Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

‘No Ji Sane ni Hi Fe Fɛɛ ni Anu Pɛŋ’

‘No Ji Sane ni Hi Fe Fɛɛ ni Anu Pɛŋ’

 Ajie Kɛjɛ Wɔnitoohe Lɛ

‘No Ji Sane ni Hi Fe Fɛɛ ni Anu Pɛŋ’

GEORGE NAISH kɛ enine tsɔɔ tsei wuji komɛi ni kɛlɛmɔ ji mitai 18 ni abua naa yɛ he ni akɛ tawu nibii toɔ yɛ Saskatoon, ni yɔɔ Saskatchewan, yɛ Canada lɛ, ni ebi akɛ, “Mɛni akɛ enɛɛmɛi fɛɛ yaafee?” Akɛɛ lɛ akɛ akɛ tsei nɛɛ mamɔ tsũi ni atsɔɔ nɔ akɛ adafitswaa haa beni awuɔ Jeŋ Ta I. Sɛɛ mli lɛ Nyɛminuu Naish wie akɛ: “Mina akɛ wɔbaanyɛ wɔkɛ nakai tsei lɛ afee poolu tsei kɛha redio steshɛŋ, kɛkɛ ni wɔna akɛ esa akɛ aná redio steshɛŋ ni akɛbaagbɛ Biblia mli anɔkwalei lɛ ashwã.” Enɔ afi nɔŋŋ—yɛ afi 1924—lɛ, aná redio steshɛŋ ni ji CHUC. Enɛ fata klɛŋklɛŋ redio steshɛŋ ni wieɔ jamɔ saji ahe yɛ Canada lɛ ahe.

Canada, ni dalɛ miihe ashɛ Yuropa lɛ ji he ko ni sa jogbaŋŋ kɛha redio nɔ odaseyeli. Florence Johnson, ni tsu nii yɛ Saskatoon redio steshɛŋ lɛ wie akɛ, “Redio steshɛŋ lɛ ye ebua ni mɛi babaoo ni kulɛ wɔnyɛŋ wɔya amɛŋɔɔ lɛ nu anɔkwale lɛ.” Ekɛfata he akɛ: “Akɛni kpaako redio eba nɔ hewɔ lɛ, mɔ fɛɛ mɔ sumɔɔ akɛ ebo nɔ fɛɛ nɔ ni awieɔ yɛ nɔ lɛ toi.” Beni shɛɔ afi 1926 lɛ, Biblia Kaselɔi lɛ (taakɛ atsɛɔ Yehowa Odasefoi yɛ nakai beaŋ lɛ) miishiɛ yɛ amɛ diɛŋtsɛ amɛredio steshɛŋ nɔ yɛ Canada maji srɔtoi ejwɛ amli. *

Kɛ́ ogbele redio steshɛŋ nɛɛ eko lɛ, mɛni obaanu? Bei pii lɛ obaanu ni lalɔi akuu ko ni jɛ asafo ni yɔɔ nakai maŋ lɛ nɔ lɛ miila, ni aatswa saŋkui hu. Shi nyɛmimɛi lɛ haa wiemɔ ni amɛgbaa Biblia mli saji yɛ redio lɛ nɔ hu. Amy Jones, ni no mli lɛ efata mɛi ni gbaa Biblia mli saji lɛ ahe lɛ wie akɛ, “Bei komɛi kɛ́ minyiɛ shiɛmɔ nɔ ní mitsɛ migbɛ́i mitsɔɔ shĩatsɛmɛi lɛ, amɛteŋ mɛi komɛi kɛɔ akɛ, ‘Oo, minu ohe yɛ redio lɛ nɔ.’”

Biblia Kaselɔi ni yɔɔ Halifax, yɛ Nova Scotia lɛ kɛ gbɛjianɔtoo ko ni kpaako eba nɔ yɛ nakai beaŋ lɛ tsu nii—redio nɔ sanegbaa ní toibolɔi baanyɛ atswa ni amɛbi Biblia mli saji. Nyɛmi nuu ko ŋma akɛ: “Mɛi nya gbɛjianɔtoo nɛɛ he waa. Mɛi ni  tswaa lɛ ayi fa aahu akɛ wɔnyɛɛɛ wɔbo amɛ fɛɛ toi.”

Taakɛ ebalɛ yɛ bɔfo Paulo gbɛfaŋ lɛ, mɛi komɛi bo Biblia Kaselɔi lɛ asane lɛ toi, shi mɛi komɛi booo toi. (Bɔf. 17:1-5) Toibolɔi komɛi nya wiemɔ lɛ he waa. Akɛ nɔkwɛmɔnɔ lɛ, beni Hector Marshall nu ni Biblia Kaselɔi lɛ tsĩ Studies in the Scriptures wolo lɛ tã yɛ redio lɛ nɔ lɛ, eshɛ kpoi ekpaa lɛ fɛɛ. Sɛɛ mli lɛ eŋma akɛ: “Misusu akɛ woji lɛ baaye abua mi ni matsɔɔ gbekɛbii anii yɛ sɔlemɔ daa Hɔgbaa leebi.” Shi beni Hector kane Kpo I lɛ egbe naa lɛ, ekpɛ eyiŋ akɛ ebaashi esɔlemɔ lɛ. Ebatsɔ shiɛlɔ ni yɔɔ ekãa, ni etee nɔ esɔmɔ Yehowa kɛyashi egbo yɛ afi 1998. Beni aha maŋshiɛmɔ ni ji “The Kingdom, the Hope of the World” lɛ yɛ redio lɛ nɔ yɛ Nova Scotia bokagbɛ lɛ, enɔ jetsɛremɔ lɛ, nuu ko ni atsɛɔ lɛ Colonel J. A. MacDonald lɛ kɛɛ nyɛmi nuu ko ni yɔɔ jɛmɛ lɛ akɛ: “Mɛi ni yɔɔ Cape Breton Island lɛ nu sane ko, ni no ji sane ni hi fe fɛɛ ni anu pɛŋ yɛ biɛ.”

Shi osɔfoi lɛ amli fu. Katolikbii komɛi ni yɔɔ Halifax lɛ kɛɛ amɛbaafite redio steshɛŋ ni haa Biblia Kaselɔi lɛ bashiɛɔ yɛ nɔ lɛ. Jamɔŋ hiɛnyiɛlɔi lɛ wo nɔyeli lɛ yiŋ, no hewɔ lɛ yɛ afi 1928 lɛ, nɔyeli lɛ tswa adafi trukaa akɛ eŋmɛŋ Biblia Kaselɔi lɛ gbɛ dɔŋŋ ni amɛya nɔ amɛkɛ amɛ diɛŋtsɛ amɛredio steshɛŋ lɛ atsu nii. Enɛ hewɔ lɛ, nyɛmimɛi lɛ kala wolo ko ni yitso ji Who Owns the Air? lɛ ni amɛjara. Fɛɛ sɛɛ lɛ, nɔyeli lɛ eŋmɛɛɛ Biblia Kaselɔi lɛ gbɛ ni amɛkɛ amɛredio steshɛŋ lɛ atsu nii.

Ani enɛ gbe Yehowa tsuji akuu fioo ni yɔɔ Canada nɛɛ mumɔ? Nyɛmi yoo ko ni atsɛɔ lɛ Isabel Wainwright lɛ wie akɛ: “Shishijee lɛ, efee tamɔ nɔ ni henyɛlɔ lɛ eye kunim.” Ekɛfata he akɛ: ‘Shi mile akɛ, eji Yehowa miisumɔ ni wɔya nɔ wɔkɛ redio atsu nii kulɛ, ebaatsĩ amɛnaa. No hewɔ lɛ, eeenyɛ efee akɛ eetao wɔtsɔ gbɛ kroko ni mɔɔ shi nɔ wɔgbɛ Maŋtsɛyeli sanekpakpa lɛ wɔshwã.’ Yɛ nɔ najiaŋ ni Biblia Kaselɔi ni yɔɔ Canada lɛ kɛ amɛhe aaafɔ̃ redio nɔ odaseyeli nɔ lɛ, amɛtee mɛi aŋɔɔ yɛ amɛshĩai amli. Shi be mli ni akɛ redio tsuɔ nii lɛ, eye ebua waa ni ajaje ‘sane ni hi fe fɛɛ ni anu pɛŋ’ lɛ.—Ajie kɛjɛ wɔnitoohe ni yɔɔ Canada lɛ.

[Shishigbɛ niŋmaa]

^ kk. 4 Nyɛmimɛi ni yɔɔ Canada lɛ yawoɔ nyɔmɔ koni amɛnyɛ amɛshiɛ yɛ redio steshɛŋ krokomɛi ni jeee asafo lɛ nɔ lɛ anɔ.

[Mfonirii ni yɔɔ baafa 32]

(1) Steshɛŋ ni yɔɔ Edmonton, yɛ Alberta lɛ (2) Nyɛmi nuu ko ni miitsu nii yɛ redio nitsumɔhe ni yɔɔ Toronto, yɛ Ontario lɛ

[Mfoniri ni yɔɔ baafa 32]

(3) CHUC redio nitsumɔhe ni Saskatoon, yɛ Saskatchewan lɛ

[Wiemɔ ni akɔ ni akɛmiitsu nii ni yɔɔ baafa 32]

“Mɛi ni tswaa lɛ ayi fa aahu akɛ wɔnyɛɛɛ wɔbo amɛ fɛɛ toi”