Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

“Mishwelɛ lɛ Eba Mli”

“Mishwelɛ lɛ Eba Mli”

 “Mishwelɛ lɛ Eba Mli”

Afii 15 ni eho nɛ lɛ, Emilia sɔmɔ akɛ daa gbɛgbalɔ. Shi ehe bahia ni ekɛ be fɛɛ sɔɔmɔ nitsumɔ lɛ aŋmɛ shi. Yɛ nyɛsɛɛ afii nɛɛ amli lɛ, efɔɔ miishɛɛ ni enáa yɛ nakai beaŋ lɛ he susumɔ, ni eeshwe akɛ ebatsɔ gbɛgbalɔ ekoŋŋ.

Shi Emilia heloonaa nitsumɔ lɛ heɔ ebe babaoo, ni gbɛtsii nii nɛɛ haaa ená miishɛɛ. Be ko lɛ, ewie yɛ enanemɛi nitsulɔi lɛ ahiɛ akɛ: “Mináa kulɛ mikɛ ŋmɛlɛtswai fioo pɛ baatsu nii!” Onukpa ni etsuɔ nii yɛ eshishi lɛ nu nɔ ni ewieɔ lɛ, ni eyabi lɛ kɛji eyɛ mli anɔkwale. Emilia ha ele akɛ eji anɔkwale. Shi dani abaaŋmɛ lɛ gbɛ lɛ, ja onukpai ni fe fɛɛ ni kwɛɔ nitsumɔ lɛ nɔ lɛ eko ekpɛlɛ nɔ dã, ejaakɛ nitsumɔ lɛ mla biɔ ni nitsulɔi atsu nii gbi muu fɛɛ. Wɔnyɛmi yoo lɛ saa ehe koni ekɛ onukpa lɛ ayakpe, ni esɔle koni enyɛ eto etsui shi ni ekɛ ekãa awie.

Beni kpee lɛ yaa nɔ lɛ, Emilia jɛ bulɛ mli ekɛ ekãa bi koni atse ŋmɛlɛtswai abɔ ni ekɛtsuɔ nii lɛ nɔ. Etsɔɔ mli akɛ be fɛɛ be ni etsuuu nii lɛ, ekɛ nakai be lɛ yayeɔ ebuaa mɛi krokomɛi, ni ekɛshi sɛɛ akɛ: “Yehowa Odasefonyo ji mi, ni miyeɔ mibuaa mɛi koni amɛbale Nyɔŋmɔ. Ŋmɛnɛ lɛ, mɛi babaoo ajeŋba efite kwraa. Ehe miihia ni atsɔɔ amɛ nɔ ni ja kɛ nɔ ni ejaaa, ni Biblia mli nilee ni mikɛhaa amɛ lɛ yeɔ ebuaa amɛ waa. Misumɔɔɔ akɛ nibii ni mifeɔ beni mitsuuu nii lɛ saa bɔ ni mitsuɔ nii mihaa yɛ biɛ lɛ he, shi miisumɔ ni maná bei babaoo ni mikɛye mabua mɛi. No hewɔ ni mitaoɔ ni atse bei ni mikɛtsuɔ nii lɛ nɔ lɛ.”

Onukpa lɛ bo lɛ toi diŋŋ, ni ekɛɛ lɛ akɛ be ko ni eho lɛ kulɛ lɛ hu eetao eyatsu nii akɛ mɔ ko ni yeɔ ebuaa mɛi. Ni ekɛɛ hu akɛ: “Yɛ nɔ ni owie lɛ hewɔ lɛ, efeɔ mi akɛ maŋmɛ bo gbɛ. Shi ani ole akɛ abaatse onyɔmɔwoo lɛ nɔ?” Emilia kɛɛ ele nakai, ni ákɛ kɛ́ ebaahi lɛ, ebaaha eshihilɛ afee mlɛo. Ekɛfata he akɛ: “Oti ni fe fɛɛ ni mikɛma mihiɛ ji, ní mafee nɔ ko ni baaha mɛi aná miishɛɛ.” Onukpa lɛ kɛɛ lɛ akɛ: “Mináa mɛi ni jɛɔ amɛsuɔmɔ mli amɛkɛ amɛbe yeɔ amɛbuaa mɛi krokomɛi lɛ ahe miishɛɛ waa.”

Aŋmɛko nitsulɔ ko gbɛ yɛ nakai nitsumɔhe lɛ ní ekɛ ŋmɛlɛtswai fioo ko atsu nii dã. Amrɔ nɛɛ aŋmɛɔ Emilia gbɛ ni etsuɔ nii gbii ejwɛ yɛ otsi mli. Nɔ ni fee lɛ naakpɛɛ fe fɛɛ ji akɛ, aŋmɛ enyɔmɔwoo lɛ nɔ, ni no ha shika ni enáa lɛ bafee tamɔ etsutsu nyɔmɔwoo lɛ nɔŋŋ! Ekɛɛ akɛ: “Mishwelɛ lɛ eba mli, ni manyɛ mikɛ mihe awo gbɛgbamɔ nitsumɔ lɛ mli ekoŋŋ!”

Ani osusu he akɛ obaato oshihilɛ he gbɛjianɔ koni obɔi gbɛgbamɔ nitsumɔ lɛ loo osaa okɛ ohe awo mli ekoŋŋ?

[Wiemɔ ni akɔ ni akɛmiitsu nii ni yɔɔ baafa 32]

Onukpa lɛ kɛɛ lɛ akɛ: “Mináa mɛi ni jɛɔ amɛsuɔmɔ mli amɛkɛ amɛbe yeɔ amɛbuaa mɛi krokomɛi lɛ ahe miishɛɛ waa”