Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yesu Ba Ehe Shi ni Ekɛto Okadi Eha Wɔ

Yesu Ba Ehe Shi ni Ekɛto Okadi Eha Wɔ

 Yesu Ba Ehe Shi ni Ekɛto Okadi Eha Wɔ

“Okadi mito miha nyɛ, koni bɔ ni mifee nyɛ nɛɛ, nyɛ hu nyɛfee nakai.”—YOH. 13:15.

TE OBAAHA HETOO OHA TƐŊŊ?

Mɛɛ gbɛ nɔ Nyɔŋmɔ Bi lɛ ba ehe shi dani eba shikpɔŋ lɛ nɔ?

Mɛɛ gbɛ nɔ Yesu ba ehe shi beni eyɔɔ shikpɔŋ lɛ nɔ lɛ?

Mɛni ejɛ Yesu he shi ni eba lɛ mli kɛba?

1, 2. Yɛ naagbee gbɛkɛ ni Yesu ye yɛ shikpɔŋ lɛ nɔ lɛ, mɛni etsɔɔ ebɔfoi lɛ?

YESU kɛ ebɔfoi lɛ ye enaagbee gbɛkɛ yɛ shikpɔŋ lɛ nɔ lɛ yɛ ŋwɛi asa ko nɔ yɛ Yerusalem. Beni amɛyeɔ nii lɛ, Yesu te shi ni ejie etadei lɛ eshwie shi. Ekɛ papaŋ ŋmɔ ehɛ. Kɛkɛ ni efɔse nu ewo okpolu mli, ni ebɔi ekaselɔi lɛ anaji ahe fɔmɔ, ni ekɛ papaŋ ni ŋmɔ ehɛ lɛ tsumɔ. Beni egbe naa lɛ, ekɔlɔ etadei lɛ ewo ekoŋŋ. Mɛni hewɔ Yesu tsu nitsumɔ ni baa shi nɛɛ?—Yoh. 13:3-5.

2 Yesu diɛŋtsɛ tsɔɔ mli akɛ: “Nyɛle nɔ ni mifee nyɛ nɛɛ lo? . . . Agbɛnɛ, kɛji mi, tsɔɔlɔ kɛ Nuŋtsɔ lɛ, mifɔ nyɛnaji ahe lɛ, esa akɛ nyɛ hu nyɛfɔfɔɔ nyɛnanemɛi anaji ahe. Shi okadi mito miha nyɛ, koni bɔ ni mifee nyɛ nɛɛ, nyɛ hu nyɛfee nakai.” (Yoh. 13:12-15) Yesu tsɔ nifeemɔ ni baa shi nɛɛ nɔ etsɔɔ ebɔfoi lɛ nɔ ko ni amɛhiɛ kpaŋ nɔ kɔkɔɔkɔ, ni enɛ baawo amɛ hewalɛ ni amɛba amɛhe shi wɔsɛɛ.

3. (a) Mɛɛ gbɛ nɔ Yesu ma bɔ ni ehe hiaa ni aba he shi lɛ nɔ mi yɛ shihilɛi srɔtoi enyɔ mli? (b) Mɛni he wɔbaasusu yɛ nikasemɔ nɛɛ mli?

3 Jeee be ni Yesu fɔ ebɔfoi lɛ anaji ahe lɛ ji klɛŋklɛŋ be ni etsɔɔ amɛ bɔ ni heshibaa he hiaa ha. Be ko lɛ, ŋwanejee ko bate shi yɛ ebɔfoi lɛ ateŋ yɛ mɔ ni baafee agbo fe fɛɛ yɛ amɛteŋ lɛ he, ni Yesu ŋɔ gbekɛ fioo ko ni ekɛ lɛ badamɔ emasɛi ni ekɛɛ amɛ akɛ: “Mɔ fɛɛ mɔ ni aaaŋɔ gbekɛ fioo nɛɛ yɛ migbɛ́i anɔ lɛ, eŋɔɔ mi; ni mɔ ni aaaŋɔ mi lɛ, eŋɔɔ mɔ ni tsu mi lɛ; ejaakɛ mɔ ni ji bibioo yɛ nyɛ fɛɛ nyɛteŋ lɛ, lɛ nɔŋŋ ji agbo.” (Luka 9:46-48) Akɛni Yesu le akɛ Farisifoi lɛ woɔ amɛhe  nɔ hewɔ lɛ, be ko beni ekɛ amɛ wieɔ lɛ, ekɛɛ amɛ akɛ: “Mɔ fɛɛ mɔ ni woɔ ehe nɔ lɛ, aaaba lɛ shi, ni mɔ ni baa ehe shi lɛ, aaawo enɔ.” (Luka 14:11) Eyɛ faŋŋ akɛ Yesu miisumɔ ni esɛɛnyiɛlɔi lɛ aba amɛhe shi, ni tsɔɔ akɛ, amɛkawo amɛhe nɔ, ni amɛkabu amɛhe akɛ amɛhi fe mɛi krokomɛi. Nyɛhaa wɔsusua bɔ ni Yesu ba ehe shi lɛ he wɔkwɛa, koni wɔkase lɛ. Agbɛnɛ hu, wɔbaana bɔ ni su nɛɛ baanyɛ aye abua mɔ ni jieɔ lɛ kpo lɛ kɛ mɛi krokomɛi hu.

“MIKUUU MISƐƐ”

4. Mɛɛ gbɛ nɔ Nyɔŋmɔ Bi koome lɛ ba ehe shi dani eba shikpɔŋ lɛ nɔ?

4 Nyɔŋmɔ Bi koome lɛ baa ehe shi po dani eba shikpɔŋ lɛ nɔ. Yesu kɛ eŋwɛi Tsɛ lɛ hi shi be kplaŋŋ dani eba shikpɔŋ lɛ nɔ. Yesaia wolo lɛ wie wekukpaa ni kã Bi lɛ kɛ e-Tsɛ lɛ teŋ lɛ he akɛ: “Nuŋtsɔ Yehowa eha mi nikaselɔi alilɛi, koni male bɔ ni mikɛ mɔ ni etɔ lɛ lɛ aaawie yɛ be ni sa mli; etsĩɛɔ mi daa leebi, etsĩɛɔ mitoi, ni mikɛnu nii tamɔ nikaselɔi. Nuŋtsɔ Yehowa egbele mitoi, ni mitseee atua, ni asaŋ mikuuu misɛɛ.” (Yes. 50:4, 5) Nyɔŋmɔ Bi lɛ ba ehe shi, ni ebo nibii ni Yehowa tsɔɔ lɛ lɛ toi jogbaŋŋ. Eesumɔ ni ekase nii kɛjɛ anɔkwa Nyɔŋmɔ lɛ dɛŋ. Eyɛ faŋŋ akɛ, ena bɔ ni Yehowa jɛɔ heshibaa mli enaa adesai eshafeelɔi mɔbɔ lɛ.

5. Mɛɛ gbɛ nɔ Yesu, ni ji bɔfonukpa Mikael lɛ ba ehe shi, ni efeee nɔ ko ni ebɛ hegbɛ akɛ efeɔ beni ekɛ Abonsam taa naa lɛ?

5 Jeee ŋwɛi bɔfoi lɛ fɛɛ jie heshibaa kpo taakɛ Nyɔŋmɔ Bi koome lɛ fee lɛ. Yɛ nɔ najiaŋ ni bɔfo ni batsɔ Satan Abonsam lɛ baakase nii kɛjɛ Yehowa ŋɔɔ, ní eba ehe shi lɛ, ewo ehe nɔ, ni eyasusu akɛ ehi fe mɔ fɛɛ mɔ, ni no ha ete shi ewo Yehowa. Shi Yesu hiɛ sɔ hegbɛ ni eyɔɔ yɛ ŋwɛi lɛ, ni ekɛ hegbɛ nɛɛ tsuuu nii yɛ gbɛ gbonyo nɔ. Yesu, ni ji bɔfonukpa Mikael lɛ efeee nɔ ko kɛtekeee hegbɛ ni eyɔɔ lɛ beni ekɛ Abonsam “taa naa yɛ Mose gbonyo lɛ hewɔ lɛ.” Yɛ no najiaŋ lɛ, Nyɔŋmɔ Bi lɛ ba ehe shi, ni efeee nɔ ko ni ebɛ hegbɛ akɛ efeɔ. Eesumɔ moŋ akɛ etu sane lɛ ewo Yehowa, ni ji Jeŋ Muu Fɛɛ Kojolɔ lɛ dɛŋ, koni lɛ etsu sane lɛ he nii yɛ be ni sa mli, kɛ gbɛ ni sa nɔ.—Nyɛkanea Yuda 9.

6. Mɛɛ gbɛ nɔ kpɛlɛmɔ ni Yesu kpɛlɛ akɛ ebaaba shikpɔŋ lɛ nɔ akɛ Mesia lɛ tsɔɔ akɛ ebaa ehe shi?

6 Ŋwanejee ko bɛ he akɛ, gbalɛi ni kɔɔ bɔ ni Mesia lɛ shihilɛ baaji yɛ shikpɔŋ nɔ lɛ he lɛ fata nibii ni Yesu kase beni eyɔɔ ŋwɛi lɛ he. No hewɔ lɛ, eeenyɛ efee akɛ ele momo akɛ ebaana nɔ. Fɛɛ sɛɛ lɛ, Yesu kpɛlɛ akɛ ebaaba shikpɔŋ nɛɛ nɔ koni agbe lɛ akɛ Mesia ni awo ehe shi lɛ. Mɛni hewɔ? Bɔfo Paulo tsɔɔ bɔ ni Yesu ba ehe shi lɛ mli akɛ, “Nyɔŋmɔ su lɛŋ eyɔɔ moŋ, shi ebuuu egbɔ ní ekɛ Nyɔŋmɔ ye lɛ akɛ nihaa nii; shi moŋ ejie yɛ ehe efɔ̃ shi, eŋɔ tsulɔ su efɔ̃ enɔ, [ni] etsɔ tamɔ gbɔmɔ.”—Fil. 2:6, 7.

“EBA EHE SHI” BENI EJI ADESA LƐ

7, 8. Mɛɛ gbɛ nɔ Yesu ba ehe shi yɛ egbekɛbiiashi kɛ esɔɔmɔ nitsumɔ lɛ mli?

7 Paulo ŋma akɛ: ‘Yesu shihilɛ gbɛfaŋ hu ana lɛ taakɛ gbɔmɔ; eba ehe shi ni ebo toi kɛtee gbele mli, kɛtee sɛŋmɔtso nɔ gbele mli tete.’ (Fil. 2:7, 8) Yesu ba ehe shi kɛjɛ egbekɛbiiashi tɔ̃ɔ, ni ekɛto okadi eha wɔ. Eyɛ mli akɛ Yesu fɔlɔi—Yosef kɛ Maria—yeee emuu moŋ, shi etee nɔ “eba ehe shi eha  amɛ.” (Luka 2:51) Enɛ ji nɔ ko kpakpa ni gbekɛbii baanyɛ akase, ni Nyɔŋmɔ baajɔɔ amɛ kɛji amɛbo amɛfɔlɔi atoi!

8 Beni Yesu da lɛ, eba ehe shi kɛtsɔ Nyɔŋmɔ suɔmɔnaa nii ni ekɛye nɔ ni lɛ diɛŋtsɛ esumɔɔ lɛ hiɛ lɛ nɔ. (Yoh. 4:34) Yesu Kristo kɛ Nyɔŋmɔ gbɛ́i lɛ tsu nii yɛ esɔɔmɔ nitsumɔ lɛ mli, ni etsɔɔ mɛi nɔ Nyɔŋmɔ ni Yehowa ji, kɛ E-yiŋtoi hu. Yesu hi shi yɛ nibii ni etsɔɔ yɛ Yehowa he lɛ hu naa. Ákɛ nɔkwɛmɔnɔ lɛ, beni etsɔɔ bɔ ni asɔleɔ ahaa lɛ, oti ni ewie he klɛŋklɛŋ ji: ‘Wɔtsɛ ni yɔɔ ŋwɛi, ogbɛ́i lɛ he atse.’ (Mat. 6:9) Enɛ tsɔɔ akɛ, Yesu miikɛɛ esɛɛnyiɛlɔi lɛ ní amɛha Yehowa gbɛ́i lɛ hetsemɔ afee nɔ ni he hiaa fe fɛɛ yɛ amɛshihilɛ mli. Lɛ diɛŋtsɛ hu efee nakai. Beni eshwɛ fioo ni Yesu baagbe eshikpɔŋ lɛ nɔ sɔɔmɔ lɛ naa lɛ, ekɛɛ Yehowa yɛ sɔlemɔ mli akɛ: “Mijie ogbɛ́i lɛ kpo mitsɔɔ amɛ, ni masaa majie lɛ kpo matsɔɔ.” (Yoh. 17:26) Kɛfata he lɛ, Yesu ŋɔ yijiemɔ ni jɛ esɔɔmɔ nitsumɔ lɛ mli kɛba lɛ fɛɛ eha Yehowa.—Yoh. 5:19.

9. Mɛni Zakaria gba yɛ Mesia lɛ he, ni te Yesu ha gbalɛ nɛɛ ba mli tɛŋŋ?

9 Zakaria gba yɛ Mesia lɛ he akɛ: “Omli afilio pii, Zion biyoo! Bɔɔ oshe, Yerusalem biyoo! Naa, omaŋtsɛ lɛ miiba oŋɔɔ: jalɔ kɛ yiwalaherelɔ ji lɛ; ebaa ehe shi, ni etá teji nɔ, kɛ teji oblanyo ni ji teji yoo bi ko nɔ.” (Zak. 9:9) Gbalɛ nɛɛ ba mli beni Yesu tee Yerusalem dani aye Hehoo lɛ yɛ afi 33 Ŋ.B. lɛ. Mɛi babaoo kɛ amɛtadei kɛ tsei aniji shwie gbɛ lɛ nɔ. Anɔkwa, maŋ muu lɛ fɛɛ bɔ oshe beni eboteɔ Yerusalem lɛ. Shi beni amɛjieɔ Yesu yi akɛ Maŋtsɛ po lɛ, etee nɔ eba ehe shi.—Mat. 21:4-11.

10. Mɛni anɔkwa ni Yesu ye kɛtee gbele mli lɛ ha ana?

10 Beni Yesu Kristo yɔɔ shikpɔŋ lɛ nɔ lɛ, eba ehe shi ni ebo e-Tsɛ lɛ toi kɛyashi egbo yɛ sɛŋmɔtso lɛ nɔ. Ekɛ enɛ tsɔɔ akɛ adesai baanyɛ aye Yehowa anɔkwa yɛ shihilɛi ni jaraa po amli. Yesu ha ana hu akɛ, nɔ ni Satan wie akɛ adesai  jáa Yehowa yɛ nibii ní amɛbaaná lɛ hewɔ lɛ ji amale. (Hiob 1:9-11; 2:4) Kristo tsɔ e-Tsɛ lɛ toi ni ebo kɛmɔ shi lɛ nɔ etsɔɔ akɛ Yehowa ji mɔ ni sa akɛ eyeɔ jeŋ muu lɛ fɛɛ nɔ, ni ákɛ, enɔyeli lɛ nɔ bɛ. Ekã shi faŋŋ akɛ, Yehowa ná miishɛɛ waa beni ena akɛ e-Bi ni baa ehe shi lɛ eye anɔkwa kɛmɔ shi lɛ.—Nyɛkanea Abɛi 27:11.

11. Mɛɛ hegbɛ Yesu Kristo kpɔmɔ afɔleshaa lɛ haa adesai héyelilɔi náa?

11 Yesu tsɔ egbele yɛ sɛŋmɔtso lɛ nɔ lɛ nɔ ekpɔ̃ adesai kɛjɛ esha kɛ gbele mli. (Mat. 20:28) Enɛ ha adesai ni ji eshafeelɔi lɛ ná hegbɛ akɛ amɛhi shi kɛya naanɔ, ni etsu Yehowa jalɛ taomɔ nii lɛ hu he nii. Paulo ŋma akɛ: “Atsɔ mɔ kome jalɛ nɔ abu gbɔmɛi fɛɛ wala bem.” (Rom. 5:18) Yesu gbele lɛ hewɔ lɛ, Kristofoi ni akɛ mumɔ krɔŋkrɔŋ efɔ amɛ mu lɛ baahi shi kɛya naanɔ yɛ ŋwɛi, ni “tooi krokomɛi” lɛ hu baahi shi kɛya naanɔ yɛ shikpɔŋ lɛ nɔ.—Yoh. 10:16; Rom. 8:16, 17.

“MIBAA MIHE SHI KƐJƐ MITSUI MLI”

12. Mɛɛ gbɛ nɔ Yesu jie heshibaa kɛ mlijɔlɛ kpo yɛ bɔ ni ekɛ adesai ni yeee emuu lɛ ye eha lɛ mli?

12 Yesu fɔ̃ mɛi fɛɛ ni ‘etɔ amɛ ni amɛjatsui fe amɛ lɛ’ nine akɛ amɛba eŋɔɔ. Ekɛɛ akɛ: “Nyɛwoa mipã lɛ nyɛfɔ̃a nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaaná hejɔɔmɔ nyɛaaha nyɛsusumai lɛ.” (Mat. 11:28, 29) Heshibaa kɛ mlijɔlɛ tsirɛ Yesu ni ekɛ adesai ni yeee emuu lɛ ye yɛ mlijɔlɛ mli, ní ekwɛɛɛ hiɛaŋ. Ekpaaa babaoo gbɛ kɛjɛɛɛ ekaselɔi lɛ adɛŋ fe bɔ ni amɛaanyɛ. Yesu jie amɛyi ni ewo amɛ hewalɛ hu. Ehaaa amɛnu he akɛ amɛbɔɔɔ mɔdɛŋ loo amɛhe bɛ sɛɛnamɔ ko. Yesu efeee kpɛŋŋ ni eyitsoŋ hu waaa. Moŋ lɛ, eha esɛɛnyiɛlɔi lɛ le akɛ kɛ́ amɛbɛŋkɛ lɛ, ni amɛkɛ nibii ni etsɔɔ amɛ lɛ tsu nii lɛ, amɛhe baajɔ amɛ ejaakɛ epã lɛ teremɔ waaa, ni ejatsu lɛ hu etsiii. Hii kɛ yei, onukpai kɛ gbekɛbii fɛɛ nyɛ amɛbɛŋkɛ lɛ.—Mat. 11:30.

13. Mɛɛ gbɛ nɔ Yesu musuŋ tsɔ lɛ yɛ mɛi ni bɛ nɔ ko tsɔ lɛ ahe?

13 Akɛni Israelbii ni bɛ nɔ ko tsɔ lɛ anii fee Yesu mɔbɔ hewɔ lɛ, ejɛ suɔmɔ mli eye ebua amɛ. Be ko beni ebɛŋkɛ Yeriko lɛ, ekɛ shwilafo ko ni atsɛɔ lɛ Bartimeo kɛ shwilafo kroko ni atsĩii egbɛ́i tã lɛ kpe. Amɛkpa Yesu fai shii abɔ ni eye ebua amɛ, shi asafo lɛ fã amɛ ni amɛbu amɛnaa. Kulɛ Yesu baanyɛ eku ehiɛ eshwie shwilafoi nɛɛ afaikpamɔ lɛ nɔ. Shi ebi ni akɛ amɛ aba eŋɔɔ, ni emusuŋ tsɔ lɛ yɛ amɛhewɔ, ni egbele amɛhiŋmɛii lɛ.  Hɛɛ, Yesu kase e-Tsɛ Yehowa kɛtsɔ heshibaa kɛ mɔbɔnalɛ kpo ni ejie etsɔɔ adesai eshafeelɔi lɛ nɔ.—Mat. 20:29-34; Mar. 10:46-52.

“MƆ FƐƐ MƆ NI AAABA EHE SHI LƐ, AAAWO ENƆ”

14. Mɛni ejɛ Yesu he shi ni eba lɛ mli kɛba?

14 Bɔ ni Yesu Kristo baa ehe shi lɛ haa mɛi náa miishɛɛ kɛ jɔɔmɔi babaoo. Yehowa mli fili lɛ akɛni esuɔmɔ Bi lɛ bo lɛ toi lɛ hewɔ. Yesu bɔfoi lɛ kɛ ekaselɔi lɛ fɛɛ atsui nyɔ amɛmli yɛ bɔ ni emli jɔ ni ebaa ehe shi lɛ hewɔ. Nɔkwɛmɔnɔ kpakpa ni efee, bɔ ni etsɔɔ nii eha, kɛ bɔ ni ejɛ suɔmɔ mli ejie amɛyi lɛ ye ebua amɛ ni amɛtee amɛhiɛ waa yɛ mumɔŋ. Yesu ye ebua mɛi krokomɛi hu kɛtsɔ nibii ni etsɔɔ amɛ, hewalɛ ni ewo amɛ, kɛ nibii ni he hiaa amɛ ni eha amɛ lɛ nɔ. Yɛ anɔkwale mli lɛ, Yesu kpɔ̃mɔ afɔleshaa lɛ hewɔ lɛ, adesai fɛɛ ni náa emli hemɔkɛyeli lɛ baaná jɔɔmɔi kɛya naanɔ.

15. Te Yesu ná ehe shi ni eba lɛ he sɛɛ eha tɛŋŋ?

15 Ni Yesu hu? Ani ená ehe shi ni eba lɛ he sɛɛ? Hɛɛ, ejaakɛ ekɛɛ ekaselɔi lɛ akɛ: “Mɔ fɛɛ mɔ ni aaaba ehe shi lɛ, aaawo enɔ.” (Mat. 23:12) Wiemɔi nɛɛ ba mli yɛ Yesu diɛŋtsɛ gbɛfaŋ. Paulo kɛɛ akɛ: “Nyɔŋmɔ wó [Yesu nɔ] gojoo, ni eduro lɛ gbɛ́i ní tá gbɛ́i fɛɛ gbɛ́i nɔ, koni mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ kɛ mɛi ni yɔɔ shikpɔŋ lɛ shishi lɛ anakutso fɛɛ nakutso akula shi yɛ Yesu gbɛ́i lɛ amli, ní lilɛi fɛɛ lilɛi agbá mli kpoo ákɛ Yesu Kristo ji Nuŋtsɔ kɛwo tsɛ Nyɔŋmɔ lɛ hiɛ nyam.” Akɛni Yesu ba ehe shi ni eye anɔkwa beni eyɔɔ shikpɔŋ lɛ nɔ lɛ hewɔ lɛ, Yehowa Nyɔŋmɔ wó enɔ gojoo, loo ewo ehiɛ nyam, ni eha lɛ hegbɛ yɛ mɛi ni yɔɔ ŋwɛi kɛ shikpɔŋ lɛ nɔ fɛɛ lɛ nɔ.—Fil. 2:9-11.

YESU BAATA ‘OKPƆŊƆ NƆ YƐ ANƆKWALE KƐ HESHIBAA HEWƆ’

16. Mɛni tsɔɔ akɛ Nyɔŋmɔ Bi lɛ baaya nɔ aba ehe shi yɛ enifeemɔi fɛɛ mli?

16 Nyɔŋmɔ Bi lɛ baaya nɔ eba ehe shi yɛ enifeemɔi fɛɛ mli. Beni lalatsɛ lɛ gbaa bɔ ni Yesu kɛ ehenyɛlɔi lɛ baaye eha beni awó enɔ gojoo yɛ ŋwɛi lɛ he lɛ, elá akɛ: ‘Yaaye kunim yɛ ogbojee lɛ mli; Ta okpɔŋɔ nɔ yɛ anɔkwale kɛ heshibaa kɛ jalɛ hewɔ.’ (Lala 45:5) Yesu Kristo baawu eha anɔkwafoi, jalɔi, kɛ heshibalɔi yɛ Harmagedon. Ni mɛni baaba yɛ Mesia Maŋtsɛ lɛ Afii Akpe Nɔyeli lɛ naagbee, beni efo “nɔyeli fɛɛ kɛ hegbɛ fɛɛ kɛ hewalɛ fɛɛ sɛɛ” lɛ? Ani ebaaya nɔ eba ehe shi? Hɛɛ, ejaakɛ “eeeŋɔ maŋtsɛyeli lɛ eha Nyɔŋmɔ kɛ tsɛ lɛ.”—Nyɛkanea 1 Korintobii 15:24-28.

17, 18. (a) Mɛni hewɔ esa akɛ Yehowa tsuji akase bɔ ni Yesu ba ehe shi lɛ? (b) Mɛɛ sanebimɔi ahe abaasusu yɛ nikasemɔ ni nyiɛ sɛɛ lɛ mli?

17 Ni wɔ hu? Ani wɔbaakase Yesu nɔkwɛmɔnɔ lɛ ni wɔba wɔhe shi? Te nibii anaa baayakpa aha wɔ tɛŋŋ beni Maŋtsɛ Yesu Kristo kpataa mɛi ahiɛ yɛ Harmagedon lɛ? Yesu baahere mɛi ni baa amɛhe shi, ni amɛfeɔ jalɛ nii lɛ pɛ ayiwala. No hewɔ lɛ, kɛ́ wɔmiitao ni ahere wɔyiwala lɛ, esa akɛ wɔba wɔhe shi. Agbɛnɛ hu, kɛ́ wɔba wɔhe shi lɛ, wɔ kɛ mɛi krokomɛi baaná jɔɔmɔi babaoo taakɛ Yesu Kristo ná lɛ.

18 Mɛni baaye abua wɔ ni wɔkase bɔ ni Yesu ba ehe shi lɛ? Te wɔɔfee tɛŋŋ wɔba wɔhe shi beni wɔkɛ shihilɛ ni jaraa ekpe? Abaaha sanebimɔi nɛɛ ahetoo yɛ nikasemɔ ni nyiɛ sɛɛ lɛ mli.

[Nikasemɔ lɛ he Sanebimɔi]

[Mfonirii ni yɔɔ baafa 12]

Te wɔɔfee tɛŋŋ wɔná Yesu heshibaa lɛ he sɛɛ?

[Mfoniri ni yɔɔ baafa 13]

Esa akɛ wɔkase bɔ ni Yesu jie musuŋtsɔlɛ kpo lɛ