmɛ lɛ, fɛo ji mɛ!” Gbalashihilɛ mli hefatalɔi nɛɛ nu he akɛ amɛha amɛshihilɛ efee mlɛo, ni akɛ amɛkɛ amɛhe miifɔ̃ Yehowa nɔ. Amɛsusu akɛ, ‘Wɔwɔɔ lɛlɛ ni kɛlɛ ji mitai 7.9 mli, wɔkɛ wɔbe fã tsuɔ nii, wɔkɛ maŋsɛɛ wiemɔ asafo ko yaa kpeei, ni bei komɛi lɛ wɔkɛ wɔhe woɔ gbɛgbalɔi awamɔ nitsumɔ lɛ mli.’ Shi sɛɛ mli lɛ, amɛ diɛŋtsɛ amɛna akɛ amɛmiilaka amɛhe. Dustin wie akɛ: “Yɛ nɔ najiaŋ ni wɔɔye wɔbua asafo lɛ, bei pii lɛ wɔkɛ be lɛ moŋ saa wɔlɛlɛ lɛ.” Ekɛfata he akɛ: “Wɔle akɛ kɛ́ wɔmiisumɔ lɛɛlɛŋ akɛ  wɔkɛ Yehowa aye klɛŋklɛŋ gbɛhe yɛ wɔshihilɛ mli lɛ, esa akɛ wɔfee tsakemɔi.”

Jassa kɛfata he akɛ: “Dani wɔbaabote gbalashihilɛ mli lɛ, no mli lɛ miyɛ Mexico, ni mikɛ Blɔfo asafo ko bɔɔ. Minya jɛmɛ sɔɔmɔ nitsumɔ lɛ he waa, ni no mli lɛ miishwe ni maku misɛɛ kɛya jɛmɛ ekoŋŋ.” Bɔni afee ni Dustin kɛ Jassa awo shwelɛ ni amɛyɔɔ akɛ amɛbaayasɔmɔ yɛ maŋsɛɛ lɛ mli hewalɛ lɛ, amɛbɔi nyɛmimɛi ni fã kɛtee hei ni hiamɔ lɛ da yɛ lɛ ahe saji kanemɔ yɛ amɛweku jamɔ lɛ mli. (Yoh. 4:35) Dustin kɛɛ akɛ: “Wɔ hu wɔmiisumɔ ni wɔná miishɛɛ ni tamɔ nakai.” Beni Dustin kɛ Jassa nanemɛi komɛi ni yɔɔ Mexico lɛ kɛɛ amɛ akɛ atse kuu ko yɛ jɛi ni yelikɛbuamɔ he miihia amɛ lɛ, amɛkpɛ amɛyiŋ akɛ amɛbaaya. Amɛkpa amɛnitsumɔi lɛ, amɛhɔɔ amɛlɛlɛ shĩa lɛ, ni amɛfã kɛtee Mexico.

“NƆ KO NI FE FƐƐ YƐ WƆSHIHILƐ MLI”

Dustin kɛ Jassa yahi Tecomán—ni maŋ nɛɛ hu bɛŋkɛ Pacific Ocean lɛ, shi eyɛ Astoria wuoyigbɛ aaafee kilomitai 4,345. Dustin kɛɛ akɛ: “Yɛ nɔ najiaŋ ni wɔɔná kɔɔyɔɔ ŋanii ni wɔkwɛ gɔji fɛfɛji lɛ, hulu lɛ naa wa moŋ yɛ jɛmɛ, ni abonua tsei sɔŋŋ yɔɔ jɛmɛ.” Shishijee mli lɛ, amɛnaaa nitsumɔ. Akɛni amɛbɛ shika hewɔ lɛ, amɛyeɔ omɔ kɛ yɔɔ shii enyɔ yɛ gbi lɛ mli, ni amɛfee nakai otsii abɔ. Jassa kɛɛ akɛ: “Shi beni efee tamɔ nɔ ni niyenii lɛ miihe ajie wɔ lɛ, wɔ-Biblia nikaselɔi lɛ baha wɔ maŋoi, akwadui, akpakpai kɛ abonuai pii!” Fee sɛɛ lɛ, gbalashihilɛ mli hefatalɔi lɛ baná nitsumɔ yɛ skul ko ni yɔɔ Taiwan, ni amɛtsɔɔ mɛi anii kɛtsɔɔ Intanɛt lɛ nɔ. Amrɔ nɛɛ shika ni amɛnáa yɛ nitsumɔ nɛɛ mli lɛ fa aahu akɛ amɛnine shɛɔ amɛdaa gbi hiamɔ nii anɔ.

Te Dustin kɛ Jassa nu he yɛ shihilɛ hee ni amɛyaje mli nɛɛ he amɛha tɛŋŋ? Amɛkɛɛ akɛ, “Fã ni wɔfã nɛɛ ji nɔ ko ni fe fɛɛ yɛ wɔshihilɛ mli.” Amɛkɛfata he akɛ: “Wekukpaa ni kã wɔ kɛ Yehowa kɛ wɔyi enyɔ lɛ teŋ lɛ mli ewa fe bɔ ni wɔkpaa gbɛ po. Daa gbi lɛ, wɔfeɔ ekome kɛfeɔ nibii pii—wɔyaa shiɛmɔ, wɔsusuɔ bɔ ni wɔɔfee wɔye wɔbua wɔ-Biblia mli nikaselɔi lɛ ahe, ni wɔsaa wɔhe hu kɛha asafoŋ kpeei. Agbɛnɛ hu, wɔye wɔhe kɛjɛ naagbai ni tsutsu ko lɛ wɔkɛkpeɔ lɛ ahe.” Amɛkɛfata he akɛ: “Amrɔ nɛɛ, wɔnu nɔ ni kulɛ lɛ wɔnuuu shishi jogbaŋŋ lɛ shishi—bɔ ni shiwoo ni yɔɔ Lala 34:9 lɛ ji anɔkwale ha lɛ, he ni kɛɔ akɛ, ‘Nyɛsaa nyɛnaa nyɛkwɛa, ni nyɛaana akɛ Yehowa hi’ lɛ.”

NITSULƆI AKPEI ABƆ KƐ AMƐHE HAA YƐ AMƐSUƆMƆ NAA—MƐNI TSIRƐƆ AMƐ?

Nyɛmimɛi ni fa fe 2,900—mɛi ni ebote gbalashihilɛ mli kɛ oshijafoi, ni amɛteŋ mɛi babaoo yɛ afi 20 afii lɛ amli loo afi 30 afii lɛ amli—efã kɛyahi Mexico maji ni Maŋtsɛyeli shiɛlɔi ahe hiaa waa yɛ lɛ amli. Mɛni hewɔ Odasefoi nɛɛ fɛɛ kɛ amɛhe wo nitsumɔ ni kãaa  shi akɔɔɔ nɛɛ mli lɛ? Beni abi amɛteŋ mɛi komɛi sane nɛɛ lɛ, amɛtsɔɔ yiŋtoi etɛ komɛi ahewɔ ni amɛfee nakai. Mɛni ji yiŋtoi nɛɛ?

Leticia kɛ Hermilo

Koni amɛkɛjie suɔmɔ kpo amɛtsɔɔ Yehowa kɛ amɛnaanyo gbɔmɔ. Abaptisi Leticia beni eye afii 18. Ekɛɛ akɛ: “Beni mijɔɔ miwala nɔ miha Yehowa lɛ, minu shishi akɛ nɔ ni enɛ tsɔɔ ji, ni majɛ mitsui muu fɛɛ kɛ misusuma muu fɛɛ mli masɔmɔ lɛ. No hewɔ lɛ, bɔni afee ni matsɔɔ akɛ misumɔɔ Yehowa kɛ mitsui fɛɛ lɛ, miisumɔ ni mikɛ mibe babaoo kɛ mihewalɛ atsu nii yɛ esɔɔmɔ lɛ mli.” (Mar. 12:30) Hermilo, ni amrɔ nɛɛ ekɛ Leticia ebote gbalashihilɛ mli lɛ fã eyahi he ni Maŋtsɛyeli shiɛlɔi ahe hiaa yɛ beni eye aaafee afii 20 kɛmiimɔ afii 24 lɛ. Ewie akɛ: “Miyɔse akɛ mɛi ni ayeɔ abuaa yɛ mumɔŋ lɛ ji gbɛ ni hi fe fɛɛ ni matsɔ nɔ mikɛjie suɔmɔ kpo matsɔɔ mikutsoŋbii lɛ.” (Mar. 12:31) No hewɔ lɛ eshi Monterrey, ni ji maŋtiase ni yɔɔ nii waa lɛ, he ni etsuɔ nii yɛ shikatoohe ni enáa ogbɔjɔ shihilɛ mli ŋɔɔmɔ lɛ mli, ni efã kɛtee maŋ bibioo ko mli.

Essly

Koni amɛná miishɛɛ diɛŋtsɛ ni sɛɛ tsɛɔ. Beni abaptisi Leticia etsɛɛɛ lɛ, efata nyɛmi yoo gbɛgbalɔ ko ni he esa he kɛtee akrowa ko, ni amɛyashiɛ yɛ jɛmɛ nyɔɔŋ kome. Leticia wie akɛ: “Minaa kpɛ mihe waa. Beni mina bɔ ni mɛi lɛ náa Maŋtsɛyeli sane ni wɔshiɛɔ lɛ he miishɛɛ lɛ, eha miná miishɛɛ waa. Beni nyɔɔŋ lɛ gbo lɛ, mikɛɛ mihe akɛ, ‘Enɛ ji nɔ ni misumɔɔ ni mikɛ miwala atsu!’” Nakai miishɛɛ lɛ nɔŋŋ ji nɔ ni kanya Essly, ni ji nyɛmi yoo oshijafo ko ni eye afii 20 kɛmiimɔ afii 24 lɛ koni lɛ hu eyasɔmɔ yɛ he ni hiamɔ lɛ da yɛ. Beni eyaa sɛkɛndre skul lɛ, ekɛ Odasefoi ni yɔɔ ekãa ni yasɔmɔ yɛ he ni hiamɔ lɛ da yɛ lɛ ná sharamɔ. Ekɛɛ akɛ, “Beni mina miishɛɛ ni nyɛmimɛi hii kɛ yei nɛɛ yɔɔ lɛ, eha mikpɛ miyiŋ akɛ mikɛ mihe baawo nitsumɔ ni amɛtsuɔ lɛ mli.” Nyɛmimɛi yei babaoo efee amɛnii tamɔ Essly. Yɛ anɔkwale mli lɛ, ayɛ nyɛmimɛi yei oshijafoi ni fa fe 680 yɛ Mexico ni miisɔmɔ yɛ hei ni hiamɔ lɛ da yɛ. Mɛɛ nɔkwɛmɔnɔ kpakpa amɛfeɔ amɛhaa oblahii kɛ oblayei kɛ onukpai fɛɛ nɛkɛ!

Koni amɛná shihilɛ kpakpa ni haa mɔ náa miishɛɛ. Beni Essly gbe sɛkɛndre skul naa lɛ, aha lɛ hegbɛ ni eya yunivɛsiti ni awo he nyɔmɔ aha lɛ. Etipɛŋfoi wo lɛ hewalɛ ni ekpɛlɛ nɔ, koni enyɛ ená “shihilɛ kpakpa”—ená digrii, nitsumɔ, kar, kɛ agbɛnɛ hu, ni enyɛ efã gbɛ kɛyashara shi yɛ hei srɔtoi. Kɛlɛ, ebooo amɛŋaawoo lɛ toi. Essly kɛɛ akɛ: “Minanemɛi Kristofoi babaoo tiu nibii nɛɛ asɛɛ, ni nɔ ni miyɔse ji akɛ, amɛkɛ mumɔŋ otii mamɔɔɔ amɛhiɛ dɔŋŋ. Miyoo hu akɛ, beni amɛtiu je lɛŋ nibii lɛ asɛɛ babaoo lɛ, naagbai ni amɛkɛkpe lɛ ha amɛnijiaŋ je wui kwraa. Miisumɔ ni mikɛ hewalɛ ni miyɔɔ yɛ miblayeiaŋ lɛ asɔmɔ Yehowa kɛmɔ shi.”

Racquel kɛ Phillip

 Essly yakase nɔ ko ni baaha ená nitsumɔ ni baaye abua lɛ ni ekwɛ ehe beni etsuɔ gbɛgbamɔ nitsumɔ lɛ, kɛkɛ ni sɛɛ mli lɛ efã kɛyahi he ko ni Maŋtsɛyeli shiɛlɔi ahe miihia waa yɛ. Ebɔ mɔdɛŋ po akɛ ebaakase maŋ ni etee nɔ, ni ji Otomibii kɛ Tlapanecobii awiemɔ lɛ. Amrɔ nɛɛ, kɛ́ ekwɛ afii etɛ ni ekɛsɔmɔ yɛ maŋ nɛɛ mli lɛ, ekɛɔ akɛ: “Shiɛmɔ yɛ he ni hiamɔ lɛ da yɛ lɛ eha mitsui enyɔ mimli yɛ shihilɛ mli. Nɔ ni fe fɛɛ lɛ, eha wekukpaa ni kã mi kɛ Yehowa teŋ lɛ mli ewa.” Phillip Racquel, gbalashihilɛ mli hefatalɔi ni eye afii 30 kɛmiimɔ afii 34, ni jɛ United States lɛ hu wie akɛ: “Je lɛ miitsake oyayaayai aahu akɛ mɛi babaoo susuɔ akɛ amɛshihilɛ baanyɛ atsake be fɛɛ be. Shi shiɛmɔ yɛ he ni mɛi babaoo miibo Biblia mli sane lɛ toi lolo lɛ haa wɔnaa akɛ wɔkɛ wɔshihilɛ miitsu nii yɛ gbɛ kpakpa nɔ. Ehaa mɔ tsui nyɔɔ emli waa!”

BƆ NI ESA AKƐ ATSU NAAGBAI AHE NII AHA

Verónica

Anɔkwa, nyɛmimɛi ni yashiɛɔ yɛ hei ni Maŋtsɛyeli shiɛlɔi ahe hiaa yɛ lɛ hu yɛ naagbai ni amɛkɛkpeɔ. Naagbai nɛɛ ateŋ ekome ji bɔ ni amɛaafee amɛná shika kɛkwɛ amɛhe. Bɔni afee ni onyɛ okwɛ ohe lɛ, ehe miihia ni otsake ohe owo jɛmɛ shihilɛ lɛ mli. Verónica, ni ji gbɛgbalɔ ko ni he esa waa lɛ tsɔɔ mli akɛ: “Yɛ he ko ni miyasɔmɔ yɛ lɛ, mihɔɔ niyenii. Yɛ he kroko ni mitee lɛ, mihɔɔ atade ni miku yi hu. Amrɔ nɛɛ, misaa mɔ ko shĩa, ni mitsɔɔ fɔlɔi fioo komɛi hu nii yɛ bɔ ni amɛbaafee amɛkɛ amɛbii agba sane lɛ he.”

Akɛ mɛi komɛi aaatsake amɛhe amɛwo mɛi krokomɛi akusum kɛ bɔ ni amɛhiɔ shi amɛhaa lɛ mli lɛ baanyɛ afee naagba waa, titri lɛ kɛ́ oyɛ akrowa. Nakai eba lɛ yɛ Phillip kɛ Racquel gbɛfaŋ beni amɛyasɔmɔ yɛ he ni awieɔ Nahuatl yɛ lɛ. Phillip kɛɛ akɛ, “Srɔtofeemɔ agbo yɛ bɔ ni wɔhiɔ shi kɛ bɔ ni amɛhiɔ shi amɛhaa lɛ teŋ.” Mɛni ye ebua amɛ ni amɛnyɛ amɛtsake amɛhe amɛwo shihilɛ lɛ mli? Amɛkɛɛ akɛ: “Wɔgbala wɔjwɛŋmɔ kɛtee nibii kpakpai ni wɔna yɛ Nahuatlbii lɛ ahe lɛ anɔ—ekomefeemɔ ni yɔɔ amɛwekui lɛ amli, bɔ ni amɛkɛ amɛhe yeɔ yɛ anɔkwayeli mli, kɛ bɔ ni amɛdɛŋ kpɔɔ lɛ.” Racquel kɛfata he akɛ: “Wɔkase nibii pii kɛjɛ jɛmɛ kɛ agbɛnɛ hu kɛjɛ wɔnyɛmimɛi ni jɛ jɛmɛ lɛ ni wɔkɛfee ekome kɛsɔmɔ lɛ adɛŋ.”

BƆ NI OOOFEE OSAA OHE OTO

Kɛ́ obaasumɔ ni oyasɔmɔ yɛ he ko ni hiamɔ lɛ da yɛ lɛ, mɛni obaanyɛ ofee kɛsaa ohe oto? Nyɛmimɛi hii kɛ yei ni efee nakai pɛŋ lɛ kɛɛ akɛ: Dani obaaya lɛ, ha oshihilɛ afee mlɛo amrɔ nɛɛ, ni oha omii ashɛ nii ni oyɔɔ lɛ he. (Fil. 4:11, 12) Mɛni ekoŋŋ obaanyɛ ofee? Leticia kɛɛ akɛ: “Mitsuuu heloonaa nitsumɔ ni baaha mahi he kome be kplaŋŋ. Miisumɔ ni manyɛ mashi kɛya he fɛɛ he ni hiamɔ lɛ yɔɔ lɛ be fɛɛ be kɛ́ ehe bahia akɛ mafee nakai.” Hermilo kɛɛ akɛ: “Mikase bɔ ni ahoɔ nii, afɔɔ nii ahe kɛ bɔ ni atoɔ atadei anɔ.” Verónica wie akɛ: “Beni mikɛ mifɔlɔi kɛ minyɛmimɛi lɛ yɔɔ shĩa lɛ, miwaa kɛsaa shĩa lɛ, ni mikase bɔ ni ahoɔ niyenii ni hewalɛ yɔɔ mli ni biii ni afite shika pii. Mikase bɔ ni atoɔ shika hu.”

Amelia kɛ Levi

Levi Amelia ni jɛ United States ni bote gbalashihilɛ mli afii kpaanyɔ nɛ lɛ wie bɔ ni nɔ pɔtɛɛ ni he hiaa amɛ ni amɛtsi tã yɛ amɛsɔlemɔ mli lɛ ye ebua amɛ kɛsaa amɛhe kɛyasɔmɔ yɛ Mexico. Levi wie akɛ: “Wɔbu shika abɔ ni baashɛ wɔ kɛyasɔmɔ yɛ maŋsɛɛ afi lɛ naa, no sɛɛ lɛ wɔkɛɛ Yehowa yɛ sɔlemɔ mli ni eye ebua wɔ ni wɔná nakai shika.” Yɛ nyɔji komɛi asɛɛ lɛ, amɛnyɛ amɛto shika abɔ ni amɛtsi tã yɛ sɔlemɔ lɛ mli lɛ, oya nɔŋŋ kɛkɛ ni amɛshi kɛtee. Levi kɛɛ akɛ: “Yehowa eha wɔ nɔ pɔtɛɛ ni wɔbi lɛ lɛ, no hewɔ lɛ amrɔ nɛɛ esa akɛ wɔ hu wɔye wɔshiwoo lɛ nɔ.” Amelia kɛfata he akɛ: “Wɔsusu akɛ wɔbaaye afi pɛ, shi amrɔ nɛɛ wɔhi biɛ afii kpawo, ni ebako wɔyiŋ akɛ wɔbaashi! Biɛ hilɛ haa wɔnaa faŋŋ akɛ, Yehowa nine yɛ wɔhe. Gbi fɛɛ gbi lɛ, wɔnaa odaseyeli ni tsɔɔ ejurɔ ni efeɔ wɔ lɛ.”

Adam kɛ Jennifer

Sɔlemɔ ye ebua Adam Jennifer, ni ji gbalashihilɛ mli hefatalɔi ni jɛ United States ni miisɔmɔ yɛ shikpɔŋkuku ni awieɔ Blɔfo yɛ mli yɛ Mexico lɛ hu waa. Amɛwie akɛ: “Kaamɛ ni hegbɛ lɛ kɛ ehe ba dã. Sɔlemɔ yɛ shwelɛ ni oyɔɔ akɛ obaayasɔmɔ yɛ maŋsɛɛ lɛ he, ni otsu osɔlemɔ lɛ he nii. Feemɔ oshihilɛ mlɛo, ŋmaa nitsumɔhe nine ni obaasumɔ ni oyasɔmɔ yɛ eshikpɔŋkuku mli lɛ wolo, kɛ́ oná shika abɔ ni he baahia bo lɛ, tsu he nii amrɔ nɔŋŋ!” * Kɛ́ ofee nakai lɛ, obaaná miishɛɛ waa ni ohe baawa yɛ mumɔŋ.

^ kk. 21 Kɛ́ ootao ole enɛ he sane babaoo lɛ, kwɛmɔ sane ni ji “Ani Obaanyɛ ‘Oya Makedonia’?” ni je kpo yɛ August 2011 Wɔ Maŋtsɛyeli Sɔɔmɔ lɛ mli lɛ.

 

Ekrokomɛi Hu Nɛ

NAMƐI FEƆ YEHOWA SUƆMƆNAA NII ŊMƐNƐ?

Mɛɛ Srɔtoi Skul Ato he Gbɛjianɔ Ahã Gbɛgbalɔi?

Mɛɛ tsɔsemɔ krɛdɛɛ ato he gbɛjianɔ ahã mɛi ni kɛ amɛbe fɛɛ shiɛɔ maŋtsɛyeli lɛ he sane lɛ?