Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ) JANUARY 2013

Feemɔ Ekãa—Yehowa Kɛ Bo Yɛ!

Feemɔ Ekãa—Yehowa Kɛ Bo Yɛ!

“Wajemɔ ohe ni ofee ekãa. . . . Yehowa, o-Nyɔŋmɔ lɛ, fĩ osɛɛ.”—YOSH. 1:9.

1, 2. (a) Mɛɛ sui baaye abua wɔ koni wɔnyɛ wɔkpee naagbai anaa? (b) Mɛni ji hemɔkɛyeli? Okɛ enɛ he nɔkwɛmɔnɔ aha.

YEHOWA sɔɔmɔ lɛ haa wɔnáa miishɛɛ. Shi fɛɛ sɛɛ lɛ, wɔkɛ jaramɔ shihilɛi ni adesai fɛɛ kɛkpeɔ lɛ eko kpeɔ, ni bei komɛi lɛ, ‘jalɛ hewɔ lɛ, wɔnaa amanehulu’ po. (1 Pet. 3:14; 5:8, 9; 1 Kor. 10:13) Bɔni afee ni wɔnyɛ wɔkpee naagbai nɛɛ anaa lɛ, esa akɛ wɔná hemɔkɛyeli, ni wɔfee ekãa.

2 Mɛni ji hemɔkɛyeli? Bɔfo Paulo ŋma akɛ: “Hemɔkɛyeli ji nii ni mɛi ahiɛ kã nɔ lɛ anɔ hewalɛnamɔ kɛ nii ni anaaa lɛ anɔmimaa.” (Heb. 11:1) Biblia shishitsɔɔmɔ kroko (The Simple English Bible) kɛɛ akɛ: “Hemɔkɛyeli ji wolo ko ni yeɔ nibii ni wɔhiɛ kã nɔ lɛ he odase. Hemɔkɛyeli tsɔɔ akɛ wɔyɛ nɔmimaa akɛ wɔnine baashɛ nibii ni wɔnaaa lɛ anɔ.” Kɛ́ wɔhiɛ wolo ni yeɔ odase akɛ gboshinii ko ji wɔnɔ lɛ, wɔyɛ nɔmimaa akɛ nii lɛ ji wɔnɔ. Akɛni wɔyɛ hemɔkɛyeli akɛ Nyɔŋmɔ shiwoi lɛ baa mli be fɛɛ be hewɔ lɛ, wɔyɛ nɔmimaa akɛ wɔnine baashɛ nɔ ni wɔhiɛ kã nɔ lɛ nɔ. Wɔhemɔkɛyeli lɛ haa wɔnáa nɔmimaa akɛ, Biblia mli shiwoi ni wɔhiɛ kã nɔ lɛ fɛɛ baaba mli, ni eyɛ mli akɛ wɔkɛ wɔhiŋmɛii enaaa moŋ, shi wɔyɛ nɔmimaa akɛ ebaaba mli.

3, 4. (a) Mɛni ji ekãa? (b) Mɛni ji gbɛ kome ni wɔbaanyɛ wɔtsɔ nɔ wɔwaje wɔhemɔkɛyeli lɛ ni wɔfee ekãa?

3 Wolo ko (The New Interpreter’s Dictionary of the Bible) tsɔɔ ekãa shishi akɛ, “mumɔŋ, henumɔŋ, kɛ jeŋba gbɛfaŋ nyɛmɔ ni akɛwieɔ loo akɛfeɔ nɔ ko ni asheee nɔ ni baajɛ mli aba lɛ gbeyei.” Kɛ́ wɔyɛ ekãa lɛ, etsɔɔ akɛ wɔyɛ hewalɛ, ni bei komɛi lɛ, wɔsheee nɔ ko gbeyei.—Mar. 6:49, 50; 2 Tim. 1:7.

4 Hemɔkɛyeli kɛ ekãa ji sui kpakpai. Shi kɛ́ wɔnu he akɛ hemɔkɛyeli kɛ ekãa babaoo he miihia wɔ hu? Awie mɛi akpei abɔ he yɛ Biblia lɛ mli ni jie  sui nɛɛ akpo. No hewɔ lɛ, gbɛ kome ni wɔbaanyɛ wɔtsɔ nɔ wɔwaje wɔhemɔkɛyeli lɛ ni wɔfee ekãa ji, ni wɔɔsusu mɛi nɛɛ ateŋ mɛi komɛi anɔkwɛmɔnɔ lɛ he.

YEHOWA FĨ YOSHUA SƐƐ

5. Mɛni esa akɛ Yoshua aná koni enyɛ etsu nitsumɔ ni akɛwo edɛŋ lɛ jogbaŋŋ?

5 Nyɛhaa wɔsusua nɔ ko ni ba aaafee afii 3,500 ni eho nɛ lɛ he wɔkwɛa. Sane nɛɛ ba beni Yehowa kɛ nineshiwalɛ jie Israelbii lɛ kɛjɛ nyɔŋyeli mli yɛ Mizraim lɛ sɛɛ afii 40. No mli lɛ, gbalɔ Mose ní nyiɛ Israelbii lɛ ahiɛ lɛ eye afii 120. Aha eyakwɔ Nebo Gɔŋ lɛ ni ekwɛ Shiwoo Shikpɔŋ lɛ, ni no sɛɛ lɛ egbo yɛ jɛmɛ. Mɔ ni baye esɛɛ ji Yoshua, nuu ni ‘eyi kɛ nilee mumɔ’ lɛ. (5 Mose 34:1-9) No mli lɛ, eshwɛ fioo ni Israelbii lɛ baaŋɔ Kanaan shikpɔŋ lɛ. Ja Yoshua ená nilee ni jɛ Nyɔŋmɔ ŋɔɔ dani ebaanyɛ enyiɛ amɛhiɛ jogbaŋŋ. Esa akɛ ená hemɔkɛyeli yɛ Yehowa mli, ni ewaje ehe ni efee ekãa hu.—5 Mose 31:22, 23.

6. (a) Mɛni Yoshua 23:6 lɛ biɔ ni aná ekãa kɛfee? (b) Mɛni wɔkaseɔ kɛjɛɔ Bɔfoi lɛ Asaji 4:18-20 kɛ Bɔfoi lɛ Asaji 5:29 lɛ mli?

6 Nilee, ekãa, kɛ hemɔkɛyeli ni Yoshua jie lɛ kpo beni amɛkpataa maji ni yɔɔ Kanaan shikpɔŋ lɛ nɔ lɛ ahiɛ lɛ wo Israelbii lɛ hewalɛ waa. Shi kɛfata ekãa ni amɛkɛwu ta lɛ he lɛ, ehe miihia ni amɛná ekãa hu kɛfee nɔ ni Yoshua kɛɛ amɛ akɛ amɛfee lɛ. Beni eshwɛ fioo ni ebaagbo ni ekɛ amɛ yeɔ shɛɛ lɛ, ekɛɛ akɛ: “Nyɛfia shi jogbaŋŋ, ni nyɛye nii fɛɛ ni aŋma yɛ Mose mla wolo lɛ mli lɛ nɔ ni nyɛfee, ni nyɛkagba kɛmiijɛ he kɛmiiya ninejurɔ loo abɛku.” (Yosh. 23:6) Wɔ hu ja wɔná ekãa dani wɔbaanyɛ wɔbo Yehowa toi be fɛɛ be. Ni ehe miiha ni wɔfee nakai hu kɛ́ adesai miibi ni wɔfee nɔ ko ni kɛ Nyɔŋmɔ suɔmɔnaa nii kpãaa gbee. (Nyɛkanea Bɔfoi lɛ Asaji 4:18-20; 5:29.) Kɛ́ wɔsɔle kɛbi Yehowa gbɛtsɔɔmɔ ni wɔkɛ wɔhe fɔ̃ enɔ lɛ, ebaaye ebua wɔ ni wɔfee ekãa.

BƆ NI WƆƆFEE WƆYE OMANYE

7. Mɛni ehe bahia ni Yoshua afee koni ená ekãa, ní etsɔ nɔbatsɛ?

7 Kɛ́ wɔbaaná ekãa kɛfee Nyɔŋmɔ suɔmɔnaa nii lɛ, esa akɛ wɔkase e-Wiemɔ lɛ, ni wɔkɛ nɔ ni wɔkaseɔ lɛ atsu nii. No ji nɔ ni akɛɛ Yoshua akɛ efee beni ebaye Mose sɛɛ lɛ. Akɛɛ lɛ akɛ: “Wajemɔ ohe ni ofee ekãa jogbaŋŋ kɛkɛ, ni ojwɛŋ nɔ ni oye mla lɛ ni mitsulɔ Mose woò lɛ fɛɛ nɔ. . . . Kaaha nɛkɛ mla wolo nɛɛ mli wiemɔi lɛ miikpa yɛ odaaŋ, shi jwɛŋmɔ he nyɔɔŋ kɛ shwane, koni ojwɛŋ nɔ ni ofee tamɔ bɔ ni aŋma yɛ mli lɛ pɛpɛɛpɛ; ejaakɛ no aaaha ofee nɔbatsɛ kɛ hiɛshikalɔ.” (Yosh. 1:7, 8) Yoshua kɛ ŋaawoo nɛɛ tsu nii ni ‘etsɔ nɔbatsɛ,’ ni tsɔɔ akɛ eye omanye. Kɛ́ wɔ hu wɔfee nakai lɛ, wɔbaaná ekãa, ni wɔbaaye omanye yɛ Nyɔŋmɔ sɔɔmɔ lɛ mli.

Wɔ afi 2013 afi ŋmalɛ lɛ ji: “Wajemɔ ohe ni ofee ekãa. . . . Yehowa, o-Nyɔŋmɔ lɛ, fĩ osɛɛ.”—Yoshua 1:9

8. Mɛɛ ŋmalɛ nɔ afi 2013 afi ŋmalɛ lɛ damɔ, ni mɛɛ gbɛ nɔ nakai wiemɔi lɛ baanyɛ aye abua bo?

8 Beni Yoshua nu Yehowa wiemɔi ni nyiɛ sɛɛ nɛɛ akɛ: “Wajemɔ ohe ni ofee ekãa. Kaaha ŋmiŋmi miimɔo, ni asaŋ otsui akafã; ejaakɛ Yehowa, o-Nyɔŋmɔ lɛ, fĩ osɛɛ yɛ he fɛɛ he ni oyaa” lɛ, ewaje lɛ waa. (Yosh. 1:9) Wɔ hu Yehowa kɛwɔ  yɛ. No hewɔ lɛ, ekɔɔɔ he eko naagbai ni wɔkɛbaakpe lɛ, esaaa akɛ wɔhaa ‘ŋmiŋmi mɔɔ wɔ loo wɔtsui fãa.’ Wiemɔ ni ji: “Wajemɔ ohe ni ofee ekãa. . . . Yehowa, o-Nyɔŋmɔ lɛ, fĩ osɛɛ” lɛ sa kadimɔ waa. Ahala Yoshua 1:9 lɛ mli wiemɔi nɛɛ akɛ afi 2013 afi ŋmalɛ. Wiemɔi nɛɛ kɛ mɛi ni fee hemɔkɛyeli kɛ ekãa he nɔkwɛmɔnɔ lɛ hu awiemɔi kɛ amɛnifeemɔi lɛ baawaje wɔ yɛ nyɔji ni baaba lɛ amli.

AMƐFEE EKÃA

9. Mɛɛ gbɛi anɔ Rahab jie hemɔkɛyeli kɛ ekãa kpo?

9 Beni Yoshua tsu mɛi enyɔ koni amɛyakpá Kanaan shikpɔŋ lɛ shi lɛ, Rahab, ajwamaŋ lɛ, ŋɔ amɛ etée, ni ewó amɛhenyɛlɔi lɛ ewo he kroko. Ehemɔkɛyeli kɛ ekãa hewɔ lɛ, abaa lɛ kɛ ewe lɛ yi beni Israelbii lɛ kpataa Yeriko maŋ lɛ hiɛ lɛ. (Heb. 11:30, 31; Yak. 2:25) Rahab tsi ehe kɛjɛ etsutsu jeŋba sha lɛ he koni esa Yehowa hiɛ. Mɛi komɛi ni ebatsɔmɔ Kristofoi lɛ hu ená hemɔkɛyeli, ekãa, kɛ nyɛmɔ lɛ ni amɛkɛfee tsakemɔi ni tamɔ nɛkɛ nɔŋŋ koni amɛsa Nyɔŋmɔ hiɛ.

10. Mɛɛ gbɛ nɔ Rut fĩ anɔkwa jamɔ sɛɛ, ni mɛɛ jɔɔmɔi ená?

10 Yɛ Yoshua gbele sɛɛ lɛ, Moabyoo Rut kɛ ekãa fĩ anɔkwa jamɔ sɛɛ. Akɛni no mli lɛ ewu ni egbo lɛ ji Israelnyo hewɔ lɛ, eeenyɛ efee akɛ ele Yehowa he nɔ ko fioo. Kulɛ eshaayoo Naomi, ni lɛ hu ewu egbo lɛ yɛ Moab, shi ekpɛ mli akɛ eeshi kɛmiiya Betlehem, yɛ Israel. Beni amɛnyiɛ gbɛ lɛ nɔ lɛ, Naomi kɛɛ Rut ni eku esɛɛ kɛya emaŋbii lɛ aŋɔɔ, shi Moabyoo nɛɛ kɛɛ lɛ akɛ: “Kaahiɛ mi doo akɛ mishio ni miku misɛɛ ni mifɔ̃ɔ osɛɛ nyiɛmɔ! . . . Omaŋ ji mimaŋ, ni o-Nyɔŋmɔ ji mi hu mi-Nyɔŋmɔ.” (Rut 1:16) Jeee shwɛ Rut shwɛɔ lɛ. Sɛɛ mli lɛ, Boaz ni ji Naomi wu lɛ wekunyo lɛ kɛ Rut hi shi, ni ekɛ lɛ fɔ binuu, ni Rut batsɔ David kɛ Yesu blemanyɛ. Yehowa jɔɔ mɛi ni jieɔ hemɔkɛyeli kɛ ekãa kpo lɛ lɛɛlɛŋ.—Rut 2:12; 4:17-22; Mat. 1:1-6.

MƐI BABAOO KƐ AMƐWALA WO OSHARA MLI!

11. Mɛɛ gbɛ nɔ Yehoiada kɛ Yehosheba fee ekãa, ni mɛni jɛ mli kɛba?

11 Kɛ́ wɔna bɔ ni Nyɔŋmɔ jɔɔ mɛi ni kɛ Yehowa sɔɔmɔ kɛ amɛnyɛmimɛi héyelilɔi lɛ ahilɛkɛhamɔ yeɔ klɛŋklɛŋ gbɛhe lɛ, ehaa ekãa kɛ hemɔkɛyeli ni wɔyɔɔ lɛ mli waa. Akɛ nɔkwɛmɔnɔ lɛ, susumɔ Osɔfonukpa Yehoiada kɛ eŋa Yehosheba he okwɛ. Beni Maŋtsɛ Ahazia gbo lɛ, enyɛ Atalia gbe maŋtsɛ seshibii lɛ fɛɛ, ja Yoash, ni ebaye maŋnyɛ. No mli lɛ, Yehoiada kɛ Yehosheba kɛ amɛwala ewo oshara mli ni amɛŋɔ Ahazia bi Yoash amɛto afii ekpaa. Yɛ afi ni ji kpawo lɛ nɔ lɛ, Yehoiada wo Yoash maŋtsɛ, ni eha agbe Atalia. (2 Maŋ. 11:1-16) Sɛɛ mli lɛ, Yehoiada ye ebua Maŋtsɛ Yoash ni esaa sɔlemɔwe lɛ. Ni beni Yehoiada gbo beni eye afii 130 lɛ, afũ lɛ yɛ maŋtsɛmɛi lɛ amasɛi, “ejaakɛ etsu nii kpakpai yɛ Israel kɛ Nyɔŋmɔ kɛ ewe lɛ hu he.” (2 Kron. 24:15, 16) Kɛfata he lɛ, ekãa ni Yehoiada kɛ eŋa lɛ fee lɛ baa odehei awekutɔkpãa lɛ yi kɛjɛ David nɔ kɛbashi Mesia lɛ nɔ.

12. Mɛɛ ekãa Ebed-Melek fee?

12 Ebed-Melek, ni ji Maŋtsɛ Zedekia piafonyo lɛ hu kɛ ewala wo oshara mli yɛ Yeremia hewɔ. No mli lɛ, maŋtsɛ lɛ eŋɔ Yeremia ewo Yuda lumɛi ni folɔ enaa akɛ eeje maŋbii lɛ anijiaŋ wui lɛ adɛŋ, ni amɛkɛ lɛ wo nubu ko ni ŋmɔtɔ yɔɔ mli lɛ mli koni egbo. (Yer. 38:4-6) Ebed-Melek kpa Zedekia fai koni eha eyajie Yeremia, eyɛ mli akɛ no kɛ Ebed-Melek wala baawo oshara mli, ejaakɛ lumɛi lɛ  nyɛ̃ɔ Yeremia. Zedekia bo lɛ toi, ni eha Ebed-Melek hii 30 koni amɛyajie Yeremia. Nyɔŋmɔ tsɔ gbalɔ lɛ nɔ ewo Ebed-Melek shi akɛ akpataŋ ehiɛ kɛ́ Babilonbii lɛ bawo Yerusalem he ka. (Yer. 39:15-18) Nyɔŋmɔ wo ekãa ni efee lɛ he nyɔmɔ.

13. Mɛɛ gbɛ nɔ Hebribii etɛ lɛ fee ekãa, ni te wɔɔfee tɛŋŋ wɔná amɛnɔkwɛmɔnɔ lɛ he sɛɛ?

13 Yɛ afi 600 D.Ŋ.B. afii lɛ amli lɛ, Yehowa ha Hebribii etɛ komɛi ni sɔmɔɔ lɛ lɛ na faŋŋ akɛ ejɔɔ mɛi ni jieɔ hemɔkɛyeli kɛ ekãa kpo lɛ. Maŋtsɛ Nebukadnezar bua Babilon hiɛnaanɔbii lɛ fɛɛ naa, ni efã akɛ amɛjá shika amaga kpeteŋkpele ni efee lɛ. Mɔ fɛɛ mɔ ni efeee nakai lɛ, abaashɛ lɛ afɔ̃ la kɛ flɔnɔɔ ni tsoɔ grigri mli. Hebribii etɛ lɛ jɛ bulɛ mli amɛkɛɛ Nebukadnezar akɛ: “Wɔ-Nyɔŋmɔ lɛ ní wɔsɔmɔɔ lɛ aaanyɛ ajie wɔ yɛ la kɛ flɔnɔɔ ní tsoɔ grigri lɛ mli, ni eeejie wɔ yɛ odɛŋ, maŋtsɛ. Shi kɛ́ jeee nakai hu lɛ, maŋtsɛ, ná ole akɛ wɔsɔmɔŋ onyɔŋmɔi lɛ, ni wɔjáŋ shika amaga ní okɛma shi lɛ.” (Dan. 3:16-18) Atsɔɔ gbɛ nɔ ni atsɔ akpɔ̃ Hebribii etɛ lɛ mli fitsofitso yɛ Daniel 3:19-30 lɛ. Eyɛ mli akɛ ekolɛ akɛ wɔ woŋ la kɛ flɔnɔɔ ni tsoɔ grigri mli moŋ, shi wɔkɛ anɔkwayeli he kai kpeɔ, ni wɔbaanyɛ wɔná nɔmimaa akɛ Nyɔŋmɔ baajɔɔ wɔ yɛ wɔhemɔkɛyeli kɛ ekãa lɛ hewɔ.

14. Taakɛ Daniel yitso 6 lɛ tsɔɔ lɛ, mɛɛ gbɛ nɔ Daniel fee ekãa, ni mɛni jɛ mli kɛba?

14 Beni Daniel henyɛlɔi lɛ wo Maŋtsɛ Dario yiŋ ni ewo akpɔ akɛ “mɔ fɛɛ mɔ ní aaabi nyɔŋmɔ loo gbɔmɔ ko nɔ ko, ní jeee bo maŋtsɛ okome kɛkɛ, kɛyashi biɛ gbii nyɔŋmai etɛ lɛ, aaashɛ lɛ afɔ jatai abu lɛ mli” lɛ, Daniel jie hemɔkɛyeli kɛ ekãa kpo. Beni Daniel ná le akɛ maŋtsɛ lɛ kɛ enine ewo akpɔ lɛ shishi lɛ, “eyiŋ kɛtee ewe, ni eŋwɛi pia lɛ he samfɛji ní kwɛɔ Yerusalem lɛ anaa kamɔ, ni ehoɔ ekulaa shi yɛ enakutsei anaa shii etɛ daa gbi, ni esɔleɔ ni edaa shi yɛ e-Nyɔŋmɔ lɛ hiɛ, taakɛ bɔ ni efeɔ sá lɛ.” (Dan. 6:7-11) Akɛ Daniel ekãalɔ lɛ yawo jatai abu lɛ mli—shi Yehowa jie lɛ.—Dan. 6:17-24.

15. (a) Mɛni Akwila kɛ Priskila fee kɛtsɔɔ akɛ amɛyɛ hemɔkɛyeli kɛ ekãa? (b) Mɛni Yesu wiemɔi ni yɔɔ Yohane 13:34 lɛ tsɔɔ, ni mɛɛ gbɛ nɔ Kristofoi pii ejie suɔmɔ nɛɛ kpo?

15 Akwila kɛ Priskila ‘kɛ amɛhe wo gbele mli yɛ Paulo wala hewɔ,’ yɛ shihilɛi komɛi ni atsɔɔɔ yɛ Biblia lɛ mli lɛ amli. (Bɔf. 18:2; Rom. 16:3, 4) Amɛfee ekãa kɛbo Yesu wiemɔi akɛ: “Kitã hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ  hu nyɛsumɔa nyɛhe” lɛ toi. (Yoh. 13:34) Mose Mla lɛ bi ni mɔ asumɔ enaanyo tamɔ lɛ diɛŋtsɛ ehe. (3 Mose 19:18) Shi kita ni Yesu wo lɛ ji kita “hee,” ejaakɛ ebiɔ ni mɔ kɛ ewala aŋmɛ shi aha mɛi krokomɛi, taakɛ lɛ hu efee lɛ. Suɔmɔ eha Kristofoi pii efee ekãa kɛtsɔ ‘amɛhe ni amɛkɛwo gbele mli’ kɛbu amɛnyɛmimɛi héyelilɔi ahe koni henyɛlɔi akafee amɛ niseniianii loo amɛkagbe amɛ lɛ nɔ.—Nyɛkanea 1 Yohane 3:16.

Mra be mli Kristofoi lɛ eŋmɛɛɛ amɛhemɔkɛyeli lɛ he kɛsaaa

16, 17. Mɛɛ hemɔkɛyeli he kaa mra be mli Kristofoi komɛi kɛkpe, ni mɛɛ gbɛ nɔ ŋmɛnɛŋmɛnɛ beaŋ Kristofoi komɛi kɛ shihilɛ ni tamɔ nakai ekpe?

16 Taakɛ Yesu fee lɛ, mra be mli Kristofoi lɛ kɛ ekãa já Yehowa pɛ. (Mat. 4:8-10) Amɛkpoo akɛ amɛaashã tsofa-kɛŋma amɛha Roma nɔyelɔ lɛ. (Kwɛmɔ mfoniri lɛ.) Daniel P. Mannix ŋma yɛ wolo ko (Those About to Die) mli akɛ: “Kristofoi lɛ ateŋ mɛi fioo pɛ shã tsofa-kɛŋma lɛ, eyɛ mli akɛ aha afɔleshaa latɛ ni la tsoɔ yɛ nɔ daa hi shwɛmɔhe lɛ koni amɛkɛfee nakai. Nɔ ni ehe hiaa ni gboklɛfonyo lɛ afee pɛ ji, ni ekɛ tsofa-kɛŋma fioo ashwã la lɛ nɔ, kɛkɛ lɛ aha lɛ Afɔleshaa he Yijiemɔ Wolo, kɛkɛ lɛ aŋmɛɛ ehe. Agbɛnɛ hu, atsɔɔ mli jogbaŋŋ ahaa lɛ akɛ jeee maŋtsɛ lɛ ejáa; shi eekpɛlɛ nyɔŋmɔ ni maŋtsɛ lɛ ji akɛ Roma maŋ lɛ yitso lɛ nɔ kɛkɛ. Ni kɛlɛ, Kristofoi lɛ ateŋ mɛi babaoo eŋɔɔɔ hegbɛ nɛɛ ní amɛkɛye amɛhe.”

17 Aha ŋmɛnɛŋmɛnɛ beaŋ Kristofoi ni awo amɛ tsuŋ yɛ Nazi yiwalɛ nsarai amli lɛ hegbɛ shii abɔ ní amɛkɛ amɛnine awo wolo shishi kɛtsɔɔ akɛ amɛkwa Yehowa, koni no aha amɛye amɛhe kwraa. Shi mɛi fioo pɛ fee nakai. Beni Rwanda ta lɛ yaa nɔ lɛ, Tutsi kɛ Hutu Odasefoi lɛ kɛ amɛwala wo oshara mli kɛbu amɛnyɛmimɛi lɛ ahe. Enɛ fɛɛ biɔ ekãa kɛ hemɔkɛyeli.

KAIMƆ AKƐ YEHOWA KƐ WƆ YƐ!

18, 19. Mɛɛ hemɔkɛyeli kɛ ekãa he nɔkwɛmɔnii ni yɔɔ Biblia lɛ mli baanyɛ aye abua wɔ yɛ wɔshiɛmɔ nitsumɔ lɛ mli?

18 Amrɔ nɛɛ, eji hegbɛ ni wɔná akɛ wɔmiitsu nitsumɔ ni fe fɛɛ—Maŋtsɛyeli lɛ he sane lɛ jajemɔ kɛ kaselɔfeemɔ nitsumɔ lɛ—ni Nyɔŋmɔ kɛha etsuji ni ji adesai lɛ eko. (Mat. 24:14; 28:19, 20) Wɔhiɛ sɔɔ nɔkwɛmɔnɔ ni nɔ bɛ ni Yesu fee lɛ waa! Eyakpa “maji kɛ akrowai amli eshiɛ Nyɔŋmɔ maŋtsɛyeli lɛ he sanekpakpa lɛ etsɔɔ mɛi.” (Luka 8:1) Wɔ hu hemɔkɛyeli kɛ ekãa he miihia wɔ bɔni afee ni wɔnyɛ wɔshiɛ Maŋtsɛyeli lɛ he sane lɛ taakɛ efee lɛ. Yɛ Nyɔŋmɔ yelikɛbuamɔ naa lɛ, wɔbaanyɛ wɔfee ekãa tamɔ Noa, ni ji “jalɛ shiɛlɔ” ni kɛ ekãa shiɛ etsɔɔ “mɛi ni kwa Nyɔŋmɔ lɛ aje lɛ,” ni gboi yɛ nu afua ni ba jeŋ fɛɛ lɛ mli lɛ.—2 Pet. 2:4, 5.

19 Sɔlemɔ haa wɔnyɛɔ wɔshiɛɔ. Beni Kristo sɛɛnyiɛlɔi komɛi ni awaa amɛ yi lɛ sɔle koni amɛnyɛ amɛkɛ ‘ekãa pii ajaje Nyɔŋmɔ wiemɔ lɛ,’ abo amɛ toi. (Nyɛkanea Bɔfoi lɛ Asaji 4:29-31.) Kɛ́ osheɔ gbeyei akɛ obaashiɛ yɛ shĩa kɛ shĩa, ni osɔle obi Yehowa koni eha oná hemɔkɛyeli kɛ ekãa lɛ, ebaabo bo toi.—Nyɛkanea Lala 66:19, 20. *

20. Akɛ Yehowa tsuji lɛ, mɛɛ sɛɛfimɔ wɔyɔɔ?

20 Ebɛ mlɛo akɛ wɔɔfee Nyɔŋmɔ suɔmɔnaa nii yɛ naagbai ni wɔkɛkpeɔ yɛ jeŋ fɔŋ nɛɛ kɛ emli haomɔi babaoo lɛ mli lɛ fɛɛ sɛɛ. Shi wɔle akɛ Nyɔŋmɔ kɛwɔ yɛ. Ni nakai nɔŋŋ e-Bi lɛ, ni ji asafo lɛ Yitso lɛ hu kɛwɔ yɛ. Wɔyɛ nyɛmimɛi Odasefoi ni fa fe 7,000,000 yɛ jeŋ fɛɛ ni miifĩ wɔsɛɛ. Nyɛhaa wɔkɛ amɛ fɛɛ ayaa nɔ ajiea hemɔkɛyeli kpo, ni wɔjaje sanekpakpa lɛ beni afi 2013 afi ŋmalɛ, ni ji: “Wajemɔ ohe ni ofee ekãa. . . . Yehowa, o-Nyɔŋmɔ lɛ, fĩ osɛɛ” lɛ yɔɔ wɔjwɛŋmɔ mli lɛ.—Yosh. 1:9.

^ kk. 19 Obaanyɛ ona ekãa he nɔkwɛmɔnii saŋŋ yɛ February 15, 2012 Buu-Mɔɔ lɛ saneyitso ni ji “Wajemɔ Ohe Ni Ofee Ekãa Jogbaŋŋ” lɛ mli.