Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) MARCH 2013

Ha Ashɛje Omii—Shɛjemɔ Mɛi Krokomɛi Amii

Ha Ashɛje Omii—Shɛjemɔ Mɛi Krokomɛi Amii

Akɛni wɔji adesai ni yeee emuu hewɔ lɛ, hela emɔ wɔteŋ mɔ fɛɛ mɔ dã, mɛi komɛi po anɔ mli wa waa. Kɛ́ wɔkɛ shihilɛi ni mli wawai tamɔ nakai kpe lɛ, te wɔfeɔ tɛŋŋ wɔkpeɔ naa lɛ?

Nɔ kome ni yeɔ ebuaa wɔ kɛdamɔɔ naa ji miishɛjemɔ ni wɔnáa kɛjɛɔ wɔwekumɛi, nanemɛi, kɛ nyɛmimɛi Kristofoi adɛŋ lɛ.

Mlihilɛ kɛ suɔmɔ mli ni naanyo ko jɛɔ eshɛjeɔ wɔmii lɛ baanyɛ afee tamɔ mu ni tsaa wɔ, ní haa wɔhe jɔɔ wɔ. (Abɛi 16:24; 18:24; 25:11) Shi anɔkwa Kristofoi susuuu amɛ pɛ amɛmii ni aaashɛje lɛ he. Amɛ tsutsu amɛŋɔɔ hegbɛ lɛ ‘koni amɛnyɛ amɛkɛ miishɛjemɔ, ni Nyɔŋmɔ ŋɔshɛjeɔ amɛmii lɛ ashɛje mɛi ni naa amanehulu fɛɛ amanehulu lɛ amii.’ (2 Kor. 1:4; Luka 6:31) Antonio ni eji kpokpaa wulu nɔkwɛlɔ ni jɛ Mexico lɛ ná enɛ mli niiashikpamɔ.

Beni ana akɛ eeye hela ko ni atsɛɔ lɛ lymphoma, ni ji la mli kansa henɔ ko lɛ, Antonio he jára lɛ waa. Fɛɛ sɛɛ lɛ, ebɔ mɔdɛŋ ni ekaha ewerɛ ho ehe tsɔ fe nine. Mɛni efee? Ebɔɔ mɔdɛŋ ekaiɔ Maŋtsɛyeli lalai lɛ, ni eláa lɛ waa bɔni afee ni enu ni enyɛ ejwɛŋ emli wiemɔi lɛ anɔ. Sɔlemɔ ni esɔleɔ waa kɛ Biblia lɛ ni ekaneɔ lɛ hu shɛje emii diɛŋtsɛ.

Amrɔ nɛɛ, Antonio eyɔse akɛ, yelikɛbuamɔ kpelei ni enáa lɛ ateŋ ekome ji nɔ ni enyɛmimɛi Kristofoi lɛ kɛhaa lɛ lɛ. Ekɛɛ akɛ: “Kɛ́ mi kɛ miŋa nijiaŋ je wui lɛ, wɔbiɔ wɔwekunyo ko ní eji asafoŋ onukpa lɛ koni ekɛ wɔ abafee ekome kɛsɔle. Enɛ shɛjeɔ wɔmii ni ehaa wɔhe jɔɔ wɔ.” Ekɛfata he akɛ, “yɛ anɔkwale mli, wɔdaa wɔweku lɛ kɛ wɔmumɔŋ nyɛmimɛi ni ye amɛbua wɔ lɛ ashi waa, yɛ be fioo ko sɛɛ lɛ, wɔnyɛ wɔye yeyeeyefeemɔ henumɔ ni wɔnáa lɛ nɔ.” Kwɛ bɔ ni ehiɛ sɔɔ waa akɛ eyɛ nanemɛi ni yɔɔ suɔmɔ, ní susuɔ mɔ he tamɔ nɛkɛ!

Mumɔ krɔŋkrɔŋ lɛ ni awo he shi lɛ hu ji nɔ kroko ni yeɔ ebuaa wɔ yɛ jaramɔ shihilɛi amli. Bɔfo Petro wie Nyɔŋmɔ mumɔ krɔŋkrɔŋ lɛ he akɛ eji “nɔkeenɔ.” (Bɔf. 2:38) Mumɔ krɔŋkrɔŋ lɛ ni akɛfɔ mɛi babaoo mu yɛ afi 33 Ŋ.B. Pentekoste gbi lɛ nɔ lɛ ha ana enɛ faŋŋ. Shi yɛ shishinumɔ ko naa lɛ, mumɔ krɔŋkrɔŋ lɛ ji nikee nii ní yɔɔ kɛha wɔ fɛɛ. Nikee nii nɛɛ sɛɛ efooo kɔkɔɔkɔ, no hewɔ lɛ, mɛni hewɔ obiii ni aha bo babaoo?—Yes. 40:28-31.

NÁ MƐI NI NAA NƆ LƐ AHE MIISHƐƐ WAA

Bɔfo Paulo kɛ amanehului babaoo kpe, ni yɛ be ko mli po lɛ shwɛ fioo ni ewala aŋmɛɛ lɛ. (2 Kor. 1:8-10) Kɛlɛ, Paulo sheee gbeyei akɛ ebaagbo. Le ni ele akɛ Nyɔŋmɔ fĩɔ esɛɛ lɛ shɛje emii. Eŋma akɛ: “Ajɔɔ Nyɔŋmɔ kɛ wɔ-Nuŋtsɔ Yesu Kristo tsɛ lɛ, mɔ ni ji musuŋtsɔlɛi atsɛ kɛ miishɛjemɔ fɛɛ Nyɔŋmɔ lɛ, mɔ ni shɛjeɔ wɔmii yɛ wɔmanehului lɛ fɛɛ mli lɛ.” (2 Kor. 1:3, 4) Paulo eŋmɛɛɛ gbɛ ni enaagbai lɛ asũ lɛ. Yɛ no najiaŋ lɛ, amanehului ni etsɔ mli lɛ ye ebua lɛ ni ená nyɛmimɛi ahedɔɔ, ni no ha efee mɔ ni sa ni nyɛɔ eshɛjeɔ mɛi krokomɛi ni yɔɔ jaramɔ shihilɛ mli lɛ amii.

Beni Antonio he wa lɛ lɛ, enyɛ ekɛ ehe wo gbɛfaa nitsumɔ lɛ mli ekoŋŋ. Beni eji nɔkwɛlɔ gbɛfalɔ lɛ, esusuɔ enanemɛi héyelilɔi lɛ ahe waa, ni ekɛ eŋa miaa amɛhiɛ amɛyasaraa mɛi ni naaa hewalɛ lɛ, ni amɛwoɔ amɛ hewalɛ. Akɛ nɔkwɛmɔnɔ lɛ, be ko beni Antonio kɛ eŋa eyasara Kristofonyo ko ni hela ko ni naa wa kɛ lɛ miiwuwua shi sɛɛ lɛ, ena akɛ nyɛmi nɛɛ sumɔɔɔ ni eyaaa Kristofoi akpeei. Antonio tsɔɔ mli akɛ, “jeee akɛ nyɛmi nɛɛ sumɔɔɔ Yehowa loo nyɛmimɛi lɛ, shi hela lɛ ená enɔ hewalɛ aahu akɛ enuɔ he akɛ ehe bɛ sɛɛnamɔ ko dɔŋŋ.”

Nɔ ko ni Antonio fee kɛwo nyɛmi nuu ni he tseee lɛ nɛɛ hewalɛ ji, eha esɔle yɛ henaabuamɔ ko ni afee nyɛsɛɛ nɛɛ lɛ shishi. Eyɛ mli akɛ nyɛmi nuu lɛ nu he akɛ esaaa mɔ ni sɔleɔ moŋ, shi ekpɛlɛ ni esɔle. Antonio wie akɛ: “Esɔle jogbaŋŋ, ni no sɛɛ lɛ, etsui nyɔ emli waa. Enu he akɛ ehe yɛ sɛɛnamɔ ekoŋŋ.”

Hɛɛ, yɛ gbɛ ko nɔ lɛ, wɔ teŋ mɔ fɛɛ mɔ kɛ amanehulu ko ni naa wa loo nɔ ni naa waaa tsɔ ekpe dã. Shi taakɛ Paulo kɛɛ lɛ, enɛ baanyɛ awaje wɔ ni wɔshɛje mɛi krokomɛi amii kɛ́ amɛmiina nɔ. No hewɔ lɛ, nyɛhaa wɔnua he wɔhaa wɔnanemɛi Kristofoi ni naa nɔ lɛ, ni wɔkase Yehowa, wɔ-Nyɔŋmɔ lɛ, kɛtsɔ mɛi krokomɛi amii ni wɔɔshɛje lɛ nɔ.