Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) MARCH 2013

Ní ‘Wɔle Nyɔŋmɔ’ Nɛɛ—Mɛni Shwɛɔ Wɔ?

Ní ‘Wɔle Nyɔŋmɔ’ Nɛɛ—Mɛni Shwɛɔ Wɔ?

‘Nyɛbale Nyɔŋmɔ.’—GAL. 4:9.

1. Mɛni hewɔ kɔɔyɔŋ lɛlɛ kudɔlɔ kwɛɔ wolo ko ni aŋmala nibii ni esa akɛ ekwɛ yɛ mli lɛ nɔ dani efãa lɛ?

BE FƐƐ BE ni kɔɔyɔŋ lɛlɛ kudɔlɔ ko baafã lɛ, etsɔɔ hiɛ ekwɛɔ akɛ nɔ fɛɛ nɔ yɛ jogbaŋŋ yɛ kɔɔyɔŋ lɛlɛ lɛ he lo, dani efãa. Ekwɛɔ wolo ko ni aŋmala nibii ni esa akɛ ekwɛ lɛ yɛ mli lɛ nɔ kɛfeɔ enɛ, bɔni afee ni enyɛ ená nɔmimaa akɛ ekwɛ nɔ fɛɛ nɔ ni esa akɛ ekwɛ lɛ. Kɛ́ efeee nakai lɛ, enaŋ naagba ko ni baanyɛ aha kɔɔyɔŋ lɛlɛ lɛ ayagbee shi. Shi ani ole kɔɔyɔŋ lɛlɛ kudɔlɔi titrii ni awoɔ amɛ hewalɛ akɛ amɛfee enɛ? Amɛ ji mɛi ni kɛ afii babaoo ekudɔ kɔɔyɔŋ lɛlɛ lɛ. Ewaaa akɛ kɔɔyɔŋ lɛlɛ kudɔlɔ ni he esa waa lɛ aaaku ehiɛ eshwie nibii ni esa akɛ ekwɛ lɛ ekomɛi anɔ.

2. Mɛni awoɔ Kristofoi hewalɛ ni amɛfɔ feemɔ?

2 Taakɛ kɔɔyɔŋ lɛlɛ kudɔlɔ ni miisumɔ ni eyashɛ shweshweeshwe lɛ feɔ lɛ, bo hu nibii komɛi yɛ ni esa akɛ okwɛ ni eha oná nɔmimaa akɛ oyɛ hemɔkɛyeli ni mli wa ni baanyɛ aha odamɔ shihilɛi ni jaraa anaa. Kɛ́ kpaako abaptisi wɔ jio, abaptisi wɔ etsɛ jio lɛ, ehe miihia ni wɔpɛi wɔhemɔkɛyeli kɛ bɔ ni wɔjáa Yehowa Nyɔŋmɔ wɔhaa lɛ mli wɔkwɛ yɛ be kɛ beaŋ. Kɛ́ wɔfɔɔɔ enɛ feemɔ loo wɔfeee lɛ jogbaŋŋ lɛ, wɔbaafite wɔ kɛ Yehowa teŋ wekukpaa lɛ. Biblia lɛ bɔɔ wɔ kɔkɔ akɛ: “Mɔ ni susuɔ akɛ edamɔ shi lɛ akwɛ ehe ni ahi koni ekagbee shi.”—1 Kor. 10:12.

3. Mɛni ehe bahia ni Kristofoi ni yɔɔ Galata lɛ afee?

3 Ehe bahia ni Kristofoi ni yɔɔ Galata lɛ apɛi amɛhemɔkɛyeli lɛ mli amɛkwɛ, ni amɛhiɛ asɔ mumɔŋ heyeli ni amɛyɔɔ lɛ. Yesu afɔleshaa lɛ gbele gbɛ eha mɛi fɛɛ ni heɔ enɔ amɛyeɔ lɛ koni amɛbale Nyɔŋmɔ yɛ gbɛ krɛdɛɛ nɔ, ni tsɔɔ akɛ, amɛbatsɔmɔ Nyɔŋmɔ bii! (Gal. 4:9) Bɔni afee ni Galatabii lɛ ahiɛ  wekukpaa krɛdɛɛ nɛɛ mli lɛ, ehe bahia ni amɛkpoo nibii ni Yudafoi ni kɛɛ esa akɛ aye Mose Mla lɛ nɔ doo lɛ tsɔɔ lɛ. Shi no mli lɛ, Nyɔŋmɔ kɛ Mla nɛɛ tsuuu nii dɔŋŋ, ni Jeŋmajiaŋbii foolɔi ni yɔɔ asafoi lɛ amli lɛ ehiko Mla lɛ shishi pɛŋ! Ehe bahia ni Yudafoi lɛ kɛ Jeŋmajiaŋbii lɛ fɛɛ aya amɛhiɛ yɛ mumɔŋ. Enɛ biɔ ni amɛnu shishi akɛ, Nyɔŋmɔ kpaaa gbɛ akɛ mɔ ko aye Mose Mla lɛ nɔ dani ebu lɛ jalɔ.

NIBII NI ESA AKƐ MƆ AFEE TSUTSU KƐ EETAO ELE NYƆŊMƆ

4, 5. Mɛɛ ŋaa Paulo wo Galatabii lɛ, ni mɛɛ gbɛ nɔ ŋaawoo nɛɛ kɔɔ wɔhe?

4 Yiŋtoo ko hewɔ ni bɔfo Paulo wo Galatabii lɛ ŋaa lɛ, no ji akɛ: koni anɔkwa Kristofoi lɛ ateŋ mɔ ko akakpale kɛjɛ Biblia mli anɔkwale lɛ he ni eku esɛɛ kɛtee nibii ni eshi yɛ sɛɛ lɛ ahe. Yehowa kɛ emumɔ lɛ tsirɛ bɔfo lɛ ni ewo Galata asafo lɛ, kɛ E-jálɔi fɛɛ hewalɛ ni amɛfĩ shi shiŋŋ.

5 Esa akɛ wɔ fɛɛ wɔkai bɔ ni fee ni wɔye wɔhe kwraa yɛ mumɔŋ ni wɔbatsɔmɔ Yehowa Odasefoi lɛ. Bɔni afee ni onyɛ ofee nakai lɛ, susumɔ sanebimɔi enyɔ nɛɛ ahe: Ani okaiɔ nibii ni ofee koni osa kɛha baptisimɔ lɛ? Ani okaiɔ bɔ ni fee ni obale Nyɔŋmɔ ni lɛ hu ebale bo, ni no ha oná mumɔŋ heyeli lɛ?

6. Mɛɛ nibii ahe wɔbaasusu yɛ nikasemɔ nɛɛ mli?

6 Kɛ́ wɔɔkɛɛ lɛ, wɔ fɛɛ wɔfee nibii nɛɛhu. Nibii nɛɛhu nɛɛ ji nɔ ni ato naa yɛ akrabatsa ni yitso ji  “Nibii ni Haa Wɔshɛɔ Baptisimɔ He ni Haa Wɔyaa Nɔ Wɔdaa yɛ Mumɔŋ” lɛ mli lɛ. Kɛ́ wɔtee nɔ wɔha nibii nɛɛhu nɛɛ hi wɔjwɛŋmɔ mli lɛ, ebaawaje wɔ koni wɔkaku wɔsɛɛ kɛtee nibii ni wɔshi yɛ je lɛŋ lɛ ahe. Taakɛ kɔɔyɔŋ lɛlɛ kudɔlɔ ni he esa waa lɛ po kwɛɔ ewolo lɛ mli dani efãa lɛ, esa akɛ wɔ hu wɔya nɔ wɔjwɛŋ nibii nɛɛ anɔ.

MƐI NI NYƆŊMƆ LE AMƐ LƐ YAA AMƐHIƐ YƐ MUMƆŊ BE FƐƐ BE

7. Mɛni esa akɛ wɔfee yɛ be kɛ beaŋ, ni mɛni hewɔ?

7 Wolo ni kɔɔyɔŋ lɛlɛ kudɔlɔ lɛ kwɛɔ nɔ lɛ kaiɔ lɛ akɛ nibii komɛi yɛ ni esa akɛ efee be fɛɛ be dani efã. Wɔ hu wɔbaanyɛ wɔkwɛ bɔ ni wɔyaa nɔ yɛ anɔkwale lɛ mli lɛ yɛ be kɛ beaŋ. Paulo ŋma Timoteo akɛ: “Hiɛmɔ tsámɔ wiemɔi ni onu yɛ minaa lɛ akadi lɛ mli yɛ hemɔkɛyeli kɛ suɔmɔ ni yɔɔ Kristo Yesu mli lɛ mli.” (2 Tim. 1:13) “Tsámɔ wiemɔi” nɛɛ yɛ Nyɔŋmɔ Wiemɔ lɛ mli. (1 Tim. 6:3) Nitɛŋmɔ ko baanyɛ aye abua wɔ ni wɔna bɔ ni nii lɛ diɛŋtsɛ yɔɔ ha. Nakai nɔŋŋ “tsámɔ wiemɔi” lɛ baaye abua wɔ koni wɔna nɔ ni Yehowa taoɔ yɛ wɔdɛŋ. No hewɔ lɛ, nyɛhaa wɔkwɛa nibii ni wɔfee dani abaptisi wɔ lɛ, koni wɔkwɛ akɛ wɔmiihi shi yɛ anɔkwale lɛ okadi lɛ naa lo.

8, 9. (a) Mɛni hewɔ esa akɛ wɔya nɔ wɔda yɛ nilee kɛ hemɔkɛyeli mli lɛ? (b) Mɛni hewɔ esa akɛ wɔya nɔ wɔda yɛ mumɔŋ lɛ, ni mɛni hewɔ abaanyɛ akɛ enɛ ato bɔ ni tso daa ehaa lɛ he lɛ?

8 Nɔ klɛŋklɛŋ ni wɔbaakwɛ ji nilee ni esa akɛ wɔná lɛ. Ni enɛ baaha wɔná hemɔkɛyeli. Shi esa akɛ wɔya wɔhiɛ yɛ nibii enyɔ nɛɛ amli. (2 Tes. 1:3) Yɛ wɔbaptisimɔ sɛɛ lɛ, esa akɛ wɔha wekukpaa ni kã wɔ kɛ Nyɔŋmɔ teŋ lɛ mli aya nɔ awa.

Tso yaa nɔ edaa. Esa akɛ Kristofoi hu aya nɔ ada

9 Wɔbaanyɛ wɔkɛ enɛ ato bɔ ni tso daa ehaa lɛ he. Tso ko baanyɛ ada agbo, titri lɛ kɛ́ eshishifãi lɛ emɔ shi waa. Akɛ nɔkwɛmɔnɔ lɛ, tseneduru tsei wuji komɛi yɛ Lebanon ni kwɔlɔmɔ aaashɛ ŋwɛi tsũ nsɔɔdoi 12, ni amɛshishifãi lɛ nyɛɔ eyaa shikpɔŋ aaafee mitai 12. (Sal. Lal. 5:15) Tso kwɛ̃ɔ oyayaayai yɛ shishijee mli. Beni afii lɛ hoɔ lɛ, tso  lɛ daa ni ekwɔɔ ni eshishifãi lɛ hu yaa shikpɔŋ waa, ni no haa tso lɛ mɔɔ shi jogbaŋŋ. Sɛɛ mli lɛ, tso lɛ yaa nɔ edaa, shi ayɔseee. Nakai nɔŋŋ eji kɛ́ Kristofonyo ko miida yɛ mumɔŋ. Kɛ́ ebɔi Biblia lɛ kasemɔ lɛ ebaafee tsakemɔi oyayaayai ni abaabaptisi lɛ. Asafoŋbii lɛ naa enɔyaa lɛ faŋŋ. Ekolɛ ekɛ ehe baawo gbɛgbamɔ nitsumɔ lɛ mli loo ebaaná sɔɔmɔ hegbɛi yɛ asafo lɛ mli. Shi yɛ afii ni baanyiɛ sɛɛ lɛ amli lɛ, anaŋ bɔ ni edaa yɛ mumɔŋ ehaa lɛ faŋŋ taakɛ eji yɛ shishijee lɛ. Fɛɛ sɛɛ lɛ, ehe miihia ni eya nɔ eda yɛ hemɔkɛyeli kɛ nilee mli, kɛyashi beyinɔ ni eeefee “nuu ni eye emuu yɛ Kristo dalɛ muu lɛ susumɔ naa.” (Efe. 4:13) No hewɔ lɛ, abaanyɛ akɛ bɔ ni wɔyaa wɔhiɛ akɛ Kristofoi lɛ ato bɔ ni tsofɔ daa ni ebatsɔɔ tso agbo lɛ he.

10. Mɛni hewɔ esa akɛ Kristofoi ni edara yɛ mumɔŋ lɛ hu aya amɛhiɛ lolo lɛ?

10 Shi esaaa akɛ wɔhiɛyaa lɛ yawaa jɛmɛ. Esa akɛ wɔkase nii babaoo, ni wɔha wɔhemɔkɛyeli lɛ mli awa. No baaha wɔnane amɔ shi yɛ Nyɔŋmɔ Wiemɔ lɛ mli. (Abɛi 12:3) Nyɛmimɛi hii kɛ yei babaoo miifee nakai. Akɛ nɔkwɛmɔnɔ lɛ, nyɛmi nuu ko ni kɛ nɔ ni fe afii 30 esɔmɔ akɛ asafoŋ onukpa lɛ yɔse akɛ eeda lolo yɛ mumɔŋ. Ekɛɛ akɛ: “Miná Biblia lɛ he miishɛɛ waa fe tsutsu lɛ. Daa nɛɛ mitaoɔ gbɛi anɔ ni matsɔ mikɛ Biblia mli shishitoo mlai kɛ mlai krokomɛi lɛ atsu nii. Miishɛɛ ni mináa yɛ shiɛmɔ nitsumɔ lɛ mli lɛ hu etee hiɛ.”

YAA NƆ OHA OKƐ NYƆŊMƆ NAANYOBƆƆ LƐ MLI AWA

11. Te wɔɔfee tɛŋŋ wɔle Yehowa jogbaŋŋ beni be shwieɔ mli lɛ?

11 Nɔ ni fata wɔmumɔŋ hiɛyaa lɛ he ji, ni wɔtsi wɔbɛŋkɛ Yehowa, ni ji wɔ-Naanyo kɛ wɔ-Tsɛ lɛ. Eesumɔ ni wɔna akɛ ekpɛlɛɔ wɔnɔ. Ni eesumɔ ni wɔna akɛ esumɔɔ wɔ ni wɔyɛ shweshweeshwe taakɛ gbekɛbii nuɔ he kɛ́ amɛyɛ amɛfɔlɔi amlishi lɛ, loo bɔ ni wɔnuɔ he kɛ́ wɔyɛ wɔnaanyo ko ni sumɔɔ wɔ masɛi lɛ. Taakɛ ole lɛ, naanyo ni tamɔ nɛkɛ ni wɔkɛ Yehowa aaabɔ lɛ baaa lɛ kɛkɛ. Ebaahe be dani wɔbaanyɛ wɔle lɛ, ni wɔsumɔ lɛ. No hewɔ lɛ, esa akɛ wɔhe be kɛkane e-Wiemɔ lɛ daa gbi bɔni afee ni wɔle lɛ jogbaŋŋ. Kɛfata he lɛ, esa akɛ wɔkane Buu-Mɔɔ Awake! ni baa daa nyɔɔŋ nɔ lɛ ateŋ eko fɛɛ eko, kɛ wɔwoji krokomɛi lɛ hu.

12. Mɛni esa akɛ wɔfee koni Yehowa ale wɔ?

12 Sɔlemɔ nanemɛi kpakpai ni akɛbɔɔ lɛ yeɔ ebuaa Nyɔŋmɔ nanemɛi lɛ ni amɛdaa yɛ mumɔŋ. (Nyɛkanea Maleaki  3:16.) Yehowa boɔ “amɛfaikpamɔ toi.” (1 Pet. 3:12) Yehowa efee klalo akɛ ebaabo wɔsɔlemɔi lɛ atoi taakɛ fɔlɔ ni yɔɔ suɔmɔ feɔ lɛ. No hewɔ lɛ, esa akɛ ‘wɔhiɛ sɔlemɔ mli daa.’ (Rom. 12:12) Ja Nyɔŋmɔ eye ebua wɔ dani wɔbaanyɛ wɔya nɔ wɔkɛ lɛ abɔ naanyo. Wɔ pɛ wɔnyɛŋ wɔkpee naagbai ni wɔkɛkpeɔ yɛ je nɛɛ mli lɛ anaa. Kɛ́ wɔfɔ̃ɔ sɔlemɔ lɛ, wɔnine shɛŋ hewalɛ ni he hiaa wɔ lɛ nɔ. Shi Nyɔŋmɔ efee klalo akɛ ebaaye ebua wɔ kɛ́ wɔbi lɛ ni efee nakai. Ani okɛ Nyɔŋmɔ gbaa sane tamɔ okɛ onaanyo ko ni oheɔ lɛ oyeɔ lɛ feɔ lɛ, aloo esa akɛ ofee tsakemɔi komɛi?—Yer. 16:19.

13. Mɛni hewɔ ehe hiaa ni wɔya asafoŋ kpeei daa bɔni afee ni wɔya wɔhiɛ yɛ mumɔŋ lɛ?

13 Yehowa sumɔɔ mɛi ni “baa lɛ abo” lɛ asane waa, no hewɔ lɛ, ehe miihia ni wɔkɛ enanemɛi, ni ji asafo lɛ mli bii lɛ aya nɔ abɔ daa. (Nah. 1:7) Akɛni wɔyɛ jeŋ ni efɔŋfeemɔ eyi mli tɔ mli hewɔ lɛ, ehe miihia ni wɔkɛ wɔnyɛmimɛi lɛ abɔ daa. Te wɔbaaná enɛ he sɛɛ wɔha tɛŋŋ? Wɔnyɛmimɛi lɛ baawo wɔ hewalɛ koni “wɔhiɛ adɔ suɔmɔ kɛ nitsumɔi kpakpai ahe.” (Heb. 10:24, 25) Wɔnyɛŋ wɔjie suɔmɔ ni Paulo wo Hebribii lɛ ŋaa yɛ he lɛ kpo kɛ́ wɔkɛ asafo lɛ ebɔɔɔ. Suɔmɔ ni tamɔ nɛkɛ lɛ kpojiemɔ biɔ ni wɔkɛ wɔnyɛmimɛi lɛ agba sane. No hewɔ lɛ, tswaa ofai shi akɛ obaaya asafoŋ kpeei daa, ni okɛ ohe awo mli hu.

14. Mɛni hewɔ esa akɛ wɔfee klalo akɛ wɔbaatsake wɔtsui ni wɔku wɔsɛɛ kɛ́ ebi ni wɔfee nakai lɛ?

14 Dani wɔbatsɔmɔ Kristofoi lɛ, wɔtsake wɔtsui ni wɔku wɔsɛɛ, ni tsɔɔ akɛ wɔtsi wɔhe yɛ wɔhe eshai lɛ ahe. Shi esa akɛ wɔfee klalo akɛ wɔbaatsake wɔtsui be fɛɛ be ni ehe baahia ni wɔfee nakai. Akɛni wɔyeee emuu hewɔ lɛ, ewaaa akɛ wɔɔfee esha, ejaakɛ esha tamɔ onufu ko ni efee klalo akɛ ebaakɔ̃ wɔ be fɛɛ be ni hegbɛ lɛ aaaba. (Rom. 3:9, 10; 6:12-14) Wɔnyɛŋ wɔku wɔhiɛ wɔshwie wɔgbɔjɔmɔi lɛ anɔ. Miishɛɛ sane ji akɛ, Yehowa toɔ etsui shi ehaa wɔ beni wɔmiaa wɔhiɛ akɛ wɔbaawu wɔshi wɔgbɔjɔmɔi, ni wɔfee tsakemɔi ni sa lɛ. (Fil. 2:12; 2 Pet. 3:9) Esa akɛ wɔkɛ wɔbe kɛ wɔnyɛmɔ fɛɛ asɔmɔ Yehowa moŋ fe ni wɔkɛaatiu nibii gbohii asɛɛ. Nyɛmi yoo ko ŋma akɛ: “Eyɛ mli akɛ atsɔse mi yɛ anɔkwale lɛ mli moŋ, shi esoro bɔ ni mina Yehowa miha kwraa. Eji mɔ ko ni esa akɛ ashe lɛ gbeyei waa, ni minu he akɛ minyɛŋ masa ehiɛ kɔkɔɔkɔ.” Be ko sɛɛ lɛ, nyɛmi yoo lɛ yɔse akɛ ekɛ Yehowa teŋ ejɛkɛ, akɛni etɔ̃ babaoo lɛ hewɔ. Ewie akɛ: “Jeee Yehowa ni misumɔɔɔ lɛ hewɔ, shi moŋ lé ni mileee lɛ jogbaŋŋ lɛ hewɔ. Kɛlɛ, misɔle shii abɔ ni mibɔi tsakemɔi feemɔ.” Ekɛfata he akɛ: “Mina akɛ Yehowa hiɛ mimli tamɔ gbekɛ bibioo, ni eto etsui shi eye ebua mi kɛtsu minaagbai lɛ ahe nii fiofio, ni etsɔɔ mi nɔ ni esa akɛ mafee.”

15. Mɛni Yesu kɛ Yehowa naa ni amɛnyaa he?

15 ‘Nyɛyaa nɔ nyɛjajea sanekpakpa lɛ nyɛtsɔa.’ Enɛ ji nɔ ni Nyɔŋmɔ bɔfo ko kɛɛ Petro kɛ bɔfoi krokomɛi lɛ beni atsɔ naakpɛɛ gbɛ nɔ ajie amɛ kɛjɛ tsuŋwoo mli lɛ. (Bɔf. 5:19-21) Shiɛmɔ nitsumɔ lɛ ni wɔkɛ wɔhe baawo mli daa otsi lɛ hu ji nɔ kroko ni he hiaa waa ni baaha wɔhemɔkɛyeli lɛ mli awa. Yesu kɛ Yehowa fɛɛ naa wɔhemɔkɛyeli lɛ, ni amɛnyaa bɔ ni wɔkɛ wɔhe woɔ shiɛmɔ nitsumɔ lɛ mli lɛ he. (Kpoj. 2:19) Asafoŋ onukpa ni atsi etã kɛtsɔ hiɛ lɛ tsɔɔ mli akɛ: “Shiɛmɔ nitsumɔ lɛ ji nɔ ko ni he hiaa waa yɛ wɔshihilɛ mli.”

16. Mɛni hewɔ ehi akɛ ooosusu ohe nɔ ni ojɔɔ oha Yehowa lɛ he lɛ?

16 Susumɔ ohenɔjɔɔmɔ lɛ he. Wekukpaa ni kã wɔ kɛ Yehowa teŋ lɛ ji nɔ ko  ni jara wa fe fɛɛ yɛ wɔshihilɛ mli. Ele mɛi ni ji enii. (Nyɛkanea Yesaia 44:5.) Susumɔ okɛ lɛ teŋ wekukpaa lɛ he, ni osɔle ni eye ebua bo ni wekukpaa nɛɛ mli awa be fɛɛ be. Susumɔ obaptisimɔ lɛ hu he, ni ohiɛ akakpa gbi ni he hiaa nɛɛ nɔ. Obaptisimɔ lɛ haa mɛi krokomɛi naa akɛ ojɔɔ ohe nɔ oha Yehowa, ni eji yiŋkpɛɛ ni he hiaa fe fɛɛ yɛ oshihilɛ mli.

ONIJIAŊ AKAJE WUI KONI ONYƐ OHI YEHOWA MASƐI DAA

17. Kɛ́ wɔmiisumɔ ni wɔhi Yehowa masɛi daa lɛ, mɛni hewɔ esaaa akɛ wɔnijiaŋ jeɔ wui lɛ?

17 Beni Paulo ŋmaa Galatabii lɛ, ekɛɛ amɛ akɛ amɛnijiaŋ akɛje wui. (Gal. 6:9) Wɔ hu esaaa akɛ wɔnijiaŋ jeɔ wui, ejaakɛ wɔkɛ naagbai baakpe. Shi Yehowa baaye ebua wɔ. Yaa nɔ osɔle obi mumɔ krɔŋkrɔŋ lɛ. Ebaaha oná miishɛɛ kɛ toiŋjɔlɛ kɛ́ okɛ naagbai miikpe po. (Mat. 7:7-11) Bo lɛ susumɔ enɛ he okwɛ: Kɛ́ Yehowa kwɛɔ loofɔji lɛ, ani ekwɛŋ bo ní ojɔɔ ohe nɔ oha lɛ ni osumɔɔ lɛ lɛ aahu po? (Mat. 10:29-31) Ekɔɔɔ he eko naagbai ni okɛbaakpe lɛ, kaakpale, onijiaŋ akaje wui. Kwɛ jɔɔmɔi sɔŋŋ ni wɔnáa yɛ le ni Yehowa le wɔ lɛ hewɔ!

18. Ní ‘obale Nyɔŋmɔ nɛɛ,’ mɛni obaafee?

18 No hewɔ lɛ, kɛ́ obale Nyɔŋmɔ etsɛko ni oha abaptisi bo lɛ, mɛni eshwɛɔ bo mɔ? Yaa nɔ ole Yehowa jogbaŋŋ, koni oya nɔ oda yɛ mumɔŋ. Ni kɛ abaptisi bo etsɛ hu? Esa akɛ bo hu oya nɔ oná Yehowa he nilee babaoo. Kaabu okɛ lɛ teŋ wekukpaa lɛ akɛ nɔ ko flɛflɛ. Moŋ lɛ, pɛimɔ nibii ni asusu he yɛ nikasemɔ nɛɛ mli lɛ amli yɛ be kɛ beaŋ koni no aha okɛ Yehowa, ni ji wɔ-Tsɛ, wɔ-Naanyo, kɛ wɔ-Nyɔŋmɔ lɛ teŋ wekukpaa lɛ mli awa daa.—Nyɛkanea 2 Korintobii 13:5, 6.